အခန်း (၁၄၈)

ဒီလူက တကယ့်ကို လူကြီးမင်းအစစ်အမှန်ပဲ

စုယန်ယန်သည် အံ့အားသင့် သွားမိကာ ဤကြည့်ရှုသူသည် မကြာသေးမီက အင်တာနက်ပေါ်တွင် သူမအတွက် ဝမ်ကျင့်ဖျင်ကို ဆူပူကြိမ်းမောင်းခဲ့သော ဆေးဝါးဌာနက ပါမောက္ခအိုကြီး ဖြစ်ကြောင်း လျင်မြန်စွာ နားလည် သဘောပေါက် သွားခဲ့သည်။

ဒီမက်ဆေ့ချ်ကိုမြင်ပြီး တိုက်ရိုက် ထုတ်လွှင့်မှုအခန်းရှိ အခြားကြည့်ရှုသူ များသည် ဒီအကြောင်းအား စတင်ဆွေးနွေးခဲ့ကြသည်။

[တက္ကသိုလ်အေက ဆေးဝါးဌာနမှုးလား။ သူက လုံးဝကို သာလွန်တဲ့ သူဌေးကြီး တစ်ယောက်လား။ သူ့အသံက တော်တော် ကြောက်ဖို့ ကောင်းတယ်။ သူ့အကြောင်းသိတဲ့ သူငယ်ချင်းတို့ ရှိကြလား။]

[ငါ၊ ငါ၊ ငါ၊ ငါက တက္ကသိုလ်အေက ဆေးဝါးဌာနမှ ကျောင်းသား တစ်ယောက်ပါ၊ ငါတို့ရဲ့ဌာနမှုးက ငါတို့နယ်ပယ်ရဲ့ ပါရမီရှင် တစ်ယောက်ပဲ။ ဒီနေရာမှာ သူ့ရဲ့ အောင်မြင်မှုတွေကို စာရင်းပြုစုပြဖို့ အနည်းငယ် ခက်ခဲတယ်။ မင်းတို့ သိချင်ရင် ‘ယဲ့ချီလျန့်’လို့ ရိုက်ရှာကြည့် နိုင်ပါတယ်၊ မင်းတို့ရဲ့ ရှာဖွေတွေ့ရှိမှုကို မင်းတို့ အံ့အားသင့် သွားကြလိမ်မ့ယ်။]

သူ့မှတ်ချက်ကြောင့် လူအများအပြားဟာ သွားရောက် ရှာဖွေခဲ့ကြသည်။ သူတို့သည် မျက်စိကန်းလုမတတ် ယဲ့ချီလျန့်၏ အောင်မြင်မှုများ၊ ဆုများနှင့် ဘွဲ့တွေကို ဆက်တိုက် တွေ့ရှိခဲ့ကြသည်။

[ဝိုး... အရမ်း အံ့သြဖို့ကောင်းတာပဲ။ ဒါက တကယ့်ကို သာလွန်တဲ့ လူကြီးမင်း အစစ်အမှန်ပဲ။]

[ဟားဟားဟား... ဒီလူကြီးမင်းက အများသူငှာ ပလက်ဖောင်းပေါ်မှာ လိမ်ညာတတ်ပြီး အရှက်မရှိတဲ့ ဟိုအမျိုးသမီး တင်ဆက်သူကို ဆူပူကြိမ်းမောင်း ထားတာကို ငါ မြင်လိုက်ရတယ်။ သူ့ရဲ့ စကားလုံး အသုံးအနှုန်းနဲ့ အရှိန်အဟုန်က ငါ့ကို အမှန်တကယ် စိတ်လှုပ်ရှား စေတယ်။ သူက အရမ်းမိုက်တာပဲ။ ပါမောက္ခအိုကြီးရဲ့ ပို့စ်အောက်မှာ ဟိုအမျိုးသမီးရဲ့ အသေခံ ပရိသတ်တွေနဲ့ ရေတပ်တွေ အများကြီး ရောက်ရှိ လာခဲ့ကြပြီး၊ ပါမောက္ခအိုကြီးကို သူတို့က အကြောက်အလန့်မရှိ ဆူပူကြိမ်းမောင်း ထားတာကို တွေ့ရတာ အနည်းငယ် သနားဖို့ ကောင်းပါတယ်။]

ယဲ့ချီလျန့်သည် ပညာရှင်တစ်ဦး ဖြစ်သော်လည်း နောက်ကွယ်တွင် နှိမ်နှိမ်ချချ နေတတ်သဖြင့် လူသူသိပ်မသိကြပေ။

ဝမ်ကျင့်ဖျင်၏ ပရိသတ်များနှင့် ရေတပ်တို့က သူ့ကို တစ်ခါမှ မကြားဖူးခဲ့ကြပေ။ သူတို့က ဒီအကောင့်ဟာ လူကြိုက်များသော စျေးကွက် ရှာဖွေရေး အကောင့်တစ်ခု ဟုသာ မှတ်ထင်ခဲ့ကြပြီး သူ့ကို သူတို့ တိုက်ခိုက်လျှင် ပြီးသွားမည်ဟု ထင်ခဲ့ကြသည်။

သူတို့သည် သတိမထားမိပဲ နောက်ထပ် မထိသင့်တဲ့လူကို မတော်တဆ ထိမိသွားခဲ့သည်။

[ဟားဟား...ဟားဟား... အဲ့တာကြောင့် သူတို့ကို အသေခံ ပရိသတ်လို့ ခေါ်ကြတာ မဟုတ်လား။ ဆေးဖက်ဆိုင်ရာ နယ်ပယ်ကို မရေမတွက်နိုင်အောင် အကျိုးပြုခဲ့တဲ့ ဒီလို လူကြီးမျိုးကိုတောင် သတိမမူမိစွာ တိုက်ခိုက်ကြခဲ့တယ်။ ဒီလူအုပ်စုက အကုသိုလ်ဆိုတာ ဘာကိုခေါ်မှန်း နားမလည်မှာတောင် စိုးရွံ့မိတယ်။]

[တင်ဆက်သူရဲ့ အချက်အပြုတ် ပါဝင်ပစ္စည်းတွေက ဒီလူကြီးမင်းကို ဆွဲဆောင် နိုင်ခဲ့တာလို့ ထင်နေတာ ငါတစ်ယောက်တည်းလား။ ဒါဆိုရင် တင်ဆက်သူ အရင်က ပြောနေတာတွေက အစစ်အမှန်တွေပေါ့။ သူမ ချက်ပြုတ်ထားတဲ့ ဟင်းလျာတွေက ရောဂါဝေဒနာတွေကို တကယ်ပဲ ကုသနိုင်တာလား။]

[!!!]

ထိုစာတစ်ကြောင်းတည်းက ကြည့်ရှုသူတွေကြား ကြီးမားတဲ့ တုံ့ပြန်မှုကို ဖြစ်ပေါ်စေခဲ့သည်။ ရောဂါဝေဒနာတွေကို ဟင်းလျာများ စားသောက်ခြင်းဖြင့် ‌ကုသပေးနိုင်တယ် ဆိုတာက သူများတွေ ဘယ်လောက်ပဲ ထောက်ခံထောက်ခံ ကိုယ်တိုင်ကိုယ်ကျ မစားသုံးဖူးသော သူများအတွက်မူ ဒါနှင့် ပတ်သက်ပြီး သံသယ အမြဲရှိနေမှာပါပဲ။

သို့သော် ဤအခြေအနေမျိုးတွင် တရားဝင် စည်းတံဆိပ် တစ်ခု လိုအပ်ပါတော့မလား။

ဖန်သားပြင်ပေါ်တွင် မှတ်ချက် အမြောက်အမြား လျင်မြန်စွာ ထွက်ပေါ် လာခဲ့တာကို စုယန်ယန် တွေ့လိုက်ရသည်။ အထူးသဖြင့် ထိုမှတ်ချက် ရေးသားသူများဟာ သူမဘက်မှ ရပ်တည်ပြီး ရေတပ်များနှင့် အသေခံ ပရိသတ်တွေကို တိုက်ခိုက် ပေးခဲ့သူများ ဖြစ်ကြသည်။

“အိုး၊ ဒါဆိုရင် ဒါက ပါမောက္ခယဲ့ပေါ့။ ကျွန်မဘက်ကနေ ပြောပေးတဲ့ အတွက် ကျေးဇူးပါ၊ ပါမောက္ခယဲ့။ ကျွန်မကြောင့် ပါမောက္ခယဲ့ အင်တာနက်ပေါ်တွင် အတိုက်ခိုက် ခံရတဲ့အတွက် စိတ်မကောင်း ဖြစ်မိပါတယ်။ ကျွန်မရဲ့ တိုက်ရိုက် ထုတ်လွှင့်မှုမှာ အသုံးပြုခဲ့တဲ့ အချို့သော ပါဝင် ပစ္စည်းတွေဟာ ရှေးခေတ် ဆေးစာအုပ်တွေမှာ မှတ်တမ်း တင်ထားတဲ့ တရုတ်ဆေးဖက်ဝင် အပင်တွေ အမှန်ပါပဲ”

[ငါ သူတို့ကို ကြည့်လို့ ရမလား။]

စုယန်ယန်သည် ဒီပါမောက္ခအိုကြီး၏ ကြင်နာမှုကြောင့် အလွယ်တကူ သဘောတူခဲ့သည်။ “ဒါပေါ့၊ ပါမောက္ခကြီး ကြည့်နိုင်ပါတယ်။ ကျွန်မရဲ့ တိုက်ရိုက် ထုတ်လွှင့်မှုမှာ အသုံးပြုတဲ့ ပါဝင်ပစ္စည်းတွေ အားလုံးကို လူအများ ကြည့်ရှုနိုင်ပါတယ်”

ထိုသို့ပြောရင်း စုယန်ယန်သည် သူမ အသုံးပြုနေသည့် တရုတ်ဆေးဖက်ဝင် အပင်များကို ကင်မရာရှေ့သို့ တွန်းကာ ပြသလိုက်သည်။

သူတို့တွေကတော့ ဖူးလင်မှို၊ တန့်ရှန်း၊ ဟွမ်းချီ၊ ရှီးပတီးတို့ပင်...

ယဲ့ချီလျန့်သည် ဒီတိုက်ရိုက် ထုတ်လွှင့်မှု အခန်းတွင် ဂျင်ဆင်း ကဲ့သို့သော တရုတ်ဆေးဖက်ဝင် အပင်များသာ ရှိလိမ့်မည်ဟု ထင်ခဲ့သော်လည်း ယခင် မှတ်တမ်း မှတ်ရာများတွင်သာ ရှိခဲ့သော အခြားဆေးဖက်ဝင် အပင်များကို တွေ့လိုက်ရသောအခါ သူ စိတ်လှုပ်ရှားလွန်း သွားသဖြင့် အသက်ရှူ မဝသလို ဖြစ်သွားခဲ့ကာ သူ့လက်များပင် တုန်ယင်သွားခဲ့သည်။

သူတို့၏ အစစ်အမှန်ကဲ့သို့ မြင်ရသည့် ရုပ်ပုံများကို အချိန်အတော်ကြာ လေ့လာပြီးနောက် ဒီပါဝင်ပစ္စည်းများကို မြည်းစမ်းကြည့်ရန် အနံ့အရသာ ဖန်ရှင်ကို ဖွင့်လိုက်ပြီး ယဲ့ချီလျန့်သည် ဒီအရာများက သူ့မိသားစု မျိုးရိုးစဉ်ဆက် အမွေဆက်ခံခဲ့သည့် ဆေးစာအုပ်မှာ မှတ်တမ်းတင် ထားခဲ့သည့် ဆေးဖက်ဝင် အပင်များဖြစ်ကြောင်း အတည်ပြုခဲ့မိသည်။

သူ့မျက်လုံးတွေ အနည်းငယ် ပူနွေးလာသလို ခံစားရကာ မက်ဆေ့ချ် တစ်စောင်ကို တုန်ယင်စွာ စာရိုက်လိုက်သည်။

[မင်းရဲ့ အရင်က တိုက်ရိုက် ထုတ်လွှင့်မှုမှာ ပြသခဲ့တဲ့ ဂျင်ဆင်းကို ငါ့ကို ပြသပေးနိုင်မလား။]

“ဟုတ်ကဲ့၊ ပြပေးနိုင်ပါတယ်”

စုယန်ယန်သည် သူ၏ တောင်းဆိုချက်ကို မငြင်းပယ်ပဲ ဗီရိုအောက်ခြေမှာ သိမ်းဆည်းထားသည့် ဧရာမ ဂျင်ဆင်းပင်အား ထုတ်ပြလိုက်သည်။

ယဲ့ချီလျန့်သည် ဒါကို မြင်တွေ့ လိုက်ရသောအခါ နေရာ၌ပင် နှလုံးဖောက်လုမတတ် စိတ်လှုပ်ရှားသွားခဲ့သည်။

***

Prev Next