Welcome To MM Storyteller
LOGIN
အခန်း (၃၅၂) - ဆရာဝန် ဟုခေါ်သည်
မူရင်းစာအုပ်တွင် ဖော်ပြထားသော
ရှင်းပြချက်မှာ လောဝေပင်းအား သူမ၏ နီရဲနေသော မျက်လုံးများအကြောင်း ဘယ်လိုရှင်းပြရမည်ကို
မသိခဲ့ပေ။
မီဒီယာတွေက သူမရဲ့ နီရဲနေသော
မျက်လုံးများကို မြင်သောအခါ လောဝေပင်း၏ အနိုင်ကျင့်ခြင်းကို ခံရသော အခြားမင်းသမီးများကဲ့သို့
သူမသည်လည်း နစ်နာခံခဲ့ရသည်ဟု လွဲမှားစွာ ထင်မြင်ယူဆခဲ့ကြသည်။ သူ့နာမည်ကို ကြားလိုက်တာနဲ့
သူ၏ မျက်လုံးများ နီရဲလာခဲ့သည်။
သူမနှင့် လောဝေပင်းတို့ရဲ့ ဓာတ်ပုံတွေနဲ့
ဗီဒီယိုတွေကို သူမရဲ့ ပရိသတ်တွေက လူမြင်ကွင်းမှာ ရှာဖွေခဲ့ပြီး သူမဟာ နစ်နာသူဖြစ်ကြောင်း
သက်သေပြဖို့အတွက် တည်းဖြတ်ခဲ့ကြသည်။
ဒီသတင်းထွက်လာတာနဲ့တပြိုင်နက်
လောဝေပင်းရဲ့ အပျက်သဘောဆောင်တဲ့သတင်းကြောင့် ဝမ်ကျင့်ဖျင်သည် မထိခိုက်သွားဘဲ ဖြတ်သွားဖြတ်လာတွေထံမှ
စာနာမှုများကိုတောင် ရရှိခဲ့ပါသည်။
မူရင်းစာအုပ်မှာတော့ ဒါက အမှန်တရားကို
ရေးထားတဲ့အတိုင်းပဲ - ဝမ်ကျင့်ဖျင်က ဒီအရာအားလုံးကို ရည်ရွယ်ချက်ကောင်းတွေနဲ့ လုပ်နေတာလား။
ဟောက်ရှောက်ဖုန်း ဘာတွေလုပ်ခဲ့လဲဆိုတာကို သူမ ဘာမှ မသိခဲ့ဘူးလား။
သူမ သိဖို့ မဖြစ်မနေ မလိုအပ်ပါဘူး။
အင်တာနက်ပေါ်တွင် လော့ဝေပင်းကို
လူသိရှင်ကြား ထောက်ခံခြင်း မပြုခြင်းသည် လူ့သဘောသဘာဝ ဖြစ်သော်လည်း မီဒီယာများက အချက်အလက်များကို
တမင်တကာ လိမ်လည်လှည့်ဖြားပြီး သူမအား နစ်နာသူအဖြစ် သရုပ်ဖော်ဆောင်ခဲ့သည်။
ဝမ်ကျင့်ဖျင်သည် လူတွေရဲ့ အာရုံစူးစိုက်မှုကို
ဆွဲဆောင်နိုင်တဲ့ မီဒီယာတွေကို မထိန်းချုပ်နိုင်သော်လည်း သူမသည် အနည်းဆုံးတော့ သူမရဲ့
ကိုယ်ပိုင်ပရိသတ်များကို ထိန်းချုပ်နိုင်သည် မဟုတ်ပါလား။
ပရိသတ်များက သူမအား ဤကဲ့သို့
စနစ်တကျ စီစဥ်ထားသည့်ပုံစံဖြင့် နစ်နာသူအဖြစ် ကြေငြာထားသောကြောင့် မီးထဲသို့ လောင်စာထည့်နေသည့်
သူများ သူမ၏ နောက်ကွယ်တွင် ရှိရပေမည်။
သနားစရာကောင်းသော လော့ဝေပင်းသည်
သူမအတွက် သူ့သွေးအားလုံးကို ကုန်စင်ခြောက်သွေ့အောင် စုပ်ယူခံရပြီးနောက် လူအများ၏ အနင်းခံ
ကျောက်တုံး ဖြစ်လာခဲ့သည်။
သူ့ညီမတောင် သူ့ကြောင့် အလုပ်ပြုတ်သွားခဲ့သည်။
သူမသည် ကြော်ငြာစာချုပ်များစွာကို ချိုးဖောက်ခဲ့ပြီး ငွေအမြောက်အမြား အကြွေးတင်ခဲ့သည်။
ထို့ကြောင့် သူမသည် ဆေးကုသမှုကို ဆက်မလုပ်နိုင်တော့ဘဲ မကြာမီ သေဆုံးသွားခဲ့သည်။
တစ်စုံတစ်ယောက်ကို စေတနာဖြင့်
ကူညီပေးခဲ့သည့်အတွက်ကြောင့် သူ့ရဲ့ အသက်မွေးဝမ်းကြောင်းက ပျက်စီးသွားခဲ့သလို သူ့ရဲ့
တစ်ဦးတည်းသော ညီမလေးသည်လည်း သေဆုံးသွားခဲ့ရသည်။ တကယ်လို့ သူ့ကို အရူးလို့ မခေါ်ဆိုနိုင်ပါက
မည်သူ့ကို ခေါ်ဆိုနိုင်ပါ့မည်နည်း။
“ယန်ယန်၊ ယန်ယန်”
ရှားကျွင်းရှန့်၏ အသံတိုးတိုးဖြင့်
ခေါ်ဆိုလိုက်သံကြောင့် စုယန်ယန်တစ်ယောက် အသိပြန်ဝင်လာခဲ့သည်။ “သူက သူ့ညီမကြောင့် ညီမတို့ကုမ္ပဏီကို
ရွေးချယ်ခဲ့တာလား။”
“နျဥ်ချီလွေ့ရဲ့ ဆေးစစ်ချက်
အစီရင်ခံစာကို သူတွေ့ပြီးတဲ့နောက် လော့ဝေပင်းက သူ့ဆီကို ဆက်သွယ်ခဲ့တယ်လို့ နျဥ်ချီလွေ့ရဲ့
မန်နေဂျာဆီက ကြားသိခဲ့ရတယ်။ နျဥ်ချီလွေ့ကို ကိုယ်တိုင်ကိုယ်ကျ တွေ့ချင်တယ်လို့ သူက
ပြောခဲ့တယ်။ လော့ဝေပင်းက နျဥ်ချီလွေ့နဲ့ ကိုယ်တိုင်ကိုယ်ကျ တွေ့ဆုံပြီးတဲ့နောက်မှာ
အွန်လိုင်းမှာ တင်ထားတဲ့အရာက အမှန်ဖြစ်ကြောင်း သူ အတည်ပြုနိုင်ခဲ့တယ်။ အဲဒီနောက်မှာ
လော့ဝေပင်းက နျဥ်ချီလွေ့ကို သူ့ကို ကုသပေးတဲ့ ဆရာဝန်နဲ့ မိတ်ဆက်ပေးဖို့ တောင်းဆိုခဲ့တယ်။”
“သူ့ကို ကုသပေးတဲ့ ဆရာဝန်လား။”
စုယန်ယန်က ရယ်မောလိုက်သည်။ သူမသည် ဘယ်တုန်းက နျဥ်ချီလွေ့ရဲ့ ဆရာဝန် ဖြစ်လာတာလဲ။
ထိုကာလအတွင်း သူမသည် သူ့ကို
ရက်အနည်းငယ်ကြာတိုင်း အပ်စိုက်ကုသပေးခဲ့သော်လည်း နျဥ်မိသားစုသည် နျဥ်ချီလွေ့၏ ရောဂါဝေဒနာကို
ပြန်လည်ကောင်းမွန်လာစေပြီး ကုသမှုအတွက် အထောက်အကူပြုရန် အခြားသော မိသားစုဆရာဝန်တစ်ဦးကို
ငှားရမ်းခဲ့သည်။
နျဥ်ချီလွေ့၏ ယခုလို ကောင်းကောင်းမွန်မွန်
စားသောက်နိုင်စွမ်းသည် သူမတစ်ယောက်တည်းကြောင့်သာ မဟုတ်ပေ။
“လော့ဝေပင်းက နျဥ်ချီလွေ့ရဲ့
ဆေးမှတ်တမ်းတွေကို တခြားဆရာဝန်တွေဆီ ပြကြည့်ထားပုံရတယ်။ သူတို့အားလုံးက နျဥ်ချီလွေ့တစ်ယောက်
အခုလို မြန်မြန်ပြန်ကောင်းလာတာက အံ့ဖွယ်တစ်ခုလို့ ဆိုကြတယ်။”
“ဒါဆို နျဥ်ချီလွေ့ကို ကုသပေးတဲ့သူက
တကယ် အရည်အချင်းရှိနေလိမ့်မယ်လို့ သူထင်နေတာလား။”
“... အင်း”
“နျဥ်ချီလွေ့က သူ့ကို ဘာပြောလိုက်တာလဲ။”
“သူပြောတာ...” ရှားကျွင်းရှန့်က
သူ့နှာခေါင်းကို ပွတ်သပ်ရင်း အူမြူးစွာ ပြောလိုက်သည်။ “ဒါက ကုမ္ပဏီဝန်ထမ်းတွေအတွက်
အထူးခံစားခွင့်ဖြစ်လို့ အပြင်လူတွေကို ပေါ့ပေါ့ဆဆ ထုတ်ဖော်ပြောဆိုခွင့်မရှိဘူးလို့
သူက ပြောလိုက်တယ်။”
“…”
စုယန်ယန်သည် ခဏလောက် နှုတ်ဆိတ်သွားခဲ့ပြီးမှ
“အခုခေတ် ကုမ္ပဏီဝန်ထမ်းတွေက သူတို့ရဲ့ ကံကောင်းမှုကို တွန်းအားပေးနေတယ်လို့ အစ်ကိုထင်လား။”
ဟု မေးလိုက်မိသည်။
“ဟမ်...” ရှားကျွင်းရှန့်က သူမ
ဆိုလိုသည့် အဓိပ္ပါယ်ကို နားမလည်သဖြင့် သူမကို ဗလာအကြည့်ဖြင့် ကြည့်နေခဲ့သည်။
“သူဌေးတစ်ယောက်အနေနဲ့ ညီမက သူတို့ရဲ့
အနာဂတ်နဲ့ အသက်မွေးဝမ်းကြောင်းကို ဂရုစိုက်ပေးရုံသာမက သူတို့ရဲ့ ကျန်းမာရေးကိုလည်း
ဂရုစိုက်ပေးရဦးမယ်ပေါ့။ အဲ့တာက ညီမအတွက် လွယ်ကူတယ်လို့ အစ်ကိုထင်လား။”
ရှားကျွင်းရှန့်၊ “...”
“အဟမ်း...” ရှားကျွင်းရှန့်က
သူ့အပြုံးကို အတင်းအကြပ် ဖိနှိပ်ထားခဲ့ပြီး “အဲ့တာဆို လော့ဝေပင်းကို...” ဟု ညင်သာစွာ
မေးလိုက်သည်။
“သူနဲ့တွေ့ဖို့ အချိန်တစ်ခု
စီစဥ်ပြီး ချိန်းထားလိုက်ပါ။ သူ့မှာ အရည်အချင်း တကယ်ရှိတယ်ဆိုရင် သူ့အတွက် အချိန်အနည်းငယ်
ဘေးဖယ်ပြီး အားအင်စိုက်ထုတ်ပေးဖို့ အဆင်ပြေပါတယ်။”
သူမသည် ဝမ်ကျင့်ဖျင်ကြောင့်
ထိခိုက်နစ်နာခဲ့ရသူများအတွက် ကိုယ်ချင်းစာစိတ် အနည်းငယ် ရှိသည်။ အထူးသဖြင့် အဲဒီ အပြစ်ကင်းစင်သော
ကလေးမလေး... သူက အရမ်းငယ်သေးတယ်။
Welcome To MM Storyteller
LOGIN
Welcome To MM Storyteller
REGISTER