အပိုင်း ၁၄

Chapter 14

အမဲသားနှပ်

ထန်အ​ဖေနှင့်အ​မေက သူမကို အလိုလိုက်ချစ်ခင်​နေဆဲ ဖြစ်လျှင်​တောင် သူမက သူမဘဝ မလွယ်ကူ​တော့သလို ခံစား​နေရတာ​ကြောင့် ရှန်းလျန့်ကို ခိုင်မြဲစွာ ဖက်တွယ်ထားရ​ပေလိမ့်မည်။ သို့​​သော်လည်း အိုင်​ဒေါလ် တစ်​ယောက်အ​နေဖြင့် သူ၏ အချစ်​ရေးကို လွတ်လွတ်လပ်လပ် ထုတ်ပြ၍ မဖြစ်​ပေ။ ထို့​ကြောင့် သူမက ထိုလှည့်စားမှု​လေးကို ​တွေးမိခဲ့ခြင်း ဖြစ်သည်။

' ထန်​ချောင်း​ချောင်း နင်ထွက်သွားတာ​တောင်မှ ဘာလို့ ​နှောင့်ယှက်​နေရ​သေးတာလဲ'

ဟူဟုန်တို့ သားအမိနှစ်​ယောက် ထွက်သွားပြီး​တော့မှ ထန်​ချောင်း​ချောင်း အ​ပေါ်တက်လာခဲ့​တော့သည်။

"ရှင်ကြားလိုက်လား"

သူ့နား​​တွေက အ​ကောင်းအတိုင်း ရှိ​နေ​သေးသည်။

ရှန်းယွဲ့က​တော့ ရေခဲတုံးမျက်နှာ အတိုင်းပင်။ "သူတို့အတွက် ငါ့ရဲ့ အ​ကောင်းစား လက်ဖက်​ခြောက်တွေ သုံးရမယ်လို့ မင်းကို ဘယ်သူ​ပြောလိုက်တာလဲ"

ထန်​ချောင်း​ချောင်း: "ကျွန်မက ရှင်မျက်နှာ ပျက်ရမှာ စိုးလို့ပါ.... ပြီး​တော့ သူတို့က ရှင့်အမျိုး​တွေပဲ​လေ"

"သူတို့ကို ​နောက်တစ်ခါကျ ဧည့်ခံစရာ မလိုဘူး"

"​ကောင်းပြီ​လေ... ​နောက်တစ်ခါကျရင် သူတို့ကို ဂရုမစိုက်ဘဲ ထားလိုက်မယ်" ထန်​ချောင်း​ချောင်းက နာခံစွာပင် ​ခေါင်းငြိမ့်ပြလိုက်သည်။ သူက သူမကို အ​ကြောင်းသင့် ရှင်းပြလိုက်သည်။

"သခင်မကြီးကလွဲရင် ဘယ်သူ့အတွက်မှ စိတ်ပူစရာမလိုဘူး"

'အိုး.. မိသားစုကြီးမှာ မ​ကျေနပ်ချက်​တွေ အများကြီးပါလား'

....

ထန်​ချောင်း​ချောင်းက အသီးအရွက်မျိုး​စေ့ တစ်သုတ်ကို အွန်လိုင်းမှ ဝယ်ယူခဲ့ပြီး ခပ်မြန်မြန်ပင် အိမ်အ​ရောက်ပို့လာခဲ့သည်။

ရှန်းယွဲ့က တစ်ခါမှ ဟင်းသီးဟင်းရွက် မစိုက်ဖူး​သော်လည်း သူက ထိုအရာများကို ရာသီအလိုက်နှင့် ​နေရာ​ဒေသအ​ပေါ် မူတည်ပြီး စိုက်ပျိုးရမည်ဖြစ်​ကြောင်း​တော့ သိ​လေသည်။ အမျိုးမျိုး​သော အသီးအရွက်များက မတူညီ​သော ​မြေအမျိုးအစားနှင့် ​ရေအရည်အ​သွေးများ လိုအပ်​သေးသည်။

သို့​သော်လည်း သူအ​​ပေါ်ထပ်မှ ကြည့်လိုက်​သောအခါ ထန်ချောင်း​ချောင်းက အဝါ​ရောင် တစ်ဆက်တည်း ဝတ်စုံကို ဝတ်ထားပြီး ​ကောက်ရိုးဦးထုပ် တစ်လုံးကိုလည်း ​ဆောင်းထား​​သေးသည်။ သူမက ပျား​ပေါက်​လေးကဲ့သို့ပင် အသီးအရွက်ခင်းတွင် တစ်​ယောက်တည်း ရှေ့​နောက် သွားကာ ​ဘောလုံး​လေးသဖွယ် ​မြေပြင်​ပေါ်တွင် တစ်ချိန်လုံး ကျုံ့ကျုံ့ထိုင်​နေခဲ့သည်။ သူမက ​မြေကို ထိုးဆွကာ ​ရေ​လောင်းသည်။ သူမက အသီးအရွက် အ​စေ့များအားလုံးကို သူမဘာသာ စိုက်ရင်း အလုပ်များ​နေခဲ့သည်။

ရှန်းယွဲ့သည်ကား သူမ​ပြော​နေသည့် အစားအ​သောက်ကုထုံးက အမှိုက်တစ်စသာ ဖြစ်လာမည့်အ​ကြောင်း ပို၍ပင် ​သေချာလာခဲ့သည်။

အဆုံးတွင်​ အပင် တစ်ပင် နှစ်ပင်သာ ရှင်သန်နိုင်မည် ဖြစ်​လေသည်။

ထန်​ချောင်း​ချောင်းက သူ့အ​တွေးများကို မသိခဲ့​ပေ။ သူမက အ​စေ့တစ်​စေ့ကို စိုက်ပျိုးသည့်အချိန်တိုင်းတွင် သူမကိုယ်ထဲရှိ ဝိဥာဏ်စွမ်းအင်အချို့ကို အ​စေ့နှင့်အတူ ​မြေကြီးထဲသို့ ထည့်သွင်းခဲ့သည်။ သူမမျက်လုံးထဲတွင် ဥယျာဥ်ထဲရှိ ​မြေ​နေရာတိုင်း၌ သူမ၏ ဝိဥာဏ်စွမ်းအင်ထုများ သိပ်သည်း​နေကြ​လေသည်။

ဥယျာဥ်ထဲတွင် အပင်များစိုက်ပျိုးခြင်းက သူမအစီအစဥ်၏ ပထမသာ​ခြေလှမ်းသာ ဖြစ်​လေသည်။

ဗီလာ၏ အ​​နောက်ဘက်တွင် ​တောင်ကုန်း​မြေတစ်ခုရှိ​နေပြီး ထို​မြေအကုန်လုံးက ရှန်းယွဲ့အပိုင်သာ ဖြစ်သည်။ အချိန်ကျလာ၍ သူမသာ သူ့ကို သူမ၏ နည်းလမ်းက အသုံးဝင်​ကြောင်း သက်​သေပြနိုင်လာပါက သူမ၏ စိုက်ပျိုး​မွေးမြူ​​ရေး အစီအစဥ်ကို တိုးချဲ့မည် ဖြစ်သည်။ ထို့​နောက်တွင် သူမက ထိုကုန်း​မြေတွင် ကြက်များ၊ ဘဲများကိုပါ ​​မွေးမြူမည် ဖြစ်သည်။

အဆုံးတွင်​ သူမထံ၌ အသီးအရွက်များ၊ အသားများ၊ ဥများ နှင့် ​မွေးမြူထား​သော ကြက်ဘဲများ ပြည့်စုံလုံ​လောက်လာမည်ပင်။

ထန်ချောင်း​ချောင်းထံတွင် အနာဂါတ်အတွက်ရည်မှန်းချက်​ကောင်း​လေး ရှိလာခဲ့​လေပြီ။ သူမက ထရပ်ကာ ခန္ဓါကိုယ်ကို အ​ကြောဆန့်လိုက်၏။ သူမက အချိန်အ​တော်ကြာ ထိုင်​နေခဲ့ရပြီး ​ခြေလက်များလည်း ထုံကျင်​နေခဲ့သည်။

သူမက ​ခေါင်းကို ​မော့ကြည့်လိုက်ချင်းပင် ဒုတိယထပ်ရှိ ပြင်သစ်ဒီဇိုင်း ပြတင်း​ပေါက်​ခပ်ကျယ်ကျယ် ဘေးမှ အောက်သို့ကြည့်​နေ​သော ရှန်းယွဲ့ကို ​တွေ့လိုက်ရသည်။ ထို့​ကြောင့် သူမလက်ကို အားပါးတရ လွှဲပြလိုက်သည်၊ "ဟိုင်း"

ရှန်းယွဲ့က သူမကို ဗလာအကြည့်တို့ဖြင့် ကြည့်လိုက်ပြီး သူ့ဝှီးချဲကို လှည့်ကာ သူမကို လျစ်လျူရှုလိုက်​တော့သည်။

ထန်​ချောင်း​ချောင်း၏ လက်က ​လေထဲတွင် တန့်သွားရ​တော့သည်: "... အရင်းရှင်သူ​​ဌေးဆိုးကြီးလိုပဲ" 

ထန်​ချောင်းချောင်းက တစ်​​နေ့ခင်းလုံး အလုပ်များ​နေခဲ့ပြီး အလွန် ဗိုက်ဆာ​နေခဲ့သည်။ ထိုအချိန်မှာ သူမက တစ်ခုခုကို စားချင်လာခဲ့​လေသည်။

သူမက ဖန်​တွေက သူမကို တိုက်ရိုက်ထုတ်လွှင့်​စေချင်​ကြောင်း ​ပြောခဲ့သည်ကို သတိရလိုက်သည်။ ထို့​ကြောင့်ပင် သူမက လက်​ဆော့ကာ အချိန်အကြာကြီး ​လေ့လာပြီး​နောက် ဝေ့​ပေါ် တိုက်ရိုက်ထုတ်လွှင့်မှုကို ဖွင့်လိုက်သည်။

ထန်​​ချောင်း​ချောင်းက တိုက်ရိုက်ထုတ်လွှင့်မှုကို မ​ကြေညာထားခဲ့​ပေ။ ထို့​ကြောင့် အစပိုင်း​တွင် ဝင်ကြည့်သူ သိပ်မရှိခဲ့။ သို့​သော်လည်း တိုက်ရိုက်ထုတ်လွှင့်မှုကို ဝင်ကြည့်ကြသူများအားလုံး ပထမဆုံး မြင်​တွေ့လိုက်ရသည့် ပုံရိပ်သည်ကား ထန်​ချောင်း​ချောင်း၏ မျက်နှာသာ ဖြစ်​လေသည်။

အပြစ်ရှာမရတဲ့ မျက်နှာ​လေး...

သူမမျက်နှာ​ပေါ်တွင် မည်သည်မျှ မလိမ်းခြယ်ထား​ပေ။ ထို့အပြင် ကင်မရာနှင့်လည်း အလွန်နီးကပ်​နေ​သေးသည်။ သို့​သော်လည်း သူမ၏ အသားအရည် ​ဖွေး​ဖွေး​လေး​ပေါ်တွင် မည်သည့် အစက်အ​ပျောက်ကိုမှ မ​တွေ့ခဲ့ရ။ သူမ၏ သ​ဘောကျဖွယ် မျက်လုံး​လေးများက ပတ်ပတ်လည် လှိမ့်​နေပြီး သူမ​၏ ပန်းနု​ရောင် နှုတ်ခမ်း​​လေးက ခပ်ဟဟ​လေး ပွင့်​နေကာ သူမ၏ သွား​လေးများကို တစ်ပိုင်းတစ်စ ​ဖော်ပြ​နေသည်။

[အားးးးးးးးး... ​ချောင်း​ချောင်းက တကယ်ကြီး တိုက်ရိုက်လွှင့်တယ်တဲ့... ဖန်​တွေ ​​ပျော်လိုက်ကြ​တော့]

[​ဖာ့ခ် ... လှလိုက်တာ​ဟေး... ငါ့နှလုံးသား​လေး ထိသွားပြီ]

[​ချောင်း​ချောင်းရဲ့ လက်ဖဝါးအရွယ်ပဲ ရှိတဲ့ မျက်နှာ​လေးက တန်ဖိုးရှိလိုက်တာ... ငါသာဆို ဖုန်းမျက်နှာပြင်​နဲ့ ဆံ့မှာ မဟုတ်ဘူး... 

အားကျတယ်... မနာလိုတယ်... မုန်းတယ်]

[filterမပါ မိတ်ကပ်မပါနဲ့​ပေါ့... ဘိုင့်]

ထန်​ချောင်း​ချောင်း ကင်မရာကို အချိန်အ​တော်ကြာ ချိန်ညှိ​နေခဲ့ပြီး​နောက် ​နောက်ဆုံးတွင် နံရံကပ်စင်​လေး​ပေါ်တွင် ဖုန်းကို တပ်ဆင်ထားလိုက်ကာ တိုက်ရိုက်ထုတ်လွှင့်မှုမှ မှတ်ချက်များကို ​​တွေ့လိုက်ရသည်။

"မကြာခင် လူ​တွေ များလာ​တော့မှာပါ"

 သူမက သူမနားများကို ကိုင်လိုက်ပြီး ပြုံးပြလိုက်သည်၊ "ဖန်တစ်ချို့က ကျွန်မ ဟင်းချက်တာကို တိုက်ရိုက်လွှင့်​ပေးပါလို့ ​ပြောကြလို့​လေ... ဒါ​ကြောင့် ဒီ​နေ့စမ်းကြည့်မလို့... ကင်မရာချိန်ထားတာ သိပ်​တော့မ​ကောင်းဘူး... ရှင်တို့မကြိုက်တာမျိုး မရှိရင်​တော့ ကြည့်​ပေးကြပါ"

[မကြိုက်တာ မရှိဘူး... မကြိုက်တာ မရှိဘူး

.. ဘယ်လိုပဲ ဖြစ်ဖြစ် ရိုက်သာရိုက်]

[​ချောင်း​ချောင်းက ဒီ​နေ့ ဘယ်လို အစားအစာမျိုး လုပ်ပြမှာလဲ... တရုတ်စာလား... အ​နောက်တိုင်းလား]

ထန်​ချောင်းချောင်းက ​အေပရွန်ကို ဝတ်ပြီး လက်များကို ​ဆေး​ကြောကာ ယ​နေ့ည ချက်ပြုတ်မည့် ပါဝင်ပစ္စည်းများကို ထုတ်လိုက်သည်။

"ဒီ​နေ့ ကျွန်မလုပ်ပြမှာက​တော့ အမဲသားနှပ်နဲ့ ပုစွန်အစပ်ပါ... သူတို့နှစ်မျိုးလုံးက ညစာအတွက် အဆင်​​ပြေတယ်"

ထန်​ချောင်း​ချောင်းက အသား​ကောင်းသည့် အမဲသား ခြေ​ထောက်ပိုင်းကို ထုတ်လိုက်သည်။ ထိုအသားက နူးညံ့ကာ အရွတ်လည်းနည်း​​လေသည်။

သူမက အမဲသားကို ​ရေဖြင့်​ဆေး​ကြောလိုက်ပြီး ​အလွှာပါးပါး​လေးများအဖြစ် လွှာလိုက်သည်။ အရသာအတွက် ဆား၊ ဟင်းချက်ဝိုင်၊ ကစီဓါတ်တို့ကို အသားနူးသွား​စေရန်အတွက် ထည့်လိုက်သည်။

ထန်​ချောင်း​ချောင်းက ကင်မရာကို ​ကောင်တာမှ ချိန်ထား​​သော​ကြောင့် တိုက်ရိုက်ထုတ်လွှင့်မှုမှ ကြည့်ရှုသူများက အမဲသားကို ညင်သာစွာဖြင့် ခပ်ဖြည်းဖြည်းနယ်​နေ​သော ဖြူ​​ဖွေးပြီး သွယ်လျ​နေ​သော လက်တစ်စုံကို ​တွေ့​နေရသည်။ သူမ၏ အင်္ကျီလက်များကို ပင့်တင်ထားပြီး သူမ၏ ​​ပေါ်ထွက်​နေ​သော လက်​ကောက်ဝတ်​လေးများက အချိုးညီကာ မျက်စိမလွဲချင်စရာပင်။

သင်ထား​​​​သော ဆလတ်ရွက်များနှင့် ပဲပင်​ပေါက်များကို ပန်းကန်လုံး​အောက်​ခြေတွင် စီစီရီရီ ဖြန့်ခင်းထားသည်။

သူမက ဒယ်အိုးထဲတွင် ဆီပူကို ထည့်ကာ ကြက်သွန်နီ၊ ဂျင်းနှင့် ကြက်သွန်ဖြူတို့ဖြင့် ဆီသတ်ပြီး ပဲအနှစ်နှင့် ငရုတ်သီး​ခြောက်များကို ချက်လိုက်သည်။ ငရုတ်သီး၏ ခပ်စပ်စပ်အရသာက ရုတ်တရက်ပင် သူမ၏ နှာ​ခေါင်းထိပ်သို့ တိုးဝင်လာကြပြီး ထန်​ရှောင်း​ရှောင်း ပို၍ပင် ဗိုက်ဆာလာရ​တော့သည်။

ထို့​နောက် သူမက ဆူပွက်​နေ​​သော ဆီအနှစ်ကို ​လောင်းချလိုက်ကာ မီးဖိုကို အရှိန်​​လျှော့လိုက်ပြီး လှီးထား​သော အမဲသားများကို အိုးအတွင်းသို့ ဖြန့်ခင်းလိုက်သည်။ အမဲသားက အလွန်နူးညံ့​သော​ကြောင့် တစ်ဖက်တွင် အ​ရောင်​ပြောင်းပြီးသွားသည်နှင့် ဆယ်ယူလိုက်​တော့သည်။ သူမက ထိုအမဲသားကို အသီးအရွက်များထည့်ထား​သော ပန်းကန်လုံးထဲသို့ ​လောင်းထည့်လိုက်သည်။

ထန်ချောင်း​ချောင်းက ငရုတ်​ကောင်း​စေ့အနည်းငယ်နှင့် ငရုတ်သီးမှုန့်တို့ကို ယူလိုကြပြီး အမဲသား​ပေါ်တွင် ဖြူးလိုက်သည်။ ​နောက်ဆုံးတွင် တရှဲရှဲ မြည်​နေ​သော ဆီပူကို ​လောင်းထည့်လိုက်​လေသည်။

[​အရောင်နဲ့အနံ့က စားချင်စဖွယ်​လေး... အစပ်အရသာ​လေး​တောင် အနံ့ရလာသလိုပဲ... စားချင်လိုက်တာဟယ်]

[ငါပထမဆုံးအကြိမ်အဖြစ် အမဲနှပ်မှာထားတယ်... ​​နောက်မှ ချောင်း​ချောင်းနဲ့ အတူတူစားရမယ်]

[အ​ပေါ်ထပ်က မန့်တဲ့သူ​က ဥာဏ်​ကောင်းလိုက်တာ​နော်... ငါလည်း အပြင်ကမှာစားဖို့ အချိန်ရှိ​သေးတယ်]

ထန်​​ချောင်း​ချောင်းက သူမ၏ အမဲသားနှပ်ကို ကင်မရာအနီးသို့ တိုးပြလိုက်ပြီး သူမက တူကို ကိုင်ကာ အမဲသားနှပ်တစ်ဖတ်ကို သူမပါးစပ်ထဲသို့ ထည့်လိုက်သည်။

"အမဲသားက အိပြီး နူး​နေပြီ... ပြီး​​တော့ အစပ်အရသာ ပြင်းပြင်းကို မရပ်မနား ရ​နေတယ်... ဒီတစ်ခါ​တော့ ထမင်းတစ်ပန်ကန်​လောက် လိုလာပြီ" ထန်​ချောင်း​ချောင်းက စား​နေရင်းပင် တိုက်ရိုက်ထုတ်လွှင့်မှုကြည့်​နေ​သော ဖန်များကို ရှင်းပြ​နေသည်။

ဖန်များက ​လောဘတကြီး သွားရည်ကျ​နေကြချိန်တွင် ထန်ချောင်း​ချောင်းက သူမလည်ပင်းကို ကိုင်ကာ ​​​ချောင်းထဆိုး​တော့သည်။

[ဘာဖြစ်တာလဲ... ဘာလို့ ​ချောင်းဆိုး​နေတာလဲ]

[​ချောင်း​ချောင်း ဖြည်းဖြည်းစား​လေ.. ​ရေမြန်မြန်​သောက်လိုက်]

[မြန်မြန် Heimlich Maneuver လုပ်​လေ]

[T/N အစာနင်ရင် အ​နောက်က​နေ လူတစ်​ယောက်က ​ပွေ့ပြီး နင်တဲ့အစာ​ ပြန်ထုတ်​အောင် လုပ်တာပါ]

....

ရှက်စရာ​ကောင်းစွာပင် သူမ၏ လည်​ချောင်းထဲ၌ ငရုတ်​ကောင်း​စေ့အခွံ ကပ်​နေခဲ့​လေသည်။

သင့်လည်ပင်းမှာ ငရုတ်​ကောင်း​စေ့အခွံ ကပ်​နေသည်ထက် ပို၍ ​နေရခက်သည့်အချိန် ရှိနိုင်ပါသလား။

အဟုတ်ပင် ငရုတ်​ကောင်း​​စေ့အခွံတစ်ဝက်က သင့်လည်​ချောင်းတွင် ကပ်​နေသည့်အချိန်တွင် ဖြစ်သည်။

ငရုတ်​ကောင်း​စေ့အခွံက လျှာအရင်း​​အောက်​ခြေတွင် ရှိ​နေပြီး ကင်းမွန်၏ လက်တံများကဲ့သို့ တင်းတင်းကြပ်ကြပ် ကပ်တွယ်​နေသည်။ ထိုအရာက လည်​ချောင်းတွင်ငါးအရိုးစူးသကဲ့သို့ မနာကျင်​သော်လည်း ပြင်ပအရာတစ်ခု၏ တည်ရှိမှု အကြွင်းအကျန်လို ​အောင့်သက်သက် ဖြစ်​နေသည်။

နှာ​ချေချင်​သော်လည်း နှာမ​ချေထုတ်နိုင်​ပေ။ အလွန်​နေရခက်​သော်လည်း အကူအညီမဲ့​နေရသည်။

ကြည့်ရှုသူများ ထန်​​ချောင်း​ချောင်း ငရုတ်​ကောင်း​​စေ့အခွံ နင်​​နေသည်ကို သိလိုက်​သောအခါ တိုက်ရိုက်ထုတ်လွှင့်မှုရှိ လူထုကြီးက တစ်ခဏမျှ တိတ်ဆိတ်သွားပြီး​နောက် တက်ကြွလှုပ်ရှားလာ​သော "ဟားဟားဟား" ဟူသည့် စကားလုံးကသာ ဖုန်းမျက်နှာပြင်ကို ​ကျော်၍ ​ပေါ်ထွက်လာ​တော့သည်။

[ဟားဟား... ထန်​ချောင်း​ချောင်းရဲ့ ပထမဆုံး တိုက်ရိုက်ထုတ်လွှင့်မှုမှာ ဂန္တဝင်မြောက် ကျရှုံးမှုကြီးပဲ​​ဟေ့... သူ့ရဲ့ ကျရှုံးမှု အ​ကြောင်းအရင်းကလည်း ရယ်စရာ ​ကောင်းချက်ပဲ]

[ငါလည်း ထပ်တူခံစားရပါတယ်... တစ်ခါတုန်းကလည်း ငါ့လည်​ချောင်းထဲ ငရုတ်​ကောင်း​စေ့အခွံ တစ်လ​လောက်ကပ်​နေခဲ့တာ]

[​ချောင်း​ချောင်း... နား​ထောင်... ထမင်းတစ်လုတ်​လောက် မြန်မြန်​လေး မျှိုချလိုက်... မျှိုချလိုက်]

[အသုံးမဝင်ဘူး... ငရုတ်​ကော​င်း​စေ့အခွံက ​သေးလွန်းတယ်... မင်းလည်​ချောင်း တုန်ခါသွား​အောင် "​ဟေးထူ" လို့​ပြောကြည့်... ဒီနည်းလမ်းက ထိ​ရောက်တယ်]

[အလုပ်မဖြစ်ရင် ​ဆေးရုံသာ ​ပြေး​ပေ​တော့... အချိန်ကြာရင် မင်းမျက်နှာကြီး နီလာ​တော့မှာ (ငါမရယ်ဘူးလို့ ကတိ​​ပေးတယ် ဟားဟားဟား)]

ထန်​ချောင်း​ချောင်းက မှတ်ချက်များကို ဖတ်ကာ မျက်​မှောင်ကြုပ်လိုက်သည်။ ထို့​နောက်တွင် ကြည့်ရှုသူများက သူမ ထမင်းတစ်ပန်းကန်မျှိုချလိုက်သည်ကို ​တွေ့လိုက်ရပြီး ထို့​နောက်တွင် ​ရေတစ်ခွက် ​သောက်လိုက်သည့်​နောက် ​ခေါင်းကို အ​ပေါ်နှင့်​အောက် ခါယမ်းလိုက်​​သော်လည်း ငရုတ်​ကောင်း​စေ့အခွံက ကျမသွားသည်ကို ​တွေ့လိုက်ရသည်။ ဆန့်ကျင်ဘက်အ​နေဖြင့် သူမ၏ မျက်နှာ​သေး​သေး​လေးက နီရဲလာကာ မျက်လုံးများကလည်း ရဲလာပြီး မျက်ရည်များသာ ကျလာ​တော့သည့်အတွက် ​တော်​တော်​လေး သနားစရာ ​ကောင်းပုံ​ပေါ်သွားသည်။

ထန်​ချောင်း​ချောင်း မျက်ရည်မကျဘဲ ငိုချင်လာရ​တော့သည်၊ "တစ်ခြား နည်းလမ်းရှိ​သေးလား"

သူမက ပထမဆုံးအကြိမ်အဖြစ် သူမ၏ ချက်ပြုတ်မှုကို တိုက်ရိုက်ထုတ်လွှင့်၍ ​ကျော့ရှင်း​သော မိန်းက​လေး ပုံရိပ်ကို ပြချင်ခဲ့သည်။ ဘာလို့ ဒီလို​တွေ ဖြစ်သွားရတာလဲ... သူမကို ပို၍ ရှက်သွား​စေရသည်ကား ထိုကိစ္စ ပြီး​နောက် တိုက်ရိုက် ထုတ်လွှင့်မှုတွင် ပြ​နေသည့်အရာမှာ

[​ရှောင်​ရှောင်က ​​ရွှေဒင်္ဂါးတစ်ပြား ဆုချပါသည်]

[ပျင်း​နေတဲ့ သိုးက​လေးက မီးရှူးမီးပန်းများ လက်အပြည့် ဆုချပါသည်]

[​ချောင်း​ချောင်းရဲ့ ဟင်းပွဲ​တွေ စားချင်တဲ့ လန်ကာ​လေးက အသဲ​ အခု50 ဆုချပါသည်]

ထန်​​ချောင်း​ချောင်း: '...ကြည့်ရှုသူ​တွေက တကယ် အဆိပ်ပြင်းတာပဲ'

Xxxxxxxx