အပိုင်း ၂၃

Chapter 23

သားရဲကြီးနဲ့ အလှ​လေး

ထန်​ချောင်း​ချောင်းက အကြည့်တစ်ချက်​ ကြည့်လိုက်​လေသည်။ 'ဒါ မ​နေ့က ငါ့ကို လိုက်စီးခွင့်​ပေးလိုက်တဲ့ ထရပ်ကားပိုင်ရှင် အန်တီကြီးမဟုတ်ဘူးလား'

'ဒါပဲ​လေ... လူ​တွေက ​ကျေးဇူးသိတတ်ရတယ်'

ထို့​ကြောင့် သူမ ​ပြေး​​နေသည်ကို ရပ်တန့်လိုက်သည်။

 သူမ လှည့်ပတ်ကြည့်လိုက်ပြီး​နောက် ​မြေ​ပေါ်တွင် ပစ်ထားသည့် တံမြက်စည်းရိုးကို ​ကောက်ကိုင်ကာ ထိုဝက်ကို ပြန်လည်​ခြောက်လှန့်ရန်အတွက် အားတက်သရော ​ဝှေ့ယမ်းလိုက်​လေသည်။

သို့​​သော်လည်း ထိုဝက်က သူမကို ​ကြောက်ရွံ့​မ​နေဘဲ သူမဆီသို့သာ ဦးတည်ပြီးလာ​နေခဲ့သည်။

ထန်​ချောင်း​ချောင်းက ​အရှေ့တည့်တည့်သို့ ​ပြေးလာခဲ့သည်။ သူမက တံမြက်စည်းကို လွှင့်ပစ်လိုက်ကာ အချိန်မှန်​ရောက်သည့်အခါတွင် ဝက်၏ ​ရှေ့​ခြေ​ထောက်နှစ်ဘက်ကို ဆွဲကိုင်ကာ ရုတ်တရက်ပင် ထိုဝက်ကို ​မြှောက်တင်လိုက်သည်။

ထိုဝက်က စူးစူးရှရှ ​အော်ဟစ်ကာ သူ့​နောက်​ခြေတို့ဖြင့် ကန်​ကျောက်​နေ​လေသည်။

"နင်ဆက်​ပြေးနိုင်အုံးမလားလို့ ကြည့်လိုက်​လေ"

ထန်​ချောင်း​ချောင်းက ဝက်ကို ထိန်းထားနိုင်ခဲ့သည်။ သူမက စိတ်သက်သာရာရစွာဖြင့် သက်ပြင်းချလိုက်ပြီး ​တောက်ပ​​သော အပြုံး​လေးတစ်ခု ​ပေးလိုက်သည်။ ထို့​နောက် သူမ​ရုတ်တရက် တစ်ခုခုကို သ​ဘော​ပေါက်သွား​တော့၏။ သူမလှည့်ကြည့်လိုက်​သောအခါ လူတိုင်းက သူမကို ကြက်​သေ​သေ​နေ​သော အမူအယာများဖြင့် ကြည့်​နေကြ​လေသည်။

အကုန် တိတ်ဆိတ်​နေကြတာပဲ...

​သေ​လောက်တဲ့အထိ တိတ်​နေကြတာ...

ထို "???" တသီတတန်းကြီးက တိုက်ရိုက်ထုတ်လွှင့်မှုတွင် ဖြတ်​ပြေးသွားသည်။

[ ??? ငါတစ်ခုခု လွတ်သွား​သေးလား... ဝက်က ထန်​ချောင်း​ချောင်း လက်ထဲ ဘယ်လို​ရောက်လာတာလဲ]

[ဖာခ့် ငါဝက်​ကြောင့် ​သေ​လောက်​အောင် လန့်သွားတာ... ဒါ​ပေမယ့် ချက်ချင်း ​ထိတ်လန့်ဖွယ် ရုပ်ရှင်က​နေ ဟာသကားကို ​ပြောင်းသွားတာပဲ... ဟားဟားဟား]

[ငါရယ်ရလွန်းလို့ အိပ်ရာပေါ်က ပြုတ်ကြသွားပြီ... ဟုတ်တယ်​ဟေ့... ငါဝက်ကို တားပြီးဖမ်းတဲ့ မင်းသမီးတစ်​​ယောက်ကို ပထမဆုံး ​တွေ့ဖူးတာပဲ... ကျွဲနွား​တွေ တိုက်ခိုက်​နေတဲ့အတိုင်းပဲ]

[ဝက်က မ​ပေါ့ဘူး​နော်... ထန်​ချောင်း​ချောင်းက တကယ်ကြီး မလိုက်တာ... သူမက တကယ် ထူးဆန်းတဲ့သူပဲ]

[ထန်​ချောင်း​ချောင်းက အားသန်တယ်ဆိုတာ သိသွားပြီ... အရင်တစ်​ခေါက်က သံဒယ်အိုးကြီးကို လှန်တာ​တောင် ​အေး​အေး​ဆေး​ဆေး ဖြစ်​နေခဲ့တာ]

[ရှန်းလျန့်က အရူးပဲ... သူအရင်ဆုံး ပုန်း​နေတာ... မိန်းက​လေးတစ်​​ယောက်​လောက်​တောင် မ​ကောင်းဘူး]

[ထန်​ချောင်း​ချောင်း... ဝက်ဖမ်းတဲ့ မိန်းက​လေး... ဘုရား​ရေ ​​​ချောင်း​ပေါင်​လေး​... ငါမသိတဲ့ အံ့အားသင့်စရာ​တွေ ဘယ်​လောက်​တောင် ရှိ​သေးလဲ]

ထန်​ချောင်းချောင်းက ဝက်ကို ရွာသားများဆီ ပြန်​ပေးလိုက်သည်။ လူကြီးနှစ်​ယောက်က ​ခြေ​ထောက်တစ်​​ချောင်းစီဆွဲကာ ထိုဝက်ကို ဆွဲ​ခေါ်သွားကြသည်။

သူမမျက်နှာ​ပေါ်တွင် အပြုံး​လေးတစ်ခု ဆင်မြန်းလျက်ပင် ထန်​ချောင်း​ချောင်းက ရိုက်ကူး​ရေးဒါရိုက်တာဘက်လှည့်ကာ သူနှင့်​ဆွေး​နွေးလိုက်သည်၊

 "ခုနက အပိုင်းကို ဖြတ်​ပေးလို့ရမလား"

ထိုဒါရိုက်တာက နာကျင်​နေ​သော အပြုံးတစ်ခုကို ဖျစ်ညှစ်ပြလိုက်သည်၊

 "ဘာလို့လဲ... အရမ်းရယ်ရတယ်​လေ" 

ထိုအ​ကြောင်းက တိုက်ရိုက်ထုတ်လွှင့်မှုတွင် ​ပေါက်သွားခဲ့သည်။

"ရှင် ဆွဲ​ဆောင်မှုရှိတဲ့ ဘယ်မင်းသမီးက ဝက်ဖမ်းတာ မြင်ဖူးလို့လဲ" 

ထန်​ချောင်း​ချောင်းက မျက်ရည်မထွက်ဘဲ ငိုချင်လာ​တော့သည်။ ထိုအပိုင်းသာ လွှင့်ပြီးပါက သူမ၏ ပုံရိပ်ကို တည်​ဆောက်ရန်အတွက် အပတ်တကုတ်အားထုတ်ခဲ့ရမှုများက မုချ ဖျက်ဆီးခံရမည်ပင်။

ထိုဒါရိုက်တာက မတတ်နိုင်​တော့ဘဲ ရယ်​မောလိုက်သည်၊ "ဒါ​ပေမယ့် တိုက်ရိုက်လွှင့်ပြီးသား​လေ... သတင်း​ခေါင်းစဥ်​တွေ​တောင် တက်တော့မယ်... ငါတို့​တွေ မင်းရဲ့ အရမ်း​ကောင်းတဲ့ လျှပ်တပြက် ပုံ​တွေ​တောင် ရထားပြီးပြီ။

ဒါရိုက်တာက ထန်​ချောင်း​ချောင်း၏ ပုံများကို ပြလာခဲ့သည်။ ပုံထဲက ​ကောင်မ​လေးက တီရှပ်နဲ့ ဂျင်းကိုသာ ရိုးရိုးရှင်းရှင်း ဝတ်ထားပြီး ​ကောက်​ကွေး​နေ​သော ကျစ်ဆံမြီးနှစ်ခုနှင့် ​ပြေးထားရ​သော​ကြောင့် ရှုပ်ပွ​နေ​​သော ဆံပင်အချို့က နှဖူး​ရှေ့တွင် ပြန့်ကျဲ​နေကာ သူမမျက်လုံးများက ​ရေများဖြင့် ဖြည့်ထားသလိုပင်။ ထိုတောက်ပ၍ ​ပျော်ရွှင်​နေ​သော မျက်လုံးများက လူအများကို အကြည့်မလွဲ​စေနိုင်ခဲ့။

သို့​​သော်လည်း ထိုမိန်းက​လေးက ဝက်လက်များကို သူမ၏ ဆုဒိုင်းများကို ကိုင်ထားရသကဲ့သို့ စိတ်လှုပ်ရှားမှုအပြည့်ဖြင့် သူမလက်ထဲတွင် မြဲမြဲမြံမြံ ကိုင်ထားသည်။

အယ်ဒီတာ: "ငါတို့ရဲ့ တရားဝင်​ဝေ့​ပေါ်အ​​ကောင့်မှာ​တောင် တင်ထားပြီးပြီ... နာမည်က...

ထန်​ချောင်း​ချောင်း: "သားရဲကြီးနဲ့ မိန်းမလှ​လေး"

အယ်ဒီတာ: "ဒါကပို​ကောင်းတာပဲ... ​ပြောင်းလိုက်မယ်"

ထန်​ချောင်း​ချောင်း ရှက်ရလွန်းသဖြင့် ​သေသွားနိုင်သည်။ သူမ အင်တာနက်သုံးစွဲသူများ၏ တုံ့ပြန်မှုကို ထပ်မကြည့်နိုင်​တော့။

'ဖျက်လိုက်... မြန်မြန်​လေး'

​ဝေ့​ပေါ်ကို ပြန်လည်ပြုပြင်ပြီး​နောက် ဒါရိုက်တာက သံသယအပြည့်ဖြင့် ​မေးလိုက်သည်၊ "ရှန်းလျန့် ဘယ်မှာလဲ"

"သူခု​လေးတင် ရှိပါ​သေးတယ်... ဘယ်သွားပုန်း​နေတာလဲ"

"ကူညီကြပါ"

ထိုအချိန်တွင် သိပ်မ​ဝေး​သော ​နေရာထံမှ ငန်းဖြူကြီး တစ်​ကောင် အလိုက်ခံ​နေရ​သော ရှန်းလျန့်က ရှက်ရွံ့စွာ ​ပြေးလာခဲ့သည်။

ထိုငန်းဖြူကြီးက သူ့အ​တောင်ပံများကို ဖြန့်ကားကာ လည်ပင်းကို ဆန့်၍ အလွန်စူးရှသည့် "ဂွပ်"ဟူ​သော အသံဖြင့် ရှန်းလျန့်​နောက်ကို လိုက်​နေခဲ့သည်။

ထန်​ချောင်း​ချောင်း ကြက်​သေ​သေသွားရသည်။ 'အဲ့ဒါ ရင်းနှီး​နေတဲ့ မြင်ကွင်း မဟုတ်ဘူးလား'

ရှန်းလျန့်က ရူး​တော့မလိုပင်။ သူက ဝက်ကို​ရှောင်ရန်အတွက် အခြားလမ်းမှသွားခဲ့​သော်လည်း ထိုငန်းဖြူကြီး ​ပြေးလာမည်ဟု မ​မျှော်လင့်ထားခဲ့​ပေ။ သူက ငန်း၏ တိုက်ခိုက်မှုစွမ်းအားက ထိုမျှအထိ ပြင်းထန်မည်ဟု မသိခဲ့။ သူ့​ခြေသလုံးကို အဆိတ်ခံလိုက်ရပြီး အ​ကြောများ ထုံသွားသည်အထိ နာကျင်သွားခဲ့ရသည်။

'ကူညီကြပါအုံး... ငါအိမ်ပြန်ချင်တယ်လို့'

ရှန်းလျန့်က ငန်းဖြူကြီး လိုက်ဆိတ်ခြင်း ခံ​နေရပြီး ထိုအချိန်တွင် သူနှင့် ထန်​ချောင်း​ချောင်းကြားက မ​ကျေနပ်မှုများကို သတိမရ​နိုင်​တော့။ သူမက ဝက်ကို​တောင် ဖမ်းနိုင်တယ်ဆိုမှ​တော့ ဘာလို့များ ငန်းကို ​ကြောက်​နေရမှာလဲ... ဟုတ်တယ်မလား... ထို့​ကြောင့်ပင် သူက ထန်​ချောင်း​ချောင်း အနားသို့ တိုးတိုးကပ်ကပ် ​ပြေးလာခဲ့သည်။

"ရှင် ပြဿနာ ဖြစ်ချင်​နေတာလား... ဘယ်လို​ယောကျ်ားမျိုးလဲ"

ထန်​ချောင်း​ချောင်းက အရှက်မဲ့စွာပင် သူ့ကို လျစ်လျူရှုထားလိုက်​တော့သည်။ ဒီတစ်ကြိမ်တွင် သူမက အရှုပ်များ မလုပ်​တော့ရန်အတွက် စိတ်ပြင်ဆင်ထားပြီးသားပင်။ သူမက ကြည့်ရှုသူများ၏ မျက်လုံးထဲတွင် ဝက်နှင့် ငန်းကို ဖမ်းနိုင်​သော မိန်းမတစ်​ယောက် မဖြစ်လာချင်​ပေ။

ထို့​ကြောင့်ပင် ရှိုး၌ ထိုကဲ့သို့ ဟာသ​မြောက်​သော မြင်ကွင်း ​ပေါ်လာရ​တော့သည်- ရှန်းလျန့်က ထန်​ချောင်း​ချောင်းကို ပတ်၍ ​ပြေး​နေကာ ထန်​ချောင်း​ချောင်းကလည်း သူ့ကို ဆက်​၍ ရှောင်​ရှားနေသည်။

ထိုအချိန်အတွင်းတွင် ကြီးမားဖြူ​ဖွေး​သော ငန်းကြီးနှင့် ထန်ချောင်း​ချောင်းတို့ ခဏတာ အကြည့်ချင်းဆုံသွားသည်။ သို့​​သော် ထို ငန်းဖြူကြီး၏ ​တောက်ပ​သော ပဲတီ​စေ့အရွယ် မျက်လုံးများက အ​ရောင်လက်သွားကာ အခြားတစ်ဖက်သို့ ကြည့်လိုက်ပြီး​နောက် ရှန်းလျန့်​နောက်ကိုသာ ဆက်လိုက်​တော့သည်။

ထန်​ချောင်း​ချောင်းက ဝမ်းသာ​နေ​သော်လည်း ရှန်းလျန့်က​ ငိုချ​မိတော့မလိုပင်။

[ကူညီကြပါအုံး... ငါရယ်ရလွန်းလို့ ​သေ​​တော့မယ်... ဒီရှိုးက အဆိပ်ပြင်းလိုက်တာ]

[ဝက်ဖမ်းပြီးသွား​တော့ ငန်းက ​ရောက်ချလာတယ်... ထန်ချောင်း​ချောင်းနဲ့ ရှန်းလျန့်ကို ပျံ​နေတဲ့ဝက် ခုန်​​​နေတဲ့ငန်း အသင်းလို့ ​ခေါ်ရ​တော့မယ်]

[OMG ငန်းကြီးရဲ့ တိုက်ခိုက်နိုင်တဲ့စွမ်းအားက ဝက်ထက် ပိုသန်မာတယ်လို့ ငါခံစား​နေရတယ်]

[ငါက​တော့ ရှန်းလျန့်ရဲ့ ​ကြောက်ပြီး ငိုမဲ့မဲ့ မျက်နှာ​​ပေးကို စခရင်​ရှော့ရိုက်ပြီးသားပဲ​​ဟေ့ ... ပြီးမှ စိတ်ခံစားချက် ပုံ​တွေ လုပ်ရမယ် ရယ်ရလွန်းတယ်]

[ငါငယ်ငယ်တုန်းကလည်း ငန်းဆိတ်တာ ခံရဖူးတယ်ဆိုတာကို သက်​သေခံပါတယ်... ငါဘယ်​တော့မှ ​မေ့မရခဲ့ဘူး]

[ဒီငန်းက ​ချောင်း​ချောင်းကို မလိုက်ဘူး​နော်... တော်တယ် ငန်း​လေး... မင်း​ကောင်း​ကောင်းလုပ်ခဲ့တယ်]

[ပရိုဂရမ်အဖွဲ့က လူ​တွေ ​သေ​ကုန်ကြတာလား... ဘာလို့ ဧည့်သည်​တွေကို မကူညီ​ပေးတာလဲ]

[လူ​တွေ လိုတာ ဒီeffectပဲ... ထိချက်ပြင်းတယ်​​ဟေ့]

အဆုံးတွင် သက်လတ်ပိုင်း အမျိုးသမီးတစ်​ယောက် ​ရောက်လာပြီး ငန်းကို ဆွဲ​ခေါ်သွားခဲ့သည်။ ဝက်က ဝက်ခြံအတွင်းမှ ​ပြေးထွက်လာ​သော​ကြောင့် ခြံတံခါးကို ဖျက်ဆီးမိသွားပြီး ငန်းအ​တော်များများက သူမအိမ်မှ ​ပြေးထွက်လာကြ​တော့သည်။

သို့​သော်လည်း ထိုငန်းက ရှန်းလျန့်​နောက်ကို မည်သည့်အ​ကြောင်း​ကြောင့် လိုက်​နေသည်ကိုကား ဘယ်သူမှ မသိလိုက်ကြ​ပေ။

သူတို့ကို ကူညီ၍ ဝက်ဖမ်း​ပေး​သော ထန်ချောင်း​ချောင်းကို ​ကျေးဇူးတင်သည်က တစ်​ကြောင်း၊ ငန်းလိုက်ဆိတ်ခံရသည့် ရှန်းလျန့်ကို ​တောင်းပန်သည်ကတစ်​ကြောင်း အ​ကြောင်းအမျိုးမျိုး​ကြောင့် ထိုသက်လတ်ပိုင်း အမျိုးသမီးက သူတို့အတွက် ငန်းနှင့် အသီးအရွက်များ အထူးတလှယ် ​ပေးခဲ့သည်။

ထို "​မြေပြင်​ပေါ်တွင် ​ပြေး​နေ​သော" ပါဝင်ပစ္စည်း ရှာရမည့် တာဝန်သည်လည်း ​အောင်မြင်သွားခဲ့​လေပြီ။

ထန်​ချောင်း​ချောင်းက အလွန်အမင်း ​ပျော်ရွှင်​နေသည်။ သူမက မ​တော်တဆ တာဝန်ကို ပြီး​မြောက်သွားမည်ဟု မထင်ထားခဲ့​ပေ။ အခု​လေးတင် ဝက်ဖမ်းရန် သုံးခဲ့ရသည့် အင်အားများက အလဟဿ ဖြစ်မသွားခဲ့​။

ဒါရိုက်တာနှင့် ကင်မရာမန်းများ: 'ဒီလိုနဲ့ အဆင်​ပြေသွားတာလား'

[ဒါ​တွေအားလုံး ​ချောင်းပေါင်ရဲ့ ​အောင်မြင်မှုပဲ... သူတို့​တွေက သူတို့ရဲ့ ပုံရိပ်ကို အပျက်ဆီးခံပြီး​တော့ ရခဲ့တာ... ချောင်း​ချောင်းက အ​တော်ဆုံးပဲ]

[ဝက်ဖမ်းတဲ့အ​ကြောင်း ထပ်မ​ပြောကြနဲ့​တော့... ထန်​ချောင်း​ချောင်းက ချစ်စရာ​ကောင်းပြီး လှပတယ်လို့ပဲ မှတ်ထားကြစမ်းပါ]

[ဟားဟားဟား... ဖန်​တွေ​ရေ... ကိုယ့်စိတ်ကို မလိမ်ကြစမ်းပါနဲ့... ကင်း​ကောင်ဘာဘီ ဖြစ်ဖို့ ထန်​ချောင်း​ချောင်းထက် သင့်​တော်တဲ့သူ အခုထိ မ​မွေး​သေးဘူး]

ရှန်းလျန့်က အ​မောတ​ကော ဖြစ်​နေခဲ့သည်။ သူ့နှလုံးခုန်သံက အချိန်အ​တော်ကြာသည်ထိ မငြိမ်နိုင်ဘဲ ​ချွေး​အေးများပင် ပြန်လာခဲ့သည်။ သူ ထိုငန်းဆီကို တစ်လှမ်းပင် တိုးမသွားရဲပါ​ပေ။

ထန်​ချောင်း​ချောင်းက စိတ်​အေးသက်သာဖြစ်​နေ​သော အမူအယာဖြင့် ကြိုးကို ကိုင်ထားခဲ့သည်။ သူမက ငန်းကိုဆွဲကာ ကြိုးနှင့်ချည်လိုက်ပြီး အပြန်လမ်းကို ​လျှောက်သွား​တော့၏။

အပြန်လမ်းတွင် ​ရေကန်လေးတစ်ခုကို ဖြတ်သွားရ​သောအခါ ထန်​ချောင်း​ချောင်းက ​ဝေ့ရီချီနှင့် ကျိုးမုန့်ကို ​တွေ့လိုက်ရသည်။ သူတို့က အပြာ​​​ရောင် ရာဘာ​ဘောင်းဘီရှည်ကို ဝတ်ထားပြီး ငါးမျှား​နေကြ​သော်လည်း ကျိုးမုန့်က တစ်ကိုယ်လုံး ရွှံ့များဖြင့် ​ပေကျံကာ ကမ်း​လေး​ပေါ်တွင် စိတ်ပျက်အား​လျော့စွာ ထိုင်နေခဲ့သည်။ သူမမျက်နှာက အလွန်အမင်း ချစ်စရာမ​ကောင်း​​နေပေ။

ငါးကလည်း အလွန် ​ချော်ထွက်​နေသည်။ သူမက အချိန်အ​တော်ကြာ ဖမ်း​နေခဲ့​သော်လည်း ငါးအမြီး​လေးပင် မထိနိုင်ခဲ့​ပေ။ ဆန့်ကျင်ဘက်အ​နေဖြင့် သူမမျက်နှာတွင် ရွှံ​ရေအပြည့်သာ ဖြစ်သွားသည်။ သူမက နံ​စော်ကာ ညစ်ပတ်လို့ ​နေ​လေပြီ။

ကျိုးမုန့်က ထန်​ချောင်း​ချောင်းတစ်​ယောက် စိတ်​အေးသက်သာဖြင့် ငန်းကို သယ်လာပြီ သူမခန္ဓါကိုယ်ကလည်း သန့်ရှင်း​နေ​သေးသည်ကို ​တွေ့လိုက်ရသည်။ သူမမျက်လုံးများက မနာလိုမှုအပြည့် ဖြစ်သွား​လေသည်။

သူမက ငါးဖမ်းရန်အတွက် ရုန်းကန်​နေရ​ဆဲ ဖြစ်သော ​ဝေ့ရီချီကို ထပ်ကြည့်လိုက်မိသည်။ သူမက သူတို့နှစ်​ယောက်က တာဝန်များကို အရင်​ရွေးရသူဖြစ်ပြီး သူမကို စိတ်​သောက​ရောက်​စေရသည့်အတွက် အလွန်​ဒေါသထွက်သွားရ​လေသည်။

ထန်ချောင်း​ချောင်းက ကမ်း​လေး​ပေါ်တွင်ရပ်ကာ ငါးဖမ်းပိုက်အရှည်ကြီးကို ကိုင်လျက် ဘယ်မှညာသို့ ပစ်လဲကျ​နေ​သော ​ဝေ့ရီချီကို ကြည့်လိုက်သည်။ ​ရေ​ပေါ်တွင် လှိုင်း​လေးများ ​ပေါ်လာ​သော်လည်း သူက​တော့ အကူအညီမဲ့​နေဆဲပင်။ သူ၏ ဝမ်းနည်း​နေ​သော မျက်နှာ​လေးက အလွန်အမင်း သနားစရာ​ကောင်း​နေခဲ့သည်။

ထန်​ချောင်း​ချောင်းက ​ပြောလိုက်သည်၊ "​ဝေ့ရီချီ... မလှုပ်နဲ့"

​ဝေ့ရီချီက သူမစကားများကို ကြား​သောအခါ ချက်ချင်းရပ်လိုက်သည်။ သူက ထန်​ချောင်း​ချောင်းကို သံသယဖြစ်စွာ လှည့်ကြည့်လိုက်​​လေသည်။

တစ်ခဏအကြာတွင် ထန်​ချောင်း​ချောင်းက သူ့ညာဘက်ကို လက်ညှိုးထိုးပြလိုက်သည်။ ခပ်ဝဝငါးတစ်​ကောင်က စက်ဝိုင်းပုံ လှည့်ပတ်​နေ​လေသည်။ ယခုအချိန်တွင် ​ရေက ရွှံ့ထူလွန်း​နေခဲ့ပြီး ​ဝေ့ရီချီသည်လည်း မမြင်နိုင်ခဲ့​ပေ။ သူက အသက်ပြင်းပြင်းရှူကာ ကိုယ်အ​ပေါ်ပိုင်းကို ကိုင်းလိုက်ပြီး ငါးဖမ်းပိုက်ကိုင်လျက် ငါးအနားကို ချဥ်းကပ်သွားလိုက်သည်။ ရုတ်တရက်ပင် ထိုငါးကို အုပ်လိုက်ပြီး ​ရေလည်း ဂယက်ထသွား​တော့​လေသည်။

"ကြည့်... အစ်မချောင်း​ချောင်း ကျွန်​တော် ဖမ်းမိသွားပြီ"

​ဝေ့ရီချီ ကျယ်​လောင်စွာ ​အောင်ပွဲခံလိုက်သည်။ 

ထန်​ချောင်း​ချောင်းက သူ့ကို လက်မအကြီးကြီး ​ထောင်ပြလိုက်ပြီး နှုတ်ခမ်းများ ​ကော့တက်လာသည်အထိ ပြုံးပြလိုက်သည်။

Xxxxxx