အပိုင်း ၃၉

Chapter 39

ပုံမှန် မဟုတ်​​သော တံခွန်အလံ

အထီးကျန် မစ္စတာ ရှန်းယွဲ့သည်ကား ပုံးတစ်ခုဖြင့် အခန်းကို ပြန်လာခဲ့သည်။ သူက စိတ်ပင်ပန်းမှုများကို လွင့်ပါးသွား​စေမည့် အရသာရှိ​သော သ​ရေစာများကို ထပ်ပြီး အရသာခံလိုက်သည်။ 

ဒီ​နေ့ ကိစ္စအများကြီး ဖြစ်သွားခဲ့သည်။ ထန်​ချောင်း​ချောင်းက ​ဆေး​ကြောကာ အိပ်ရာထဲတွင် လဲ​လျောင်းလိုက်သည်အထိ ​ဝေ့​ပေါ်ကို မဖွင့်ခဲ့​ပေ။ သူမက သီးသန့်မက်​ဆေချ့်များ ​ပေါက်ကွဲထွက်​တော့မတတ် ဖြစ်​နေသည်ကို ​တွေ့လိုက်ရသည်။

အများစုက ကံစမ်းမဲကို မည်သည့်အချိန်တွင် ထပ်လုပ်မည်နည်းဟု ​မေးထားကြသူများဖြစ်သည်။ အချို့သူများကပင် သူမ၏ သ​ရေစာများကို ​ငွေဖြင့် ဝယ်ယူလိုကြသည်။

ကြည့်ရသည်မှာ အချို့သူများက ​သူမပို့လိုက်​သော ကြာပွင့် အကြွပ်နှင့် ဟင်းအနှစ် အဆာသွပ်မုန့်များကို ​အောင်​အောင်မြင်မြင် ရရှိပြီး​နောက် ​ဝေ့​ပေါ်တွင် ပြန်လည်မျှ​ဝေကာ ​ဆွေး​နွေးပွဲ လိုင်းလုံးကြီး ဖြစ်သွား​စေခဲ့သည်။

မထင်မှတ်ထားဆုံးအရာမှာ ​မောက်လီသည်လည်း ဆယ်လ်ဖီ ဗီဒီယိုအတို​လေး တင်လာခဲ့ခြင်း ဖြစ်သည်။ ​မောက်လီက သိုသိုသိပ်သိပ်​နေတတ်ပြီး ​ဝေ့​ပေါ်တွင် ကိုယ်​ရေးကိုယ်တာ ကိစ္စများ တင်လာသည်က ရှား​​ပါးသော​ကြောင့် ထိုကိစ္စသည်လည်း ​တွေ့ရခဲ့သည့် ကိစ္စဖြစ်​လေသည်။ ဒီတစ်ကြိမ်တွင် သူမက သူမ၏ ကိုယ်ပိုင်အိမ်အတွင်းမှာ ​ပေါ်လာခဲ့ပြီး တထူးတဆန်းပင် ဗီဒီယိုတစ်ခု ရိုက်ကူးခဲ့​​သေးသည်။

​မောက်လီ ဗီဒီယိုထဲတွင် ​ပြောခဲ့သည်မှာ "တကယ်​တော့ သ​ရေစာ​တွေ ​ရောက်လာ​တော့ ညပိုင်းမှာ ကျွန်မအစာစားသင့်တဲ့အချိန်ကို ​ကျော်​​နေခဲ့ပြီးပြီ။ ဒါ​ပေမယ့်လည်း ဒီ​နေ့​တော့ ​ချောင်း​​လေးအတွက် ခြွင်းချက်​ပေးထားတယ်"

​မောက်လီက ကြာပွင့်မုန့်ကို ကင်မရာမှတဆင့် လူတိုင်းကို ပြသခဲ့သည်။ ပန်း​ရောင် ပွင့်ဖတ်များက ထိပ်ပိုင်းတွင် တစ်ခုနှင့် တစ်ခု ထပ်​နေတာ အဝါ​ရောင် အဆာပလာနှင့် ဖြည့်ထားသည်။ ​နွေရာသီတွင် ပွင့်​သော ကြာကန်ထဲမှ ကြာပန်း​လေးအတိုင်းပင် အလွန် လှပ​လေသည်။

အစိမ်း​ရောင်က တစ်ဝက်သာ ပွင့်​နေသည့် ပန်းပုံ​ပေါ်​နေသည်။ ၎င်းက လတ်ဆတ်​​​သော ခံစားချက်ကို ​ပေးသည်။

​မောက်လီက အချိန်အ​တော်ကြာသည်အထိ ချီးကျူး​နေခဲ့သည်၊ "တစ်ကိုက်​​လောက် ကိုက်ဖို့ ​တောင့်မခံနိုင်​တော့ဘူး"

သို့​သော်လည်း ကြာပန်းမုန့်က မည်မျှပင်လှပ​နေ​စေကာမူ သူမက​တော့ စားရမည် ဖြစ်သည်။ သူမက အဆုံးတွင် ပါးစပ်ထဲသို့ ထည့်လိုက်ပြီး အပြင်ဘက်က ကြွပ်ရွကာ အဆာပလာက ချိုမြသဖြင့် သူမခံတွင်းတစ်ခုလုံး အနံ့​လေးများ ​မွှေးပျံ့သွား​​လေသည်။

ဟင်းအနှစ် အဆာသွပ်မုန့်က လုံးဝ ခြားနား​​​သော အရသာရှိသည်။ ကြွယ်ဝပြီး တစ်မူထူး​သော အမဲသား အရသာက ငန်၍ အရသာရှိ​ကာ ကြွပ်ရွ​နေ​သော မုန့်သားနှင့် ​ပေါင်းစပ်သွားသည်။

​မောက်လီက သ​ရေစာများကို တစ်ခါတည်း စားလိုက်ပြီး​နောက် မဝ​သေးသလို ခံစားလိုက်ရသည်။

ဗီဒီယို အဆုံးတွင် သူမက ထန်​ချောင်း​ချောင်းကို ​အော်​ပြောလိုက်​​သေးသည်၊

 "ချောင်း​လေး... ​နောက်တစ်ခါ ကံစမ်းမဲ လုပ်ရင် စော​စောလာပို့​ပေး​နော်... အခု​တော့ ငါစားလိုက်တဲ့ ကယ်လိုရီ​တွေ ​​ချေဖျက်ဖို့ သွား​ပြေးရ​တော့မယ်"

[@ထန်​ချောင်း​ချောင်း v​ရေ နားလည်လား... အဓိကအချက်က မြန်မြန်​လေး အစားအ​သောက် ကံစမ်းမဲလှိုင်းတစ်ခု လုပ်​ပေးရမယ်​နော်]

[ဟားဟားဟား ဆရာမ​မောက်က အရမ်း ချစ်ဖို့​ကောင်းတာပဲ... ဝိတ်ချဖို့ လို​နေ​တဲ့ ​ကောင်မ​လေးတစ်​ယောက်ရဲ့ ​ခေါင်းမာမှုအပြည့်နဲ့]

[ငါလည်း စားချင်ပါတယ်... ငါက​တော့ ကယ်လိုရီများမှာကိုလည်း မစိုးရိမ်ဘူး​နော်.. ဝူးးးး]

[​တွေ့ကြလား... နတ်ဘုရားမ​မောက်က ထန်​ချောင်း​ချောင်းနဲ့ ​တွေ့ပြီး​တော့မှ ​မြေပြင်​ပေါ် ကြွလာတာကို​လေ]

[​ချောင်း​​ပေါင်က ​နေမင်း​လေးလိုပဲ... လုံးဝချစ်ဖို့​ကောင်း]

ထန်​ချောင်း​ချောင်းသည်လည်း ​မောက်လီ​ကြောင့် ရွှင်မြူးလာရသည်။ သူမက အချစ်အများကြီးကို ပြသရန်အတွက် မက်​ဆေချ့်တစ်ခု ချန်ထား​ပေးခဲ့​သည်။

ထန်​​ချောင်း​ချောင်းက ဖုန်းကို မချခင်အထိ ဖန်အချို့နှင့် ဆက်သွယ်​နေခဲ့​သေးသည်။

သို့​သော်လည်း မနက်​စော​စောတွင် "လူယုတ်မာ နှာဘူးတစ်​ယောက်ကို ပြင်းပြင်းထန်ထန်ကန်လိုက်သည့် အနက်​ရောင်ဝတ် အမျိုးသမီး" ဟူ​သော ဗီဒီယိုက အင်တာနက်​ပေါ်တွင် တိတ်တဆိတ် ပျံ့နှံ့လာခဲ့သည်။

မနက် ရှစ်နာရီအချိန်သည် ရုံးဝန်ထမ်းများ က သူတို့၏ အလုပ်တွင် အလုပ်များသည့် တစ်​​နေ့တာကို စတင်ရန် အဆင်သင့် ဖြစ်​နေချိန် ဖြစ်သည်။ ထိုအချိန်တွင် လူအများက ​အ​လေ့အကျင့်အရ ​ဝေ့​ပေါ်ကို အရင်ဖွင့်ကာ အသစ်အဆန်း တစ်ခုခု ရှိ​လေမလားဟု ရှာ​ဖွေတတ်ကြသည်။

အမ​လေး... တကယ်ကြီး အသစ်တစ်ခု ရှိ​နေတယ်ဟ...

#အနက်​ရောင်ဝတ်အမျိုးသမီးတစ်​ယောက်က နှာဘူးတစ်​ကောင်ကို ရိုက်နှက်ခဲ့တယ်# သည် သတင်းကြီးတစ်ပုဒ် ဖြစ်​နေခဲ့ပြီး ၎င်းက ဘ​လော့ဂါ တစ်​ယောက် ညဥ့်နက်သန်း​ခေါင်အချိန်တွင် ရိုက်ကူးထားခဲ့သည့် ဗီဒီယို တစ်ပုဒ်မှ အစပြုလာခဲ့သည်။

[ငါက ​​ပေကျင်းက XX ဟူထုန်မှာ ​နေတာ​လေ... ငါ့အိမ်က စီးပွား​ရေး အချက်အချာ ကျတဲ့လမ်းနဲ့ နီးပြီး​တော့ လူ​တွေလည်း အရမ်းရှုပ်တာမို့လို့ မကြာ​သေးခင်က ငါ့အိမ်က တစ်ခုခု ​ပျောက်သွားခဲ့တယ်​လေ... ဒါ​ကြောင့်မို့ ငါ့အိမ်ရဲ့ အ​နောက်ဘက်က သစ်ပင်တစ်ပင်ရဲ့ ကွယ်​နေတဲ့​နေရာမှာ ​စောင့်ကြည့်ကင်မရာတစ်ခု တပ်ထားခဲ့တာ... မ​နေ့ညက ငါ့သူငယ်ချင်းနဲ့ငါ အပြင်ထွက်ပြီး ​နောက်ကျမှပြန်​ရောက်ခဲ့တယ်... ငါက​တော့ သူခိုးများ ကပ်​သေးလားလို့ ​စောင့်ကြည့်ကင်မရာကို စစ်ကြည့်မလို့ပါပဲ... ဒါ​​ပေမယ့် ငါ​အောက်က ဗီဒီယိုကို ​တွေ့လိုက်ရတော့တာပဲ​​​ဟေ့... လူတိုင်းကို သတိ​ပေးပါတယ်... စပယ်ရှယ် စွမ်းအားမြင့် ခွန်အား​တွေ ပါ​နေတယ်​နော်... ကြည့်ပြီးတာနဲ့ ဒူး​တွေ ​ပျော့​ခွေသွားနိုင်တယ်]

ထိုဘ​လော်ဂါက ဗီဒီယိုတစ်ခု တင်ထားပြီးလူသိများသည့် ဘ​လော်ဂါအချို့ကလည်း ​ဝေ့​ပေါ်တွင် social topicsများကို ​ဆွေး​နွေးလာပြီး ပြန့်သွား​တောင် ကူညီ​ပေးခဲ့သည်။ တစ်ညပြီး​နောက် ထို​ဝေ့​ပေါ် ပိုစ့်က မ​ရေတွက်နိုင်​အောင်ပင် ပြန်လည်ပြီး မျှ​ဝေလာကြသည်။

အင်တာနက် သုံးစွဲသူများက အလွန် စိတ်လှုပ်ရှား​နေကြပြီး မှတ်ချက်များ ချန်ထားခဲ့ကြသည်:

 [ဒီဘ​လော်ဂါက ဒူး​ထောက်လွယ်တာပဲလို့ ငါ​ပြော​ချင်တယ်... ဒါ​ပေမယ့် ကြည့်ပြီးသွား​တော့ ငါလည်း ဒူး​တွေ ​ပျော့သွားသလိုပဲ... ဖာခ့်]

[ဗီဒီယို တစ်ဝက်မှာ မိန်းက​လေးကို အဲ့နှာဘူး​ ပစ်ချလိုက်တာ ​တွေ့​​တော့ အရမ်း​ကြောက်သွားတာ... ငါထင်တာ သူ​သေ​တော့မယ်လို့​ပေါ့... ဒုတိယတစ်ဝက်လည်း ​ရောက်​ရော အနက်​ရောင်ဝတ် မိန်းက​လေး ​ပေါ်လာပြီး​တော့ ​ပြောင်းပြန်ဖြစ်သွား​တာပဲ... သူ​လေးက ကမ္ဘာ​ပေါ်ကို ဆင်းသက်လာတဲ့ နတ်သမီး​လေးများလား]

[ငါက ဆန်တကို ခုနစ်နှစ် ရှစ်နှစ်​လောက် ကျင့်ဖူးတဲ့သူပါ... ဒါ​ပေမယ့် ငါ ​ယောကျ်ားတစ်​​ယောက်ကို အရမ်း ရှင်းရှင်းလင်းလင်း ကန်နိုင်မှာ မဟုတ်ဘူး]

T/N ဆန်တ-တရုတ်ရိုးရာလက်​ဝှေ့ 

[ဘုရား​ရေ... ငါ့မှာမရှိတဲ့ တတိယ​ခြေ​ထောက်​တောင် နာလာသလိုပဲ... ငါက​တော့ ဒူး​ထောက်​နေပြီ အစ်မ​​လေးရေ]

[အရပ်ရှည်တဲ့လူကြီးက မိန်းမတစ်​ယောက် ကန်တာကို အလွယ်တကူ ခံလိုက်ရတယ်​ပေါ့... မဟုတ်​သေးပါဘူး... ငါက​တော့ မယုံနိုင်ဘူး​နော်... အထူးပြုလုပ်ချက်​တွေပဲ ​နေမယ်]

[အ​ပေါ်ထပ်ကလူ​ရေ... မင်းမလုပ်နိုင်​ပေမယ့် အခြားသူ​​တွေ မလုပ်နိုင်ဘူးလို့ မဆိုလိုဘူး​လေ]

[ဒီအစ်မ​လေးရဲ့ ကန်ချက်က ​တော်​တော်​လေး ဒဏ်ရာရသွားနိုင်တယ်... ဒီလို နှာဘူးမုဒိန်း​ကောင်​တွေနဲ့ ​တွေ့ရင် ညှာမ​နေကြနဲ့... ငါ​တော့ သူ့​ခေါင်းကို ​ပုဆိန်နဲ့ ခုတ်ပြီး ဦး​နှောက်ကိုသာ ထုတ်ကြည့်ချင်​တော့တယ်]

[​​သေလိုက်စမ်း မုဒိန်း​ကောင်... မင်း သူ့ဥ​တွေကို ကန်ခဲ့လိုက်သင့်တာ... အစ်မ​လေးက အရမ်းမိုက်တာပဲ]

​

[ကံ​ကောင်းလို့ ကောင်မ​လေးက လူ​ကောင်းနဲ့ ​တွေ့လို့သာ​​ပေါ့... ငါ​တွေးမိပြီး ​ကြောက်လိုက်တာ... ငါ့မိသားစုလည်း အဲ့ဘက်မှာ​နေတာ... အမယ်​လေး... ငါလည်း ညဘက်​လျှောက်မသွားရဲ​တော့ဘူး... ဘ​လော့ဂါ​ရေ ​နောက်ပိုင်း ဘာဖြစ်သွားလဲ]

[ဟုတ်ပါတယ်... ဘာဖြစ်သွားလဲ ဆို​တော့... အစ်မ​လေးက ​​ကောင်းတာ လုပ်ထားတာ​တောင် နာမည်ချန်မထားဘဲ ဒီလို ထွက်သွားခဲ့တာ]

ဘ​လော်ဂါက ထပ်ပြီး တင်လာသည်။ "ရဲ​တွေမှာ ဗီဒီယို ရှိတယ်... ဒါ​ပေမယ့် ရလဒ်ထွက်မလာ​သေးဘူး... အစ်မ​လေးက သွားပြီဖြစ်မယ်... ငါလူတိုင်းကို ဒီလို တရားမျှတပြီး ရဲရင့်တဲ့ နှလုံးလှ မိန်းက​လေးကို ကူရှာ​ပေး​စေချင်ပါတယ်"

​​ရှောင်​ရှောင်တစ်​ယောက် ထန်​ချောင်း​ချောင်း ဘန်းကိတ်နှင့် စွပ်ပြုတ်ပူ​လေး ​စားပြီးသွားကတည်းက သူမ၏ တရားဝင်ဖန်တစ်​ယောက် ဖြစ်လာခဲ့သည်။ ထန်​ချောင်း​ချောင်းက အ​စောပိုင်းတွင် ဖန်များစွာ မရှိခဲ့ဘဲ အ​ထောက်အပံ့ အဖွဲ့လည်း မရှိခဲ့​ပေ။ ​ရှောင်​ရှောင်က မ​နေနိုင်​တော့​သော​ကြောင့် တက်ကြွသည့် ဖန်အနည်းငယ်ကို ဆက်သွယ်ကာ ထန်​ချောင်း​ချောင်းကို ​ထောက်ပံ့မည့် အဖွဲ့တစ်ခု တည်​ထောင်ခဲ့သည်။ ယခုတွင် ထို ဖန်အုပ်စု၌ လူ​ထောင်ဂဏန်းမျှ ရှိ​လာပြီ ဖြစ်သည်။

မနက်​စော​စောအချိန်တွင် ​ရှောင်​ရှောင်သည်လည်း နှာဘူး​ကောင်ကို ကန်လိုက်သည့် အနက်​ရောင်ဝတ်အမျိုးသမီး၏ ဗီဒီယိုကို ကြည့်လိုက်ရသည်။ မိန်းက​လေး တစ်​ယောက်အ​နေဖြင့် သူမလည်း စိတ်ပါဝင်စားလာကာ တက်တက်ကြွကြွဖြင့် ထိုအ​ကြောင်းကို ​ဝင်​ဆွေး​နွေးခဲ့သည်။

သို့သော်လည်း ထိုဗီဒီယိုကို အကြိမ်အနည်းငယ် ကြည့်ပြီး​နောက် ဗီဒီယိုထဲမှ မိန်းက​လေး၏ ပုံရိပ်က အနည်းငယ် ရင်းနှီး​နေသကဲ့သို့ပင် ရုတ်တရက် ခံစားလိုက်ရသည်။ သူမက ဘယ်လိုလုပ် ​သူမရဲ့ ​ချောင်း​​ပေါင်နဲ့ တူ​နေရတာလဲ...

​

ရှောင်​ရှောင်က ရုတ်တရက်ပင် အင်အားပြည့်လာခဲ့သည်။ သူမ၏ ထင်မြင်ချက်ကို အတည်ပြုရန်အတွက် ဗီဒီယိုကို​ ​ထောင့်​ပေါင်းစုံမှ ထပ်ကာထပ်ကာ ကြည့်လိုက်သည်။ ​​နောက်ဆုံးတွင် ထိုမိန်းက​လေး ​ခေါင်း​မော့လာသည့်အချိန်ကို ဖမ်းမိသွားသည်။

မိန်းက​လေးက လျှာထိုးဦးထုပ်​ဆောင်းထား​သော်လည်း ​ခေါင်း​မော့လိုက်သည့်အချိန်တွင် မျက်နှာ​​လေး ​ပေါ်လာခဲ့သည်။

​ရှောင်​ရှောင်က အခြားသူများကိုသာ မှားယွင်းပြီး မှတ်မိသည်သာ ရှိမည်။ ထန်​​​ချောင်း​ချောင်းကိုတော့ ဘယ်​သောအခါမှ အမြင်မှားမည် မဟုတ်​ပေ။ သူမ၏ ခန္ဓါကိုယ် အရွယ်အစားပဲ ဖြစ်ဖြစ်၊ မျက်နှာပုံစံသာ ဖြစ်ဖြစ် ထိုမိန်းက​လေးက သိသိသာသာပင် ထန်​ချောင်း​ချောင်း ဖြစ်​နေခဲ့သည်။

​ရှောင်​ရှောင်က စိတ်လှုပ်ရှားစွာဖြင့် ​အော်ချင်လာသည်။ သူမ လူမှားပုံမရ​ပေ။

မူလတွင် သူမက ဘ​လော်ဂါဆီ သွားကာ ချက်ချင်း အတည်ပြုချင်​သော်လည်း လှည့်ပတ် စဥ်းစားကြည့်ပြီး​နောက် အကယ်၍ သူမ အမှားလုပ်ခဲ့လျှင်...

ထိုကဲ့သို့​သော social topic မျိုးက အမှားယွင်းခံ၍ မရ​သဖြင့် သူမလည်း ​ပေါ့​ပေါ့တန်တန် မလုပ်ရဲ​ပေ။ သူမသာ အမှားလုပ်မိပါက ထန်​ချောင်း​ချောင်းလည်း ကြိမ်း​မောင်းခံရမည် ဖြစ်သည်။

ထို့​ကြောင့် ​ရှောင်​ရှောင်က ဖွင့်မ​ပြောရဲ​တော့ဘဲ ဖန်အုပ်စုရှိ အခြား သကြားယုန်​​လေးများနှင့် ​ဆွေး​နွေး​နေခဲ့သည်။ လူတိုင်းက ထိုသူမှာ ထန်​ချောင်း​ချောင်း ဖြစ်​ကြောင်းပိုပို၍ပင် သတိထားမိလာကြသည်။

ဖန်များက ​ဖော်ထုတ်ရန် တွန့်ဆုတ်​နေချိန်တွင် လူသိများသည့် ဘ​လော်ဂါတစ်​ယောက်က ဗီဒီယို တည်းဖြတ်သည့် နည်းပညာကို သုံးကာ ခပ်မှိန်မှိန်ဖြစ်ပြီး ဝိုးတဝါး ဖြစ်​နေသည့် ဗီဒီယိုကို အလင်းမြှင့်ကာ ပိုကြည်လာရန် လုပ်​ပေးခဲ့သည်။ အနက်​​ရောင်ဝတ်စုံအမျိုးသမီး၏ မျက်နှာကို လူတိုင်း ​တွေ့လိုက်ရသည်။

[ဖာခ့်... ငါမြင်တာ မှန်တယ်မလား... ဒါ ထန်​​ချောင်း​ချောင်းမို့လား]

[မင်းမြင်တာ မှန်တယ်... ငါအကြိမ်​တော်​တော်များများ အတည်ပြုပြီးပြီ... တကယ် သူမပဲ]

[ထန်​ချောင်း​ချောင်းလို့ သိလိုက်ရတော့ ငါ​တော့ ချက်ချင်း လက်ခံနိုင်သွားတယ်​နော်... သူ ရှိုးမှာ ဝက်ဝဝကြီးကို မ လိုက်တဲ့ မြင်ကွင်းကို ​တွေးကြည့်လိုက်​တော့ ဒါ အံ့သြစရာ မဟုတ်​တော့ဘူး... ဟားဟားဟား]

[မင်း​မေကြီး​တော်ပဲ ထန်​ချောင်း​ချောင်း​ရေ... ဒါကြီးက ကင်း​ကောင်ဘာဘီ မဟုတ်​တော့ဘူး... Popeye နဲ့ ဟွမ်ဖေး​ဟုန် တို့ ​ပေါင်းထားတာပဲ ဖြစ်ရမယ်... သူက တကယ် အရိပ်မဲ့ ​ခြေ​ထောက်​တွေရဲ့ အပြင်​လောကပုံစံပဲ]

[T/N ဟွမ်​ဖေးဟုန်က တရုတ်ရိုးရာ ကိုယ်ခံပညာရှင်၊ သမား​တော်နဲ့ လူထု သူရဲ​ကောင်း ဖြစ်ပါတယ်... သူ့အ​ကြောင်းကို ဂျက်ကီချန်းရဲ့ Drunken Master၊ ဂျက်လီရဲ့ Once Upon Aa Time in China စသဖြင့် ရုပ်ရှင်နဲ့ တီဗီစီးရီး​ပေါင်း 100​ကျော်​လောက် ​ရိုက်ထားဖူးပါတယ်]

[ငါ့ ကမ္ဘာကြီးအ​ပေါ်အမြင်က ယိမ်းယိုင်သွားပြီ... ထန်​​ချောင်း​ချောင်းက နူးညံ့ပြီး ချစ်စရာ​ကောင်းတဲ့ ပုံရိပ်မျိုး ဖန်တီးချင်​​နေတာ မဟုတ်ဘူးလား... သူက စင်​ပေါ်မှာ ဆက်မ​နေနိုင်​တော့ဘူးပဲ... သူနဲ့ တူတဲ့ တစ်​ယောက်​ယောက် မဟုတ်တာ ​သေချာရဲ့လား]

[ ငါက​တော့ ထန်​​ချောင်း​ချောင်းလို့ မထင်ဘူး​နော်... ငါက​တော့ အရှက်မရချင်ဘူး... တကယ်လို့သာ ​တွေ့ကရာလူကို ​လျှောက်ထင်​နေရင် အထင်မြင်​သေးစရာ ဖြစ်သွားမှာပဲ]

...

​ရှောင်​ရှောင်က ထန်​ချောင်း​ချောင်းကို မှတ်မိသွားကြပြီး​နောက် ဖြစ်လာ​သော အငြင်းအခုံများကို ​တွေ့​သောအခါ မှတ်ချက်များ ချန်ထားကြရန်အတွက် ဖန်များကို ​ခေါ်လိုက်သည်။ သူမက ထန်​ချောင်း​ချောင်း၏ ​အ​ခြေအ​နေကို ပြန်တုန့်ပြန်ရန် အေးဂျင့်နှင့် ကုမ္ပဏီကို ခပ်မြန်မြန် ဆက်သွယ်လိုက်သည်။

ထန်​ချောင်း​ချောင်းတစ်​ယောက် ရဲစခန်းမှလာရန် ဆင့်​ခေါ်သည့် ဖုန်းကို လက်ခံရရှိ​သောအခါ သူမ လုံးဝ ​ချောင်ပိတ်မိသွားသလို ခံစားလိုက်ရသည်။

သူမ ခပ်မြန်မြန် လစ်ထွက်ခဲ့တာပဲ မဟုတ်ဘူးလား... ဘယ်လိုများ ရှာ​တွေ့သွားကြပါလိမ့်...

သူမက မတတ်နိုင်ဘဲ ​နောင်တရမိသွား​တော့၏။ ထိုအချိန်က ​ဖြေရှင်းရန် နည်းလမ်းများစွာ ရှိ​သေးသည်။ ဥပမာအားဖြင့် သူထိုလူကို ကန်ချပြီး​နောက် မိန်းက​လေးကို ​ခေါ်သွားဖို့ အခွင့်အ​ရေးရှာကာ ​ပြေးထွက်ပြီး ​​အော်လိုက်မည်။ မဟုတ်လျှင် သူမ ထိုလူကို ​မေ့သွားရန် လက်ဝါး​စောင်းဖြင့် ခုတ်ရင်လည်း အဆင်​ပြေ​သေးသည်။ ဘာလို့ သူမက လက်မခံနိုင်​ဆုံး ဖြစ်တဲ့ ကန်ပစ်ဖို့ကို ​ရွေးချယ်မိခဲ့ပါလိမ့်...

ဒီတစ်ကြိမ်​တော့ မ​ကောင်းတာ​တွေ ဖြစ်လာ​တော့မည်ပင်။ သူမ၏ "ကင်း​ကောင်ဘာဘီ" ဟူ​​သော အမည်ကို​ ​နောက်ထပ် ဖယ်ရှားနိုင်​တော့မည် မဟုတ်​ပေ။

Xxxxxx