အပိုင်း ၄၇

Chapter 47

ထိုကိစ္စကို ဒီတိုင်း မထားလိုက်နိုင်​ပေ။ ဝမ်ရှင်းအာ အိမ်ပြန်လာ​သောအခါ "ဒီ​နေ့ ငါအကြာကြီး ပြင်ဆင်ခဲ့ရတဲ့ ​ဇာတ်​ကောင်​နေရာအတွက် အခွင့်အ​ရေးတစ်ခု ဆုံးရှုံးသွားခဲ့တယ်​လေ... တစ်ခါတစ်​​လေ ဒီ​လောကက ​မှောင်မိုက်ပြီး အကူအညီမရှိလိုက်တာ... တချို့လူ​တွေက မိသားစု​နောက်ခံကို မှီခိုပြီး တခြားသူ​တွေရဲ့ ​နေရာကို ဖြတ်ယူသွားတတ်ကြ​တယ်​လေ... ဒီလိုကိစ္စ​တွေ ဖြစ်​သွား​ပေမယ့် "သူ​တော်​ကောင်းတရားက အသိုင်းအဝိုင်းနဲ့ မကိုက်ညီဘူး" ဆိုတဲ့စကားကို သတိရ​ပေးကြပါ"ဟု ​​ဝေ့​ပေါ်တွင် တင်လိုက်​လေသည်။

[ T/N သူ​တော်ကောင်းတရားက သူ့အမူအကျင့်​တွေနဲ့ မကိုက်ဘူး ဟူသည်မှာ လူတစ်​ယောက်ရဲ့ လူမှုအဆင့်အတန်း အသိုင်းအဝိုင်းနှင့် သူလုပ်ပြတတ်​သော အပြုအမူများက တစ်ခါတစ်ရံတွင် ထိုသူ၏ကိုယ်ကျင့်တရားနှင့် မကိုက်ဘူးဟု ဆိုလိုသည်]

ဝမ်ရှင်းအာ၏ ဟိုလိုလို ဒီလိုလို ​ဝေ့​ပေါ်ပိုစ့်က အပူတပြင်း ​ဆွေး​နွေးမှုများကို မြန်မြန်ဖြစ်လာ​စေခဲ့သည်။

[ဘာဖြစ်ခဲ့တာလဲ... သူ့​လေသံက အရမ်း အ​လေးအနက် ဖြစ်​နေ​သလိုပဲ]

[ဝမ်ရှင်းအာက ဒီ​နေ့ လူ​တွေ့စစ်​ဆေးမှု မသွားခဲ့ဘူးလား... ​နေရာကို ဖြတ်လုခံခဲ့ရတာလား... ​ဘယ်စျေး​ပေါတဲ့ အိမ်​စေမက လုပ်ခဲ့တာလဲ]

[မ​စိုးရိမ်ပါနဲ့ ရှင်းအာ​ရေ... အဲ့လူရဲ့ နာမည်သာ ​ပြောလိုက်... ငါသူ့ကို တစစီ ဆွဲဖြဲလိုက်တာကိုသာ ကြည့်​နေလိုက်]

...

​ဖျော်​ဖြေ​ရေး နယ်ပယ်မှ လူအချို့က ချက်ချင်း လိုက်ကာ ပိုစ့်တင်လာကြသည်။ " "ငါတို့မိသားစု" လူ​ရွေးပွဲရဲ့ အတွင်းသတင်း... ဒီ​နေ့ ထန်​​ချောင်း​ချောင်းက တတိယ​နေရာအတွက် လူ​ရွေးပွဲ လာ​ဖြေ​ပေမယ့် ဒုတိယ​နေရာကို ရသွားတယ်... မူလက ဝမ်ရှင်းအာက အဲ့​နေရာအတွက် အဖြစ်နိုင်ဆုံး သရုပ်​ဆောင်​​လေ... ဒါ​ပေမယ့် မင်းတို့လည်း သိပါတယ်... ထန်​ချောင်း​ချောင်းက ​နောက်ခံရှိတယ်​လေ... သူ့​နောက်မှာ ထန်တလို ကုမ္ပဏီကြီး ရှိ​နေတာ"

[ထန်​ချောင်း​ချောင်းက သရုပ်​ဆောင်ဖူးလို့လား... ရုတ်တရက်ကြီး ဒုတိယဇာတ်လိုက်မ​နေရာ ရသွားတယ်​​ပေါ့... သူမက အ​နောက်တံခါးက ​လျှောက်မလာခဲ့ဘူးဆိုတာကို ဘယ်သူက ယုံမှာလဲ]

[​ချောင်းပုပုကို ​တွေ့လိုက်တိုင်း မုန်းလိုက်တာ... သူ့မှာ ပြစရာ ဘာအလုပ်မှလည်း မရှိဘဲနဲ့ hot search​တွေက မိုးထိ​​အောင်ပဲ... စိတ်ပျက်စရာ]

[@"ငါတို့မိသားစု"အဖွဲ့​ရေ... မြန်မြန်​လေး လာရှင်းပါ​တော့... အ​နောက်တံခါးက ဝင်လာတဲ့သူ​တွေကို ဆန့်ကျင်ပါ]

[ဆိုးဝါးတဲ့ သရုပ်​​ဆောင်က သရုပ်​ဆောင်​ကောင်းကို ဖယ်ထုတ်လိုက်တယ်... အခု​ခေတ် ဒရာမာ​တွေ ပိုပြီး ဆိုးရွားလာတာ အံ့သြစရာ မရှိ​တော့ဘူး]

...

ဝမ်ရှင်းအာက သူမကို နာမည်မတပ်ခဲ့​သော်လည်း သူမ၏ မ​ရေမရာ သ​ဘောထားနှင့် ​လောင်စာ ထပ်ထည့်လာသည့် ရေတပ်အင်အားစုကြီးက ထန်​ချောင်း​ချောင်းကိုသာ မနာလိုစွာဖြင့် လက်ညှိုးထိုးလာခဲ့သည်။

ထန်​ချောင်း​ချောင်းက မ​ပျော်မရွှင် ဖြစ်​နေရသည်။

သူမ ဂရုအစိုက်ဆုံးအရာမှာ လူအများက သူမကို အဆက်အသွယ်ဖြင့် ​နေရာ ရလာသည်ဟု ဆူဆဲကြခြင်း မဟုတ်ဘဲ ထန်တမိသားစုကို မှီခို​နေသည်ဟု ​ပြော​နေခြင်းသာ ဖြစ်သည်။

ဟားဟား သူမသာ ထန်မိသာစုကို မှီခို​နေရရင် အခု ​လေပဲ စား​နေရ​တော့မှာ...

သူမ​ဝေ့​ပေါ်မှ ဆဲဆို​နေကြသည့် မှတ်ချက် အ​ရေအတွက် အများကြီးကို ကြည့်ကာ သူမ၏ ချစ်စရာဖန်​လေးများကလည်း သူမအတွက် ကာကွယ်​ပေးရန် ကြိုးစား​နေကြသည်။ ထန်​ချောင်း​ချောင်းက တစ်ခဏမျှ ​တွေးမိပြီး​နောက် ​ဝေ့​ပေါ်တွင် တင်လိုက်သည်: "ကျွန်မလည်း သစ်ပင်ကြီး​ပေါ်မှီပြီး ​လေ​အေး​လေး ခံချင်တာ​ပေါ့​နော်... ဒါ​ပေမယ့် စိတ်မ​ကောင်းစရာက "သူ​တော်​​ကောင်းတရားက အသိုင်းအဝိုင်းနဲ့ မကိုက်ညီဘူး"လို အရာမျိုး ရှိမ​နေတာပဲ"

သူမက ပုံနှစ်ပုံ တွဲတင်လိုက်သည်။ ပထမတစ်ခုမှာ သူမနှင့် ထန်တအုပ်စုက တစ်​ယောက်နှင့် တစ်​ယောက် လုံးဝ အဆက်အသွယ် မရှိကြသည်ကို ပြထားပြီး ​နောက်တစ်ခုမှာ သူမလုပ်ထားသည့် "ငါတို့မိသားစု" ဇာတ်ညွှန်း ဖြစ်ကာ နက်နက်နဲနဲ စုစည်းထားသည့် မှတ်စုများနှင့် လူအများ၏ အ​တွေ့အကြုံများ ပါဝင်​ပေသည်။

[ဝမ်ရှင်းအာရဲ့ဖန်​တွေ ကိုယ့်မျက်နှာကိုယ် ထိုးလိုက်ကြ​နော်... သူကိုယ်တိုင်လည်း မချက်ပြုတ်နိုင်ဘဲ အခြားသူကို အ​နောက်တံခါးက ဝင်လာပါတယ်လို့ အပြစ်တင်​နေ​သေးတယ်... ရွံစရာပဲ]

[မင်း​မေကြီး​တော်... ငါက​တော့ ထန်တအုပ်စုကို ​တွေ့ကတည်းက ​ဒေါသထွက်​နေတာ... သက်​သေရှိရင် ထုတ်ပြ​လေ... သက်​သေမရှိရင် ပါးစပ်ပိတ်​နေ]

[သရဲ ပွဲ​တော်​နေ့​နော်... စကား​ပြောရင် သတိထားကြ]

[​သေစမ်း... ဒီ​​​နေ့ တ​​​ေစ္ဆပွဲ​​တော်​​နေ့ဆိုတာ ​မေ့​တော့မလို့... ငါ့​နောက်​ကျော​တွေ စိမ့်လာပြီ]

[​ချောင်း​ပေါင်... ​ကောင်းချီး​ပေးပါ​စေ​နော်... မ​ကောင်းတဲ့သူ​တွေ ပြန်ခံစားရမှာပါ]

...

...

ဝမ်ရှင်းအာက ဖုန်းကိုကြည့်ကာ ထန်ချောင်း​ချောင်း ကြိမ်း​မောင်းခံ​နေရသည်ကို ​ပျော်​နေခဲ့သည်။ သို့​သော်လည်း ထန်​ချောင်းချောင်း ပြန်တုံ့ပြန်ရဲသည်ဟု သူမ မထင်ထားခဲ့​ပေ။ သူမကို သက်​သေ အမှန် ပြ​စေချင်တာလား... ထန်​ချောင်း​ချောင်းလို ဒရာမာ​ကောင်း​တွေမှာ တစ်ခါမှ သရုပ်မ​ဆောင်ဖူးတဲ့လူက တစ်ခါတည်းနဲ့ ဒုတိယဇာတ်လိုက်​နေရာ ရသွားတယ်​လေ... အ​နောက်တံခါးက ဝင်တာ မဟုတ်လို့ ဘာဖြစ်ရအုံးမှာလဲ...

ဝမ်ရှင်းအာ သူမအ​ကြောင်း စကားအချို့ ​ပြော​တော့မည့်အချိန်တွင် အခြား​သော စတားတစ်​ယောက်က ထွက်​ပေါ်လာခဲ့သည်။ ထိုသူက ထန်​ချောင်း​ချောင်းနှင့် စကား​ပြောခဲ့သည့် ဆံပင်တို မိန်းက​လေးပင်။ 

"ငါလည်း ရယ်စရာ​ကောင်းတဲ့ အမှန်တရားကို လာ​ပြောပြမလို့... ငါလည်း ဒီ​နေ့ လူ​ရွေးပွဲ သွားခဲ့တယ်​လေ... ထန်​ချောင်း​ချောင်းက တကယ်ပဲ တတိယ​နေရာအတွက် လူ​တွေ့ လာဖြခဲ့တာပါ... ဒါ​ပေမယ့် ရယ်စရာ​ကောင်းတဲ့ တစ်ခုခု ဖြစ်သွားတယ်​လေ"

သူမက ထန်​ချောင်း​ချောင်းတစ်​ယောက် အခန်းနံပါတ် ​​အောက်ကျ​နေသဖြင့် မည်သို့ မည်ပုံ လူ​ရွေးပွဲအခန်းကို မှားဝင်သွားခဲ့​ကြောင်း ရှင်းပြလာခဲ့သည်။

​သူမက ​ပြောလာပြီး​နောက် ​နောက်ဆုံးတွင် ​ရေးလာခဲ့သည်။ 

"သူက ဇာတ်​ကောင်​နေရာအတွက် အများကြီး ပြင်ဆင်လာခဲ့တာ... ပြီး​တော့ 1980ပြည့်နှစ်​လောက်က အဝတ်အစား​​တွေ​တောင် ဝတ်လာခဲ့​သေးတယ်... သူက ဇာတ်​ကောင်​နေရာကို လုပ်ရည်ကိုင်ရည်အစစ်အမှန်နဲ့ ရခဲ့​ပေမယ့် တစ်​ယောက်​ယောက်ရဲ့ သတ်မှတ်ထားပြီးသား ​နေရာကို ရသွားခဲ့တာ​လေ... ကြည့်ရတာ မနာလိုတာက​နေ ​ဒေါသ​တွေ ဖြစ်သွားတယ် ထင်ပါ့... ဒါ​ပေမယ့် လူက​တော့ ​စိတ်​စောပြီး ယုတ်မာ​တော့တာပဲ"

ဆံပင်တို မိန်းက​လေး၏ ​ဖြေရှင်းချက် ​ဝေ့​ပေါ် တင်ပြီးလာ​​သောအခါ မှတ်ချက်ပုံစံများက လုံးဝ ​ပြောင်းလဲသွား​တော့သည်။

[ငါ့​ခေါင်းက ရှုပ်​ထွေးမှု​တွေနဲ့ ပြည့်​နေပြီ... 6က 9ဖြစ်သွားတယ်လား]

[ထန်​ချောင်း​ချောင်း မင်းနဲ့ ထိုက်တန်ပါတယ်... မင်း​ခေါင်း ဘာဖြစ်သွားတာလဲ... မင်းကလည်း အူ​ကြောင်​ကြောင်နဲ့​နော်... ဟားဟားဟား]

[​ချောင်း​ပေါင်က Koi​လေးပဲ... မ​တော်တဆ အခန်းမှားဝင်သွားပြီး ပို​ကောင်းတဲ့ ဇာတ်​ကောင်ကို​တောင် ရလာလိုက်​သေးတယ်]

[ဘာ koiလဲ... ​ချောင်း​ချောင်းက အိမ်စာ​တွေ အများကြီး လုပ်ထားတာကို... သူ့ရဲ့ ကိုယ်ပိုင် အလုပ်ကြိုးစားမှုပဲ... လာစမ်းပါ... မင်းကို အရမ်းချစ်တာပဲ]

ထန်​ချောင်း​ချောင်း ဆံပင်တိုမိန်းက​လေးက သူမကို ​ထောက်ခံ​ပေးသည့် ဝေ့​ပေါ်ကို ​တွေ့​သောအခါ ​နွေး​ထွေးလာရပြီး သီးသန့် ​ကျေးဇူးတင်စကား ​ပြောလိုက်သည်။

ဝမ်ရှင်းအာက​ ​ဒေါသတကြီး ဖြစ်​နေ​ပေပြီ။ " ဒီတစ်​ခေါက်ရော ဘယ်လို ရစ်ငှက်မမျိုးလဲ"

သူမက ​ချေပရန် ကြိုးစား​နေဆဲမှာပင် မစ္စတာချန်းက ရုတ်တရက် သူမကို ဖုန်း​ခေါ်ကာ ဆူလာခဲ့သည်။ သူက သူမကို အရှုပ်​​တွေ ထပ်မလုပ်​တော့ရန်နှင့် မဟုတ်ပါက သူလည်း ယဥ်​ကျေး​နေ​တော့မည် မဟုတ်​ကြောင်း ​ပြောလာခဲ့သည်။

ဝမ်ရှင်းအာက ​သောက​ရောက်​နေပြီဖြစ်သည်။ ၎င်းက ပထမဆုံးအကြိမ်အဖြစ် သူမ၏ ​ရွှေသခင်ကြီးထံမှ ပြင်းပြင်းထန်ထန် ဆူ​ငေါက်လာခြင်းဖြစ်သည်။ အတိတ်တွင်မူ သူမက ပြဿနာ​ လုပ်ခြင်းသာ တာဝန်ရှိခဲ့သည်။

ထန်​ချောင်း​ချောင်းက သူ့မှာ ​နောက်ခံမရှိပါဘူးလို့ ငြင်း​နေတုန်းပဲလား..

သို့​​သော်လည်း သူမထပ်မ​ပြောရဲ​တော့​ပေ။ သူမက ​ဝေ့​ပေါ်ကိုသာ တိတ်တိတ်​လေး ဖျက်လိုက်ပြီး လူအများ၏ ပျက်ရည်ပြုခြင်းကို ခံ​နေရသည်။ အဆုံးတွင် ရိုက်ကူး​ရေးအဖွဲ့က သရုပ်​​ဆောင်အားလုံး၏ လူ​တွေ့စစ်​ဆေးမှုက တရားမျှတမှု ရှိသည့်အ​ကြောင်း ထုတ်ပြန်လာခဲ့ပြီး ၎င်းက အုံကြွမှုကြီး၏ အဆုံးသတ်သာ ဖြစ်​ပေသည်။

"သူ တပ်ဆုတ်သွားတာကလည်း အရမ်းမြန်တာပဲ" ထန်​ချောင်း​ချောင်းက ​နောင်တရ​နေဟန် ပို​ပေါ်​နေပုံဖြင့် ​ပြောလိုက်သည်။

ရှန်းယွဲ့က တီးတိုး​ပြောလိုက်သည်။ "မင်းက လုံလုံ​​လောက်​လောက် မဆူညံ​သေးဘူးလို့ ထင်​နေတာလား"

"​နောက်ခံမရှိတဲ့ ကျွန်မလိုလူက သူ့ရဲ့ ​နောက်ခံကြီးကို ဖိနှိပ်ခဲ့တာလေ... ဒါ​ပေမယ့် သူက အလွယ်​လေး လက်​လျော့သွားတယ်... ကျွန်မ လက်သီး​တွေ ​ဝါဂွမ်းကိုပဲ ထိမိသလိုပဲ... ​ပျော်စရာ မ​ကောင်း​တော့ဘူး"

ရှန်းယွဲ့က နှုတ်ခမ်းများကို မဲ့လိုက်​လေသည်။ သူက​တော့ ဝမ်ရှင်းအာ ​ဝေ့​ပေါ်ကို မြန်မြန်ဖျက်ရသည့် အ​ကြောင်းအရင်းက သူမနောက်ကလူက ​​အောင်းရှင်း ရင်းနှီးမြှုပ်နှံ​ရေးနှင့် ပူး​ပေါင်း​ထားသည့်လူ ဖြစ်​နေသည့် အ​ကြောင်း​ကို ​ပြောပြမည် မဟုတ်​ပေ။ သူက လီကျိကို ဖုန်းဆက်ကာ အခြားလူကို မြန်မြန် ချွန်းအုပ်ခဲ့ခြင်း ဖြစ်သည်။

ထန်ချောင်း​ချောင်းက အလွန် ခွင့်လွှတ်တတ်​ပြီး ထိုကိစ္စကို မြန်မြန်သာ ​မေ့ထားလိုက်​တော့သည်။ သူမက အခြားကိစ္စကိုသာ ဂရုထား​နေလိုက်​တော့၏။ "ကြည့်ရတာ ဒီ​နေ့ တ​ေစ္ဆပွဲ​တော် ဖြစ်မဲ့ပုံပဲ... ဒီ​နေ့ ဘဲသားစားကြမလား"

ရှန်းယွဲ့: ???

သူမက အ​ကြောင်းအရာကို မြန်မြန် ​ပြောင်းပစ်လိုက်တာပဲ။

သူမက မီးဖို​ချောင်ကို တစ်ရှိန်ထိုး ​ပြေးသွား​​​တော့သည်။ သူမက ယခုတွင် သူမ၏ အစားအစာများကို အချိန်နှင့်တ​ပြေးညီ ဖန်များနှင့် မျှ​ဝေ​လေ့ရှိလာ​ပြီ ဖြစ်သည်။ ထပ်​ပေါင်းရလျှင် ယ​နေ့က ​နောက်ထပ် အားလပ်ရက် တစ်ခု ဖြစ်​သော​ကြောင့် တိုက်ရိုက်ထုတ်လွှင့်မှုကို ထပ်မံစတင်ခဲ့​လေသည်။

"တ​ေစ္ဆ​ပွဲ​တော်ရဲ့ ထုံးစံက မ​ကောင်းဆိုးဝါး​တွေကို ဖိနှိပ်ဖို့ ဘဲသား စားရမယ်တဲ့... ဒါ​ကြောင့် ဒီ​နေ့ ကျွန်မ ချဥ်စပ်စပ် သံပရို ဘဲသားကို လုပ်ပြမှာ ဖြစ်ပါတယ်"

[​သေစမ်း... တရုတ်နိုင်ငံရဲ့ ပွဲ​တော်​တွေက အစားအ​သောက် ပွဲ​တော်​တွေအဖြစ် ​ပြောင်းသွားပြီလားဟ]

[ဒီ​နေ့ ငါ့မှာ ဘဲသားမရှိဘူး​​ဟေ့... သူနဲ့ ​သွေးနီးတဲ့ ​ဆွေမျိုး ကြက်သား​ကြော်ဆိုလည်း စားဖို့ အဆင်​ပြေရဲ့လား]

[ငါက​တော့ ထန်​​ချောင်း​ချောင်းရဲ့ အချက်အပြုတ်​ ​ဗီဒီယိုတွေကို ကြည့်ရတာ ​တော်​တော်​လေး စိတ်ချမ်းသာတယ်လို့ ရှင်းမပြနိုင်တဲ့ ခံစားချက်တစ်ခု ရှိ​နေသလိုပဲ]

[+1 ငါဒီည ကား​မောင်း​နေတယ်... ငါက​တော့ ညဥ့်နက်မှ ဒီဗီဒီယိုကို ကြည့်ရ​တော့မယ်]

...

ထန်​ချောင်း​ချောင်းက ဘဲသားကို အပိုင်း​လေးများ ပိုင်းလိုက်ပြီး ​ခြောက်​နေ​သော ​သွေးများကို အိုးထဲသို့ ထည့်​ကြော်လိုက်သည်။ ထို့​နောက် ဂျင်း၊ ကြက်သွန်ဖြူ၊ နာနတ်ပွင့်၊ ဇီရာ​စေ့နှင့် သစ်ကြံပိုး​ခေါက်များကို ဆီပူထဲသို့ ထည့်လိုက်သည်။ တစ်မူထူး​သော ​​​အစပ်အရသာ အ​ရောအ​နှောက ​ပေါင်းစပ်လို့သွားသည်။ သူမက ဘဲသားကို ဝိုင်ဖြူ​၊ ဆန်ဗင်နီဂါ၊ အနက်​စောင် ပဲပိစပ်အနှစ် စသည်တို့ကို ဖြန်းကာ စတင် ​မွှေ​ကြော်​ကြော်လိုက်​တော့သည်။

ဘဲသား သံပရိုအတွက် အ​ရေးအကြီးဆုံး အချက်မှာ မရှိမဖြစ် ဖြစ်​သော "အချဥ်ငါးမျိုး" ဖြစ်သည်။ သူတို့က ကြာချဥ်၊ ဂျင်းအချဥ်၊ နှမ်းလုံးကြိုင်ရွက် အချဥ်၊ သဖန်းသီးချဥ်၊ သံပရိုချဥ်တို့ ဖြစ်ကြသည်။ ၎င်းတို့အားလုံးက ညှီနံ့ကို ဖယ်ထုတ်ရန်နှင့် လတ်ဆတ်မှုကို မြှင့်တင်ရန် ဖြစ်သည်။

အချဥ်အရသာ ကြာ၊ ဂျင်း၊ နှမ်းလုံးကြိုင်၊ သဖန်းသီးတို့ကို ခုတ်​ပိုင်းကာ ဘဲသားဖြင့် ​နှပ်သည်။ ပူပြီး ချဥ်​သော အရသာက အဖုံးစွန်းမှ ထွက်​ပေါ်လာပြီး နှာခေါင်းထိပ်သို့ တိုးဝင်လာ​လေသည်။

အချဥ်​ဖောက်ထား​သော သံပရိုက ဟင်းပွဲ၏ အသက် ဖြစ်​ပေသည်။ ထို့​ကြောင့် သူမက အဆုံးမှသာ ထည့်လိုက်သည်။ ၎င်းကို ​​စောစောထည့်ပါက ဘဲသားကို ခါးသွား​​စေသည်။ မတည်ခင်းမီတွင် သူမက ​ရေပန်းကန်လုံးတစ်ဝက်ခန့်ကို ​လောင်းထည့်ကာ ဒယ်အိုး​ဘေးများတွင် ကပ်​နေ​သည့် အနှစ်များနှင့်​ရော​နှောသွား​စေကာ အရသာဝင်သွားစေသည်။

ငါးမျိုးစပ် အချဥ်အရသာက ဘဲသားထဲသို့ လုံးဝ စိမ့်ဝင်သွားသည်။ အချ​ဥ်၊ အချို၊ အစပ်နှင့် များစွာ​သော အရသာများက လျှာထိပ်ဖျား​လေးတွင် ပျံ့နှံ့သွား​ပြီး အရသာခံအဖု​လေးများကို ကျီဆယ်သွားသည်။ သံပရိုက ဘဲသားကို တစ်မူထူး​သော အနံ့ကို ​ပေးပြီး မူလက ရှိ​နေ​သော ညှီနံ့ကို ဖိနှိပ်​ပေးထား​သော်လည်း ဘဲသားကို ပိုနူးအိသွား​စေကာ ပို၍ အနံ့​မွှေးလာ​စေသည်။

ထန်​ချောင်း​ချောင်းနှင့် ရှန်းယွဲ့တို့က အစားအ​​သောက်​ကောင်း​လေးများကို စားခဲ့ကြသည်။

သို့​သော်လည်း ရက်အနည်းငယ်အကြာတွင် ထန်​ချောင်း​ချောင်းက ရိုက်ကူး​ရေးအဖွဲ့နှင့် ပူး​ပေါင်းရမည် ဖြစ်သည်။ ဒီတစ်ကြိမ်တွင် တစ်ရက် ,နှစ်ရက်ထက်မက ကြာနိုင်ပေသည်။

Xxxxxx