အပိုင်း ၁၂၅

အခန်း(၁၂၅) - လုံးဝမရဘူး

သူ့လူယုံတော် ထွက်သွားပြီးနောက် ရှောင်ယွမ်ရှစ်က ထိုအမျိုးသမီးကို ကြည့်လိုက်သည်။

“မင်း မြန်မြန် လိုက်သွားသင့်တယ်။” ဟု ညွှန်ကြားပြခဲ့သည်။

ရှောင်မိသားစုဟောင်းကလူတွေကို ပြင်ပကမ္ဘာနှင့် ရောနှောနေခွင့်ပေးထားသော်လည်း အပြင်ထွက်သည့်အခါ သို့မဟုတ် အိမ်၌ ရှိနေချိန်တွင် သတိထားစောင့်ကြည့်ရသေးသည်။

အထူးသဖြင့် ဆိုးသွမ်းကောက်ကျစ်သည့် ချွေးမနှင့် နောက်တစ်ကြိမ် ဆက်ဆံခြင်းမှ တားဆီးကြရန် ဖြစ်သည်။

ထိုအမျိုးသမီးက ခဏလောက် စဉ်းစားပြီးနောက် မေးခဲ့သည်။ “ကျွန်မ မောင်လေးကော ဘယ်လိုလဲ။”

ထိုအချိန်မှာ ကောချွန်းရုက ပြန်ဖြေလိုက်သည်။ “နင့်မောင်ကို ငါ့ဆိုင်မှာ မန်နေဂျာလုပ်ဖို့ ငါတို့စီစဉ်ထားပြီးသား၊ နင် မသွားခင် သွားကြည့်လို့ ရတယ်။”

ထိုအမျိုးသမီးက ကောချွန်းရု လက်နှင့် ကိုယ်တိုင် ရွေးချယ်ထားသူ ဖြစ်သည်။

သူမက ရှင်သန်မှုအတွက် တစ်ယောက်ကိုတစ်ယောက် အားကိုးတကြီး မှီခိုနေရသော သူမနှင့် သူမ၏ မောင်လေးတို့၏ ဆန္ဒကို အသုံးချခဲ့သည်။ သူမ၏ မောင်လေးက သူမ၏ ပျော့ကွက် ဖြစ်တာကြောင့် ကောချွန်းရုက သူမကို ကိုင်တွယ်ရန် လွယ်ကူနေသည်။

အဓိကအချက်မှာ ထိုအမျိုးသမီးက ယခင်က အသက်မွေးဝမ်းကြောင်းပြုရန်အတွက်  ပြည့်တန်ဆာအဖြစ် တိတ်တဆိတ် အတင်းအကြပ် ခိုင်းစေခြင်း ခံခဲ့ရခြင်းပင် ဖြစ်သည်။

ထို့အတွက်ကြောင့် သူမက ကူးစက်ရောဂါတစ်ခုပင် ဖြစ်ခဲ့သည်။

ကောချွန်းရုက ရှောင်မိသားစုဟောင်းကို အလွန် မုန်းတီးခဲ့သည်။

သူမ မောင်ရဲ့ အနာဂတ်ကို ဖျက်စီးပစ်လိုက်တဲ့အတွက် ရှောင်မိသားစုရဲ့ အကြီးဆုံးမြေးကို သူ့ဘဝတစ်ခုလုံးမှာ သားသမီးမရနိုင်တဲ့အပြင် အနာဂတ်မှာ ဇနီးမရနိုင်အောင် လုပ်လိုက်တာ ဖြစ်သည်။

သူ့ဘဝမှာ သားစဉ်မြေးဆက်မရှိဘဲ သေပါစေ။

ထိုစကားကိုကြားသည့်အခါ ထိုအမျိုးသမီးက သက်ပြင်းတစ်ချက်ချလိုက်သည်။ "ဟုတ်ကဲ့ ကျွန်မ လုပ်လိုက်ပါ့မယ်။"

သူမက မသန့်ရှင်းသည့် ရောဂါတစ်ခု ကူးစက်ခံခဲ့ရပြီး ကြာရှည်စွာ အသက်မရှင်နိုင်တော့ပေ။

သူမ မသေခင်မှာ သူ့မရဲ့ မောင်ဖြစ်သူကို ခြေကုပ်ယူနိုင်အောင် ကူညီပေးနိုင်ဖို့သာ သူမ မျှော်လင့်ခဲ့တယ်။

ထိုအချိန်တွင် ရှောင်ယွမ်ရှစ်၏ ယုံကြည်ရသော အခြားလက်ထောက်တစ်ဦး ဝင်လာခဲ့သည်။

ရှောင်ယွမ်ရှစ်က ထိုအမျိုးသမီးကို လက်ပြလိုက်သည်။ "မင်း ထွက်သွားလို့ ရပြီ။"

သူမက ချက်ချင်း ထွက်သွားခဲ့သည်။

ယုံကြည်ရသည့် လက်ထောက်က လေးလေးစားစား အစီရင်ခံခဲ့သည်။ “သခင်ကြီး ကျွန်တော်တို့မှာ တွေ့ရှိချက်တချို့ရှိပါတယ်၊ ဒီဘိလပ်မြေထုတ်လုပ်နည်းကို သခင်ကြီးရဲ့ သားဖြစ်သူက မော့မိသားစုကနေတဆင့် ပေးခဲ့တာပါ။”

ရှောင်ယွမ်ရှစ်က ယခင်က ရှောင်မိသားစုဟောင်း၏ ဒုက္ခပေးမှုများနှင့် စိတ်အနှောင့်အယှက်ဖြစ်ခဲ့ရပြီး တော်ဝင်ခုံရုံးက အဖြစ်အပျက်များကို သိပ်ဂရုမစိုက်ခဲ့ပေ။

မကြာသေးမီက ဧကရာဇ်မင်းကြီးက ထိုစီရင်စုမြို့ငယ်လေး၏ ထောက်ပံ့မှုများကို အလွန်တန်ဖိုးထားပြီး အလုပ်သမားများအား ဘိလပ်မြေထုတ်လုပ်ရန် အလုပ်ရုံကြီးတစ်ခု ဆောက်လုပ်ခွင့်ပေးခဲ့ကြောင်း သူကြားသိခွင့်ရခဲ့သည်။

ပထမတော့ သူ သိပ်ဂရုမစိုက်ပေမယ့် နန်ရှီစီရင်စုမြို့က ဖြစ်ကြောင်း ကြားသိရပြီးနောက် ပိုစူးစမ်းဖို့ ဆုံးဖြတ်လိုက်သည်။

ထိုမှသာ ထုတ်လုပ်နည်းကို မျှဝေခဲ့သူမှာ ရှောင်မျိုးရိုးအမည်ဖြင့် အခြေခံစာသင်သားဖြစ်ကြောင်း သူသိခဲ့ရသည်။

ဧကရာဇ်မင်းမြတ်က သူ့ကို တောင်တစ်လုံး ဆုချခဲ့သည်။

မျိုးရိုးနာမည်ရှောင်နှင့် အခြေခံစာသင်သားဟာ သူ့သားအကြီးဆုံးလို့ ခံစားမိပေမယ့် တခြားသူတွေက သူ့အကြောင်း မကောင်းတာတစ်ခုခုကို သတိပြုမိမှာကို စိုးရိမ်တာကြောင့် ထပ်မမေးခဲ့ပေ။

ထို့ကြောင့် သူက စုံစမ်းရန် နန်ရှီစီရင်စုမြို့သို့ တစ်စုံတစ်ဦးကို စေလွှတ်လိုက်တာ ဖြစ်သည်။

ရှောင်မိသားစုဟောင်းက ရှောင်ဟန်ကျန့်၏ ဇနီးနှင့် ဆက်ဆံရေးရှိနေပြီဖြစ်ကြောင်း မသိမီက ထိုအကြောင်းကို ရှာဖွေတွေ့ရှိခဲ့ခြင်းဖြစ်ပြီး သူ့လူယုံတော်က ထိုအကြောင်းအား စုံစမ်းစစ်ဆေးပြီးမှ ယခုမှ ပြန်လည်ရောက်ရှိလာခြင်း ဖြစ်သည်။

သူက သိချင်စွာ မေးလိုက်သည်။ “ဘိလပ်မြေထုတ်လုပ်နည်းကို သူတို့ ဘယ်လိုရလာတာလဲ။”

သူ့လူယုံတော်က ပြန်ဖြေခဲ့သည်။ “သူ့ဇနီးသည်က သူ့ကို မျှဝေပေးခဲ့တာပါ။”

ထို့နောက် ရှစ်ချင်းလျို့က မသေမျိုးဘုန်းတော်ကြီး၏ တပည့်ဖြစ်ပြီး သူမ တီထွင်ခဲ့သော အရာများ အကြောင်း အားလုံးကို ပြောပြခဲ့သည်။

ရှောင်ယွမ်ရှစ်က ကြက်သေ သေသွားခဲ့သည်။ သူ့ရဲ့ ယုတ်မာသည့် ချွေးမတွင် ထိုသို့သော အရည်အချင်းများ ရှိမည်ဟု သူ မမျှော်လင့်ခဲ့မိပေ။

မသေမျိုး ဘုန်းတော်ကြီးရှိသည်ကိုတော့ သူ မယုံကြည်ခဲ့ပေ။

ရှစ်ချင်းလျို့က တာအိုဘုန်းတော်ကြီးထံမှ သင်ယူခဲ့သည်ကိုတော့ သူ သံသယ မရှိခဲ့ပေ။

မဟုတ်ပါက သူလို ရွာသူက ဘယ်ကနေ သိမည်နည်း။

သူက အနည်းငယ် မျက်မှောင်ကြုတ်လိုက်သည်။ "ဒါဆို ကျန့်အာကော ဘယ်လိုလဲ။"

သူက ယခင်က ရှောင်မိသားစုဟောင်း၏ နှောင့်ယှက်မှုကို အာရုံစိုက်ခဲ့ပြီး မကြာသေးမီက သူ့သားအကြီးဆုံးကို ဂရုမစိုက်မိခဲ့ပေ။

သူ့လူယုံတော်က အမှန်အတိုင်း ဆက်ပြောခဲ့သည်။  “သခင်လေးက အနားယူသွားပြီး နန်ရှီစီရင်စုမြို့မှာ သင်ခန်းစာသွားပို့ချတဲ့ ဆရာဟုန်နဲ့ ဆုံတွေ့ခဲ့ပါတယ်၊ သခင်လေးကို သူ့တပည့်ဖြစ်စေဖို့ ဖိတ်ကြားခဲ့ပါတယ်၊ သခင်လေးက နန်ရှီစီရင်စုမြို့ရဲ့ တရားသူကြီးအဖြစ် သွားခဲ့တဲ့ သခင်လေးမော့နဲ့လည်း အလွန်ရင်းနှီးပါတယ်။"

သူက ခဏရပ်ပြီးနောက် သူ စုံစမ်းခဲ့ရသည့် နောက်ထပ် ရှာဖွေတွေ့ရှိမှုအသစ်တွေကို တင်ပြခဲ့သည်။ "ဖေးမိသားစုက ဖေးယွီကျယ်က သူ့တူလေးနဲ့ လျန်မိသားစုက လျန့်ယိုရှောင်ကို သူတို့နဲ့အတူ ခေတ္တ နေထိုင်ဖို့ ခေါ်ဆောင်ခဲ့ပါတယ်။"

ရှောင်ယွမ်ရှစ်က အံ့သြသွားခဲ့သည်။ "သူတို့က ကျန့်အာရဲ့ အိမ်မှာ ဘာဖြစ်လို့ ခေတ္တနေနေရတာလဲ။"

နန်ရှီစီရင်စုမြို့က ကိစ္စတွေကို သူ အာရုံစိုက်ခဲ့တာ ဘယ်လောက်ကြာပြီလဲ။ ဘာကြောင့် ဒီလောက် အပြောင်းအလဲတွေ ရှိနေရတာလဲ။

ပိုလို့တောင် မမျှော်လင့်ထားတာကတော့ သူ့သားကို စိတ်လိုလက်ရ နှုတ်ထွက်ခဲ့တဲ့ ပထမတန်းအဆင့်အရာရှိက တပည့်အဖြစ် လက်ခံခဲ့တာ ဖြစ်သည်။

သူက ရာထူးမှ နုတ်ထွက်ခဲ့သော်လည်း တော်ဝင်ခုံရုံးတွင် သြဇာကြီးမားနေဆဲ ဖြစ်သည်။ သူ၏ အခြားကျောင်းသား သုံးဦးစလုံးသည်လည်း တော်ဝင်ခုံရုံးတွင် အရေးပါသည့် ရာထူးများကို တာဝန်ထမ်းဆောင်နေခဲ့ကြသည်။

ဆရာဟုန်က ဧကရာဇ်မင်းမြတ်နှင့် တွေ့ဆုံခွင့်ရရှိခြင်းအတွက် ကံကောင်းခဲ့သည်။

ရှောင်ဟန်ကျန့်က ရင့်ကျက်ပြီး ဉာဏ်ရည်ထက်မြက်သော်လည်း ဆရာဟုန်က ခြွင်းချက်အနေနှင့် သူ့ကို တပည့်အဖြစ် လက်ခံနိုင်လောက်အောင် ထူးချွန်ပုံမပေါ်ဘူးမလား။

ထို့အပြင် သူ၏သားက မော့မိသားစုက သခင်လေးနဲ့ ဘယ်လို ချိတ်ဆက်မိသွားသနည်း။

သူ့မှာ ခိုင်မာတဲ့ နောက်ခံရှိရုံတင်မကဘဲ သူက ပိုပိုပြီး အားကောင်းလာခဲ့သည်။

ဤတစ်ကြိမ်တွင်တော့ သူက နန်ရှီစီရင်စုမြို့သို့ တရားသူကြီးအဖြစ် ရုတ်တရက် သွားခဲ့တာ ဖြစ်သည်။

လူတိုင်းက ဒီလောက် မရိုးရှင်းဘူးလို့ ခံစားနေရသည်။

သူ့လူယုံတော်က ပြန်ဖြေခဲ့သည်။ “သူတို့က သခင်လေးကို ဆေးဘက်ဆိုင်ရာ တိုင်ပင်ဆွေးနွေးဖို့ သွားရှာကြတာလို့ သိရပါတယ်။"

"ဖွီစ" ရှောင်ယွမ်ရှစ်က စောနက သောက်လိုက်သည့် လက်ဖက်ရည်ပင် ပြန်သီးထွက်သွားခဲ့သည်။

"ဘာ၊  ဆေးဘက်ဆိုင်ရာ တိုင်ပင်ဆွေးနွေးမှု ဟုတ်လား။" သူ နားမလည်နိုင်ပေ။ "ကျန့်အာက ဆေးဘက်ဆိုင်ရာ ဆွေးနွေးပေးတာကို ဘယ်တုန်းက သိတာလဲ၊ ဒါက အဓိပ္ပာယ်မရှိဘူးလား။"

သူ့လူယုံတော်က ပြန်ဖြေခဲ့သည်။ “တာ့လျန်က ကျော်ကြားတဲ့ အံ့ဖွယ်သမားတော်တစ်ဦးက သခင်လေး သူ့တပည့်အဖြစ် လက်ခံခဲ့ပါတယ်၊ သူက သူရဲ့ ဆေးပညာဆိုင်ရာ ကျွမ်းကျင်မှုတွေကို တိတ်တဆိတ် လွှဲပြောင်းပေးခဲ့တာပါ၊ ဖေးယွီကျယ်က သူ့တူလေးကို ကုသဖို့ အံ့ဖွယ်သမားတော်ကို သွားရှာတော့ သူဆုံးသွားပြီဆိုတာ သိလိုက်ရတယ်၊  နောက်တော့ သခင်လေးက သူ့နေရာကို ဆက်ခံသူဖြစ်ကြောင်း သူသိခဲ့တာ၊ ဒါကြောင့် သူက သူ့တူလေးကို ဆေးကုဖို့ ရှောင်မိသားစုဆီ ခေါ်သွားခဲ့တာပါ။"

ရှောင်ယွမ်ရှစ်က ထပ်အံ့သြသွားပြန်သည်။ "ကျန့်အာက ဘယ်တုန်းက အံ့ဖွယ်သမားတော်ရဲ့ တပည့် ဖြစ်လာတာလဲ။"

ဒါကို သူ ဘာလို့ လုံးလုံး မသိခဲ့ရတာလဲ။

ဖေးမိသားစုက ဖေးယွီကျယ်က သောက်စားပျော်ပါးဖို့ပဲ သိသည့် သခင်လေး မဟုတ်ပေ။

သူ့တူကို ရှာ့ရှီရွာသို့ ကိုယ်တိုင်ကိုယ်ကျ ခေါ်ဆောင်လာတာကြောင့် ဒီကိစ္စက သေချာပေါက် မှန်ကန်သည်ဟု ဆိုလိုခြင်း ဖြစ်သည်။

သူ့ရဲ့ လူယုံတော်က ပြန်ဖြေခဲ့သည်။ “ကျွန်တော်တို့ ဒါကို အဖြေရှာလို့မရသေးပါဘူး၊ သူ့ကို တပည့်အဖြစ် တိတ်တဆိတ် လက်ခံပြီး သင်ပေးခဲ့တာ ဖြစ်မယ်။”

များစွာသော အရာများက သူ့ထိန်းချုပ်မှုအတွင်း၌ မရှိကြောင်း ရှောင်ယွမ်ရှစ် သဘောပေါက်ခဲ့သည်။

သူ့မွေးရပ်မြေက လူတွေကို တိတ်တိတ်လေး ကျိန်ဆဲလိုက်သည်။

သူတို့ကြောင့် မဟုတ်ရင် သူ ဒီလောက်ထိ တုန်လှုပ်နေမှာ မဟုတ်ပေ။

ရေခဲပြုလုပ်ခြင်းနှင့် ဘိလပ်မြေထုတ်လုပ်နည်းများကို တင်ပြသည့် ရှောင်ဟန်ကျန့်ကို ဧကရာဇ်မင်းကြီးက သေချာပေါက် မှတ်မိနေပါသည်။

သူကလက်ဖက်ရည်ခွက်ကို ပွတ်လိုက်ပြီး သူ့သားကို မြို့တော်ကို ပြန်ခေါ်လာပြီး ပြုစုပျိုးထောင်သင့်သလားဟု ရုတ်တရက် စဉ်းစားမိသွားခဲ့သည်။

ကောချွန်းရုက သူမအင်္ကျီလက်အတွင်းတွင်ရှိသော လက်များကို တင်းတင်းကြပ်ကြပ် ဆုပ်ထားလိုက်သည်။

ရှာ့ရှီရွာကို အချိန်အတော်ကြာ စောင့်ကြည့်မနေသည့် အချိန်မှာ ခွေးမသားက ဒီလောက် ပြဿနာဖြစ်စေလိမ့်မည်ဟု သူမ မမျှော်လင့်ခဲ့ပေ။

ထုတ်လုပ်နည်း ဆက်သခြင်း၊ မော့ချင်းလင်နှင့် မိတ်ဖွဲ့ခြင်း စသည်တို့က သူမ မဖြစ်စေချင်သည့် ကိစ္စတွေ ဖြစ်သည်။

အထူးသဖြင့် သူမမောင်ဖြစ်သူ၏ အနာဂတ် ပျက်စီးသွားပြီးနောက် ရှောင်ဟန်ကျန့်ကို ရာထူးမတက်စေချင်ပေ။

သူမက သူ့ကို အလွန်မုန်းတီးသွားကာ ခေါင်းကိုမော့လိုက်တော့ ရှောင်ယွမ်ရှစ် တွေးနေသည်ကို မြင်လိုက်သောအခါတွင် သူမ နှလုံးခုန်နှုန်း မြန်ဆန်သွားခဲ့သည်။

အရမ်းချစ်ရသည့် ယောက်ျားရဲ့ အတွေးကို သူမ သိသည်။

ရှောင်ဟန်ကျန့်ကို မြို့တော်ကို ခေါ်လာပြီး ပျိုးထောင်ဖို့ တွေးနေတာလား။

လုံးဝ မရဘူး။

ထို့ကြောင့် သူမက တည်ငြိမ်ယောင်ဆောင်ကာ ပြောခဲ့သည်။ "ရှစ်ချင်းလျို့က ရှောင်မိသားစုဟောင်းကို  မြို့တော်ကို လာဖို့ လှုံ့ဆော်ခဲ့ပြီး ပြဿနာရှာခိုင်းတာကို ဟန်ကျန့် သိလား မသိဘူးနော်။"

သူမက သက်ပြင်းချလိုက်ပြန်သည်။ "သူက ကျွန်မတို့ကို ရန်ငြိုးထားသေးလား မသိပါဘူး။"

ရှောင်ယွမ်ရှစ်က ကြက်သေ သေသွားခဲ့သည်။ "သူ သတိထားမိလိမ့်မယ်။"

သို့သော်လည်း သူ့စိတ်ထဲမှာ ဒီအတွေးတွေကို ချက်ချင်း ဖယ်ထုတ်ပစ်လိုက်သည်။

သူ့သားဖြစ်ပေမယ် သူ့မိသားစုနှင့် ဆွေမျိုးဖြတ်တောက်ပြီးသား ဖြစ်သည်။

ရှောင်ဟန်ကျန့်က ရှောင်မိသားစုအပေါ် ရန်ငြိုးထားပုံရသည်။

အနည်းဆုံးတော့ သူ့ကို ရန်ငြိုးထားပုံရသည်။

ရှောင်ယွမ်ရှစ်က သူ့ကို နှိမ်နှင်းဖို့ သားသမီးဝတ္တရားကို အသုံးပြုကာ ဖိနှိပ်လို့ မရပေ။

သူ့ကို ပြုစုပျိုးထောင်ဖို့ မြို့တော်ကို ပြန်ခေါ်လာခဲ့ရင် သူ သတိမထားမိရင် ဒုက္ခပိုခံရနိုင်သည်။

ဒါကြောင့် အဖူးတွေကို ညှပ်ပြီး မကြီးထွားအောင် တားဆီးရမည်။

တကယ်တော့ သူလည်း တုံ့ဆိုင်းနေသည်။

ရှောင်ဟန်ကျန့်ရဲ့ အသွင်အပြင်က သူ မပြောချင်သည့် အတိတ်အကြောင်းများကို ဖော်ထုတ်နိုင်မည်ဖြစ်သည်။

သူက သူ့ဇနီးကို အငယ်အနှောင်းအဖြစ်သို့ ရာထူးချပြီး သူတို့နှင့် ဆွေခန်းမျိုးခန်း ဖြတ်တောက်သွားကြောင်း တခြားသူတွေလည်း သိသွားကြလိမ့်မည်။

အမြင့်တက်ဖို့ ယောက္ခထီးကို အားကိုးခဲ့ပေမယ့် အောင်မြင်သွားချိန်တွင် သူတို့နဲ့ ဆွေခန်းမျိုးခန်း ဖြတ်တောက်ခဲ့ကြောင်း ပြောပြီး တချို့က သူ့ကိုရိုက်ချနိုင်သည်။

ဒါက သူများတွေဆီက ပြောခံရမည့် ကိစ္စကို သူ အမုန်းဆုံးဖြစ်သည်။

အရင်တုန်းက သူ့အောင်မြင်မှုက အမျိုးသမီးခုန်ရဲ့ အဖေနဲ့ မကင်းရှင်းကြောင်း ရွာကလူတချို့က ပြောဖူးခဲ့သည်။

သူ့ထံက ကိုယ်ခံပညာကို မသင်ယူခဲ့ဘဲ သူ့ဂရုမစိုက်မှုနှင့် စိုးရိမ်မှုအောက်တွင် မရှိခဲ့ပါက ယနေ့ သူသည် အသုံးမကျသူအဖြစ်သာ ရှိနေမည် ဖြစ်သည်။

ထို့ကြောင့် သူက အလွန်စိတ်ပျက်ပြီး ထိုမှတ်ချက်များကို ဤကဲ့သို့သော မှတ်ချက်များကို မကြားလိုပေ။

သူ့ကိုယ်ပိုင်ကြိုးစားမှုကြောင့်သာ ဒီနေရာအထိ ရအောင် လုပ်နိုင်ခဲ့တာ ဖြစ်သည်။