အပိုင်း ၁၂၆
Viewers 14k

 

အခန်း(၁၂၆) - ကပ်ဘေးတစ်ခု

 

ရှောင်ယွမ်ရှစ်က ခဏတာ လေးလေးနက်နက် တွေးလိုက်မိသည်။

 

သူက သူ့လူယုံတော်ကို ညွှန်ကြားခဲ့သည်။ “ကျန့်အာကို စောင့်ကြည့်ဖို့ လူတွေကို ဆက်ပြီး စေလွှတ်ထား၊ သူ့ဂုဏ်သိက္ခာကို ဖျက်စီးဖို့ အခွင့်အရေး ဖန်တီးတာ အကောင်းဆုံးပါပဲ။”

 

သူက သူ့သားဖြစ်သူအတွက် တွေးပေးဟန်ဖြင့် ပြောခဲ့သည်။ “မြို့တော်ကြီးဟာ သွေးထွက်သံယိုတွေ၊ တဖျက်ဖျက်လက်တဲ့ သံမဏီဓားမှာ သွေးစွန်းနေတာတွေ အများကြီး၊ သူ့လို ရွာသားလေးအတွက် မသင့်တော်ပါဘူး၊ သူက နန်ရှီစီရင်စုမြို့မှာ နေပြီး သူဌေးဖြစ်နေတာပဲ သင့်လျော်တယ်။"

 

အလုပ်ရုံ အနည်းငယ် ဖွင့်ထားတာကြောင့် ၎င်းတို့ကို ကောင်းမွန်စွာ စီမံခန့်ခွဲသင့်ပြီး တော်ဝင်စာမေးပွဲများ ဝင်ရောက် မဖြေဆိုပါက ပိုကောင်းပမေည်။

 

သူ့ကို ကြိုးကိုင်လို့ မရပေ။ သူ့ကို နောက်ကျောကနေ ဓားနှင့် ထိုးနိုင်သည်။

 

အောင်မြင်မှုအတွက် ရက်စက်ကြမ်းကြုတ်ပြီး သူ့သားဖြစ်သူရဲ့ အောင်မြင်မှုလမ်းကြောင်းကို ဖြတ်တောက်ပစ်ရမည်။

 

သူ့လူယုံတော်က ခေါင်းညိတ်ပြလိုက်သည်။ "နားလည်ပါပြီ၊ စစ်သူကြီးက သခင်လေးအတွက် စဥ်းစားပေးနေတာပဲ။"

 

ရှောင်ယွမ်ရှစ်က ခဏလောက် စဉ်းစားပြီးနောက် ထပ်ပြောခဲ့သည်။ “သက်သေ မချန်ခဲ့နဲ့၊ သေသေချာချာလုပ်၊  ကျန့်အာကို ဒီအကြောင်း မသိစေနဲ့။"

 

သူယုံကြည်ရသည့် လက်ထောက်တွေက သူတို့ကိုယ်တိုင် မလုပ်သင့်ဘူးလို့ သူက ပြောနေတာ ဖြစ်သည်။

 

ထိုကိစ္စကို လုပ်ဖို့ တခြားသူရဲ့ ဓားကို ငှားရမည်။

 

မျက်စိတစ်မှိတ်အတွင်းမှာ ရှောင်ဟန်ကျန့်က ကြီးပြင်းလာခဲ့သည်။

 

သူက ကောင်းကောင်း လုပ်နေပြီး ရှောင်ယွမ်ရှစ်က အလျင်စလို မပြုရဲပေ။

 

အစွန်းဆုံးအားဖြင့် သူ့ဂုဏ်သိက္ခာကို ဖျက်စီးပစ်လိုက်တာလောက်သာ ဖြစ်သည်။

 

အကယ်၍ သူသာ တော်ဝင်စာမေးပွဲကို အောင်မြင်သော်လည်း နာမည်ကောင်း မရှိပါက တော်ဝင်တရားရုံးရှိ အကြီးတန်း အရပ်ဘက် အရာရှိများ၏ အရေးပါသော ရာထူးကို ပေးအပ်ခြင်း ခံရမည်မဟုတ်ပေ။

 

ထိုအမျိုးသမီးက မြို့တော်သို့ လာရန် ရည်ရွယ်ချက်ရှိရှိဖြင့် သူတို့၏ ဂုဏ်သိက္ခာကို ဖျက်ဆီးရန် ရှောင်မိသားစုဟောင်းမှ လူများကို လှုံ့ဆော်ခဲ့တာ ဖြစ်သည်။

 

ဒီအကြောင်းကို သူ့သား မသိတာကို သူ မယုံပေ။

 

ဒီလိုဆိုမှတော့ သူ့အစီအစဥ်တွေကို ထိန်းထားစရာ မလိုပေ။

 

သူ၏ဂုဏ်သတင်းနှင့် အနာဂတ် ပျက်ဆီးပြီးနောက် သူက နန်ရှီစီရင်စုမြို့တွင် နာခံစွာ နေထိုင်လိမ့်မည်။

 

သူ့လူယုံတော်က သူ့သခင်ဖြစ်သူ ဘာတွေတွေးနေမှန်း သိလေသည်။ "ဟုတ်ကဲ့ ကျွန်တော် ကိုယ်တိုင်ကိုယ်ကျ ဆောင်ရွက်ပေးပါ့မယ်။"

 

သူတို့စကားကြားမှ ကောချွန်းရုရဲ့ တင်းတင်းကြပ်ကြပ် ဆုပ်ကိုင်ထားတဲ့ လက်တွေကို ဖြည်းညှင်းစွာ ဖြေလျော့လိုက်ပြီး သက်ပြင်းတစ်ချက်ချလိုက်သည်။

 

သူမက အဓိပ္ပါယ်ရှိစွာပြောခဲ့သည်။ "ဟန်ကျန့်ကို သိမ်မွေ့တဲ့ဇနီး ရအောင် ပြောင်းပေးဖို့ ကူညီပေးတာ ပိုကောင်းလိမ့်မယ်၊ ဒါမှ သူ နောက်တစ်ကြိမ် လမ်းလွဲမခံရမှာ။"

 

ရှစ်ချင်းလျို့ရဲ့ ချုံရှီကြောင့်သာ မဟုတ်ပါက ရှောင်ဟန်ကျန့်က အခုအချိန်တွင် ဖျားနာပြီး သေဆုံးသွားလောက်ပြီ ဖြစ်သည်။

 

ထို့အပြင် ထိုခွေးမက ဖော်စပ်ထုတ်လုပ်နည်းများကို ပေးခဲ့သူလည်း ဖြစ်သည်။

 

ရှောင်ဟန်ကျန့်ရဲ့ဘေးမှာ အကူအညီပေးနိုင်သည့်လူ မရှိစေချင်တာကြောင့် သူမကို စောစီးစွာ ရှင်းထုတ်ပစ်ရမည်။

 

သူမက ရှောင်ဟန်ကျန့်ကို အနာဂတ်တွင် ကူညီပေးနိုင်သည့် ဇနီးသည်ကို ရှာမတွေ့စေချင်ပေ။

 

ထို့ကြောင့် သူမ သူ့ကို ထပ်သတိပေးခဲ့တာဖြစ်သည်။

 

ရှောင်ယွမ်ရှစ်က ခဏမျှ စဉ်းစားလိုက်သည်။ “ဒါကို မင်းကိုင်တွယ်လို့ ရတယ်။ ငါက လူကြီးတစ်ယောက်ဆိုတော့ ဝင်စွက်ဖက်ဖို့က မကောင်းဘူး။”

 

ထိုမကောင်းသည့် ချွေးမဖြစ်သူကို ဖယ်ရှားပစ်ဖို့ သူ့လက်ထောက်တွေကို သူ့အတွက် အချောင်ဝင်ခံခိုင်းဖို့ လူရှာဖို့ ညွှန်ကြားထားပြီးပြီ ဖြစ်သည်။

 

သို့ပေမယ့် သားဖြစ်သူကို ဘယ်လိုမျိုး ဇနီးမယားမျိုးနဲ့ ပြောင်းစေချင်လဲ ဆိုတာကိုတော့ သူ စိတ်ပူစရာ မလိုပါဘူး။

 

ဒီကိစ္စက သူ့ဇနီးအလှလေး ဖြေရှင်းလိမ့်မည်။

 

သူမက နန်ရှီစီရင်စုမြို့တွင် တစ်စုံတစ်ဦးအား စေလွှတ် ခိုင်းစေပြီး သူမ၏ ကိုယ်ပိုင်ထင်မြင်ယူဆချက် မရှိသော နူးညံ့သိမ်မွေ့ပြီး အကျင့်ကောင်းရှိသည့် အမျိုးသမီးတစ်ဦးကို ရှာဖွေဖို့ ကူညီပေးလိမ့်မည်။

 

ထို့နောက် ရှောင်ဟန်ကျန့်အတွက် အောင်သွယ်လုပ်ရန် တစ်စုံတစ်ဦးကို သူမ ရှာပေးလိမ့်မည်။

 

အမျိုးသမီးခုန်က အလွန်ဉာဏ်တိမ်ပြီး ပြဿနာကိုသာ ဖန်တီးတတ်သည်။

 

ကောချွန်းရုက သူမ မျက်နှာမှာ နူးညံ့သိမ်မွေ့သည့် အမူအရာ ဆင်မြန်းကာ ပြောလိုက်သည်။ "ကောင်းပြီ၊ ကျွန်မ ဟန်ကျန့်ကို အကျင့်သီလကောင်းတဲ့ ဇနီးတစ်ယောက်ရဖို့ သေချာပေါက် ကူညီပေးပါ့မယ်။"

 

ရှောင်ယွမ်ရှစ်က သူမကို ဤကဲ့သို့ ပုံစံလေး မြင်လိုက်ရသည့်အခါ သူ့ရင်ထဲတွင် ယားယံလာခဲ့သည်။

 

သူ့လူယုံတော်တွေကို ထွက်သွားခိုင်းပြီးနောက် သူမကို အိပ်ခန်းထဲ ခေါ်သွားခဲ့လေသည်။

 

ရှာ့ရှီရွာတွင် ဖြစ်သည်။

 

လျန့်ယိုရှောင်က လွန်ခဲ့သည့် ရက်အနည်းငယ်ကတည်းက ရွာတစ်ဝိုက်တွင် ပတ်သွားခဲ့သည်။

 

သူက ရှစ်ချင်းလျို့၏နောက်သို့ မကြာခဏ လိုက်သွားကာ ရှောင်မိသားစု၏ အလုပ်ရုံသို့ သွားခဲ့သည်။

 

ဒီနေ့မှာတော့ သူ့အစေခံကောင်လေးတွေကို သကြားအလုပ်ရုံကို ခေါ်သွားခဲ့သည်။

 

ရှစ်ချင်းလျို့က သူမ၏ အလုပ်သမားများကို မုန့်ချိုခဲနှင့် နို့သကြားလုံးများ ပြုလုပ်ရန် ဦးဆောင်ခဲ့သည်။

 

တောင်ပေါ်က နွားတွေက နို့ထွက်နေပြီမို့ အလုပ်သမားတွေကို ညှစ်ခိုင်းခဲ့သည်။

 

နေ့စဉ်စားသုံးရန် သီးသန့်ခွဲထားသည့် နွားနို့မှလွဲ၍ ကျန်သည့်အားလုံးကို သကြားလုံးအဖြစ် ပြုလုပ်ထားသည်။

 

ရှောင်ဟန်ကျန့်က ယနေ့တော့ အားလပ်ရက်တစ်ရက်ရကာ နို့သကြားလုံးများပြုလုပ်ရန်အတွက် သူ့ဇနီးနှင့်အတူ လိုက်ပါလာခဲ့သည်။

 

လျန့်ယိုရှောင်က သူ့ကိုယ်ပိုင်အတွေးများတွင် နစ်မြောနေသည်။

 

သူက လမ်းလျှောက်လာရင်း မုန့်ချိုခဲတစ်ခုကို ကောက်ယူပြီး ပါးစပ်ထဲကို ပစ်ထည့်လိုက်သည်။

 

သူ့မျက်လုံးများက တောက်ပလာခဲ့သည်။ "ဒီသကြားလုံးက အရမ်းအရသာရှိတယ်။"

 

ရှစ်ချင်းလျို့က သူက အစားသရဲဖြစ်ကြောင်း သိထားပြီးပြီဖြစ်သည်။ "ဒါပေါ့ ကောင်းတာပေါ့။"

 

လျန့်ယိုရှောင်က ဤကျားမ၏ အချက်အပြုတ်အတတ်ပညာက အလွန် ကောင်းမွန်ခြင်း မရှိသော်လည်း အခြားသူများကိုတော့ ဟင်းလျာများကို ပုံစံအမျိုးမျိုးဖြင့် ပြင်ဆင်နိုင်စေအောင် ဦးဆောင်နိုင်ကြောင်း သိလိုက်သည်။

 

သူက မေးလိုက်သည်။ “ဒီသကြားလုံးတွေကို ဘယ်လိုရောင်းချမှာလဲ။”

 

“ရွာအဝင်ဝက ဆိုင်တွေမှာ ရောင်းချမယ်။”

 

ရွာဝင်ပေါက်မှာ ခြံဝင်းနဲ့ ဈေးဆိုင်တွေကို ပြုပြင်ပြီးသွားတော့ တခြားနေရာက လက်ကားရောင်းသူတွေနဲ့ စီရင်စုမြို့တွင်းက ဈေးသည်တွေ စည်ကားနေကြသည်။

 

လျန့်ယိုရှောင်က အနည်းငယ် မျက်မှောင်ကြုတ်လိုက်သည်။ "ဒါက မင်းအတွက် အရမ်း ဒုက္ခရောက်မှာပေါ့၊  မင်း ငါ့ကို ဘာလို့ အကုန်ဝယ်ခွင့်မပေးတာလဲ။"

 

ရှစ်ချင်းလျို့က သူ့ကို မျက်စောင်းထိုးလိုက်သည်။ "မလုပ်ဘူး။"

 

အကယ်၍ ဒီလူသာ ထိုသို့လုပ်ပါက မုန့်ချိုခဲတွေနှင့် နို့သကြားလုံးများက အထက်တန်းလွှာအတွက် သီးသန့်ဖြစ်လာမည်ဖြစ်သည်။

 

တာ့လျန်မှ လူများက အနာဂတ်တွင် သူမရဲ့ မိသားစုမှ ထုတ်လုပ်သည့် နို့သကြားလုံများကို မြည်းစမ်းနိုင်လိမ့်မည်ဟု သူမ မျှော်လင့်ထားဆဲ ဖြစ်သည်။

 

"စိတ်ဝင်စားရင် စာချုပ်ချုပ်ပြီး တချို့ကို ဝယ်ပြီးရင် သင်္ဘောနဲ့ မြို့တော်ကို ပို့ပေးပြီး ရောင်းခိုင်းလို့ ရတယ်။"

 

ဤနို့ထွက်ပစ္စည်းအကြောင်း လူအများ ပိုမိုသိရှိနိုင်စေရန်အတွက် တချို့ကို မြို့တော်သို့ ပို့ဆောင်ကာ ထိုနေရာက လူတွေကို ဝယ်ယူစေခြင်းက နည်းလမ်းကောင်း ဖြစ်သည်။

 

ဒီလူက သူမ တစ်နေ့တာလုံး လုပ်ထားသည့် ကုန်ပစ္စည်းတွေကို လက်ဝါးကြီးအုပ်ဖို့ တွေးနေသည်။

 

ယခင်က ပိုင်ရွှီ ပစ္စည်းများစွာအတွက် ဈေးကွက်ကို လက်ဝါးကြီးအုပ်ခွင့်ပေးရန် သူမအား အကြိမ်ကြိမ် ပြောခဲ့ဖူးပြီး ပရိဘောဂအလုပ်ရုံတစ်ခု တည်ထောင်လိုသော်လည်း သူမ ငြင်းပယ်ခဲ့သည်။

 

သူမက ပရိဘောဂလုပ်ငန်းတွင် ပါဝင်ရမှာ အလွန်ပျင်းလွန်းလှသည်။

 

အနည်းဆုံးတော့ အခုလောလောဆယ်တော့ သူမရဲ့ အိမ်ကို ထူးခြားတဲ့ပုံစံလေးဖြင့်  ထိန်းသိမ်းထားချင်သည်။

 

အနာဂတ်မှာ ဒါမျိုးတွေ ပိုလုပ်ချင်တယ်ဆိုရင်တော့ နောက်တစ်ကြိမ်မှ ပြန်စဉ်းစားမည်။

 

သူမ ပစ္စည်းတွေကို ဆော့ကစားလိုပါက လက်ကားရောင်းချသူများထံ ပေးပို့ရန် အာရုံစိုက်ဖို့ ရည်ရွယ်ထားသည်။

 

လျန့်ယိုရှောင်က ဆွံ့အသွားသည်။

 

တခါတရံမှာ ဒီအမျိုးသမီး ဘာတွေတွေးနေလဲဆိုတာ သူ တကယ် နားမလည်နိုင်ပေ။

 

အကယ်၍ သူသာ သူမ၏ ကုန်ပစ္စည်းအားလုံးကို ဝယ်ယူပါက ကုန်သည်များစွာထံ အနည်းအကျဉ်း ရောင်းချခြင်း ပြဿနာကို ရှောင်လွှဲနိုင်မည်ဖြစ်သည်။

 

ရောင်းဈေးလည်း မြင့်နိုင်ပေမယ့် လက်တွေ့မှာတော့ သူမက ငြင်းပယ်ခဲ့သည်။

 

သူက ဆွံ့အစွာ ပြောခဲ့သည်။ “ကောင်းပြီ ဒါဆို ငါ့ကို တစ်သုတ် အရင်ရောင်း၊ မြို့တော်ကို သင်္ဘောနဲ့ ပို့ပြီး ရောင်းခိုင်းကြည့်မယ်။"

 

သူက တော်ဝင်ခုံရုံးမှာ ရာထူးရရှိရန် အလွန် စိတ်မ၀င်စားပဲ ပိုက်ဆံကိုသာ ကြိုက်သည်။

 

ထို့ကြောင့် သူ မြို့တော်မှာရှိသည့်အချိန်တုန်းက ကိုယ်ပိုင်စီးပွားရေးတစ်ခု စတင်လိုကြောင်း သူ့မိသားစုကို ပြောပြခဲ့သည်။

 

ပြင်ပကမ္ဘာကို ပိုကောင်းအောင် ကြည့်မြင်ချင်သည်။

 

သို့သော် ငြင်းပယ်ခံရရုံသာမက အရိုက်ခံရလုနီးပါး ဖြစ်ခဲ့သည်။

 

သူအရှုံးမပေးခဲ့ပေ။ သူက လုပ်ငန်းလိုင်စင်ကို လျှို့ဝှက်လျှောက်ထားခဲ့ပြီး အပြင်ထွက်ရန် ပြင်ဆင်ခဲ့သည်။

 

သူလျှို့ဝှက်ချက်တွေကို တခြားသူက ရှာဖွေတွေ့ရှိတယ်ဆိုတာ မထင်မိခဲ့ပေ။

 

သူ့အဘိုးနှင့် အဖေက သူ့ခြေထောက်တွေကို ချိုးမယ်လို့ ပြောခဲ့သည့်အတွက် ခဏလောက် ပုန်းအောင်းဖို့ ထွက်ပြေးခဲ့တာ ဖြစ်သည်။

 

ရှစ်နွန်ကုန်းရှန် 士农工商 (ရှေးခေတ်တရုတ်များက  စာသင်သားပညာရှင်၊ တောင်သူလယ်သမား၊ လက်သမား၊ ကုန်သည် စသည့်အလုပ်အကိုင်ဖြင့် အဆင့်ခွဲခြားထားခြင်း) တာ့လျန်မှာရှိသည့် ကုန်သည်တွေဟာ အလွန် ဆိုးရွားသည့် အဆင့်အတန်းမှာ မရှိသော်လည်း သူတို့က လူ့အဖွဲ့အစည်း အဆင့်အတန်းရဲ့ အောက်ဆုံးမှာ ရှိနေသည့် အချက်ကိုတော့ မပြောင်းလဲနိုင်ခဲ့ပေ။

 

သေချာပေါက် သူ့မိသားစုက ကိုယ်ပိုင်ဆိုင်တွေရှိပေမယ့် သူတို့တွေက အိမ်အစေခံနဲ့ ဆိုင်ရှင်တွေကို စီမံခန့်ခွဲဖို့သာ ထားရှိသည်။

 

မင်းစိုးရာဇာမိသားစုရှိ ကလေးများက သူတို့လက်တွေ ညစ်ပတ်အောင် ကိုယ်တိုင်ဝင်ပါစရာ မလိုပေ။

 

ထို့ကြောင့် သူ့မိသားစုက သူစီးပွားရေးလုပ်တာက အလွန်ရှက်စရာကောင်းသည်ဟု ခံစားခဲ့ကြရလေသည်။

 

မူလက သူက အပျော်သဘောဖြင့် စမ်းကြည့်ချင်သော်လည်း သူ့မိသားစုက ပြင်းပြင်းထန်ထန် ကန့်ကွက်ပြီး သူ့ကို တားချင်တာကြောင့် သူပုန်ကန်ချင်သည့် အတွေးတစ်ခု ရှိခဲ့သည်။

 

မလုပ်ခိုင်းလေလေ ပိုကောင်းအောင် လုပ်ချင်လေလေ ဖြစ်သည်။

 

ဆိုင်အနည်းငယ် ဖွင့်ပြီး ဘာလုပ်ရမှာလဲ။ တကယ်လို့ လုပ်ချင်ရင် မိသားစုဝင်တွေကို ထိတ်လန့်သွားအောင် ကြီးမားခိုင်မာသည့် လုပ်ငန်းကြီးဖြစ်အောင် လုပ်ရမည်။

 

ထို့အပြင် သူက လုပ်ငန်းကို ကောင်းမွန်စွာ ချဲ့ထွင်မည်ဆိုပါက သူ့မိသားစုကို ပိုမိုချောမွေ့စွာ အခြေအနေ တိုးမြင့်အောင် လုပ်ဆောင်ပေးနိုင်မည်။

 

သေချာပေါက် သူ့မိသားစုနောက်ခံကလည်း သူ့ကို အကြီးမားဆုံးသော အကာအကွယ်ပေးနေခြင်း ဖြစ်သည်။

 

ထို့အတွက်ကြောင့် ရှစ်ချင်းလျို့ အိမ်မှာရှိသည့် ပစ္စည်းကောင်းများကို သူရှာဖွေတွေ့ရှိပြီးကတည်းက သူမျက်စိကျခဲ့သည်။

 

ဤကျားမထုတ်လုပ်သသည့် နို့သကြားလုံးနှင့် မုန့်ချိုခဲသည် သူ တစ်ခါမှ မမြင်ဖူးသော အရာ ဖြစ်သည်။

 

မြို့တော်ကလူတွေလည်း ဒီထုတ်ကုန်တွေကို မမြင်ဖူးပေ။

 

အရသာကောင်းရုံသာမက ခန္ဓာကိုယ်ကိုလည်း  အာဟာရဖြည့်ပေးနိုင်ကြောင်း ရှစ်ချင်းလျို့က ပြောခဲ့သည်။

 

သူက မြို့တော်ရှိ စျေးကွက်ကို ဦးစွာစမ်းသပ်ရန်အတွက် ပထမတစ်သုတ်ကို ဝယ်ရောင်းပြီး သူ့မိသားစုဝင်များ မည်သို့တုံ့ပြန်မည်ကိုလည်း ကြည့်ရှုနိုင်မည်။

 

သူ့ကိုယ်သူ သက်ပြင်းချနေသလိုမျိုး သက်ပြင်းချလိုက်သည်။  "ဘာလို့ ငါကြိုက်​သမျှက လုပ်ဖို့ ခက်ခဲနေရတာလဲ။"

 

ရှစ်ချင်းလျို့က သူ့သက်ပြင်းချသံကိုကြားသည့်အခါ အလားတူ ခံစားလိုက်ရလေသည်။

 

သူမလည်း မော်ဒန်ခေတ်တုန်းက စိုက်ပျိုးရေးပညာကို လေ့လာဖို့ မိသားစု၏ အထောက်အပံ့ကို မရရှိခဲ့ပေ။

 

သူမကိုယ်တိုင် ရုန်းကန်မှုကာ ကြိုးစားအားထုတ်မှုခဲ့ကြောင့်သာ မဟုတ်ပါက သူမလည်း စီးပွားရေးပညာကို ဖိအားပေး သင်ယူခဲ့နေရလောက်ပြီဖြစ်သည်။

 

"ရှင့်ကိုယ်ရှင် နာမည်တပ်နိုင်သရွေ့ ရှင့်ရဲ့ စွမ်းဆောင်ရည်တွေကို တခြားသူတွေက အသိအမှတ်ပြုတဲ့နေ့ တစ်နေ့တော့ ရှိလိမ့်မယ်။"

 

တာ့လျန်ကို မကြာသေးမီကမှ စတင်တည်ထောင်ခဲ့ပြီး ယခင်စစ်ပွဲက နိုင်ငံတစ်ခုလုံး၏ စီးပွားရေးကို ထိခိုက်ခဲ့သည်။

 

ထို့ကြောင့် ဧကရာဇ်မင်းပသစ် နန်းတက်ပြီးနောက် ကုန်သည်များ၏ အဆင့်အတန်းကို မြှင့်တင်ကာ စီးပွားရေးဖွံ့ဖြိုးတိုးတက်မှုအတွက် အကျိုးရှိသော မူဝါဒများစွာကို ထုတ်ပြန်ခဲ့သည်။

 

ဥပမာအားဖြင့်၊ ကုန်သည်များ၏ ၀တ်စားဆင်ယင်မှုတွင် ကန့်သတ်ချက် မရှိဘဲ သူတို့၏ သားမြေးများသည် တော်စာမေးပွဲတွင် ပါဝင်နိုင်ပြီး နိုင်ငံ့ဝန်ထမ်းအဖြစ် ဝင်ရောက်တာဝန်ထမ်းဆောင်နိုင်သည်။

 

ရှစ်နွန်ကုန်းရှန် 士农工商 (ရှေးခေတ်တရုတ်များက  စာသင်သားပညာရှင်၊ တောင်သူလယ်သမား၊ လက်သမား၊ ကုန်သည် စသည့် အလုပ်အကိုင်ဖြင့် အဆင့်ခွဲခြားထားခြင်း) စာသင်သားပညာရှင်များမှလွဲ၍ တောင်သူလယ်သမားများနှင့် လက်သမားတွေက တကယ်ပဲ ကုန်သည်တွေထက် အဆင့်အတန်း ပိုမြင့်တာလား။

 

ဒါဟာ စကားလုံး သက်သက်သာ ဖြစ်သည်။ အာဏာအပြင် ပိုက်ဆံပိုရှိသည့်လူက ပိုမြင့်မားသည့် အဆင့်အတန်းကို ပိုင်ဆိုင်တာ မဟုတ်လား။

 

ကုန်သည်မိသားစု၏ ကျွန်အများစုက လယ်သမားမိသားစုမှ မွေးဖွားလာကြသည်။

 

ပိုင်ရွှီ၏ အဆင့်အတန်းနှင့် သူ့မိသားစုနောက်ခံကြောင့် သူကြီးကြီးမားမားလုပ်ချင်ရင် သူ့ကိုယ်သူ  နှိမ့်ချတာ ပိုကောင်းပါသည်။ မဟုတ်ရင် လူတွေက သူ နစ်မြှုပ်သွားသည်အထိ သူ့ကို ပစ်မှတ်ထားနိုင်သည်။

 

လျန့်ယိုရှောင်တွင် ထိုကဲ့သို့သော အခြေအနေနှင့်ပတ်သက်ကာ စိုးရိမ်ပူပန်စရာမရှိတာကြောင့် ရှစ်ချင်းလျို့ ပိုမိုရည်မှန်းချက်ကြီးသော လုပ်ငန်းတစ်ခုစတင်ရန် သူ့အစီအစဉ်ကို ထောက်ခံခဲ့သည်။ သူမ လိုတာရှိရင် သူပြန်ကူညီနိုင်ရင်လည်း ကောင်းသည့် ကိစ္စ ဖြစ်သည်။

 

လျန့်ယိုရှောင်က ထိုစကားကိုကြားသည့်အခါ သူတို့က တစ်ကယ့်ကို စိတ်တူသည့် မိတ်ဆွေတွေဖြစ်ကြောင်း ခံစားလိုက်ရသည်။

 

ထိုအချိန်မှာပဲ ရှစ်မိသားစုရဲ့ တတိယသားက ခိုးကြောင်ခိုးဝှက် ဝင်လာခဲ့သည်။ "မိန်းကလေး ကပ်ဘေးတော့ ဆိုက်ပြီ။"