အပိုင်း ၁၃၇

အပိုင်း(၁၃၇) - ပြဇာတ် အဆိုတော် မလုပ်တာက အရည်အချင်းကို ဖြုန်းတီးတာပဲ

ဝူမိသားစုက သူတို့ကို ဒီတိုင်းပြဿနာဆက်ရှာအောင် ထားလို့မရတာ သိသည်။

ဝူသခင်မကြီးနှင့် အမျိုးသမီးဝူက ထွက်လာပြီး ရှစ်သခင်မကြီးကို တွဲထူပေးကာ ကောင်းကောင်းမွန်မွန် ချော့မြူခဲ့သည်။

ဝူမိသားစုနှင့် လက်ထပ်ပွဲကိစ္စဆွေးနွေးတုန်းက သူမ အဲလောက် မာန်မတက်ခဲ့ပေ။

ရှစ်သခင်မကြီးက ငိုနေဆဲဆိုပေမယ့် သူမဘာသာသူမ ဂုဏ်ယူနေသည်။

ထိုအယုတ်တမာမလေးက အနည်းငယ် အကြင်နာမဲ့ပေမယ့် သူမ အကြံတွေက အသုံးဝင်သည်။

စောနတုန်းက စကားပြောတုန်းက ဝူသခင်မကြီးက သူမကို လျစ်လျူရှုခဲ့ကာ အထင်သေးသလိုဖြင့် ကြည့်ခဲ့သည်။

အခုတော့ အလှည့်အပြောင်း ဖြစ်သွားကာ သူမကို တောင်းပန်နေရပြီဖြစ်သည်။

သူမက ချက်ချင်း သဘောမတူပဲ ငိုယိုကာ အထွန့်တက်ခဲ့သည်။

"ကျွန်မတို့ မိသားစုက ငွေ ၁၀၀၀ မတတ်နိုင်ပါဘူး၊ တစ်မိသားစုလုံး ခြစ်ကုတ်ပြီးမှ ငွေ ၂ပြားပဲ တတ်နိုင်တာပါ၊ သက်ညှာပေးပါဦး။"

သူမက စကားပြောပြီး ဝူသခင်မကြီးရှေ့ ဒူးထောက်တော့မလို ပြုလုပ်ခဲ့သည်။

တင်တောင်းငွေ ငွေ ၂ပြားနှင့် တင်တောင်းငွေ ၁၀၀၀ကို ဝူမိသားစုကို ပေးရသလို လူအများရှေ့မှာ ပြောရမည် ဖြစ်ကြောင်း အယုတ်တမာမက ပြောခဲ့သည်။

ဆွေးနွေးညှိနှိုင်းဖို့အတွက် ဝူမိသားစုအိမ်ကို ဆွဲခေါ်ခံသွားလို့ မရပေ။

မဟုတ်ပါက ဝူမိသားစုက သူတို့ကို အကြပ်ကိုင်ပြီး ဒီသပုပ်လေလွင့်ကိစ္စကို သူတို့ မလုပ်ခဲ့ကြောင်း သက်သေပြကြလိမ့်မည်။

ဒါ့အပြင် သူမက ဒီကိစ္စကို ဆက်ထိန်းချုပ်ထားရမည်။

သူမက ရွာက အဖွားကြီးဖြစ်တော့ကော ဘာဖြစ်လဲ။ သူမရဲ့ သားက စာသင်သား ဖြစ်သည်။

သူမက အပြစ်မဲ့ပြီး ညစ်ပေစွန်းထင်းအောင် လုပ်ခံရတာ ဖြစ်သည်။

သူတို့တွေက နစ်နာသူတွေ ဖြစ်သည်။

သူမက အလွန် ဖြောင့်မှန်သည်။

သူမက ဝူသခင်မကြီးနှင့် အမျိုးသမီးဝူကို တမင်တကာ မျက်ရည်တွေ၊ နှပ်ချေးတွေ ပေကျံအောင် သုတ်ခဲ့တာကြောင့် သူတို့ ပိုရွံသွားခဲ့သည်။

သူတို့က ဒီအရှက်မရှိသည့်လူတွေကို အစေခံတွေဖြင့် သေအောင် ရိုက်သတ်ခိုင်းချင်နေသည်။

သို့ပေမယ့် လူအများရှေ့မှာ ထိုသို့ လုပ်လို့ မရပေ။

သူတို့က မကျေမနပ်ဖြစ်နေပေမယ့် အိမ်ထဲဝင်ပြီး ကောင်းကောင်းဆွေးနွေးမယ့်အကြောင်း အပြင်ပန်းကနေ နူးညံ့သည့်လေသံဖြင့် ချော့ပြောနေခဲ့သည်။

သို့ပေမယ့် ရှစ်သခင်မကြီးသည် ရှစ်ချင်းလျို့ရဲ့ သတိပေးချက်ကြောင့် သူမက ပျော့ဆင်းမသွားဘဲ ဒီကိစ္စကို အပေါက်ဝမှာသာ အပြတ်ရှင်းမည့်အကြောင်း တင်းခံခဲ့လေသည်။

ဝူသခင်မကြီးနှင့် သခင်လေးဝူက ဒေါသထွက်ကာ ရူးမတတ် ဖြစ်နေသည်။

သူတို့က မကြာခဏ ဝူသခင်ကြီးနှင့် သခင်လေးဝူကို မကြာခဏ ကြည့်ခဲ့သည်။

အမျိုးသမီးနျိုနှင့် တခြားလူတွေက ထပ်ပြီး ဝုန်းဒိုင်းကြဲခဲ့သည်။

သူတို့က ရှောင်မိသားစုထက် ပိုအရှက်မဲ့သည်။

သူတို့က ကျယ်လောင်စွာ ငိုပြောခဲ့သည်။ "လာကြပါဦး အားလုံးပဲ လာကြည့်ကြပါဦး၊ ဝူမိသားစုက ကျွန်မတို့ကို အနိုင်ကျင့်နေပါတယ်၊ အိမ်နဲ့ မြေကို ရောင်းချလိုက်ရင် ကျွန်မတို့က ဘယ်လိုရှင်သန်ရတော့မှာလဲ၊ သူတို့က ကျွန်မတို့ကို အသက်မရှင်နိုင်အောင် ဖိအားပေးနေတာပါ။"

ရှစ်မိသားစုရဲ့ တတိယသားက ရှစ်မိသားစုရဲ့ စတုတ္ထသားနား ကပ်ကာ တီးတိုးပြောခဲ့သည်။

ရှစ်မိသားစုရဲ့ စတုတ္ထသားရဲ့ မျက်လုံးတွေ လင်းလက်သွားခဲ့သည်။

ထို့နောက် သူက ကူကယ်ရာမဲ့သည့် မျက်နှာနှင့် ခါးသက်စွာ ပြုံးပြီး ရှေ့တိုးသွားခဲ့သည်။ "အမေ ဒါတွေက ကျွန်တော့် အမှားတွေပါ၊ အမေတို့အားလုံးကို ငြိစွန်းစေမိပြီ၊ အရင်တုန်းကတော့ အမျိုးသမီးတွေက အဲလို မလုပ်လောက်ပါဘူးလို့ ယုံကြည်ခဲ့တာ၊ မိန်းကလေးဝူက ကျွန်တော့်ကို သဘောကျပြီး လက်ထပ်ချင်လို့ လုပ်လိမ့်လို့ မထင်ခဲ့ဘူး၊ ဝူမိသားစုသာ သူ့ကို သီလရှင် ဝတ်ခိုင်းလိုက်ရင် ဒါမှမဟုတ် သူ့စိတ်သူမထိန်းနိုင်တော့ရင် ဖြစ်လာမယ့် အကျိုးဆက်တွေကို ကျွန်တော် ဒီတိုင်း ကြည့်မနေနိုင်ဘူး၊ ဒါကြောင့်ပဲ ကျွန်တော့်မိသားစုကို မင်္ဂလာပွဲ ကမ်းလှမ်းပေးဖို့ တောင်းဆိုခဲ့မိတာပါ၊ ဝူမိသားစု ဒီလောက်ထိ လုပ်လိမ့်မယ်လို့ မထင်ခဲ့ဘူး၊ သူတို့က ကျွန်တော့်ကို ဖိနှိပ်ပြီး အနိုင်ကျင့်ရင်တောင် ကျွန်တော် စိတ်ထဲ မထားပါဘူး၊ ဒါပေမဲ့ အသက်ကြီးမှ အမေ ကျွန်တော့်ကြောင့် အရှက်ခွဲစော်ကားခံရပြီး အနိုင်ကျင့်ခံရတာကိုတော့ ကြည့်မနေနိုင်ဘူး၊ တကယ်လို့ ဝူမိသားစုသာ ကျွန်တော်တို့ကို အိမ်နဲ့ မြေတွေ အတင်းရောင်းခိုင်းပြီး တင်တောင်းငွေ အများကြီးတောင်းမယ်ဆိုရင် စီရင်စုမြို့ တရားသူကြီးမင်းဆီက အကူအညီ တောင်းကြတာပေါ့၊ ကျွန်တော်က အာဏာရှိတဲ့လူ မဟုတ်ပေမယ့် ကျွန်တော်က စာသင်သားပါ။"

ရှစ်သခင်မကြီးရဲ့ မျက်လုံးတွေ လင်းလက်သွားပြီး ရှစ်မိသားစု၏ စတုတ္ထသားရဲ့ လက်ကို ကိုင်လိုက်သည်။ "ကောင်းတယ်၊ အခုပဲ တရားသူကြီးမင်းမော့ကို သွားရှာရအောင်။"

သူမက အသံကျယ်ကျယ်ဖြင့် တမင်ပြောခဲ့သည်။ "တရားသူကြီးမော့ကို ပန်းဧည့်ခံပွဲက အကြောင်းပါ တစ်ခါတည်း ပြောတာပေါ့၊ နင့်မှာ သက်သေရှိသေးတယ်မလား၊ သူ့ကို ပြတာပေါ့။"

ရှစ်မိသားစုရဲ့ စတုတ္ထသားက သူမ လက်ကို ကိုင်ထားဆဲ ဖြစ်သည်။ "ကောင်းပြီ။"

သူက အင်္ကျီလက်ထဲက ကြွေပုလင်းလေးကို တမင်ထုတ်ပြီး ဝူမိသားစုဝင်တွေရှေ့မှာ ယမ်းပြခဲ့သည်။

သူတို့မြင်ပြီးသွားသည့် အချိန်မှတော့ သူက ချက်ချင်း အင်္ကျီလက်ထဲ ပြန်ထည့်ကာ သိမ်းခဲ့သည်။

အရင်တစ်ခါက ဝူမိသားစု သူ့ကို ပေးခဲ့သည့် ဆေးတွေ ရှိနေတုန်း ဖြစ်သည်။

သူက ရှောင်ဟန်ကျန့်အတွက် တမင်တကာ ဆေးပမာဏ လျော့ချခဲ့ပြီး ဝူရှီရှီကို ဆေးခတ်ပြီးနောက် ဆေးအနည်းငယ်ကို သီးသန့်ခွဲထားခဲ့သည်။

ရှစ်မိသားစုရဲ့ တတိယသားက အသုံးဝင်လာနိုင်ကြောင်း ပြောကာ သီးသန့်ခွဲပြီး သိမ်းထားခိုင်းခဲ့တာ ဖြစ်သည်။

အခုတော့ ဝူမိသားစုကို ခြိမ်းခြောက်ဖို့ သက်သေရှိပြီဖြစ်သည်။

သူ အခုမှ ထုတ်ပြရတာဟာ စောစောကတည်းက ဝူမိသားစု သူ့ဆီက လုယူသွားမှာ စိုးရိမ်လို့ ဖြစ်သည်။

ဘာပဲဖြစ်ဖြစ် စီရင်စုမြို့တရားသူကြီးက ဆေးဝယ်သူကို စုံစမ်းသည့်အခါ သူ မဟုတ်သည့် ဝယ်သူကို ရှာတွေ့မှာပဲ ဖြစ်သည်။

သူတို့နှစ်ယောက်ရဲ့ စကားကို ကြားတော့ ဝူသခင်ကြီးနှင့် သခင်လေးဝူက အလွန်ဒေါသထွက်ပြီး မြေပေါ် ယိုင်လဲသွားခဲ့သည်။

အရှက်မဲ့လိုက်တာ။ ဒီရှစ်မိသားစုက တကယ် အရှက်မဲ့တာပဲ။

ရှစ်မိသားစုရဲ့ စတုတ္ထသား ထုတ်လိုက်သည့် ကြွေပုလင်းကို သူတို့ မြင်ခဲ့သည်။

ဝူသခင်လေးက မျက်လုံးမှေးကျဥ်းခဲ့သည်။

သူက သူ့လက်ထောက်နှင့် ရှစ်မိသားစုရဲ့ စတုတ္ထသားဆီ ပေးခိုင်းလိုက်သူ ဖြစ်သည်။

ဒီငတုံးကောင်က သူ့ကို တကယ် ဆန့်ကျင်လာလိမ့်မည်ဟု သူ မထင်မိခဲ့ပေ။

ရှစ်မိသားစုသာ အခု ဝူမိသားစုရဲ့ အိမ်ထဲမှာ ဆိုပါက နည်းလမ်းပေါင်းစုံ အသုံးပြုကာ သွေးဆောင်ပြီး ချွေးသိပ်လိုက်မည် ဖြစ်သည်။

သို့သော်လည်း သူတို့က အပေါက်ဝနှင့် တရားရုံးတော်မှာ ပြဿနာ ရှာလိုက်မှာကို သူတို့ တကယ်ကြောက်နေသည်။

မော့ချင်းလင်က မကြာသေးခင်က ဝူမိသားစုကို စုံစမ်းနေသည်။

ဒီဆေးက သက်သေအဖြစ် သူ့ဆီ ပို့ခံရမည် ဖြစ်သည်။

ဒီကိစ္စမှာ ရှောင်ဟန်ကျန့်ကလည်း ပါဝင်သေးသည်။

သူ့ဆရာက စီရင်စုမြို့မှာ ရှိနေဆဲ ဖြစ်သည်။

ရုတ်ရုတ်သဲသဲ တစ်ခုခုသာ ဖြစ်ပါက ဝူမိသားစု ပြဿနာတက်ပြီ ဖြစ်သည်။

ဝူသခင်ကြီးက အသက်ပြင်းပြင်းရှူပြီး သခင်လေးဝူကို လေသံတိုးတိုးဖြင့် ညွှန်ကြားခဲ့သည်။ "တရားရုံးမှာ ထပ်ပြဿနာမရှာဘူးလို့ သူတို့ကို ကတိပေးခိုင်းလိုက်ချေ။"

သခင်လေးဝူက မကျေမနပ် ခေါင်းငြိမ့်ပြခဲ့သည်။ "ဟုတ်ကဲ့"

အရင်ဆုံး ရှစ်မိသားစုရဲ့ စိတ်ခံစားချက်ကို ထိန်းမတ်ပေးရမှာ ဖြစ်ပြီး သူတို့ကို ငွေ ၁၀၀၀ ပေးပြီးသော်လည်း သူတို့ရဲ့ ဂုဏ်သိက္ခာသည်လည်း မှေးမှိန်သွားပြီဖြစ်သည်။

အခုတော့ အရင်ဆုံး ဒီရွံစရာကောင်းသည့်လူတွေကို ဘဝင်လေဟပ်ခွင့်ပေးရမည်ဖြစ်သည်။

ပြီရင်တော့ ယူထားသမျှ ပိုက်ဆံတွေ အကုန် ပြန်အန်ထုတ်အောင်လုပ်ရုံသာမက သူတို့ ထိုငွေတွေကို သုံးစွဲဖို့ အသက်ရှည်ပါ့မလားဆိုတာပါ သူစောင့်ကြည့်ဦးမည်။

ထို့ကြောင့် သူက လျှောက်သွားကာ အားတင်းပြုံးလိုက်သည်။

သူက ရှစ်သခင်မကြီးကို ပြောလိုက်သည်။ "သခင်မကြီး အထင်မှားနေတာပါ၊ ခင်ဗျားတို့ဆီက တင်တောင်းငွေ ၁၀၀၀ တောင်းတာ မဟုတ်ဘဲ ကျွန်တော်တို့က ခန်းဝင်ကြေး ငွေ ၁၀၀၀ ပေးမယ်လို့ ပြောတာပါ၊ ကျွန်တော်တို့ကို ဘာတင်တောင်းတဲ့ပစ္စည်းမှ ပေးစရာ မလိုပါဘူး။"

တင်တောင်းငွေ ၂ပြား ဟုတ်လား။ စော်ကားဖို့ လုပ်နေတာလား။

ရှစ်သခင်မကြီးက ဝမ်းမြောက်ဝမ်းသာ ဖြစ်သွားခဲ့သည်။

ငွေ ၁၀၀၀ ရမည့်အပြင် ငွေ ၂ပြားလည်း မကုန်ရတော့ပေ။

သူမ သဘောတူမည့်အချိန်မှာပဲ ရှစ်မိသားစုရဲ့ တတိယသားက သူမ အင်္ကျီကို ဆွဲခဲ့သည်။

ရှစ်သခင်မကြီးက သူမ သားကို ရှုပ်ထွေးစွာ ကြည့်လိုက်သည်။

ရှစ်မိသားစုရဲ့ စတုတ္ထသားက စကားနှစ်လုံး ပြောခဲ့သည်။ "ငြင်း ငြင်း။"

ရှစ်သခင်မကြီးက အနိုင့်ကျင့်တတ်သည့် မြေးမကို တွေးပြီး တုန်ယင်သွားခဲ့သည်။

ထိုအယုတ်တမာမက ဝူမိသားစုကို အရှက်ခွဲစော်ကားချင်တာ ဖြစ်သည်။

အခု ဒီတိုင်း သဘောတူလိုက်ရင် ရွာပြန်ရောက်သည့်အခါ သူမ ဘဝ လှပမည် မဟုတ်ပေ။

ထိုအယုတ်တမာမက သူမကို မရိုက်ရဲသော်လည်း သူမရဲ့ အဖိုးတန်သားကို ရိုက်ရဲသည်။

ထို့ကြောင့် တင်တောင်းငွေ ပေးရမည့် နာကျင်မှုကို မျိုသိပ်ပြီး သခင်လေးဝူကို ပြန်ဖြေခဲ့သည်။ "မဟုတ်တာ၊ ကျွန်မတို့ မိသားစုက ဆင်းရဲပေမယ့် ဂုဏ်သိက္ခာနဲ့ နေထိုင်တာပါ၊ တင်တောင်းငွေ မပေးလို့ ဖြစ်ပါ့မလား၊ တင်တောင်းငွေ ၂ပြား ပေးမှာပါ၊ အားမနာပါနဲ့။"

သခင်လေးဝူက ဆွံ့အသွားခဲ့သည်။

ငါတို့က အားနာတာ မဟုတ်ဘူး။ ဒီစော်ကားမှုကို သည်းမခံနိုင်တာကွ။

သူက အံကြိတ်ကာ ပြောလိုက်သည်။ "ကျွန်တော်တို့ မိသားစုက ငွေ ၂ပြားတော့ မချို့တဲ့ပါဘူး။"

ရှစ်သခင်မကြီးက ခိုင်မာစွာ ပြောခဲ့သည်။ "ဒီလိုဆိုပေမယ့် ကျွန်မတို့က မပေးလို့ မဖြစ်ဘူး၊ ဘယ်မိသားစုက ချွေးမ မိသားစုကို တင်တောင်းတာမျိုး မရှိလို့လဲ။ ဒုက္ခသည်ဆိုရင်တောင် အစေ့အဆန် အိတ်တစ်အိတ် ပေးရသေးတယ်မလား၊ ရှင့်သမီးကို အစေ့အဆန် တစ်အိတ်လိုတော့ မနိမ့်ကျစေရပါဘူး။"

သူမ စကားတွေက သေစေလောက်တာ မဟုတ်ပေမယ့် အလွန် စော်ကားလွန်းနေသည်။

"ဒါကြောင့် တင်တောင်းငွေ ၂ပြား ပေးမယ်၊ ဆက်မငြင်းနဲ့၊ ဆက်ငြင်းနေရင် လက်မထပ်တော့ဘူး။"

သခင်လေးဝူက ဒေါသထွက်လွန်းသဖြင့် အနောက်ပြန်ယိုင်သွားသည်။

ဒါဟာ ငါတို့သမီးက ၂ပြားပဲတန်တယ်လို့ ဆိုလိုတာမလား။

သူ့ကို လက်မထပ်တော့ဘူး ဟုတ်လား။

ဘယ်သူက တောင်းပန်ပြီး လက်ထပ်ခိုင်းနေလို့လဲ။

ရှစ်သခင်မကြီးရဲ့ အရှက်မဲ့မှုတွေကို သူ တကယ်ရွံရှာနေပြီဖြစ်သည်။

သူ ထပ်ပြီး အန်ထွက်တော့မလိုတောင် ခံစားနေရသည်။

သခင်ကြီးဝူက ခပ်ဖွဖွ ချောင်းဆိုးခဲ့သည်။

ထိုအခါမှ သခင်လေးဝူက သူမကို သတ်ချင်နေသည့်စိတ်ကို ထိန်းချုပ်ခဲ့သည်။ "ကောင်းပြီ၊ ဒီလို ခေါင်းမာနေမှတော့ လက်ခံလိုက်တာပေါ့။"

သူက ဆက်ပြောခဲ့သည်။ "အခု ကျွန်တော်တို့ အိမ်ထဲဝင်ပြီး အသေးစိတ် ဆွေးနွေးရအောင်။"

ထိုအခါမှ ရှစ်သခင်မကြီးက ကျေနပ်စွာ ခေါင်းငြိမ့်ပြခဲ့သည်။ "ကောင်းပြီ၊ အထဲဝင်ပြီး ဆက်ဆွေးနွေးတာပေါ့။"

ထို့နောက် သူမက လှည့်ပြီး မျက်ရည်သုတ်ခဲ့သည်။

သူမက ရှိနေသည့် လူတိုင်းကို ကျေးဇူးတင်ခဲ့သည်။ "ရှင်တို့ရဲ့ မှန်ကန်တဲ့ အမြင်တွေအတွက် အားလုံးကို ကျေးဇူးတင်ပါတယ်ရှင်၊ ကျွန်မတို့ မိသားစု နောက်ဆုံးတော့ ချွေးမအသစ်လေးကို အောင်မြင်စွာ ကြိုဆိုနိုင်ပါပြီ၊ နောက်တစ်ခါကျမှ မင်္ဂလာပွဲအတွက် အားလုံးကို ဝူမိသားစုအိမ်ကို ဖိတ်လိုက်ပါ့မယ်။"

ဘာပဲဖြစ်ဖြစ် ထိုကိစ္စအတွက် သူတို့ မိသားစုက ငွေကြေး မထောက်ပံ့ပေ။

သခင်လေးဝူက ဆွံ့အသွားခဲ့သည်။

ရှစ်သခင်မကြီးက ဘာလို့ ပြဇာတ်မှာ အဆိုတော် မလုပ်တာလဲ။

ဒါက သူမရဲ့ အရည်အချင်းတွေကို ဖြုန်းတီးတာပဲ။