အပိုင်း ၁၂၁

Chapter 121

ပျော်ရွှင်ဖွယ်နှစ်သစ်

ထန်ချောင်းချောင်းသည် ယနေ့၌ အလွန် လှပစွာ ဝတ်စားထားသည်။ မကြာသေးခင်ကပင် မြူးကြွသော pop သီချင်းကို သီဆိုကခုန်ထားရာမှ "သူရဲကောင်း၏တေးသံ" ကဲ့သို့ ရှေးဟောင်းသီချင်းကို ဆိုရမည်ဆိုပါက ထန်ချောင်းချောင်းသည် သူမဘာသာ ချောက်ထဲ ခုန်ဆင်းသကဲ့သို့ ဖြစ်ပေတော့မည်။

သူမ၏ ဂုဏ်သိက္ခာကို ဖျက်ဆီး၍ မဖြစ်ချေ။

သူမ ကောင်းကင်သို့ မော့ကြည့်လိုက်ရာ လခြမ်းကွေးလေးကို မြင်လိုက်ရသည်။ ခေါင်းထဲ၍ အလင်းတန်းတစ်ခု ပေါ်သွား၍ ပြုံးကာပြောလိုက်သည်။

"ကျွန်မသိပြီ...ဒီနေ့က ဒီနှစ်ရဲ့ နောက်ဆုံးနေ့ မနက်ဖြန်ကျရင် နှစ်သစ်ကိုရောက်ပြီ...အဲ့ဒီတော့ လူတိုင်းနဲ့ရင်းနှီးတဲ့ သီချင်းတစ်ပုဒ်ကို ကျွန်မဆိုမယ်...အမြင်မကတ်ကြဖို့နဲ့ ကျွန်မကို ကီးကြောင်တယ်တွေ ဘာတွေ မပြောဖို့လည်း တောင်းဆိုပါတယ်...ကျွန်မ စင်အောက်ရောက်ပြီးမှ အဲ့ဒီအကြောင်းတွေ ဆက်ပြောကြတာပေါ့နော်..."

ပရိသတ်များက သဘောတူသည့် အပြုံးများဖြင့် "သဘောတူပါတယ်..." ဟုပြောလိုက်ကြသည်။

ဤစကားများကို ကြားလိုက်သူများသည် သူတို့ကိုယ်သူတို့ လက်တန်းပြောသောဟာသပွဲသို့ ရောက်နေသည်ဟု ထင်ကုန်ကြမိသည်။

ဘယ်သီချင်းကို ထန်ချောင်းချောင်း ဆိုမှာပါလိမ့်။ လူတိုင်းသည် မျှော်လင့်စောင့်စားနေကြသည်။

ထန်ချောင်းချောင်းသည် လည်ချောင်းကိုရှင်းလိုက်ကာ လူတိုင်း၏အကြည့်များအောက်တွင် သီချင်းကို ညင်သာစွာ စတင်သီဆိုလိုက်တော့သည်။

ထန်ချောင်းချောင်း၏ စာသားများကို ကြားသောအခါတွင်တော့ ဤတစ်ခေါက် ဆွံ့အရမည့်လူသည် ပရိသတ်များဖြစ်သွားတော့သည်။

ဟင်...

ပွဲ၏အခြေအနေသည် ပွဲတော်တစ်ခုကို ကျင်းပနေသကဲ့သို့ ရုတ်တရက် ပြောင်းလဲသွားတော့သည်။

ကြီးမားသော ခန်းမထဲတွင် လူများက ထောင်သောင်းမကရှိနေသည်။ သို့သော် ဤအချိန်တွင်တော့ လူတိုင်းက တိတ်ဆိတ်နေကြသည်။ နောက်ခံတေးဂီတသည်လည်း ရပ်သွား၍ လူတိုင်းက ‌မြှင့်တင်ထားသော စင်ပေါ်ရှိ အမျိုးသမီးကို ကြည့်နေကြသည်။

စက္ကန့်အနည်းငယ်ကြာ တိတ်ဆိတ်ပြီးသောအခါမှ ထန်ချောင်းချောင်း စဆိုလိုက်သည်။

"နှစ်သစ်ကို ကြိုဆိုကြမယ်...နှစ်သစ် နှစ်သစ်ကို တစ်နှစ်ပြီး တစ်နှစ် ဆုတောင်းကြမယ်...နှစ်တွေဟာ မြှားလိုပဲ ရှည်လျားကြတယ်...အတိတ်ကို ပြန်ကြည့်ရတာ မီးခိုးငွေ့လိုပဲ နာကျင်စရာကောင်းပြီး ခါးသက်လှပါတယ်...အခုအချိန်ကစပြီး ကောင်းတဲ့အရာတွေပဲ ဖြစ်လာဖို့ ဆုတောင်းကြမယ်..."

ပရိသတ်များက အံ့ဩမှင်သက်သွားကြသည်။

ဘာသီချင်းကိုဆိုနေတာလဲ...

အဲ့ဒီသီချင်းက ငယ်ငယ်တည်းက လူတိုင်းကြားဖူးနေတဲ့ "ပျော်ရွှင်ဖွယ်နှစ်သစ်" ဆိုတဲ့ နှစ်သစ်ကိုကြိုတဲ့ သီချင်း မဟုတ်ဘူးလား...

သီချင်းက အရမ်းကို ရင်းနှီးနေတယ်...

လူများက အံ့ဩနေရခြင်းမှာ ယခုဖျော်ဖြေပွဲသည် တရုတ်နှစ်သစ်ကူးပွဲတော်မဟုတ်ပဲ နှစ်သစ်ကူးပွဲ သာဖြစ်သောကြောင့် ဖြစ်သည်။ နှစ်သစ်ကူးဖျော်ဖြေပွဲများတွင် သရုပ်ဆောင်များနှင့် အဆိုတော်များသည် စတိုင်ကျ၍ ခေတ်မှီသော ပုံစံနှင့်သာ ဖျော်ဖြေကြသည်။ မည်သူကမှ ဤသို့သော "ရှေးဟောင်း" သီချင်းကို ဆိုကြမည်မဟုတ်ပေ။

အထူးသဖြင့် ခုနလေးကပင် မြူးကြွသည့် Pop သီချင်းဖြင့် ကခုန်ထားသော ထန်ချောင်းချောင်းဆိုလျှင် ပို၍ပင် ဆိုမည့်ပုံမပေါက်ချေ။ ခုနက ကနေစဉ်က ထန်ချောင်းချောင်းသည် ပရိသတ်များ၏ အသည်းနှလုံးကို ကိုင်လှုပ်ခဲ့သည်။ သို့သော် ယခုတွင်တော့ သူမ၏ပုံစံက လုံးဝပင်ပြောင်းသွားကာ "ပျော်ရွှင်ဖွယ်နှစ်သစ်" သီချင်းကို စဆိုနေတော့သည်။ အပြောင်းအလဲက မြန်ဆန်လွန်းသောကြောင့် ပရိသတ်များသည် အနည်းငယ် တုန်လှုပ်သွားကြသည်။

နောက်ထပ် မတော်တဆမှုများ ထပ်ဖြစ်မည်စိုး၍ စင်ပေါ်သို့ လှမ်းကြည့်နေသော ဒါရိုက်တာပင် ထန်ချောင်းချောင်း သီချင်းစဆိုသောအခါ ကြောင်အသွားသည်။ ဒါရိုက်တာသည် ထန်ချောင်းချောင်းအား အချိန်ဆွဲခိုင်းစေခဲ့သော်လည်း ထန်ချောင်းချောင်းက ဤကဲ့သို့ တွေ့ရာသီချင်းကို ကောက်ဆိုပစ်လိမ့်မည်ဟု မထင်ထားခဲ့ချေ။ ထန်ချောင်းချောင်းသည် တကယ်ပင် ဤဖျော်ဖြေပွဲအခြေအနေနှင့် မလိုက်သော ရှေးဟောင်းသီချင်းကို ဆိုနေခဲ့သည်။ ဒါရိုက်တာသည် ထန်ချောင်းချောင်းအတွက် နောက်ခံဂီတ ဖွင့်ပေးရမည်လား မဖွင့်ပေးရမည်လား မသေမချာဖြစ်နေတော့သည်။

စဉ်းစားရ အတော်ကျပ်ပေသည်။

သို့သော် ထန်ချောင်းချောင်း၏ မလျော်ကန်သော လုပ်ရပ်သည် ပွဲအခြေအနေကို ပို၍ပင် တက်ကြွသွားစေမည်ဟု ဒါရိုက်တာ မမျှော်လင့်ထားမိခဲ့ပေ။ ပရိသတ်များသည် မီးအလင်းချောင်းများကို လေပေါ်မြှောက်၍ အော်ဟစ်နေကြသည်။ ဤအားပေးမှုသည် ပွဲကျင်းပသည့်တစ်လျှောက်လုံး၌ အကျယ်လောင်ဆုံး အားပေးမှုများပင်ဖြစ်သည်။

ဒါရိုက်တာ: ???

ဒါရိုက်တာသည် အတော်ပင် ‌အိုနေပြီး ယနေ့ခေတ်လူငယ်များကို လိုက်မမှီတော့ပြီလား ဟု သူ့ကိုယ်သူ တွေးလိုက်မိသည်။

မည်သို့ပင်ဆိုစေကာမူ ပရိသတ်များ၏ တုံ့ပြန်မှုသည် ကောင်းမွန်သည်ကို ဒါရိုက်တာ နားလည်လိုက်သည်။ ထို့ကြောင့် အချိန်ဆွဲ‌မနေတော့ပဲ အဖွဲ့သားတစ်ယောက်ကို ထန်ချောင်းချောင်းအတွက် နောက်ခံဂီတ ဖွင့်ပေးရန် ခိုင်းလိုက်တော့သည်။ ကံကောင်းထောက်မစွာပင် ထိုသီချင်း၏မူပိုင်ခွင့်ကို ပိုင်သော ကုမ္ပဏီပိုင်ရှင်နှင့် ဒါရိုက်တာတို့က ခင်မင်နေကြ၍ တော်သေးသည်။

ထန်ချောင်းချောင်းသည် စိတ်ထဲ၌ စာသားများကို အမြန်စဉ်းစားကာ စင်ဘေးနေရာဆီကို မျက်လုံးထောင့်ဖြင့် လှမ်းကြည့်လိုက်သည်။

ဒါရိုက်တာရေ...ပြင်လို့မပြီးသေးဘူးလား...

ထန်ချောင်းချောင်းသည် ပရိသတ်ကို ဆက်မထိန်းထားနိုင်တော့ချေ။ သူမသည် သီချင်း၏ အရှေ့ပိုင်းစာသားအနည်းကိုသာ မှတ်မိတော့သည်။

ထန်ချောင်းချောင်းသည် အတော်ကြာ စောင့်နေသော်လည်း စင်က အောက်သို့ ကျမသွားပဲ နောက်ခံဂီတ သာ ထွက်ပေါ်လာသည်။

နေုက်ခံတေးဂီတ ထွက်ပေါ်လာသည်နှင့် ခန်းမတစ်ခုလုံးသည် တရုတ်နှစ်သစ်ကူးအငွေ့အသက်များဖြင့် ဖုံးလွှမ်းသွားတော့သည်။

ဤအကြိမ်တွင်တော့ သူမ ဘာမှမလုပ်နိုင်တော့ပဲ ကျည်ဆန်ကိုသာ အမှန်ကိုက်လိုက်ရကာ သီချင်းကို ဆက်ဆိုနေလိုက်ရသည်။

ထိုမျှမက ပရိသတ်များကလည်း ထန်ချောင်းချောင်းနှင့် အတူ လိုက်ဆိုနေကြသည်။

"ပျော်ရွှင်ဖွယ်နှစ်သစ်ပါ...ပျော်ရွှင်ဖွယ်နှစ်သစ်...နှစ်သစ်ပါ...တစ်နှစ်ပြီးတစ်နှစ် လူတိုင်း ငြိမ်းချမ်းတဲ့ နှစ်ကို ရရှိနိုင်ပါစေလို့ ဆုတောင်းပါတယ်..."

ထန်ချောင်းချောင်း စာသားမရသည့်နေရာသို့ ရောက်သောအခါ ဖြတ်ထိုးဉာဏ်သုံးလိုက်သည်။ အချို့ ကျွမ်းကျင်အဆိုတော်များသုံးလေ့ရှိသည့် ပရိသတ်ဘက်သို့ မိုက်ထိုးပေးသည့် နည်းလမ်းကို ထန်ချောင်းချောင်း မှတ်မိသွားသည်။ ထို့ကြောင့် သူမ ‌အော်လိုက်သည်။

"အားလုံးပဲ...တူတူဆိုကြရအောင်..."

ထို့ကြောင့် နောက်တစ်ပိုဒ်တွင် ခန်းမထဲမှ လူများအားလုံးကပါ လိုက်ဆိုနေကြတော့သည်။

"ပျော်ရွှင်ဖွယ် နှစ်သစ်ပါ..."

ပွဲကျင်းပသည့်ခန်းမ၏အနီးအနား၌ နေထိုင်သူများကလည်း ထိုရင်းနှီးသည့် သီချင်းကိုကြနေကြရ၍ တရုတ်နှစ်သစ်ကူးသည် ပုံမှန်ထက် စောရောက်လာသည်ဟု ခံစားနေမိကြသည်။

ပရိသတ်များသည် အလွန်တက်ကြွနေကြ၍ တိုက်ရိုက်ထုတ်လွှင့်သည့် ချန်နယ်ထဲတွင်လည်း အုတ်အော်သောင်းနင်း ဖြစ်နေကြသည်။

【ငါရယ်ရတာသေတော့မယ်..ထန်ချောင်းချောင်းက မန်းဂိုးချန်နယ်ရဲ့ စတိုင်ကျပြီး ခေတ်ဆန်တဲ့ နှစ်သစ်ကူးဖျော်ဖြေပွဲကို လုံးဝ သိမ်းပိုက်လိုက်တာပဲ...】

【ထန်ချောင်းချောင်းက သူ့ရဲ့ ဂုဏ်သတင်းနဲ့လည်း တကယ်လိုက်ဖက်ပါတယ်...သူ့မှာ ဘယ်လောက်တောင် အံ့ဩစရာတွေ ထုတ်ပြစရာကျန်သေးလဲ ငါမသိတော့ဘူး...အခုတော့ အရမ်းရယ်နေရပြီ...】

【ငါသာ ဒါကိုကြည့်မနေရင် အနာဂတ်ကို ကြိုရောက်သွားတယ်လို့ ထင်နေမိမှာ...】

【ငါတကယ်နားမလည်တော့ဘူး...ထန်ချောင်းချောင်းက ဦးနှောက်အလုပ်လုပ်ပုံက ပုံမှန်လူတွေရဲ့ဦးနှောက်အလုပ်လုပ်ပုံနဲ့ မတူဘူးထင်တယ်...】

【ဘုရားရေ...ငါ ဒီသီချင်းကို နားထောင်လိုက်တော့ ငါ့ရဲ့ ကလေးဘဝကို ပြန်ရောက်သွားသလိုပဲ...ဟယ် ဒုက္ခပါပဲ...ငါ့အသက်ကို ထုတ်ပြောမိသွားပြီ...】

【ဒီသီချင်းကို ၂၀၀၀ ခုနှစ်နောက်ပိုင်းမှာ ပြန်ကြားရတာ ဒါပထမဆုံးပဲ...နားထောင်လို့ကောင်းလိုက်တာ...】

【ဒီလို ရှေးဟောင်းသီချင်းတွေက နှစ်သစ်ကူးအငွေ့အသက်ပိုရတယ်လို့ ငါထင်တယ်...ခုခေတ် လူတွေက ဒီလိုသီချင်းတွေကို မမှတ်မိကြတော့ဘူး...ဒါပေမယ့် အဲ့ဒီသီချင်းတွေ ဖွင့်လိုက်ပြီဆိုတာနဲ့ အတိတ်ကို ရှင်းရှင်းလင်းလင်း သတိရလာရတယ်...】

【ထန်ချောင်းချောင်းက သီချင်းကောင်းကောင်းဆိုနိုင်တာပဲ...ကီးလည်းမကြောင်ပါဘူး...သူက သူ့ကိုယ်သူ အရမ်း နှိမ့်ချတာပဲ...】

【စင်ကို မြန်မြန်ပြင်ပါတော့...ချောင်းပေါင် ဆိုစရာစာသားတွေမရှိတော့ဘူးလို့ ငါထင်နေတယ် ဟားဟားဟား】

【ထန်ချောင်းချောင်းက တကယ်ကို ထိပ်တန်းအနုပညာရှင်ပဲ...အခုတော့ သူနဲ့ထိုက်တန်တဲ့ ဩဘာသံတွေရနေပြီ...ငါသူ့ကို သေနိုင်လောက်တဲ့အထိ အရမ်းချစ်တယ်...ချောင်းပေါင်က တကယ်ချစ်ဖို့ကောင်းတဲ့ အရူးမလေး...】

...

"အို ဘုရားရေ...အောက်ကလူတွေကတော့ ထိန်းမရတော့ဘူး...မမလေး ဒီသီချင်းကိုရွေးလိုက်တာ တကယ်ကောင်းသွားတာပဲ...လူတိုင်းရဲ့ ငယ်ငယ်တုန်းက အမှတ်တရတွေ ပြန်ပေါ်လာကြပြီ..."

လီကျိကလည်း မနေနိုင်ပဲ သီချင်းကို လိုက်ဆိုနေလေသည်။ ဖျော်ဖြေပွဲကို ကြာမြင့်စွာ ကြည့်ပြီးသည့်နောက်တွင် ဤသီချင်းကိုတော့ သူလိုက်ဆိုနိုင်ပြီဖြစ်သည်။

လီကျိသည် ဤနေရာ၌ရှိသည့် အခြားလူများနှင့် မျိုးဆက်ကွာခြားနေသည်ကို လုံးဝဝန်ခံမည်မဟုတ်ချေ။

ရှန်းယွဲ့သည်လည်း ထန်ချောင်းချောင်း၏ အပြုအမူများကြောင့် ခဏမျှ ထိတ်လန့်သွားရသော်လည်း နောက်ပိုင်းတွင်တော့ ရင်ထဲ၌ ကျိတ်ပြုံးနေမိသည်။

ဘာမှ ထူးထူးခြားခြားမဖြစ်ဘူးဆိုလျှင် ထန်ချောင်းချောင်း ပီသတော့မည်မဟုတ်ပါ။ ရှန်းယွဲ့ကတော့ ဤကဲ့သို့ ကိစ္စများကို ရိုးနေပြီဖြစ်သည်။

လီကျိက သီချင်းကို ပို၍ကျယ်လောင်စွာ အားမာန်အပြည့်နှင့် လိုက်ဆိုနေသည်။

"မမလေးက သူသီချင်းကောင်းကောင်းမဆိုတတ်ဘူးလို့သာ ပြောနေတာ...အခု ဆိုနေတာ ကီးတစ်ချက်မှ မလွဲဘူး...ခုနဆိုတဲ့သီချင်းထက်တောင် ဒီဟာက ပိုကောင်းတယ်လို့ ကျွန်တော်ထင်‌တယ်..."

ရှန်းယွဲ့က ခပ်တည်တည်ပင်ပြောလိုက်သည်။

"သူ စာသားတွေမေ့နေတာ..."

"ဟမ်...သူဌေး ဘယ်လိုသိလဲ..."

လီကျိက နားမလည်ဖြစ်သွားသည်။

"မမလေးက သီချင်းကို သေချာဆိုနေတယ်လို့ ကျွန်တော်ထင်နေတာ...ထစ်သွားတာမျိုးတွေ ကျွန်တော် မကြားမိပါဘူး..."

"သူက မိုက်ခရိုဖုန်းကို ပရိသတ်ဆီ ခဏခဏထိုးပေးနေတာပဲ...ကြည့်လိုက်ရုံနဲ့ သူ စာသားတွေ မမှတ်မိလို့ ပရိသတ်ကို ဆိုခိုင်းနေတာမှန်းသိသာတယ်..."

ရှန်းယွဲ့သည် ကြီးမားသောတီဗီမျက်နှာပြင်၌ ပေါ်နေသော ထန်ချောင်းချောင်း၏ မျက်နှာအမူအယာကိုကြည့်၍ သူမသည် တည်ငြိမ်နေဟန်ဆောင်ထားရခြင်းမှန်း ခန့်မှန်းလိုက်သည်။

ထိုသို့ဆိုလျှင်လည်း ထန်ချောင်းချောင်း၏ ရုတ်တရက် ဖြတ်ထိုးဉာဏ်‌သုံး၍ လုပ်လိုက်နိုင်ခြင်းက တကယ်ကောင်းလှသည်။

လီကျီ သူ့သူဌေးကို ဆက်၍ မြှောက်ပေးလိုက်သည်။

"သူဌေး...သူဌေးနဲ့ မမလေးက တကယ့်ကို လိုက်ဖက်ကြတာပဲ...တစ်ယောက်နဲ့တစ်ယောက် အလိုလို နားလည်နေကြတယ်..."

အခြားလူများက မမြင်နိုင်သော်လည်း လီကျိကတော့ မြင်နိုင်သည်။

ရှန်းယွဲ့ပြောသကဲ့သို့ပင် ထန်ချောင်းချောင်းသည် ဆိုစရာ စာသားများ ကုန်ခါနီးဖြစ်နေတော့သည်။

ကံကောင်းစွာပင် သီချင်းပြီးဆုံးခါနီး၌ သူမ ဦးနှောက်ကို မနည်းညှစ်ထုတ်၍ အချိန်ဘယ်လို ဆက်ဆွဲရမလဲ စဉ်းစားနေချိန်တွင် မြှင့်တင်ထားသောစင်သည် လှုပ်ရှားသွားတော့သည်။

အမလေး...တော်ပါသေးရဲ့...

ထန်ချောင်းချောင်း ယခုမှပင် သက်ပြင်းချနိုင်တော့သည်။

သို့သော် ပရိသတ်များထဲမှ ရယ်သံများ အလုံးအရင်း ထွက်လာကြပြန်သည်။

ထိုအခါမှသာ သူမတွေးနေသည်ကို ပါးစပ်မှ မတော်တဆထုတ်ပြောလိုက်မိမှန်း သတိထားမိပြီး ထိတ်လန့်သွားတော့သည်။

【ဟားဟားဟား ထန်ချောင်ချောင်းတွေးနေတာက ငါတွေးနေတဲ့အတိုင်းပဲ...】

【ချောင်းပေါင်ရဲ့ အကယ်ခံလိုက်ရတဲ့ မျက်နှာက အရမ်းရယ်ရတာပဲ...စင်သာ မလှုပ်ဘူးဆိုရင် သူငိုတော့မယ်ထင်တယ်...】

【ငိုမယ် ဟုတ်လား...ထန်ချောင်းချောင်းက ငိုမှာမဟုတ်ဘူး...စိတ်ရှိတိုင်း သောင်းကျန်းပြီး အေးအေးဆေးဆေး ဆက်နေနေမှာ...】

【ချောင်းပေါင် ဒီနေ့ အရမ်းကြိုးစားခဲ့ရတယ်...ငါ အပိုပြောနေတာမဟုတ်ဘူး...ဒီ ဗီဒီယိုနဲ့ဆိုရင် နောက်တစ်နှစ်လောက် ငါ တိုက်ခိုက်လို့ရတယ်...】

...

စင် ဖြည်းညင်းစွာ အောက်သို့ ကျလာစဉ်တွင် ထန်ချောင်းချောင်းက လူတိုင်းကို လက်ပြနှုတ်ဆက်နေသည်။ သူမသည် လူတိုင်းကို ပျော်ရွှင်ဖွယ်ရာ နှစ်သစ် ဖြစ်ပါစေ ဟု ဆုတောင်းပေး၍ နောက်ဆုံးတွင်တော့ စင်၏ ကန့်လန့်ကာက ပိတ်သွားတော့သည်။

ဤမတော်တဆမှုကြောင့် ပွဲသည် မိနစ်အနည်းငယ် နောက်ကျသွားသည်။ သို့‌သော် ဤကဲ့သို့သော ဖျော်ဖြေပွဲများသည် မတော်တဆမှုမျိုးစုံ ကြုံတွေ့နိုင်သည်ဖြစ်သောကြောင့် အစီအစဉ်များကို ရွှေ့ရန် ကြိုတင်ပြင်ဆင်ထားပြီးသားဖြစ်သည်။

အောက်သို့ ထန်ချောင်းချောင်းရောက်သွားသောအခါ သူမ၏ခြေထောက်များက အနည်းငယ် ယိုင်‌ချင်နေကြသည်။

ဖန့်ယွမ်က လျင်မြန်စွာပင် ထန်ချောင်းချောင်း ထိုင်၍ အနားယူနိုင်ရန် ကူညီပေးလိုက်သည်။

"ချောင်းချောင်း...အစ်မ ဖျော်ဖြေသွားတာ အရမ်းကောင်းတာပဲ...အစ်မ ဒီတစ်ခေါက်တော့ ဒုက္ခမရောက်တော့ဘူး..."

ထန်ချောင်းချောင်းက ရေတစ်ငုံသောက်လိုက်ကာ ခပ်ဖြည်းဖြည်း ပြောလိုက်သည်။

"မတတ်သာလို့သာ အတင်းအဆင်ပြေအောင် ကြိုးစားလိုက်ရတာပါ..."

ဒါရိုက်တာက ထန်ချောင်းချောင်းဆီပြေးလာ၍ သေချာတောင်းပန်လိုက်သည်။ စင်အောက်မှ အလုပ်သမားတစ်ဦးသည် စက်ကို သေချာမကိုင်တွယ်လိုက်သောကြောင့် မြှင့်တင်သည့် စင်က ထစ်သွားခြင်းဖြစ်သည်။

တစ်ချိန်တည်းမှာပင် ဒါရိုက်တာသည် အလျင်အမြန် ပရိသတ်ကို ဖျော်ဖြေပေးလိုက်မှုနှင့် ‌ပွဲ၏အခြေအနေကို သာလွန်သည့်နောက်တစ်ဆင့်အထိရောက်အောင် လုပ်ပေးလိုက်သည့် အလွန်ကောင်းမွန်သော ဖျော်ဖြေမှုတို့ကြောင့်လည်း ထန်ချောင်းချောင်းကို ကျေးဇူးတင်လိုက်သည်။ ဒါရိုက်တာက အလွန်ပင်ပျော်ရွှင်နေသည်။ ယခုပင် ထန်ချောင်းချောင်း၏ ဖျော်ဖြေမှုကြောင့် တီဗီချန်နယ်၏ rating များသည် တဟုန်ထိုး ထိုးတက်သွားကာ အခြား ပွဲများကို အပြိုင် ထုတ်လွှင့်နေသည့် ဂြိုလ်တုတီဗီများနှင့် အပြတ်အသတ်ကွာသွားတော့သည်။

ထန်ချောင်းချောင်းက koi ငါးကဲ့သို့ပင် ဖုန်းကွယ်ထားသော ကံကောင်းမှုလေးဖြစ်သည်။

ထန်ချောင်းချောင်းက သီချင်း၏မူပိုင်ခွင့်အကြောင်းကိုလည်း မေးဖို့ မမေ့ပေ။ တကယ်တော့လည်း သူမသည် အခြားတစ်ယောက်၏ သီချင်းကို ဆိုခဲ့သည်မဟုတ်လား။ မူပိုင်ခွင့်ကိစ္စကိုသာ ရှင်းမရပါက  ပြဿနာများ ဖြစ်လာပေလိမ့်မည်။

ဒါရိုက်တာက မူပိုင်ခွင့်ကိစ္စများကို ဖြေရှင်းပြီးကြောင်း ပြောလိုက်မှပင် ထန်ချောင်းချောင်း စိတ်အေးသွားရသည်။

နှစ်သစ်ကူးဖျော်ဖြေမှုများသည် နာမည်ကျော်ကြားသော အနုပညာရှင်များအတွက် ပရိသတ်ရှေ့ မျက်နှာပြ၍ အာရုံစိုက်မှုယူရန် အကောင်းဆုံးအချိန်ဖြစ်သည်။ ဂြိုလ်တုတီဗီဖျော်ဖြေပွဲများ၌ ဖိတ်ကြားခံရသော အနုပညာရှင်များဆိုလျှင် အနုပညာလောကတစ်ဝက်လောက်ကို သိမ်းပိုက်ထားသော နာမည်ကြီးများ ဟု ယူဆနိုင်သည်။

ထို့ကြောင့် ဤကဲ့သို့သော ညနေတွင် Weibo ပေါ်ရှိ သတင်းခေါင်းစီးများ၌ အလွန် အပြိုင်အဆိုင်များတတ်ကြသည်။

ထိုခေါင်းစီးများကို ထိုးဖောက်ရန်မှာ မလွယ်ကူကြချေ။

သို့သော် ထန်ချောင်းချောင်းကတော့ လုပ်ပြနိုင်သွားသည်။ သူမတစ်ယောက်တည်းနှင့်ပင် သတင်းခေါင်းစီးနေရာ ၃ နေရာကို သိမ်းပိုက်ထားလိုက်တော့သည်။

---

[T/N: ဒါက ထန်ချောင်းချောင်းဆိုတဲ့ သီချင်းဖြစ်ပါတယ်။ ဘာသာပြန်သူက တရုတ်မဟုတ်တာတောင်မှ ဘာသာပြန်သူလည်း ဒီသီချင်းကို ကြားဖူးနေပါတယ်။]

https://www.youtube.com/watch?v=q5k208ZBnmY

Xxxxxxxx