အပိုင်း ၁၂၉

Chapter 129

"အရင်တုန်းက ငါတို့ရဲ့အိမ်‌ထောင်ရေးက အစစ်အမှန်မဟုတ်ဘူးဆိုတာ ငါတို့နှစ်ယောက်စလုံး သိကြတာပဲ...အခုအချိန်က စပြီးတော့မှသာ ငါတို့ရဲ့ခံစားချက်တွေက အစစ်အမှန်ဖြစ်လာတာ...ငါမင်းကို မင်္ဂလာပွဲအစစ်နဲ့ သေချာလက်ထပ်ပြီးမှ လူကြားထဲကို ချပြချင်တယ်..."

"ရှင်က တကယ်ကို ရှေးရိုးဆန်တာပဲနော်..."

ရှန်းယွဲ့သည် သူစားသောက်သည့်အတိုင်းပင် အရာရာကို အသေးစိတ် ဂရုစိုက်တတ်လေသည်။

"ဒါက ရှေးရိုးထုံးစံနဲ့မဆိုင်ဘူးလေ...ဒါက ယောင်္ကျားတွေက မိန်းမတွေအတွက် သေချာတန်ဖိုးထားပြီး လုပ်ပေးသင့်တဲ့အရာပဲ..."

ထန်ချောင်းချောင်းက လိမ္မာစွာပြောလိုက်သည်။

"အင်းပါ...ရှင့်စကားကို ကျွန်မ လိုက်နာပါ့မယ်..."

ထန်ချောင်းချောင်း၏ ချစ်ဖွယ်ကောင်းသောအပြုအမူလေးကြောင့် ရှန်းယွဲ့၏ နှလုံးသားက လှုပ်ခတ်သွားချိန်မှာပဲ ထန်ချောင်းချောင်းက ဆက်ပြောလိုက်သည်။

"တကယ်တော့ ကျွန်မဆီကို အိုင်ဒေါဒရာမာကားတွေရဲ့ ဇာတ်ညွှန်းတွေအများကြီးရောက်နေတာ...ကျွန်မလည်း ကောင်လေးချောချောလေးတစ်ယောက်နဲ့ ကျောင်းတွင်းအချစ်ဇာတ်လမ်းမျိုးလေး ရိုက်ကြည့်ချင်သေးတယ်..."

ရှန်းယွဲ့: ...

ရှန်းယွဲ့သည် သူပြောခဲ့သည်များအတွက် နောင်တရသွားသည်။ သူပြောခဲ့သည်များကို ပြန်လည်ရုပ်သိမ်း၍ရလျှင် ရုပ်သိမ်းချင်စိတ်များပေါက်နေတော့သည်။

---

နှစ်သစ်ကူးအကြိုညဂီတ‌ဖျော်ဖြေပွဲ ပြီးဆုံးပြီး မကြာခင်မှာပင် "ကျွန်ုပ်တို့မိသားစု" ၏ နောက်ဆုံး ‌ဇာတ်သိမ်းပိုင်းသည် စံချိန်ထိုးဖောက်သည့် rating များဖြင့် အဆုံးသတ်သွားတော့သည်။ အဆုံးသတ်တွင် ဇာတ်လမ်းတွဲ၏ ပျမ်းမျှ ratingသည် မျှော်မှန်းသည်များကိုပင် ကျော်လွန်၍ ထိုနှစ်၏ အကောင်းဆုံး ဇာတ်လမ်းတွဲဖြစ်မည်မှာ သေ‌ချာနေတော့သည်။

ထုတ်လုပ်သူနှင့် ဒါရိုက်တာတို့သည် ထိုအောင်မြင်မှုကို ကြီးမားသောပါတီပွဲကြီး ကျင်းပပေးခြင်းဖြင့် အောင်ပွဲခံခဲ့ကြသည်။ ဒုတိယအမျိုးသမီးဇာတ်ဆောင် ထန်‌ချောင်းချောင်း၏ ဂုဏ်သတင်းသည်လည်း ပို၍ပင် မြင့်တက်လာသည်။ ထန်ချောင်းချောင်းသည် ကမ်းလှမ်းမှုများစွာကို လက်ခံရရှိနေတော့သည်။

တရုတ်နှစ်သစ်ကူးက နီးကပ်နေပြီဖြစ်သောကြောင့် ထန်ချောင်းချောင်းအား ကမ်းလှမ်းလာသော ဇာတ်ညွှန်းအများစုသည် နှစ်ကူးပြီးမှသာလျှင် စရိုက်ကြမည်ဖြစ်သည်။ ထို့ကြောင့် ထန်ချောင်းချောင်းသည် ရွေးချယ်ရန် အချိန်များစွာရနေလေသည်။

ထန်ချောင်းချောင်းတို့အဖွဲ့သည် ဇာတ်ညွှန်းရွေးရန် အလျင်မလိုသော်လည်း "အနာဂတ်၏ကောင်လေးများ" ဟူသော စွမ်းရည်ပြပွဲက သူတို့၏ တံခါးကို ခေါက်လာခဲ့သည်။ ထန်ချောင်းချောင်းသည် ထိုစွမ်းရည်ပြပွဲရှိုး၌ အချက်နှစ်ချက်ကြောင့် ဧည့်သည်ဒိုင်လူကြီးအဖြစ် ဖိတ်ကြားခြင်းခံလိုက်ရသည်။

အကြောင်းပြချက်မှာ နှစ်သစ်ကူးအကြိုညဂီတပွဲ၌ ထန်ချောင်းချောင်း သီချင်းဆို၍ ကနေသော ဗီဒီယိုမှာ အလွန်ပင် ကောင်းမွန်၍ နာမည်ကြီးနေသောကြောင့် ဖြစ်သည်။ ဗီဒီယို၏ ကြည့်ရှုသူနှုန်းသည် အခြားနာမည်ကြီး မိန်းကလေးအဖွဲ့များကိုပင် ကျော်တက်သွားသောကြောင့် ထုတ်လုပ်သူအများစုက ထန်ချောင်းချောင်းကို လိုချင်နေကြသည်။ ထိုအချက်မှာ ထန်ချောင်းချောင်းသည် သရုပ်ဆောင်ခြင်းကိုကျော်လွန်၍ ပါရမီပါနေသောကြောင့်သာဖြစ်ပေလိမ့်မည်။

ထို့အပြင် ယခုတလော၌ ထန်ချောင်းချောင်းသည် သတင်းခေါင်းစီးများ၌ နေ့စဉ်လိုလိုပါနေလေသည်။ ထန်ချောင်းချောင်းသည် အလွန်နာမည်ကြီးလာသောကြောင့် သူမကို မသိသူ ဟူ၍မရှိတော့ချေ။

ထိုအလုပ်မှာ နှစ်ခါသာရိုက်ကူးရမည်ဖြစ်သည်။ ထိုရှိုး၌ ဒိုင်လုပ်ခြင်းဖြင့် ထန်ချောင်းချောင်းသည် အချိန်သိပ်အကုန်ခံစရာမလိုပဲ ပိုက်ဆံရနိုင်သောကြောင့် ပြောစရာမလိုစွာပင်  လက်ခံလိုက်တော့သည်။

"အဲ့ဒါတစ်ခုတည်းကြောင့်ပဲ ဒီအလုပ်ကို လက်ခံလိုက်တာလား..."

ထန်ချောင်းချောင်းက အမျိုးသားများ၏ စွမ်းရည်ပြပွဲ၌ သွား၍အကဲဖြတ်မည်ဆိုသည်ကို ရှန်းယွဲ့သိသောအခါ အံကြိတ်၍ ပြောလိုက်သည်။

ထန်ချောင်းချောင်းက မေးလိုက်သည်။

"တခြား ဘာအကြောင်းရှိလို့လဲ..."

ရှန်းယွဲ့က ပြောပြလိုက်သည်။

"မင်း ကောင်လေးတွေကို ကြည့်ဖို့ သွားတာမဟုတ်ဘူးလား..."

ရှန်းယွဲ့သည် ထိုပရိုဂရမ်မှ ထုတ်လွှင့်သည် ထရေလာကို ကြည့်ပြီးဖြစ်သည်။ အသက်နှစ်ဆယ်ပတ်ဝန်းကျင်ကောင်လေးများသည် အပြာနှင့်အဖြူ ဝတ်စုံများကိုဝတ်၍ သီချင်းဆိုကာ ကခုန်နေကြလေသည်။ ရှန်းယွဲ့၏အမြင်၌တော့ ထိုကောင်လေးများသည် နေရာအနှံ့ခုန်ပေါက်‌နေကြသည်ဟုသာမြင်သော်လည်း ကောမန့်များထဲ၌ အမျိုးသမီးဖန်အုပ်စုကြီးက တက်ကြွစွာအော်ဟစ်အားပေးနေကြသည်ကို မြင်သောအခါ ရှန်းယွဲ့သည် စိတ်ပူလာမိသည်။

ရှန်းယွဲ့ကိုယ်တိုင်က ရုပ်ဆိုးနေသည်မဟုတ်သော်လည်း ထန်ချောင်းချောင်းက အလှအပကြိုက်လွန်းလှသည်။ ထိုမိန်းမသည် ကောင်လေးချောချောလေးများနှင့် အချစ်ဇာတ်လမ်းရိုက်ချင်ကြောင်းကို တစ်နေကုန် ပြောနေတတ်သူ မဟုတ်လား။

ထန်ချောင်းချောင်း ရှန်းယွဲ့၏ မျက်နှာကို လှမ်းကြည့်၍ ချက်ချင်းပင် နားလည်သွားသည်။ သူမသည် ပြုံး၍ ပြောလိုက်သည်။

"အဲ့ဒီမောင်လေးတွေက တကယ်ပဲ ငယ်ပြီးချောကြတယ်နော်...ကြည့်ရတာ မျက်စိပသာဒရှိလိုက်တာ...အနားကပ်ပြီး သေချာကြည့်ရမယ်..."

ရှန်းယွဲ့၏ မျက်နှာက ပို၍ပင်စူပုတ်သွားသည်။

"အိမ်မှာ ဒီလောက်ကောင်းတဲ့လူရှိနေတာတောင် မလုံလောက်သေးဘူးလား..."

Weibo ပေါ်တွင် ရှန်းယွဲ့အား လိုက်နေသူများစွာရှိ၍ ကောမန့်များ၌ "‌ယောင်္ကျား" ဟုခေါ်နေကြသူများလည်း အများအပြားရှိပေသည်။

ထန်ချောင်းချောင်းက ရယ်လိုက်သည်။ ရှန်းယွဲ့၏ မနာလိုမှုသည် သူကြိုက်သောပစ္စည်းများကို အသိမ်းခံရမည်ကို ကြောက်နေသော ကလေးလေးနှင့်တူပေသည်။

ရှန်းယွဲ့သည် မူလဝတ္ထု၌ ဗီလိန်သူဌေးကြီး ဖြစ်ခဲ့သည်ကို ထန်ချောင်းချောင်း လုံးဝမေ့နေမိတော့သည်။

ထန်ချောင်းချောင်းသည် ဝအောင်ရယ်ပြီးသောအခါ ရှဉ့်လေးကဲ့သို့ ဆိုဖာပေါ်၌ထိုင်၍ ရှန်းယွဲ့အား တင်းကျပ်နေအောင် ဖက်ထားလိုက်တော့သည်။

"စိတ်မပူပါနဲ့...အပြင်မှာ ကျွန်မ ဘယ်လောက်ပဲ အရောင်စုံတဲ့အလံတွေကို လွှင့်နေလွှင့်နေ ရှင့်အိမ်က အလံနီကတော့ ဘယ်တော့မှ အချမခံရပါဘူး..."

ထန်ချောင်းချောင်းက ခိုင်မာစွာပြောလိုက်သည်။

ရှန်းယွဲ့သည်လည်း ယခုမှပင် အနည်းငယ်စိတ်အေးသွားကာ ကိုယ့်ကိုယ်ကိုယ်သတိမထားမိခင်မှာပင် ခေါင်းငြှိမ့်ပြလိုက်မိသည်။

ထန်ချောင်းချောင်း ရှန်းယွဲ့ကိုကြည့်ကာ ရယ်နေပြန်သောကြောင့် နောက်ဆုံးတွင်တော့ ရှန်းယွဲ့သည် တစ်ခုခုမှားနေပြီဖြစ်ကြောင်းကို သတိထားလိုက်မိတော့သည်။ ရှန်းယွဲ့သည် ဒေါသထွက်သင့်သည်ဖြစ်‌သော်လည်း ထန်ချောင်းချောင်း၏ နူးညံ့သောခန္ဓာကိုယ်ကို ပွေ့ဖက်လိုက်သောအခါ ရှန်းယွဲ့၏ ဒေါသများသည် ပျောက်ကွယ်သွားတော့သည်။

ထန်ချောင်းချောင်းက ရှန်းယွဲ့၏ လည်ပင်းကို သိုင်းဖက်ကာ ပြုံး၍ပြောလိုက်သည်။

"သူတို့တွေက ရှင့်ထက် ပိုငယ်၊ ပိုနူးညံ့၊ အကလည်း ပိုတော်ပြီး ပိုလည်း ချောကြပေမယ့် ကျွန်မရဲ့ ရင်ထဲမှာတော့ ရှင့်ကို ဘယ်သူမှ မယှဉ်နိုင်ကြပါဘူး..."

ယခုလိုကျတော့လည်း ပွင့်လင်းလွန်းနေပြန်လေသည်။

ထန်ချောင်းချောင်းပြောသည်မှာ ကြောင်တောင်တောင်နိုင်နေ‌သော်လည်း ရှန်းယွဲ့က ပြုံးလိုက်မိသည်။

ထန်ချောင်းချောင်းက နူးညံ့စွာမေးလိုက်သည်။

"ရှင် နို့လက်ဖက်ရည်(milk tea) သောက်ချင်လား .."

ရှန်းယွဲ့: "ရတယ်လေ...ပစ္စည်းအသစ်ရှာနေလို့လား..."

အိမ်၌ ထန်ချောင်းချောင်း milk tea လုပ်နေသည်ကို ရှန်းယွဲ့ မမြင်မိပါ။

"အင်း...ပိန်းဥ milk tea..."

"ကောင်းသားပဲ..."

"ဒါပေမယ့် အဲ့ဒီထဲမှာ ပိန်းဥလည်းမပါဘူး...လက်ဖက်ရည်လည်း မပါဘူး..."

"ဟမ်...ဒါဆို ဘာပါမှာလဲ..."

ထန်ချောင်းချောင်းက ရယ်၍ပြောလိုက်သည်။

"Boba ပဲ ကျန်တော့တယ်..."

[T/N: Boba သည် milk tea ထဲ၌ပါလေ့ရှိသော bubble အလုံးလေးများဖြစ်သည်။ သို့သော် Boba ဟူသော စကားလုံးကို "အနမ်း" ဟူသော အဓိပ္ပာယ်အနေနှင့်လည်း သုံးကြသည်။ "မွ" ဟုပြောလိုက်သည်နှင့် ဆင်တူသည်။]

ထိုအခါမှသာလျှင် ရှန်းယွဲ့သည် milk tea ၏ အဓိပ္ပာယ်အစစ်ကို နားလည်‌တော့သည်။ ထန်ချောင်းချောင်းသည် ထိုအချစ်စကားများကို ဘယ်ကနေဘယ်လို သိလာသည်မသိပါ။ အလွန်ပင် အသည်းယားဖို့ကောင်းလေသည်။

သို့သော်လည်း ဘာဖြစ်သေးသနည်း။ ရှန်းယွဲ့သည် ထို milk tea ကိုနောက်ထပ် ဆယ်ခွက်လောက်ပင် ထပ်မှာလိုက်ချင်ပါသေးသည်။

"အနာဂတ်၏ကောင်လေးများ" သည် ယောင်္ကျားလေးစွမ်းရည်ပြပွဲရှိုးတစ်ခုဖြစ်သည်။ တစ်နိုင်ငံလုံးမှ ပြိုင်ပွဲဝင်ပေါင်း နှစ်ရာကျော်သည် လာရောက်ဖျော်ဖြေယှဉ်ပြိုင်ကြ၍ မဲနှင့် တဖြည်းဖြည်းဖြုတ်ချသွားကာ နောက်ဆုံးကျန်သော ၁၁ယောက်ကို အဆိုတော်အဖွဲ့အဖြစ် စင်တင်ပေးမည်ဖြစ်သည်။ ဤဈေးကွက်ထဲရှိ စွမ်းရည်ပြပွဲရှိုး တော်တော်များများသည် ဤပုံစံနှင့်သာ သွားကြ၍ ကွဲပြားလျှင်လည်း အနည်းငယ်သာ ကွဲပြားပေသည်။ ထန်ချောင်းချောင်းအပြင် အဓိက ဒိုင်လူကြီးတစ်ဦးနှင့် လေ့ကျင့်ပေးသူနည်းပြ ငါးဦးလည်း ရှိမည်ဖြစ်သည်။

ထန်ချောင်းချောင်းက ထိုရှိုး၌ ဧည့်သည်ဒိုင်အဖြစ်လုပ်ရသည်မှာ လွယ်ကူမည်ဟု ထင်ခဲ့မိသည်။ အခြားစီနီယာလေ့ကျင့်ပေးသူများစွာလည်း ရှိနေသည်မဟုတ်လား။ သို့သော် တကယ်ကတော့ ထိုသို့မဟုတ်ပေ။

ပရိုဂရမ်မှထုတ်လွှင့်ထားသော ထရေလာကို ကြည့်ခြင်းဖြင့် ကောင်လေးများတစ်ဦးချင်းစီသည် အဆိုနှင့်အက၌ ကျွမ်းကျင်ကြသော ယောင်္ကျားလေးအဆိုတော်အဖွဲ့များ၏ အနာဂတ်ရောင်ခြည်လေးများဖြစ်သည်ဟု ထန်ချောင်းချောင်းထင်ခဲ့မိသော်လည်း တကယ့်ရလဒ်များကတော့ ကြေကွဲဖွယ်ဖြစ်နေခဲ့လေသည်။

ထန်ချောင်းချောင်းသည် စိတ်ကို ပွင့်ပွင့်လင်းလင်းထား၍ ရှိုးကိုကြည့်ရန် စိတ်ကူးထားသော်လည်း ရှိုးက တကယ်ပင် တုန်လှုပ်ဖွယ်ကောင်းနေသည်။

တကယ်တမ်းက ထရေလာ၌ပါသော ပြိုင်ပွဲဝင်များဆိုထားသည့်သီချင်းများအကုန်လုံးသည် အသံညှိထားခြင်းဖြစ်ပေသည်။ တကယ့်ပြင်ပတွင် ပြိုင်ပွဲဝင် ဆယ်ယောက်၌ ရှစ်ယောက်က သီချင်းဆိုရာတွင် ကီးမကိုက်ကြချေ။ သူတို့ပါးစပ်မှထွက်နေသောအသံများမှာ ကားမတော်တဆမှုများ၌ ဦးနှောက်ထဲသို့ စူးနစ်ဝင်ရောက်သွားသော အသံနှင့်တူသည်။ အချို့ ပြိုင်ပွဲဝင်များက မူလတန်းကလေးများထက် အနည်းငယ်ပိုကောင်းအောင် ကနိုင်ကြသော်လည်း အနည်းဆုံးတော့ မူလတန်းကလေးများကသည်က ညီညာ၍ ချစ်စရာကောင်းသေးသည်။

အမြဲတမ်းလေ့ကျင့်ပေးသူနည်းပြများသည် မည်သို့များ အမြဲပြုံးနိုင်နေမှန်းထန်ချောင်းချောင်းမသိချေ။ သို့သော် ထိုအရာက ထန်ချောင်းချောင်း သည်းမခံနိုင်ဆုံးအရာမဟုတ်ပါ။ တကယ်တော့လည်း ဤလူရွေးပွဲက အယောက်တစ်ရာထဲမှ တစ်ယောက်ကိုသာ ရွေးရမည့် လုပ်ငန်းစဉ်ဖြစ်ပေသည်။

ထန်ချောင်းချောင်းသည်းမခံနိုင်သည်က ယခုပြိုင်ပွဲဝင်များသည် သူတို့၏အရှေ့မှလူများနှင့် အနည်းငယ်ကွဲပြားနေခြင်းဖြစ်သည်။ အတိတ်၌ ဤကဲ့သို့ စွမ်းရည်ပြပွဲများ၏ လုပ်ရိုးလုပ်စဉ်သည် သနားအောင် ပြောခြင်းဖြစ်သည်။ ပြောပြစရာဇာတ်လမ်းမရှိပါက ပြိုင်ပွဲဝင်များသည် ဒိုင်များနှင့် ပရိသတ်များ၏ သနားမှုကို ရယူရန် ဆင်းရဲသည့် ဘဝမျိုးကို ဖန်တီး၍ပြောဆိုကြသည်။

သို့သော် ယခုတွင်တော့ ပြိုင်ပွဲဝင်များသည် လူချမ်းသာပုံစံ လုပ်ခြင်းက ပို၍ခေတ်စားနေလေသည်။ ဥပမာအားဖြင့် ယခု စင်ပေါ်၌ ပြိုင်ပွဲတစ်ဦးသည် လမ်းဘေးအကလေးတစ်ခုကို က၍ သူ့ဘဝအကြောင်းကိုပြောနေသည်။

"ကျွန်တော်က သီချင်းဆိုရတာနဲ့ ကရတာကို အလယ်တန်းမှာတည်းက အရမ်းကြိုက်ခဲ့တာ ဒါပေမယ့် ကျွန်တော့်မိဘတွေက မကြိုက်ကြဘူး....ကျွန်တော့်ကို နိုင်ငံခြားမှာ ကျောင်းထားဖို့လုပ်ကြတယ်...ကျွန်တော့် ကျောင်းဝင်ခွင့်ကိစ္စတွေအကုန်ပြင်ဆင်ပြီးသွားတာတောင်မှ ကျွန်တော်က မသွားချင်ခဲ့ဘူး...New York ရဲ့ ဥပဒေစည်းမျဉ်းတွေက မကောင်းဘူးလေ...အဲ့ဒီဘဝက ကျွန်တော်နဲ့ ဘာမှမဆိုင်ဘူး လို့ ခံစားရတယ်...ကျွန်တော့်အဖေက မြို့တော်မှာ အိမ်တွေအများကြီးပိုင်ပေမယ့် အဲ့ဒီအိမ်တွေက ကျွန်တော်နဲ့ ဘာမှ မပတ်သတ်တာလိုမျိုးပေါ့..."

"ဒါပေမယ့် အဲ့ဒီအချိန်တုန်းက ကျွန်တော်က ငယ်သေးတော့ ကျွန်တော့်မိဘတွေရဲ့ အမိန့်ကို မလွန်ဆန်နိုင်ခဲ့ဘူး...အဲ့ဒါကြောင့် ကျွန်တော် New York ကို သွားခဲ့ရတယ်...နိုင်ငံခြားကို ရောက်သွားတဲ့အချိန်မှာလည်း ကျွန်တော့်ရဲ့ လွတ်လပ်ခွင့်တွေ ဆုံးရှူံးရလိမ့်မယ်လို့ မထင်ထားခဲ့ဘူး...အိမ်အကူ၊ ကလေးထိန်းနဲ့ အိမ်က ဒရိုင်ဘာတွေအားလုံးက ကျွန်တော့်ကို မျက်ခြေမပြတ် စောင့်ကြည့်ပြီး အဖေ့ကို သတင်းပြန်ပို့နေကြတယ်လေ...ကျောင်းက ဆရာ ဆရာမတွေကတောင်မှ အဖေ့ရဲ့ စပိုင်တွေဖြစ်နေကြတယ်..."

ထိုစကားများကိုကြားသောအခါ တစ်ခုခုလွဲမှားနေကြောင်း ထန်ချောင်းချောင်းခံစားလိုက်ရသည်။

နည်းပြတစ်ယောက်က မေးလိုက်သည်။

"ဒါဆိုရင် ဒီရှိုးမှာ မင်း ဘယ်လိုလုပ် လာဝင်ပြိုင်လို့ရသွားတာလဲ..."

ပြိုင်ပွဲဝင်က ဆက်ပြောသည်။

"ကျွန်တော် အထက်တန်းကျောင်းကိုရောက်တဲ့နှစ်မှာ ကျွန်တော်အရမ်းစိတ်ညစ်လာလို့ အမေရိကားအနှံ့ကို တစ်လလောက် ကျွန်တော်လျှောက်သွားပစ်လိုက်တယ်...ခဏကြာတော့ ကျွန်တော် တော်တော်ကြိုက်တဲ့ အမေရိကန် အကနဲ့အဆိုတော်က ဖျော်ဖြေပွဲတစ်ခုလုပ်တယ်...ကျွန်တော်က မသွားချင်ခဲ့ဘူး...ဘာဖြစ်လို့လဲဆိုတော့ ကျွန်တော်သွားရင် ဒရိုင်ဘာက အဖေ့ကို သေချာပေါက် ပြန်ပြောပြီး ကျွန်တော်နဲ့ အဖေ ရန်ဖြစ်ကြရဦးမှာမို့လို့...ဒါပေမယ့် ကျွန်တော် အဲ့ဒီဖျော်ဖြေပွဲရဲ့လက်မှတ်ကိုရခဲ့တယ်...ကလပ်တစ်ခုခုက ပေးတာပဲလို့ ကျွန်တော်ထင်ခဲ့လို့ အလကားရတာပဲ သွားလိုက်ပါဦးမယ်ဆိုပြီး ကျွန်တော်သွားခဲ့လိုက်တာ...ဟိုကိုလည်းရောက်ရော ကျွန်တော်က အထူးဧည့်သည်တော်ဖြစ်နေခဲ့တယ်...ဘာဖြစ်လို့လဲဆိုတော့ အဲ့ဒီဖျော်ဖြေပွဲရဲ့ စပွန်ဆာက အဖေဖြစ်နေတာကိုး...အဖေက နောက်ဆုံးတော့ ကျွန်တော့် ဆန္ဒတွေကို နားလည်သွားပြီး ကြိုးစားခွင့်ပေးခဲ့တာမို့လို့ ကျွန်တော် ဒီကို လာခဲ့တာပါ..."

ထန်ချောင်းချောင်း လုံးဝဆွံ့အနေမိသည်။

ထိုစကားအတိုလေးကပင် ပွင့်ပွင့်လင်းလင်းရော လျှို့ဝှက်စွာပါ ကြွားဝါနေသည်နှင့်တူ‌နေသည်။ ထိုပြိုင်ပွဲဝင်၏စကားများမှ အရေးပါသည့် အချက်အလက်များကို ဆွဲထုတ်နိုင်လေသည်။ သူ၏မိသားစုသည် မြို့တော်၌အိမ်များစွာပိုင်သည်၊ သူသည် နာမည်ကြီးအမေရိကန်ကျောင်း၌ တက်ရောက်နိုင်သည်၊ နိုင်ငံခြား၌ နေနေစဉ်တွင်ပင် အိမ်တော်ထိန်း၊ ဒရိုင်ဘာနှင့် ကလေးထိန်းတို့ငှားထားနိုင်သည်။ အမေရိကားနိုင်ငံအနှံ့ကို စိတ်ရှိတိုင်း သွားချင်သည့်နေရာသွားနိုင်၍ ကလပ်မျိုးစုံ၌လည်း တက်နိုင်သည်။ သူ့အဖေသည် နာမည်ကြီးအမေရိကန်အဆိုတော်အား တိုက်ရိုက်စပွန်ဆာလုပ်ပေးနိုင်သူဖြစ်သည်။

အတိုချုံးပြောရလျှင် စာကြောင်းတစ်ကြောင်းသာရှိသည် ---ထိုပြိုင်ပွဲဝင်သည် ဘာမှမလုပ်လျှင်တောင် အိမ်ပြန်၍ အမွေများကို ထိုင်စားနေ၍ရပေသည်။

တကယ်ကို ဗာဆိုင်း ပါပေလား။

[T/N: Fán'ěrsài (凡尔赛) or Versailles(ဗာဆိုင်း) သည် "မသိမသာလေးကြွားခြင်း" ဟူသော အသုံးအနှုန်းကိုဖော်ပြသော အင်တာနက်ဗန်းစကားဖြစ်သည်။ "Fanxue" ဟုလည်းခေါ်ကြသည်။ ထိုအပြုအမူမှာ လူတစ်ယောက်သည် လူရှေ့၌ သူ့ကိုယ်သူ နှိမ့်ချ၍ပြောဆိုနေသော်လည်း မသိမသာနှင့် သူ့ကိုယ်သူ ချီးမြှောက်နေခြင်းဖြစ်သည်။ စိတ်ညစ်သောလေသံဖြင့် ညည်းညူနေချိန်တွင် တစ်ခါတည်း ကြွားဝါနေခြင်းမျိုးဖြစ်သည်။ ဥပမာအားဖြင့် အင်တာနက်ပေါ်၌ သူငယ်ချင်းတစ်ယောက်သည် သူနေ့တိုင်းထိတွေ့သုံးဆောင်နေရသော အဆင့်မြင့်ဟိုတယ်များ၊ နာမည်ကြီးအသုံးအဆောင်များနှင့် တန်ဖိုးကြီးဝိုင်အရက်များ မကောင်းကြောင်းကို ညည်းညူပြနေခြင်းမျိုးဖြစ်သည်။ သူတို့သည် ညည်းညူနေခြင်းဖြင့် "မင်းတို့က ငါ့လိုမနေနိုင်ကြပါဘူး" ဟူ၍လည်း ကြွားနေခြင်းဖြစ်သည်။ ဤအသုံးအနှုန်းသည် ၁၈ရာစု အကုန်နား၌ ပြင်သစ်ရှိ ဗာဆိုင်းနန်းတော်တွင် နေထိုင်ကြသော‌ တော်ဝင်မျိုးနွယ်များအကြောင်း ရေးသားထားသည့် ဂျပန် manga "The Rose Of Versailles"(ဗာဆိုင်းနန်းတော်၏နှင်းဆီ) မှ ဆင်းသက်လာခြင်းဖြစ်သည်။]

Xxxxxxxxxx