အပိုင်း (၁၂၃)
Viewers 31k
Chapters 322

Chapter 123 


" ပါပါး အရင်တုန်းက ဒီပြဿနာကို မတွေးခဲ့ဖူးဘူး ..."

စုန့်ထင်ရှန်း ပြောလိုက်သည်။


ဝမ်လေးက လက်ဝှေ့ယမ်းပြကာ ပြောလိုက်သည်။

" ဒါဆို အခုစဉ်းစားကြည့်ပါလား ..."


စုန့်ထင်ရှန်း သက်ပြင်းချလိုက်သည်။ ပထမဆုံးချိန်းတွေ့စဉ်က သူဘာပြောခဲ့သည်ကို တွေးလိုက်မိသည်။ 

တစ်ခြားတစ်ယောက်ကို ပရောပရည်လုပ်တဲ့ စကားတွေများ‌လား ... ဒါပေမဲ့ ဒီလိုအခြေအနေမှာ ဒီစကားတွေက သင့်တော်ပါ့မလား  မသေချာဘူး ... ဘယ်လိုပဲဖြစ်ဖြစ် ဝမ်လေးက ယွမ်ရှရဲ့အလှကိုချီးကျူးရင်တော့ သူမပျော်မယ်ဆိုတာ သူပြောနိုင်တယ် ...


စုန့်ထင်ရှန်း ပြန်ဖြေလိုက်သည်။

" ဒါဆိုရင် ပါပါးသေချာတွေးကြည့်လိုက်မယ် ..."


သူ့ဖုန်းကိုထုတ်ပြီး " ပထမဆုံး ချိန်းတွေ့တာမှာ သူမအလှကိုချီးကျူးဖို့ သင့်တော်လား " ဟူ၍ အင်တာနက်ပေါ်တွင် ရှာလိုက်သည်။ 


စုန့်ထင်ရှန်းက မိုင်းကွင်းထဲ လမ်းလျှောက်နေရသကဲ့သို့ ကြောက်လန့်နေမိသည်။ ထို့ကြောင့် သူအလျင်အမြန် ပြန်မဖြေလိုပေ။ ထို့ကြောင့် အင်တာနက်ပေါ်မှ တိကျသေချာသည့်အဖြေရမှသာ ဝမ်လေးကို ပြန်ဖြေလိုက်သည်။

" ပါပါးတွေခဲ့ဖူးသမျှ မိန်းကလေးတွေထဲမှာ သားရဲ့မာမားက အလှဆုံးပဲ .."

.

ဝမ်လေးကြားသည့်အခါ သူက သွေးသောက်တစ်ယောက်ကို တွေ့လိုက်ရသကဲ့သို့ တုံ့ပြန်လိုက်သည်။


" ဒါပေါ့ ... သားက မလိမ်ဘူးလို့ ပြောတယ်မလား ... သားပြောတာမှန်သမျှ အမှန်တွေချည်းပဲ ... ကမ္ဘာပေါ်မှာ အလှဆုံးမိန်းကလေးက သားရဲ့မာမားပဲ ..."


သားအဖနှစ်ယောက်လုံးက ချီးကျူးလိုက်သဖြင့် ယွမ်ရှ ချောင်းဟန့်ပြီး နှိမ့်ချစွာပြောလိုက်သည်။

" အဲ့လိုလည်း မဟုတ်ပါဘူး ..."


စုန့်ထင်ရှန်းထံမှ ချီးကျူးခြင်းခံရသည်က မမျှော်လင့်စရာပင်ဖြစ်သည်။ ကလေးတစ်ယောက်၏ မျက်လုံးထဲတွင် သူ၏အမေကသာ အမြဲတမ်း အလှဆုံးဖြစ်နေတတ်သည်။ သို့ရာတွင် စုန့်ထင်ရှန်းက ထိုစကားများကို လေးနက်စွာပြောလိုက်သဖြင့် သူမ မပြုံးပဲ မနေနိုင်တော့ပေ။


သူတို့ တဖြည်းဖြည်းမြှောက်ပင့်ပြောနေကြပြီး စကားလုံးများက တဖြည်းဖြည်းကြီးကျယ်လာ၍ ယွမ်ရှ စိတ်မသက်မသာဖြစ်လာသည်။ သူတို့ချီးကျူးနေသည့် ပြီးပြည့်စုံလုနီးပါးဖြစ်နေသည့် အမျိုးသမီးမှာ သူမ ဖြစ်သော်လည်း တစ်စုံတစ်ယောက်ကို ချီးကျုးနေသည်ဟု သူမခံစားနေရသည်။


...........


စုန့်ထင်ရှန်း အလုပ်လုပ်ပြီးသွားသည့်အခါ အောက်ထပ်ကိုသွားပြီး ရေသောက်နေသည်။ ယွမ်ရှက ညအိပ်ရာမဝင်မီ နွားနိုးတစ်ခွက်သောက်တတ်သည်ကိုသိ၍ လက်ဦးမှုယူပြီး သူကိုယ်တိုင် နွားနို့တစ်ခွက်သွားပို့ပေးရန် တွေးနေမိသည်။ စုန့်ထင်ရှန်းက အမျိုးသမီးများကို ပရောပရည်လုပ်ရာတွင် အတွေ့အကြုံမရှိပေ။ သူ့ဘဝတွင် မိန်းကလေးတစ်ယောက်ကို ပထမဆုံး စည်းရုံးသိမ်းသွင်းခဲ့ဖူးသည်မှာ ယွမ်ရှကို အမေကောင်းတစ်ယောက်ဖြစ်ပေးရန် သဘောတူညီချက်ပြုလုပ်စဉ်ကသာ ဖြစ်သညိ။


သို့ရာတွင် စုန့်ထင်ရှန်းက ဉာဏ်ကောင်းသူတစ်ယောက်ဖြစ်သည်။ သူဆန္ဒရှိလျှင် စိတ်ပိုင်းဆိုင်ရာအရ  လိမ္မာပါးနပ်သော ဆုံးဖြတ်ချက်များချနိုင်သည်။ ယွမ်ရှသောက်နေကြ နွားနို့ထုပ်ကို ဗီရိုထဲမှထုတ်ပြီး ရေနွေးတည်လိုက်ပြီးနောက် သူမအတွက် နွားနို့ပူပူတစ်ခွက် ဖျော်လိုက်သည်။


ယွမ်ရှက ဝမ်လေးအိပ်ပျော်အောင် ချော့သိပ်နေချိန်ဖြစ်သည်။ သူမက ညမအိပ်မီတိုင်း နွားနို့တစ်ခွက်သောက်ရသည်ကို အကျင့်ဖြစ်နေ၍ ဝေ့ပေါ်ကိုကြည့်ပြီးနောက်  အောက်ထပ်သို့ နွားနို့သွား‌ဖျော်ရန် ပြင်လိုက်သည်။ ထိုအချိန်တွင် တံခါးခေါက်သံကြားလိုက်ရသည်။ 

ဒီအချိန်ဆို အိမ်အကူအန်တီလည်း အိပ်နေလောက်ပြီဆိုတော့ တံခါးခေါက်တာ စုန့်ထင်ရှန်းပဲဖြစ်မယ် ... ဒီလောက် နောက်ကျနေမှ ဘာပြောမလို့ပါလိမ့် ...


ယွမ်ရှ မတ်တပ်ရပ်လိုက်ပြီး ဆိုဖာပေါ်မှ ညအိပ်ဝတ်စုံရှည်ကို ဝတ်လိုက်သည်။ အမည်မသိ အ‌ကြောင်းအရင်းတချို့ကြောင့် မှန်တင်ခုံနားမှ ဖြတ်သွားသည့်အခါ ခဏရပ်ပြီး မှန်ပေါ်မှ သူမပုံရိပ်ကို စက္ကန့်အနည်းငယ် ကြည့်လိုက်သည်။ တံခါးဖွင့်လိုက်သည့်အခါ သူမထင်သည့်အတိုင်း စုန့်ထင်ရှန်း ဖြစ်နေသည်။  


ရွှေရောင်ကိုင်းမျက်မှန်နှင့် သာမန်အဝတ်အစားများကို ဝတ်ဆင်ထားသဖြင့် နေ့ဘက်တွင်ရုံးဝတ်စုံဝတ်ထားသည့် ရောင်ဝါနှင့် လုံးဝကွာခြားနေသည်။ အကယ်၍ သူမက ဝတ္ထုစာအုပ်ထဲသို့ နေရာမကူးပြောင်းလာပါက ယွမ်ရှက သူမဘဝတွင် ဤသို့သော ယောက်ျားမျိုးကို ရခဲ့သည်ကို ယုံကြည်ရန် ခက်ခဲနေပေလိမ့်မည်။


စုန့်ထင်ရှန်းက သူမကို နွားနို့တစ်ခွက်ပေးလိုက်ပြီး ပြောလိုက်သည်။


" ကိုယ်အောက်ထပ်ကို ရေဆင်းသောက်တုန်းက ရောက်လက်စနဲ့ တစ်ခါတည်း နွားနို့တစ်ခွက်ဖျော်လာခဲ့တယ် ... ခဏနေရင် မင်းအောက်ထပ် မဆင်းရတော့ဘူပေါ့ ..."


ယွမ်ရှက အံ့ဩမှင်သက်စွာဖြင့် ခွက်ကိုယူလိုက်သည်။ အပူချိန်ကို သေချာစွာထိန်းချုပ်ထားသည့် အခန်းဝတွင် ရပ်နေသော်လည်း သူမခန္ဓာကိုယ်ကို နွေးထွေးမှုတစ်ခု ဖြတ်သန်းသွားသကဲ့သို့ ခံစားလိုက်ရသည်။


" ကျေးဇူးတင်ပါတယ်..."

Prev Next