အပိုင်း ၃

အခန်း 3

မီးသင်းသကြားပြောင်းဖူးပေါက်ပေါက်

မနေ့က ရှဲ့ရွှင်းစာကြည့်ခန်းထဲမှာ အိပ်ခဲ့သည်ကို အိမ်တော်ထဲက လူတိုင်းသိကြသည်။ သူတို့ တတိယသခင်မကို အထင်အမြင်မသေးဘဲမနေနိုင်ကြပေ။သူမက ထိုသို့ပြောသည့်အခါ အဘွားက သူမနောက်ကို လိုက်မလာတော့ဘဲ ဦးညွှတ်ပြီး မီးဖိုခန်းထဲက ထွက်သွား​ခဲ့သည်။

ကျန်းရှုယောင်က မနက်စာမစားသဖြင့် အမျိုးသမီးအစေခံလေးယောက်လည်း ဗိုက်ဆာနေကြ၏။ လူတိုင်း ဗိုက်ဆာအတော်ဆာနေကြပြီဖြစ်သည့်အတွက် သူမ ချက်ရန် ဟင်းအမယ်နှစ်မျိုး အမြန်ရွေးလိုက်သည်။

အင်္ကျီတွေကို လိပ်တင်ပြီး အလုပ်စတော့မည့် အချိန်မှာ မီးဖိုချောင်ထဲက လူငါးယောက်မှာ ဘယ်သူမှ မီးမမွှေးတတ်ဘူးဆိုသည်ကို သတိပြုမိလိုက်သည့်အတွက် အပြင်ထွက်ပြီး မီးဖိုချောင်ထဲက မိန်းကလေးတစ်ယောက်ကို ခေါ်ခိုင်းလိုက်၏။

ကလေးမလေးက အရပ်မရှည်ဘဲ ပိန်ပိန်ပါးပါး ခန္ဓာကိုယ်လေးသာရှိပေမဲ့ အလုပ်လုပ် မြန်မြန်ဆန်ဆန်ရှိလေသည်။

မီးစမွှေးပြီးနောက် ကျန်းရှုယောင်  ခေါက်ဆွဲပြင်ဆင်ရန်အတွက် အိုးကြီးတစ်လုံးကို မီးဖိုပေါ်တင်ကာ ရေနွေးအိုးတည်လိုက်သည်။

မုန်လာဥနီ၊ ဟင်းသီးဟင်းရွက်များနှင့် နွေကြက်သွန်တို့ကိုတွေ့သဖြင့် နောက်ပိုင်းတွင် အသုံးပြုရန်အတွက် သပ်ရပ်စွာ လှီးဖြတ်လိုက်သည်။

အမျိုးသမီးအစေခံများ သူမ၏ ဓားကိုင်ကျွမ်းကျင်မှုကြောင့် ထိတ်လန့်သွားကြသည်။ သူတို့က တစ်ယောက်ကို တစ်ယောက်ကြည့်ရင်း သခင်မတစ်ယောက် ချက်ပြုတ်သည့်အချိန်ကို အမှတ်ရရန် ကြိုးစားနေကြ၏။

ထိုအချိန်တွင် ရေဆူလာပြီဖြစ်သဖြင့် ကျန်းရှုယောင်  ခေါက်ဆွဲကို သံအိုးကြီးထဲသို့ ထည့်လိုက်သည်။

ပန်းကန်လုံးကြီးတစ်လုံးကိုယူပြီး ကြက်ဥခွဲထည့်၊ အသီးအရွက်နှင့် နွေကြက်သွန်ထည့် ဆားနှင့် ဂျုံမှုန့် ဖြူးပြီး သမအောင် မွှေလိုက်၏။သူမ မီးဖိုချောင်က မိန်းကလေးကို နောက်ထပ်မီးဖိုတစ်ခုလုပ်ခိုင်းပြီး မီးအနည်းငယ်ခွဲကာ ဒယ်အိုးပူပူမှာ ဆီထည့်လိုက်သည်။

ဆီပူလာလျှင် ခေါက်ထားသော ကြက်ဥ၏ လေးပုံတစ်ပုံကို လောင်းထည့်ပြီး ချောမွေ့သော ကြက်ဥပုံသဏ္ဍာန်ဖြစ်အောင် မွှေလိုက်၏။ ထို့နောက် အပြည့်အဝခဲမသွားခင်မှာ ကြက်ဥကို လိပ်ကာ ယောက်မဖြင့် ဖိ၍ ပုံစံဖော်လိုက်ကာ အတွင်းဘက်ကျက်သည်အထိ စောင့်ပြီး ခေါက်ထားသော ကြက်ဥ၏ နောက်ထပ်လေးပုံတစ်ပုံကို လောင်းထည့်လိုက်သည်။

၎င်းကို အကြိမ်ပေါင်းများစွာ ထပ်ခါထပ်ခါလုပ်ပြီးနောက် ခေါက်ထားသောကြက်ဥ၏ နောက်ဆုံးအပိုင်းကို အိုးထဲကို လောင်းချလိုက်ပြီး ထိုအချိန်မှာ  ခေါက်ဆွဲကလည်း ကျက်နေလေပြီ။

ကျန်းရှုယောင် အစေခံတစ်ယောက်ကို ခေါက်ဆွဲများကို ဆယ်ပြီး ရေအေးထဲထည့်ခိုင်းလိုက်ကာ ပြင်ဆင်ထားသည့် ကြက်ဥလိပ်ကြော်ကို ပန်းကန်တစ်လုံးမှာ ထည့်ပြီး ငါးပိုင်းခွဲထားလိုက်သည်။

"လာ လာ မြည်းကြည့်" 

သူမ အမျိုးသမီးအစေခံများကို လက်ယက်ခေါ်လိုက်၏။

အမျိုးသမီးအစေခံများ အံ့သြသွားကြသည်။  အမြဲတမ်း အလုပ်အကျွေးပြုရခက်သည့် ကျန်းရှုယောင်က သူတို့အတွက် ချက်ပြုတ်ပေးလိမ့်မည်ဟု သူတို့ မမျှော်လင့်ထားခဲ့ကြပေ။ လူတော်တော်များများက ၎င်းကို တွေးမိကြ၏။ ကျန်းရှုယောင်က စပ်စုပြီး ချက်ပြုတ်ချင်ခဲ့သည်ဟု အားလုံးက  တစ်ထစ်ချမှတ်ယူခဲ့ကြသည်။ယခု ဟင်းပွဲကို မြည်းကြည့်ရန် တာဝန်က သူတို့ခေါင်းပေါ်ကျလာ၏။

ပိုင်ကျီက လေးယောက်ထဲတွင် အတည်ငြိမ်ဆုံးဖြစ်သည်။ ကျန်သုံးယောက်က လန့်ပြီး ရှေ့ကိုထွက်ရမှာကို ကြောက်ရွံ့နေသောကြောင့် သူမဘာသာသူမ ထရပ်လိုက်၏။

နည်းနည်းလောက် စားမဖြစ်ရုံပဲ မဟုတ်ဘူးလား... အများဆုံးမှ မကျက်သေးရုံပေါ့... အဆိပ်တော့ မမိလောက်ပါဘူးနော်...

သူမ စိတ်ထဲမှာ ကိုယ့်ကိုကိုယ်  နှစ်သိမ့်ပြီး ကျန်းရှုယောင် ပေးလာသည့် ပန်းကန်ပြားကို ယူလိုက်သည်။

သူမနှင့်နီးကပ်လာသောအခါတွင်  ကြက်ဥရနံ့လှိုင်လှိုင်က သူမ၏နှာခေါင်းထဲသို့ စိမ့်ဝင်သွားပြီး ပိုင်ကျီ တံတွေးကို မမျိုချဘဲမနေနိုင်ပေ။

သူမ ရွှေအိုရောင် အရေခွံနှင့် အတွင်းဘက်တွင် နူးညံ့သော ကြက်ဥကြော်ကို ကောက်ယူလိုက်သည်။ သူမကောက်ကိုင်လိုက်သောအခါ ယင်းက အလွန်ပျော့ပျောင်းလျက်ရှိနေကာ အနည်းငယ်အိတုန်အိတုန်ဖြစ်သွားသည်။

ပိုင်ကျီ လူအုပ်ကြီး၏ မျှော်လင့်စောင့်စားနေသောအကြည့်များနှင့် ကိုယ်ချင်းစာတရားများအောက်တွင် တစ်ကိုက် ကိုက်လိုက်လေသည်။ ကြက်ဥအကာက အိုးထဲကထွက်လာခါစဖြစ်သဖြင့် အနည်းငယ် ပူ၏။ ကိုက်လိုက်သောအခါတွင် အထဲရှိ အရသာရှိသော အချိုရည်များက သူမပါးစပ်ထဲမှာ ပေါက်ကွဲထွက်လာသည်။ ကြက်ဥက နူးညံ့ပျော့ပျောင်းပြီး  ကြက်ဥရနံ့လှိုင်လှိုင်က

အသီးအရွက်တုံးလေးများ၏ မွှေးရနံ့နှင့် ရောစပ်နေသောကြောင့် အရသာက အီစိမ့်ပြီး သူမ၏ အရသာဖုများ သက်ဝင်နိုးကြားလာခဲ့သည်။

"ဘယ်လိုနေလဲ" 

ကျန်းရှုယောင်က မေးလိုက်သည်။ ဤမြေသားမီးဖို၏ အပူချိန်ကို ထိန်းချုပ်ရန် မလွယ်ကူသည့်အပြင့် သူမအနေဖြင့် ၎င်းဖြင့်  ပထမအကြိမ် ချက်ပြုတ်ခြင်း သောကြောင့် အနည်းငယ် စိတ်ပူနေသည်။

"ဟုတ်တယ်"

ပိုင်ကျီက ခေါင်းတညိတ်ညိတ်နှင့် သူမပါးစပ်ထဲက ကြက်ဥကြော်ကို မျိုချလိုက်ပြီးဆို၏။

 "ကောင်းတယ် အရသာရှိတယ်...နင်တို့တွေ မြန်မြန်မြည်းကြည့်လှဲ့ " 

ကျန်အစေခံသုံးယောက်သည် အတိတ်က အေးဆေးတည်ငြိမ်လွန်းသော ပိုင်ကျီကို ကြည့်ရင်း စိတ်ထဲတွင် နှာခေါင်းရှုံ့လိုက်သည်။သူမက ကောင်းကောင်းဖားတတ်ရုံသာမက သူတို့သုံးယောက်ကိုပါ ရေထဲသို့ ဆွဲချချင်နေလိမ့်မည်ဟု သူတို့ မမျှော်လင့်ထားပေ။

သူတို့ ပန်းကန်ပြားကို ကောက်ကိုင်ကာ ကြက်ဥလိပ်ကြော်ကို ကိုက်လိုက်ကြ၏။

သူတို့က ဗိုက်ဆာနေကြပြီဖြစ်ကာ မျှော်လင့်ချက်ကလည်းနည်းသည်။ ကြက်ဥကြော်က အရသာရှိသည်ကို သဘာဝအတိုင်း ခံစားကြရသည်။ 

အရသာက အိစိမ့်ပေမဲ့ ဆီမများဘဲ လတ်ဆတ်နေလေသည်။ အရင်တုန်းက စားနေကျ ယာဂုနှင့်အရံဟင်းတွေထက် အများကြီးပိုကောင်း၏။

ကျန်းရှုယောင်   တစ်ပိုင်းယူပြီး သူမကိုယ်တိုင် မြည်းစမ်းကြည့်လိုက်ရာ သူမထင်သည်ထက် ပိုအရသာရှိနေသည်။

သူမ အဆာပြေ ကြက်ဥနှစ်ချပ်စားပြီး မီးဖိုထဲပြန်ဝင်သွားလိုက်၏။ ပဲငံပြာရည်၊ သကြားတို့ဖြင့် ဆောစ့်လုပ်လိုက်ပြီး အရသာချိန်ညှိပြီးနောက် နွေကြက်သွန်၊ ကြက်သွန်ဖြူတို့ကို ပါးပါးလှီးကာ  အိုးတစ်လုံးထဲတွင် ဆီကိုအပူပေး၍ ၎င်းကို ဆီပူပူထဲလောင်းထည့်လိုက်သည်။

အသံနှင့်အတူ ပြင်းထန်သော နွေကြက်သွန်ရနံ့ က လွှမ်းသွားသည်။ခုနက  ကြက်ဥအနံ့လှိုင်လှိုင်နှင့် ယှဉ်ပါက ဆီထဲက နွေကြက်သွန်နံ့က ပိုပြီး မွှေးပျံ့နေ၏။

နွေကြက်သွန်အနည်းငယ် ကျွတ်လာလျှင် ပြင်ဆင်ထားသော ဆော့စ်ကို လောင်းထည့်ပြီး တစ်မိနစ်ခန့် ဆူပွက်ပြီးလျှင် နွေကြက်သွန်ဆီချက် အဆင်သင့်ဖြစ်လေပြီ။

ထို့နောက် ရေအေးအေးထဲမှ ဆယ်ထားသော ခေါက်ဆွဲထဲသို့ ဆီလောင်းထည့်ကာ ရောမွှေလိုက်လျှင် ရိုးရိုးကြက်သွန်စိမ်းခေါက်ဆွဲ ရပြီဖြစ်သည်။

လူအနည်းငယ်က ကြက်ဥလိပ်ကို စားပြီး အစာအိမ်နွေးလာပေမဲ့ နောက်ပိုင်း ကြက်သွန်စိမ်းဆီမွှေးနံ့ရပြီး ဗိုက်ထဲက လောဘကြီးသည့်ပိုးကောင်များက ထပ်မံလှုပ်ရှားလာပြန်၏။ ကြက်သွန်၏မွှေးရနံ့က အခန်းတစ်ခုလုံးကို ပျံ့လွင့်နေပြီ သူတို့ကို တံတွေးမျိုချမိစေသည်။

ကြက်သွန်စိမ်းခေါက်ဆွဲက တစ်ဖက်မှာ ပေါ်လာပြီး ကျန်းရှုယောင် သူတို့ကို မခေါ်ခင်မှာ သူတို့ လေးယောက်က သူတို့ ပန်းကန်လုံးနှင့် ရောက်လာကြ၏။

ပထမဆုံးတစ်ကိုက်တွင် ကြက်သွန်ဆီ၏ရနံ့ပြင်းပြင်း၊ ဆော့စ်၏ လတ်ဆတ်မှုတို့က နွေကြက်သွန်၏ထူးကဲကြွယ်ဝမှုကို ပိုမိုကောင်းမွန်စေသည်။ ခေါက်ဆွဲက နူးညံပြီး ဝါးစားလိုက်သည့်အခါ သူတို့၏ခံတွင်းထဲသို့ ရနံ့က ပျံ့နှံ့သွားသည်။

လူတိုင်းသည် ကျင့်ဝတ်ကို ဂရုမစိုက်ဘဲ စားပွဲရှည်ကြီးပေါ်တွင် မတ်တပ်ရပ်ကာ တွယ်ကြတော့ သည်။

ကျန်းရှုယောင်  သူမဘေးတွင်ရပ်နေသော မီးဖိုချောင်ကမိန်းကလေးက သူမဘေးကို စိုက်ကြည့်နေသည်ကိုတွေ့လိုက်ရသဖြင့် ထိုမိန်းကလေးကိုလည်း ပန်းကန်လုံးတစ်လုံး ပေးလိုက်သည်။ သူမက ၎င်းကို နှစ်ကြိမ် ပြန်တွန်းရန် ကြိုးစားခဲ့သော်လည်း အစားအစာ၏ ဆွဲဆောင်မှုကို မခံနိုင်ပါချေ။ သူမ ပန်းကန်လုံးကိုယူပြီး အငမ်းမရမျိုချတော့၏။

ကြက်ဥလိပ်ကြော်နှင့် ကြက်သွန်စိမ်းခေါက်ဆွဲက ထိပ်တန်းအရသာမဟုတ်ပေမဲ့ တစ်မျိုးက အရသာရှိပြီး နောက်တစ်မျိုးက လေးလေးပင်ပင်ရှိကာ အရသာလည်း လိုက်ဖက်လေသည်။ ဟင်းရည် အကြည်နှင့် အသီးအရွက်များပဲပါသည့် အဆီနည်းဟင်းလျာကို တစ်လကျော်ကြာ စားခိုင်းခြင်းခံရသည့် ကျန်းရှုယောင်   နောက်ဆုံးတွင် အာသာပြေသွားရ၏။

လူတော်တော်များများ ခေါင်းငုံ့စားနေကြချိန်မှာ မုန်လာဥနီခေါင်းသေးသေးလေးက တံခါးဝကနေ ပြူထွက်လာပြီး တစ်ချက်ကြည့်လိုက်ပြီးနောက် သူ့မျက်လုံးများက ကျန်းရှုယောင်ဆီမှာ ချောက်ချသွားခဲ့သည်။

 "တတိယအဒေါ်..."

ကျန်းရှုယောင် မော့ကြည့်လိုက်ရာ အနက်ရောင်မျက်လုံးရွဲကြီးတစ်စုံနှင့် အကြည့်ချင်းဆုံသွား၏။  

ပထမအိမ်တော်ခွဲတွင် အမြွှာယောက်ျားလေးများ မွေးဖွါးထားပြီး တစ်ယောက်ကဝပြီး တစ်ယောက်ကပိန်လေသည်။ တစ်ယောက်က သွက်သွက်လက်လက် တက်ကြွနေပေမဲ့ နောက်တစ်ယောက်က တိတ်တိတ်ဆိတ်ဆိတ်နှင့် ဘာသိဘာသာနေတတ်သည်။ဝတုတ်လေးက ကျန်းရှုယောင်၏အကျီလက်များကို လာဆွဲပြီး ဖလံလေးက  သူ့နောက်မှာ ပုန်းကာ ချောင်းကြည့်နေ၏။

ကျန်းရှုယောင်  သူတို့၏ နာမည်များကို မမှတ်မိတော့သဖြင့် သူမ ဝတုတ်လေး၏ ခေါင်းလုံလုံးလေးကို ပွတ်ကာ "အိုးး မင်းတို့ပဲ"ဟုပြောလိုက်သည်။

ဝတုတ်လေးက သူမနှင့်ရင်းနှီးစွာပြုမူကာ ရယ်လိုက်ပြီး ဖြူဖွေးသောသွားများကိုပြသလာခဲ့၏။ "ဟုတ်...စတုတ္ထညီရဲ့ ဆေးဝါးဓာတ်စာသောက်ရမယ့်အချိန်ရောက်ပြီ"

ဖလံလေးအတွက် ဟင်းရည်တည်ထားသည်မှာ သိသာထင်ရှားလေသည်။

ဝတုတ်လေးက ပြောပြီးသည်နှင့်  ချက်ချင်းပဲ သူပြောချင်သည့်ခေါင်းစဥ်ကို တန်းသွား၏။

"ဒေါ်လေး ဘာစားနေတာလဲ...အနံ့က အရမ်းအရသာရှိမဲ့ပုံ" 

ကြက်ဥလိပ်ကြော်က နည်းနည်းကျန်သေးပြီး အေးမသွားသေးပါချေ။ ကျန်းရှုယောင်က  အပိုင်းတစ်ပိုင်းယူပြီး  ဝတုတ်လေးဆီပေးလိုက်သည်။

 "စားကြည့်ချင်လား" 

ကြက်ဥကြော်က အရောင်လှ၏။ ရွှေရောင်ကြက်ဥကို လှီးထားသော လိမ္မော်နီရောင်မုန်လာဥနီနှင့် ကြက်သွန်းတို့ဖြင့် ရောစပ်ထားသောကြောင့် ကလေးများအတွက် ဆွဲဆောင်မှုရှိလေသည်။

ဝတုတ်လေးက အကိုက်ကြီးတစ်ကိုက်ကိုက်လိုက်၏။သူ အရင်က ဤကဲ့သို့သော  အရသာမျိုး မစားဖူးပေ။ အစားအသောက်အသစ်အဆန်းကို စားလိုက်ရသည့်အခါ သူ့ဘဝက ပြီးပြည့်စုံသွားသလို ခံစားရသည်။သူက ပြောလိုက်၏။

"အရသာရှိတယ်... အရသာရှိတယ်...နောက်ထပ်တစ်ကိုက် ပေးလို့ရမလား"

ကျန်းရှုယောင်က သူ့ကို နောက်တစ်ခု ကျွေးလိုက်သည်။

ဝတုတ်လေးက  သူ့ညီကို မမေ့ဘဲ ပျော်ရွှင်စွာ စားသောက်ခဲ့သည်။ဖလံလေးကို သူ့နောက်ကနေ ဆွဲထုတ်လိုက်ပြီး ဆို၏။

"စတုတ္ထညီ...မင်းစားကြည့် ချင်လား" 

ဖလံလေးက သူ့မျက်လုံးများကို မဝံ့မရဲ ပင့်ကာ ကျန်းရှုယောင်ကို ကြည့်လာသည်။  သူ၏   ကြည်လင်သန့်ရှင်းနေသော အနက်ရောင်မျက်လုံးများက စူးစမ်းလိုစိတ်များ ပြည့်နှက်နေပြီး ခေါင်းညိတ်လိုက်လေသည်။

ကျန်းရှုယောင်၏နှလုံးသား ချက်ချင်း အရည်ပျော်သွားပြီး သူ့ကို ငုံ့ကာ ကျွေးလိုက်၏။ သူက ကြောင်လေးတစ်ကောင်လို အကိုက်သေးသေး ကိုက်ပြီး ဖြည်းညှင်းစွာ ဝါးနေကာ ယင်းက ကျန်းရှုယောင်ကို အနည်းငယ် စိုးထိတ်သွားစေ  ခဲ့သည်။

"အရသာရှိလား"

သူ့ဘေးရှိ ဝတုတ်လေးက မေးလိုက်၏။ 

ဖလံလေးက ဖြည်းညှင်းစွာ ခေါင်းညိတ်လိုက်ပြီး ထိုမှသာ ကျန်းရှုယောင်  သက်ပြင်းချလိုက်သည်။

ဝတုတ်လေးက လေအိုးလေးဖြစ်ပြိး သူတို့ကိုယ်သူတို့ မိတ်ဆက်လာ၏။

 “စတုထ္ထညီက ချိုတာတွေ ကြိုက်တယ်...ခါးတဲ့ဆေးတွေ အရမ်းသောက်တာကြောင့် ဖြစ်နိုင်တယ်... အစာစားချင်စိတ်မကောင်းလို့ နည်းနည်းပဲစားနိုင်တော့ သားထက်အများကြီးပိုပိန်နေတာပေါ့"

အမွှာနှစ်ယောက် ဝင်လာပြီးနောက် အမျိုးသမီးအစေခံများက  ပန်းကန်တွေကို ဆေးကြောပြီး ထိုနေရာမှာပဲ ရပ်နေကြသည်။ အမွှာနှစ်ယောက်၏ အမျိုးသမီးအစေခံများကလည်း သူတို့နောက်ကနေ မီးဖိုချောင်ထဲသို့ လိုက်လာပြီး  အဖုံးဖွင့်ကာ အပူချိန်ကို စစ်ဆေးကြ၏။ ဆေးဝါးဓာတ်စာက ကျိုမပြီးသေးသည်ကို တွေ့လိုက်ရသဖြင့် စောင့်ဆိုင်းရန် ဘေးနားတွင် ရပ်နေကြသည်။

အကြီးဆုံးသခင်မက အိမ်၏တာဝန်ခံဟု ကျန်းရှုယောင်  ထင်မိသည်။  နောက်ပိုင်းတွင်  မီးဖိုချောင်အသေးစားတစ်ခုလုပ်ရန် အကြောင်းပြောရန် ပထမအိမ်တော်ခွဲသို့ သွားရမည်ဖြစ် သောကြောင့် သူမလည်း ပင်မမီးဖိုချောင်တွင်နေပြီး ကောင်လေးများနှင့် ဆေးဝါးဓာတ်စာသောက်မည်ကို စောင့်ခဲ့သည်။

ဝဝကစ်ကစ်ကောင်လေးကို မြင်ပြီး သူမ လျင်မြန်လွယ်ကူသော သရေစာတစ်မျိုးကို ရုတ်တရက် တွေးလိုက်မိသည်။ မည်သို့ပင်ဖြစ်စေ သူမ ဘာမှမလုပ်ဘဲနေသည်ထက် တစ်ခုခုကို စမ်းကြည့်သည်က ပိုကောင်း၏။

ကျန်းရှုယောင် မီးဖိုချောင်ထောင့်မှာ နေလှန်းထားသော ပြောင်းဖူးကို ယူကာ အစေ့များကို ခွာပြီး အိုးထဲသို့ ပစ်ချလိုက်သည်။ သူမ အဖုံးကို အမြန်ပိတ်လိုက်သောအခါ အိုးကတဖောင်းဖောင်းအသံများထွက်ပေါ်လာသည်။ သူမ သန့်ရှင်းသော သံအိုးတစ်လုံးကို ထပ်တည်ပြီး အေးနေသောအိုးထဲသို့ ဆီနှင့် သကြားကို လောင်းထည့်လိုက်သည်။ မီးဖိုချောင်က ကောင်မလေးကို အပူရှိန်အလယ်အလတ်လောက်  မီးကိုမွှေးခိုင်းလိုက်၏။ သကြားက အရည်ပျော်ပြီး အရောင်ပြောင်းကာ တဖြည်းဖြည်း အညိုရောင်ပြောင်းသွားသည်။ တူဖြင့်အမျှင်တန်းအောင် ဆွဲယူနိုင်ပြီ သောကြောင့် မီးသင်းသကြား အဆက်သင့်ဖြစ်ပြီဖြစ်သည်။

ဝတုတ်လေးက  ခေါင်းလေးထိုးကာ စူးစူးစိုက်စိုက်ကြည့်နေပြီး သံဒယ်အိုးပေါက်ကွဲမည်ကို စိုးရိမ်သဖြင့် အမျိုးသမီးအစေခံကြီးတစ်ယောက်က ရှေ့သို့ ထွက်လာပြီး သူ့ကို ဆွဲထုတ်လိုက်သည်။

ကြောက်ရွံ့နေသူက သူမ တစ်ဦးတည်းမဟုတ်၊ လူတိုင်းလည်း အနည်းနှင့်အများ ဝေးဝေးသို့ဆုတ်ကုန်ကြ၏။

ကျန်းရှုယောင်က သူမ၏ အရည်အချင်းကို ပြသခြင်းသက်သက်ဖြစ်သော်လည်း အစေခံများ၏ အမြင်တွင် သူမက အားကိုးမရသော လူတစ်ယောက် ဖြစ်နေဆဲပင်။

သံအိုးက လေးလံသောကြောင့် ကျန်းရှုယောင်  ပြောင်းဖူးစေ့များ အညီအမျှ အပူရပြီး မီးသင်းသကြားဖြင့် ဖုံးအုပ်ထားကြောင်း သေချာစေရန်အတွက် အိုးကို စက်ဝိုင်းပုံစံ လှုပ်ယမ်းလိုက်သည်။

တဖောင်းဖောင်း အသံများ လျော့သွားသည်။ ခဏအကြာတွင် ပေါက်သံများ သိပ်မကြားရတော့ပေ။ ကျန်းရှုယောင်  မီးဖိုပေါ်မှ သံအိုးကို ချလိုက်သည်။ စက္ကန့်အနည်းငယ်မျှ တည်ထားပြီးနောက် သူမ လူအုပ်ကြီး၏ သံသယမျက်လုံးများအောက်တွင် အဖုံးကိုဖွင့်လိုက်သည်။

ပြောင်းဖူးစေ့အများစုကို ဖောက်ထားပြီး အဖြူရောင် ပြောင်းဖူးပေါက်ပေါက်များကို ကြည်လင်ပြတ်သားသော မီးသင်းသကြားအလွှာဖြင့် ထုပ်ပိုးထားကာ ချိုမြပြီး အရသာရှိလှသည်။

ကျန်းရှုယောင်  တစ်ခုကိုယူ၍ ပါးစပ်ထဲသို့ ထည့်လိုက်သည်။ မီသင်းသကြားအကာက မအေးသေးသဖြင့် အပေါ် ရေက ကောင်းကောင်း မကြွပ်သေးသော်လည်း အချိုကမူ လုံလောက်လေသည်။ ယေဘုယျအားဖြင့် သူမမျှော်လင့်ထားသည်ထက် ပိုအောင်မြင်ခဲ့သည်။

အဖုံးဖွင့်ပြီးနောက် မွှေးရနံ့က မီးဖိုချောင်ထဲတွင် လွှမ်းသွားသည်။ သူမ တစ်ခုကို ကောက်ယူပြီး မြည်းစမ်းသောအခါ ဝတုတ်လေးလည်း မနေနိုင်တော့ပေ။ သူက အစေခံထံမှရုန်းထွက်ပြီး ကျန်းရှုယောင်ဆီသို့ ပြေးသွားခဲ့သည်။ သူ မစောင့်နိုင်ဘဲ “စားကောင်းလား” ဟု မေးလိုက်သည်။

ကျန်းရှုယောင်က သူ့ကို တစ်ခု ကျွေးလိုက်၏။ နှစ်ယောက်သား တစ်ယောက်နှင့်တစ်ယောက် ရင်းနှီးလာကြပြီး ဝတုတ်လေးကလည်း ရွှင်လန်းတက်ကြွသည့် ကိုယ်ရည်ကိုယ်သွေးရှိလေသည်။ ယနေ့မှ ပထမဆုံးတွေ့ဖူးခြင်း ဖြစ်ပေမဲ့ သူတို့နှစ်ယောက်က တစ်ယောက်နှင့်တစ်ယောက် အကြာကြီးသိခဲ့ကြသည့် ညီအကိုတွေလိုပါပင်။

ဖက်တီးလေးက ပေါက်ပေါက်ကို ပါးစပ်ထဲသို့ ထည့်လိုက်သည်။ အပြင်အလွှာရှိ မီးသင်းသကြားက  ယခုအခါ အနည်းငယ် အေးနေပြီဖြစ်ကာ ကိုက်ပြီးနောက် အနည်းငယ် ကြွပ်ရွသော အရသာကို ရရှိစေသည်။ ပေါက်ပေါက်က နူးညံ့ပြီး ချို၏။ မီးသင်းသကြား၏ ကြွယ်ဝသောချိုမြိန်မှုက ပြောင်းဖူး၏အနံ့ကို မဖုံးလွှမ်းထားပေ။ အချိုကဲသော်လည်း ဆီမများဘဲ မီးသင်းသကြား၏၏ခါးသောရနံ့သည် ချိုမြိန်မှုကို ပြေပျောက်စေသည်။

"အွန်း~"

ဝတုတ်လေးက မျက်လုံးဖွင့်လိုက်ပြီး သူ အရသာထက် ဆန်းသစ်မှုကို ပိုနှစ်သက်လေသည်။

သူ ဆန်းသစ်သောအရသာကို ဝေမျှလိုသဖြင့် သူ့ညီကို လက်ယပ်ခေါ်လိုက်၏။

ကျန်းရှုယောင်က  ဇလုံကြီးတစ်လုံးကိုယူကာ ပေါက်ပေါက်အားလုံးကို လောင်းထည့်လိုက်ပြီး ဖလံလေးကို ပေးလိုက်သည်။ ဖလံလေးက သူမကို မဝံ့မရဲကြည့်နေပေမဲ့  ပေါက်ပေါက်အကြောင်း သိချင်စိတ်ကို မထိန်းနိုင်သဖြင့် ​ဇလုံအကြီးကြီးကို ယူလိုက်၏။

တိုက်ဆိုင်စွာပင် ဆေးဝါးဓာတ်စာက အဆင်သင့်ဖြစ်နေပြီဖြစ်သဖြင့် ကျန်းရှုယောင်  ဝတုတ်လေး၏လက်ကို ကိုင်ပြီး "သွားရအောင်...သွားရင်းနဲ့စားလိုက်"ဟုပြောလိုက်သည်။ 

လူတစ်စုသည် ပင်မအိမ်ဆီသို့ အားမာန်အပြည့် ချီတက်ခဲ့ကြသည်။

ဖလံလေးက အစာစားချင်စိတ်မရှိသော်လည်း ပေါက်ပေါက်ကို မြိန်ရေရှက်ရေစားနေကာ  ပါးစပ်ထဲသို့ ဆက်တိုက်ထည့်နေ သည်။ ပင်မအိမ်သို့ရောက်သောအခါတွင် ပြောင်းဖူးပေါက်ပေါက်က တစ်ဝက်မျှသာရှိနေတော့၏။

ခြံဝင်းက တက်ကြွနေပြီး အိမ်ရှေ့တွင် ဘဏ္ဍာစိုးနှင့် ကလေးထိန်းများ တန်းစီရပ်နေသည်။ အကြီးဆုံးသခင်မရှုရှီ၏ စားပွဲပေါ်တွင် စာရင်းစာအုပ်များ ဖြန့်ကျဲထားသည်။

ကျန်းရှုယောင်  ၎င်းကိုမြင်သည့်အခါ သူမကို နှောင့်ယှက်ရန် ရှက်မိသွား၏။ နောက်ကျမှ အချိန်ရှာပြီး ရှုရှီကိုထပ်လာရှာချင်ခဲ့သော်လည်း ရှုရှီက သူမကို အရင်တားလိုက်သည်။

"တတိယယောက်မ "

ရှုရှီက  မျက်နှာထက်တွင် စိတ်အားထက်သန်သော အပြုံးတစ်ခုဖြင့် စာရင်းစာအုပ်ကို ပိတ်လိုက်သည်။ မတ်တပ်ထရပ်ပြီး ခြေလှမ်းအနည်းငယ်လှမ်းကာ နှုတ်ဆက်လေသည်။

သူမက အစေခံများကို  လက်​ဝှေ့ယမ်းပြီးလူစုခွဲခိုင်းလိုက်ကာ လက်​ဖက်​ရည်​နှင့်မုန့်​​များကို ယူလာခိုင်းလိုက်၏။ နွေးထွေးသောဧည့်ဝတ်ကျေပွန်မှုကြောင့် ကျန်းရှုယောင် ခေါင်းမူးသွားလေသည်။