အပိုင်း ၄၁

Chapter 41

ဟမျဘာဂါ

ရှက်စရာကောင်းလွန်းသည်။ ရှဲ့ရွှင်းပေါင်ကို ဖက်ထားသူတစ်ယောက်အနေဖြင့်  သူမ၏လက်ကို မြှောက်ပြီး နှုတ်ထွက်ချင်ခဲ့၏။

ရှဲ့ရွှင်း  မူလက ထိပ်ဆုံးနေရာအတွက် တိုက်ပွဲဝင်ရန် စိတ်မဝင်စားခဲ့ပေ။ မည်သို့ပင်ဖြစ်စေ  အောင်ပွဲက သူ့အတွက် အရေးမကြီးပါချေ။သို့ပေမဲ့ ကျန်းရှုယောင်က သူ့ဘေးမှာ ထိုင်နေသဖြင့် သူ သူမရှေ့မှာ အရှံ့မပေးနိုင်ပေ။

ဒါပေမဲ့ လက်မလျော့ဘဲတင်းခံနေမယ်ဆိုရင် သူက နိုင်လိုစိတ်ပြင်းတဲ့လူဖြစ်သွားမှာလား... ကျန်းရှုယောင်က သဘောမကျဖြစ်မှာလား...

သူ ထိုအကြောင်းကို မသိစိတ်ဖြင့် တွေးနေမိသည်။

ကောချင်ရှုက မြန်မြန်ဖြေပြီး သူလည်း မြန်မြန်ပြန်ဖြေ၏။ တစ်ဒါဇင်ကျော်ကြာပြီးနောက်၊ ကောချင်ရှု၏ အဖြေက ပိုပို နှေးကွေးလာသည်။ နောက်ဆုံးတွင် သူမ အဖြေမထုတ်နိုင်ဘဲ ဝိုင်တစ်ဖန်ခွက်သောက်ပြီး ထွက်သွားခဲ့သည်။

လူတိုင်းသည် ပွဲကောင်းတစ်ပွဲကိုကြည့်လိုက်ရသလို ခံစားရပြီး ရှဲ့ရွှင်း၏မျက်နှာကို စိုက်ကြည့်လိုက်ကြ၏။

ရှဲ့ရွှင်း အတွင်းစိတ်တွင် ရုန်းကန်နေရဆဲဖြစ်သော်လည်း ချက်ခြင်းပင် အနိုင်ရခဲ့သည်။ သူ ကျန်းရှုယောင်ကို စိုးထိတ်စွာ ကြည့်လိုက်သည်။

ကျန်းရှုယောင်  သူ့ကို မကြည့်ပေ။ ယင်းအစား သူမက ထပ်ကာထပ်ကာ မျှောနေသောဝိုင်ဖန်ခွက်ကိုယူကာ တစ်ငုံသောက်ပြီး ကောချင်ရှုကို ဦးညွှတ်၍ပြောလိုက်၏။

 "ကောသခင်မလေးက အရမ်းတော်တာပဲ" 

စင်စစ်အားဖြင့် ရှဲ့ရွှင်းကငယ်စဉ်ကတည်းက တော်ဝင်စာမေးပွဲအတွက် လေ့လာခဲ့သူဖြစ်သည်။ကောချင်ရှုက ယခုအချိန်အထိ ဆက်ရှိနေနိုင်သည်။ တကယ်ကို တော်ခြင်းဖြစ်၏။

ကောချင်ရှုက အေးစက်စွာ ပြန်ဦးညွှတ်ပြီး "အဓိပ္ပါယ်မဲ့တဲ့ ချီးကျူးမှုပါ" ဟု တိုးတိုးလေးပြောသည်။

ပွဲကောင်းတစ်ပွဲကို စောင့်မျှော်နေကြသည့် သခင်မလေးများ  ရင်ခုန်လာကြ၏။

မထင်မှတ်ပဲ ကျန်းရှုယောင်က စကားအများကြီး မပြောခဲ့ပါချေ သူမက ကောချင်ရှုကိုသာ ပြုံးပြ လိုက်ပြီး ကောချင်ရှုက သူမကို ခေါင်းညိတ်ပြလိုက်သည်။

ဇာတ်ခုံမစင်ရသေးခင်မှာ ပြဇာတ်က ပြီးသွား၏။

ဤဂိမ်းနောက်ဆုံးတွင် ပြီးမြောက်သွားပြီးနောက် မင်းသမီးချန်းလဲ့က ထိုငယ်ရွယ်သော ပါရမီရှင်များကို ခေါ်သွားရန် သူမ၏မောင်ငယ်ကို အမြန်စေလွှတ်ခဲ့သည်။ ထို့နောက်သူမက အိုးပစ်တမ်းကစားရန် သခင်မလေးများကို ခေါ်သွားခဲ့သည်။

[ET/N- အိုးပစ်ခြင်းဆိုသည်မှာ ရှေးခေတ်ကအထက်တန်းလွှာများအတွက်  ရေပန်းစားခဲ့သော ဂိမ်းတစ်ခုဖြစ်ပြီး  မြှားခေါင်းမပါဘဲမြှားရိုးကို အထူးအိုးထဲသို့ ပစ်ချသည့်ဂိမ်းဖြစ်သည်။ အိုးကိုပစ်ခြင်းသည် အမှန်ပင် "အိုးထဲသို့ မြှားပစ်ခြင်း" ၏ အတိုကောက်တစ်ခုဖြစ်သည်ကို တွေ့မြင်နိုင်သည်။]

ကျန်းရှုယောင်မှာ စာပေ အရည်အချင်း မရှိသလိူ အိုးပစ်တမ်းလည်း မကစားနိုင်သည့်အတွက် ပြတ်ပြတ်သားသား ငြင်းဆိုခဲ့၏။

မင်းသမီးချန်းလဲ့ အံ့သြသွားသည်။ 

"အရင်က အိုးကိုပစ်တာကြိုက်တယ်မဟုတ်ဘူးလား"

ကျန်းရှုယောင်  လိမ်ညာခဲ့၏။

 "နေလို့မကောင်းဘူးရယ်... ဒီမှာထိုင်လိုက်မယ်... ရှုခင်းက လှတယ်"

မင်းသမီးချန်းလဲ့က ဤပွဲကြီးတွင် စိတ်လှုပ်ရှားနေသည်။ သူမ၏ "ညီမငယ်"  စိတ်ဝိညာဉ် ပြောင်းလဲသွာသည်ကိုပင် သတိမထားမိလေရာ ကျန်းရှုယောင် ဤအသေးအမွှားကိစ္စနှင့် ပတ်သက်၍ လိမ်ညာထားသည်ကို သူမ ရှာဖွေတွေ့ရှိရန်က ဝေးရော့ပင်။

သူမက လူအများအပြားကို ခေါ်ဆောင်သွားခဲ့ပြီး  အိုးပစ်ခြင်းကို မကြိုက်သော ကျန်သခင်မလေး အချို့နှင့် ကျန်းရှုယောင်က ဤနေရာတွင် နေရစ်ခဲ့သည်။

သူတို့က စကားပြောရန် အုပ်စုလိုက်စုကြပြီး ကျန်းရှုယောင်ကို အကြည့်တစ်ချက်မှမပေးကြပေ။ ထို့ကြောင့် သူမသည် ထောင့်တစ်နေရာတွင် တစ်ယောက်တည်းထိုင်ပြီး ဝိုင်သောက်ရုံသာတတ်နိုင်ခဲ့သည်။

မင်းသမီးအိမ်တော်ရှိ သစ်သီးဝိုင်က အလွန်အရသာရှိသည်။

ဝိုင်က ခရမ်းရောင်အဆင်းရှိပြီး အချိုဓာတ်ကြွယ်ဝသောကြောင့် စပျစ်ရည်၏ အဖန်သတ္တိကို လျှော့ချပေးသည်။ ၎င်းတွင် လန်းဆန်းသော အချဉ်ဓာတ်ရှိပြီး ကြာရှည်စွဲကျန်သော အရသာရှိသည်။

မက်မွန်ဝိုင်အကြောင်း ပြောကြရမည်ဆိုပါက တစ်ကျိုက်တည်းမှာ အကုန်သောက်လိုက်လျှင် ခံတွင်းထဲမှာ ကြည်လင်လတ်ဆတ်သည့် မက်မွန်သီး အရသာ ရှိလိမ့်မည်ဖြစ်၏။ နူးညံ့သော မက်မွန်သီးရနံ့ဖြင့် အနည်းငယ်ချဉ်၊ ချိုပြီး အရသာစစ်မှန်သည်။

ပျားလိမ္မော်ဝိုင်လည်းရှိ၏၊ မျက်နှာပြင်က သန့်ရှင်းကြည်လင်သော်လည်း အောက်ခြေရှိ အသီးအနှံများကို အရသာခံနိုင်သည်။ သစ်သီးရနံ့က သန့်စင် ပြေပြစ်ပြီး ချိုမြိန်သည်။ အနံ့သည် ဝိုင်နှင့် သိပ်မတူသော်လည်း လတ်ဆတ်သော လိမ္မော်သီးဖျော်ရည်ကဲ့သို့ အနည်းငယ် ချိုမြိန်သော အရသာနှင့် လတ်ဆတ်သော အနံ့ရှိသည်။

ကျန်းရှုယောင်   ပွဲကအစားအသောက်ကို မကြိုက်ပေ။ အလွန်အကျွံသောက်မိပြီး ဗိုက်မအီမသာဖြစ်သွား၏။ သူမ ဝတ်ရုံလက်အတွင်းကို ထိလိုက်ရာ ဆီစက္ကူအိတ်ကို တွေ့လိုက်ရသည်။

မနေ့က ရှဲ့ရွှင်းက ဤလုပ်ငန်း အဆိုပြုချက်အကြောင်း သူမကို ပြောပြခဲ့ပြီး သူမ တစ်ညလုံး အိပ်မပျော်နိုင်လောက်အောင် စိတ်လှုပ်ရှားနေခဲ့၏။ သူမ သယ်ရလွယ်ကူပြီး မီးဖိုချောင်မှာ အချိန်အကြာကြီးကုန်ရသည့်ဟင်းလျာကို ချက်ချင်ခဲ့သည်။

တည်ထောင်သူဧကရာဇ်မင်းမြတ်၏ လမ်းဖောက်လုပ်မှုကြောင့် ကုန်သည်များ ယခင်ကထက် များစွာလွယ်ကူသောခရီးကို လျှောက်လှမ်းခဲ့ကြရသော်လည်း မကြာခဏဆိုသလို လမ်းခရီးတွင် အချိန်အတော်ကြာတတ်သည်။ လမ်းပေါ်မှာ လက်ဖက်ရည်ဆိုင်မရှိလျှင် ရေနွေးပူပူကို ကိုယ်တိုင်ချက်ပြုတ်ရပေလိမ့်မည်။ထို့ကြောင့် ဤအချိန်မှာ လူတွေက အစာခြောက်ကို ကြိုပြီးယူသွားကာ လမ်းမှာရေနွေးနှင့် ပြုတ်ပြီး  မြိန်ကြရ၏။ မစားနိုင်လောက်အောင်ပါပင်။

လူတွေက အသားပေါင်မုန့် သို့မဟုတ် ဖက်ထုပ်တွေကို မဝယ်ရသည့် အကြောင်းရင်းမှာ အေးသည့်အချိန်မှာ အရသာမရှိ၍ဖြစ်၏။ အစားအစာ၏ ပြုပြင်မွမ်းမံမှုနည်းပညာ မလုံလောက်ခြင်းကြောင့် အပေါ်ခွံက အရသာမရှိသလို အေးစက်သောအသားကလည်း အညှီနံ့ထွက်မည်ဖြစ်သည်။

၎င်းကိုစဉ်းစားရင်း ကျန်းရှုယောင်  အစားအသောက်ကို ဘယ်လိုတိုးတက်အောင်လုပ်ရမလဲဆိုသည်ကို တွေးပြီး နောက်ဆုံးမှာ ဟမ်ဘာဂါကို တွေးမိခဲ့၏။

ဘာဂါက ပူတုန်းမှာ အရသာအကောင်းဆုံးဖြစ်ပေမဲ့ အေးသွားသည့်အခါမှာ သိပ်အရသာပြောင်းမှာ မဟုတ်ပါချေ။ထို့အပြင်၊ အတွင်းပိုင်းအသားများကို အထူးနည်းလမ်းဖြင့် ကိုင်တွယ်ထားသောကြောင့် အေးသောအခါတွင် အညှီနံ့နံခြင်းကို ရှောင်ရှားနိုင်သည်။

၎င်းကိုစဉ်းစားပြီး ကျန်းရှုယောင်  မနေ့ညက ဟမ်ဘာဂါနှစ်ခုကို ပြုလုပ်ခဲ့ပြီး အရသာရှိမရှိ အဆင်မပြေဖြစ်မဖြစ်ကြည့်ရန် ယနေ့ ဤနေရာသို့ ယူလာခဲ့၏။

လက်ရှိအချိန်မှာ ရာသီဥတုက အတော်ပူနေသဖြင့် သူမဝတ်ရုံလက်ထဲမှာ ထည့်ထားသည့် ဟမ်ဘာဂါက အေးစက်မနေပေ။ဤသည်က အခန်းအပူချိန်ဖြစ်ပြီး ပူသည်ဟု ယူဆ၍မရပါချေ။

ဆီစိမ်စက္ကူအိတ်ကိုဖွင့်ပြီး ကိုက်လိုက်သည်။

မုန့်က ပွရွသည်၊ မွှေးပြီး နူးညံ့နေဆဲဖြစ်၏။ ဖုတ်ထားသည်က အနေတော်ဖြစ်ပြီး မုန့်သားသည် မွှေးရနံ့နှင့် ၎င်း၏ကိုယ်ပိုင် ချိုမြိန်မှုတို့အပြည့်ရှိသည်။

သူမ မနေ့ညက ဘာဂါလုပ်သောအခါတွင် လူကြိုက်အများဆုံး ဘာဂါနှစ်ခုကို မသိစိတ်က ရွေးချယ်ခဲ့သည်။ တစ်ခုမှာ Orleans Roasted Chicken ဖြစ်ပြီး နောက်တစ်ခုကတော့ Spicy Fried Chickenဖြစ်ကာ ဆလတ်နှင့် အသုပ် နှစ်မျိုးလုံးပါဝင်၏။ အရသာက သိပ်မဆိုးလောက်ပါချေ။

[ET/N- နှစ်ခုလုံးသည် တရုတ် KFC ရှိ ကြက်သားဘာဂါ များဖြစ်သည်။]

ချက်ပြုတ်ပြီးသည့်အခါမှ ကြက်သားစရိတ်က ဝက်သားပေါက်ဈေးထက် ပိုများသည်ကို သိလိုက်ရ၏။ သူမ ဝက်သားကို ဦးစွာစမ်းသပ်သင့်သည်၊ ဥပမာ- ငရုတ်ကောင်းနက်ဝက်သားဘာဂါ၊ *teriyaki ဝက်သားဘာဂါစသည်ဖြင့်။

(T/N–ဂျပန်အစားအစားများတွင်အသုံးပြုသည့်ချက်ပြုတ်နည်းတစ်မျိူး)

ဆီစိမ်စက္ကူထုပ်ကို ညှစ်ပြီး ပေါင်မှုန့်အကြေများဖြင့် ပတ်ထားသော ကြက်သားအစပ်ကြော်ကို တစ်ကိုက်ကိုက်လိုက်ရာ အပေါ်ယံက ကြွပ်ရွနေ သည်။

မွှေးကြိုင်သောအသားရနံ့က အပြင်ဘက်အကာက အဓိကထွက်နေခြင်းဖြစ်သော်လည်း အတွင်းပိုင်းက အလွန်လတ်ဆတ်ပြီး အလွန်အမင်း စပ်သောအရသာရှိသည်။ ကြက်သား၏ အညှီအနံ့ကို ဖယ်ရှားရန် လုံလောက်လေသည်။ ကိုက်ပြီးနောက် နူးညံ့ပြီး အရည်ရွှမ်းကာ ပေါင်မုန့်နှင့် ကြွပ်ဆတ်သော ဆလတ်အရသာကို ဖြတ်၍ ပါးစပ်ထဲရှိ ကြက်ကြော်အရသာကို မြည်းစမ်းနိုင်သည်။

အသုပ်ဆော့စ်က ကြက်ဥအနှစ်နှင့် ဆီဖြင့်ပြုလုပ်ထားသော ချိုချဉ်ချဉ်အရသာဖြစ်သည်။ ၎င်းတွင် ကြက်ဥအနှစ် ထူးခြားသည့် ယစ်မူးဖွယ် အရသာရှိ၍ စားရသည်မှာမြိန်၏။

ကြော်ထားသော အစားအစာ၏ ဆီမွှေးရနံ့နှင့် ကြက်သား၏ နူးညံ့မှုကို ကောင်းစွာ ပေါင်းစပ်ထားသည်။ သပ်ရပ်စွာ ဖုတ်ထားသော ပေါင်မုန့်၊ လတ်ဆတ်သော ဆလတ်ရွက်နှင့် ဆားငန်သော အသုပ်များနှင့်အတူ ပထမအကိုက်ပြီးနောက် ဒုတိယအကိုက်ကိုက်ရရန် သူမ မထိန်းနိုင်တော့ပေ။

သူမ ပျော်ရွှင်စွာ စားသောက်နေချိန်တွင် မျက်လုံးထောင့်ကနေ တံလျှပ်သဏ္ဍာန်တချို့ပန်းထိုးထားသည့်  လရောင် ၀တ်ရုံတစ်ခုသူမရှေ့မှာပေါ်လာသည်ကို ရုတ်တရက် မြင်လိုက်ရ၏။

ကျန်းရှုယောင်  ၀တ်ရုံကနေ မော့ကြည့်လိုက်ရာ ဖုန်မှုန့်တစ်ခါမှမထိဖူးသကဲ့သို့သော ကောချင်ရှု၏ မျက်နှာကို တွေ့လိုက်ရသည်။

"ဒါကဘာလဲ" 

သူမ၏ အမူအရာမှာ အေးစက်နေဆဲဖြစ် သော်လည်း သူမ၏ လေသံမှာ အလွန်ပေါ့ပါးပြီး ဆန့်ကျင်ဘက်ဖြစ်နေသည်။

ကျန်းရှုယောင်  အံ့သြသွားသည်။ ဟမ်ဘာဂါအကြီးကြီးက ပါးစပ်ထဲတွင် ရှိနေသဖြင့် ခဏကြာသည့်တိုင် ပြန်မဖြေနိုင်ပေ။

ကောချင်ရှုက သူမရှေ့တွင် ဂုဏ်သိက္ခာရှိစွာ ဝင်ထိုင်လိုက်သည်။ ကျန်းရှုယောင်၏ ကျင့်ဝတ်က လုံးဝကို မကောင်းပေမဲ့ သူမ၏ လေသံက နူးညံ့သိမ်မွေ့နေ၏။

"မင်းဒီမှာ တစ်ယောက်တည်း ထိုင်နေတာတွေ့လို့ တို့လာခဲ့တာ... မင်းစားနေတာကို နှောင့်ယှက်ဖို့ မရည်ရွယ်ပါဘူး တောင်းပန်ပါတယ်"

ထို့နောက် ဖုန်မှုန့်အစွန်းအထင်းမရှိသော နတ်သမီးက အနည်းငယ် ပြုံးပြသည်။ အပြုံးကသူမ၏ ကိုးယိုးကားယားဖြစ်မှုကြောင့် အတော်လေး တောင့်တင်းနေသော်လည်း  သူမ၏ အေးစက်သော မျက်နှာကို အနည်းငယ် လန်းဆန်းစေဆဲဖြစ်သည်။

သူမက ဟမ်ဘာဂါကို စိုက်ကြည့်ရင်း ကျန်းရှုယောင်ကိုဆို၏။ 

"ဒါက အရမ်းအရသာရှိမဲ့ပုံပဲနော်"

ကျန်းရှုယောင် နှင့် ကောချင်ရှု တို့သည် တစ်ယောက်ကို တစ်ယောက် ကြည့်နေကြသည်။ ကောသခင်မလေး၏မျက်နှာပေါ်ရှိ အပြုံးက တောင့်တင်းလွန်းနေ၍ ထိုထက်ပိုတောင့်တင်းရန်မဖြစ်နိုင်တော့သည် မြင်ရသည်မှာ ကျန်းရှုယောင်ကို ဟမ်ဘာဂါကြောင့် နင်လုနီးပါးဖြစ်သွားစေသည်။

သူမ ပါးစပ်ကို အုပ်ပြီး အစာကို ခက်ခက်ခဲခဲ မျိုချလိုက်သည်။

၎င်းကိုမြင်သောအခါ ကောချင်ရှု မနေနိုင်ဘဲပြုံးမိလိုက်သော်လည်း သူမမျက်နှာက အေးစက်ပြီး ထိတွေ့၍မရနိုင်သည့် အသွင်အပြင်ကို အမြန်ပြောင်းသွား၏။ သူမက ဝိုင်ဖန်ခွက်ကို ကျန်းရှုယောင်ထံ ပေးခဲ့သော်လည်း သူမ၏ဝတ်ရုံလက်များကို မြှောက်ကာ လက်ကောက်ဝတ်များကို လှုပ်ရှားလိုက်ပုံက ဝိုင်ကို ကျောက်စိမ်းနှင်းရည်တစ်ခွက်သဖွယ် ဖြစ်စေသည်။

ကျန်းရှုယောင် သည် တစ်ငုံတိတိသောက်လိုက်ပြီး နောက်ဆုံးတွင် သက်တောင့်သက်သာ ခံစားလိုက်ရသည်။ သူမက ကောချင်ရှုကို "ကျေးဇူးတင်ပါတယ်" ဟုပြောလိုက်သည်။

"မလိုပါဘူး"

ကျန်းရှုယောင်က သူမကို ပြုံးပြပြီး ဆက်စားရန် လက်ကို မြှောက်လိုက်သည်။ သို့သော်လည်း ကောချင်ရှု၏ မျက်လုံးများက သူမ၏ လှုပ်ရှားမှုများနောက်လိုက်နေသည် တွေ့လိုက်ရပြီး အကြည့်များက ဟမ်ဘာဂါဆီက ဘယ်တော့မှ မခွဲခွာခဲ့ပေ။

'အိုး...ဘာလို့ အဲဒီလို ခေါင်းမာတဲ့ပုံစံနဲ့ ဟမ်ဘာဂါကို စိုက်ကြည့်နေတာလဲ"

သူမ၏အကြည့်အောက်တွင် ကျန်းရှုယောင် စိတ်မသက်မသာဖြစ်ပြီး ဟမ်ဘာဂါကို ပါးစပ်ထဲသို့ထည့်ကာ ကိုက်ပြီးလိုက်နောက် အတွင်းဘက်ရှိ အစိမ်းရောင်ဟင်းသီးဟင်းရွက်များနှင့် ကြက်သားများသည် "ဂျွတ်" ခနဲအသံထွက်လာသည်။

ထို့နောက် ကောချင်ရှု၏ တည်ငြိမ်ပြီး မယိမ်းယိုင်သော မျက်လုံးများ လင်းလက်လာသည်ကို သူမတွေ့လိုက်ရသည်။

သူမသာ ကြောင်အမနေလွန်းဘူးဆိုပါက ကျန်းရှုယောင်၏ နဖူးမှာ အေးစက်နေသည့် ချွေးတစ်ပေါက်ရှိနေမှာ ကျိန်းသေပါပင်။

ဤမြင်ကွင်းနှင့် ဤထူးဆန်းသော ရင်းနှီးကျွမ်းဝင်မှုနှင့်အတူ သူမ စမ်းမေးကြည့်လိုက်၏။

 "ကောင်းပြီ... စားကြည့်ချင်လား"

သူမမေးခွန်းမပြီးခင်မှာ အေးစက်သည့်အသံက အဖြေပေးရန် မစောင့်နိုင်တော့ပေ။

 "အင်း"

ရှဲ့ရွှင်း၏ အသွင်ပြောင်းခြင်းကို သူမမြင်ဖူးထားသောကြောင့် ကျန်းရှုယောင်  နတ်သမီးအသွင်ဆောင်သော ကောသခင်မလေး၏ သေမျိုးကမ္ဘာသို့ ကြွေကျသွားခြင်းကို အတော်လေး ကောင်းကောင်းလက်ခံနိုင်ခဲ့သည်။

ဆီစိမ်စက္ကူကိုအသုံးပြု၍ ဟမ်ဘာဂါ၏ထောင့်ကို ဆုတ်ဖြဲကာ ကောချင်ရှုအတွက် သေးငယ်သောအပိုင်းကို မျှဝေခဲ့သည်။

ကောချင်ရှုက ၎င်းကိုယူကာ ကျက်သရေရှိစွာ... သူမ၏ပါးစပ်ထဲသို့ ထိုးထည့်လိုက်သည်။

သူမက ဝါးပြီး မျိုချပြီးသည်နှင့် ခဏလောက် ပါးစပ်ကို အုပ်ထားပြီးမှ ပြောလေ၏။

"တောင်းပန်ပါတယ် ...တို့ပွဲမှာ သိပ်မစားခဲ့လို့ မထိန်းနိုင်ခဲ့ဘူး... ခုနက ရိုင်းပြမိသွားပါတယ်...ရယ်စရာမြင်လိုက်ရစေမိပါပြီ"

"မဟုတ်ပါဘူးနော်"

ဤပါရမီရှင်သခင်မလေးက သွေးကြီးပြီး ပါးစပ်ဟခဲသည်ဟု မင်းသမီးပြောသည်ကို ကျန်းရှုယောင်ကြားဖူးသည်။  ကောင်းပြီ၊ ကောလဟာလတွေက ယုံကြည်၍ မရပေ။

"ဒီအစားအစာရဲ့နာမည်ကဘာလဲ"  

ကောချင်ရှုက ကဗျာအကြောင်းမေးနေသကဲ့သို့ လေးနက်သော လေသံဖြင့် မေးသည်။

"ဟမျဘာဂါ" 

ကျန်းရှုယောင်ကဆိုလိုက်၏။

 "ဒါကို ကျွန်မကိုယ်တိုင်လုပ်ခဲ့တာ"

"အိုး..." 

ကောချင်ရှု ၏ မျက်လုံးများ ပြန်လည်တောက်ပလာပြီး သူမ၏ အရည်လဲ့နေသော မျက်လုံးများက တောက်ပပြီး ဝင်းလက်လာသည်။ သူမက ကျန်းရှုယောင် ဘက်သို့ ပြောင်းထိုင်ခဲ့သည်။

 "ဘယ်လိုမုန့်အကာမျိုးနဲ့ လုပ်ထားတာလဲ... အရသာက ဘာလို့ဒီလောက်နူးညံ့တာလဲ... အရသာရှိပြီး နို့လိုမျိုးအရသာလေးစွဲကျန်နေတာ...ပြီးတော့ အတွင်းထဲက အသားက ဘာလဲ၊ အပြင်အရေပြားက ကြွပ်ကြွပ်လေးနဲ့ မွှေးကြိုင်နေတာပဲ...ဒါပေမဲ့ အတွင်းပိုင်းကကျ နူးညံ့ချောမွတ်နေပြီး ကိုက်လိုက်တဲ့အခါ အရည်တွေပြည့်နေတယ်"

သူမ၏ လျင်မြန်သော အပြောအဆိုနှုန်းသည် ကျန်းရှုယောင်ကို မူးမေ့လဲလုမတတ် ဖြစ်သွားစေ သည်။ သူမ ကောချင်ရှုကို မယုံကြည်နိုင်စွာ ကြည့်နေမိသည်။

 'မျက်နှာပေါ်က အမူအရာက မပြောင်းလဲဘဲ ဒီလို ပြင်းပြတဲ့ စကားမျိုးကို ဘယ်သူက ဘယ်လို ပြောနိုင်မှာလဲ'

သူမအပြုံးကိုဖိနှိပ်ကာ သူမကိုရှင်းပြလိုက်၏။ "အပြင်ဘက်အပိုင်းကတော့ ပေါင်မုန့်ပဲ...ဂျုံမှုန့်၊ ကြက်ဥ၊ ဆီနဲ့ တခြားအဓိက ပါဝင်ပစ္စည်းတွေနဲ့ ပြုလုပ်ထားပါတယ်... အတွင်းပိုင်းမှာတော့ ကြက်ရင်ပုံသားကို အရသာနှပ်ပြီး ပေါင်မုန့်အကြေတွေကပ်ကြော်လိုက်တယ်...ပြီးရင်း စားပွဲတင်ဆော့စ်နဲ့ ဆလတ်ရွက်ကို ပေါ်မှာ သုတ်ထားပါတယ်"

အစားအသောက်နှင့် ပတ်သက်လျှင် သူမကရပ်၍မရပေ။

 "ဒါပေမဲ့ ဒါက အလွယ်ဆုံးနည်းလမ်းလေ... ဖြစ်နိုင်ရင် ကြက်သားနှစ်ပြားကို ကိုယ်တိုင်ထည့်၊ချိစ်ပြား၊ ကြက်သားကြော်လတ်လတ်ဆတ်ဆတ်ကိုထည့်ပြီး ပေါင်မုန့်ကိုအပူပေးဦးမှာ...ချိစ်တွေ ပူလာတဲ့အခါ ဆီလိုမျိုးဖြည်းဖြည်းချင်း လျှောကျလာလိမ့်မယ်...တစ်ကိုက်စားလိုက်တဲ့အခါ ချိစ်ကဆိမ့်ပြီးငန်တဲ့အရသာရှိလိမ့်မယ်"

သူမက ပြောရင်းနှင့်တံတွေးမျိုချလိုက်၏။

"အသားပြားကသိပ်မပါးသင့်ဘူး ...မီးအေးအေးနဲ့ ကင်ပြီးရင် အဆီအနှစ်ကို တင်းတင်းကျပ်ကျပ် ပိတ်လှောင်ထားလိမ့်မယ်... နှမ်းစေ့တွေ ဖြူးထားတဲ့ ပေါင်မုန့်ထဲမှာ ညှပ်ထားလိုက်မယ်... ဆလတ်ရွက်က အရသာရှိပြီး အရည်ရွှမ်းတယ်...မရောနိစ်နဲ့ အရည်ပျော်နေတဲ့ ချိစ်နဲ့ဆို ပိုအရသာရှိမှာ”

ကောချင်ရှု  ကောင်းစွာနားမလည်သော်လည်း သူမ၏ဖော်ပြချက်ကို နားထောင်ခြင်းဖြင့် ဗိုက်ထဲတဂျုတ်ဂျုတ် ခံစားရဆဲဖြစ်သည်။ သူမက ခေါင်းညိတ်ပြီးပြောလိုက်၏။ 

"ဒါဆို ဒီလိုပေါ့...ဒါကို တို့မသိခဲ့ဘူး... ရှိသေးလားဟင်"

ကျန်းရှုယောင်  ခဏလောက် စဉ်းစားပြီး နဖူးကို ရိုက်ကာ Orleans Roasted Chickenဘာဂါကို အခြားဝတ်ရုံလက်မှ ထုတ်ယူလိုက်သည်။ ဆီစိမ်စက္ကူကို ပိုင်းဖြတ်ပြီး တစ်ဝက်ကို ကောချင်ရှုကို ပေးလိုက်၏။

"ရှင် ဒီအရသာကို စမ်းကြည့်ပါလား"

ကောချင်ရှုက မငြင်းဆန်ခဲ့ပါချေ။ သူမကို ကျေးဇူးတင်ပြီးနောက် အထုပ်ကိုဖွင့်ရန် သူမ မစောင့်နိုင်တော့ပေ။ ဟမ်ဘာဂါက ဖိညစ်ထားပြီးသားဖြစ်နေပြီး ပုံသဏ္ဍာန်က လုံးဝန်းပြီး ပွရွခြင်းမရှိတော့သော်လည်း ဆွဲဆောင်မှုရှိနေဆဲဖြစ်သည်။

ကောချင်ရှုက သူမ၏လက်ကို မြှောက်လိုက်ပြီး မျက်နှာကို ဝတ်ရုံလက်ဖြင့် အုပ်ကာ အင်္ကျီနောက်ကနေ ပါးစပ်ကို ကျယ်ကျယ်ဖွင့်၍ ဘာဂါ၏ သုံးပုံတစ်ပုံကို ကိုက်လိုက်သည်။

ဤအရသာက ခုနအရသာထက်ပင် ပိုအရသာရှိ၏။ အထဲရှိ ကြက်သားက လတ်ဆတ်ပြီး ချိုပေမဲ့ ဆီမများပါချေ။ အရသာက နူးညံ့သော်လည်း အနည်းငယ်စပ်သည်။ ကင်ပြီးနောက် အသားက မာနေပေမဲ့ အရသာက အပြည့်ရှိ၏။

သူမ ပေါင်မုန့်ကို ခွဲလိုက်ပြီး အတွင်းထဲမှာ ကြက်ရင်ပုံသားကင်ကို တွေ့လိုက်ရသည်။ အရောင်မှာ နီညိုရောင်ရှိပြီး အဆီပြန်နေသော ပျားရည်ဆော့စ်အလွှာဖြင့်လွှမ်းခြုံထားသည်။ အရသာနည်းနည်း ချိုနေသည်မှာ မဆန်းပါချေ။

Xx