MM Story Teller

အပိုင်း ၇၄

Viewers 11k

Chapter 74
သဝန်တိုခြင်း

ယနေ့တွင် သူတစ်ယောက်ယောက်ကို ကြိုက်နေသည့်အကြောင်းအား ပြောပြခဲ့ပြီး မီဒီယာများလည်း ရုတ်ရုတ်သဲသဲ တုံ့ပြန်ခဲ့ကြသည်။ သူတို့သာ အတူတူ ရှိလာခဲ့ပါက သူတို့၏ ဆက်ဆံရေးကို လူသိရှင်ကြား မလုပ်ရင်တောင် သူမအပေါ်တွင် ဖိအားများတိုးလာရုံသာရှိသည်။

သူမ လက်ခံနိုင်ပါ့မလား...

သူက လီယန်ကို သူ့လိုလူမျိုးနှင့် အတူတူရှိချင်ပါ့မလား ဟူသည်အား ရှင်းရှင်းလင်းလင်းစဥ်းစားစေချင်သည်။ သေချာပေါက် ၎င်းမတိုင်မီ သူမ စဥ်းစားရမည့် ပထမဆုံး အရာသည် သူမ သူ့ကို ဖန်တစ်ယောက်အနေဖြင့် သဘောကျသည်လား သို့မဟုတ် အမှန်တကယ် သဘောကျနေသည့် တစ်စုံတစ်ယောက်အဖြစ်လားဟူသည်ပင်။

လီယန်ကို ထိုအကြောင်း သေသေချာချာမစဥ်းစားရသေးဘဲ အဆင့်ကျော်မသွားစေချင်ပေ။

ထန်ချန်း၏ အတွေးလမ်းကြောင်းက မော့ကျန်းနှင့် လုံးဝ တူညီနေပုံမပေါ်ပေ။ သူက မော့ကျန်း၏ ပုံရိပ်ကို ပိုစဥ်းစားပေးနေသည်။ ထို့ကြောင့် သူ ထိုကဲ့သို့ ပြောလိုက်သည်ကို ကြားလိုက်ရပြီးနောက် သူတွေးနေသည့် တစ်ခုတည်းသောအရာမှာ ၎င်းက အချစ်စစ်၏ စစ်ဆေးမှုတစ်ခု ဖြစ်နေသည်ကိုသာပင်။

တစ်ယောက်နဲ့ တစ်ယောက် စစ်ဆေးကြဖို့ ပိုပြီး သိုသိပ်တဲ့ နည်းလမ်းကို ရှာလို့ မရဘူးလား... သူတို့ မပျော်ရခင် ကမ္ဘာပေါ်က လူတိုင်း သိအောင် လုပ်ဖို့ လိုလို့လား... ဒီလို စွဲလမ်းမှုမျိုးကို ပြစရာ လိုမနေဘူးလို့...

မော့ကျန်း တံခါးကို ခြေချမိသောအခါ ထန်ချန်းက အချိန်ဆွဲမနေတော့ဘဲ မောင်းထွက်သွားသည်။ ထိုအချိန်၌ လီယန်မှာ ပြန်ရောက်နှင့်နေလေပြီ။ သူမက ဧည့်ခန်းထဲက ဆိုဖာပေါ်တွင် ထိုင်ကာ ဝေ့ပေါ် ကြည့်နေသည်။

ဝေ့ပေါ်က အလွန် အသက်ဝင်နေပေသည်။ ဝေ့ပေါ်ပိုစ့် ဆယ်ခု၏ ကိုးခုမှာ မော့ကျန်း၏ ခံစားချက်များ တိုးတက်လာသည့် အကြောင်းပင်။ ဆုပေးပွဲ၏ မြင်ကွင်းလှလှလေးများက ဧကရာဇ်မော့၏ အချစ်ရေးအကြောင်းဖြင့် လုံးဝ ဖုံးအုပ်ခံလိုက်ရလေသည်။

"လီမွန်ပြုတ် V: ဒီအခြေအနေ ရောက်လာမှတော့ ငါဝန်ခံလိုက်ရတော့မှာပေါ့... ဧကရာဇ်မော့ ပြောတဲ့သူက ငါပါ... လူတိုင်း ငါတို့ကို ကောင်းချီးပေးကြဖို့ မျှော်လင့်ပါတယ် :)"

လီယန်: "..."

သူမက ချန်းချင်းယန် ပို့လာသော မက်ဆေချ့်ကို ကြည့်၍ ပြန်ဖြေလိုက်သည်။

"သူတို့ အရှက်ကိုသိတဲ့ အရှက်မရှိတဲ့လူတွေက ရဲစွမ်းသတ္တိ ရှိဖို့ နီးကပ်တယ်... ရှက်ရကောင်းမှန်းတောင် မသိတဲ့လူတွေကတော့ သတ္တိအရှိဆုံးပဲနော်"

ထို့နောက်တွင် သတ္တိရှိသူ တစ်ယောက် ဖြစ်လာသူမှာ ချန်းချင်းယန် တစ်ယောက်သာ မဟုတ်ပါပေ။

တစ်ညတာအတွင်းမှာပင် မရေတွက်နိုင်သော အင်တာနက်ပေါ်က လူများစွာ ခုန်ထွက်လာကြပြီး သူတို့ကိုယ်သူတို့ မော့ကျန်း ပြောခဲ့သူပါဟု ရဲရဲဝင့်ဝင့် ပြောလာကြသည်။ များစွာသော Vအကောင့်များပင် ထိုကစားပွဲ၌ ပါဝင်လာကြလေသည်။ ကျိုးကြောင်းမညီညွတ်ဆုံး အရာမှာ... ကွမ်းရန်လို့ ခေါ်တဲ့ ယောကျ်ားက ယောကျ်ားတစ်ယောက် ဟုတ်ပါတယ်နော်... ဘာလို့ သူရော ပါလာပြီး အပျော်လာရှာရတာလဲလို့...
...

လီယန်က ဆုတောင်းကစားပွဲပြီးနောက် ၎င်းက အင်တာနက် သုံးစွဲသူများအတွက် တစ်ခဏမျှ အကျော်ကြားဆုံး ကစားပွဲအဖြစ် ရှိလာလိမ့်မည်ဟု ကြိုတင်သိမြင်နေခဲ့သည်။ ၎င်းကဲ့သို့သော အခြားအရာတစ်ခု ရှိမနေပါချေ။

တံခါးဖွင့်သံက လီယန်၏ နားထဲသို့ ပဲ့တင်လာခဲ့သည်။ သူမက ခေါင်းလေးလှည့်ကြည့်လိုက်ရာ မော့ကျန်း ဝင်လာသည်ကို တွေ့လိုက်ရလေသည်။

မော့ကျန်းက ဆုပေးပွဲတွင် ဝတ်ခဲ့သည့် ဝတ်စုံကိုပင် ဝတ်ဆင်ထားခဲ့သည်။ ထိုသူ၏ ပင်ပန်းနေသော ပုံစံကလွဲ၍ TVထဲကလူနှင့် တစ်ထပ်တည်း တူနေခဲ့လေသည်။

၎င်းက လီယန်ကို အိမ်မက်မက်နေသည့်အလား ခံစားရစေသည်။　　

သူမက ချန်းချင်းယန် ပြောခဲ့သည်ကို ရုတ်တရက် သတိရမိသွားသည်။

ဧကရာဇ်မော့ ကြိုက်လာအောင် လုပ်နိုင်သည့် မိန်းကလေးမှာ ထူးချွန်ပြောင်မြောက်ရမည်။ သူမ၏ မျက်နှာက လီဝေ့ဝေ့ထက် ပို၍ လှသင့်ပြီး သူမ၏ ခန္ဓါကိုယ်ကလည်း လဲ့ရှီဟာလေထက် ပိုဟော့ရမည်။ သူမက ဥာဏ်ကောင်းပြီး အပြုအမူကောင်း၍ ဟင်းပွဲကောင်းများ ချက်ပြုတ်နိုင်ရပေမည်။

လီယန်၏ မျက်လုံးများ မှုန်မှိုင်းသွားလေသည်။ မော့ကျန်း သဘောကျနေသည့် တစ်ယောက်ယောက်ကို တွေ့ဆုံခဲ့ရပြီဟု ပြောခဲ့စဥ်က သူပြောနေသူမှာ သူမ ဖြစ်ရမည်ဟု တစ်ခဏမျှ အမှန်တကယ် တွေးလိုက်မိသေးသည်။ သို့သော်လည်း သေသေချာချာ စဥ်းစားကြည့်လိုက်သည့်အခါ မော့ကျန်းဘေးတွင် ထူးချွန်လှသော လူပေါင်းများစွာ ဝန်းရံနေသည်ကို နားလည်မိသွားခဲ့သည်။ သူ သူမကို သဘောကျနေသည်ဟု တွေးနေသည်ကပင်... အတော်လေး အရှက်မဲ့လွန်းနေလေပြီ။　　

လီယန်က သူမ၏ မျက်နှာ အမူအယာကို ခပ်မြန်မြန် ထိန်းလိုက်ပြီးနောက် ပြုံးပြကာ ဆိုဖာမှ ထရပ်လိုက်သည်။ "ဟေး... အကောင်းဆုံး သရုပ်ဆောင်ဆုရလို့ ဂုဏ်ပြုပါတယ်နော်" 　　

မော့ကျန်းက တံခါးဝတွင် မလှုပ်မယှက် ရပ်နေခဲ့သည်။ လီယန်၏ စကားများကို ကြားမှသာ အိမ်ထဲသို့ ဝင်လာပြီး ပြန်ဖြေလိုက်လေသည်။ "ကျေးဇူးပဲ"　　

လီယန်က ရယ်မော၍ သူမ၏ ကွန်ပြူတာ အောက်ခြေထက်မှ တရိပ်ရိပ် ပြေးနေသော နံပါတ်များကို ကြည့်လိုက်သည်။ "ဒါပေမယ့် ဘာလို့ စောစော ပြန်လာတာလဲ... ရိုက်ကူးရေးအဖွဲ့နဲ့ ဂုဏ်ပြုပွဲ မလုပ်ဘူးလား" 　　

"နည်းနည်း ပင်ပန်းနေလို့ စောစောပြန်လာခဲ့တာ" မော့ကျန်းက ဝတ်စုံကို ချွတ်လိုက်ပြီး ဆိုဖာပေါ်တွင် ထားလိုက်သည်။ ထို့နောက် လည်ပင်းပေါ်မှ လည်စီးကိုလျှော့၍ ဆိုဖာပေါ်တွင်ထိုင်ချလိုက်လေသည်။

လီယန်က မျက်တောင်ခတ်လိုက်ပြီးနောက် မီးဖိုချောင်ဆီ ပြေးသွားကာ ရှန်ပိန်တစ်ပုလင်း ထုတ်လိုက်သည်။

"အဆင်ပြေပါတယ်... ကျွန်မ ရှန်ပိန် ပြင်ထားသေးတယ်... ဂုဏ်ပြုဖို့ တစ်ခွက်လောက် သောက်ချင်လား"　

မော့ကျန်း၏ အကြည့်များက ရှန်ပိန် ပုလင်းပေါ် ကျသွားလေသည်။ သူမ တကယ်ပင် ရှန်ပိန် တစ်ပုလင်း ပြင်ထားလိမ့်မည်ဟု သူတွေးမထားခဲ့ပေ။

"ဘာပဲဖြစ်ဖြစ် ရတယ်"

လည်စီးက သူ့ကို မသက်မသာ ဖြစ်စေပုံပင်။ သူက လည်ပင်းမှ လည်စည်းကို တိုက်ရိုက် ချွတ်လိုက်ပြီး ရှပ်အင်္ကျီ၏ အပေါ်ဆုံး ကြယ်သီးနှစ်လုံးကို ဖြုတ်လိုက်သည်။　

လီယန်က လက်ထဲမှ ရှန်ပိန် ပုလင်းကို ချလိုက်ပြီး မီးဖိုချောင်ထဲမှ ပန်းကန်အချို့ သယ်လာခဲ့သည်။ ၎င်းတို့ပေါ်၌ သရေစာအချို့ ပါနေလေသည်။

"ရှင် အခု ဗိုက်ဆာနေမှာပေါ့... အားလုံး ကျွန်မအမေကိုယ်တိုင် လုပ်ထားတာ... သေချာပေါက် အရမ်း စားကောင်းတာနော်"　　

ပန်းကန်ပြားပေါ်မှ သရေစာများမှာ အလွန်ကြည့်၍လှသည်။ ၎င်းတို့ကိုသာ အသွင်အပြင်ပေါ် မူတည်၍ ရောင်းချမည်ဆိုပါက ကြယ်ငါးပွင့်ဟိုတယ်များမှ အချိုပွဲများကို သေချာပေါက် ရှုံးနိမ့်မည် မဟုတ်ပေ။ မော့ကျန်း၏ အကြည့်များက ၎င်းတို့အပေါ် တစ်ခဏမျှ ဝဲနေခဲ့သည်။ ထို့နောက် တစ်ခုကို ကောက်ယူ၍ ပါးစပ်ထဲသို့ ထည့်ကာ တစ်ကိုက်ကိုက်လိုက်သည်။ အရသာမှာ အမှန်တကယ်ပင် စားကောင်းလှပေသည်။ ချိုသော်လည်း ဆီမများလှပေ။ ၎င်းတို့က သူ့ပါးစပ်ထဲတွင်ပင် အရည်ပျော်သွားပုံရပြီး ရနံ့ခပ်ဖျော့ဖျော့လေးပါ သယ်ယူလာခဲ့သည်။

လီယန်က ဘန်းဟူသော အသံဖြင့် ရှန်ပိန်ကို ဖွင့်လိုက်သည်။ သူမက ၎င်းကို ဖန်ခွက်နှစ်ခွက်ထဲသို့ အပေါ်စီးမှ လောင်းထည့်လိုက်ပြီး တစ်ခွက်ကို မော့ကျန်းထံ ကမ်းပေးလိုက်သည်။

"ကျန်းကျန်း... ချီးယား"　

မော့ကျန်းက ပါးစပ်ထဲမှ မုန့်သားကို မျိုချကာ လီယန်ကို မော့ကြည့်လိုက်သည်။ သူမက ရှန်ပိန်တစ်ခွက်ကို ကိုင်ထားပြီး သူမ၏ အပြုံးသည်လည်း ပျားရည်ကဲ့သို့ ချိုမြနေလေသည်။

"ကျေးဇူး" မော့ကျန်းက လီယန်၏ လက်ထဲမှ ဖန်ခွက်ကိုယူ၍ ခေါင်းလေးအနည်းငယ်စောင်းကာ ရှန်ပိန်တစ်ခွက်လုံးကို တစ်ကျိုက်တည်း သောက်လိုက်လေသည်။

"ကိုယ် နည်းနည်း ပင်ပန်းနေပြီ... အပေါ်ထပ်သွားပြီး အိပ်တော့မယ်"　

စကားဆုံးသောအခါ ထရပ်ပြီး ဆိုဖာမှ ထွက်လာခဲ့သည်။ လီယန်၏ လက်များက ရှန်ပိန်အနည်းငယ် ကျန်နေသေးသော ခွက်ကို ကိုင်ထားဆဲဖြစ်ပြီး မနီးမဝေးတစ်နေရာတွင် ရပ်ကာ သူ့ကို စိုက်ကြည့်နေခဲ့လေသည်။　　

"ကျန်းကျန်း"

ကြွပ်ဆတ်ဆတ် အသံတစ်ခုက ဧည့်ခန်းထဲတွင် ထွက်ပေါ်လာခဲ့သည်။

မော့ကျန်းက ခြေနှစ်လှမ်း လှမ်းပြီးနောက် ရပ်သွားလေသည်။ "ဘာဖြစ်လို့လဲ"　　

သူခေါင်းကို လှည့်၍ လီယန်အား ကြည့်လိုက်သည်။ သူ့ခေါင်းပေါ်မှ အလင်းရောင်က သူ့မျက်နှာ တစ်ဖက်ပေါ်တွင် ဖြာကျနေသည်။ ရုတ်တရက် ထိုသူက နေမင်းအကြီးအလား မျက်စိကျိန်းဖွယ် တောက်ပနေသည်ဟု ခံစားလိုက်ရသည်။　　

"ရှင်ပြောတဲ့... ရှင် သဘောကျတဲ့ တစ်ယောက်ယောက်ကို တွေ့နေပြီလို့ ပြောခဲ့တာလေ... တကယ်ပဲလား"

လီယန်၏ စကားဆုံးသည်နှင့် ဧည့်ခန်းတစ်ခုလုံး ပြန်လည် တိတ်ဆိတ်သွားခဲ့သည်။ မော့ကျန်းက ယခင်ကအတိုင်းပင် မပြောင်းလဲသော ကိုယ်ဟန်အနေအထား ရှိနေပြီး သူမကို တိတ်တဆိတ်စိုက်ကြည့်လာခဲ့သည်။ 　

သူမ နောက်ဆုံးတော့ မေးလာခဲ့ပြီ...　　

ဧကရာဇ်မော့၏ နှလုံးသားက အဆုံးတွင် စိတ်ကျေနပ်သွားခဲ့လေသည်။ သူမသာ မကြာခင်အချိန်အထိ မေးမလာခဲ့ပါက သူသည်လည်း ထိန်းထားနိုင်မည်မဟုတ်ပေ။　　

မော့ကျန်းက ကိုယ်ကိုလှည့်၍ လီယန်နှင့် မျက်နှာချင်းဆိုင်လိုက်သည်။

"ဟုတ်တယ်"　　

ထိုသူ၏ ဝန်ခံချက်က ပွင့်လင်းလှသဖြင့် လီယန်၏ နှလုံးသားကို ပို၍ပင် မသက်မသာ ဖြစ်သွားစေရသည်။ သူမ၏ နှုတ်ခမ်းများ လှုပ်ရှားသွားပြီး မေးလာခဲ့သည်။

"သူက ဘယ်သူများလဲ"　　

ထိုအချိန်လေးအတွင်း သူမက သူ အိပ်ပျော်နေသည့် အချိန်မှလွဲ၍ မော့ကျန်း၏ ဘေးတွင် တစ်ချိန်လုံးနီးပါး ရှိနေခဲ့သည်။ သူကြိုက်တဲ့သူကို တွေ့ဖို့ ဘယ်နေရာမှာ အခွင့်အရေး ရှိနေလို့လဲ... သူမ အိပ်နေတဲ့ အချိန်မှာများလား...　　

နောက်ဆိုရင် သူမ မော့ကျန်းနဲ့ အိပ်ဖို့ လိုလာပြီလား...　　

အတွေးများက လီယန်၏ စိတ်ထဲတွင် ဝဲပတ်နေပြီး သူမ၏ နားရွက်လေးများမှာ တဖြည်းဖြည်း နီရဲလာခဲ့လေသည်။ လတ်တလော သူမ၏ အတွေးအမြင်များမှာ ပိုပို၍ ညစ်ညမ်းလာသလို ခံစားလိုက်ရသည်။　　

"ဒီညနေမှာတင် ကိုယ့်ကို ဒီမေးခွန်းမေးလာတဲ့သူတွေ ရေတောင်မရေနိုင်တော့ဘူး"

မော့ကျန်း၏ အသံက တီဗီထဲတွင် ပြောနေစဥ်ကနှင့် ထပ်တူကျနေခဲ့သည်။ ၎င်းက ငြင်သာနေသော်လည်း အနည်းငယ် ကင်းကွာနေသည့် ခံစားချက်ဖျော့ဖျော့ကိုလည်း ရနေခဲ့သည်။　　

လီယန် အေးခဲသွားသည်။ မော့ကျန်းရဲ့ အသံက စိတ်မရှည်ဖြစ်မနေပေမယ့် ဘာလို့များ သူမက အဲ့သတင်းထောက်တွေလို တူညီတဲ့ မေးခွန်းမျိုး မေးမိသွားတာလဲ... သူမက မော့ကျန်း၏ လက်ထောက်သာ ဖြစ်ပြီး ထိုကဲ့သို့သော ဖြစ်ရပ်များက သူမနှင့် သက်ဆိုင်မနေပါပေ။　

"ကျွန်မ တောင်းပန်ပါတယ်" လီယန်က ခေါင်းလေးကို ငုံ့ထားပြီး တောင်းပန်စကား တီးတိုး ပြောလိုက်သည်။

မော့ကျန်းက သူမကို တစ်ခဏမျှ ကြည့်လိုက်ပြီး ခပ်ဝါးဝါး ထပ်ပြောလိုက်သည်။ "ဒါပေမယ့် ကိုယ်မင်းကို ပြောပြလို့ ရပါတယ်"　

"အာ" လီယန်က ခေါင်းမော့ကာ မော့ကျန်း ပြောလိုက်သည့်စကားလုံးများကို လုံးဝ အစာကြေသေးပုံ ပေါ်မနေခဲ့သည်။　

မော့ကျန်းက သူ့ကိုယ်သူ သတိပေးနေသည့်အလား ပြောလာသည်။ "သူ့နာမည်က အားယောင်လေ"　　

အားယောင်...

လီယန်က တစ်ဖက်မှလူကို ကြည့်ကာ ခံစားချက်မျိုးစုံတို့က သူမ၏ မျက်နှာပေါ်တွင် ဖြတ်ပြေးသွားခဲ့သည်။ အဆုံးတွင် သူမ၏ မျက်လုံးများက ယခင်က ရှိခဲ့သည့် ကြည်လင်ပြတ်သားမှုများ ပြန်ရောက်လာခဲ့သည်။ မျက်ခုံးများ စုကြုတ်သွားပြီး သူမ၏ အသံထဲတွင် မရှင်းမလင်း အရိပ်အယောင်တို့ဖြင့်မေးလာခဲ့သည်။

"ကျွန်မရဲ့... ကိုယ်ခွဲလား..."　

တစ်ညနေလုံး ပြိုကျလုနီးပါး ဖြစ်နေသည့် မော့ကျန်း၏ မျက်နှာက အချိုးအကွေ့ တစ်ခုသို့ ပြောင်းလဲသွားလေသည်။ သူ မပြုံးမိဘဲ မနေနိုင်တော့ပေ။ "အင်း"　　

လီယန်၏ မျက်ခုံးများ စုကြုတ်နေမှုက ပို၍ တင်းကြပ်သွားပြီး အလွန်သောကရောက်နေဟန် ပေါ်နေသည်။

"ကျွန်မရဲ့ ကိုယ်ခွဲဆီ ဘယ်လို ပြောင်းရမလဲ"　　

မော့ကျန်းက အသံတိုးတိုးဖြင့် ရယ်လိုက်ပြီး သူ့ရှေ့မှလူကို ကြည့်လာခဲ့သည်။ သူ့မျက်လုံးများထဲမှ ခပ်ဝါးဝါးအလင်းရောင်တို့မှာ အပြုံးရိပ်များ စွန်းနေခဲ့သည်။

"အရင်ဆုံး လေထဲ ပျံနိုင်အောင် ကြိုးစားလိုက်ဦး"

လီယန်: “…”

ဧကရာဇ်မော့ရဲ့ အကြိုက်က နည်းနည်းတော့ဆန်းတယ်နော်...　　

"အွန်လိုင်းက သတင်းတွေ မြင်ပြီးပြီလား"

မော့ကျန်းက ရုတ်တရက် စကားလမ်းကြောင်းပြောင်းလိုက်ပြီး ဆိုဖာဆီသို့ သွားလိုက်သည်။ လီယန်က သူ မည်သည်ကို ဦးတည်နေသည်ကို အမှန်တကယ် နားမလည်သော်လည်း ရိုးရိုးသားသား ပြန်ဖြေနေဆဲပါပင်။

"မြင်ပြီးပြီ"

"မနက်ဖြန်ကျရင် သတင်းခေါင်းစီး ဖြစ်လာလောက်တယ်"　　

"ဪ" ဒါဆို သူ ဒီကို ရောက်လာတာ သူလုပ်ခဲ့တဲ့ ကောင်းမှုကို ရည်ရွယ်ချက်ရှိရှိ ဟန်ပြလုပ်ချင်လို့ပေါ့လေ...

"မင်း ဒါကို ဘယ်လို မြင်လဲ"

"တော်တော်လေး စိတ်ဝင်စားစရာ ကောင်းပါတယ်"　

မော့ကျန်းက သူမကို တစ်ခဏမျှ တိတ်တဆိတ် ကြည့်လိုက်ပြီး မေးလာခဲ့သည်။

"မင်းရဲ့ ကိုယ်ရေးကိုယ်တာ ကိစ္စကို အွန်လိုင်းပေါ်မှာ ဆွေးနွေးကြတာ စိတ်ရှုပ်စရာ ကောင်းတယ်လို့ ထင်လား"　　

"ကံကောင်းထောက်မလို့ သူတို့ ဘာတွေ ပြောပြော ကျွန်မရဲ့ နေ့ရက်တွေက ဆက်သွားနေမှာပဲလေ... မပိမရိ ဟန်ဆောင်နေတာကို ကြည့်နေရတာပဲလို့ ဟန်ဆောင်ရုံပဲပေါ့"

မော့ကျန်း: “…”

ဒီလို ရင့်ကျက်ပြီး အမြင်ကျယ်တဲ့ သဘောထားမျိုး ဖျော်ဖြေရေးလောကထဲ မဖွံ့ဖြိုးလာသေးတာ စိတ်မကောင်းစရာပဲ...　　

"ကောင်းတာပေါ့" မော့ကျန်းက ပြောပြီးနောက် နောက်ထပ် စကားမဆိုဘဲ ဒုတိယထပ်သို့ လှည့်သွားသည်။ သူ့ကျောပြင်လေး အိပ်ခန်းထဲသို့ ပျောက်ကွယ်သွားပြီးနောက် လီယန်က ဆိုဖာပေါ်သို့ ထိုင်ရန် ပြန်လှည့်သွားသည်။　　

လီယန်က ကွန်ပြူတာပိတ်၍ တီဗီ ဖွင့်ကာ မျက်နှာပြင်ပေါ်ကို မမှိတ်မသုန် စိုက်ကြည့်နေခဲ့သည်။

"ဒီနွေရာသီမှာ... မင်းရဲ့ အသားအရည်ကို ရေခဲမုန့်အရသာလေး ခံစားစေလိုက်နော်"　

သိမ်မွေ့ပြီး လှပသော အမျိုးသမီးအသံ တစ်သံက လီယန်၏ အတွေးများကို ကမ္ဘာပေါ်သို့ ပြန်ဆွဲခေါ်သွားသည်။ သူမက နှုတ်ခမ်း ဟဟ ဖွင့်ကာ ပြုံးပြနေသော တီဗီ screenပေါ်မှ အမျိုးသမီးကို ကြည့်လိုက်ပြီး နှာမှုတ်လိုက်သည်။

ဒါဆို ဒါက လီဝေ့ဝေ့လား... အရှေ့တိုင်းရဲ့ အလှအပစံချိန်တွေနဲ့ ပြီးပြည့်စုံတယ်လို့ မီဒီယာတွေ ဂုဏ်ပြုကြတဲ့ ရုပ်ရှင်လောကနဲ့ ကြော်ငြာလောကရဲ့ အချစ်လေးပေါ့လေ...　　

ဟမ့်... ဒါက သူရဲ့ မျက်နှာပေါ့လေ...　　

လီယန်က တီဗီ၏ ပါဝါခလုတ်ကို နှိပ်ကာ ဧည့်ခန်းမီးကိုလည်း ချက်ချင်းပိတ်လိုက်ပြီး ဒုတိယထပ်သို့ အိပ်စက်ရန် တွယ်တက်လာတော့သည်။　　

ဒုတိယနေ့တွင် အဓိက သတင်းစာများ၏ သတင်းထူးအစီအစဥ်ကို ဧကရာဇ်မော့ကသာ လုံးလုံးလျားလျား စိုးမိုးထားခဲ့သည်။ ဧကရာဇ် ဂုဏ်ပုဒ်ကို ထပ်မံ အနိုင်ရရှိသည်ဟု ရေးသားထားကြသည့်အပြင် ကောဇောနီထက်တွင် ပြောခဲ့သည့် စကားလုံးများကို အချက်အလက်ကျကျ ခွဲခြမ်းစိတ်ဖြာထားကြသေးသည်။ ထိုသူတို့က ကောလိပ်ဘာသာစကားစာမေးပွဲ၌ အမှတ်မြင့်မြင့် ရခဲ့ကြပုံပင်။ အဆုံး၌ လူတိုင်းက ထိုကဲ့သို့သော တိုတိုတုတ်တုတ် စကားလေးတစ်ခွန်း၌ အဓိပ္ပါယ်မြောက်များစွာကို ရှာမတွေ့နိုင်ကြပေ။

ဝေ့ပေါ်တွင် မော့ကျန်း ဝန်ခံခဲ့သူက ကိုယ့်ကိုယ်ကိုယ်ပါဟု ပြောလာကြသည့် ကစားပွဲမှာလည်း အပြည့်အဝ လှိုက်ခါသွားစေခဲ့သည်။ မပြည့်စုံသေးသော စာရင်းများအရ အင်တာနက်သုံးစွဲသူ ထောင်ပေါင်းများစွာကို ထပ်ပေါင်း၍ ခုန်ထွက်လာပြီး သူတို့၏ ဝန်ခံချက်များကို ပိုစ့်တင်လာကြသည့် လိင်အမျိုးအစား နှစ်ခုလုံး၏ ကြီးမားသော Vအကောင့် ဆယ့်နှစ်ခုပါ ရှိနေသည်။ 　　

Xxxxx

Prev Next