အပိုင်း ၇၆

Chapter 76



"မစ္စတာ​မော့... ခဏ​လောက် ​စောင့်​ပေးပါအုံး​နော်... ဆရာအန်းက ခဏ​နေရင် ​ရောက်လာ​တော့မှာပါ" ​

မော့ကျန်း​ရှေ့မှ ဝန်ထမ်း​လေးက ပြုံးပြကာ သူတို့ကို ဆိုဖာ​ပေါ်တွင် ထိုင်၍ အနားယူရန် လက်ဟန်ပြလိုက်သည်။　　
​
​ဟေး... သူမ​ပြောဖို့ ​မေ့​တော့မလို့... ဒီက ဝန်ထမ်းလှလှ​လေး​တွေ အားလုံးက ဖက်ရှင်မဂ္ဂဇင်းမှာ မျက်နှာဖုံးရှင် လုပ်နိုင်​လောက်တဲ့ ပုံစံမျိုး​တွေပဲဟ...　

​မော့ကျန်းက ​ခေါင်းငြိမ့်လိုက်ပြီး ဆိုဖာဆီသို့ သွားကာ ထိုင်ချလိုက်သည်။ သူက မဂ္ဂဇင်းတစ်ခုကို​ ​ကောက်ကိုင်၍ လှန်​လှောကြည့်လိုက်သည်။ ​လီယန်က သူ့​နောက်ကို လိုက်လာရင်း သတိကြီးကြီး ရှိနေခဲ့သည်။ ထိုကဲ့သို့​​သော အပြင်အဆင်မျိုးတွင် ရှိ​နေရခြင်းက သူမ၏ ပုံစံမှာ ​တောသူမတစ်​ယောက်သဖွယ် ဖြစ်​နေသည်မှာ သိသာ​နေ​ကြောင်း ရုတ်တရက် ခံစားလိုက်ရသည်။

ဧည့်ကြိုလှလှ​လေးက သူတို့အတွက် ​ရေနှစ်ခွက် လာထည့်​​ပေး​လေသည်။ လီယန်က သူမကို ​ကျေးဇူးတင်စကား ​ပြောလိုက်ပြီး ခွက်ကို ​ကောက်ယူကာ တစ်ငုံ​သောက်လိုက်​လေသည်။ အိုး... သံပရာရည်​လေးပါ ထည့်ထားတာပဲ... ​မော့ကျန်းက ထိုင်ကာ မဂ္ဂဇင်း ဖတ်​နေဆဲဖြစ်သည်။ လီယန်မှာ လက်ထဲမှ ​ရေခွက်ကို ​သောက်​နေရင်းဖြင့် သူမ​ဘေးမှ မမလှလှ​လေး အိုင်းရှဲဒိုး အ​ရောင် မည်မျှ​လောက်ထိ သုံးထားသည်ကို အကဲဖြတ်​နေခဲ့သည်။　　

"​စောင့်လိုက်ရလို့ ​တောင်းပန်ပါတယ်... ဒီ​နေ့ ကျွန်​တော် နည်းနည်း အလုပ်ရှုပ်​နေလို့" ​

ယောကျ်ားတစ်​ယောက်က ​လှေကားမှ ဆင်းလာခဲ့ပြီး သူ့အသံက ချိုမြ​နေကာ နိုင်ငံခြား​သားလေသံသဲ့သဲ့ ရ​နေသည်။ လီယန်က ထိုလူရပ်​နေရာသို့ ကြည့်လိုက်သည်။ ထိုသူက ပန်း​ရောင်ရှပ်အင်္ကျီကို ​အ​ပေါ်ထပ်တွင် မီးခိုး​ရောင်ညို့ညို့ ကိုယ်ကျယ်စွပ်ကျယ် ထပ်ဝတ်ထားသည်။ ဗြိတိန်စတိုင် နံပြားဦးထုပ်ကို ထိုသူ၏ ​ရွှေ​ရောင်​ဖျော့​ဖျော့ ဆံပင်များ ​ပေါ်တွင် တင်ထားပြီး ဘယ်ဘက်နားထက်တွင် ​ငွေ​ရောင် နားကွင်း​သေး​သေး​လေးနှစ်ခု ရှိနေသည်။　

​အမျိုးသားများ ပန်း​ရောင်ဝတ်ပါက မိန်းက​လေးဆန်သွားရန် လွယ်ကူ​သော်လည်း သူမ​ရှေ့မှ ​ယောကျ်ားက သန့်စင်ပြီး စတိုင်ကျလှသည်ဟု ခံစားမိရုံသာ။　　

"ဆရာအန်းကို ​စောင့်ခွင့်ရလို့ ဂုဏ်ယူမိပါတယ်"

​မော့ကျန်းက သူ့လက်ထဲမှ မဂ္ဂဇင်းကို ပြန်ချကာ ဆိုဖာမှ ထရပ်လိုက်သည်။ အန်းယိက ပြုံးလိုက်​သော်လည်း သူ့ကို နှုတ်မဆက်ခဲ့​ပေ။ ထ်ုအစား လီယန်ကို သူ့မျက်လုံးများဖြင့် တိုင်းတာ​နေခဲ့သည်။ မူလတွင် လီယန်မှာ ဆိုဖာ​ပေါ်တွင် ထိုင်​နေခဲ့ခြင်း ဖြစ်သည်။ သို့​သော်လည်း ထိုသူ၏ အကြည့်စူးစူးများကို ခံစားမိသွား​သောအခါ ခပ်မြန်မြန် ခုန်ထလာခဲ့သည်။

"ဟယ်... ဟယ်လို"　　

အန်းယိက သူမကို ​ခေါင်းငြိမ့်ပြပြီး ဟယ်လိုလို့​ပြောလိုက်သည်။ ထို့​နောက် ​မော့ကျန်းကို ကြည့်လိုက်​လေသည်။

"အဲဒါသူလား"　　

"အင်း... မင်းကို လွှဲ​ပေးလိုက်ပြီ"　　

လီယန်က သူတို့ကို ရှင်းမပြနိုင်​သော အမူအယာတို့ဖြင့် ကြည့်လိုက်သည်။ ဒီလူနှစ်​ယောက် အချိန်းအချက် လုပ်လိုက်ကြတာလား...

"ကြိုပြီး ချိန်းထားသင့်​ပေမယ့်လည်း ဧကရာဇ်​မော့ကို ​လေးစား​သောအားဖြင့် လက်ခံဖို့ ဆုံးဖြတ်လိုက်တာ​နော်"

အန်းယိက ​ဘောင်းဘီအိတ်ထဲတွင် လက်ထည့်ကာ လီယန်ကို ​ခြေဆုံး​ခေါင်းဆုံးကြည့်လိုက်သည်။ ထို့​နောက် သူ ပြုံးပြလိုက်သည်။

"မစိုးရိမ်ပါနဲ့... မင်းကို အခုချက်ချင်း မင်းသမီး​​​လေး တစ်​ယောက် ဖြစ်​အောင် ​ပြောင်း​ပေးမယ်"　　

လီယန်: “…”

ဒါဆို သူတို့နှစ်​ယောက်ကြားထဲက အချိန်းအချက်က ဘာများလဲလို့...　　

​မော့ကျန်းက ​ခေါင်းငြိမ့်ကာ ဆိုဖာတွင် ပြန်ဖိုင်လိုက်သည်။ အန်းယိက လီယန်ဆီသို့ ​လျှောက်လာကာ သူမကို အ​ပေါ်ထပ်သို့ ဆွဲ​ခေါ်သွားသဖြင့် ​မော့ကျန်းကို အကူအညီ​တောင်းခံလိုသည့်စိတ်​လေးဖြင့် စိုက်ကြသည့်လိုက်သည်။ သို့​​သော်လည်း ​မော့ကျန်းမှာ သူ့​ရှေ့တွင် မည်သည်မျှ ဖြစ်ပျက်​နေခြင်း မရှိကဲ့သို့ ဟန်​ဆောင်​နေဆဲဖြစ်ပြီး သူ့​ခေါင်းကို မဂ္ဂဇင်းထဲတွင် နှစ်ထားခဲ့သည်။ 　　
……

အဲ့မဂ္ဂဇင်းက ဘာ​တွေများ ထူးခြား​နေလို့လဲ...

လီယန်၏ နှလုံးသားမှာ အ​ပေါ်တွင် ကုလားအုတ်နက် ​ထောင်​သောင်းချီ ဖြတ်​ပြေးသွားသလိုပါပင်။ (မြက်ရွှံ့မြင်း)

(TN: မြက်ရွှံ့မြင်း သို့မဟုတ် ​ကောင်းနိမား(草泥马)က တရုတ်မှာ ကျယ်ကျယ်ပြန့်ပြန့် သုံးကြတဲ့ အင်တာနက် memeပါ... ​ကောင်းနိမား(肏你妈)ဆိုတဲ့စကားလုံးကို ဆဲ​​ရေးတဲ့အခါ စကားလှ​​အောင် သုံးတဲ့စကားပါ... . ​ကောင်းနိမား (肏你妈)ဆိုတဲ့ မန်ဒရင်းစကားက “fuck your mother”လို့ အဓိပ္ပါယ် ရပါတယ်)

(TN: လီယန်ရဲ စကားက​တော့ ကုလားအုတ်နက် ​ထောင်​သောင်းချီ ဖြတ်​ပြေးသွားတယ်ဆိုတာ သူမ အရမ်းစိတ်ညစ်ပြီး ​ဒေါသထွက်​နေတယ်လို့ ဆိုလိုတာပါ)

"ခိုက်ဟွမ်းရဲ့ ဧည့်ခံပွဲကို တက်ဖို့လား"　

လီယန်၏ လက်​မောင်းကို ဆွဲ​ခေါ်သွား​သော အန်းယိက ရုတ်တရက် ​ပြောလိုက်သည်။ လီယန် တစ်ခဏမျှ ​အေးခဲသွားပြီး​နောက် ​ခေါင်းငြိမ့်ပြလိုက်သည်။ "ဟုတ်"　　

"အာ" အန်းယိက တစ်ခုခုကို ​တွေး​တော​နေသည့်ပုံပါပင်။ အ​ပေါ်ထပ်ကြမ်းပြင်က ပထမထပ်၏ အဝတ်အစားဆင်ယင်ခန်းထက်ပင် ပိုကျယ်​သေးသည်။ အဝတ်အစားနှင့် ရှူးဖိနပ်များစွာက ​နေရာ၏ တစ်ဝက်နီးပါးကို သိမ်းပိုက်ထားသည်။ 　

"အားတ... အရင်ဆုံး သူ့​ကို ခေါင်းလျှော်​ပေးလိုက်အုံး" အန်းယိက လီယန်ကို ဝန်ထမ်းမ​လေး လက်သို့ လွှဲ​ပေးလိုက်ပြီး အဝတ်အစားတန်းကြီးကို စတင်​ရွေးချယ်​တော့သည်။

လီယန်က အားတ​နောက်မှတဆင့် ​ခေါင်း​လျှော်မည့် အခန်းထဲသို့ န​ဝေတိမ်​တောင်ဖြင့် လိုက်သွားသည်။ သူမ ထွက်လာ​သောအခါ အန်းယိက အ​ပေါ်ဝတ်ကိုယ်ကျပ် စွပ်ကျယ်ကို ချွတ်ကာ ပန်း​ရောင်ရှပ်​လေးသာ ဝတ်ထားပြီး မှန်တင်ခုံ​​ရှေ့တွင် ​စောင့်​နေခဲ့သည်။ 　　

"အို​ကေ... ဒီကို လာထိုင်" အန်းယိက ထရပ်ကာ သူ့​ဘေးမှ ထိုင်ခုံကို ညွှန်ပြလိုက်သည်။ လီယန်က နှုတ်ခမ်းကိုက်ကာ အန်းယိ ထိုးပြ​သော နေရာတွင် ဝင်ထိုင်လိုက်သည်။ ထို​နောက် သူမက အန်းယိ သူမ၏ ဆံပင်ကို နည်းနည်းချင်းစီ ပုံသွင်း​ပေး​နေသည်အား ကြည့်​နေခဲ့သည်။ 　　

"မင်းဆံပင်​က ​ထူးခြားတာပဲ... ​​တော်​တော်​လေး ​ပျော့ပြီး​တော့ အရမ်းနက်​မှောင်​နေတာ"

အန်းယိက လီယန် ဆံပင်၏ ​အဖျားမှ အ​ကောက်​လေးများကို ပုံသွင်း​ပေး​နေရင်း သူမကို ချီးမွမ်း​နေခဲ့သည်။

"မင်းရဲ့ မျက်နှာပုံစံကိုလည်း သ​ဘောကျတယ်.. အ​ရှေ့တိုင်းရဲ့ စံပြအလှပုံစံပဲ..."　　

"...​ကျေးဇူးပါ" လီယန်က တစ်ခဏမျှ သူမကိုယ်သူမ တင်းကြပ်ထားလိုက်ပြီး ထိုစကားနှစ်လုံးဖြင့်သာ ပြန်​ဖြေနိုင်ခဲ့သည်။ 　　

အန်းယီက မှန်မှတဆင့် လီယန်ကို ကြည်ွလိုက်ပြီး မပြုံးမိဘဲ မ​နေနိုင်​တော့​ပေ။

"မင်း အရမ်း စိတ်လှုပ်ရှား​နေဖို့ မလိုပါဘူး... စိတ်​အေး​အေးထား... ဒီလုပ်ငန်းစဥ်က သ​ဘောကျဖို့ ​ကောင်းပါတယ်" ​

လီယန်: “…”

သူ ဒီလို​ပြော​လေ​လေ ပိုစိတ်လှုပ်ရှား​လေ​လေပဲ..　

လီယန်က အန်းယိ၏ စိတ်ကူး​​ကောင်းလှ​သော ဆံပင်အ​ခြောက်ခံခြင်း နည်းပညာကို ​လေးစား​နေခဲ့သည်။ သူမ၏ ဆံပင်​ဖြောင့်​လေး တဖြည်းဖြည်း ​ကွေး​ကောက်လာသည်ကို ကြည့်၍ မ​နေနိုင်ဘဲ ရလဒ်ကို အံ့အားသင့်မိသွား​လေသည်။ သူမက ဆံပင်​ကောက်များ ရှိခြင်းက သူမကို ပို၍ အရွယ်ရင့်သွား​စေသည်ဟု ​အမြဲတမ်း ​တွေးခဲ့သဖြင့် ဆံပင်အ​ဖျား​လေးကိုသာ ​ကောက်ထားခဲ့သည်။ သို့သော် အန်းယိ ပြင်​​ပေးလာ​သော ဆံပင်ပုံစံမှာ သူမကို အရွယ်ရင့်သွား​စေသည်ဟု မခံစားရဘဲ ထိုအစား အလွန်လှပပြီး ဖက်ရှင်ကျသွား​စေသည်။　

အမျိုးသမီးတစ်​ယောက်အတွက် ​မှော်ဆရာ​လေး..

ထိုစကားလုံး ​ခြောက်လုံးက သူမ၏ ​စိတ်ထဲတွင် ​ပေါ်လာခဲ့သည်။ ၎င်းမှာ ယခင်က ဝတ်ရုံရှည်ဖိုရမ်တွင် အန်းယိကို သူ့ကျွမ်းကျင်မှူများအတွက် ချီးမွမ်းကြစဥ်က ​ပေါ်ထွက်လာခဲ့သည့် ကွန်မန့်တစ်ခု ဖြစ်သည်။　

သူ့လက်များမှာ ​မှော်ပညာများ ရှိ​နေသည့်အလားပင် ၎င်းတို့က မိန်းက​လေး တစ်​ယောက်ကို မင်းသမီး​လေး တစ်ပါးအဖြစ် ​ပြောင်းလဲ​ပေးနိုင်သည်။　　

ဆံပင်ပုံသွင်းမှုက ယာယီသာဖြစ်၍ အချိန်အများကြီး မယူလိုက်ရ​ပေ။ အန်းယိက ဆံပင်​လေမှုတ်စက်ကို ပြန်ချထားလိုက်ပြီး သူ့​ဘေးမှ အားတကို ​ပြောလိုက်သည်။

"သူ့အတွက် အဝတ်အစား​၊ ဖိနပ်နဲ့ အဆင်တန်ဆာ​တွေ ငါ​ရွေးထားပြီးသား... သူ့ကို အဝတ်လဲဖို့ ​ခေါ်သွား​​ပေးလို့ ရပြီ"　　

"ဟုတ်" အားတက လီယန်ကို ပြုံးပြလိုက်သည်။ "​ကျေးဇူးပြုပြီး ကျွန်မနဲ့ လိုက်ခဲ့​​ပေးပါ"　　

အန်းယိက ​ခါး​နေရာ၏ ဘယ်ဘက်တွင် ဖဲပွင့် အကြီးကြီးရှိ​နေသည့် ရေပြာ​ရောင် ပုခုံးကျ ဝတ်စုံကို ​ရွေးချယ်ထားပြီး ကြိုးသိုင်းဖိနပ်သည်လည်း ဝတ်စုံနှင့် အ​ရောင်တူပဲ ဖြစ်ကာ ပန်း​ရောင် နှင်းဆီပွင့်​လေးပါသည့် လည်ဆွဲ​လေးလည်း ပါ​သေးသည်။ လီယန် အဝတ်လဲပြီးသွား​သောအခါ မှန်ထဲတွင် သူမကိုယ်သူမ မမှတ်မိနိုင်လုနီးပါး ဖြစ်သွားသည်။
　　
အန်းယိက သူအားထုတ်ထားမှုများကို ​အလွန်တရာ ကျေနပ် အားရ​နေဟန်ပင်။ လီယန်​​​ရှေ့တွင် ရပ်ကာ ​လေချွန်လိုက်ပြီး မိတ်ကပ်လိမ်းရန် ​ခေါ်သွားသည်။ အန်းယိက ဂရုတစိုက် ခြယ်သ​ပေး​နေပြီး သူမ၏ လက်သည်းများကိုပင် သူကိုယ်တိုင် ​အ​ရောင်ခြယ်​ပေးခဲ့ခြင်း ဖြစ်သည်။ လက်သည်းလုပ်ပြီးသွား​သောအခါ ဆံပင်​လေမှုတ်စက်ကို ထပ်မံ ​ကောက်ယူလိုက်ပြီး သူမ၏ ဆံပင်များကို ​လေမှုတ်​ပေး​နေခဲ့သည်။ အဆုံးတွင် အန်းယိက ဘယ်ဘက်မှ ချထား​သော ဆံပင်ကို သုံး၍ ဆံထုံး​လေးတစ်ခုဖြင့် ပုံ​ဖော်လိုက်ပြီး အ​ပေါ်တွင် ​ရေပြာ​ရောင် စိန်တုဖြင့် အုပ်ထားလိုက်သည်။

"ပြီးပြီ... မင်း အခု ဧကရာဇ်​မော့နဲ့ သွား​တွေ့လို့ရပြီ"

လီယန်: “…”

ဒီစာ​ကြောင်းက နည်းနည်း ထူးဆန်း​​​နေသလိုပဲလို့...　　

လီယန်က နှစ်​ပေါင်းများစွာ ရှင်သန်ခဲ့​သော်လည်း ထိုကဲ့သို့​​သော ပွဲတက်အဝတ်အစားမျိုးကို တစ်ခါမှ မဝတ်ဖူးပါဘဲ ထိုခံစားချက်နှင့်လည်း အနည်းငယ် အကျွမ်းတဝင် ဖြစ်မ​နေခဲ့​ပေ။ သူမကို ​မော့ကျန်း​ရှေ့တွင် ပြရမည်ဆိုပါက ပို၍ပင် စိတ်လှုပ်ရှားသွားရ​စေသည်။ သူမ ​လှေကား​ပေါ်မှ ဆင်းလာသည့် အချိန်တွင် ​မော့ကျန်းမှာ မျက်လုံးများ မှိတ်ထားရင်း ဆိုဖာကို ​နောက်မှီကာ အနားယူ​နေခဲ့သည်။ သို့​​သော်ငြား အဝတ်အစားများ လဲထားပြီး ဆံပင်ကလည်း ပုံစံသွင်းထားကာ နူးညံ့ပြီး သက်​တောင့်သက်တာ ဖြစ်​နေဟန်​ပေါ်သည်။　　

ထိုသူ၏ ဝတ်စုံက အထူးပြုလုပ် ဒီဇိုင်းထွင်ထားသည့် အနက်​ရောင် အ​​နောက်တိုင်းဝတ်စုံနှင့် အဖြူ​ရောင် ရှပ်အင်္ကျီ ဖြစ်သည်။ ထိုခေါင်း​လောင်းပန်းအ​ရောင် လည်စီးက အဆုံးသတ် အပြင်အဆင် ဖြစ်သည်။　

ကျန်းကျန်းက တကယ် ခန့်ညားတာပဲ...　　

​မော့ကျန်းက သူမ၏ စိတ်အားထက်သန်မှုကို ခံစားမိသည့်အလား မျက်​တောင်များ လှုပ်ခတ်သွားပြီး မျက်လုံးများ တဖြည်းဖြည်းပွင့်လာခဲ့သည်။ သူ့​ခေါင်းကို ​မော့လိုက်သည့်အခိုက်၌ လီယန် ​လှေကားထက်တွင် ရပ်​နေသည်ကို ​တွေ့လိုက်ရသည်။ 　

​မော့ကျန်း၏ မျက်လုံးများထဲမှ အံ့သြမှင်သက်မှုတို့ကို ဖမ်းမိသွားသည့် အန်းယိက ပြုံးကာ ​​ကောက်မေးလိုက်သည်။

"ကျွန်​တော့်ရဲ့ လက်ရာကို စိတ်​ကျေနပ်ရဲ့လား"　

​မော့ကျန်းက သူ့ကို ကြည့်ကာ ထရပ်လိုက်ပြီး ​လှေကားဆီသို့ ​လျှောက်လာခဲ့သည်။

"အများဆုံးက ​မော်ဒယ်​ကြောင့်ပဲ​လေ"　　

အန်းယိက ​ခေါင်းငုံ့ကာ တိတ်တဆိတ် ရယ်​မောလိုက်သည်။ ​မော့ကျန်းက လီယန်ကို သူ့ဘက်သို့ ဆွဲယူလိုက်ပြီး သူမကို အကြိမ် အနည်းငယ် ထပ်ပြီး စစ်​ဆေး ကြည့်ရှု​နေခဲ့သည်။ သူ့မျက်ခုံးများ အတူတကွ စုကြုံ့သွားပြီး ​မေးလာခဲ့သည်။

"ပုခုံးမ​ပေါ်တဲ့ဟာ မရှိဘူးလား"　　

လီယန်၏ ဆံပင်ရှည်များက သူမ၏ ပုခုံးကို အများဆုံး အုပ်ကာထားပြီး ထိုစိုးမိုးနိုင်စွမ်းရှိသည့် ပုံ​လေးက လူတိုင်း၏ စိတ်ကူးစိတ်သန်းများကို ပို၍ပင် ​ယောင်ဝါးဝါး ဖြစ်သွား​စေရသည်။

"ပြီး​တော့... ဒီဂါဝန်က နည်းနည်း တိုလွန်း မ​နေဘူးလား"　　

　　……

အန်းယိ​၏ နှုတ်ခမ်း​​​ထောင့်​လေးများ တွန့်သွားသည်။ "မစိုးရိမ်ပါနဲ့... ဧကရာဇ်​မော့သာ သူ့အနားမှာရှိရင် ဘယ်သူမှ သူ့ကို စရဲကြမှာ မဟုတ်ဘူး"　

​မော့ကျန်းက သူ့စကားလုံးများမှာ အဓိပ္ပါယ်ရှိသည်ဟု ခံစားရ​သော်လည်း လက်​လျှော့ရန် ငြင်းဆန်​နေဆဲပင်။

"သူ့ကို ​ခေါင်းစ​ခြေဆုံး ဖုံးထားလို့ရမဲ့ ဝတ်စုံ မရှိဘူးလား"　　

ဒါဆို ဘာလို့ ခင်ဗျား ကိုယ်တိုင်ပဲ လိုက်ကာကို ဖြဲပြီး သူ့ကို သူ့ကို မပတ်​ပေးလိုက်ရတာလဲ... အန်းယိက ​ခေါင်းလှည့်ကာ ခပ်ဆိတ်ဆိတ် ရှိ​နေဆဲပင်။

လီယန် ​မော့ကျန်း ထိုကဲ့သို့ ​ပြောသည်ကို ကြား​သောအခါ သူမ၏ ဝတ်စုံကို ယက်ထားသည့် ချည်မျှင်များမှာ အနည်းငယ် ကျဲ​နေ​ကြောင်း ​တွေ့လိုက်ရသည်။ သူမက ဝတ်စုံကို စိတ်မသက်မသာဖြင့် ဆွဲချ၍ စိတ်ဖိစီး​နေသည့် အမူအယာဖြင့် ​မော့ကျန်းကို လှမ်းကြည့်လိုက်သည်။

"ကျန်းကျန်း... ကျွန်မမှာ ယွမ်ငါး​ထောင်ပဲ ပါခဲ့တာ"　

​မော့ကျန်း: “…”

လီယန်က သူမ၏​ သောကများထဲတွင် နစ်​မြော​နေဆဲ ဖြစ်သည်။ ဆံပင်နှင့် မိတ်ကပ်ကို ထည့်မတွက်လျှင်​တောင် ထိုအဝတ်အစားများနှင့် ဖိနပ်သည်ပင် သူမ မတတ်နိုင်​သော ကိန်းဂဏန်းတစ်ခုသို့ ​ရောက်​နေ​လေပြီ။ အမှန်တကယ်တွင် သူမထံ၌ ယွမ်​ငါး​ထောင်ပင် ရှိမ​နေခဲ့။　　

အန်းယိက ​နောက်ပါးတွင် ရယ်​မော​နေလေပြီ။ ​မော့ကျန်းက သူ့နှုတ်ခမ်းတွန့်​ကွေးလာမည်ကို ကြံ့ကြံ့ခံကာ ​မော့မိသားစု ပိုင်ဆိုင်သည့် စံပြအပြုံး​လေးကို ​ဖော်ပြလာခဲ့သည်။

"ကိုယ့်ကဒ်နဲ့ ရှင်းလိုက်"　

​မေးခွန်း: ​ယောကျ်ားတစ်​ယောက်က ဘယ်လိုစကားမျိုး ​​ပြောတဲ့အချိန်မှာ အ​ချော​မောဆုံးဖြစ်​နေတဲ့ပုံ​ပေါ်လဲ... အ​​ဖြေက​တော့ ဝယ် ဝယ် ဝယ်.... ပြီးရင် ကိုယ့်ကဒ်နဲ့ရှင်း ပါတဲ့...　

​မော့ကျန်းက လီယန်၏ မှုန်မှိုင်း​နေ​သော အသွင်အပြင်ကို ကြည့်ကာ သူမကို ​စျေးဝယ်ထွက်ဖို့ ​ခေါ်သွားရန် အားလပ်ချိန်အချို့ ထားသင့်​နေပြီဟု ခံစားလိုက်ရသည်။ ဤနည်းဖြင့် အမြင်​ကောင်း​လေးများကို တည်​ဆောက်ရန် ​ကောင်းမွန်​လှပေသည်။


သူတို့က အန်းယိ၏ စတူဒီယိုတွင် အချိန်အကြာကြီး မ​နေခဲ့ကြ​ပေ။ ​မော့ကျန်းက လီယန်နှင့်အတူ ဧည့်ခံပွဲကိုသာ တိုက်ရိုက်သွားလိုက်သည်။ လီယန်က ဓါတ်​လှေကားက အထပ်တစ်ခုချင်းစီအား ဖြတ်သွားသည်ကို ကြည့်၍ သူမ၏ နှလုံးသားသည်လည်း ၎င်းနှင့်အတူ မြင့်တက်လာသည်ဟု ခံစားလိုက်ရသည်။ သူမက ထိုကဲ့သို့​​သော အဆင့်မြင့် ဧည့်ခံပွဲများကို မတက်ဖူး​ပေ။ သူမ ဘယ်သူ့ကိုမှ စကားမ​ပြောနိုင်ခဲ့ရင်​ရော... တစ်ခုခုမှားသွားရင် ကျန်းကျန်း မျက်နှာပျက်​အောင် လုပ်မိသွား​လောက်လား...

​မော့ကျန်းက သူမကို ​ဘေးတိုက်ကြည့်လိုက်သည်။ သူမ၏ လက်ကို ဆုပ်ကိုင်၍ နူးနူးညံ့ညံ့ ​ပြောလိုက်​လေသည်။

"စိတ်မပူပါနဲ့... မင်း စား​သောက်ပြီးရင် အဆင်​ပြေသွားလိမ့်မယ်"　　

လီယန်: “…”

ကျန်းကျန်းက တကယ်ကြီး ​တွေး​ပေးတတ်တာပဲ​နော်...　　

ပွဲကျင်းပရာ​နေရာက 21ထပ် ဖြစ်သည်။ လီယန်က ဓါတ်​လှေကား၏ "တင်း" ဟူ​သော အသံကို နား​ထောင်​နေပြီး ဝင်​ပေါက်​ရှေ့တွင် ရပ်နေသည့် တံခါး​စောင့်များကို ​တွေ့လိုက်ရသည်။ ​မော့ကျန်းက သူတို့ကို ဖိတ်စာကမ်း​ပေးလိုက်ပြီး အမှတ်တမဲ့ဖြင့် လီယန်၏ လက်ကို လှမ်းဆွဲရန် ပြင်သည်။ သို့​သော်လည်း သူမ၏ လက်များကို မထိလိုက်ခင်မှာပင် ရပ်လိုက်ပါ၏။ အနည်းငယ် တုံ့ဆိုင်းသွားပြီး​နောက် ​မော့ကျန်းက အကြံ​ကောင်း​လေးကိုသာ တဖြည်းဖြည်း လိုက်နာသွားရန် ဆုံးဖြတ်လိုက်ပြီး သူ့လက်များကို ပြန်သိမ်း၍ သူ့​ရှေ့မှ ​လျှောက်လမ်းကိုသာ စိုက်ကြည့်လိုက်သည်။

"သွားရ​အောင်"　

"​ကောင်းပြီ​လေ" လီယန်က အားတက်သ​ရော ​ခေါင်းငြိမ့်ပြလာပြီး သူမ၏ အမူအယာက စစ်တိုက်ထွက်​တော့မည့် စစ်သည်​တော်တစ်​ယောက်နှင့် တူ​နေခဲ့သည်။　　

​မော့ကျန်း: “…”

အမှန်တကယ်တွင် ၎င်းက​ သာမန် ​ကော့​တေးပါတီ​လေးတစ်ခုသာ ဖြစ်သည်။ အမှန်တကယ်ပင် မလိုအပ်လှ။　　

ဝင်​ပေါက်​ရှေ့မှ တံခါး​စောင့်က သူတို့အတွက် ပ​ရော်ဖက်ရှင်နယ်ကျကျ တံခါးဖွင့်​ပေးလိုက်ပြီး ​မော့ကျန်းနှင့် လီယန်တို့က အတူတကွ ဝင်လာခဲ့ကြသည်။ လူများစွာက ပွဲအတွင်းသို့ ​ရောက်နှင့်​နေကြ​လေပြီ။ တံခါး ပွင့်လာသံ ကြား​သောအခါ လူတိုင်းက အသံလားရာဘက်သို့ အမှတ်တမဲ့ ကြည့်လာကြပြီး သူတို့၏ မလိုမုန်းထားကင်း​​သော အမူအယာအားလုံးက သိမ်​မွေ့လာကြသည်။

​မော့ကျန်းက ခိုက်ဟွမ်း၏ ​ကော့​တေးပါတီသို့ နှစ်တိုင်း တက်​ရောက်ခဲ့​သော်လည်း အမျိုးသမီး တွဲဖက်တစ်​ယောက်ကို ဘယ်​သောအခါမှ ​ခေါ်မလာခဲ့ဖူး​ပေ။ ဤတစ်ကြိမ်၌ သူနှင့်အတူ အမျိုးသမီး တစ်​​ယောက်ကို ပွင့်ပွင့်လင်းလင်း ​ခေါ်လာခဲ့​လေပြီ။ ​လတ်တ​လော ကော်​ဇောနီ​ပေါ်တွင် ​ပြောခဲ့သည့် စကားများနှင့် ​ပေါင်းစပ်ကြည့်လိုက်ပါက အချို့​သော ထင်​ကြေးများ ဖြစ်​ပေါ်လာကြမည်မှာ မလွဲဧကန်ပင်။　　

၎င်းက အတိအကျပင် ဝမ်​ရှောင်​ရှောင် ​မော့ကျန်းနှင့်အတူပွဲတက်လိုသည့် အ​ကြောင်းအရင်း ဖြစ်သည်။ သူမ ​မော့ကျန်း၏ ​ဘေးတွင်ပေါ်လာနိုင်သ​ရွေ့ သူမ ဘာတစ်ခုမှ မလုပ်ခဲ့လျှင်​တောင် လူတိုင်းက မတူညီသည့်အမြင်မျိုးနှင့် ကြည့်လာကြမည် ဖြစ်သည်။



Xxxxxx