MM Story Teller

Ch 18

Viewers 1k

😺Chapter 18

နတ်ဆိုးဘုရင်ကြီးရဲ့ လျှို့ဝှက်ချက်လေးတစ်ခု…

အခြားတစ်ဖက်တွင် လီရှစ်က အကျဉ်းစခန်းမှ ထွက်ပြီးသည်နှင့် လက်တွေ့ကမ္ဘာသို့ ချက်ချင်းပြန်မသွားခဲ့ဘဲ သူ ယခင်က ရောက်ခဲ့သည့် နေရာလွတ်အတွင်းသို့ဝင်လိုက်သည်။

ပတ်ဝန်းကျင်၌ မျက်စိတစ်ဆုံး မြင်နိုင်သမျှက အဆုံးစမဲ့သော အဖြူရောင်မြူထုကြီးသာဖြစ်ကာ လူတစ်ရပ်စာ မှန်ကြီးတစ်ချပ်မှလွဲ၍ အခြားမည်သည့်အရာမျှ မရှိပေ။

ရုတ်တရက်ပင် စနစ်၏ အမည်ဖော်မရသည့် အသံက လီရှစ်၏ နားအတွင်း ထွက်ပေါ်လာ၏။

[ ကစားသမားရဲ့ လက်ရှိရမှတ်က 120 points ဖြစ်ပြီး အဆင့် 1 စမ်းသပ်သူအဖြစ် ရာထူးတိုးသွားပါပြီ။ စနစ်က မင်းအတွက် တိုက်ရိုက်ထုတ်လွှင့်ခန်းတစ်ခု ဖွင့်ထားပေးပါတယ်။ တိုက်ရိုက်ထုတ်လွှင့်ခန်းကို လာမယ့် အကျဉ်းစခန်းမှာ စတင်အသုံးပြုလို့ရမှာဖြစ်ပါတယ်။ တိုက်ရိုက်ထုတ်လွှင့်မှုမှရရှိတဲ့ ဝင်ငွေတွေကိုတော့ အဆင့် 1 ဂိမ်းစမ်းသပ်သူတွေရဲ့ ဝေစုအတိုင်း မင်းရဲ့ ကိုယ်ပိုင်အကောင့်ထဲကို တိုက်ရိုက်လွှဲပေးသွားမှာပါ။ ]

လီရှစ်၏ မျက်လုံးများမှာ စိတ်လှုပ်ရှားမှုဖြင့် ဝင်းလဲ့လာ၏။

စနစ်ရဲ့ပြောပုံအရဆို ငါ အလုပ်အကိုင် အတည်တကျ ရသွားပြီလို့ ပြောလို့ရတယ်မလား…

[ Followers တိုးတက်နှုန်းမြင့်စေဖို့ ကစားသမား 321 ရဲ့ ကိုယ်ရေးချက်လက်တွေကို ဖော်ထုတ်ပြသထားချင်သလား..]

“ ကိုယ်ရေးအချက်အလက်လား…”

လီရှစ်က မျက်မှောင်ကြုတ်ပြီးရင် ကြုတ်လိုက်ကာ ပြောလိုက်သည်။

“ မင်း ငါရဲ့ ကိုယ်ရေးအချက်အလက်တွေကို ပြပေးလို့ရလား… ငါ ကြည့်ပြီးမှ ဖွင့်မဖွင့် ဆုံးဖြတ်မယ်…”

လီရှစ်၏စကားဆုံးသည်နှင့် အပြာရောင်ဖျော့ဖျော့ သုံးဖက်မြင်မျက်နှာပြင်တစ်ခုက သူ့ရှေ့၌ ပေါ်လာသည်။ ထို မျက်နှာပြင်၏ အလယ်၌ လိမ္မော်ရောင်ကြောင်လေး၏ ဓာတ်ပုံရှိနေကာ ပက်စ်ပို့ဓာတ်ပုံနှင့်ပင် ဆင်တူလေ၏။ ထိုဓာတ်ပုံ၏ အောက်ဘက်တွင်မူ လိမ္မော်ရောင်ကြောင်လေး တစ်ဖြစ်လဲ လီရှစ်၏ ကိုယ်ရေးအချက်အလက်များပါဝင်သည်။

ကစားသမား ID : No.321

လက်ရှိ followers အရေအတွက် : 32886 ဦး

အသေးစိတ် ကိုယ်ရေးအချက်အလက်များ : [ ဖုံးကွယ်ထား]

— ဖုံးကွယ်ထားသော အချက်အလက်များ —

အမည်အရင်း : လီရှစ်

စမ်းသပ်သူ အဆင့် : အဆင့် 1 (120 points/ 200 points)

ချည်နှောင်ထားသော စွမ်းရည် : ကြွက်ဖမ်းခြင်း ( စမ်းသပ်သူ အဆင့် မြင့်လာသည်နှင့်အမျှ စွမ်းရည်အဆင့်သည်လည်း မြင့်လာမည်။ မူလစွမ်းရည် “သေလုမြောပါးအရွယ် ကြွက်များကို ဖမ်းဆီရခြင်း” မှ “နို့ဖြတ်စအရွယ် ကြွက်ပေါက်များကို ဖမ်းဆီးခြင်း” အထိ တိုးတက်ပြောင်းလဲလာမည်။ )

ချည်နှောင်ထားသော အသုံးအဆောင်ပစ္စည်း : ဘာသာစကားပြောင်းလဲနိုင်သည့် ချူလုံး ( တစ်သက်တာ)

ကဒ်ဆွဲနိုင်သည့် အခွင့်အရေး : ၁ ကြိမ်

အချက်အလက်များ ဖတ်ပြီးသည့်နောက်...

လီရှစ်: “…”

ဒီလောက် ရှက်ဖို့ကောင်းတဲ့ ကိုယ်ရေးအချက်အလက်ကို ဖော်ထုတ်ပြသဖို့ ဖြစ်နိုင်ရဲ့လား…

မည်သို့ပင်ဖြစ်စေ လီရှစ်က သူ့ကိုယ်သူ ပထမဆုံး ပုံတူကို အန္တရာယ် ကင်းကင်းနှင့် ကျော်ဖြတ်နိုင်လိမ့်မည်ဟုပင် မမျှော်လင့်ထားခဲ့ပေ။

အဲ့ဒီအပြင်ကိုမှ ပရိသတ် ၃ သောင်းကျော်လောက်ကိုတောင် ဆွဲဆောင်နိုင်လိုက်သေးတယ်…

ကြည့်ရတာ ငါ ဒီအလုပ်မှာ အရမ်း ပါရမီပါတာပဲ ဖြစ်မယ်…

ဒါပေမဲ့…

လီရှစ်၏ မျက်လုံးများ အရောင်လက်သွားသည်။ သူ အရေးကြီးသည့် အရာတစ်ခုကို မေ့လုဆဲဆဲပင်။

“ စနစ်... ငါ ကဒ်ထပ်ဆွဲလို့ ရသေးတယ်မလား…”

[ ရတာပေါ့။ ကစားမား 321 ကဒ်ကို အခု ဆွဲချင်ပါသလား။ ဒါမှမဟုတ် နောက်အကျဉ်းစခန်းဝင်မှ ဆွဲချင်သလား။ ]

“ အခုချက်ချင်း ဆွဲမယ်...”

ကစားသမား အသစ်လေး လီရှစ်က သူ ကဒ်ဆွဲလိုက်သည့် နှစ်ရက်အတွင်း ကံကောင်းခြင်းများ ရောက်ရှိလာလိမ့်မည်ဟု မမျှော်လင့်မထားပေ။ သူက ဂိမ်းမှ ထွက်လာပြီးလျှင် ထိုကိစ္စအတွက် ခေါင်းရှုပ်မနေစေရန် ဆွဲ၍ရခိုက် အပြီး ဆွဲထားခြင်းဖြစ်၏။

[ ကဒ်တစ်ကဒ်ကို ရွေးချယ်လိုက်ပါ—]

စနစ်၏ စကားအဆုံး၌ ကျောမှောက်ထားသော ကဒ် တစ်ဒါဇင် ခန့်က လီရှစ်၏ ရှေ့၌ ပေါ်လာ၏။ ကဒ်ဆွဲခြင်း လုပ်ငန်းစဉ်များက ပထမအကြိမ်အတိုင်းပင် လီရှစ် ကြုံရာကျပန်း တစ်ကဒ်ဆွဲပြီးသည်နှင့် အခြားကဒ်များက ပျောက်ကွယ်သွား၏။

လီရှစ်က ကဒ်ထောင့်စွန်းကို သူ၏ လက်သည်းများဖြင့် ကိုင်ကာ လှန်လိုက်ပြီး ကဒ်အတွင်း၌ ရေးထားသော အချက်အလက်များကို ဖတ်လိုက်သည်။

[ အထူး အသုံးအဆောင်ပစ္စည်း : Selfie

အမျိုးအစား : တစ်ခါသုံး ပစ္စည်း

မိတ်ဆက် : သေစေလောက်သော ဒဏ်ရာများကို ခုခံနိုင်သည်။ ကစားသမားနှင့် အသုံးအဆောင်ပစ္စည်း ချည်နှောင်ပြီးသည်နှင့် သေစေလောက်သော ထိခိုက်မှုများကြုံလာမည်ဆိုပါက ကစားသမားမှာ ဓာတ်ပုံကမ္ဘာထဲသို့ အလိုအလျောက် စုပ်ယူခြင်း ခံရပါမည်။ အပြင်ဘက် ကမ္ဘာတွင် အန္တရာယ်ကင်းသွားသည့် အချိန်မှသာ ကစားသမားက ဓာတ်ပုံကမ္ဘာထဲမှ အထုတ်ခံရမည်ဖြစ်ကာ အသုံးအဆောင်ပစ္စည်းသည်လည်း တစ်ချိန်တည်း၌ ပျက်စီးသွားမည်ဖြစ်သည်။ ]

[ သတိပေးချက် : သေချာအသုံးပြုရင် မင်းရဲ့ ခွေးဘဝ... အိုး... မဟုတ်ဘူး... ကြောင်ဘဝ ကို ကယ်တင်နိုင်ပါလိမ့်မယ်.. ]

လီရှစ်၏ ကြောင်မုတ်ဆိတ်များ နှစ်ကြိမ်တိုင်တုန်ခါသွားသည်။ သူက ထိုမုန်းတီးဖွယ်ကောင်းသော ပျက်ရယ်ပြုမှုအား လျစ်လျူရှုရန် ကြိုးစားလိုက်သည်။

အမှန်အားဖြင့် ဆိုရလျှင် ပစ္စည်းက ကောင်းမွန်၏။ ထိုပစ္စည်းကို လက်ဝယ်ပိုင်ထားခြင်းက အသက်ပိုတစ်ခု ရှိနေခြင်းဖြင့်ပင် ညီမျှလိမ့်မည်။

[ မင်း ဒီအသုံးအဆောင်နဲ့ ချည်နှောင်ချင်သလား..]

“ ချည်နှောင်မယ်... လုပ်လိုက်တော့... “

ထိုကဒ်ပြားက လိမ္မော်ရောင်ကြောင်လေး၏ အနီးကပ်ဓာတ်ပုံ အဖြစ်ပြောင်းလဲသွားပြီး စနစ်၏ နေရာလွတ် သိုလှောင်ခန်းထဲသို့ အလိုအလျောက်ဝင်သွားသည်။ လီရှစ်က နောက်ပုံတူကမ္ဘာ စသည်နှင့် ထိုအသုံးအဆောင်ကို လွယ်လင့်တကူ ထုတ်သုံး၍ ရလေ၏။

နေရာလွတ်မှ မထွက်မီ လီရှစ်က စနစ်အား မမေ့မလျော့ မေးလိုက်သည်။

“ စကားမစပ်... နောက်ပုံတူက ဘယ်တော့ စမှာလဲ…”

လီရှစ်က ဤဂိမ်းအား အလွန်အမင်းနှစ်သက်နေ၏။

ဂိမ်းကစားရင်းနဲ့ ပိုက်ဆံပါရှာလို့ရတာ… ငါ အရမ်းကိုပျော်နေပါပြီ…

[ ကစားသမားတွေရဲ့ ကျန်းမာရေးအတွက် လုံလောက်တဲ့ နားချိန်ရှိအောင် အကျဉ်းစခန်း တစ်ခုနဲ့ တစ်ခုကြား တစ်ရက်ခြားထားပါတယ်။ ကစားသမားများကို သန်ဘက်ခါမနက် ၈ နာရီ အတိမှာ ဂိမ်းအတွင်း ဝင်ရောက်ပေးဖို့တောင်းဆိုပါတယ်။ ပျော်ရွှင်တဲ့ အနားယူချိန်လေးဖြစ်ပါစေလို့ စနစ်က ဆုမွန်ကောင်းတောင်းပေးလိုက်ပါတယ်နော်~ ]

လေပွေတစ်ခုပေါ်လာပြီးနောက် လီရှစ်က လက်တွေ့ကမ္ဘာဆီသို့ပြန်ရောက်လာခဲ့သည်။

“ ပြန်လည်ရောက်ရှိလာမှုအတွက် ဂုဏ်ပြုပါတယ်။ ဂိမ်းကစားချိန် ၃ နာရီကြာမြင့်ခဲ့ပြီး နောက်ထပ် ၁၂ နာရီကြာမှသာ ဂိမ်းဆော့ခန်းကို ထပ်မံဖွင့်လှစ်နိုင်ပါမယ်။ ဂိမ်းကို အစွဲလမ်းတကြီး မဆော့ဘဲ အလုပ်လုပ်ဖို့နဲ့ အနားယူဖို့ကိုလည်း အထူးဂရုစိုက်ကြပါ။ “

ဂိမ်းဆော့ခန်းအတွင်း ထိုသတိပေးချက် ပျံ့လွင့်လာပြီးနောက် တံခါးက အလိုအလျောက်ပွင့်သွားသည်။ လီရှစ်က ထိုအခန်းထဲမှ တွားသွားကာ ထွက်လာလိုက်သည်။ သူ၏ ခန္ဓာကိုယ်အား လှုပ်ရှားကြည့်သော်လည်း အနည်းငယ်မျှ ညောင်းညာမှုကို မခံစားရချေ။

သူ ထို သုံးဖက်မြင်ဂိမ်းအတွင်းသို့ ဝင်ရောက်နေစဉ်တွင် ဂိမ်းဆော့ခန်းက သူ၏ ခန္ဓာကိုယ်အား အာဟာရအရည်များ အလိုအလျောက်ဖြည့်သွင်းထား၏။ ထိုသည်မှာ ကစားသမားများ ဂိမ်းအတွင်းဝင်ရောက်နေစဉ် သူတို့၏ ခန္ဓာကိုယ် ရုတ်တရက် အကြောသေခြင်းမဖြစ်စေရန် ကာကွယ်ပေးသည့် ဂိမ်းဆော့ခန်း၏ အထူးလုပ်ဆောင်မှုဖြစ်၏။

ဂိမ်းအတွင်း အချိန်စီးဆင်းမှုက လက်တွေ့ကမ္ဘာ ၏ အချိန်စီးဆင်းမှုထက် အဆပေါင်းများစွာ လျင်မြန်သည်။ လီရှစ်က အကျဉ်းစခန်းအတွင်း သုံးရက်အကြာနေခဲ့ရသော်လည်း လက်တွေ့ကမ္ဘာ၌မူ သုံးနာရီမျှသာ ကြာလေ၏။

လီရှစ်က အနည်းငယ် ပင်ပန်းလာကာ နှစ်ခြိုက်စွာ အိပ်စက်အနားယူရန် အရေးတကြီးလိုအပ်နေသကဲ့သို့ ခံစားလိုက်ရသည်။

သို့ပေသိ လီရှစ်က ထိုသည်ကို လွယ်လင့်တကူ လက်ခံမည့် လူမျိုး မဟုတ်ပေ။

လီရှစ်က ရေချိုးပြီးသည်နှင့် အဖြူရောင်ရေချိုးဝတ်ရုံ ဝတ်လျက် ထွက်လာသည်။ သူ၏ မျက်နှာမှာ ဖြူဖွေးကာ ကြည်လင်နေပြီး မျက်နှာအစိတ်အပိုင်းတစ်ခုချင်းက ငယ်ရွယ်မှုများဖြင့် ပြည့်နှက်နေသည်။ သူ၏ နှုတ်ခမ်းသားများသည်လည်း ပန်းဖျော့ရောင် သမ်းနေကာ မြင်သူများအဖို့ မြည်းစမ်းချင်စိတ်များဖြစ်ပေါ်စေနိုင်၏။ ရွှေရောင် ဆံနွယ်များထံမှ တစ်ပေါက်ပေါက် ကျဆင်းနေသော ရေစက်များက သူ၏ ညှပ်ရိုးပေါ်မှ ဖြတ်သန်းသွားကာ နှင်းတမျှ ဖြူစွတ်နေသော အသားအရေပေါ်၌ ရေစီးကြောင်းများ ချန်ရစ်လျက် ဝတ်ရုံ ကော်လံအတွင်းသို့ တိုးလျှိုးပျောက်ကွယ်သွား၏။

လီရှစ်က ဆံပင်သုတ်ရန်ပင် အလုပ်ရှုပ်မခံချေ။ သူက အိမ်ထိန်းစက်ရုပ် နွှေးပေးထားသော နွားနို့ကို ယူသောက်လိုက်ပြီး Optical brain ကိုဖွင့်ကာ “ဟွမ်းယွီ” ဟုရိုက်လိုက်ပြီး လူအများ သူ့အကြောင်း ဆွေးနွေးထားသည့်ကို သိလိုစိတ်ဖြင့် ရှာဖွေကြည့်လိုက်၏။

{ T/N : Optical brain = သိပ္ပံ ဝတ္ထုတွေမှာပါလေ့ရှိတဲ့ ဖုန်းနဲ့တူတဲ့ သုံးဖက်မြင် ကိရိယာတစ်ခုပါ။ }

“ ဖွီး...“

နွားနို့ပူပူများက လီရှစ်ပါးစပ်အတွင်းမှ ပန်းထွက်လာသည်။ သူက သုံးဖက်မြင်မျက်နှာပြင်အား ကြည့်လျက် အလွန် အံ့ဩထိတ်လန့်နေ၏။

[ (အံ့အားသင့်)... ပထမဆုံးသော ကြောင်စမ်းသပ်သူပဲ...]

[ ဒီ ဆန်းကြယ်တဲ့ စမ်းသပ်သူလေးက လူလား ဒါမှမဟုတ် ကြောင်လား...]

[ နတ်ဆိုးဘုရင်ကြီးက အရင်တုန်းကလောက် မကြိုးစားတော့ဘဲ တစ်လျှောက်လုံး ရေသာခိုနေတော့ ကစားသမားအသစ်လေးပဲ မျက်ရည်ထွက်မတတ်ကြိုးစားပြီး အနိုင်ရအောင် လုပ်ပေးရတော့တယ်...]

[ လင်းရှန်းက နမော်နမဲ့နဲ့ အဖွဲ့ကို ဦးဆောင်လိုက်တာ… အဆုံးမှာတော့ သူ့အသင်းဖော် နှစ်ယောက် သေသွားရတယ်... ဘာလို့ လင်းရှန်းက အဲ့လောက်အပြင်းအထန်တိုက်ခိုက်ချင်ရတာလဲ... ‌OPက လင်းရှန်းနဲ့ နတ်ဆိုးဘုရင်ကြီးကြားက အချစ်နဲ့ အမုန်းတရားကို ဖော်ထုတ်ဖို့ ရောက်လာပြီ...]

[ ဟွမ်းယွီက တကယ်ကို မိုက်တဲ့ ဂိမ်းပဲ…ဘယ်တော့မှ ငါတို့ကစားဖို့အတွက် beta ဗာရှင်း က ထွက်လာမှာလဲ… ငါလည်း ဂိမ်းကစားချင်တယ်လေ ဝူး ဝူး ဝူး...]

[ ဘယ် ကြီးမြတ်တဲ့ဘုရားသခင်က ဒီကြောင်လေးရဲ့ သရုပ်မှန်ကို သိကြလဲဟင်... ငါတော့ အရမ်းကိုသိချင်လွန်းလို့ အိပ်လို့တောင် မပျော်တော့ဘူး…]

ဘုရားရေ... ဒါကြီးက ငါ တကယ့်လူဟုတ်မဟုတ် သိချင်နေကြတဲ့ အဆင့်တောင်မဟုတ်တော့ဘူး… ငါ့အကြောင်း ရေးထားကြတဲ့ မှတ်ချက်တွေနဲ့တင် ဒီ ဖိုရမ်ကြီးကို ရေမျှောပစ်လို့တောင်ရနေပြီ…

လီရှစ်က ပါးစပ်ပြန်ပိတ်နိုင်ရန် အချိန်အနည်းငယ်ပင် ယူလိုက်ရသည်။ ဤအခြေအနေအရ သူ၏ ကိုယ်ရေးအချက်အလက်များကို မထုတ်ဖော်သင့်တော့ပေ။

ဒါက အရမ်း ရှက်ဖို့ကောင်းလွန်းတယ်…

ဟုတ်တယ်... အမှန်ပဲ…

လီရှစ်က ခေါင်းကို အဆက်မပြတ်ညိတ်လျက် နွားနို့ တစ်ငုံသောက်လိုက်ကာ သူ၏ နှလုံးသားထဲရှိ အကြောက်တရားများကို ဖိနှိပ်ရန် ကြိုးပမ်းလိုက်၏။

တစ်ချိန်တည်း၌ လူပြောများနေသည့် ဟန်ကြွယ့်မင်သည်လည်း ဂိမ်းဆော့ခန်းအတွင်းမှ ထွက်လာသည်။ သူထွက်လာသည်နှင့် သူ၏ သူငယ်ချင်းထံမှ ဗီဒီယိုကောလ် ကိုလက်ခံလိုက်ရ၏။

“ နတ်ဆိုးဘုရင်ကြီးရေ…”

ဟန်ကြွယ့်မင်၏ သူငယ်ချင်း တစ်ဖြစ်လဲ လုပ်ဖော်ကိုင်ဖက်ဖြစ်သူ ရှင်းခယ့်က မရပ်မနား အပြစ်တင်လာသည်။

“ ငါ မင်းကို အစကတည်းက ပြောတယ်နော်... မင်းကိုယ်တိုင် ဖန်တီးထားတဲ့ ဟွမ်းယွီစမ်းသပ်မှုမှာ မင်း မပါဝင်တာ အကောင်းဆုံးပဲလို့... အခုတော့ကြည့်... လူဘယ်နှယောက်လောက်က မင်းရဲ့ အဆင့်တွေကျလာတာနဲ့ ပတ်သက်ပြီး ကွန်ပလိန်းတက်နေလဲဆိုတာ… တချို့လူတွေဆီကဆို တိုင်ကြားစာတွေပါ တက်လာတယ် မင်းက အလုပ်မှာ ပျင်းရိနေတယ်ဆိုပြီး... အခုဆို အင်တာနက်တစ်ခုလုံး မင်းရဲ့ ပရော်ဖက်ရှင်နယ်မဆန်မှုကို သတိပြုမိနေပြီ… မင်းတကယ်ပဲ ငါ့ကို ဘာလုပ်ပေးစေချင်နေတာလဲ…”

“ အေးဆေးပေါ့…”

ဟန်ကြွယ့်မင်က ပေါ့ပါးစွာ ပြောလိုက်သည်။

“ ဂိမ်းဒီဇိုင်နာ တစ်ယောက်က ကိုယ်ပိုင်တဲ့ ဂိမ်းကို ကိုယ်မစမ်းသပ်ရဘူးလို့ ဘယ်သူပြောထားလို့လဲ... နောက်ပြီး ငါက ဂိမ်းထဲမှာ မညစ်ခဲ့ဘူးလေ... ဂိမ်းတစ်ခုလုံးမှာ ငါ့ အသင်းဖော်တွေကို မှီခိုခဲ့တာကလွဲလို့ ငါဘယ်သူ့ကို အနှောင့်အယှက်ပေးဖူးလို့လဲ…”

“ ဒါပေမဲ့... ဒါက မင်းရဲ့ ဂုဏ်သတင်းကို ထိခိုက်စေနိုင်တယ်လေ... မင်းက ဒီ ဂိမ်းရဲ့ နံပါတ် ၁ စမ်းသပ်သူလေ… ထိပ်ဆုံးစာရင်းထဲက ကန်ထုတ်ခံချင်လို့လား…”

“ စာရင်းက ကန်ထုတ်ခံရတာက အလွန်ဆုံးရှိမှ ငါ့ စကေးက သူများထပ်နိမ့်တယ်လို့ အထင်ခံရရုံပေါ့...”

ရုတ်တရက် ဟန်ကြွယ့်မင်က တစ်စုံတစ်ခုကို သတိရသွားကာ နူးညံ့ညင်သာစွာ ပြုံးလျက် ပြောလိုက်သည်။

“ စကားမစပ်… ငါ မင်းကို အရေးတကြီး အကူအညီတောင်းစရာရှိတယ်...”

သုံးဖက်မြင် မျက်နှာပြင်ပေါ်ရှိ ရှင်းခယ့်က ရုတ်တရက် သရဲမြင်လိုက်ရသကဲ့သို့ ရပ်တန့်သွားသည်။

ရက်စက် ကြမ်းကြုတ်တဲ့ မကောင်းဆိုးဝါးကြီးက ဘယ်လိုတောင် ဖြူဖြူစင်စင်လေး ပြုံးလိုက်နိုင်တာလဲ...

သူ မူးနေတာများလား... မဟုတ်မှ တကယ်ကြီး မူးနေတာလား…

“ ဘာလဲ... ဘာအကူအညီလဲ…”

ဟန်ကြွယ့်မင်က နှာရိုးပေါ်ရှိ မျက်မှန်ကိုင်းအား တွန်းတင်လိုက်ကာ ပြုံးရွှင်နေသော မျက်ဝန်းများဖြင့် ပြောလိုက်သည်။

“ ငါ့ကို ကစားသမားတစ်ယောက်နဲ့ ချိတ်ထားပေး… ရှေ့လျှောက် သူနဲ့ တူတူ ပုံတူလိုက်ဝင်မလို့…”

😺😺😺

Prev Next