Chapter 64
"အဲဒီ့ဓားပြတွေက သတ္ထုတွင်းတွင်းတူးပြီးလို့ လေယာဉ်နဲ့ သယ်ပြီး လစ်ထွက်ဖို့ ကြံနေကြပြီ ဟုတ်လား ..."
ဒုတိယအကြိမ် သတင်းကြားလိုက်ရချိန်တွင် ကျောက်လင်းယွီက မျက်မှောင်ကြုတ်ကာ မေးလိုက်သည်။
"ဒါက တကယ်ကို ကော်ဘီယန်ရဲ့ စတိုင်ပဲ ..."
လူသားမျိုးနွယ်ဖက်ဒရယ်၏ နယ်နိမိတ်မှာ ကျယ်ပြောလွန်းလှသည့်အတွက် ထိုကြီးမားလှသည့် နယ်နိမိတ်ထဲတွင် မသမာသူအဖွဲ့အစည်းများ အများအပြားရှိနေကာ ကြယ်ဓားပြများမှာလည်း တစ်ခုအပါအဝင်ပင်ဖြစ်သည်။
၎င်းတို့သည် ကုန်သွယ်ရေးယာဉ်တန်းများနှင့် အရင်းအမြစ်ကြွယ်ဝသော ဂြိုဟ်အချို့ကို လုယက်တိုက်ခိုက်ကြသဖြင့် စီးပွားရေးသမားတိုင်းက ရွံမုန်းကြသည်။ ဖက်ဒရယ်ကလည်း ၎င်းတို့ကို အမြစ်ဖျက်ချေမှုန်းရန် ကြိမ်ဖန်များစွာ ကြိုးစားခဲ့သည်။
သို့သော် မည်မျှပင် ကြိုးစားစေကာမူ ၎င်းတို့ကို အမြစ်ပြတ်သုတ်သင်ရန်မှာ မဖြစ်နိုင်ချေ။
အချို့ကြယ်ဓားပြများက လူသူကင်းမဲ့သော ဂြိုဟ်များကို သိမ်းပိုက်ကာ ခံတပ်အဖြစ် ဖွဲ့စည်းထားပြီး အချို့က ဖက်ဒရယ်၏ အပြင်ဘက်တွင် ပုန်းအောင်းနေကြသည်။ အချို့မှာတော့ ...
ပြီးခဲ့သည့် နှစ်တစ်ရာခန့်က လူသားမျိုးနွယ်ဖက်ဒရယ်တွင် ကိစ္စကြီးတစ်ခု ဖြစ်သွားခဲ့သည်။ အနီးဝန်းကျင်ရှိ ကြယ်တစ်ခု၏ အမှုဆောင်အရာရှိမှာ ကြယ်ဓားပြခေါင်းဆောင် ဖြစ်နေခဲ့ပြီး ထိုဓားပြအားလုံးတွင် ဖက်ဒရယ်၏ တရားဝင် သက်သေခံကတ်ပြားလည်း ရှ်ိနေကြသည်။ သူတို့နေထိုင်ရာ ကြယ်အနီးအနားသို့ နောက်ခံမရှိသည့် ကုန်သွယ်ရေးယာဉ်များ ချဉ်းကပ်လာပါက ကြယ်ဓားပြအဖြစ်သို့ ပြောင်းကာ လုယက်လိုက်ကြသည်။ ထို့နောက်တွင်တော့ တစ်ဖန် လူကောင်းအဖြစ် ပြန်ပြောင်းကာ သမ္မာအာဇီဝကျကျ လုပ်ကိုင်စားသောက်ကြပြန်သည်။
လူသားမျိုးနွယ်ဖက်ဒရယ်တွင် ကြယ်ဓားပြများစွာ တည်ရှိပြီး ၎င်းတို့အနက် အင်အားအကြီးဆုံးအဖွဲ့၏ ခေါင်းဆောင်မှာ ကော်ဘီယန်ဖြစ်သည်။
ကော်ဘီယန် ဓားပြခေါင်းဆောင် ဖြစ်လာခဲ့သည်မှာ နှစ်တစ်ရာကျော်နေပြီဖြစ်သည်။ သူသည် ကြယ်ဓားပြအုပ်စုသေးသေးလေးကို လူသူစုဆောင်းတိုးမြှင့်ရင်း ဖက်ဒရယ်တွင်သာမက မဟာမိတ်တပ်ပေါင်းစုတွင်ပါ အင်အားအကြီးဆုံးဓားပြအဖွဲ့ ဖြစ်လာအောင် ကြိုးစားခဲ့သည်။
ကျောက်လင်းယွီနှင့် ကျောက်ဖမ်းတို့သည် ၎င်းတို့ကို ဖမ်းဆီးရန် အကြိမ်ကြိမ်အခါခါ ကြိုးစားခဲ့သော်ငြား ကာဘီယန်မှာ အရှောင်အတိမ်း မြန်လွန်းလှသည်။ သူသည် စစ်တပ်နှင့် မရင်ဆိုင်၊ စစ်တပ်ရောက်လာတော့မည်ဟု သတင်းရသည်နှင့်တစ်ပြိုင်နက် ရှောင်တိမ်းသွားတော့သည်။
ထို့ကြောင့် သူတို့နှင့် ရင်ဆိုင်ရာတွင် စစ်တပ်သည် မရှုံးနိမ့်သော်ငြား နိုင်လည်း မနိုင်ခဲ့ချေ။
"မာရှယ် အခု ဘယ်လိုလုပ်ကြမလဲ ..."
ဟုန်ကျုံးက မေးလိုက်သည်။
"အိုင်ဗာ မင်းရဲ့အတွေးကရော ..."
ကျောက်လင်းယွီ ပထမတပ်ဖွဲ့၏ အကြံပေးအရာရှိကို ပြန်မေးလိုက်သည်။
"မာရှယ် ရန်မိသားစုက ကာဘီယန်နဲ့ အဆက်အသွယ်ရှိနေတယ် ..."
သူက ပြောလိုက်သည်။
ရန်ယဲ့က ကျောက်လင်းယွီကို ဤနေရာသို့ သွားရန် တိုက်တွန်းခဲ့ပြီး ထိုကြယ်ဓားပြများကလည်း အလျင်အမြန် ရှောင်တိမ်းသွားသည်။ ဒါက သေချာပေါက်ကို ပူးပေါင်းကြံစည်ထားတာပဲ ...
ကျောက်လင်းယွီက အချိန်အတော်ကြာ ချိန်ဆပြီးနောက် ပြောလိုက်သည်။
"ထောက်လှမ်းရေးယာဉ်နဲ့အတူ တိုက်ခိုက်ရေးယာဉ်တွေကိုပါ မိုင်ကုန်မြှင့်ပြီး မောင်းခိုင်းလိုက် ဓားပြတွေကို မိပြီဆိုတာနဲ့ သူတို့ပစ္စည်းသယ်ထားတဲ့ယာဉ်ကို ဖျက်ဆီးပစ်လိုက်တော့ ..."
"မာရှယ် အဲဒါက နည်းနည်းလေး အန္တရာယ် မများလွန်းဘူးလား ..."
ထောက်လှမ်းရေးယာဉ်များမှာ များစွာ အရေးမပါလှသော်ငြား တိုက်ခိုက်ရေးယာဉ်များမှာမူ ပင်မသင်္ဘောကို ခုခံရာတွင် အသုံးပြုရန်ဖြစ်ကာ ပင်မစစ်သင်္ဘောနှင့် တကွဲတပြားစီ ဖြစ်နေ၍ မရပေ ..."
"ပြီးတော့ စွမ်းအင်သတ္ထုတွင်းတွေကလည်း ..."
စစ်တပ်ဌာနချုပ်မှာလည်း ထိုစွမ်းအင်သတ္ထုတွင်းများအားလုံးကို ပြန်လိုချင်နေသေးသည်။
"ဖျက်ဆီးပစ်မလား ဓားပြတွေလက်ထဲ အပါခံမလား ဘယ်တစ်ခုကို ရွေးမလဲ ..."
သူက ထပ်ပြောလိုက်သည်။
"ပြီးတော့ အခြေချနေထိုင်သူ အများကြီးကို လက်ခံနိုင်အောင် ပြင်ဆင်ပေးထားဦး ..."
"ဟုတ်ကဲ့ ကာဘီယန်က ကျွန်တော်တို့ကို နှောင့်နှေးအောင် ကြယ်အမှတ် ၁၂၅၃၄ မှာ တစ်ခုခု လုပ်ထားမှာ ကျိန်းသေပဲ အဲ့ဒီမှာ အများဆုံး လူသုံးသန်းလောက်အထိ ရှ်ိနေနိုင်တယ် ..."
အိုင်ဗာက မျက်မှောင်ကြုတ်ကာ ပြောလိုက်သည်။
ကြယ်အမှတ် ၁၂၅၃၄ သည် မိုင်းတူးခြင်း ပြီးဆုံးသည်နှင့် တစ်ပြိုင်နက် စွန့်ပစ်ခံရမည်ဖြစ်၍ နာမည်မရှိဘဲ နံပါတ်သာ ရှ်ိနေခြင်းဖြစ်သည်။ သို့သော် တွင်းထွက်ပစ္စည်း ကြွယ်ဝလှသည့်အတွက် လူဦးရေမှာ ၂၈သိန်းခန့်အထိ ရှိနေပြီး မြို့စောင့်တပ်အပါအဝင် ကာဘီယန် ဖမ်းဆီးထားသည့် ကုန်သည်များကိုပါ ထည့်သွင်းစဉ်းစားပါလျှင် ပျမ်းမျှလူဦးရေ သုံးသန်းခန့် ရှိနေမည်ဖြစ်သည်။
ကာဘီယန်သည် ငွေနှင့်ပတ်သက်၍ လောဘကြီးသော်ငြား လူသတ်ရန် မနှစ်မြို့လှသဖြင့် ထိုသူများမှာ မုချ အသက်ရှင်နေဦးမည်ဖြစ်သည်။
"ပြင်ဆင်ထားကြတာပေါ့ ..."
သူက ကြယ်အမှတ် ၁၂၅၃၄ ၏ ဦးတည်ရာကို ကြည့်နေရင်း ပြောလိုက်သည်။
ကြယ်အမှတ် ၁၂၅၃၄ တွင်တော့ ဗရမ်းဗတာ ဖြစ်မနေ။ ပြည်သူများကို မိုင်းတွင်းတူးခိုင်းထားသည့် ကြယ်ဓားပြများသည် တွင်းထွက်ပစ္စည်းများအားလုံးကို သယ်ဆောင်ကာ ရုတ်တရက် ထွက်သွားကြသည်။
အဖိနှိပ်ခံရသူများအတွက်မူ ဤကိစ္စသည် သတင်းကောင်းပင်ဖြစ်သည်။ သို့သော် များမကြာမီ သူတို့ခြေထောက်အောက်ရှိ မြေကြီးမှာ အနည်းငယ် ထူးခြားနေသည်ကို ခံစားမိလိုက်သည်။
"သတ္ထုတွင်းတွေရှိတဲ့ ဂြိုဟ်က အခေါင်းပေါက်ဖြစ်သွားပြီဆိုတာနဲ့ ကံကောင်းတဲ့သူပဲ အသက်ရှင်ကျန်ခဲ့မှာ ကံဆိုးတဲ့သူကတော့ တစ်စစီ ပေါက်ကွဲသွားမှာပဲ ..."
ရွိုင်းနှင့်အတူ မိုင်းတူးနေသော သက်လတ်ပိုင်း အမျိုးသားမှာ ဖြူဖျော့လာတော့သည်။
ကြယ်ဓားပြများ ဂြိုဟ်ကို သိမ်းပိုက်ချိန်မှစ၍ ထိုသုံးသန်းသော ပြည်သူအားလုံးမှာ ရက်နှစ်ဆယ်တိုင် မအိပ်မနေ တူးဖော်ခဲ့ရသည်။ အခေါင်းပေါက်ဖြစ်သွားဖို့ဆိုတာ တကယ်ရော ဖြစ်နိုင်ပါ့မလား ...
"အခုမှ ရက်နှစ်ဆယ်ပဲ ရှိသေးတာ ဂြိုဟ်ကြီးတစ်ခုလုံး ဗလာဖြစ်သွားအောင် တူးဖို့ဆိုတာ မဖြစ်နိုင်ပါဘူး ..."
ခပ်ပိန်ပိန်နှင့် လူငယ်တစ်ဦးက ဝင်ပြောလိုက်သည်။
"ကျွန်တော်က သတ္ထုတွင်းပညာရှင်ပါ ကျွန်တော့်တွက်ချက်မှုအရဆိုရင် ဒီဂြိုဟ်တစ်ခုလုံးကို ကုန်အောင် တူးပစ်နိုင်ဖို့ အနည်းဆုံး တစ်နှစ် ကြာမှာ ..."
"ပြီးတော့ ကျွန်တော်တွက်တာ မှားသွားရင်တောင် အဆင်ပြေသွားမှာပါ ..."
64.2
သက်လတ်ပိုင်းအမျိုးသားက ရယ်ရယ်မောမောဖြင့် ပြောလိုက်သော်ငြား သူ့အပြုံးမှာ တစ်ခုခု မှားယွင်းနေသယောင်ပင်။
"ငါတို့က တကယ် အဆင်ပြေသွားမှာပါ ဟုတ်တယ် မဟုတ်လား ..."
ရွိုင်းမှာ သူ့ဘေးနားရှိလူများ ဆွေးနွေးနေသည်ကို နားထောင်ရင်း စိုးရိမ်လွန်း၍ နှုတ်ခမ်းများပင် ဖြူဖျော့လာတော့သည်။ ထိုစဉ် သူ့ထံ ပြေးလာသည့် ထူးထူးကဲကဲ သန်မာထွားကျိုင်းနေသော အမျိုးသားတစ်ဦးကို တွေ့လိုက်ရသည်။
"သခင်လေး သခင်လေး ..."
"ချိုးကျွမ်း ..."
ရင်းနှီးနေသောသူကို မြင်လိုက်ရချိန်တွင် ရွိုင် မှာ ဟန်မဆောင်နိုင်အောင် စိတ်လှုပ်ရှားလာတော့သည်။
"သခင်လေး ..."
ချိုးကျွမ်းက ပူပန်မှုအပြည့်ဖြင့် အနားသို့ ရောက်လာသည်။
"သခင်လေး ကျွန်တော်တို့ ဘယ်လိုလုပ်မလဲ ဟိုဓားပြကောင်တွေက မိုင်းတွင်းတွေ အများကြီး တူးသွားပြီး တစ်ဂြိုဟ်လုံး ပျက်စီးအောင် လုပ်သွားကြပြီ ..."
"ဘာ ..."
ရွိုင်း၏ မျက်နှာမှာ ဖြူလျော်သွားတော့သည်။
သတ္ထုတွင်းပညာရှင်ဟု ပြောထားသည့် လူငယ်လေးမှာလည်း မြေကြီးပေါ် လဲကျသွားတော့သည်။
"စောစောက ငလျင်လှုပ်သွားတာ အံ့ဩစရာ မရှိတော့ဘူးပဲ သူတို့က သတ္ထုတွင်းတွေ အကုန်လုံးကိူ တူးထုတ်သွားကြပြီပေါ့ ဒီဂြိုဟ်တော့ ..."
"မတော်တဆမှု တစ်ခုခုသာမရှိရင် ကြယ်ဓားပြတွေက စစ်တပ်ကို ဟန့်တားဖို့အတွက် ဂြိုဟ်ကို တစ်ခုခု ကြံစည်ခဲ့ကြမှာပဲ အခု ဒီဂြိုဟ်က သေချာပေါက် တစ်စစီ ပေါက်ကွဲထွက်တော့မှာ ..."
အနီးအနားရှိ မိုင်းတွင်းများမှ လူများပါ စုဝေးလာကာ ယခုလက်ရှိ စကားပြောနေသူသည် စွမ်းအင်ပုံဆောင်ခဲများ ထည့်ထားသော ခြင်းတောင်းကို လွယ်ထားဆဲဖြစ်ကာ စုတ်ပြဲနေသော စစ်ယူနီဖောင်းကို ဝတ်ဆင်ထားသည်။
"ခင်ဗျားက ဘယ်သူလဲ ဘာဖြစ်လို့ ဒီလိုပြောနိုင်တာလဲ ..."
သက်လတ်ပိုင်းအမျိုးသားက ပြောလိုက်သည်။
"ငါက ဒီဂြိုဟ်ရဲ့ တပ်ကြပ်ကြီးလေ ကြယ်ဓားပြတွေဆီမှာ အဖမ်းခံလိုက်ရလို့ သူတို့ခိုင်းတဲ့အတိုင်း မိုင်းတူးပေးနေရတာ ..."
စစ်ယူနီဖောင်းနှင့် အမျိုးသားက ခါးသက်စွာ ပြုံးလိုက်သည်။
"သူတို့နဲ့ပတ်သက်ပြီး ငါသိတာက မများပေမယ့် နည်းလည်း မနည်းဘူးလေ ..."
"တကယ်သာဆို စစ်တပ်က ဒီကို လာနေလောက်ပြီ သူတို့က ကျွန်တော်တို့ကို အဆုံးရှုံးခံမှာ မဟုတ်ဘူး ..."
ရွိုင်းက ပြောလိုက်သည်။
"မင်းပြောတာ ဟုတ်တယ် နာမည်ဘယ်လိုခေါ်လဲ ..."
တပ်ကြပ်ကြီးက သူ့ကို မေးလိုက်သည်။
"ကျွန်တော့်နာမည်က ရွိုင်းပါ ခင်ဗျားကရော ..."
"ငါ့နာမည်က Cohen ပါ ..."
တပ်ကြပ်ကြီးက သွားဖြူဖြူတို့ကို လှစ်ဟကာ ပြုံးပြလာသည်။
ကျောက်လင်းယွီ၏ ယာဉ်ပျံ အနားကပ်လာချိန်တွင် ထိုဂြိုဟ်နှင့်ပတ်သက်၍ တစ်ခုခု မှားယွင်းနေသည်ကို တွေ့လိုက်ရသည်။
ဒီဂြိုဟ်က တစ်စစီ ပေါက်ကွဲထွက်တော့မှာ ...
စကြ၀ဠာထဲတွင် တစ်စစီ ပေါက်ကွဲထွက်ကာ ဥက္ကာခဲအစုအဝေးအဖြစ် ပြောင်းသွားသော ဂြိုဟ်များ အမြောက်အများ ရှ်ိသော်ငြား ဤဂြိုဟ်တွင်တော့ အသက်ရှင်နေသူ သုံးသန်း ရှ်ိနေသေးသည်။
"တစ်ယောက်လောက် ဂြိုဟ်ရဲ့ ပေါက်ကွဲနှုန်းကို တိုင်းတာပြီး ဂြိုဟ်ပေါ်က ဆက်သွယ်ရေးလိုင်းတွေအားလုံးကို ထိန်းချုပ်လိုက် ပင်မသင်္ဘောရှစ်စီးက အပြင်ကနေ ကာကွယ်ထားမယ် ယာဉ်ပျံတွေက အကုန်ဆင်းပြီးတော့ လူတွေကယ် ..."
အလေးအနက် စဉ်းစားပြီးနောက် ထပ်ဖြည့်ပြောလိုက်သည်။
"ကယ်ဆယ်ခံရတဲ့သူအားလုံးကို အကျဉ်းသားလို့ပဲ သဘောထားရမယ် ..."
လူသုံးသန်းဆိုသည့် အရေအတွက်မှာ များပြားလွန်းသည်။ အကယ်၍ ဤထဲတွင် ကြယ်ဓားပြများပါ ရောနှောပါဝင်နေပါလျှင် ...အကျဉ်းသားအဖြစ် ဆက်ဆံခံရခြင်းကို မကျေနပ်မည့်သူ များပြားနိုင်သော်ငြား ထိုသို့လုပ်မှသာ ပြဿနာဖြစ်ပွားနှုန်းကို လျော့ချနိုင်မည်ဖြစ်သည်။
ရွိုင်း၊ ချိုးကျွမ်း၊ သက်လတ်ပိုင်းအရွယ် ခပ်ဝဝအမျိုးသားနှင့် အနီးဝန်းကျင်ရှိ လူများအားလုံးသည် တပ်ကြပ် Cohen နှင့်အတူ အဖွဲ့ဖွဲ့လိုက်ကြသည်။ သူတို့သည် အနီးဝန်းကျင်ရှိ မီးဖိုချောင်မှ စားစရာအချို့ စုဆောင်းကာ ကယ်ဆယ်ရေးယာဉ်ကို စောင့်ဆိုင်းနေကြသည်။
ထိုအချိန်တွင် ပထမတပ်ဖွဲ့အမှတ်အသားပါ ယာဉ်ပျံများက ကြယ်အမှတ် ၁၂၅၃၄ အနီးတွင် ထွက်ပေါ်လာသည်။
စစ်သင်္ဘောများက ဂြိုဟ်ကို ဝန်းရံထားကာ ကယ်ဆယ်ရေးယာဉ်ပျံများ တစ်ခုပြီးတစ်ခု ဆင်းသက်လာသည်။
ထိုယာဉ်ပျံများကို မြင်လိုက်ချိန်တွင် Cohen က ဝမ်းသာအားရ ထခုန်ကာ ပြောလိုက်သည်။
"ပထမတပ်ဖွဲ့ပဲ မာရှယ်က ငါတို့ကို ကယ်တင်ဖို့ ရောက်လာပြီ ..."
"ငါသိနေတယ် ငါသိနေတယ် မာရှယ်က ငါတို့ကို သေချာပေါက် လာကယ်မယ်ဆိုတာ သိနေတယ် ..."
ဗိုက်ပင် အနည်းငယ်ချပ်စပြုနေသော ခပ်ဝဝအမျိုးသားက အစာကြမ်းကို ပါးစပ်ထဲ အတင်းထိုးထည့်ရင်း ပြောလိုက်သည်။ သူ့စကားများမှာ အနည်းငယ် ပြတ်တောင်းပြတ်တောင်း ဖြစ်နေသော်ငြား စိတ်လှုပ်ရှားနေသော အမူအယာကိုမူ အတိုင်းသား မြင်နေရသည်။
ရွိုင်းက လက်သီးကို တင်းတင်းဆုပ်ပြီး အနီးဝန်းကျင်ရှိလူများ ကျောက်လင်းယွီကို ကျေးဇူးတင်နေသည်ကို အောင့်အည်းသည်းခံကာ နားထောင်နေရသည်။
ကြယ်ဓားပြများ ပိတ်ဆို့ထားသည့် ဆက်သွယ်ရေးလိုင်းများမှာလည်း ပထမတပ်ဖွဲ့၏ အကူအညီဖြင့် ပြန်လည်အသုံးပြု၍ ရသွားလေပြီ။ ဂြိုဟ်ပေါ်တွင် ရှိနေသူတိုင်း ပထမတပ်ဖွဲ့၏ အသံကို ကိုယ်ပိုင်ဆက်သွယ်ရေးစက်မှတစ်ဆင့် နားထောင်နိုင်ကာ ပေးပို့လာသော ရုပ်ပုံများကိုလည်း ကြည့်ရှုနိုင်သည်။
"ကြယ်အမှတ် ၁၂၅၃၄ မှာ ရှ်ိနေတဲ့သူ အားလုံးပဲ နားထောင်ပေးကြပါ ဒီဂြိုဟ်က ပေါက်ကွဲထွက်တော့မယ့် အခြေအနေနဲ့ ကြုံနေရပါပြီ ကျွန်တော်တို့က ကယ်ဆယ်ရေးလုပ်ငန်းစဉ်တွေကို ချက်ခြင်း လုပ်ဆောင်နေတဲ့အတွက် ဒီဂြိုဟ်ကနေ ထွက်ခွါနိုင်ဖို့ ကယ်ဆယ်ရေးဆုံမှတ်ဆီ အရောက်သွားပြီး ယာဉ်ပျံပေါ် တက်ပေးကြပါ လူပြုံတိုးတာတွေ မဖြစ်အောင်လည်း အတတ်နိုင်ဆုံး ဂရုစိုက်ပေးကြဖို့ တောင်းဆိုပါရစေ ..."
ဂြိုဟ်ပျက်သုဉ်းတော့မည့်သတင်းကို အတည်ပြုလိုက်သည်နှင့်တစ်ပြိုင်နက် လူအားလုံးမှာ ပူပန်သောကရောက်ကုန်ကြတော့သည်။
"အခု ကယ်ဆယ်ရေးလုပ်ငန်းကို ပထမတပ်ဖွဲ့ကနေ တာဝန်ယူထားတဲ့အတွက် တစ်ဦးတစ်ယောက်မှ မကျန်ရစ်လေရအောင် အစွမ်းကုန် ကြိုးစားပေးနေပါတယ် အဲဒါကြောင့် စည်းကမ်းဖောက်ဖျက်တာ ဒါမှမဟုတ် ပြဿနာရှာတာမျိုးကို လုံးဝ သည်းခံနေမှာ မဟုတ်ပါဘူး ..."
xxxxxxxxxx