MM Story Teller

Ch 3

Viewers 2k

🍃 Chapter 3

ပြန်လည်ရှင်သန်ခြင်း(Part 3)

ရွှေဖြူရောင်ကတ်က သူ၏သက်သေခံကတ်ပြားဖြစ်သည်ကို ကျိရန် နောက်ဆုံး၌ သဘောပေါက်လိုက်သည်။ သူက မွေးဖွားလာရုံမျှသာ ရှိသေးသောငြား မျိုးရိုးဗီဇခွဲခြားစစ်ဆေးခြင်းကို လုပ်ရရုံသာမက သက်သေခံကတ်ပြား ပြုလုပ်ရန် သူ၏လက်ဗွေရာများကိုလည်း အသုံးပြုရသေးပေသည်။ ဤကမ္ဘာကြီးက အမှန်တကယ်ကို ထူးဆန်းလှသည့် ကမ္ဘာကြီးပင်။

လူအုပ်စုကြီးက အချက်အလက် အမျိုးအစားပေါင်းစုံကို စာရင်းသွင်းရန် မွေးကင်းစမင်းသားလေးပတ်ပတ်လည်တွင် စုဝေးလိုက်ကြပြီး သူတို့၏အလုပ်ပြီးသည့်နောက် ထွက်သွားကြကာ နေရာ၌ ကလေး၊ ဧကရာဇ်နှင့်ဘုရင်မ သုံးယောက်တည်းကိုသာ ချန်ထားခဲ့လိုက်ကြသည်။

ဘုရင်မအန်နာက ထင်ထင်ရှားရှားပင် သူမ၏သားတော်လေးအား ချစ်မြတ်နိုးနေပြီး သူမလက်မောင်းထဲရှိသူ့ကို ငြင်သာနူးညံ့စွာ ချော့မြူနေလေ၏။

တစ်ဖက်တွင် ဧကရာဇ်ထရန့်က အလွန်မပျော်မရွှင်ဖြစ်နေပုံ ပေါ်လေသည်။ ဘုရင်မလက်ထဲရှိ ကလေးလေးက သူ၏မျက်လုံးလေးများကို ဖွင့်ပြီး ပတ်ပတ်လည်ကို စပ်စုနေသည်ကို မြင်ချိန်တွင် မနေနိုင်ဘဲ လက်ဆန့်ကာ ကလေးလေး၏ခေါင်းကိုထိ၍ သက်ပြင်းချလိုက်သည်။

"ဘာများဖြစ်လို့ပါလဲ အရှင်..."

အန်နာက ဧကရာဇ်သက်ပြင်းချသည်ကို မြင်ချိန်တွင် တုံ့ဆိုင်းဆိုင်းဖြင့် မေးလိုက်သည်။

"ရှီဝိန့်က အိုမီဂါတစ်ယောက်ပဲ...ရှင်...ရှင်အဲ့ဒါကို သဘောမကျဘူးလား..."

ထရန့်က တခဏမျှကြာအောင် နှုတ်ဆိတ်နေခဲ့ပြီး နောက်ဆုံးမှ တိုးတိုးလေး ပြောလိုက်သည်။

"ဘယ်လိုလုပ်ဖြစ်နိုင်မှာလဲ...သူက ကိုယ်တို့ရဲ့ ပထမဆုံးကလေးပဲလေ...ကိုယ်သေချာပေါက် ချစ်တာပေါ့ .."

ထိုအခါမှသာ ဘုရင်မအန်နာ စိတ်သက်သာရာရသွားပြီး သူမလက်မောင်းထဲရှိ ကလေးငယ်၏လက်သေးသေးများကို ညင်သာစွာ ဆုပ်ကိုင်လိုက်သည်။ ဤသည်ကိုမြင်ပြီး ထရန့်လည်း မနေနိုင်ဘဲပြုံးလိုက်ကာ လက်ဆန့်ထုတ်၍ သူ့မိန်းမနှင့်ကလေး၏လက်ကို လက်အကြီးကြီးဖြင့် အုပ်ကိုင်လိုက်တော့သည်။

ဤမြင်ကွင်းမှရသည့် ခံစားချက်က အလွန်ထူးဆန်းပေ၏။ ကလေးငယ်၏လက်ကို မိခင်က ညင်သာစွာဆုပ်ကိုင်ထားကာ ဖခင်၏သန်မာနွေးထွေးသည့်လက်ဖဝါးကြီးက အပြင်မှ အုပ်ကိုင်ထားပြီး လက်များက အတူတကွ ချိတ်ဆက်နေကြသည်။

မိသားစုရှိတဲ့ခံစားချက်က ဒီလိုလား...

ကျိရန် စိတ်လှုပ်ရှားသွားရသည်။ ဘုရားသခင်က သူ့အား မျှမျှတတ ဆက်ဆံပေးခဲ့သည်။ ကားအက်စီးဒင့်တစ်ခု ဖြစ်ပြီးနောက် သူ့အား နောက်တစ်ကြိမ် ရှင်သန်ရန် အခွင့်အရေးပေးခဲ့ရုံမက သူတစ်ကြိမ်မှ မရခဲ့ဖူးသည့် မိသားစုကိုလည်း နောက်ဆုံး၌ ရှိခွင့်ပေးခဲ့သည်။

ယခင်ဘဝတွင် သူက မိဘမဲ့ဂေဟာတစ်ခုမှာ ကြီးပြင်းလာခဲ့ရပြီး မိဘအရင်းများက မည်သူမည်ဝါမှန်း မသိခဲ့ရချေ။ ထို့ကြောင့် အိမ်ကပေးသည့် နွေးထွေးသည့်ခံစားချက်ဆိုသည်ကို မရခဲ့ဖူးချေ။ ငယ်စဥ်ကလေးဘဝအရွယ်က အခြားကလေးများကို သူတို့၏မိဘများနှင့် အတူတွဲတွေ့ရသည့်အချိန်တိုင်း သူအမြဲလိုလို မနာလိုဖြစ်ခဲ့သည်။ သူအရွယ်ရောက်လာချိန်တွင် မိဘများကို ရှာခဲ့သော်ငြား နောက်ဆုံးတွင် မည်သည်မှ မတွေ့ခဲ့ရချေ။

အဖေမရှိ၊ အမေမရှိ...

ယင်းက သူ့ဘဝ၏အနက်ရှိုင်းဆုံးသော နောင်တတရားပင်။

ယခုမူ သူက ကလေးတစ်ယောက် ဖြစ်လာခဲ့သည်။ ဤသည်က မည်ကဲသို့ ကမ္ဘာမျိုးဖြစ်နေပါစေ ကိစ္စမရှိပေ။ အနည်းဆုံးတော့ သူ၏ကိုယ်ပိုင်အဖေနှင့်အမေကို နောက်ဆုံး၌ ရရှိခဲ့ပြီပင်။

သူ့မူလဘဝတွင် လောလောလတ်လတ်မှ ရရှိထားသည့် အကောင်းဆုံးသရုပ်ဆောင်ဆုကဲ့သို့ လက်လွှတ်ရန် စိတ်အဆင်သင့်မဖြစ်သေးသည့် မပြီးပြတ်သေးသော လုပ်ငန်းကိစ္စများ အများကြီး ကျန်နေသေးသော်ငြား သူ့၌ အခြားရွေးချယ်စရာမရှိပေ။ မူလဘဝကို ဘယ်လိုပြန်သွားရမည်လဲ သူ မသိပေ။ ထို့ပြင် သူက ယခုမှ မွေးဖွားလာသည့် မွေးကင်းစကလေးလေးအရွယ်ပဲ ရှိနေသေးကာ "အကြီးဆုံးမင်းသား"ဟူသည့် သရုပ်လည်း ရှိနေသေးပေ၏။ အကယ်၍ တစ်ယောက်ယောက်က သူနှင့်ပတ်သက်ပြီး တစ်စုံတစ်ရာ မှားယွင်းနေသည်ကို ရှာတွေ့သွားပါက သုတေသနခန်းတွင်းသို့ ဆွဲခေါ်ခံရပြီး အလွှာပါးပါးလှီးကာ ဖွင့်ထုတ်ခံရနိုင်ခြေ ရှိပေသည်။

အခု ငါလုပ်ဖို့လိုတာက အစကပြန်စဖို့ပဲ...လုပ်လိုက်ကြတာပေါ့...

ကျိရန်အကောင်းမြင်စိတ်ဖြင့် တွေးလိုက်သည်။ ပြောရပါက သူ့ယခင်ဘဝတွင် အခန်းကဏ္ဍမျိုးစုံကို ကျိရန် သရုပ်ဆောင်ဖူးလေသည်။ ယခုလိမ္မာသည့် ကလေးလေးအဖြစ် သရုပ်ဆောင်ရန်မှာ မခက်ခဲနိုင်ပါချေ။

သို့ပေမည့် "အိုမီဂါ" ဟူသည့်အဓိပ္ပါယ်က ဘာလဲဆိုသည်ကို တတ်နိုင်သမျှမြန်မြန် သူသိမှဖြစ်ပေမည်။

ကျိရန်က"အိုမီဂါ"မှန်း သိလိုက်ရပြီးနောက် ဧကရာဇ်အဖေက အလွန်မပျော်မရွှင် ဖြစ်သွားပုံပေါ်သည်ကို သူ မြင်နိုင်ပေသည်။

×××××

ကလေးလေး၏ဘဝက မယုံနိုင်စရာကောင်းလောက်အောင်ပင် အလွန်ပျင်းဖို့ကောင်းပေ၏။ စားလိုက်၊အိပ်လိုက်မှလွဲ၍ အခြားမည်သည်မှ လုပ်စရာမရှိပေ။ ကံကောင်းထောက်မစွာဖြင့် ကျိရန်က အလိုက်သင့်ကောင်းကောင်း နေထိုင်နိုင်စွမ်းရှိသည့် သရုပ်ဆောင်တစ်ယောက်ပင်။ ထို့ကြောင့် မကြာမီမှာဘဲ သူ၏"ရှီဝိန့်"ဟူသော အမည်အသစ်နှင့် "ပထမမင်းသား"ဟူသည့်သူ၏သရုပ်မှန်အသစ်ကို ကျင့်သားရသွားလေသည်။ သူ မနေ့ကကြားခဲ့သည့် စက်ရုပ်အမျိုးသမီးအသံက ဘယ်ကလာလဲဆိုသည်ကို သိသွားပြီပင်။ ယင်းကအမှန်တကယ်တွင် ဘုရင်မအန်နာ၏ AI အိမ်စေ ပေါအာဖြစ်ပေ၏။

ဤကမ္ဘာရှိနည်းပညာက သူ့မူလကမ္ဘာထက်ပင် ပိုမိုဖွံ့ဖြိုးတိုးတက်နေပြီးဖြစ်ကာ သူစိတ်ကူးထားသည်ထက်ပင် ကျော်လွန်နေပေ၏။ အိမ်စေပေါအာတွင် လက်တွေ့မြင်နိုင်သည့် ခန္ဓာကိုယ်မရှိဘဲ ဘုရင်မအန်နာ၏နေ့စဥ်ဘဝကို တာဝန်ယူ စောင့်ရန် ဘုရင်မ၏အိပ်ခန်းတွင်းတွင် ထည့်သွင်းထားသည့် လူလုပ်မှတ်ဥာဏ်တုတစ်ခုသာ ဖြစ်ပေသည်။ နေ့တိုင်းသူမက သတ်မှတ်ထားသည့် အချိန်စာရင်းအတိုင်းလိုက်ကာ ဘုရင်မအန်နာ၏အိပ်ရာဘေးသို့ အာဟာရဖြစ်ဖွယ် အစားအသောက်များကို လက်တွန်းလှည်းလေးဖြင့် ပို့ပေးမည်ဖြစ်သည်။ ထို့ပြင် တစ်စုံတစ်ယောက်က အခန်းနားကပ်လာသည့်အခါတွင် လျှပ်စစ်ကာကွယ်ရေးစနစ်ကို အသက်သွင်းလိုက်မည်ဖြစ်ကာ ဘုရင်မအား မနှောင့်ယှက်နိုင်စေရန် ကာကွယ်ပေးလိမ့်မည် ဖြစ်သည်။ အကယ်၍ အခြားသူများက ဘုရင်မထံ အလည်လာချင်လျှင် ဘုရင်မအန်နာ၏သဘောတူချက်ကို ဦးစွာယူရန်လိုအပ်ပေသည်။ ထိုအခါမှသာ ပေါအာက သူတို့အတွက် တံခါးဖွင့်ပေးလိမ့်မည် ဖြစ်သည်။

ထို့ပြင် မည်သည့်လှုပ်ရှားမှူမျိုးကို ဘုရင်မအန်နာလုပ်ချင်သည်ဖြစ်စေ ပေါအာက သူမကို ကူညီပေးလိမ့်မည်ပင်။

ဥပမာအနေဖြင့် ဘုရင်မအန်နာက သူမ၏ကလေးနှင့်နေပူဆာလှုံချင်သည်ဆိုပါက ပေါအာက ဝရံတာတံခါးကိုဖွင့်ကာ ထိုင်ရန်ကုလားထိုင်များကို ပြင်ဆင်ပေးလိမ့်မည် ဖြစ်သည်။ ဘုရင်မအန်နာက ပူသည်ဟုခံစားရပါက ပေါအာက အခန်းအပူချိန်ကို ချက်ချင်းချပေးလိမ့်မည်ပင်။ အကယ်၍ ဘုရင်မက အသီးစားချင်ပါက လှီးဖြတ်ထားသည့် အသီးများပါသည့် လက်တွန်းလှည်းလေးကို ချက်ချင်းပို့ပေးလိမ့်မည်သာဖြစ်၏။

ယင်းက အလွန်အံ့သြစရာကောင်းသည်ဟု ရှီဝိန့်ကတွေးလိုက်သည်။ ဘုရင်မအန်နာက အလွန်ပျော်ရွှင်ကျေနပ်ဖွယ်ကောင်းသည့်ဘဝတွင် နေထိုင်နေခြင်းဖြစ်သည်။ သူမလိုချင်သမျှ မည်သည့်အရာမဆို ရနိုင်ပြီး နေ့ရက်တိုင်းကို နတ်ဘုရားမသဖွယ် နေထိုင်နိုင်ပေ၏။ သို့သော် တစ်ဖက်တွင်မူ သူမကတစ်နေ့တာလုံးကို နန်းဆောင်တွင်သာ နေထိုင်ရပြီး အပြင်ကမ္ဘာနှင့် သီးခြားဖြစ်လုနီးနီးပင်။ ဧကရာဇ်နှင့် ရံဖန်ရံခါတွေ့ဆုံခြင်းမှလွဲ၍ အခြားသူများနှင့် အပြန်အလှန်ဆက်သွယ်ပြောဆိုမှု မရှိချေ။

ရှီဝိန့်မှာ သီးခြားကွဲထွက်နေသည့် သူ့အမေဖြစ်သူ၏လက်မောင်းထဲတွင်သာ အမြဲနေ'နေရ၍ အပြင်ကမ္ဘာနှင့်ပတ်သက်၍ ပိုလေ့လာရန်မှာ ဖြစ်နိုင်ချေမရှိချေ။ ထို့ကြောင့် သူသိသည်မှာ ဘုရင်မအန်နာနှင့်ဧကရာဇ်ထရန်း၏သားဦး၊ အင်ပါယာ၏ပထမဆုံးမင်းသားဖြစ်ပြီး အိုမီဂါတစ်ယောက် ဖြစ်နေသည်ကိုသာ သိပေသည်။ အခြားအရာများကိုမူ သူ မသိနေဆဲဖြစ်ပြီး အိုမီဂါက မည်သည့်အဓိပ္ပါယ်မှန်းကိုပင် သူ မရှင်းလင်းသေးချေ။

ရှီဝိန့် ဤကမ္ဘာထဲရောက်ပြီးနောက် ခုနှစ်ရက်အကြာတွင် နန်းဆောင်ကြီးက သူ့ပထမဆုံးဧည့်သည်ကို ရရှိလိုက်သည်။

ထိုအချိန်က ရှီဝိန့်မှာ ဘုရင်မအန်နာ၏လက်မောင်းထဲတွင် ပွေ့ဖက်ခံထားရပြီး သူ၏အာဟာရနို့ရည်ကိုသောက်သုံးနေစဥ်တွင် ပေါအာက ရုတ်တရက် အမျိုးသမီးစက်ရုပ်သံဖြင့် ပြောလိုက်သည်။

"ဘုရင်မ...မင်းသားဘာ့ဂျ်က ဘုရင်မကို တွေ့ချင်နေပါတယ်..."

အန်နာက အံ့သြသွားပြီး ပြောလိုက်သည်။

"ဘာ့ဂျ်က ပြန်လာပြီလား...ဝင်ခွင့်ပြုလိုက်ပါ..."

မင်းသားဘာ့ဂျ်က ဘယ်သူလဲ...

ရှီဝိန့်က သူ့ခေါင်းလေးကို စပ်စပ်စုစုဖြင့် လှည့်ကာ မျက်လုံးလေးများဖွင့်၍ တံခါးဝကို မျှော်ကြည့်လိုက်သည်။ မကြာမီမှာပင် ပိန်ပါးသွယ်လျသည့်အမျိုးသားတစ်ယောက်က တံခါးပေါက်မှဝင်လာသည်ကို မြင်လိုက်ရသည်။ အမျိုးသားက အလွန်တရာ ပေါ့ပေါ့ပါးပါးဖြစ်သည့် ရိုးရှင်းလှသောအဖြူရောင်ရှပ်အင်္ကျီနှင့် ဘောင်းဘီရှည်ကိုသာ ဝတ်ဆင်ထားပြီး ညင်သာ၊ကြင်နာသည့် အပြုံးတစ်ပွင့်ကို ဆင်မြန်းထားလေ၏။

"ဘုရင်မက ရှီဝိန့်ကိုစောမွေးလာတယ်လို့ ကျွန်တော်ကြားတော့ နန်းတော်ကို ပြန်ရောက်ခါစပဲရှိသေးတယ်...ဒါ့ကြောင့် ကျွန်တော် အခုသူ့ကိုလာကြည့်တာပါ..."

အမျိုးသား၏အသံက နူးညံ့ညင်သာပြီး ဘုရင်မနှင့်နှစ်မီတာအကွာတွင် မတ်တတ်ရပ်ကာ သူမ၏လက်မောင်းထဲရှိ ကလေးငယ်လေးကို ကြည့်လိုက်သည်။ အမျိုးသားက အလွန်နူးညံ့ညင်သာသော်ငြား အနည်းငယ်မျှပင် အားနည်းပျော့ညံ့ပုံမပေါ်ဟု ရှီဝိန့် တွေးလိုက်မိသည်။ အမျိုးသားတွင် လူများကို နွေဦးလေပြေညှင်းလေးများ တိုက်ခတ်ပြီး ငြိမ်ချမ်းကာ စိတ်သက်သာရာ ရစေနိုင်စွမ်းရှိသည့် ညင်သာကြင်နာသည့် စိတ်ခံစားချက်မျိုး ရှိလေသည်။

အမျိုးသားက သူ့အကြည့်ကို ဘုရင်မထံပြောင်းကာ ပြုံး၍ ပြောလိုက်သည်။

"ဘုရင်မ ရုတ်တရက်ကြီး စောမွေးလိုက်မိသွားတာ ခန္ဓာကိုယ်က အဆင်ပြေရဲ့လား..."

ဘုရင်မအန်နာက ပြုံးကာဖြေလိုက်သည်။

"ဒီစောမွေးလိုက်တာလွဲလို့ အဆင်ပြေပါတယ်...မတော်တဆ နည်းနည်းရှိခဲ့ပေမဲ့လည်း ကလေးလေးက ကျန်းမာတယ်လေ...မင်းသူ့ကို ချီကြည့်ချင်လား..."

"ဟုတ်ကဲ့ ကျေးဇူးပြုပြီး..."

ဘာ့ဂျ်က လက်ဆန့်ထုတ်ကာ ကလေးကို ချီလိုက်ပြီး ယခုအခါ သူ့လက်မောင်းထဲတွင်ရှိသည့် ကလေးလေးကို ငုံ့ကြည့်လိုက်သည်။

"ဒီကလေးလေးမှာ မျက်လုံးကြီးကြီးလေးတွေရှိတာပဲ...အဲ့မျက်လုံးလေးတွေက အရမ်းအသက်ဝင်နေတယ်..."

ဘုရင်မကပြုံးကာ ပြောလိုက်သည်။

"မ်ငးအစ်ကိုတော် ဧကရာဇ်က ဒီကလေးက မင်းနဲ့အရမ်းတူတယ်လို့ ပြောတယ်...မင်းတို့နှစ်ယောက်လုံးက အိုမီဂါတွေလေ...ဒါပေမဲ့မင်းမွေးလာတုန်းက မင်းရဲ့စိတ်စွမ်းအားထက် 100 ကျော်တယ်..."

"တကယ်လား...သူ့စိတ်စွမ်းအားကလည်း အရမ်းမြင့်တာပဲ..."

ဘာ့ဂျ်က တွေးတွေးဆဆနှင့် ရှီဝိန့်၏ခေါင်းလေးကိုကိုင်ကာ မေးလိုက်သည်။

"အစ်ကိုတော်ကဘယ်မှာလဲ..."

"ဧကရာဇ်က အခုတလော အရမ်းအလုပ်များနေတာ...စစ်တပ်ထဲမှာ တစ်ခုခုဖြစ်နေတဲ့ပုံပဲ...သူ့ကိုမတွေ့ရတာ ရက်တော်တော်ကြာနေပြီ..."

"အိုး..."

ဘာ့ဂျ်က ကလေးလေးကို ငုံ့ကြည့်ပြီး အချိန်အတန်ကြာအောင် တိတ်ဆိတ်သွားခဲ့သည်။ ထို့နောက်ပြောလိုက်သည်။

"ဟုတ်သားပဲ...ကျွန်တော်ာ့မှာ ရှီဝိန့်အတွက် လက်ဆောင်သေးသေးလေးတစ်ခု ရှိတယ်..."

သူက အိတ်ကတ်ထဲမှ ငွေရောင်လည်ဆွဲတစ်ခုကိုထုတ်ယူလိုက်သည်။ လည်ဆွဲပေါ်တွင် အပြာရောင်ရေစက်သဏ္ဍာန် ဆွဲသီးတစ်ခုရှိနေပြီး အလင်းရောင်ထဲတွင် ယင်းကနူးညံ့သည့်အရောင်များ ထုတ်လွှတ်နေခဲ့ပြီး လည်ဆွဲအား အလွန်အင်မတန် လှသွားစေခဲ့သည်။

"ဒါက ကာကွယ်ရေးအဆောင်တစ်ခုပဲ...ဒါလေးက ရှီဝိန့်ကို ကံကောင်းမှုတွေ ယူဆောင်လာပေးလိမ့်မယ်လို့ ကျွန်တော်မျှော်လင့်ပါတယ်..."

ဘာ့ဂျ်က ကလေးလေး၏လည်ပင်းတွင် လည်ဆွဲကို ဆွဲပေးလိုက်ပြီး ကလေးကို ဘုရင်မအန်နာထံ ပြန်ပေးလိုက်သည်။

ဘုရင်မအန်နာက သူမသားကိုဖက်ပြီး လက်သေးသေးလေးကို ဆုပ်ကိုင်ကာ ပြောလိုက်သည်။

"ရှီဝိန့်...ဦးလေးကို လက်ဆောင်ပေးတဲ့အတွက် ကျေးဇူးတင်လိုက်နော်..."

ရှီဝိန့်က သူ့ကျေးဇူးတင်မှုကို ဖော်ပြရန် သူ့လက်သေးသေးလေးကို ယမ်းလိုက်သည်။

အန်နာက မရယ်မောဘဲ မနေနိုင်တော့ပေ။

"လိမ္မာတဲ့ကလေးလေးပဲ...အရမ်းထက်မြက်တယ်..."

သို့သော်ငြား ထိုအခိုက် ဘာ့ဂျ်၏အကြည့်က ရုတ်တရက် စူးစိုက်သွားပြီး အန်နာ၏လက်မောင်းထဲရှိကလေးလေးကို ကြည့်ကာ မေးလိုက်သည်။

"သူက ကျွန်တော်တို့ပြောတာတွေကို နားလည်နိုင်တာလား..."

အန်နာက မျက်မှောင်ကြုတ်လိုက်သည်။

"ဘယ်လိုလုပ်ဖြစ်နိုင်မှာလဲ...သူက လွန်ခဲ့တစ်ပတ်ကမှ မွေးလာတာလေ...သူနားလည်ဖို့က မဖြစ်နိုင်ပါဘူး..."

ဘာ့ဂျ်က စကားမပြောဘဲ ရှီဝိန့်ကိုသာ စူးစိုက်ကြည့်

နေလေသည်။

ရှီဝိန့်က အနည်းငယ်နောင်တရသွားသည်။ ဤဦးလေးက အလွန်မရိုးရှင်းပုံပင်။ ရှီဝိန့်က မသိစိတ်အလျောက် တုံ့ပြန်လိုက်ခြင်း ဖြစ်သော်ငြား သူက အမှန်တကယ်ပင် တစ်ခုခု မူမမှန်နေသည်ကို အာရုံခံလိုက်နိုင်လေ၏။ ယင်းကိုတွေးပြီး ရှီဝိန့်က ချက်ချင်းလက်ငင်းပင် လက်နှစ်ဖက်လုံးကို သူ့ဦးလေးရှိရာထံဆန့်ထုတ်ပြီး ယမ်းကာ "ပွေ့ဖက်ချင်နေသည့်"လက်ဟန်အမူအရာ လုပ်ပြလိုက်သည်။

ဤတုံးအအနိုင်သော်ငြား ချစ်စဖွယ်ကောင်းသည့် အမူအရာကိုမြင်ပြီး ဘာ့ဂျ်လည်း မရယ်ဘဲမနေနိုင်တော့ချေ။

"ဟုတ်တယ်...ကျွန်တော် အတွေးလွန်သွားတာနေမှာပါ...ဘုရင်မ ကျွန်တော် အခုပြန်တော့မယ်...သူ့ကိုတွေ့ဖို့ နောက်တစ်ရက်ရက်မှ ပြန်လာပါ့မယ်..."

သူ့ဦးလေး ထွက်သွားသည့်အခါမှသာ ရှီဝိန့်နောက်ဆုံး၌ စိတ်သက်သာရာ ရသွားသည်။ သူ့လက်လေးများကို နောက်ပြန်ဆုတ်လိုက်ပြီး သူ့အမေဖက်ထားသည့်ထဲကို ပြန်လည်ပူးကပ်တိုးဝှေ့နေလိုက်သည်။

ဘုရင်မအန်နာထံမှလာသည့် ညင်သာသည့် ခံစားမှုကို သူအမှန်ပင် သဘောကျပေ၏။ ဤထူးဆန်းသည့် လောကကြီးထဲ ရှိနေချိန်တွင် မိခင်၏ပွေ့ဖက်မှုထဲတွင် ရှိနေရသည်က သူ့ကို ရှားရှားပါးပါး စိတ်ချလုံခြုံသည့် ခံစားချက်ကို ခံစားရစေလေ၏။

မတိုင်မီက လူကြီးနှစ်ယောက်၏စကားဝိုင်းမှတစ်ဆင့် အန်ကယ်ဘာ့ဂျ်က ဧကရာဇ်၏ညီတော်၊ သူ့ဦးလေးအရင်းဖြစ်သည်ကို သိလိုက်ရသည်။ သူ့ဦးလေးသည်လည်း အိုမီဂါတစ်ယောက်ဖြစ်ပြီး သူ၏ပိုမိုနူးညံ့သိမ်မွေ့သည့် အသွင်အပြင်မှလွဲ၍ အခြားယောကျ်ားတွေနှင့် မည်သည်မှ ခြားနားချက်ရှိပုံ မပေါ်ပေ။

ဒီတော့ မွေးပြီးပြီးခြင်း စစ်ဆေးခံရတဲ့အကြောင်းကဘာလဲ...အိုမီဂါနဲ့အယ်လ်ဖာကြားက ကွာခြားချက်ကဘာလဲ...

ရှီဝိန့်က နားမလည်ဘဲ ရှေ့ဆက်တွေးတောရန် အလွန်ပင် ပင်ပန်းနွမ်းနယ်လွန်းသွားပြီပင်။ ထို့ကြောင့် မျက်လုံးလေးများကိုသာမှိတ်ပြီး အိပ်လိုက်တော့သည်။

***

Prev Next