MM Story Teller

Ch 5

Viewers 2k

🍃 Chapter 5

အမှန်တရား (Part 2)

စာအုပ်ကပြောထားသည်မှာ စကြဝဠာထဲသို့ ပြောင်းရ၊ရွှေ့ရသည့် ရှည်လျားကြာမြင့်လှသော အချိန်ကာလအတွင်းတွင် ပတ်ဝန်းကျင်နှင့် လိုက်လျောညီထွေ နေနိုင်စေရန် လူသားများက ရုပ်ပိုင်းဆိုင်ရာ ပြောင်းလဲမှုများ ကြုံခဲ့ရပြီး ရလဒ်အနေဖြင့် အယ်လ်ဖာ၊ ဘီတာ၊ အိုမီဂါဟူ၍ လိင်များထပ်မံ ကွဲထွက်သွားခဲ့သည်။

အယ်လ်ဖာများက သဘာဝခေါင်းဆောင်များဖြစ်ပြီး သန်မာကာ စိတ်စွမ်းအားမြင့်ပြီး လွှမ်းမိုး၊ချုပ်ကိုင်ရသည်ကို နှစ်သက်ပေ၏။ ဗိုလ်ချုပ်အများစုနှင့် အင်ပါယာအုပ်ချုပ်သူများက အလ်ယ်ဖာများ ဖြစ်ပြီး လူသားမျိုးနွယ်ထဲတွင် အကောင်းဆုံးခေါင်းဆောင်များ ဖြစ်ကြသည်။ သို့သော် အယ်လ်ဖာများက သန္ဓေမတည်နိုင်ဘဲ သားသမီးများမမွေးဖွားနိုင်၍ ဘီတာ သို့မဟုတ် အိုမီဂါများနှင့် တွဲဖက်ကြရမည်ပင်။

ဘီတာက လူဦးရေအများဆုံးဖြစ်ပြီး သူတို့က မျိုးပွားနိုင်စွမ်းရှိသော်ငြား မွေးဖွားနှုန်းက အလွန်နိမ့်ပေ၏။ ကလေးမွေးဖွားရသည့် ဖြစ်စဥ်ကလည်း အလွန်တရာခက်ခဲကာ မွေးလာသည့်ကလေးများကလည်း သေနှုန်းမြင့်ပေသည်။

အိုမီဂါများက ရာခိုင်နှုန်း အနည်းငယ်မျှသာ ရှိသော်ငြား မွေးဖွားနိုင်စွမ်းက အမြင့်ဆုံးပင်။ အယ်လ်ဖာများနှင့် တွဲဘက်ဖြစ်သည့် အိုမီဂါများက သန့်စင်သည့်သွေးနှင့် စွမ်းအားကြီးသည့် သားသမီးများကို မွေးဖွားပေးနိုင်စွမ်း ရှိလေသည်။ အိုမီဂါများက 18 နှစ်ပြည့်ပြီး အရွယ်ရောက်လာပြီးသည့်နောက်တွင် နှစ်တိုင်း estrus ကိုကြုံတွေ့ရမည် ဖြစ်သည်။ Estrus ကာလတွင်းတွင် သူတို့၏စိတ်ထိန်းချုပ်နိုင်မှုက လျော့ကျသွားပြီး မသိစိတ်ကအလိုအလျောက် အယ်လ်ဖာတစ်ယောက်၏ပွေ့ဖက်မှု၊ အမှတ်အသားပေးမှုကို လိုချင်တပ်မက်လာလိမ့်မည် ဖြစ်သည်။ အယ်လ်ဖာများကို ဆွဲဆောင်ရန် ချိုမြိန်သည့် ဖယ်ရိုမုန်းများကိုလည်း သူတို့၏ခန္ဓာကိုယ်က ထုတ်လွှတ်ပေလိမ့်မည်။ သန္ဓေတားဆေးမသုံးခဲ့ဘဲ တစ်သက်တာအမှတ်အသားပေးလိုက်ပါက အိုမီဂါတစ်ယောက်၏ ကိုယ်ဝန်ဆောင်နိုင်ခြေက 99% ထိရှိပေ၏။

'အမှတ်အသား'၏အဓိပ္ပါယ်ကို ရှီဝိန့်သံသယဝင်ပြီး စာအုပ်များကို ထပ်မံလှန်လှောကြည့်လိုက်ရာ စာရေးသူက ရိုးရိုးရှင်းရှင်းပင် ပွင့်လင်းမြင်သာလှသည့် ပုံများကို ထည့်သွင်းထားပြီး အယ်လ်ဖာတစ်ယောက်က အိုမီဂါတစ်ယောက်အား အမှတ်အသားပေးသည့် ဖြစ်စဥ်တစ်ခုလုံးကို အသေးစိတ်ကျကျ ရေးသားထားသည်ကို မြင်လိုက်ရတော့သည်။

"ဘန်း..."

ရှီဝိန့် စာအုပ်ကို မြေပေါ်လွှတ်ပစ်လိုက်ပြီး သူ့မျက်နှာက မည်းမှောင်သွားသည်။ ဘုရားသခင်က သူ့ကို စနောက်၊ကျီစယ်နေခြင်းပင် ဖြစ်ရမည်။

ငါ့ကိုယ်ငါ အခုသတ်သေလိုက်ရင် ပြန်ကူးပြောင်းသွားနိုင်သေးလား... ငါ့အရင်ဘဝဟောင်းပဲ ပြန်သွားပြီး သိပ္ပံရုပ်ရှင်တွေ ဆက်ရိုက်လိုက်ချင်တော့တယ်...

အဓိပ္ပါယ်မရှိပါဘူးဆိုတဲ့ ရုပ်ရှင်ဇာတ်ညွှန်းတောင်မှ ဒီလောက်ကြီး တရားလွန်မှာမဟုတ်ဘူးကွ...

သူ ခန့်မှန်းထားသမျှ ယူဆချက်များအားလုံးက မှားနေသည်ကို ရှီဝိန့်ရှာတွေ့လိုက်ရသည်။ စစ်ဆေးထားသည့် ရလဒ်များက သူက အိုမီဂါဟု ပြလိုက်သည့်အချိန်က အိုမီဂါဆိုသည်မှာ စိတ်စွမ်းအားမြင့်မြင့်ဖြင့် မွေးဖွားလာသည့် ကောင််းချီးပေးခံရသည့် ကလေးဟု အကောင်းမြင်စိတ်ဖြင့် သူတွေးမိခဲ့သည်။ ဦးလေးဘာ့ဂျ်က သူ့အား "မင်းလည်း ငါ့လိုနန်းတော်ထဲမှာပဲနေပြီး အရွယ်ရောက်ရင် ဧကရာဇ် ရွေးချယ်ပေးထားတဲ့သူနဲ့ပဲ လက်ထပ်ပြီး ကလေးမွေးရမှာ" ဟုပြောချိန်တွင်လည်း ကလေးမွေးရမည့်သူက အယ်လ်ဖာပင်ဖြစ်လိမ့်မည်ဟု သူအကောင်းမြင်စိတ်ဖြင့် တွေးခဲ့လိုက်သေးသည်။

အကောင်းမြင်စိတ် များလွန်းခြင်းကလည်း မကောင်းကြောင်း ပေါ်ထွက်လာပြီဖြစ်သည်။

အဘယ့်ကြောင့်ဆိုသော် အမှန်တရားက ရက်စက်လှ၍ပင်။

ကလေးမွေးဖွားနိုင်စွမ်းအမြင့်ဆုံးက အိုမီဂါများဖြစ်နေပြီး ရှားပါးရတနာကဲ့သို့ ကာကွယ်ခံရပေ၏။ အရွယ်ရောက်လာလျှင်ပင် နှစ်စဥ်estrus ကာလကိုဖြတ်သန်းရဦးမည်ဖြစ်သည်။ ထို့ပြင်...

သောက်ကျိုးနည်း "အယ်လ်ဖာတွေကိုဆွဲဆောင်ဖို့ ချိုပြီး သွေးဆောင်တဲ့ ဖယ်ရိုမုန်းတွေကို ထုတ်လွှတ်ရလိမ့်မယ်"ဆိုတာက ဘာကြီးလဲ...

ဤသည်မှာ ယခင်က သူ၏လိင်အမျိုးအစားရလဒ်ကို သိသွားချိန်တွင် ဧကရာဇ်၏မပျော်ရွှင်သွားပုံပေါက်သွားရသည့် အကြောင်းအရင်းဖြစ်သည်။ အဘယ့်ကြောင့်ဆိုသော် အိုမီဂါမင်းသားက အယ်လ်ဖာမင်းသားကဲ့သို့ အသုံးမဝင်သည်မှာ သိသာနေ၍ပင်။

အယ်လ်ဖာများက တိုက်ခိုက်ကာ ထီးနန်းကိုဆက်ခံနိုင်ချိန်တွင် အိုမီဂါများကမူ အယ်လ်ဖာတစ်ယောက်ကို လက်ထပ်ရန် အရွယ်ရောက်ချိန်ကိုသာ စောင့်နေပြီး ကလေးများမွေးပေးရုံသာ အသုံးဝင်နေ၍ပင်။

ပြီးတော့ လူ့အဖွဲ့အစည်းရဲ့ဒီလိုပျက်စီးနေတဲ့စည်းကမ်းကို ငါက လိုက်နာဖို့ မျှော်လင့်နေတယ်ပေါ့လေ...

သောက်ကျိုးနည်း....နတ်ဘုရားတွေရဲ့ဦးနှောက်ထဲ ရေဝင်သွားတာလား...

ယင်းက သူ့အား ဇာတ်ညွှန်းတစ်ခုထဲသို့ မှားခေါ်သွားမိခြင်းမျိုး သို့မဟုတ် ရုပ်ရှင်စတူဒီယိုတစ်ခုတွင်းသို့ မှားဝင်သွားမိခြင်းမျိုး ဖြစ်ပါစေဟု ရှီဝိန့်အမှန်တကယ် ဆုတောင်းမိသည်။ သို့သော် ရက်စက်လှသည့်အမှန်တရားက ဤထူးခြားဆန်းကြယ်သည့် ကမ္ဘာကြီးထဲသို့ သူအမှန်တကယ် ရောက်လာသည်ဟု ပြောနေလေသည်။

ဤကမ္ဘာကြီးတွင် အမျိုးသားအယ်လ်ဖာ၊ အမျိုးသမီးအယ်လ်ဖာ၊ အမျိုးသားဘီတာ၊ အမျိုးသမီးဘီတာ၊ အမျိုးသားအိုမီဂါနှင့် အမျိုးသမီးအိုမီဂါဟူ၍ လိင်အမျိုးအစားခြောက်မျိုးရှိပေသည်။ အယ်လ်ဖာများက ကိုယ်ဝန်မဆောင်နိုင်ဘဲ ဘီတာများကလည်း သန္ဓေတည်ရန် ခက်ခဲစဥ်တွင် အိုမီဂါများကမူ သန္ဓေတည်နိုင်စွမ်းအမြင့်ဆုံးပင်။

ဒီတော့...ကိုယ်ဝန်ဆောင်နိုင်တာ မဆောင်နိုင်တာ ယောကျ်ားလေး၊မိန်းကလေးဖြစ်တာနဲ့ မဆိုင်ဘဲ သူတို့ရဲ့ အယ်လ်ဖာ၊ ဘီတာ၊ အိုမီဂါအမျိုးအစားနဲ့ပဲ ဆုံးဖြတ်တာပေါ့လေ...

ရှီဝိန့် သူ၏လောကပေါ်အမြင်က ကမောက်ကမ ဖြစ်သွားသလို ခံစားလိုက်ရသည်။

စာအုပ်ထဲရှိ ပုံများကိုကြည့်ပြီး အနာဂတ်တွင် အယ်လ်ဖာတစ်ယောက်ထံမှ တစ်သက်တာ အမှတ်အသားပေးခံရမည့် သူ့ကိုယ်သူ မြင်ယောင်သွားကာ မနေနိုင်ဘဲ ခိုက်ခိုက်တုန်သွားခဲ့သည်။

အခြားယောကျ်ားတစ်ယောက်ထံမှ ဖိနှိပ်ခံရပြီး မျိုးပွားနိုင်သည့် အိုမီဂါတစ်ယောက်အဖြစ် သူက အမှန်တကယ် ပြောင်းလဲသွားခဲ့ခြင်းပင်။

ဒီလောကကြီးထဲ ဘယ်လိုဆက်နေရတော့မှာလဲ...

***

ထိုစဥ်တွင် ဧည့်ခန်းထဲထိုင်ပြီး e-mailများ ဖတ်နေသည့် ဧကရာဇ်ထရန့်က စာကြည့်ခန်းနှင့် ချိတ်ဆက်ထားသည့် သူ့ရှေ့ရှိစခရင်ကို ကြည့်လိုက်ရာ ရှီဝိန့်က စိတ်ဓာတ်ကျနေသည့်အသွင်ဖြင့် ဆိုဖာပေါ် လှဲနေသည်ကို ရုတ်တရက် မြင်လိုက်ရသည်။

ဧကရာဇ်က ပဟေဠိဖြစ်သွားပြီး ခြင်္သေ့ဘုရင်ကို လှမ်းဆက်သွယ်ကာ မေးလိုက်သည်။

"ရှီဝိန့်ဘာဖြစ်တာလဲ..."

ခြင်္သေ့ဘုရင်၏စက်သံက အလေးအနက်ဖြင့် ဖြေလိုက်သည်။

"ဧကရာဇ်ကို တင်ပြရမယ်ဆိုရင် မင်းသားလေးက စာကြည့်ခန်းထဲက စာအုပ်တချို့နဲ့ ဆော့နေခဲ့တာပါ...ဒါပေမဲ့ သိပ်မကြာခင်က စာအုပ်တစ်အုပ်ကို မြေပေါ်လွှတ်ပစ်လိုက်ပြီး သူကိုယ်တိုင်လည်း လဲကျသွားတာပါ..."

မြေပေါ်တွင် မလှုပ်မလျက် လှဲနေသည့် သူ့သား၏ပုံရိပ်ကို ကြည့်ပြီး ဧကရာဇ်က မနေနိုင်ဘဲ အနည်းငယ် စိတ်ပူသွားခဲ့သည်။

"သူ တစ်နေရာရာ နာသွားလား စစ်ကြည့်လိုက်..."

အမှန်တကယ်တွင် စာကြည့်ခန်းအား ထူထဲ၊နူးညံ့သည့် ကော်ဇောများနှင့် ခင်းထားပြီး ဆိုဖာသည်လည်း နိမ့်ကာ ပြားပေသည်။ ထို့ကြောင့် လဲကျသွားလျှင်ပင် နာလိမ့်မည် မဟုတ်ချေ။ သို့သော်ငြား ဖခင်တစ်ယောက်ဖြစ်သည့်ထရန့်က သေချာပေါက် သူ့ကလေး၏ အခြေအနေကို စိုးရိမ်ပူပန်နေဆဲပင်။ ဧကရာဇ်ထရန့်က သူ့အလုပ်ကိစ္စများကို ဘေးပို့ကာ စာကြည့်ခန်းကို ဦးတည်လိုက်သည်။ စာကြည့်ခန်းရောက်ချိန်တွင် ရှီဝိန့်၏နံဘေးသို့ အလောတကြီး သွားလိုက်ကာ ဖက်ထားလိုက်သည်။

ယုတ္တိကျကျပြောရလျှင် ကလေးတစ်ယောက်လဲသွားသည်ဆိုပါက ငိုသွားလိမ့်မည်ဖြစ်သော်ငြား ရှီဝိန့်ကမူ ခြားနားပေ၏။ သူ မွေးလာကတည်းက ငိုသည်မှာ ရှားသည်ပင်။

သူ့ရင်ခွင်ထဲရှိ စိတ်အခြေနေမကောင်းပုံပေါ်သော ကလေးလေးကို တစ်ချက်ကြည့်ကာ ထရန့်က ပြုံးလိုက်သည်။ သူက ကလေးလေး၏ခေါင်းထိပ်လေးကို ထိကာ နူးညံ့စွာ မေးလိုက်သည်။

"ဘာဖြစ်လို့လဲ...နာလို့လား..."

ရှီဝိန့်က ခေါင်းခါလိုက်သည်။

"သား မနာပါဘူး..."

ထရန့်က ကြမ်းပြင်ပေါ်ကျနေသည့် စာအုပ်ကိုကောက်ကာ လှန်ဖွင့်လိုက်သည်။ သူက အယ်လ်ဖာတစ်ယောက်က အိုမီဂါတစ်ယောက်ကို မည်သို့အမှတ်အသားပေးရမလဲဟူသည့် အသေးစိတ်ကျကျပုံများကို ရုတ်တရက် တွေ့လိုက်ရသည်။ ထိုပုံများ၏အရွယ်အစားက အလွန်ကြီးမားပြီး အချို့နေရာများအား အနည်းငယ် ဝါးထားလေသည်။ ထရန့်က အနည်းငယ် မျက်မှောင်ကြုတ်သွားပြီး စာအုပ်ကို စင်တစ်ခုပေါ် ပြန်ထားကာ ပြောလိုက်သည်။

"ရှီဝိန့်က ငယ်လွန်းသေးတယ်...တချို့စာအုပ်တွေက သူ့အတွက်မြင်ဖို့ မသင့်တော်ဘူး...စာကြည့်ခန်းထဲက စာအုပ်တွေအကုန်လုံးကို ထပ်ပြီးနေရာပြန်ချလိုက်...ပြီးရင် သူ့အတွက် ကလေးတွေနဲ့ သင့်တော်မယ့် နတ်သမီးပုံပြင်စာအုပ်တချို့ ရှာထားလိုက်ပါ..."

"ဟုတ်ကဲ့ပါ ဧကရာဇ်..."

မက်ခါ၏တာဝန်ထမ်းဆောင်နိုင်စွမ်းက အလွန်မြင့်ပြီး လျင်လျင်မြန်မြန်ပင် စာအုပ်များကို ရှီဝိန့်လက်လှမ်းမမှီနိုင်သည့် စာအုပ်စင်များပေါ် တင်လိုက်ကာ နတ်သမီးပုံပြင် စာအုပ်အထပ်လိုက်ကို ဧကရာဇ်ရှေ့ နေရာချလိုက်သည်။

ထရန့်က ထိုင်ခုံပေါ် ထိုင်ချလိုက်ပြီး ရှီဝိန့်ကို သူ့ဒူးပေါ်တင်လိုက်ကာ နတ်သမီးပုံပြင်စာအုပ်များကို ဖွင့်ပြီး ပြုံးလိုက်သည်။

"ဒီစာအုပ်ဖတ်ကြည့်ရအောင်နော် ရှီဝိန့်..."

ရှီဝိန့် : "..."

ကျွန်တော် နတ်သမီးပုံပြင်စာအုပ် မဖတ်ချင်ဘူး...ဒီတိုင်းငြိမ်ငြိမ်ပဲ ထိုင်နေချင်တာလို့...

သို့သော် ယနေ့တွင် ဧကရာဇ်က ဖခင်တစ်ယောက်၏အကြင်နာမေတ္တာများ ယိုဖိတ်နေကာ အမှန်တကယ်ပင် ကျယ်လောင်စွာ စာဖတ်ပြလာခဲ့သည်။

"ဟိုးရှေးရှေးတုန်းက အန်ဒရိုမန်ဒါဂလက်ဆီထဲမှာ လိမ္မာတဲ့ နတ်သူငယ်လေးတစ်ယောက် နေထိုင်ခဲ့တယ်တဲ့...အဲ့နတ်သူငယ်လေးမှာ ရောင်စုံတောင်ပံလေးတစ်စုံ ရှိတယ်တဲ့..."

ရှီဝိန့် အလွန်အိပ်ငိုက်လာ၍ မျက်လုံးများ မှိတ်လိုက်သည်။

ဤသည်ကိုမြင်ပြီး သူ့သားလေးကို ရှားရှားပါးပါး စာဖတ်ပြရန် အခွင့်အရေးရခဲ့သည့် ဧကရာဇ်၏ဂုဏ်သိက္ခာလေးက အနည်းငယ် ထိခိုက်နာကျင်သွားခဲ့ရရှာသည်။ သူက ခြင်္သေ့ဘုရင်ကို လေးလေးနက်နက် မေးလိုက်သည်။

"ငါပြောပြတဲ့ ပုံပြင်က စိတ်ဝင်စားစရာ မကောင်းဘူးလား..."

"ဧကရာဇ်ပြောပြတဲ့ပုံပြင်က အရမ်းကို စိတ်ဝင်စားဖို့ကောင်းပါတယ်...မင်းသားလေးက အဲဒါကြောင့် စိတ်သက်သောင့်သက်သာဖြစ်သွားပြီး အိပ်ပျော်သွားတာပါ..."

ခြင်္သေ့ဘုရင်က ရိုးသားစွာ ပြောပြလိုက်သည်။

ထရန့်က သူ့အဖြေကို စိတ်ကျေနပ်သွားပြီး ခေါင်းညိတ်လိုက်သည်။ ထို့နောက် အိပ်ပျော်နေသည့်

သူ့သားကို အိပ်ရာပေါ် သယ်ဆောင်သွားကာ ခေါင်းလေးကို ညင်သာစွာ ပုတ်ပေးပြီး တိုးတိုးလေး ပြောလိုက်သည်။

"ကောင်းကောင်းအိပ်ပျော်ပါစေ သားလေး..."

ရှီဝိန့်က အမှန်တကယ် အိပ်ပျော်မသွားခဲ့သေးပေ။ ယခုလေးတင် စာအုပ်မှဖတ်ထားခဲ့သည့် အကြောင်းအရင်းကို ကျေညက်အောင် ကြိုးစားနေရဆဲဖြစ်သည်။ အိုမီဂါနှင့် ပတ်သက်သည့် အကြောင်းများကို သူပိုစဥ်းစားလေလေ ပိုကြက်သီးထလေလေပင်။ Estrus ကာလတွင် အိုမီဂါများက အယ်လ်ဖာများကို ဆွဲဆောင်နိုင်သည့် ဖယ်ရိုမုန်းအများအပြားကို ထုတ်လွှတ်ပစ်ပြီး မသိစိတ်အလျောက် သူတို့ကို သိမ်းပိုက် အမှတ်အသားပေးစေရန် ဆွဲဆောင်လိမ့်မည်ဟု စာအုပ်က ပြောထားလေသည်။

ရှီဝိန့် မတွေးဘဲ မနေနိုင်ဖြစ်သွားသည်။

ငါတကယ်ပဲ လူသားတွေရဲ့ ခေတ်လွန်အနာဂတ်ကာလကို ရောက်သွားတာလား ဒါမှမဟုတ် ရှေးဦးတောရိုင်းတိရစ္ဆာန်ကမ္ဘာထဲကို ရောက်သွားတာလား...

***

ထိုနှစ်ဆောင်းဦးတွင် ဘုရင်မအန်နာက အယ်လစ်ကာအမည်ရှိ မင်းသမီးငယ်လေးတစ်ပါးကို မွေးဖွားခဲ့သည်။ သူမက မွေးဖွားပြီးနောက် သေလုနီးနီးဖြစ်သွားခဲ့သည့် ဖျော့တော့သော အသားအရေရှိသည့် အိုမီဂါမင်းသမီးလေးဖြစ်ပေ၏။ ကံကောင်းထောက်မစွာဖြင့် ဆရာဝန်များက သူမကိုကယ်တင်ရန် အကောင်းဆုံး ကြိုးစားခဲ့ကြပြီး အောင်မြင်ခဲ့လေသည်။ သနားစရာကလေးမလေးအား မွေးပြီးပြီးချင်း လမစေ့ဘဲမွေးသော ကလေးများအား ထည့်သည့် သားဖောက်စက်ထဲထည့်ပြီး ကျွမ်းကျင်သော သူနာပြုများဖြင့် 24 နာရီ 7ရက် စောင့်ရှောက်ခဲ့ရလေသည်။

ထရန့်က အင်ပါယာအတွင်း၌ရှိသော ကလေးအထူးကုဆရာဝန်များကို သူမအား ကယ်ဆယ်စောင့်ရှောက်ရန် ငွေကုန်ကြေးကျခံကာ ဖိတ်ခေါ်ခဲ့လေသည်။

သားဖောက်စက်အတွင်းတွင် အသက်ဖျော့ဖျော့ရှူနေသည့် သူ၏ညီမလေးကိုကြည့်ပြီး စာအုပ်ထဲတွင် ဖတ်ခဲ့ဖူးသည့် "အိုမီဂါများတွင် အလွန်အားနည်းသည့်ခန္ဓာကိုယ်ရှိသည်"ဟူသော အဓိပ္ပါယ်အမှန်ကို နောက်ဆုံး၌ သဘောပေါက်သွားခဲ့သည်။

အိုမီဂါအရေအတွက်က ရှားပါးပြီး သေဆုံးနှုန်းကလည်း မြင့်သောကြောင့် သူတို့၏အရေအတွက်က တစ်နှစ်ထက်တစ်နှစ် နည်းပါးလာခဲ့သည်။ ထို့ပြင် အိုမီဂါများကသာ အသန့်စင်ဆုံးသွေးမျိုးဆက်များကို မွေးဖွားပေးနိုင်လေ၏။ အကယ်၍ အိုမီဂါအရေအတွက်က ဆက်လက်လျော့ကျနေပါက အင်ပါယာတွင် သန့်စင်သည့် သွေးမျိုးဆက်များ နည်းပါးလာပြီး လူဦးရေ လျော့ကျလာကာ ဆုံးရှုံးမှုများလည်း များပြားလာလိမ့်မည်ပင်။

ရလဒ်အနေဖြင့် အိုမီဂါများက ရှားပါးအရင်းအမြစ်များ ဖြစ်လာပြီး အလွန်အဖိုးတန်ကာ သူတို့မွေးဖွားလာသည့် အချိန်ကတည်းက ကာကွယ်ခံရလေသည်။

ရှီဝိန့်ကဲ့သို့ပင် မင်းသမီးလေး၏အချက်အလက်များကိုလည်း အိုမီဂါကာကွယ်ရေး အဖွဲ့အစည်းတွင် စာရင်းသွင်းလိုက်လေသည်။ သူမ၏ခန္ဓာကိုယ်က အလွန်အမင်းအားနည်းလှ၍ သားဖောက်စက်အတွင်းတွင်သာ နေရလေသည်။ ထို့ကြောင့် ဘုရင်မအန်နာက မကြာခဏ ရှီဝိန့်ကိုခေါ်ကာ ဆေးရုံသို့ လာလည်တတ်ပေသည်။ ခြောက်လတင်းတင်း ပြည့်ပြီးနောက်တွင် အယ်လစ်ကာ၏ခန္ဓာကိုယ်အခြေအနေက တဖြေးဖြေး တိုးတက်လာပြီး နန်းတော်တွင် နေထိုင်ရန် နောက်ဆုံး၌ ခွင့်ပြုလိုက်လေသည်။

သူ့ညီမလေး၏အခြေအနေက မကောင်းမှန်းသိသောကြောင့် ရှီဝိန့်က သူမကို အမှန်တကယ်ပင် စောင့်ရှောက်ခဲ့လေသည်။ ထိုအချိန်က သူက ကလေးတစ်ယောက်သာ ဖြစ်နေသေးသော်ငြား အရုပ်ကလေးများကို သူမထံ ယူလာပေးခြင်းကဲ့သို့ ကိစ္စသေးသေးလေးများကို လုပ်နိုင်နေပြီပင်။ ဤမောင်နှမနှစ်ယောက်ကြားက ခံစားချက်များက အလွန်ကောင်းမွန်လှ၍ ဘုရင်မအန်နာက အမှန်ပင် ပျော်ရွှင်သွားခဲ့သည်။

ရှီဝိန့်သိချင်နေသည့် ကိစ္စတစ်ရပ်လည်း ရှိပေ၏။ သူ့ညီမလေး မွေးဖွားလာပြီးနောက်တွင် ဘုရင်မအန်နာနှင့် အလွန်အမင်း ရင်းနှီး၊နိီးကပ်ခဲ့သည့် ဂရေ့စ်က မမျှော်လင့်စွာပင် သူမထံ အလည်မလာတော့ချေ။ ရှီဝိန့်က ယင်းမေးခွန်းကို ဘုရင်မအန်နာထံ မေးကြည့်လိုက်ရာ သူမကပြုံးလျက် ပြန်ဖြေလာခဲ့သည်။

"ဘာလို့လဲဆို လေဒီဂရေ့စ်က ကိုယ်ဝန်ရှိနေပြီလေ...အဲဒါကြောင့် လာမလည်တော့တာ...ဘာလို့လဲ သားက သားသူငယ်ချင်းကောင်း ကလဲယ်ကို လွမ်းနေလို့လား..."

ရှီဝိန့် : "..."

မေမေက တကယ်ရယ်ရတာပဲ...ကျွန်တော်က အဲ့ကြွက်စုတ်လေး ကလဲယ်ကို လွမ်းမနေပါဘူးနော်...

***

အချိန်များက လျင်မြန်စွာ ကုန်ဆုံးသွားပြီး မကြာမီတွင် ရှီဝိန့်က အသက်သုံးနှစ်ဖြစ်လာတော့မည်ပင်။

အင်ပါယာထဲရှိ ကလေးများက အသက်သုံးနှစ် မပြည့်မီတွင် ပုံမှန်ပညာရေးကို သင်ယူခွင့်မရနိုင်ပေ။ သို့သော် ရှီဝိန့်ကမူ ကိုယ်တိုင်မည်သို့ လေ့လာရမလဲကို သိ၍ ယင်းက သူ့အတွက် ကိစ္စကြီးမဟုတ်ချေ။ သူက ဧကရာဇ်၏စာကြည့်ခန်းတွင်းသို့ သွားရန် အခွင့်အရေးကို မကြာခဏရှာလေ့ရှိပြီး ထိုနေရာရှိ စာအုပ်များကို ဖတ်လိမ့်မည်ပင်။

ယခင်ဘဝက ဇာတ်ညွှန်းများကို ဖတ်ပြီးမှတ်သားတတ်သည့် အလေ့အကျင့်ရှိ၍ ထင်ပေ၏။ ယခုအချိန်၌ သူ့တွင် အလွန်ကောင်းသည့် မှတ်ဥာဏ်ရှိပြီး စာအုပ်ထဲတွင် ဖတ်ခဲ့သည့်အရာများကို မှတ်မိပေသည်။ ဗဟုသုတက သူ့အား အကျိုးအမြတ်များ ယူဆောင်ပေးနိုင်သည်ကို သူသိပေသည်။ ဤထူးဆန်းလှသည့် ကမ္ဘာကြီးထဲတွင် သနားစဖွယ် အိုမီဂါမင်းသားလေးအဖြစ် မွေးဖွားလာခဲ့သည့် သူ့ကံကြမ္မာကို လက်ခံပြီးပြီဖြစ်သော်ငြား အနာဂတ်တွင် အခြားတစ်ယောက်ထံမှ အမှတ်အသား ပေးခံရမည့် ကံကြမ္မာကိုမူ လက်မခံနိုင်ပေ။ ဖို့ကြောင့် သူ့ကံတရားကိုပြောင်းလဲနိုင်သည့် လမ်းတစ်ခုကို ရှာဖွေမှရပေမည်။

ရှီဝိန့် အသက်2နှစ်6လပြည့်ချိန်တွင် မစ္စဂရေ့စ်က အိုမီဂါယောကျ်ားလေးတစ်ယောက်ကို မွေးဖွားခဲ့လေသည်။ သူမ နာလန်ပြန်ထူလာပြီးနောက်တွင် နန်းတော်၏ပုံမှန်ဧည့်သည် ပြန်ဖြစ်လာခဲ့သည်။

သေချာပေါက်ပါပင် သူမက အသက်2နှစ် 6လ

ရှိနေပြီဖြစ်သည့် ကလဲယ်ကိုလည်း ရှီဝိန့်နှင့် ဆော့ကစားရန် နန်းတော်သို့ ခေါ်ဆောင်လာနေဆဲပင်။ ယခုအချိန်တွင်မူ ကလဲယ်က လမ်းလျှောက်နည်း၊ စကားပြောနည်းကို သင်ယူနေပြီဖြစ်သောကြာင့် သူ ကလေးပေါက်စဘဝကကဲဲ့သို့ ရှီဝိန့်၏အိပ်ရာနံဘေးတွင် လူးလိမ့်ခြင်းမျိုး မလုပ်တော့ချေ။

ကလဲယ်ငယ်လေးက စိတ်တိုင်းကျ ချုပ်ထားသည့် အဖြူရောင်suit ဝတ်စုံနှင့်နက်ကတိုင်ကို ဝတ်ဆင်ထားပြီး သူ့မိခင်နံဘေးတွင် လူကြီးလူကောင်းလေးတစ်ယောက်ကဲ့သို့ မတ်တတ်ရပ်နေခဲ့သည်။ ကလဲယ်၏ အလွန်ရယ်စဖွယ်ကောင်းသည့်ယိုင်နဲ့နဲ့ လမ်းလျှောက်ပုံကို တွေ့ပြီး ဖက်ရှင်စတိုးဆိုင်များထဲမှ ကလေးအရုပ်လေးများနှင့်တူသည်ဟု တွေးမိသွားသည်။

ကလဲယ်က ရှီဝိန့်ကို တွေ့လိုက်ချိန် မျက်ဝန်းများက ချက်ချင်းဆိုသလို တောက်ပသွားသည်။ သူက ပျော်ပျော်ရွှင်ရွှင်ဖြင့် ရှီဝိန့်၏နံဘေးသို့ ကပျာကယာပြေးလာပြီး မေးလိုက်သည်။

"မင်းက ရှီဝိန့်လား..."

ရှီဝိန့်က ခေါင်းညိတ်လိုက်သည်။

"အင်း..."

ကလဲယ်က လက်ဆန့်ကာ ပြောလိုက်သည်။

"ငါ့မှာ မင်းအတွက် လက်ဆောင်ရှိတယ်..."

ရှီဝိန့်က တစ်ချက်ကြည့်လိုက်ရာ တစ်ဖက်ကောင်လေးက ကလေးငယ်လေးများ ဆော့ကစားရသည်အား နှစ်သက်သည့် မက်ခါအသေးစားတစ်စုံကို ကိုင်ထားသည်ကို တွေ့လိုက်ရသည်။ ယင်းက လက်ဖဝါးအရွယ်မျှသာရှိပြီး လွတ်လွတ်လပ်လပ် ဖြုတ်နိုင်၊တပ်နိုင်ပေသည်။ သို့သော် သူ့အဖေ၏Sအဆင့်မက်ခါကို မြင်ပြီးနောက်တွင် ဤကဲ့သို့ အရုပ်သေးသေးလေးများကို ရှီဝိန့် စိတ်မဝင်စားတော့ချေ။ ထိုသို့ဆိုသော်ငြား ကလဲယ်လက်ထဲမှ ယူလိုက်ဆဲဖြစ်ပြီး ပြောလိုက်သည်။

"ကျေးဇူးပဲ..."

သူ့အမူအရာက အနည်းငယ်လေးမျှပင် ပြောင်းလဲမသွားသည်ကို မြင်ပြီး ကလဲယ်က အနည်းငယ် မသေချာသလို ခံစားလိုက်ရသည်။

"မင်း မကြိုက်ဘူးလား..."

ရှီဝိန့်က ပြောလိုက်သည်။

"ငါကြိုက်ပါတယ်..."

ကလဲယ်က ချက်ချင်းပင် ပျော်ရွှင်ဝမ်းသာသွားသည်။

သူတို့နှင့်မဝေးသည့်နေရာတွင် ဘုရင်မအန်နာက

ကလဲယ်က သူမသားလေးကို လက်ဆောင်ပေးနေသည့် မြင်ကွင်းကို စောင့်ကြည့်ပြီး မပြုံးဘဲ မနေတိုင်တော့ပေ။

"ကလဲယ်က စဥ်းစားတတ်တာပဲ...သူက ငယ်ငယ်လေးရှိသေးတယ် ဆိုပေမယ့် ရှီဝိန့်ကို လက်ဆောင်လေးတွေပေးရမယ်ဆိုတာကို သိနှင့်နေပြီ..."

ဂရေ့စ်က ပြောလိုက်သည်။

"ဟုတ်တယ်...ကျွန်မ သူ့ကိုနန်းတော်ခေါ်လာချင်တယ်လို့ ကြားတုန်းကဆို သူအရမ်း စိတ်လှုပ်ရှားသွားခဲ့တာလေ...ချက်ချင်းပဲ ရှီဝိန့်ကိုပေးဖို့ဆိုပြီး သူတန်ဖိုးအထားဆုံးအရုပ်တွေထဲက တစ်ရုပ်ကို ကောက်ယူခဲ့တော့တာပဲ..."

အန်နာက ရယ်လိုက်သည်။

"သူတို့အချင်းချင်း ဆော့ကြပါစေ...ငါတို့က ဥယျာဥ်ထဲသွားကြတာပေါ့..."

🍃🍃🍃

Prev Next