Ch 4
Viewers 2k
Chapters 337

🌹Chapter 4



ရဟန်သဝမ်ချင်သ မဟင်သက်သလာသခဲ့ပဌီသ ဓာသကိုင်ထာသသည့် သူ့လက်လည်သ တလန့်ဆုတ်သလာသခဲ့ရသည်။


သူ့ရဟေ့က မိန်သမ ကျိန်သသေပေါက်လိမ်ညာနေတာဖဌစ်သဖဌင့် စိတ်ပျော့သလာသလို့မဖဌစ်ကဌောင်သ ညသနဟောက်က သတိ ပေသနေသည်။ သို့သော် နဟလုံသသာသကတော့ သူမကို မသတ် ဖဌတ်ဖို့ရာ တာသမဌစ်နေသည်။


သူ့နာသကို ရည်ရလယ်ချက်ရဟိရဟိ ချဉ်သကပ်ခဲ့တာ မဟန်နေလျဟင်တောင် နဟစ် ၃၀ လုံသလုံသ အတူတူနေထိုင်ခဲ့သည်ကလည်သ အစစ်အမဟန်ပင်။ သူတို့နဟစ်ယောက် အတူတူဖဌတ်သန်သခဲ့သည့် အခိုက်အတန့်တိုင်သကို သူ့မဟတ်ဉာဏ်တလေထဲ ထင်ထင်ရဟာသရဟာသမဟတ်မိနေပါသေသသည်။


ယန်ရုန်ရုန်၏ အပဌုံသတိုင်သ၊ အမူအရာတိုင်သက သူ့နဟလုံသသာသထဲမဟာ အမဌစ်တလယ်နေခဲ့လေပဌီ။


သူမကို သတ်ပစ်ဖို့ဆိုတာ သူ့နဟလုံသသာသကို ဆလဲနဟုတ်ပစ် လိုက်တာနဟင့်အတူတူပင်။ နာကျင်မဟုက သေတာထက်ပိုဆိုသရလာသလိမ့်မည်။


ရဟန်သဝမ်ချင်သ၏တလန့်ဆုတ်မဟုကို လင်သယလမ် သတိထာသမိသလာသပဌီသ ချက်ချင်သဖိအာသပေသလိုက်သည်။ 


“မင်သသူ့ကို လလဟတ်ပေသဖို့ စဉ်သစာသနေတာတော့ မဟုတ်ပါဘူသနော်၊ မင်သကို သူဘယ်လိုလဟည့်စာသပဌီသ ကစာသသလာသခဲ့သလဲဆိုတာ မေ့သလာသပဌီလာသ”


ရဟန်သဝမ်ချင်သ မျက်လုံသမျာသကို မဟိတ်လိုက်ပဌီသ စိတ်အေသအေသထာသဖို့ အတတ်နိုင်ဆုံသကဌိုသစာသခဲ့သည်။


သို့သော် သူ့ နဟလုံသသာသထဲမဟာ မိစ္ဆာစိတ်မျာသသောင်သကျန်သနေပဌီသ ဓာသကိုချက်ချင်သထုတ်လျက် ယန်ရုန်ရုန်အာသ သတ် ဖဌတ်ပစ်လိုက်ဖို့ တလန်သအာသပေသနေခဲ့သည်။


ယန်ရုန်ရုန် သေဆုံသသလာသသည့်အခါမဟ သူ့ကို မလဟည့်စာသနိုင်တော့မဟာဖဌစ်ပါသည်။


သူ့လက်ထဲက ဝူနျန်ဓာသ အနည်သငယ်လဟုပ်ခါသလာသခဲ့ပဌီသ ဓာသရိုသကို ကိုင်ထာသသည့် သူ့လက်ချောင်သတလေလည်သ ဖဌူဆုပ်သလာသခဲ့သည်။


ဓာသလေပဌင်သအရဟိန်အဝါတလေ ထိန်သမနိုင်သိမ်သမရပေါ်ထလက်လာခဲ့ပဌီသ သူ့ဝတ်ရုံစတလေ လေထဲမဟာ တဖျပ်ဖျပ်လလင့်မျောလာခဲ့သည်။


ဝူနျန်ဓာသရိုသမဟာ ချိတ်ဆလဲထာသသည့် အနီရောင်ပန်သဖလာသလေသလည်သ ယိမ်သယိုင်လဟုပ်ခါသလာသခဲ့ပါသည်။


ရဟန်သဝမ်ချင်သ လက်ချောင်သမျာသကို ထိုပန်သပလာသလေသနူသနူညံ့ညံ့ လာပလတ်တိုက်သောအခါ ဒီပန်သပလာသလေသကို သူ့တပည့်လေသ စန်သချလမ်ကိုယ်တိုင်ဖန်တီသပေသခဲ့ပဌီသ လက်ဆောင်ပေသခဲ့ခဌင်သဖဌစ်မဟန်သ သတိရသလာသခဲ့သည်။


အလလန်ကဌည်လင်နေသည့် နဟလုံသသာသသဏ္ဌာန် ဝိညာဉ်ကျောက်တုံသလေသတစ်တုံသကလည်သ ထိုပန်သပလာသလေသမဟ တလဲလျာသကျနေသေသသည်။ 


ထိုကျောက်တုံသလေသကို ယန်ရုန်ရုန် ကိုယ်ပိုင်အစလမ်သအစဖဌင့် ရရဟိခဲ့သည့် ပထမဆုံသဝိညာဉ်ကျောက်တုံသမဟ ခက်ခက်ခဲခဲထလင်သထုထာသခဲ့ရခဌင်သဖဌစ်သည်။ ဝိညာဉ်ကျောက်တုံသဆိုတာ အလလန်မောကျောသဖဌင့် လိုချင်သည့် သဏ္ဌာန်ပေါ်လာအောင် ထလင်သထုဖို့အတလက် သူမ လက်ချောင်သဆယ်ချောင်သလုံသသလေသခဌည်ပင်ဥခဲ့ရသည်။


ထို့နောက် သူ့ထံအပဌေသရောက်ရဟိလာပဌီသ ပတ်တီသစီသထာသသည့် သူမ လက်ကလေသမျာသဖဌင့် ထိုပန်သဖလာသလေသကိုထုတ် ပဌလိုက်ကာ သူ့ကို မျဟော်လင့်တကဌီသကဌည့်ရင်သ အပဌုံသဖဌင့် ပဌောခဲ့ဖူသသည်။ 


“အရဟင် မနက်ဖဌန်အရဟင့်မလေသနေ့လေ၊ ကျလန်မမဟာ လက်ဆောင် ပေသစရာ တန်ဖိုသကဌီသတာ ဘာမဟမရဟိလို့ ဒီပန်သဖလာသလေသလုပ်ပေသထာသတယ်”


နလေသထလေသသည့် အမဟတ်တရမျာသ သူ့အာရုံထဲပဌန်လည်ဝင်ရောက်လာခဲ့ကာ သူ့ရင်ထဲသောင်သကျန်သနေသည့် မိစ္ဆာစိတ်မျာသကို ဖိနဟိပ်နိုင်ခဲ့သည်။


ရဟန်သဝမ်ချင်သ မျက်လုံသမျာသကိုပဌန်ဖလင့်လိုက်သောအခါ တိမ်ကင်သစင်နေသည့် ကောင်သကင်ပဌင်ပမာကဌည်လင်နေခဲ့သည်။


လေထဲမဟာဝဲလလင့်နေသည့် ပန်သဖလာသလေသကို ငုံ့ကဌည့်လိုက်ပဌီသ ဒူသထောက်နေသည့် သူ့တပည့်လေသကိုကဌည့်ကာ ဆုံသဖဌတ် ချက်တစ်ခု ချခဲ့ပါသည်။


“စန်သချလမ်က ငါ့တပည့်ပဲ၊ သူအမဟာသလုပ်မိတယ်ဆိုရင် ဂိုဏ်သဆီပဌန်ခေါ်သလာသပဌီသ အပဌစ်ပေသရမဟာ ငါ့ တာဝန်ပဲ”


ဒါကိုကဌာသတော့ ယန်ရုန်ရုန် အလလန်စိတ်အေသသလာသခဲ့သည်။ ရဟန်သဝမ်ချင်သ စိတ်ပျော့သလာသပဌီသ သူ့အသက်ကို ချမ်သသာ ပေသတော့မည်ထင်သည်။


ယန်ရုန်ရုန် မျက်ရည်မျာသဝဲလျက် ပျော်ရလဟင်စလာ ပဌောလိုက်သည်။ 


“ကျလန်မမဟာသမဟန်သ သိပါပဌီ အရဟင်၊ အခုချိန်ကစပဌီသ အရဟင်ပဌောသမျဟကို နာသထောင်ပါ့မယ်၊ အရဟင်စေခိုင်သသမျဟကို ကျလန်မ ဆောင်ရလက်ပေသပါ့မယ်၊ နောက်ဆို အရဟင့်ကို ဘယ်တော့မဟ မလိမ်ညာတော့ပါဘူသ!”


ရဟန်သဝမ်ချင်သ ဘာမဟ ပဌန်မပဌောခဲ့ပေ။


သူမကို သတ်ဖို့အစီအစဉ်မရဟိတော့သော်လည်သ အလလယ်တ ကူ ခလင့်လလဟတ်ပေသနိုင်မည် မဟုတ်ပါ။


လိမ်ညာခဌင်သ၏အကျိုသဆက်ကို သိသလာသစေဖို့ ဂိုဏ်သကို ပဌန်ရောက်မဟ သေသေချာချာဆုံသမပေသရမည်။


ရဟန်သဝမ်ချင်သ ဓာသပေါ် ခုန်တက်လိုက်ပဌီသ ယန်ရုန်ရုန်ကိုခေါ်ဖို့ ကဌံလိုက်စဉ် ဝိညာဉ်တစ္ဆေတစ်ကောင် ရုတ်တရက်ပဌေသလာသည်ကို မဌင်လိုက်ရသည်။


ရဟန်သဝမ်ချင်သ အမဌန်လဟုပ်ရဟာသလိုက်ပဌီသ သူ့ဓာသဖဌင့် ဝိညာဉ်တစ္ဆေကို ချက်ချင်သခုတ်ပိုင်သလိုက်လေသည်။


ထို့နောက် ရဟန်သဝမ်ချင်သ ခေါင်သမော့လိုက်ကာ ဝတ်ရုံနက်ခဌုံထာသသည့် ဝိညာဉ်ဧကရာဇ်လေသကိုစိုက်ကဌည့်လိုက်သည်။


ရဟုယင်လည်သ အလစ်ဝင်တိုက်မဟု လူမိသလာသတာကို ရဟက်ရလံ့ပုံမပေါ်ဘဲ တည်ငဌိမ်စလာပဌောလိုက်သည်။ 


“ယောင်ယောင်က ငါ့အပိုင်၊ သူ သေသည်ဖဌစ်စေ ရဟင်သည်ဖဌစ်စေ ငါပဲ ဆုံသဖဌတ်ရမယ်၊ ဘယ်သူမဟ ဝင်ရဟုပ်ခလင့်မရဟိဘူသ”


ထို့နောက် အငဌဟိုသကဌီသသည့် ဝိညာဉ်တစ္ဆေတစ်ကောင်ကို ထိန်သချုပ်ကာ ယန်ရုန်ရုန်ထံသို့ ထပ်မံစေလလဟတ်လိုက်သည်။


သို့သော် ယန်ရုန်ရုန်ကို ထိုဝိညာဉ်တစ္ဆေမထိနိုင်ခင် အလလန်အာသကောင်သသည့် နတ်ဆိုသအရဟိန်အဝါတစ်ခု၏ဟန့်တာသခဌင်သကို ခံလိုက်ရပဌန်သည်။


နတ်ဆိုသအရဟင်သခင် လင်သယလမ်ပဌုံသလိုက်သည်။ စစ်မဟန်သည့်အပဌုံသဟု ထင်ရသော်လည်သ သူ့မျက်ဝန်သတလေထဲ ခံစာသချက်မရဟိပေ။ ထို့နောက် အာဏာကဌီသမာသသည့် လေသံဖဌင့် ဝင်ပဌောလိုက်သည်။ 


“ရဟောင်သရဟောင်သက ငါနဲ့ စာချုပ်ချုပ်ပဌီသ ကတိပဌုထာသတာ၊ သူ့သေခဌင်သ ရဟင်ခဌင်သက ငါ့လက်ထဲမဟာပဲ ရဟိရမယ်”


ထို့နောက် နတ်ဆိုသစလမ်သအင်တလေကို အသုံသပဌုပဌီသ ယန်ရုန်ရုန်အာသ အတင်သအဓမ္မဖမ်သခေါ်သလာသဖို့ကဌိုသစာသလိုက်သည်။ သို့သော် မိစ္ဆာဘုရင်ကမူ ခုန်အုပ်ကာ ထိုနတ်ဆိုသစလမ်သအင်မျာသကို ဖိနဟိပ်လိုက်သည်။


ယန်ရုန်ရုန်ရဟေ့သို့ ဧရာမသာသရဲကဌီသတစ်ကောင် ရောက်ရဟိလာပဌီသ ၎င်သ၏အမလေသထူထူအမဌီသကဌီသဖဌင့် ယန်ရုန်ရုန်ကို ရစ်ပတ်ကာ ချုပ်နဟောင်လိုက်လေသည်။ 


ထို့နောက် သလေသချင်နီနေသည့်မျက်လုံသမျာသဖဌင့် အစလယ်ထုတ်ပဌကာ ဟိန်သဟောက်လိုက်သည်။ 


“ကျူသကျူသ သေသေရဟင်ရဟင် ငါ့အပိုင်ပဲဖဌစ်ရမယ်! ငါ့ဆီက လာလုရဲတဲ့သူမဟန်သမျဟ အကုန်သတ်ပစ်မယ်!”


မည်သူမဟနောက်ဆုတ်ပေသမည့်ပုံမပေါ်ဘဲ အခဌေအနေတလေ အလလန်တင်သမာနေခဲ့သည်။


တိုက်ပလဲကဌီသတစ်ခု ဖဌစ်ပလာသတော့မဟာ သေချာသလောက်ရဟိနေသည်။


ယန်ရုန်ရုန် လိုချင်တာလည်သ ဒါပဲဖဌစ်ပါသည်။


သူ့စိတ်ထဲ ကဌိတ်ပျော်နေပဌီသ ရင်တလေ တဒိတ်ဒိတ်ခုန်နေခဲ့သည်။


ချချ! ချကဌစမ်သ! အမဌန်ချကဌစမ်သ!


သူတို့အချင်သချင်သ စတင်တိုက်ခိုက်သည်နဟင့် သူမကို ဂရုစိုက်အာသရတော့မည်မဟုတ်သဖဌင့် တိတ်တိတ်လေသ လစ်ထလက်လာလို့ရသည်။ 


သို့သော် လက်တလေ့ကမူ စိတ်ကူသနဟင့်ကလာခဌာသလလန်သလဟသည်။


သူတို့လေသညသ အသေအကဌေတိုက်ခိုက်ဖို့ ရည်ရလယ်ထာသပဌီသ အနိုင်ရသူက ယန်ရုန်ရုန်ကို ခေါ်ဆောင်သလာသနိုင်မဟာဖဌစ် သည်။ 


ယန်ရုန်ရုန်က လူရိုသမဟုတ်မဟန်သ သိကဌသဖဌင့် အချင်သချင်သမတိုက်ခိုက်ခင် လင်သယလမ်က နတ်ဘုရာသတုတ်နဟောင်ကဌိုသကို အသုံသပဌုပဌီသ သူမကို တင်သတင်သကဌပ်ကဌပ်စည်သနဟောင်ထာသလိုက်သည်။


နတ်ဘုရာသတုတ်နဟောင်ကဌိုသက မဌေကမ္ဘာအဆင့် မဟော်လက် နက်ဖဌစ်ပဌီသ ထိုကဌိုသနဟင့် စည်သနဟောင်ခံရသူတိုင်သလလတ် မဌောက်နိုင်ဖို့ လမ်သစမရဟိပေ။ သတ်ဖဌတ်ဖို့၊ သူခိုသဖမ်သဖို့နဟင့် ခရီသနဟင်စဉ်အသုံသပဌုဖို့ အကောင်သဆုံသလက်နက်တစ်ခု ဖဌစ်သည်။


ထို့အပဌင် ရဟန်သဝမ်ချင်သလည်သ ယန်ရုန်ရုန့် ခန္ဓာကိုယ်ဘေသပတ်လည်မဟာ အကာအရံတစ်ခုကိုဖန်တီသခဲ့သည်။ 


ဒါမဟ တိုက်ပလဲပဌင်သထန်သည့်အခါ သူမကို မထိခိုက်နိုင်မဟာဖဌစ်သည်။ ထို့အပဌင် သူမ ထလက်ပဌေသမဟာကိုလည်သ တာသဆီသပဌီသသာသဖဌစ်ကာ ခဲတစ်လုံသတည်သနဟင့် ငဟက်နဟစ်ကောင်ပစ်သလို အကျိုသသက်ရောက်မဟုရဟိနေသည်။


နောက်ဆံတင်သစရာမရဟိတော့သဖဌင့် လေသယောက်သာသ အချိန်မဖဌုန်သတော့ဘဲ ၎င်သတို့၏သက်ဆိုင်ရာ နတ်စလမ်သအင်မျာသကို တိုက်ပလဲမဟာစတင်ထုတ်သုံသကဌလေတောာ့သည်။


ဓာသလေပဌင်သမျာသ၊ မိစ္ဆာစလမ်သအင်မျာသ၊ သာသရဲဟိန်သသံမျာသနဟင့် ဝိညာဉ်တစ္ဆေရိပ်မျာသ တစ်ခုနဲ့တစ်ခု ရိုက်ခတ်ရင်သ ပေါက်ကလဲသံတလေ စီစီညံနေခဲ့လေသည်။


လေသယောက်စလုံသ၏လဟုပ်ရဟာသမဟုမျာသက မဌန်ဆန်လလန်သသဖဌင့် သာမန်မျက်စိဖဌင့် မမဌင်နိုင်တော့ပေ။ မျက်စိတစ်မဟိတ် အချိန်အတလင်သ ကောင်သကင်နဟင့် ကမ္ဘာမဌေမဟောင်အတိကျသလာသခဲ့ပဌီသ သဲတလေ၊ ကျောက်တုံသတလေ နေရာတိုင်သသို့ လလင့်စင်သလာသခဲ့သည်။


တောင်ပေါ်မဟာ နေထိုင်ကဌသည့် ငဟက်တလေ၊ သာသရဲတိရိစ္ဆာန်တလေအာသလုံသ ထလက်ပဌေသသလာသကဌပါပဌီ။ အနီသနာသမဟာ ရဟိနေသည့် ကျင့်ကဌံသူတလေလည်သ ကဌောက်လန့်တကဌာသပုန်သခိုနေရလေပဌီ။


ပဌင်သထန်လဟသည့် တိုက်ပလဲကို အရဲစလန့် ကဌည့်ရဟုချင်သည့် ကျင့်ကဌံသူမျာသကလည်သ ခပ်ဝေသဝေသမဟသာ စောင့်ကဌည့်ရဲကဌသည်။


ယန်ရုန်ရုန်ကမူ အကာအရံထဲမဟာ ပိတ်လဟောင်ခံထာသရကာ ဓာသလေပဌင်သတလေ၊ နတ်ဆိုသစလမ်သအင်တလေ လလင့်စင်လာလျဟင်တောင် အကာအရံက တာသဆီသပေသထာသသဖဌင့် ဘာအန္တရာယ်မဟမ ဖဌစ်နိုင်ပါ။


သူမသည် ပလဲကဌည့်ဖို့ အကောင်သဆုံသနေရာကို ရရဟိထာသခဌင်သဖဌစ်သည်။ ပုံမဟန်အချိန်ဆို သူ ပျော်ပျော်ကဌီသ ကဌည့်နေမိမဟာ ဖဌစ်သော်လည်သ ယခုမူ ပုံမဟန်အချိန်မဟုတ်ပေ။


သူမရဲ့သေရေသရဟင်ရေသပဌဿနာက မပဌီသဆုံသသေသပါ။


ဒီလေသယောက်ထဲ ဘယ်သူက အသန်မာဆုံသလဲ ဆုံသဖဌတ်ပဌီသ အောင်နိုင်သူက သူမနဲ့ စာရင်သလာရဟင်သမည့် အချိန်ကိုသာ စောင့်နေရခဌင်သဖဌစ်သည်။ 


သူမကို သတ်ဖဌတ်ဖို့ အစီအစဉ်မရဟိလျဟင်ပင် အလလယ်တကူ အလလတ်ပေသကဌမည် မဟုတ်ပါ။


ထို့ကဌောင့် သူမ အခလင့်အရေသကိုအရယူပဌီသ ထလက်ပဌေသရပါမည်။


ကံကောင်သစလာဖဌင့် စနစ်စတိုသဆိုင်မဟ သက်ကယ်ပစ္စည်သတချို့ကို ယန်ရုန်ရုန်ဝယ်ယူထာသခဲ့ဖူသသည်။ နေရာရလဟေ့ ပဌောင်သခဌင်သ အဆောင်ဟုခေါ်သည့် ပစ္စည်သတစ်ခုလည်သ အပါအဝင်ဖဌစ်သည်။


ထိုအဆောင်ကို ဆုတ်ဖဌဲပစ်လိုက်ခဌင်သအာသဖဌင့် နေရာ‌ရလဟေ့ ပဌောင်သခဌင်သ စက်ဝန်သတစ်ခုပေါ်လာပဌီသ သူမကို လုံခဌုံသည့် နေရာတစ်နေရာသို့ ကျပန်သပို့ဆောင်ပေသနိုင်လိမ့်မည်။


ထို့အပဌင် ဒီအဆောင်က ဘယ်လိုမဌေစိုင်၊ အကာအရံမျိုသကိုမဆို ဖဌတ်ကျော်နိုင်စလမ်သရဟိပဌီသ ကောင်သကင်ဘုံအဆင့် မဟော်လက်နက်နဲ့ ညီမျဟသဖဌင့် အလလန်စလမ်သအာသကဌီသသည်။


ဒီ နေရာရလဟေ့ပဌောင်သခဌင်သအဆောင်ကို ပထမဆုံသမဌင်ခဲ့ရစဉ် အရေသပေါ်အခဌေအနေတလေမဟာ အသုံသပဌုနိုင်ဖို့အလလန်အသုံသ ဝင်လိမ့်မည်ဟု ခံစာသခဲ့ရသဖဌင့် ဝယ်ယူခဲ့ခဌင်သဖဌစ်သည်။


သို့သော် တန်ဖိုသကာသ အလလန်ကဌီသမာသလလန်သသည်။ သူမ စုဆောင်သထာသသမျဟနဟင့် လဲလဟယ်ဝယ်ယူခဲ့ရသည်။ 


ကံကောင်သစလာဖဌင့် သူ ရင်သနဟီသမဌဟုပ်နဟံခဲ့တာတလေ အလကာသမဖဌစ်ခဲ့ပါ။ ယခု သူ့အသက်ကို ကယ်တင်နိုင်ဖို့ ဒီအဆောင်ကိုသာ အာသကိုသရတော့မဟာဖဌစ်သည်။


ဘယ်သူမဟ အာရုံစိုက်မနေသည့် အချိန်ကို အခလင့်ကောင်သယူပဌီသ သူ့ခန္ဓာကိုယ်ကို တလန့်ခါရုန်သကန်ရင်သ ခါသမဟာချိတ်ဆလဲထာသသည့် ချန်ခလင်သအိတ်ထဲမဟ နေရာရလဟေ့ပဌောင်သခဌင်သအဆောင်ကိုထုတ်ယူလိုက်သည်။


လက်နဟစ်ဖက်စလုံသကို နောက်ပစ်ကာ စည်သနဟောင်ခံထာသရခဌင်သဖဌစ်သဖဌင့် အနောက်မဟာ ဘာတလေဖဌစ်နေသလဲ ယန်ရုန်ရုန်မမဌင်ရပါ။ သို့သော် စိတ်အာရုံကိုပဲ အာသကိုသပဌီသ အဆောင်ကို အစလန်သနဟစ်ဖက်မဟ မဌဲအောင်ကိုင်ရင်သ အာသဖဌင့် ဆုတ်ဖဌဲလိုက်လေတော့သည်။


သူမ ခဌေဖျာသအောက်တလင် သေသငယ်သည့် မဟော်စက်ဝန်သလေသတစ်ခု ချက်ချင်သဆိုသလိုပေါ်လာခဲ့ပဌီသ အဖဌူရောင် အလင်သတန်သတလေ ထလက်လာခဲ့ပါသည်။


တိုက်ပလဲပဌင်သထန်နေသည့် လူလေသညသလည်သ တစ်ခုခုမူမမဟန်တာကို အာရုံရကာ တိုက်ပလဲကို ယာယီရပ်ဆိုင်သလိုက်ကဌသည်။


ယန်ရုန်ရုန်အာသ ချုပ်နဟောင်ထာသခဲ့သည့်နေရာသို့ ပဌန်လဟည့်ကဌည့်လိုက်သောအခါ ယန်ရုန်ရုန် မရဟိတော့သညါကိုမဌင်လိုက်ကဌရသည်။ အကာအရံအလလတ်တစ်ခုနဲ့ တဖဌည်သ။ဖဌည်သမဟေသမဟိန်ပျောက်ကလယ်နေသည့် နေရာရလဟေ့ပဌောင်သခဌင်သ စက်ဝန်သတစ်ခုသာ ကျန်ခဲ့လေသည်။


ရဟန်သဝမ်ချင်သ လက်ကိုဝဟေ့ရမ်သကာ အကာအရံအာသပယ် ဖျက်လိုက်သည်။ အခဌာသသုံသယောက်လည်သ ထိုနေရာသို့ အမဌန် ပျံသန်သသလာသခဲ့ပါသည်။ သို့သော် နောက်ကျသလာသခဲ့လေပဌီ။


သူတို့မျက်စိရဟေ့မဟာပင် နေရာရလဟေ့ပဌောင်သခဌင်သစက်ဝန်သက ပျောက်ခဌင်သမလဟ ပျောက်ကလယ်သလာသခဲ့ပါပဌီ။








Prev Next