MM Story Teller

Ch 5

Viewers 2k

🐈Chapter 5

"ကျေးဇူးတင်ပါတယ်"

မနက်ခင်းတုန်းက သူဆုံခဲ့သည့်လူငယ်က

ဤမျှကူညီဖော်ရလိမ့်မည်ဟုသူမထင်ထားခဲ့ပေ။သေသေချာချာကြည့်လိုက်သည့်အခါမှ ထိုလူငယ်က အတော်လေးငယ်ပြီး အသက်နှစ်ဆယ်ခန့်သာရှိကြောင်းတွေ့လိုက်ရသည်။ပုံစံကတောက်ပနွေးထွေးပြီးချောမောကာ ၂၁ရာစုကကောင်မလေးမလေးများကြိုက်သည့်"ဝံပုလွေခွေးလေး"ပုံစံနှင့်အတိအကျတူသည်။

စိတ်ထဲမှ တစ်ဖက်လူ၏ရုပ်ရည်နှင့်အမူအကျင့်ကို တိတ်တိတ်လေးလက်မထောင်ပြလိုက်ရင်း လင်းနင် ထရပ်ပြီးသူ့ကိုယ်ပေါ်ကဖုန်များကိုခါချလိုက်သည်။

"ရပါတယ်...ဒါနဲ့ ငါတို့ နေ့ခင်းတုန်းကလည်းဆုံခဲ့တာပဲ...တစ်ယောက်နဲ့တစ်ယောက်သိကျွမ်းရအောင်...ငါ့နာမည်က ကျန်းကျိနင်...ဒါပေမဲ့မင်းအဆင်ပြေရဲ့လား...ဆရာဝန်နဲ့ပြချင်လား"

ကျန်းကျိနင်က လင်းနင်၏ခြေထောက်ကို စိုးရိမ်စွာကြည့်လိုက်သည်။ခုနက သူအချိန်မီတားချိန်မရလိုက်ပေ။အကန်ခံရသည်ကအတော်လေးနာမည့်ပုံပေါ်သည်။

"ရဲခေါ်ပေးရ..."

"မလိုပါဘူး"

လင်းနင်က ခေါင်းခါကာသူအဆင်ပြေကြောင်းပြလိုက်သည်။

"ငါ့နာမည်ကလင်းနင် ဒီနေ့အတွက်ကျေးဇူးတင်ပါတယ်...ထပ်ဆုံကြပြန်ပြီ တိုက်ဆိုင်လိုက်တာ"

"အင်း"

ကျန်းကျိနင်က သွားဖြိီးပြလာပြီး သူ့မျက်လုံးများကတလက်လက်တောက်ပနေသည်။သူက အလွန်အရပ်ရှည်ပြီး ၁.၈မီတာကျော်မည့်ပုံပေါ်သည်။အခုမှ လူမှုအသိုင်းအဝိုင်းထဲဝင်လာခါစဖြစ်မည်။သူ့မှာကျောင်းသားတစ်ယောက်၏ငယ်ရွယ်ပျိုမျစ်သောရိုးအမှုရှိနေပြီး ဘက်စကတ်ဘောကွင်းထဲမှထွက်လာခါစ ခပ်ချောချောကျောင်းမြက်လေးနှင့်တူသည်။

"ဒါနဲ့ မင်းရဲ့အထုပ်ထဲက အနံ့လေးကမွှေးနေတာပဲ...စားစရာလား"

လင်းနင်ကခေါင်းညိတ်လိုက်သည်။

"ကြိုက်ရင် ငါ့အိမ်လိုက်ခဲ့မလား...မင်းအတွက်တစ်ပွဲလုပ်ပေးမယ်"

လင်းနင်က ဤမျှစကားပြောရလွယ်လိမ့်မည်ဟု ကျန်းကျိနင်မမျှော်လင့်ထားပေ။ယနေ့သူ [လီမွန်မီးဖိုချောင်လေး]အကောင့်ကိုလှန်လှောမွှေနှောက်ခဲ့ပြီး သူ့ဗိုက်က စိတ်လှုပ်ရှားမှုကြောင့် တဂွီဂွီမြည်နေခဲ့သည်။နောင်ကျလျှင် လင်းနင်ပို့သည့်ပစ္စည်းမှန်သမျှကို သူပဲတာဝန်ယူမည်ဟုတွေးထားခဲ့သည်။မမျှော်လင့်ဘဲ အကူအညီသေးသေးလေးအတွက်နှင့် လင်းနင်ကသူ့ကို သူ့အိမ်သို့ဖိတ်ခေါ်လာလေသည်။

"မ မလိုက်တော့ပါဘူး...ငါဒီနေ့ကျောင်းပြန်သွားရဦးမှာ အရေးတကြီးလုပ်စရာရှိတယ်...ဒါပေမဲ့ ငါမင်းကိုသူငယ်ချင်းအပ်လို့ရမလား"

တစ်ဖက်လူက စိတ်ဓာတ်ကျမှုနှင့်မျှော်လင့်မှုများရောထွေးနေသော ချစ်စရာဝံပုလွေခွေးကြီးတစ်ကောင်နှင့်တူပြီး သူ့နောက်မှာမရှိသည့်အမြှီးကြီးတစ်ခုက လှုပ်ယမ်းနေသည့်အတိုင်းပင်။

လင်းနင်၏စိတ်အခြေအနေကချက်ချင်း ကြည်လင်သွားသည်။

"စိတ်မကောင်းစရာပဲ ဒါဆိုလည်းသူငယ်ချင်းအပ်ကြရအောင်...နောင်ကျအခွင့်အရေးရှိရင်ငါ့ကိုဆက်သွယ်လိုက်ပါ...ကျေးဇူးတင်တဲ့အနေနဲ့ထမင်းတစ်နပ်ဖိတ်ကျွေးပါ့မယ်..."

"တကယ်လား..."

ကျန်းကျိနင်၏မျက်လုံးများအစိမ်းရောင်ပြောင်းလုနီးပါးပင်။

ဗီဒီယိုထဲက အစားအသောက်များက ဆွဲဆောင်နိုင်လွန်းလှ၏။သူက ကြီိးထွားနေဆဲယောကျာ်းလေးတစ်ယောက်ဖြစ်သဖြင့် ဤကဲ့သို့သောသူတစ်ခါမှမမြင်ဖူးသည့်စားစရာမျိုးနှင့်ကြုံရသည့်အခါ ကိုယ့်ကိုကိုယ် ဝက်စာစားပြီးကြီးလာသလိုခံစားရသည်။

"အမ်း ဒါပေါ့ ..."

လင်းနင်မှာ စကားပြောနိုင်သည့် အသက်ဝင်တောက်ပသော မျက်ဝန်းလှလှတစ်စုံရှိသည်။သူလခြမ်းပုံမျက်ခုံးကွေးများဖြင့်ကတိပေးလိုက်ချိန်မှာ တစ်ဖက်သား၏ရင်ထဲမှာနွေးထွေးသွားရပြီး သူတို့၏ရင်ထဲအသည်းထဲကနေ သူ့ကိုယုံကြည်မိစေသည်။

နှစ်ယောက်သား နှုတ်ဆက်စကားဆိုပြီးနောက် လင်းနင်လှည့်ကာအပေါ်ထပ်သို့တက်လာခဲ့သည်။ယနေ့က အနည်းငယ်ပင်ပန်းသဖြင့် သူကောင်းကောင်းနားရန်လိုပေသည်။

မနေ့က စီချွမ်းစတိုင်ငါးပြုတ်ကမကုန်သေးဘဲ ထမင်းလည်းကျန်သေးသည်။အိမ်ပြန်ရောက်ပြီး ရေခဲသေတ္တာထဲက လက်ကျန်စီချွမ်းစတိုင်ငါးပြုတ်နှင့် ထမင်း၏ဒေတာများကို *light brain computer * ထဲသို့ထည့်ပြီးနောက်

Shining Live မှာစီချွမ်းစတိုင်ငါးပြုတ်၏ အရသာခံစားမှု လုပ်ဆောင်ချက်ကိုဖွင့်လိုက်သည်။

အကုန်လုံးပြီးသည့်နောက်မှာ လင်းနင်အိပ်ချင်လွန်း၍မျက်လုံးပင်မဖွင့်နိုင်တော့ပေ။

စီချွမ်းစတိုင်ငါးပြုတ်ကို ရေခဲသေတ္တာထဲပြန်မထည့်ဘဲ စားပွဲပေါ်တိုက်ရိုက်တင်ထားလိုက်သည်။ရေချိုးပြီးနောက် လင်းနင် အိပ်ရာဝင်ခဲ့သည်။အထပ်မြင့်မှာနေခြင်းဖြစ်၍ လင်းနင်ပြတင်းပေါက်မပိတ်ထားပေ။ ညလေညင်းက ပြတင်းပေါက်မှတဆင့် စီချွမ်းငါးပြုတ်၏ရနံ့ကိုသယ်ဆောင်သွားလေသည်။

***

အင်တာနက်ပေါ်မှ အင်တာနက်သုံးစွဲသူများ ရူးသွပ်သွားကြပြန်သည်။

ဖြတ်သွားဖြတ်လားများဖြစ်စေ အစပိုင်းမှာ [လီမွန်မီးဖိုချောင်လေး]ကိုဆူဆဲခဲ့ကြသူများဖြစ်စေ၊ [လီမွန်မီးဖိုချောင်လေး]ကိုအာရုံစိုက်နေပြီး Hot Searchကနေတဆင့် Shining Liveကိုတွေ့သွားသရွေ့ အကုန်လုံး လင်းနင်၏ဖန်များ ဖြစ်ကုန်ကြသည်။

ဘာကြောင့်လဲ...လူတွေက ပိုက်ဆံနှင့်အစားအသောက်အတွက်သေဆုံးကြသည်။တစ်သက်လုံး အာဟာရဖြည့်စွက်စာများဘဲမှီဝဲခဲ့ကြသော အင်တာနက်သုံးစွဲသူများသည် ရုတ်တရတ် မယုံနိုင်စရာကောင်းလောက်အောင်မွှေးသောအရသာကိုရှာဖွေတွေ့ရှိသွားကြသည်။အွန်လိုင်းကနေမြည်းစမ်းပြီးနောက် အသား၏အရသာကအင်မတန်ကောင်းပြီး၊နူးညံ့ချိုမြိန်သောပေါက်စီများကလည်း သိပ်ကောင်းကာ၊စွပ်ပြုတ်ကလည်း သိပ်အရသာရှိကြောင်းကိုသိလိုက်ရသဖြင့် သူတို့အကုန်လုံး သိမ်းသွင်းခံလိုက်ကြရသည်။

မနက်စာနှင့်စီချွမ်းစတိုင်ငါးပြုတ်၏ အရသာခံလုပ်ဆောင်ချက်ကိုဖွင့်ပြီးနောက် အင်တာနက်သုံးစွဲသူများက အတူတကွအလုပ်ကြိုးစားကာ သက်ဆိုင်ရာ စကားစုပေါင်းစုံကို Hot Searchပေါ်သို့တွန်းတင်လိုက်ကြသည်။

#ဒီနေ့စီချွမ်းစတိုင်ငါးပြုတ်စားပြီးပြီလား#

#စွပ်ပြုတ်၊အသားပေါက်စီ၊ကြက်ဥကြော် ဘယ်တစ်ခုကိုအကြိုက်ဆုံးလဲ#

#အမေကနောင်ဆုံးတော့ငါ့ကို တိုက်ရိုက်ထုတ်လွှင့်မှုတွေကြည့်ခွင့်ပြုပြီ#

#တစ်မိသားစုလုံး အွန်လိုင်းမြည်းစမ်းခြင်းလုပ်နေကြ#

#လီမွန်မီးဖိုချောင်လေးရှောင်ကောကောကဘယ်သူလဲ#

#ယုန်ဖက်တီးက မနက်စာကြွားနေ#

နားမလည်ဖြစ်နေကြသောအင်တာနက်သုံးစွဲသူများစွာက နှိပ်ကြည့်ကြပြီးနောက် စိတ်အားထက်သန်နေသောအင်တာနက်သုံးစွဲသူပေါင်းစုံ၏သင်ကြားပေးမှုကိုခံလိုက်ရသည်။ သူတို့ Shining Liveကိုအမြန်ဒေါင်းလုတ်ဒ်ဆွဲလိုက်ကြပြီး အစားအသောက်စွဲလမ်းသူများဖြစ်ကုန်ကြလေသည်။ Hot Searchများ၏နာမည်ကြီးမှုက အကြာကြီးခံနေခဲ့ပြီး ယင်းကကြယ်စုကွန်ယက်၏မဟာအံ့ဖွယ်တစ်ခုဖြစ်ခဲ့လေသည်။

[ငါဒီနေ့တကယ်အားကျတယ်...ယုန်ဖက်တီးကကံကောင်းလွန်းတယ်...အဓိကအချက်က သူကတကယ်ချမ်းသာတာပဲ...လီမွန်မီးဖိုချောင်လေးပို့လိုက်တဲ့မနက်စာကိုငါမြင်လိုက်ရတယ်...ဘုရားရေ ငါသွားရည်ယိုနေပြီ...]

[ဒီနေ့ ငါ့မိသားစုကိုလာမြည်းကြည့်ဖို့ပြောခဲ့တယ်...အစပိုင်းမှာ ငါ့မိဘတွေနဲ့အဘိုးအဘွားတွေက ငါ့ကိုလျစ်လျူရှူပြီး အရေးမဟုတ်တာကိုအရာလုပ်နေတယ်ပြောတယ်...ဒါပေမဲ့အခုတော့ သူတို့ကိုကဗီဒီယိုကိုမလွှတ်တမ်းကိုင်ထားပြီး လီမွန်မီးဖိုချောင်လေးဘယ်တော့updateလုပ်မှာလဲမေးနေကြတယ်...]

[ငါပါ...ဒီနေ့ငါ့မိသားစုက ငါ့ကိုလီမွန်မီးဖိုချောင်လေးဆီကအစားအသောက်တွေကိုဘယ်လိုဝယ်ရမလဲမေးနေကြတယ်...ငါကမသိဘူး တိုက်ရိုက်ထုတ်လွှင့်မှုကြည့်မှသိမှာလို့ပြောလိုက်တယ်...အမေက ငါ့ကိုအသုံးမကျဘူးတဲ့]

[ဒီနေ့အတန်းထဲမှာ တိုက်ရိုက်ထုတ်လွှင့်မှုကိုခိုးကြည့်တာ ပါမောက္ခမိသွားတယ်...အနံ့ပိတ်ဖို့မေ့သွားတာ စာသင်ခန်းတစ်ခုလုံး ဝက်သားမှိုစတူးပေါက်စီနံ့နဲ့ပြည့်သွားတယ်လေ...ပါမောက္ခဆီကနာမည်အခေါ်ခံရတော့သေပြီမှတ်တာ...နောက်ဆုံးကျ ရုပ်တည်ကြီးနဲ့ပါမောက္ခအိုကြီးက ငါ့ကိုဘာကြည့်နေလို့အနံ့ကဒီလောက်မွှေးတာလဲလို့မေးတယ်...]

[ငါရောပဲ ...ဒီနေ့အိပ်ရာထဲမှာ အပျင်းတစ်နေတာ အမေက ငါ့ကို ကြောင်ငပျင်းလို့ဆူတယ်...ငါသူ့ကို ကျောက်ပွင့်စွပ်ပြုတ်၊ကြက်ဥကြော်၊အသားပေါက်စီနဲ့ စီချွမ်းစတိုင်ငါးပြုတ်ကိုလည်း အွန်လိုင်းကနေမြည်းစမ်းခိုင်းလိုက်ရော သူက ငါ့ကိုအပျင်းတစ်နေဖို့ခွင့်ပြုတယ်ပြောတယ်...ဒါပေမဲ့ လီမွန်မီးဖိုချောင်လေးကို မျက်စိထောက်ထောက်ကြည့်နေ၊စားစရာရှိရင်အိမ်အတွက်တစ်ယောက်စာဝေစုရအောင် လုပ်ရမယ်တဲ့]

[ငါ့အဖေက ငါ့ကိုပိုက်ဆံပို့ပေးပြီး မနက်ဖြန်ကျ Streamerကိုလက်ဆောင်ပေးပြီးStreamerရဲ့အာရုံစိုက်မှုကိုရအောင်ကြိုးစားရမယ် ပြီးရင် Streamerကို ငါတို့ကိုအစားအသောက်ပို့ခိုင်းလို့ပြောတယ် ORZ(ဒူးထောက်) ...ဒါက မှန်ကန်တဲ့ချဥ်းကပ်နည်းမဟုတ်ပေမဲ့ ငါလုံးဝသွေးဆောင်ခံလိုက်ရတယ်]

[ငါလူဆင်းရဲလေးဆိုတော့ မှတ်ချက်ရေးဖို့ စာလုံးရေ၈၀၀ရှိတဲ့ စာစီစာကုံးတစ်ပုဒ်ပြင်ဆင်ထားတယ်..အစားအသောက်ပို့ဖို့လူရွေးတဲ့အခါကျရင် ရှောင်ကောကော ငါ့ကို သတိပြုမိဖို့မျှော်လင့်ပါတယ်]

[အာ အတူတူပဲ(စီးကရက်ကိုမီးညှိ)...ရိုးရိုးသားသားပြောရရင် ငါကစာလုံးရေးသုံးထောင်ပြင်ထားတာ...ဖားတဲ့နေရာမှာငါကအတော်ဆုံးပဲ...လီမွန်ရှောင်ကောကော ကျွန်တော့်ကိုကြည့်ကြည့်]

[!!!]

ရုန်ရှင်းရှင်း Hot Searchကိုကြည့်ပြီး မဖော်ပြတတ်အောင် စိတ်လှုပ်ရှားနေမိသည်။

ယနေ့ လင်းနင်တိုက်ရိုက်ထုတ်လွှင့်ပြီး မိနစ်ငါးဆယ်အကြာမှာ သူ မနက်စာကိုလက်ခံရရှိခဲ့သည်။

ပူနွေးနေသောမနက်စာလေး သူမလက်ထဲရောက်လာချိန်မှာ သူမ၏နှလုံးသားအရည်ပျော်သွားရသည်။ယနေ့၌ တိုက်တိုက်ဆိုင်ဆိုင် သူမ၏အမေက အိမ်မှာရှိနေသဖြင့် သူမ သူမ၏အမေကို အပြင်ထွက်လာပြီး သူမနှင့်အတူစားရန်ခေါ်ခဲ့သည်။

မူလက ကျန်းဖုန်းကိုဂရုမစိုက်သည့်အတွက် သူမအမေက သူမကိုစိတ်ဆိုးနေခဲ့သည်။သူမ အပူထိန်းဘူးကို ကိုင်ထားသည်အားမြင်ချိန်မှာ ရိုးရိုးဒလီဗာရီဟုထင်ပြီး ပေါ်တင်တစ်မျိုးသွယ်ဝိုက်၍တစ်ဖုံ စောင်းပါးရိပ်ခြည်ပြောလေတော့သည်။

ရုန်ရှင်းရှင်းက သူမ၏အမေကိုထိုင်ခိုင်းပြီးနောက် လျှို့ဝှက်ဆန်းကြယ်သောအမူအရာဖြင့် အပူထိန်းဘူးကိုဖွင့်လိုက်သည်။

ယနေ့ သူမအမေ၏အမူအရာက စပ်စုလိုဟန်မှစွဲလမ်းမှုအဖြစ်ပြောင်းသွားသည်အား သူမမျက်မြင်ကြုံတွေ့လိုက်ရပြီး ယင်းကတကယ်စိတ်ဝင်စားစရာကောင်းလေသည်။သူမအမေ၏ဘဝမှာဘာတစ်ခုမှမစားခဲ့ဖူးဘဲ အာဟာရဖြည့်စွက်စာများကိုလည်းသောက်ခဲ့လေသည်။သူမအမေက အစားအသောက်ကိုစိတ်မဝင်စားသည့် အထက်တန်းလွှာသခင်မစစ်စစ်ဖြစ်သည်။အများဆုံးမှ သူမ ကျန်းမာရေးနှင့်အလှအပရေးရာတချို့ကိုသာဂရုစိုက်သည်။

ကျောက်ပွင့်စွပ်ပြုတ်က ချိုပြီးစေးကပ်ကာ အစာအိမ်ကိုနွေးထွေးစေသည်၊ဝက်သားမှိုစတူးက မွှေးပြီးသွားရည်ယိုစရာကောင်းသည်၊ကြက်ဥကြော်ကကြွပ်ရွကာ အကိုက်တိုင်းမှာ အရသာရှိ၏။ဤသည်က အာဟာရဖြည့်စွက်စာများဘယ်တော့မှမပေးနိုင်သည့်ပျော်ရွှင်မှုဖြစ်သည်။သားအမိနှစ်ယောက် စားကြည့်ပြီးနောက် စကားပြောဖို့အရေးကိုဂရုမစိုက်တော့ဘဲ အစားအသောက်အတွက်စတင်တိုက်ခိုက်ကြလေသည်။

"ချစ်သမီးလေး ဒီအရည်အသွေးမြင့်အာဟာရဓာတ်စာကို ဘယ်ကဝယ်ခဲ့တာလဲ...ငါတို့အသိုင်းအဝိုင်းထဲမှာလည်း ဘာသတင်းမှမတွေ့မိပါလား...အခုကနေစပြီး ငါတို့မိသားစု အနပ်တိုင်းမှာ ဒီအတိုင်းစားကြမယ်...ခဏလေး ငါတို့ဗီဒီယိုနဲ့နင်ရိုက်ထားတဲ့ဓာတ်ပုံတွေပို့ပေး...ငါအဲဒါတွေကို ဟိုစိတ်ကြီးဝင်နေတဲ့သခင်မတွေဆီပို့ပေးပြီး သူတို့မနာလိုပြီးသေအောင်လုပ်ပစ်မယ်..."

"ဘုရားရေ ဖြေးဖြေးစားပါ အမေရယ်...ရှောင်ကောကောပေးတဲ့မနက်စာက များပါတယ်...နင်းကန်မစားနဲ့...အရမ်းအရသာရှိတယ်မလား"

"ရှောင်ကောကော...သမီး အဲလိုလူမျိုးကိုဘယ်ကနေတွေ့ခဲ့တာလဲ"

"မနေ့က Shining Liveကြည့်နေရင်း [လီမွန်မီးဖိုချောင်လေး]ဆိုတဲ့Streamerကိုတွေ့ခဲ့တယ်...သူက ရှောင်ကောကောပဲ

...ဒါကိုသူလုပ်ထားတာ...ကျွန်မသူ့ကို တော်ပီဒိုနည်းနည်းလောက်လက်ဆောင်ပေးခဲ့တယ်...ဒါပေမဲ့သူကကျွန်မကိုကျောင်းသားထင်ပြီး သူ့ကိုအများကြီးလက်ဆောင်ပေးခွင့်မပြုဘူး...ပြီးတော့ ကျွန်မကို ဒါပို့ပေးလိုက်တာလေ ဟီးဟီးဟီးဟီ..."

"အမေ့အတွက်လည်း အကောင့်ဖွင့်ပေး...အမေလည်းသူ့ကိုလက်ဆောင်ပေးမယ်...ငါတို့မနက်ဖြန်ကျ ဒါပဲစားရအောင် နင့်အဖေအတွက်လည်းချန်ထားကြမယ်..."

"အမေ ဒါက ဒီအတိုင်းလွယ်လွယ်ရတာမဟုတ်ဘူး...အခုဆိုအဲဒါကိုဝယ်ဖို့လူဘယ်နှစ်ယောက်လောက်စောင့်နေလဲအမေမသိဘူး...သူက တစ်ခါမှမရောင်းဘူးရယ်...ကျွန်မနဲ့တခြားအင်တာနက်သုံးစွဲသူနှစ်ယောက်ကိုပဲပို့ပေးခဲ့တာ...

တိုက်ရိုက်ထုတ်လွှင့်မှုအခန်းထဲက ဖန်အရေအတွက်က ၁၀၀၀၀ ကျော်လုနီးပါးပဲ...Hot Searchထဲရောက်ပြီးရော ဖန်အရေအတွက်ကထိုးတက်လာတာ...ကျွန်မတို့ဒါကိုကြာကြာမစားနိုင်မှာစိုးရတယ်"

***

ညအချိန်တွင် ငိုက်မျည်းနေသောကြောင်တစ်ကောင်က ၎င်း၏မျက်လုံးများကိုဖွင့်လိုက်လေသည်။လေထဲက အနံ့ဖျော့ဖျော့ကိုရပြီး ခေါင်းခါကာ ၎င်း၏အကြည့်ကို တစ်ခုသောအထပ်ကပြတင်းပေါက်ဆီပို့လိုက်၏။

ဒီအနံ့က ဘာလို့ဒီလောက် မွှေးနေရတာလဲ...

အတော်လေးဗိုက်ဆာနေ၍ဖြစ်မည်၊

ကြောင်က အောက်ထပ်ဆီတလျှောက်လုံးပြေးသွားခဲ့သည်။အလင်းဦးနှောက်မရှိသော သာမန်ကြောင်တစ်ကောင်က လူနေအဆောက်အဦးထဲကိုဝင်မရပေ။

သို့သော် ဤကြောင်က ဘာအတားအဆီးမှမရှိဘဲ အဆောက်အဦး၏တံခါးထဲသို့ဝင်သွားခဲ့ပြီး တစ်ခုသော အစိမ်းရောင်အလင်းနှင့်အထပ်ဆီသို့တန်းတန်းမတ်မတ်သွားလေသည်။

၎င်းကတံခါးဝမှာ ခဏရပ်ကာ အမြှီးယမ်းလိုက်သည်။အနံ့ခံကြည့်သည့်အခါ ဤသည်က ယနေ့သူ့ကိုဆေးရုံခေါ်သွားချင်သည့်လူငယ်၏အိမ်ဖြစ်နေသည်။၎င်းက ခေါင်းငုံ့ကာ နှာရှုံ့လိုက်သည်၊သူ့ကိုစွဲလမ်းစေသောအနံ့က သည်ကနေလာခြင်းဖြစ်သည်။

ဘယ်အချိန်တုန်းက ဒီလိုမျိုး အနံ့ရလိုက်ရုံနဲ့လူတွေကိုစွဲလမ်းစေတဲ့ အဆင့်ရှိတဲ့ဆေးမျိုး ဒီနိုင်ငံမှာရှိသွားတာလဲ...

ကြောင်က စင်္ကြံမှပြတင်းပေါက်ပေါ်ကိုခုန်တက်လိုက်ပြီး ကြမ်းအပြင်ဘက် စင်တီမီတာအနည်းငယ်မျှသာရှိသောအစွန်ငယ်လေးကနေ လင်းနင်၏အိမ် ပြတင်းပေါက်ဆီတလျှောက်ခုန်ကူးလိုက်သည်။အထဲကိုခုန်ဝင်လိုက်သည်နှင့် အနံ့က ၎င်းကိုအာသာငမ်းငမ်းဖြစ်လာစေလွန်း၍ အမြှီးကိုမျက်နှာဆီကွေးကာလုံအောင်ရစ်ပတ်လိုက်သည်။ထမင်းစားပွဲပေါ်ခုန်တက်လိုက်ပြီးနောက် ပန်းကန်တစ်ချပ်ကိုတွေ့လိုက်ရ၏။

ထိုပန်းကန်ထဲမှာ...စားစရာ ပန်းကန်တစ်ဝက်စာ ရှိနေသည်။

နီနီရဲရဲနှင့် ထိုထဲကတချို့ကဟင်းရွက်များဖြစ်ပုံရပြီး တချို့ကအသားဖြစ်ပုံရသည်။တခြားပန်းကန်လုံးတစ်ခုထဲမှာလည်း အဖြူရောင်အစေ့သေးသေးလေးများရှိနေသည်။၎င်း၏မှတ်ဉာဏ်ထဲမှ အနည်းငယ်သောမှတ်ဉာဏ်များအရ ဤအရာများကို...ထမင်း၊အသားနှင့်ဟင်းရွက်ဟင်းရည်ဟုခေါ်ပုံရကြောင်းမှတ်မိ၏။

သိချင်စိတ်နှင့်သတိအပြည့်ရှိနေသော ခပ်သဲ့သဲ့ညည်းသံတစ်ခု၎င်း၏လည်ချောင်းထဲကထွက်လာပြီး အသံသေးသေးလေးက

ပင်မအိပ်ခန်းထဲမှာအိပ်နေသည့်လူ မကြားအောင်မတရားသတိထားနေသည့်အတိုင်းပင်။

ဒါက အဆိပ်ရှိလား...

အဆိပ်ရှိမရှိမသိသည့်အတွက် လက်ဖဝါးလေးကိုထုတ်ကာထိကြည့်လိုက်သည်။အနည်းငယ်အေးသည်။ဗိုက်ကဆာလောင်မှုကြောင့်တဂျုတ်ဂျုတ်မြည်လာသော်လည်း ကြောင်လေးက အတန်ကြာအတွေးလွန်ဆွဲနေပြီး မစားဘဲတင်းခံနေဆဲပင်။

၎င်း၏ခန္ဓာကိုယ်က ဒဏ်ရာအများကြီးရထားသဖြင့် ခေါင်းကမူးဝေနေသည်။ တိတ်တိတ်လေးလင်းနင်၏အိပ်ခန်းထဲကိုဝင်ကာ လင်းနင်၏အချက်အလက်ပေါင်းစုံကို လှန်လှောရှာဖွေလိုက်၏။ လင်းနင်၏အထောက်အထားက အန္တရာယ်မရှိကြောင်းအတည်ပြုလိုက်ပြီးမှ အနည်းငယ် စိတ်သက်သာရာရသွားလေသည်။

ပြုံးလိုက်သည့်အခါ အန္တရာယ်မရှိပုံပေါ်သည့် မအောင်မြင်သောအနုပညာရှင်ငယ်လေး၊ဖျော်ဖြေရေးလောကထဲသာပစ်ထည့်လိုက်ပါက အရိုးပါမကျန်ဝါးစားခံရပေလိမ့်မည်။

ကုတင်ပေါ်မှာအိပ်နေသည့်လူမှာ နှစ်လိုဖွယ်ကောင်းသည့် မျက်နှာတစ်ခုရှိပုံရပြီး တကယ်ကိုဖျော်ဖြေရေးလောကအတွက် ကောင်းမွန်သောကိုယ်စားလှယ်လောင်းတစ်ယောက်ဖြစ်သည်။သို့သော် ယနေ့ ထိုသူစကားပြောစဥ်က သူ၏လည်ချောင်းကဒဏ်ရာရထားပုံရသည်။လက်ကောက်ဝတ်မှာလည်းဒဏ်ရာများရှိပြီး ကိုယ့်ကိုကိုယ်အနာတရဖြစ်အောင်လုပ်ထားခြင်းသို့မဟုတ် ကိုယ့်ကိုကိုယ်သတ်သေထားခြင်းဖြစ်ဖို့များသည်။

သို့သော် ဘာကြောင့်မှန်းမသိ ဤလူအနားမှာနေရသည်ကတင် သူ့ကိုအလွန်သက်တောင့်သက်သာရှိစေပြီး သူ့ခန္ဓာကိုယ်က အနွေးဓာတ်များဖြာထွက်နေသည့်အတိုင်းဖြစ်၏။

စိတ်ရှုပ်ထွေးမှုနှင့်သတိထားမှုအရိပ်အယောင်တစ်ခုကြောင်၏မျက်လုံးများထဲမှာဖြတ်ပြေးသွားပြီး ၎င်းနောက် တိတ်ဆိတ်စွာ အသာလေးထွက်လာခဲ့သည်။

***

1.Light brain(ဝါ)optical brain computer အလင်းကိုအသုံးပြုပြီးဦးနှောက်နှင့်ကွန်ပျူတာတို့ကြားမှာတိုက်ရိုက်ဆက်သွယ်ပေးသည့်နည်းပညာ = အလင်းဦးနှောက်လို့ပဲ တိုက်ရိုက်သုံးသွားပါမယ်

>>><<<

🐈🐈🐈

Prev Next