Ch 3

ငါးဆားနယ် ကိုယ်လုပ်တော်

အပိုင်း ၃

ဖေးလင်ယွဲ့ကမူ တိုးညှင်းသော အသံဖြင့် ပြောလိုက်သည်။ "သူမ ပြောတဲ့အတိုင်း လုပ်ပေးလိုက်" 

သစ်ပင်ပေါ်မှ အမျိုးသမီး စကားပြောလိုက်သောအခါ ဖေးလင်ယွဲ့သည် သူမ၏ အသံကို ရင်းနှီးနေသလို ခံစားလိုက်ရသည်။ သူမသည် တကယ်ပင် သူ၏ကိုယ်လုပ်တော်များထဲမှ တစ်ဦး ဖြစ်နေခြင်းလော။

သူ၏ နန်းဆောင်များထဲတွင် သစ်ပင်တက်ရသည်ကို ဝါသနာပါသော ကိုယ်လုပ်တော် မည်သည့်အချိန်ကတည်းက ရှိနေခဲ့သနည်း။

လှေကားရှိသွားသဖြင့် ယွီမြောင်ဟွာသည် သစ်တော်သီးအိတ်ကို ကိုင်လျက် အဆင်ပြေပြေပင် ဆင်းလာခဲ့သည်။ ဤသစ်တော်သီးများကြောင့်သာ သူမ ဧကရာဇ်နှင့် ဆုံတွေ့ခဲ့ရခြင်း ဖြစ်သဖြင့် ၎င်းတို့ကို မဖြစ်မနေ ယူသွားရမည်၊ မဟုတ်ပါက ယနေ့ ပင်ပန်းခဲ့သမျှ အချည်းနှီး ဖြစ်သွားလိမ့်မည်ပင်။ ထို့အပြင် အိတ်ထဲတွင် သူမ အမှတ် ၁၀၀ ဖြင့် လဲလှယ်ထားသော ငရုတ်ပင်လေးများလည်း ပါရှိ၏။

သူမသည် အလျင်အမြန်ပင် အရိုအသေပေးလိုက်သည်။ အတိတ်ဘဝမှတ်ဉာဏ်များ ရရှိထားသော်လည်း ဤဘဝ၏ စည်းစနစ်များမှာ သူမ၏ စိတ်ထဲတွင် စွဲမြဲနေဆဲပင် ဖြစ်သည်။ "ဒီအရပ်သူယွီက အရှင်မင်းကြီးကို အရိုအသေပြုပါတယ်" 

သူမသည် အရပ်သားအဆင့်သို့ လျှော့ချခံထားရသဖြင့် ကိုယ်လုပ်တော်အဖြစ် သတ်မှတ်ထားခြင်း မရှိတော့သည် မဟုတ်ပါလား။

ယွီမြောင်ဟွာ၏ လှပမှုမှာ ငြင်းပယ်၍မရနိုင်ပေ။ ထို့ကြောင့်လည်း သူမသည် နန်းတွင်းသို့ ရွေးချယ်ခံခဲ့ရခြင်း ဖြစ်သည်။ သူမ၏ မျက်နှာပေါ်တွင် ဖုန်မှုန့်အချို့ ပေကျံနေပြီး ဆံပင်တွင်လည်း သစ်ရွက်များ ကပ်နေသော်လည်း သူမ၏ သဘာဝအလှမှာ ထင်ရှားနေဆဲ ဖြစ်၏။ သူမ ရှိနေခြင်းက သစ်သီးခြံကြီးကိုပင် နောက်ခံကားချပ်တစ်ခုအဖြစ် ပြောင်းလဲသွားစေသည်။

သူမ၏ ထူးခြားသော အလှအပနှင့် "ယွီ" ဟူသော မျိုးရိုးအမည် ရှားပါးမှုကြောင့် ဖေးလင်ယွဲ့မှာ သူမ မည်သူဖြစ်ကြောင်း ချက်ချင်းပင် မှတ်မိသွားလေ၏။

လွန်ခဲ့သော ခြောက်လခန့်က သဲ့ဖေးကို အဆိပ်ခတ်ရန် ကြိုးစားခဲ့သည်ဟု စွပ်စွဲခံရကာ အအေး နန်းဆောင်သို့ နှင်ထုတ်ခံလိုက်ရသည့် ယွီဆိုသူ မဟုတ်လား။ တစ်နှစ် သုံးသီးစား စပါးကို ရရှိဖို့အတွက် အခွင့်အရေးက သူမဆီမှာ ရှိနေတာလား။

မတရားမှု... ဒါဆို သူမ အဲဒီတုန်းက လုပ်ကြံစွပ်စွဲခံခဲ့ရတာလား။

လွန်ခဲ့သည့် ခြောက်လက နန်းတွင်းရေးရာများဖြင့် အလုပ်ရှုပ်နေစဉ် ဤအဆိပ်ခတ်မှု သတင်း ပေါ်ထွက်ခဲ့ခြင်း ဖြစ်သည်။ ထိုစဉ်က ခိုင်လုံသော သက်သေများကြောင့် သူသည် ဒေါသထွက်ကာ ပြစ်မှုကျူးလွန်သူကို အအေး နန်းဆောင်သို့ ပို့ရန် အလျင်အမြန် အမိန့်ချခဲ့သော်လည်း၊ ယခုအခါ ဤကိစ္စတွင် နောက်ကွယ်မှ အကြောင်းအရင်းများ ရှိနေနိုင်သည်ကို သူ သတိပြုမိလာသည်။

စပါးမျိုးစေ့တွေအတွက်ဆိုရင် ဒီကိစ္စမှာ နောက်ကွယ်က အကြောင်းအရာတွေ ရှိကိုရှိရမည်။

"မင်း ဘာလို့ ဒီကို ရောက်နေတာလဲ"

ယွီမြောင်ဟွာသည် ခေါင်းကို ငုံ့ထားကာ တတ်နိုင်သမျှ ရိုးသားသည့်ပုံစံဖြင့် ပြောလိုက်သည်။ "ကျွန်တော်မျိုးမ သစ်တော်သီးအချို့ ခူးချင်လို့ပါ" 

မျက်ရည်အချို့ ဝဲပြလိုက်လျှင် ပိုကောင်းမလားဟု သူမ တွေးမိသော်လည်း အတင်းအကျပ် မငိုနိုင်ပေ။

"မင်း တစ်ယောက်တည်း လာတာလား။ မင်းရဲ့ အစေခံတွေကော ဘယ်မှာလဲ" ဖေးလင်ယွဲ့သည် သစ်ပင်ကို မော့ကြည့်လိုက်သော်လည်း မည်သူမျှ ပုန်းမနေပေ။ ဒါဆို ယွီမြောင်ဟွာက လူတွေမမြင်နိုင်တဲ့ နတ်တွေနဲ့ စကားပြောနေတာလား။

သူမသည် ငြိမ်သက်စွာပင် ဖြေလိုက်သည်။ "ကျွန်တော်မျိုးမ တစ်ယောက်တည်း လာခဲ့တာပါ"  

[ Host... မြန်မြန်လုပ်၊ သင့်မှာ အပြစ်မရှိကြောင်း ပြောတော့! ဒီကိစ္စကို ပြန်ပြီး စစ်ဆေးပေးဖို့ ဧကရာဇ်ကို တောင်းဆိုလိုက်စမ်းပါ။ သင်က ဒီအအေး နန်းဆောင်မှာပဲ တစ်သက်လုံး နေချင်တာလား။ ကြည့်စမ်း... သူ သင့်အပေါ် ဘယ်လောက်တောင် စိတ်ရှည်ပေးနေလဲ၊ သင့်ကို ချက်ချင်း သတ်ဖို့လဲ အမိန့်မပေးဘူး။ သူ သင့်ကို မြင်မြင်ချင်း ချစ်သွားတာ ဖြစ်ရမယ်!]

[လွန်ခဲ့တဲ့ ခြောက်လက ငါ့ကို မချစ်ခဲ့တဲ့သူက အခုမှ ဘာလို့ ချစ်မှာလဲ။ နင် တကယ်ပဲ အဲဒီလို ထင်နေတာလား။ ငါ သစ်ပင်တက်နေတာကို မြင်ပြီး ထူးခြားတဲ့ မိန်းကလေးလို့ ထင်သွားတာမျိုး မဟုတ်ရင်တော့ ဒါဟာ မဖြစ်နိုင်ပါဘူး]

ထိုသို့ တွေးမိခြင်းမှာပင် သူမအတွက် အဓိပ္ပာယ်မရှိသလို ခံစားရ၏။

မည်သို့ပင်ဖြစ်စေ သူမ ကြိုးစားကြည့်ရမည်။ ဧကရာဇ်၏ အကြိုက်က တကယ်ပဲ ထူးဆန်းနေလျှင်ကော။

ယွီမြောင်ဟွာသည် စတင်၍ တောင်းပန်တော့သည်။ "အရှင်မင်းကြီး... ကျွန်တော်မျိုးမ မတရား လုပ်ကြံခံရတာပါ။ ကျွန်တော်မျိုးမ သဲ့ဖေးကို ဘယ်တုန်းကမှ အဆိပ်မခတ်ခဲ့ပါဘူး... သဲ့ဖေးက ကျွန်တော်မျိုးမအပေါ် အရမ်းကောင်းခဲ့တာ။ ကျွန်တော်မျိုးမ ဘယ်လိုလုပ်ပြီး သဲ့ဖေးကို အန္တရာယ်ပြုရမှာလဲ။ အဲဒီအစေခံမလေးက လာဘ်ထိုးခံထားရတာပါ။ ကျွန်တော်မျိုးမရဲ့ အမှုကို ပြန်လည် စစ်ဆေးပေးပြီး ကျွန်တော်မျိုးမ နာမည်ကို ပြန်အဖက်ဆယ်ပေးဖို့ တောင်းဆိုပါတယ်—"

သူမသည် မျက်ရည်ကျလာစေရန် မိမိကိုယ်ကိုယ် ဆိတ်လိုက်ပြီး ဝမ်းနည်းနေသည့်ပုံ ပေါက်အောင် ရှိုက်သံအချို့ကိုလည်း ထည့်လိုက်၏။

ယွီမြောင်ဟွာသည် သူမ၏ စကားမှာ မမှန်ကန်ဟု ထင်မည်စိုးသဖြင့် ကျိန်ဆိုရန် ပြင်ဆင်လိုက်သော်လည်း ဧကရာဇ်က သူမကို ချက်ချင်း ယုံကြည်လိမ့်မည်ဟု သူမ မထင်ထားခဲ့ပေ။

နောက်တစ်ခဏတွင် သူမ ထင်ထားသည်မှာ မှားသွားခဲ့သည်။

ဖေးလင်ယွဲ့က ခေါင်းကို အနည်းငယ် ငြိမ့်ပြလိုက်၏။ "မင်းက အဲဒီလို လူမျိုး မဟုတ်ဘူးဆိုတာ ကျန်း ယုံကြည်တယ်။ ဒီကိစ္စကို ကျန်း သေချာ ပြန်စစ်ဆေးပြီး အမှန်တရားကို ဖော်ထုတ်ပေးမယ်" 

ယွီမြောင်ဟွာပြောမည့် ကျိန်ဆိုချက်မှာ လည်ချောင်းထဲမှာပင် တစ်သွားရခဲ့သည်။ သူမမှာ အံ့ဩလွန်းသဖြင့် ဆွံ့အလျက် ရပ်နေမိတော့၏။

ဟမ်...?

ဧကရာဇ်က ဒီအတိုင်းပဲ လက်ခံလိုက်တာလား။ အသေးစိတ်တောင် မမေးဘူးလား။

ဒါဆို သူက တကယ်ပဲ သစ်ပင်တက်တဲ့ မိန်းကလေးတွေကို သဘောကျတာလား။ သူ့အကြိုက်က တကယ်ကို ထူးခြားတာပဲဟု သူမ တွေးလိုက်မိသည်။

စနစ်သည် အလွန်အမင်း ဝမ်းသာပီတိဖြစ်သွားကာ နားကွဲမတတ် အော်ဟစ်လိုက်တော့သည်။ [အား... Host! သင်ကတော့ တကယ့်ကို အံ့သြဖို့ကောင်းတာပဲ။ သင့်မှာ အချစ်တော် ကိုယ်လုပ်တော်ဖြစ်မဲ့ ပါရမီပါမှန်း ကျွန်တော် သိပြီးသားပါ။ နောက်ဆုံးတော့ ကျွန်တော်တို့ရဲ့ ကောင်းစားမဲ့နေ့တွေ ရောက်လာပြီ!]

ယွီမြောင်ဟွာမှာမူ တိမ်ပေါ်တွင် လွင့်မျောနေသကဲ့သို့ အနည်းငယ် ကြောင်အမ်းအမ်း ဖြစ်နေဆဲပင်။ ဒါတွေအားလုံးဟာ အိပ်မက်တစ်ခုလို ခံစားနေရ၏။ [ငါ့ရဲ့ ဆွဲဆောင်မှုကပဲ အလွန်အမင်း ပြင်းထန်လွန်းလို့ ထင်ပါရဲ့]။ သူမအနေဖြင့် ဤအကြောင်းပြချက်မှလွဲ၍ အခြားစဉ်းစားစရာ မရှိတော့ပေ။ မဟုတ်လျှင်မူ ဒါဟာ လုံးဝ အဓိပ္ပာယ်မရှိချေ။

သူမသာ ဇဝေဇဝါ ဖြစ်နေသည်မဟုတ်ဘဲ ဖေးလင်ယွဲ့၏ အနီးကပ်အစေခံများပင် နားမလည်နိုင်အောင် ဖြစ်နေကြရသည်။ ဧကရာဇ်မင်းမြတ်၏ ယွီမြောင်ဟွာအပေါ် ထားရှိသော သဘောထားမှာ... ထူးထူးခြားခြား ထူးခြားလွန်းနေ၏။ အကယ်၍ သူမသာ တကယ်ပဲ မတရားခံခဲ့ရခြင်းဖြစ်ပါက နန်းတွင်းကိုယ်လုပ်တော်များကြားတွင် ကြီးမားသော ဂယက်ရိုက်ခတ်မှုများ ဖြစ်လာတော့မည်မှာ အမှန်ပင် ဖြစ်သည်။

တစ်နှစ်လျှင် သုံးသီးစားနိုင်သော စပါးမျိုးနှင့် ပတ်သက်နေသဖြင့် ဖေးလင်ယွဲ့သည် ယွီမြောင်ဟွာထက်ပင် ပို၍ စိတ်ဝင်တစား ရှိနေခဲ့၏။ သူမ၏ ရည်မှန်းချက် ကင်းမဲ့မှုအပေါ် သူ စိတ်မရှည် ဖြစ်နေမိသည်။ သူမသည် ဤမျှကြီးမားသော မတရားမှုကို ခံစားခဲ့ရသော်လည်း အေးစက်လှသော နန်းဆောင်၌ ခြောက်လတိုင်တိုင် ငြိမ်သက်စွာ နေထိုင်ခဲ့ပြီး သူ့အာရုံကို ဆွဲဆောင်ရန် တစ်ခါမျှပင် မကြိုးစားခဲ့ပေ။ အကယ်၍ ယနေ့တွင် သူနှင့် မဆုံတွေ့ခဲ့ပါက သူမသည် တစ်သက်လုံး မတရားစွပ်စွဲချက်များအောက်တွင်သာ ဘဝကို အရှုံးပေးနေတော့မည်လား။

တစ်လအတွင်းမှာပင် သူသည် ဤကိစ္စ၏ အရင်းအမြစ်ကို ဖော်ထုတ်နိုင်ခဲ့၏။

ဖေးလင်ယွဲ့သည် သူ၏အစေခံ ချိုင်ရှို့အား ယွီမြောင်ဟွာကို ပြန်ပို့ဆောင်ပေးရန် အမိန့်ပေးလိုက်သည်။ သူမ မြင်ကွင်းမှ ပျောက်ကွယ်သွားသည်နှင့် ထိုသူသည် ကျန်ရှိသူများကို အေးစက်သောအကြည့်ဖြင့် ကြည့်လိုက်၏။ "ဒီနေ့ ဖြစ်ခဲ့သမျှကို တစ်လုံးမှ အပြင်ကို မပေါက်ကြားစေနဲ့"  ပတ်ဝန်းကျင်ရှိ အစေခံများမှာလည်း အရိုအသေပြုကာ နာခံခဲ့ကြသည်။

ဧကရာဇ်၏ အစေခံ ချိုင်ရှို့က ယွီမြောင်ဟွာကို လိုက်လံပို့ဆောင်ပေးနေသည်ကို မြင်သောအခါ ချွေ့ဝေနှင့် ချင်းလျိုတို့မှာ ထိတ်လန့်သွားကြသည်။ ချွေ့ဝေ၏ မျက်နှာမှာ ဖြူလျော်သွားပြီး အေးစက်လှသော နန်းဆောင်မှ ထွက်ခွာခြင်းဖြင့် နန်းတွင်းစည်းကမ်းကို ဖောက်ဖျက်မိပြီလော၊ အပြစ်ပေးခံရမည်လောဟု စိုးရိမ်နေလေ၏။ သို့သော် ချင်းလျိုမှာမူ ပို၍ တည်ငြိမ်နေသည်။ ဘာပဲဖြစ်ဖြစ် အခြေအနေက လက်ရှိထက် ပိုဆိုးစရာ မရှိတော့ပေ။

ချိုင်ရှို့ကမူ သူတို့ကို နွေးထွေးစွာ ပြုံးပြလိုက်၏။ "ဧကရာဇ်မင်းမြတ်က သခင်မယွီရဲ့ အမှုကို ပြန်စစ်ဆေးဖို့ အမိန့်ပေးလိုက်ပြီ။ မယ်မယ်ကို ကောင်းကောင်း ပြုစုကြ၊ မင်းတို့ရဲ့ ကံကောင်းခြင်းတွေက ရောက်လာတော့မှာပါ" 

ဧကရာဇ်က ယွီမြောင်ဟွာကို မည်မျှ တန်ဖိုးထားကြောင်း သူ သိမြင်လိုက်သဖြင့် ကြိုတင်၍ မျက်နှာသာပေးထားခြင်းမှာ မမှားကြောင်း သူ နားလည်လိုက်သည်။ ထို့အပြင် အအေး နန်းဆောင်အတွင်းရှိ ဝေဆာနေသော အပင်များနှင့် တိရစ္ဆာန်များကိုလည်း သူ သတိပြုမိသွား၏။ ယွီမြောင်ဟွာ၏ ကြံ့ကြံ့ခံနိုင်ရည်အပေါ် ချိုင်ရှို့ အံ့သြမဆုံး ဖြစ်နေရသည်။

ကိုယ်လုပ်တော်အများစုမှာ ဤနေရာသို့ ရောက်လာပြီး လအနည်းငယ်အတွင်း ရုပ်ရည်ရော စိတ်ဓာတ်ပါ နွမ်းလျသွားလေ့ရှိသော်လည်း သူမမှာမူ ဟင်းသီးဟင်းရွက်များ စိုက်ပျိုးကာ ကြက်များကို တုတ်တုတ်ဖြိုးဖြိုးဖြစ်အောင် မွေးမြူထား၏။ ထိုကြက်များမှာ တကယ်ပင် အရသာရှိမည့်ပုံ ပေါက်နေ၏။

ချိုင်ရှို့ ထွက်သွားပြီးနောက် ချွေ့ဝေနှင့် ချင်းလျိုတို့မှာ ယွီမြောင်ဟွာနားသို့ တိုးကပ်လာကြသည်။ "သခင်မလေး... ဘာဖြစ်ခဲ့တာလဲ။ သစ်သီးခြံထဲမှာ ဧကရာဇ်နဲ့ တကယ် ဆုံခဲ့တာလား" ချိုင်ရှို့၏ စကားအရဆိုလျှင် ဧကရာဇ်သည် သူမကို အပြစ်မပေးသည့်အပြင် သူမ၌ အပြစ်မရှိကြောင်းကိုပင် ယုံကြည်နေသကဲ့သို့ ဖြစ်နေ၏။

ပြန်လာရသည့် လမ်းခရီးမှာ ရှည်လျားလှသဖြင့် ယွီမြောင်ဟွာမှာ စိတ်အေးသွားပြီ ဖြစ်၏။ "အင်း... ဧကရာဇ်နဲ့ ဆုံခဲ့တယ်။ ငါတို့ မတရား စွပ်စွဲခံရတဲ့အကြောင်းကို ပြောပြလိုက်တော့ သူက အဆိပ်ခတ်မှုအမှုကို ပြန်စစ်ပေးဖို့ သဘောတူလိုက်တယ်" 

ထိုစကားကို ကြားရသောအခါ ချွေ့ဝေ၏ ရင်ထဲမှ အလုံးကြီး ကျသွားတော့သည်။ သူမသည် လက်အုပ်ချီကာ ဆုတောင်းတော့၏။ "ကျေးဇူးတင်ပါတယ်! ကျေးဇူးတင်ပါတယ်!" 

 "သခင်မလေးကတော့ တကယ့်ကို အံ့သြစရာပဲ၊ တကယ်ကြီး အောင်မြင်သွားတာပဲ!"

 "ဟုတ်ပါ့... ကျွန်မသာဆိုရင် ကြောက်လွန်းလို့ စကားတောင် ထွက်မှာ မဟုတ်ဘူး"  

အစေခံမလေးများ၏ ချီးကျူးသံများကြောင့် ယွီမြောင်ဟွာမှာ ပြုံးနေရုံသာ တတ်နိုင်၏။ အင်း... ဆက်ပြီး ချီးကျူးကြစမ်းပါ။ ငါက တကယ်ကို တော်တဲ့သူလေ! အသေးစိတ်တွေက အရေးမကြီးပါဘူး၊ ရလဒ်ကသာ အရေးကြီးတာ။ သူမ အရေးကြီးဆုံးအချက်ကို မေ့မထားပေ။

"သစ်တော်သီး! ငါ သစ်တော်သီးနဲ့ ကြက်သားကြော် စားချင်တယ်!" ဤဟင်းလျာအတွက် သူမ အတော်ပင် ပင်ပန်းခဲ့ရသဖြင့် ဝအောင်စားကာ သူမ၏ စိတ်ဒဏ်ရာကို ကုစားရမည်ဟု သူမ တွေးလိုက်သည်။

"အို့... ပြီးတော့ သစ်သီးခြံထဲမှာ အနီရောင်အသီးတွေနဲ့ ထူးဆန်းတဲ့ အပင်တစ်ပင် တွေ့ခဲ့တယ်။ ကြည့်ရတာ တစ်မျိုးလေးပဲ၊ အဲ့ဒါကို စိုက်ကြည့်ပြီး စားလို့ရမရ ကြည့်ရအောင်" 

……

သစ်သီးခြံမှာ ဝေးလံလှသည့်အပြင် ဖေးလင်ယွဲ့၏ သတိပေးချက်ကြောင့် နန်းတွင်းကိုယ်လုပ်တော်များမှာ သူနှင့် ယွီမြောင်ဟွာ ဆုံတွေ့ခဲ့သည်ကို မသိရှိခဲ့ကြပေ။

ယွီမြောင်ဟွာအပေါ် မတရားစွပ်စွဲမှုမှာ လွန်ခဲ့သည့် ခြောက်လက ဖြစ်ပွားခဲ့ခြင်း ဖြစ်သည်။ မည်သူ့ကိုမျှ သတိမမူမိစေရန် ဖေးလင်ယွဲ့သည် သူ၏ အရိပ်ကိုယ်ရံတော်များကို လျှို့ဝှက်စွာ စုံစမ်းခိုင်းလိုက်၏။ ကိုယ့်ကိုယ်ကိုယ် သတ်သေသွားသော အစေခံမလေး ယွီကျူးမှစတင်ကာ စုံစမ်းခဲ့ရာ သူမ မရှိတော့သော်လည်း သူမ၏ မိသားစုမှာ ကျန်ရှိနေဆဲ ဖြစ်သည်။

သုံးရက်အကြာတွင် ယွီကျူး၏ မိသားစုနှင့် ပတ်သက်သော စုံစမ်းချက်များကို ဖေးလင်ယွဲ့ထံ တင်ပြခဲ့သည်။ လွန်ခဲ့သည့် ခြောက်လအတွင်း သူမ၏ ဆွေမျိုးများမှာ "မတော်တဆမှု" များ ဆက်တိုက် ကြုံတွေ့ခဲ့ရ၏။ လောင်းကစားကြွေးများ တင်နေသော သူမ၏ မောင်ဖြစ်သူမှာ ကြွေးမြီရှင်များလက်မှ လွတ်အောင် အခြားဒေသသို့ ထွက်ပြေးသွားခဲ့ပြီး ကျန်မိသားစုဝင်များမှာမူ ညလယ်ပိုင်းတွင် လောင်ကျွမ်းခဲ့သော မီးဘေးကြောင့် သေဆုံးခဲ့ကြလေသည်။

ကျူးလွန်သူ၏ နည်းလမ်းမှာ အလွန်ပင် ပြတ်သားလှ၏။ သက်သေများကို နှုတ်ပိတ်ရန် ကြိုးစားခဲ့ခြင်းပင်။ အသက်ရှင်ကျန်ရစ်သူမှာ ပျောက်ကွယ်နေသော ယွီကျူး၏ မောင်ဖြစ်သူသာ ရှိတော့သဖြင့် သဲလွန်စများမှာ ပြတ်တောက်နေ၏။

ဖေးလင်ယွဲ့သည် လူတစ်ဦးအား ယွီကျူး၏ မောင်ဖြစ်သူအဖြစ် ဟန်ဆောင်ခိုင်းကာ ချမ်းသာလာဟန်ပြ၍ လူသတ်သမားကို မြှူထုတ်ရန် အမိန့်ပေးလိုက်သည်။ ထိုအကြံမှာ အောင်မြင်ခဲ့၏။ နောက်ကွယ်မှ စီစဉ်သူသည် သတင်းကို ကြားသည်နှင့် လူသတ်သမားကို လွှတ်ခဲ့ရာ စုံစမ်းနေသည့် ကိုယ်ရံတော်များက ဖမ်းဆီးနိုင်ခဲ့ပြီး နန်းတွင်းအကျဉ်းထောင်သို့ ပို့ဆောင်လိုက်၏။

နှစ်ရက်အကြာတွင် ဖေးလင်ယွဲ့သည် ဝန်ခံချက်ကို ကြည့်ရှုပြီးနောက် ချက်ချင်း အမိန့်ထုတ်ပြန်လိုက်သည်။ သဲ့ဖေးအား အဆိပ်ခတ်ရန် ကြိုးစားမှုနှင့် ယွီမြောင်ဟွာကို လုပ်ကြံစွပ်စွဲမှုတို့ဖြင့် ကိုယ်လုပ်တော် မင်နှင့် သူမ၏ မိသားစုတစ်ခုလုံးကို ဖမ်းဆီးရန် အမိန့်ချလိုက်၏။ မင်ဖေးနှင့် သူမ၏ အစေခံများကို ချက်ချင်း ဖမ်းဆီးခေါ်ဆောင်သွားကြသည်။

ယွီမြောင်ဟွာကို ဒုက္ခပေးခဲ့သူမှာ သူမနှင့်အတူ နန်းတွင်းသို့ ဝင်ရောက်လာခဲ့သော လင်းရှု့ ဖြစ်သည်။ လင်း မိသားစုမှာ ကျင်းကျိုးရှိ အချမ်းသာဆုံး ဆားကုန်သည်ကြီးများ ဖြစ်ကြပြီး သြဇာအာဏာလည်း ကြီးမားကြ၏။ လင်းရှု့၏ အဒေါ်ဖြစ်သူမှာ ယခင်ဧကရာဇ်လက်ထက်တွင် ကိုယ်လုပ်တော်အဖြစ် အမှုထမ်းခဲ့ဖူးသဖြင့် ဆယ်စုနှစ်များစွာအတွင်း နန်းတွင်း၌ ကွန်ရက်တစ်ခုကို တည်ဆောက်ထားနိုင်ခဲ့သည်။ လင်းရှု့သည် ငွေကြေးနှင့် သြဇာအာဏာကို အသုံးပြုကာ ယွီမြောင်ဟွာကို ချောက်ချရန် စီစဉ်ခဲ့ခြင်း ဖြစ်၏။

အကြောင်းပြချက်က ဘာပဲဖြစ်ဖြစ် ဖေးလင်ယွဲ့မှာမူ ဂရုမစိုက်ပေ။ သူသည် တရားမျှတမှုကိုသာ လိုလားသည်။

သတင်းများ ပျံ့နှံ့သွားသောအခါ နန်းတွင်းတစ်ခုလုံး တုန်လှုပ်သွားကြ၏။ သဲ့ဖေးကို အဆိပ်ခတ်မှုမှာ နှစ်ပေါင်းများစွာအတွင်း အကြီးမားဆုံး အရှုပ်တော်ပုံဖြစ်သဖြင့် ကိုယ်လုပ်တော်များအကြား အတင်းအဖျင်း ပြောစရာ ဖြစ်ခဲ့သည်။

များစွာသော သူတို့သည် ယွီမြောင်ဟွာ၏ ကံကြမ္မာအတွက် ဝမ်းနည်းခဲ့ကြလေ၏။ သူမ၏ ထူးခြားသော အလှအပဖြင့်သာ အခက်အခဲမရှိခဲ့ပါက ရာထူးတိုးရန် အလားအလာရှိသူပင် ဖြစ်သည်။ သို့သော် ယခုအခါ သူမသည် လုပ်ကြံစွပ်စွဲခံရခြင်းဖြစ်ကြောင်း ပေါ်ပေါက်လာခဲ့ပြီပင်။

'နေပါအုံး... ဧကရာဇ်က ခြောက်လတောင် ကြာမှ ဘာလို့ သူမကို ရုတ်တရက် သတိရသွားရတာလဲ။ ဘယ်သူက သူ့ကို သွားပြောလိုက်တာလဲ'

အဆင့်မြင့် ကိုယ်လုပ်တော်များက တည်ငြိမ်နေသော်လည်း အဆင့်နိမ့်သူများမှာမူ ဧကရာဇ်၏ နောက်ထပ်ခြေလှမ်းကို သတိကြီးစွာ စောင့်ကြည့်နေကြသည်။

ယွီမြောင်ဟွာသည် အအေး နန်းဆောင်၌ ခြောက်လတိုင်တိုင် မတရား အကျဉ်းချခံခဲ့ရ၏။ ဧကရာဇ်သည် သူမအား သေချာပေါက် ကုစားပေးမည် ဖြစ်ပြီး ရာထူးတိုးပေးကောင်း ပေးနိုင်လေသည်။ သူမသည် ဧကရာဇ်၏ မျက်နှာသာပေးမှုကို ရယူရန်အတွက် သူတို့၏ အကြီးမားဆုံး ပြိုင်ဘက် ဖြစ်လာနိုင်၏။

……

"ဧကရာဇ်မင်းမြတ် ရောက်ရှိလာပါပြီ!"ယွီမြောင်ဟွာ ညစာ စားနေစဉ်မှာပင် ကျယ်လောင်သော ကြေညာသံ ထွက်ပေါ်လာသည်။ သူမသည် ကိုယ်ပိုင်စားပွဲတွင် ထိုင်နေပြီး၊ ချွေ့ဝေနှင့် ချင်းလျိုမှာမူ အခြားစားပွဲတစ်ခုတွင် ရှိနေကြ၏။ ယွီမြောင်ဟွာမှာ သူတို့နှင့်အတူ စားလိုသော်လည်း သူတို့က ငြင်းပယ်ခဲ့ကြသည်။ ခြောက်လကြာ ကြိုးစားပြီးမှသာ သူတို့နှစ်ဦးကို စားပွဲတစ်ခုတည်းတွင် အတူစားရန် သူမ ဖျောင်းဖျနိုင်ခဲ့ခြင်း ဖြစ်၏။

ဒီညစာတွင် မှိုကြက်သားစွပ်ပြုတ်၊ ကြက်ဥနှင့် ဗုံလုံသီး

ကြော်၊ ပြီးတော့ ကြက်တောင်ပံပေါင်းတို့ ပါဝင်လေသည်။

ကြေညာသံကြားသည်နှင့် ချွေ့ဝေနှင့် ချင်းလျိုတို့မှာ တူများကို ချက်ချင်းချကာ ဝမ်းသာအားရ ကြည့်လိုက်ကြ၏။ ယွီမြောင်ဟွာကမူ ပါးစပ်ထဲမှ အစာကို အလျင်အမြန် မြိုချလိုက်ရင်း ပြောလိုက်သည်။ "ဧကရာဇ်က ဘာလို့ ထမင်းစားနေတုန်း ရောက်လာရတာလဲ"  အခုတော့ ဆက်စားရမလား၊ မစားရဘူးလား သူမ မဝေခွဲတတ်တော့ပေ။

[အား... Host! ဧကရာဇ်က အမှန်တရားကို ဖော်ထုတ်နိုင်ခဲ့ပြီ! ကျွန်တော်တို့ရဲ့ ပထမဆုံး ပင်မတာဝန်ကို အောင်မြင်တော့မယ်၊ ဒီနန်းဆောင်ကနေ ထွက်သွားလို့ရပြီ! သင် မပျော်ဘူးလား]

တာဝန်တစ်ခု ပြီးမြောက်သည်ကို မြင်တွေ့ရန် ခြောက်လတိုင်တိုင် စောင့်ဆိုင်းခဲ့ရသော ဤစနစ်မှာလည်း အလွန်ပင် ပီတိဖြစ်နေရှာသည်။ နန်းတွင်းလုပ်ကြံမှုစနစ်ပင်လျှင် မျက်ရည်ဝဲနေရ၏။

သို့သော် ယွီမြောင်ဟွာမှာမူ ငြီးတွားချင်နေသည်။ [သူသာ နာရီဝက်လောက် နောက်ကျပြီး ငါ ထမင်းစားပြီးမှ ရောက်လာရင် ပိုကောင်းမှာပဲ] 

စိတ်ထဲမှ ငြီးတွားနေသော်လည်း ဖေးလင်ယွဲ့ သူမ၏ရှေ့သို့ ရောက်လာသောအခါ ယွီမြောင်ဟွာသည် ဝမ်းသာပီတိဖြစ်ဟန် ဆောင်ကာ မျက်ရည်လေးဝဲပြလျက် သနားစဖွယ် အမူအရာကို လုပ်ပြလိုက်သည်။ သူမသည် ယဉ်ကျေးသိမ်မွေ့စွာဖြင့် ဂါရဝပြုလိုက်၏။

"အရှင်မင်းကြီး... ကျွန်တော်မျိုးမမှာ အပြစ်မရှိဘူးဆိုတာကို နောက်ဆုံးတော့ ယုံကြည်ပေးလိုက်ပြီလား" 

လှပသော အမျိုးသမီးတစ်ဦး၏ ဤကဲ့သို့သော အကြည့်မျိုးမှာ ကမ္ဘာကြီးကို အုပ်စိုးနေသော ဧကရာဇ်၏ နှလုံးသားကိုပင် လှုပ်ခတ်စေနိုင်၏။ သို့သော် ဖေးလင်ယွဲ့သာ သူမ၏ အတွေးများကို မမြင်ခဲ့မှသာ။ ထိုသူသည် သူမ၏ အတွေးများကြောင့် ရယ်ချင်စိတ်ကို အောင့်ထားရသည်။ သူမသည် သူ ရောက်လာသည့်အချိန်ကို စောလွန်းသည်ဟု တကယ်ပဲ တွေးနေခဲ့သည် မဟုတ်ပါလား။

ဖေးလင်ယွဲ့သည် ယွီမြောင်ဟွာနှင့် စနစ်တို့၏ စကားပြောသံကို ဆက်လက် နားထောင်နေခဲ့သည်။ [Host... သင့်ရဲ့ အမူအရာက တကယ့်ကို ပြည့်စုံတယ်။ နောက်ထပ် မင်းသမီးဆုကတော့ သင့်အတွက်ပဲ]

[ဒီအမူအရာ ရဖို့အတွက် ရေအိုးရှေ့မှာ အကြိမ်ပေါင်း ထောင်ချီပြီး ငါ လေ့ကျင့်ခဲ့ရတာ။ မျက်လုံးတွေတောင် ညောင်းနေပြီ။ ချွေ့ဝေဆိုရင် ငါ့ကို သရဲဝင်ပူးနေတယ် ထင်ပြီး ခေါင်းအုံးအောက်မှာ ဆားထုပ်တွေတောင် လာထည့်ထားသေးတယ်] 

ဖေးလင်ယွဲ့၏ နှုတ်ခမ်းမှာ အနည်းငယ် တွန့်သွားခဲ့သည်။ ဟက်... ဒါတွေအားလုံးက သရုပ်ဆောင်နေတာကိုး။ "မင်းသမီးဆု" ဆိုတာက ဘာလဲ။ မည်သို့ပင်ဖြစ်စေ စပါးမျိုးစေ့များအတွက် သူသည်းခံခဲ့၏။