Ch 4

ငါးဆားနယ် ကိုယ်လုပ်တော်

အပိုင်း ၄

"ထပါ... ပြီးခဲ့တဲ့ ခြောက်လလုံး မင်း အရမ်းပင်ပန်းခဲ့ရပြီ။ အခု အမှန်တရား ပေါ်သွားပြီ၊ မင်းမှာ အပြစ်မရှိဘူး" သူ ယွီမြောင်ဟွာကို ကိုယ်တိုင် ထူပေးလိုက်သည်။ သူ၏မျက်နှာတွင် ကြင်နာမှုများ ပြည့်နှက်နေ၏။

ယွီမြောင်ဟွာက ဝမ်းသာဟန်ဆောင်လိုက်သည်။ "ဒါဆို ချန်ချဲ့ ဒီအအေး နန်းဆောင်မှာ ဆက်နေဖို့ မလိုတော့ဘူးပေါ့နော်" 

ဖေးလင်ယွဲ့က ခေါင်းငြိမ့်ပြလိုက်၏။ ထိုအချိန်မှာပင် ယွီမြောင်ဟွာ၏ စိတ်ထဲ၌ လက်ခုပ်သံများ ထွက်ပေါ်လာသည်။ [ဂုဏ်ယူပါတယ် Host! 'ဧကရာဇ်နှင့် ဆုံတွေ့ပါ၊ သင့်အပြစ်မရှိကြောင်း ရှင်းပြပြီး သနားဂရုဏာ သက်အောင် လုပ်ဆောင်ပါ' ဆိုတဲ့ တာဝန်ကို ပြီးမြောက်သွားပါပြီ။ ဆုလာဘ် - တစ်နှစ် သုံးသီးစား ချန်ပါ စပါးမျိုးစေ့များ]

စနစ်သည် ရမှတ် ၂၀ ကိုမူ မေ့လျော့နေပုံရသည်။ ယွီမြောင်ဟွာမှာ အလွန်ပင် ဝမ်းသာသွားသော်လည်း စိုးရိမ်စိတ်တစ်ခု ရှိနေသေးသည်။ [စနစ်... ဒီမျိုးစေ့တွေကို ဘယ်လို ထုတ်ယူရမလဲ] သူမ စိတ်ထဲမှ မေးလိုက်၏။

စနစ်က အဆင်သင့် ပြန်ဖြေလိုက်သည်။ [မစိုးရိမ်ပါနဲ့၊ အဲဒါတွေကို သင့်ရဲ့ သိုလှောင်သေတ္တာထဲကို ထည့်ပေးပြီးပါပြီ။ သင် အရင်က ဝယ်ထားတဲ့ မျိုးစေ့တွေနဲ့ လဲလှယ်ထားတာပါ။ မြေဧကဝက်စာလောက် စိုက်လို့ရတယ်။ ပြီးတော့ ဒီကမ္ဘာက သီးနှံတွေရဲ့ အရင်းအမြစ်တွေကို ပြထားတဲ့ မြေပုံလဲ ရထားသေးတယ်။ အချိန်တန်ရင် ထုတ်ယူလိုက်ပေါ့]

ယွီမြောင်ဟွာ စိတ်အေးသွားရတော့သည်။ သူမသည် ယခင်ကပင် ခြံထဲ၌ စပါးစိုက်ရန် ကြံရွယ်ထားပြီး အစေခံများထံမှ မျိုးစေ့များ ဝယ်ယူထားခဲ့ခြင်း ဖြစ်၏။ မည်သူ့ထံမှ ဝယ်ခဲ့သည်ကို မမှတ်မိတော့ဟုသာ သူမ ပြောလိုက်မည် ဖြစ်သည်။ စနစ်က တကယ့်ကို အလိုက်သိလွန်းလှသည်။

မျိုးစေ့တွေ! မြေပုံလဲ ပါသေးတယ်! ဒါတွေဟာ ဖေးလင်ယွဲ့ အလိုအပ်ဆုံးအရာတွေ ဖြစ်၏။ သူ ကိုယ်တိုင်လာရခြင်းမှာ အလဟဿ မဖြစ်တော့ပေ။ သူသည် ယွီမြောင်ဟွာကို စူးစိုက်ကြည့်နေလိုက်ရာ သူမ တစ်ဦးတည်းသာ သူ၏ မျက်စိရှေ့တွင် ရှိနေသကဲ့သို့ ဖြစ်နေ၏။

ယွီမြောင်ဟွာမှာမူ သူ၏ အကြည့်ကြောင့် ထိတ်လန့်သွားခဲ့သည်။ "နေပါအုံး... ငါ ဘာလုပ်လိုက်လို့လဲ။ ဧကရာဇ်က ဘာလို့ ငါ့ကို ဒီလောက်တောင် ကြင်ကြင်နာနာ ကြည့်နေရတာလဲ" သူမ ဒီနေ့ အရမ်းလှနေလို့လား။ ဒါပေမဲ့ သူမမှာ အလှပြင်စရာ ပစ္စည်းမှ မရှိတာ။ နန်းဆောင်ကို လာတုန်းကလဲ ငွေနဲ့ ရွှေတွေကိုပဲ အလျင်အမြန် ထုတ်ခဲ့ရတာ မဟုတ်လား။

အင်း... တချို့ အလှတရားတွေက မွေးရာပါကို ထင်ရှားနေတာမျိုး ဖြစ်မှာပါ။

သူမသည် ခေါင်းလေးစောင်းကာ မေးလိုက်သည်။ "အရှင်မင်းကြီး... ချန်ချဲ့ ဒီနန်းဆောင်ကနေ ထွက်သွားပြီးရင်ကော ခြံထဲမှာ ဟင်းသီးဟင်းရွက်တွေနဲ့ စပါးတွေ ဆက်ပြီး စိုက်လို့ရမလား" 

အကယ်၍ သူမ ဤနေရာမှ ထွက်သွားလျှင်လည်း သူမ၏ ရာထူးအရ နန်းဆောင်၏ ဘေးဘက်အခန်း တစ်ခုတွင်သာ နေရမည်ဖြစ်ပြီး ထိုနေရာ၌ သီးနှံစိုက်ရန် နေရာမရှိပေ။ မည်သည့် အဆင့်မြင့် ကိုယ်လုပ်တော်ကမှ သူတို့၏ ဥယျာဉ်ကို လယ်ကွင်းအဖြစ် ပြောင်းလဲခွင့်ပေးမည် မဟုတ်ပေ။ သူမ ယခင်နေခဲ့သော နန်းဆောင်၏ အဓိက သခင်မမှာ သဲ့ဖေးဖြစ်၏။

သူမ ဆက်၍ ရှင်းပြလိုက်သည်။ "ချန်ချဲ့ ဒီနေရာကို စရောက်တုန်းက မတရားစွပ်စွဲခံရလို့ စိတ်ဓာတ်တွေ အရမ်းကျခဲ့ရပါတယ်။ အပင်တွေ စိုက်ပျိုးပြီးမှသာ ချန်ချဲ့ရဲ့ စိတ်တွေ အေးချမ်းခဲ့ရတာပါ။ ဒါကြောင့် အကယ်၍ ချန်ချဲ့ စပါးတွေ ဆက်မစိုက်ရတော့ဘူးဆိုရင် ချန်ချဲ့ရဲ့ ကိုယ်ပိုင်အမှတ်အသားတစ်ခု ဆုံးရှုံးသွားသလို ခံစားရပါလိမ့်မယ်"

စပါးစိုက်ခွင့်ရရန်အတွက် ယွီမြောင်ဟွာသည် သနားစဖွယ် အမူအရာကို အသုံးပြုလိုက်သည်။

ချွေ့ဝေနှင့် ချင်းလျိုတို့မှာ မျက်ရည်ဝဲလျက် နားထောင်နေကြ၏။ သူတို့၏ သခင်မလေးသည် ဤမျှ ပင်ပန်းခဲ့ရသဖြင့် ဝမ်းနည်းမှုကို ဖြေဖျောက်ရန် စိုက်ပျိုးရေး လုပ်ခဲ့ရသည်ဟု သူတို့ ထင်မှတ်နေကြသည်။

ယွီမြောင်ဟွာ၏ တောင်းဆိုချက်မှာ ဖေးလင်ယွဲ့၏ ရည်ရွယ်ချက်နှင့် ကွက်တိပင် ဖြစ်နေ၏။ သူမ မတောင်းဆိုလျှင်တောင် ထိုသူက တောင်းဆိုခိုင်းရန် ကြံရွယ်ထားသည်။ ယခုမူ သူ ပင်ပန်းစရာ မလိုတော့ပေ။

သူသည် ကြင်နာသောအမူအရာဖြင့် ပြောလိုက်သည်။ "ဒါပေါ့... အရင်က ငါကိုယ်‌တော်ရဲ့ အမှားကြောင့် မင်း အရမ်းပင်ပန်းခဲ့ရပြီ။ ဒါကြောင့် ငါကိုယ်တော် အမိန့်ထုတ်ပြန်လိုက်မယ် - ယွီမြောင်ဟွာဟာ နူးညံ့သိမ်မွေ့ပြီး အကျင့်စာရိတ္တ ကောင်းမွန်တဲ့အတွက် ကျဲယွီ အဆင့်ကို တိုးမြှင့်ပေးလိုက်ပြီး ကွမ်ကျွီနန်းဆောင်မှာ နေထိုင်ခွင့် ပေးလိုက်တယ်" 

ကွမ်ကျွီနန်းဆောင်မှာ သူ၏ ချမ့်ယွမ်ခန်းမနှင့် အနီးဆုံး ဖြစ်သဖြင့် သူမထံ မကြာခဏ လာရောက်နိုင်ပြီး စနစ်၏ တာဝန်များကိုလည်း စောင့်ကြည့်နိုင်မည် ဖြစ်သည်။ ယွီမြောင်ဟွာနှင့် စနစ်တို့၏ စကားပြောသံအရဆိုလျှင် ဤတာဝန်မှာ နောက်ဆုံးမဟုတ်ကြောင်း သူ သိရှိထား၏။ ထို့အပြင် ထိုနန်းဆောင်၌ ကျယ်ဝန်းသော ခြံရှိသဖြင့် စပါးစိုက်ရန်လည်း အဆင်ပြေလှသည်။

ယွီမြောင်ဟွာမှာ အံ့အားသင့်သွားရသည်။ သူမအနေဖြင့် ရာထူးတိုးလျှင် မေ့ရန် အဆင့်လောက်သာ ရမည်ဟု ထင်ထားခဲ့သော်လည်း ယခုမူ ကျဲယွီ အဆင့်အထိ တိုးမြှင့်ခံရ၏။ ဧကရာဇ်က သူမကို ဒီလောက်တောင် ချစ်တာလား။ ထို့ထက်ပို၍ အရေးကြီးသည်မှာ သူမ ဒဏ္ဍာရီလာ ကွမ်ကျွီနန်းဆောင်တွင် နေထိုင်ရတော့မည် ဖြစ်သည်။

ကွမ်ကျွီ နန်းဆောင်မှာ ယခင်ဧကရာဇ်၏ အချစ်ဆုံး ကိုယ်လုပ်တော် မိဖုရားခေါင်ကြီး ကျန့်ယီ နေထိုင်ခဲ့သော နေရာဖြစ်သည်။ သူမသည် သူမ၏ အလှအပနှင့် ဉာဏ်ရည်ကြောင့် ဧကရာဇ်၏ မျက်နှာသာပေးမှုကို အပြည့်အဝ ရရှိခဲ့သူ ဖြစ်၏။ သူမသာ သားတော်တစ်ပါး ထွန်းကားခဲ့ပါက လက်ရှိဧကရာဇ်မှာ ထီးနန်းရရှိမည် မဟုတ်ပေ။ သူမ ကွယ်လွန်ပြီးနောက် ယခင်ဧကရာဇ်သည် သူမအား မိဖုရားခေါင်ကြီးအဖြစ် ဂုဏ်ပြုခဲ့သည်။ လက်ရှိဧကရာဇ် နန်းတက်ကတည်းက ထိုနန်းဆောင်မှာ လစ်လပ်နေခဲ့ခြင်း ဖြစ်၏။

ဒါဟာ "အချစ်ဆုံး ကိုယ်လုပ်တော်" ဆိုတဲ့ တံဆိပ်ကို အထင်အရှား ကပ်လိုက်တာပဲ ဖြစ်ပြီး နန်းတွင်းကိုယ်လုပ်တော် အားလုံး၏ မနာလိုမှုကို ခံရတော့မည်မှာ အသေအချာပင် ဖြစ်၏။ သူမ ဤနေရာမှ ထွက်သွားသည်နှင့် ကြုံတွေ့ရမည့် ရန်လိုမှုများကို တွေးကြည့်ရင်း ယွီမြောင်ဟွာမှာ မူးလဲချင်သွားတော့သည်။ 'အရှင်မင်းကြီး... ဒီလောက် မျက်နှာသာပေးတာကတော့ သူမအတွက် များလွန်းပါတယ်ဟု သူမ တွေးနေမိသည်၏။'

စနစ်၏ အသံမှာ စိတ်ပျက်လက်ပျက်ဖြင့် ထွက်ပေါ်လာသည်။ [Host... ကိုယ့်ကိုယ်ကိုယ် ထိန်းပါအုံး။ အလှတွေ အလွန်အမင်း မထုတ်ပြပါနဲ့တော့။ ဧကရာဇ်ကို မြှူဆွယ်တာတွေ ရပ်လိုက်ပါ။ ကျွန်တော်တို့က မွန်မြတ်တဲ့ လမ်းစဉ်ကို လျှောက်နေတာ၊ မြှူဆွယ်တဲ့ လမ်းစဉ် မဟုတ်ဘူးလေ]

Host မှာ အလွန်ပင် စွမ်းဆောင်ရည် မြင့်မားလွန်းသဖြင့် စနစ်မှာ လိုက်မမီနိုင်အောင် ဖြစ်နေရသည်။

ယွီမြောင်ဟွာမှာမူ သော်အယ် ထက်ပင် ပို၍ မတရားခံနေရသည်ဟု ခံစားနေရ၏။ သူမ ဧကရာဇ်ကို ဘယ်တုန်းက မြှူဆွယ်ခဲ့လို့လဲ။ သူမ၏ ခေါင်းမှာ ကိုက်လာတော့သည်။ ဤမျှ ထိန်းမနိုင်သိမ်းမရ ဖြစ်နေသော သူမ၏ ဆွဲဆောင်မှုကို မည်သို့ နှိမ်ထားရမည်နည်းဟု သူမ တွေးတောနေမိ၏။

ယွီမြောင်ဟွာသည် သူမ၏ လှပလှသော ဆွဲဆောင်မှုနှင့် ပတ်သက်၍ အနည်းငယ်မျှ မကျေမချမ်း ဖြစ်မိသော်လည်း ပစ်ပယ်ခံထားရခြင်းထက်စာလျှင် မျက်နှာသာပေးခံရခြင်းက ပိုကောင်းသည်ဟုသာ မိမိကိုယ်ကိုယ် နှစ်သိမ့်လိုက်ရ၏။

နေပါဦး—သူ အရေးကြီးဆုံးအချက်ကို မေ့တော့မလို့ပဲ။ သူမကို ဘယ်သူက လုပ်ကြံစွပ်စွဲခဲ့တာလဲ။

လက်ဝါးခန့်သာရှိသော သူမ၏ သေးငယ်သည့် မျက်နှာလေးကို အပေါ်သို့ မော့ကြည့်ရင်း ယွီမြောင်ဟွာက မေးလိုက်သည်။ "အရှင်မင်းကြီး... ချန်ချဲ့ကို ဘယ်သူက လုပ်ကြံခဲ့တာပါလဲ"

သူမအပေါ် ဤမျှအထိ နက်ရှိုင်းသော အာဃာတမျိုး မည်သူက ထားရှိနိုင်မည်ကို သူမ စဉ်းစား၍မရပေ။ ထိုစဉ်က သူမသည် နန်းတွင်းသို့ စတင်ဝင်ရောက်ကာစသာ ရှိသေးပြီး ဧကရာဇ်မှာလည်း တိုင်းရေးပြည်ရာများဖြင့် အလုပ်ရှုပ်နေခဲ့၏။ အသစ်ဝင်လာသော ကိုယ်လုပ်တော်များထဲမှ မည်သူတစ်ဦးတစ်ယောက်မျှ ဧကရာဇ်၏ မျက်နှာသာပေးမှုကို မရရှိကြသေးချေ။ သူမ၏ ကောင်းမွန်သော မိသားစုနောက်ခံသာ မရှိပါက ပါရမီရှင် အမျိုးသမီး ဟူသော ဂုဏ်ပုဒ်ကိုပင် ရရှိလိမ့်မည် မဟုတ်ပါချေ။

ဖေးလင်ယွဲ့သည် အေးစက်တည်ငြိမ်စွာပင် ပြန်ဖြေလိုက်၏။ "ဒါဟာ ကိုယ်လုပ်တော်မင်နဲ့ လင်း မိသားစုရဲ့ လက်ချက်ပဲ"

ယွီမြောင်ဟွာ၏ မျက်လုံးများမှာ အနည်းငယ် ပြူးကျယ်သွားရသည်။ သူမလား။ သူမ ငယ်စဉ်က အဘိုးအဘွားများအိမ်သို့ သွားလည်စဉ် လင်းရှု့နှင့် အတူတူ ကစားခဲ့ဖူးသည်။ နန်းတွင်းသို့ ရောက်ရှိပြီးနောက်တွင်လည်း လင်းရှု့သည် သူမနှင့် မဟာမိတ်ဖွဲ့ရန် အရိပ်အယောင်များ ပြသခဲ့ပြီးမှ အခုတော့ သူမကို အအေးနန်းဆောင်သို့ ရောက်အောင် နောက်ကျောကနေ ဓားနဲ့ထိုးလိုက်ခြင်း ဖြစ်၏။ ဒါက ဘယ်လိုမျိုး အာဃာတလဲ။

ယွီမြောင်ဟွာသည် ထိုသစ္စာဖောက်မှု၏ နောက်ကွယ်မှ အကြောင်းရင်းကို သိရန်ပင် စိတ်မဝင်စားတော့ချေ။ သူမသည် ကိုယ်ကျင့်တရား စင်ကြယ်သူဖြစ်ပြီး လင်းရှု့က သူမကို တိုက်ခိုက်ရန် ရွေးချယ်ခဲ့သည်ဆိုပါက ၎င်းမှာ လင်းရှု့၏ စရိုက်ပျက်ယွင်းမှုကို သက်သေပြနေခြင်းဖြစ်ရာ အထင်အမြင်သေးခံရရန်သာ ထိုက်တန်တော့သည်။ သူမ၏ နှုတ်ခမ်းထက်တွင် တောက်ပသော အပြုံးတစ်ခု ပေါ်လွင်လာသည်။ "ချန်ချဲ့ရဲ့ အပြစ်ကင်းစင်မှုကို ဖော်ထုတ်ပေးတဲ့အတွက် အရှင်မင်းကြီးကို ကျေးဇူးတင်ပါတယ် အရှင်" 

ဖေးလင်ယွဲ့သည် သူမအနေဖြင့် သဘောထားကြီးဟန်ဆောင်ကာ လင်းရှု့ အတွက် အသနားခံပေးလိမ့်မည်ဟု ထင်မှတ်ထားခဲ့သော်လည်း သူမက ထိုကိစ္စကို စကားထဲပင် ထည့်မပြောခဲ့ချေ။

"ကွမ်ကျွီနန်းဆောင်ကို ပြင်ဆင်ထားပြီးပြီ။ မင်း ဒီနေ့ပဲ အဲဒီကို ပြောင်းရွှေ့နိုင်တယ်"

ယွီမြောင်ဟွာ အံ့အားသင့်သွားရ၏။ ဧကရာဇ်က အလုပ်လုပ်တာ တကယ်ကို မြန်လှသည်။ အအေးနန်းဆောင်သည် အေးချမ်းပြီး ကျယ်ဝန်းသော ဗီလာကြီးတစ်ခု ဖြစ်သည်ဟု သူမ၏ စနစ်ကို နောက်ပြောင်လေ့ရှိသော်လည်း မည်သူက ပိုကောင်းသော နေအိမ်ကို မလိုချင်ဘဲ နေမည်နည်း။ ယွီမြောင်ဟွာသည် လက်တွေ့ကျသော သူတစ်ဦးသာ ဖြစ်သည်။

သူမအား ရာထူးပြန်လည်ခန့်အပ်ခြင်းမှာ ရုတ်တရက်ဆန်လွန်းသဖြင့် လိုအပ်သော အစေခံများကို မစီစဉ်ရသေးပေ။ သူမနှင့်အတူ ပြည်နှင်ဒဏ်ခံခဲ့ရသော အစေခံမလေးနှစ်ဦးသာ သူမ၏ဘေးတွင် ရှိနေခဲ့ကြ၏။

ဖေးလင်ယွဲ့သည် သူမအား ပစ္စည်းများထုပ်ပိုးရာတွင် ကူညီရန်အတွက် အစေခံလေးဦးကို ချန်ထားရစ်ခဲ့ပြီးနောက် ခန့်ညားထည်ဝါစွာဖြင့် ထွက်ခွာသွားတော့သည်။

ယွီမြောင်ဟွာတွင် ပိုင်ဆိုင်မှုများစွာ မရှိသဖြင့် ထုပ်ပိုးခြင်းမှာ မြန်ဆန်လှ၏။ သူမသည် ဟန်ဆောင်နေခြင်း မရှိဘဲ သူမ၏ ကိုယ်ပိုင်ပစ္စည်းများကို ချင်းလျိုနှင့် ချွေ့ဝေတို့ကိုသာ ကိုင်တွယ်ခိုင်းလိုက်သည်။ ဧကရာဇ် ချန်ထားခဲ့သော အစေခံများအတွက်မူ အခြားသော အသုံးချစရာများ ရှိသေးသည် မဟုတ်ပါလား။

"ခြံထဲက ဟင်းသီးဟင်းရွက်တွေကို အမြစ်ကနေ တူးထုတ်ပြီး အိုးတွေထဲ ထည့်လိုက်ကြ။ အမြစ်တွေ မနာအောင် သတိထားအုံး"

"ကြက်တွေကိုလဲ အကုန်လုံး ယူသွားရမယ်"

"ပြီးတော့ တံခါးကိုလဲ ဖြုတ်လိုက်ကြအုံး" သူမတို့ အအေးနန်းဆောင်သို့ စရောက်စဉ်က တံခါးမှာ ပြင်မရအောင် ပျက်စီးနေခဲ့ပြီး လေဒဏ်ကိုပင် မကာကွယ်နိုင်ခဲ့ချေ။ ယခုတံခါးမှာ ယွီမြောင်ဟွာနှင့် ချင်းလျိုတို့ ကိုယ်တိုင် ပင်ပင်ပန်းပန်း ပြင်ဆင်ထားခဲ့ခြင်း ဖြစ်၏။

ချွေ့ဝေ နားမလည်နိုင်သဖြင့် မေးလိုက်သည်။ "သခင်မလေး... ဒီတံခါးကို ယူသွားရင်တောင် ကွမ်ကျွီနန်းဆောင်မှာ သုံးလို့ရမှာ မဟုတ်ဘူးလေ"

ယွီမြောင်ဟွာက တည်ငြိမ်စွာပင် ပြန်ဖြေလိုက်၏။ "ထင်းအဖြစ် သုံးလို့ရတာပဲ။ နောက်လူအတွက် ချန်ထားပေးဖို့ မလိုပါဘူး"

လင်းရှု့၏ အကြံအစည်များ ပေါ်ပေါက်သွားပြီဖြစ်ရာ သူမသည် အအေးနန်းဆောင်၏ နောက်ထပ်နေထိုင်သူ ဖြစ်လာနိုင်ခြေရှိသည်။ ထို့ကြောင့် လင်းရှု့အား မည်သည့်နည်းနှင့်မျှ အကျိုးအမြတ်မရစေရန် ယွီမြောင်ဟွာက ငြင်းဆန်လိုက်ခြင်း ဖြစ်၏။

ချွေ့ဝေမှာ သဘောပေါက်သွားသဖြင့် မျက်လုံးများ တောက်ပလာပြီး မကျေမနပ်ဖြစ်သော အမူအရာ ပေါ်လာတော့သည်။

ထိုအချိန်မှစ၍ သူမသည် ထိုအလုပ်ကို တက်ကြွစွာဖြင့် တာဝန်ယူလုပ်ဆောင်တော့၏။ သူမ၏ မှတ်ဉာဏ်မှာ ယွီမြောင်ဟွာထက်ပင် ပို၍ ထက်မြက်လှရာ လင်းရှု့အား အသေးအဖွဲကိစ္စလေးပင် အခွင့်ကောင်းမယူစေရန် သူမ လုပ်ဆောင်တော့သည်။

"ဒီစားပွဲခြေထောက်ကို ငါတို့ ပြန်တပ်ထားတာ—ဖြုတ်ချပစ်လိုက်"

"ဒီပန်းကန်တွေနဲ့ တူတွေက ငါတို့ပိုက်ဆံနဲ့ ဝယ်ထားတာ—အကုန်လုံး ယူသွားကြ"

"ခြင်ထောင်ကိုလဲ ဖြုတ်ပစ်ရမယ်"

"ဒီဇီးပင်ကို ငါတို့ မြေသြဇာမကျွေးခဲ့ရင် သေတာကြာပြီ။ ငါတို့က သူ့အသက်ကို ကယ်ခဲ့တာ—တူးပြီးတော့ ငါတို့နဲ့အတူ ယူသွားကြမယ်"

ဖေးလင်ယွဲ့ ချန်ထားခဲ့သော နန်းတွင်းအစေခံများမှာ တည်ငြိမ်လှ၏။ သစ်ပင်များကို တူးထုတ်ရန်နှင့် တံခါးများကို ဖြုတ်ပစ်ရန် အမိန့်ပေးခံရသော်လည်း သူတို့အထဲမှ တစ်ဦးတစ်ယောက်မျှ မျက်လုံးကလည်ကလည် ဖြစ်ခြင်း သို့မဟုတ် အံ့သြသည့် အရိပ်အယောင်မျှပင် မပြသခဲ့ကြပေ။

အများဆုံးအနေဖြင့် သူတို့၏ စိတ်ထဲတွင် တွေးတောမိကြသည်မှာ "အရှင်မင်းကြီးရဲ့ အချစ်သစ်က တကယ့်ကို... ခိုင်မာတဲ့ မူဝါဒရှိတဲ့ အမျိုးသမီးပဲ"  

ယွီမြောင်ဟွာနှင့် သူမ၏အဖွဲ့မှာ ထိုသို့ ရှုပ်ပွအောင် လုပ်ဆောင်ပြီးနောက် သူတို့ အအေးနန်းဆောင်မှ ထွက်ခွာသွားချိန်တွင် ထိုနေရာမှာ သူတို့ မရောက်ရှိမီကထက်ပင် ပို၍ ပျက်စီးယိုယွင်းသွားခဲ့တော့၏။

ဝုန်းခနဲ အသံကြီးနှင့်အတူ ခြေထောက်အဖြတ်ခံထားရသော စားပွဲမှာ လေဒဏ်ကြောင့် ဟန်ချက်ပျက်ကာ ကြမ်းပြင်ပေါ်သို့ ပြုတ်ကျသွားခဲ့ရာ၊ ထိုအသံမှာ သူတို့ ထွက်ခွာသွားခြင်းအတွက် နှုတ်ဆက်လိုက်သည့် အသံနှင့်ပင် တူနေတော့သည်။

...

ယွီမြောင်ဟွာသည် ပေါ်ပေါ်ထင်ထင် မရှိဘဲ နေလိုခဲ့၏။ အအေးနန်းဆောင်မှ ထွက်လာကာစ ဖြစ်သဖြင့် မလိုလားအပ်သော ရန်ငြိုးရန်စများကို မဖိတ်ခေါ်ခြင်းက အကောင်းဆုံးပင် ဖြစ်သည်။ သို့သော်လည်း သူမ၏ ပြောင်းရွှေ့မှုမှာ ဆူညံပွက်လောရိုက်သွားသဖြင့် သတိမမူမိစေရန် မဖြစ်နိုင်တော့ချေ။ အထူးသဖြင့် လင်းရှု့ အဖမ်းခံရပြီးနောက်တွင် နန်းတွင်းရှိ မျက်လုံးအားလုံးမှာ သူမအပေါ်သို့သာ ကျရောက်နေခဲ့တော့သည်။

မကြာမီမှာပင် သူမ၏ ကိစ္စရပ်များမှာ သတင်းနားစွင့်နေကြသော ကိုယ်လုပ်တော်များအကြား ပျံ့နှံ့သွားခဲ့၏။

"ဘာ... အရှင်မင်းကြီးက အအေးနန်းဆောင်ကို ကိုယ်တိုင်သွားပြီး ယွီမြောင်ဟွာကို ပြန်ခေါ်လာတာ ဟုတ်လား"

"ယွီမြောင်ဟွာက ကျဲယွီ အဆင့်အထိ ရာထူးတိုးသွားတာလား"

သဲ့ဖေးဖြစ်သူ စုန့်ရွှယ်လန်သည် သတင်းလာပို့သော နန်းတွင်းအစေခံမလေးကို ထိတ်လန့်စွာဖြင့် စိုက်ကြည့်နေမိသည်။ ယွီမြောင်ဟွာသာ မတရားစွပ်စွဲခံရခြင်းမှ လွတ်မြောက်သွားပါက တစ်စုံတစ်ရာ ပြန်လည်ကုစားပေးလိမ့်မည်ဟု သူမ ခန့်မှန်းထားခဲ့သော်လည်း၊ မေ့ရန် အဆင့်ကိုပင် ကျော်ဖြတ်ကာ ကျဲယွီ အဆင့်သို့ တိုက်ရိုက်ရောက်ရှိသွားလိမ့်မည်ဟု သူမ မထင်ထားခဲ့ပေ။ ထိုစဉ်က သူမ ဧကရာဇ်၏ ရင်သွေးများကို ဖွားမြင်ပေးခဲ့စဉ်ကပင် ဤကဲ့သို့သော မျက်နှာသာပေးမှုကို မရရှိခဲ့ဖူးပါချေ။

သဲ့ဖေးပင်လျှင် မနာလိုစိတ် အနည်းငယ် ဖြစ်ပေါ်လာရ၏။ ခဏမျှ စိတ်ကို ထိန်းချုပ်လိုက်ပြီးနောက် သူမ ပြန်တည်ငြိမ်သွားခဲ့သည်။ "ယွီမြောင်ဟွာက မတရား ခံစားခဲ့ရတာပဲ။ ဒီနန်းဆောင်ရဲ့ သခင်မတစ်ဦးအနေနဲ့ ဒီမှားယွင်းမှုကို သတိမထားမိခဲ့တဲ့အတွက် ငါ့မှာလည်း တာဝန်ရှိတယ်။ ဘေးဆောင်ကို သေချာပြင်ဆင်ထားလိုက်ကြ—သူ့ကို အထင်မသေးစေနဲ့။ ဘဏ္ဍာတိုက်ထဲက သန္တာကျောက်ကို ထုတ်ပြီး သူဆီပို့ဖို့ လက်ဆောင်အချို့ ပြင်ဆင်ထားလိုက်"

ဘာပဲဖြစ်ဖြစ် ယွီမြောင်ဟွာကို လုပ်ကြံခဲ့သည်မှာ သူမ မဟုတ်ဘဲ ကိုယ်လုပ်တော်မင်သာ ဖြစ်သည်။ သူမသည် အဆိပ်ခတ်ခံရကာ လပေါင်းများစွာ အိပ်ရာထဲ လဲနေခဲ့ရသော သားကောင်တစ်ဦးသာ ဖြစ်၏။ ယွီမြောင်ဟွာသာ လူအ တစ်ယောက် မဟုတ်ပါက သူမအပေါ် ရန်ငြိုးထားလိမ့်မည် မဟုတ်ပေ။ အဆင့်မြင့်ကိုယ်လုပ်တော်တစ်ဦးအနေဖြင့် သူမသည် ကျေးဇူးတရားနှင့် သဘောထားကြီးမှုကို ထိန်းသိမ်းထားရမည် ဖြစ်သည်။

ကောင်းကွက်ကို ကြည့်မည်ဆိုပါက ယွီမြောင်ဟွာသာ မျက်နှာသာပေးခံရလျှင် ဧကရာဇ်သည် သူတို့၏ နန်းဆောင်သို့ ပို၍ မကြာခဏ လာရောက်နိုင်ခြေရှိရာ၊ ၎င်းမှာ သူမအတွက်လည်း အကျိုးရှိစေလိမ့်မည် ဖြစ်၏။

သဲ့ဖေး၏ အစေခံမလေးက ခေါင်းငုံ့ထားရင်း ပြောလိုက်သည်။ "အရှင်မ... အရှင်မင်းကြီးက ယွီမြောင်ဟွာကို ကွမ်ကျွီနန်းဆောင်မှာ နေထိုင်ခွင့် ပေးလိုက်ပါတယ်"  သူမ ထိုသတင်းကို စတင်ကြားရစဉ်က မယုံနိုင်အောင် ဖြစ်ခဲ့ရသဖြင့် အမှန်တကယ် ဟုတ်မဟုတ်ကို နေရာအနှံ့တွင် အတည်ပြုခဲ့ရသေး၏။

သဲ့ဖေးသည် သူမ၏ ထိုင်ခုံကို တင်းတင်းကြပ်ကြပ် ဆုပ်ကိုင်လိုက်မိသည်။

ကွမ်ကျွီ နန်းဆောင် တဲ့လား—ဒါက ကွမ်ကျွီ နန်းဆောင်ပဲ ဖြစ်ရမယ်တဲ့လား။

ဧကရာဇ်က ယွီမြောင်ဟွာကို တကယ်ပဲ ဤမျှအထိ မြတ်နိုးနေတာလား။ ယွီမြောင်ဟွာ နန်းတွင်းသို့ စတင်ဝင်ရောက်စဉ်က ဧကရာဇ်သည် ဤကဲ့သို့ စိတ်ဝင်စားမှုမျိုး မပြခဲ့ပါချေ။ သူမမှာ ဤကဲ့သို့ ရထိုက်ရန် ဘယ်လို ဂုဏ်ကျေးဇူး သို့မဟုတ် အရည်အချင်းတွေ ရှိနေလို့လဲ။

ဧကရာဇ်၏ ဆုံးဖြတ်ချက်က ရှင်းလင်းသော သတင်းစကားတစ်ခုကို ပေးလိုက်ခြင်း ဖြစ်သည်—သူ၏ မျက်စိထဲတွင် ယွီမြောင်ဟွာသည် နန်းဆောင်တစ်ခု၏ အဓိကအရှင်သခင်မ ဖြစ်ထိုက်သည်ဟူ၍ပင်။ မဟုတ်ပါက သူမကို အဘယ်ကြောင့် ကွမ်ကျွီ နန်းဆောင်အား ပေးသနားမည်နည်း။ ယခု သူမတွင် လိုအပ်နေသည်မှာ ဝါရင့်မှုနှင့် ရင်သွေးတစ်ဦးသာ ရှိတော့၏။

စုန့်ရွှယ်လန်သည် သူမတွင် သားတစ်ယောက်နှင့် သမီးတစ်ယောက် ရှိသည်ဟုသာ မိမိကိုယ်ကိုယ် နှစ်သိမ့်လိုက်ရသည်။ ယွီမြောင်ဟွာမည်မျှပင် မျက်နှာသာပေးခံရပါစေ၊ သူမ၏ ရာထူးကိုတော့ ဘယ်တော့မှ ကျော်တက်နိုင်မည် မဟုတ်ချေ။ သူမအနေဖြင့် တည်တည်ငြိမ်ငြိမ် နေရန်သာ လိုအပ်သည်။ အောက်တန်းကျသော အကြံအစည်များကို သုံးတတ်သည့် စိတ်မခိုင်သော ညီမငယ်များကဲ့သို့ သူမ အလျင်စလို မလုပ်နိုင်ပါချေ။ ကောင်းပြီလေ... နောက်ရက်အနည်းငယ်ကြာရင် ဧကရာဇ်ဆီကို သူမကိုယ်တိုင်ချက်ထားတဲ့ စွပ်ပြုတ်လေး ပို့ပေးရမည်။ ပြီးခဲ့တဲ့အကြိမ်က သူ အရမ်းကို စိတ်လှုပ်ရှားသွားပြီး သူမရဲ့လက်တွေ အပူလောင်မှာစိုးလို့ နောက်ဆို မပင်ပန်းစေနဲ့လို့တောင် ပြောခဲ့သေးတာပဲ။

အချိန်အတော်ကြာ တိတ်ဆိတ်သွားပြီးနောက်တွင် သဲ့ဖေးက နောက်ဆုံး၌ ပြောလိုက်သည်။ "ပြီးခဲ့တဲ့လက အရှင်မင်းကြီး ငါ့ကိုပေးထားတဲ့ တောင်ပိုင်းက ပုလဲသေတ္တာကို ထုတ်လိုက်ကြ။ မနက်ဖြန်ကျရင် ယွီမြောင်ဟွာရဲ့ ဂုဏ်ပြုလက်ဆောင်တွေထဲမှာ အဲဒါကို ထည့်ပေးလိုက်မယ်"

****

ကျဲယွီ 

မေ့ရန် 

ချိုင်နွီ အောက်ဆုံးအဆင့်မှာ ကျဲယွီက အမြင့်ဆုံးပါ