Ch 243

အခန်း(၂၄၃) - သူတို့အပေါ် သွန်ချလိုက်သည့် ရေဆိုးရေညစ်က သိပ်များလွန်းသည်

မြင်းရထားလုံးထဲတွင် ရှစ်ချင်းလျို့က ရှစ်သခင်မကြီးနှင့် ကျန်လူများကို အားပေးအားမြှောက်လုပ်သည့် စကားများကို ရှောင်ပိုင်လီ ကြားနာခဲ့ရသည်။

ယခု ရှစ်သခင်မကြီးနှင့် ကျန်လူများက သခင်မကြီးဝူကို ဆွဲကာ ရိုက်နှက်နေကြသည်ကို မြင်လိုက်ရသောအခါ၊ အရင်က သူမကို မြေမြှုပ်သင်္ဂြိုဟ်ရန် အသေကောင်နှင့် လက်ထပ်ပေးခံရမည့်အရေးကို ပြန်တွေးမိပြီး သခင်မကြီးဝူတို့ အရိုက်ခံရသည်ကိုကြည့်ကာ ပျော်ရွှင်နေမိလေသည်။

သူမက သူမ၏ယောက်မဖြစ်သူ ရှစ်ချင်းလျို့ကို ပို၍ပင် ယုံကြည်ကိုးကွယ်လာခဲ့လေသည်။ သူမက ကိုယ်တိုင် လက်ပါစရာမလိုဘဲ ပါးစပ်ဖြင့်သာ ညွှန်ကြားခဲ့ရသော်လည်း သူတို့ကို အလွန်အမင်း ဒုက္ခရောက်သွားအောင် လုပ်နိုင်ခဲ့လေသည်။ သူမသည် တကယ့်ကို ကျွမ်းကျင်သည့် ပညာရှင်တစ်ဦးပင် ဖြစ်သည်။

သူမအနေဖြင့် ယောက်မဖြစ်သူထံမှ သင်ယူရမည့်အရာတွေ အများကြီး ရှိနေပါသေးသည်။ သူမ၏ ယောက်မက တကယ့်ကို အင်အားကြီးလှပေသည်။

ထိုအချင်းအရာကို မြင်လိုက်ရသောအခါ သခင်ဝူနှင့် အကြီးဆုံးသခင်လေးဝူတို့၏ မျက်နှာများမှာ ဖြူဖျော့သွားခဲ့လေသည်။

"မင်းတို့နှစ်ယောက်လုံး သေနေကြတာလား။ သူတို့ကို မြန်မြန် ဆွဲဖယ်ထုတ်ကြစမ်း။"

သူတို့၏ အမေများ အရိုက်ခံနေရသည်ကို မြင်တွေ့လိုက်ရသဖြင့် အလွန်ဒေါသထွက်သွားကြသည်။

သူတို့သားအဖနှစ်ယောက် ရောက်လာသည့်အချိန်တွင် ရှစ်ချင်းလျို့က ရှစ်မိသားစုဝင်များကို အကြည့်တစ်ချက်ဖြင့် အချက်ပေးလိုက်ပြီး လမ်းပိတ်ထားသည့် အစေခံကောင်လေးများနှင့် အစေခံမလေးများကို လွှတ်ပေးလိုက်လေသည်။

ရှစ်သခင်မကြီးနှင့် ကျန်သည့်လူများကလည်း ဉာဏ်ကောင်းကြသည်။ သူတို့က အခွင့်ကောင်းယူကာ သခင်မကြီးဝူတို့ကို အကြိမ်အနည်းငယ် ပါးရိုက်၊ ကုတ်ခြစ်ပြီးမှ လွှတ်ပေးလိုက်ကြသည်။

သခင်မကြီးဝူသည် အစေခံများ၏ အကူအညီဖြင့် ထလာပြီးနောက် ဒေါသကြောင့် တစ်ကိုယ်လုံး တုန်ယင်နေလျက်ရှိ၏။

"အပေါက်ဆိုးတဲ့ မိန်းမတွေ။"

သူမ၏ ဆံပင်များမှာ ရှုပ်ပွနေပြီး မျက်နှာသည်လည်း ဖူးရောင်နီရဲနေခဲ့သည်။ သူမက သခင်ဝူကို ကြည့်ကာ ဒေါသတကြီးပြောလိုက်သည်။

"သူတို့ကို သေချာပေါက် ပြန်ခံစားရအောင် လုပ်ပစ်ရမယ်။"

သခင်ဝူက ခေါင်းညိတ်ပြလိုက်သည်။

"စိတ်မပူပါနဲ့ အမေ။"

ထို့နောက် သူက အစေခံမလေးများကို အမိန့်ပေးလိုက်လေသည်။

"သခင်မကြီးဝူနဲ့ သခင်မဝူကို အထဲပြန်ခေါ်သွားပြီး နားခိုင်းလိုက်ကြ။"

သူတို့နှစ်ယောက်လုံး အရိုက်ခံထားရသဖြင့် နာကျင်နေကြကာ သန့်စင်ပြီး အဝတ်အစား လဲလှယ်ပြီးပါက သမားတော်နှင့် သွားပြရမည်ဖြစ်သည်။ သခင်ဝူနှင့် ကျန်လူများက သူတို့ကို ကူညီပေးပြီးနောက် ရှစ်သခင်မကြီးကို မျက်နှာကြီးမည်းမှောင်စွာ ကြည့်လိုက်သည်။

"အပေါက်ဆိုးတဲ့ အဘွားကြီး... ခင်ဗျား လွန်မလာနဲ့နော်။"

ဝူမိသားစု ပြိုလဲတော့မည်ကို ရှစ်သခင်မကြီးက ကြိုသိထားသဖြင့် သူမက လုံးဝ မကြောက်ရွံ့ပေ။ သူမက အရှေ့သို့ အလောတကြီး တိုးသွားပြီး သူ၏မျက်နှာကို သလိပ်အဝါရောင်ဖြင့် ထွေးချလိုက်လေသည်။

"ထွီး... ငါ့သားကို အန္တရာယ်ပေးတဲ့ လူသတ်ကောင်။ နင့်ကို သေအောင်ကို လုပ်ပစ်ဦးမယ်။"

သခင်ဝူ အာရုံစိုက်မနေသည့် အချိန်ကို အခွင့်ကောင်းယူကာ ရှစ်သခင်မကြီးက သူ့ကို ပါးဖြတ်ရိုက်လိုက်လေသည်။

သူက ရှစ်သခင်မကြီး၏ တံတွေးကို အလွန်ရွံရှာသဖြင့် သုတ်ပစ်ရန်အတွက် လက်ကိုင်ပဝါကို ထုတ်ယူလိုက်သည်။ သို့သော် ယခု ရုတ်တရက်ကြီး ပါးထပ်ရိုက်ခံလိုက်ရသဖြင့် သူ ကြက်သေသေသွားခဲ့ရသည်။ အသိစိတ်ပြန်ဝင်လာသည့် အချိန်မှာတော့ သူ၏မျက်နှာတွင် ဒေါသများ ပြည့်နှက်သွားခဲ့သည်။

"ခင်ဗျားက ကိုယ့်သေတွင်း ကိုယ်တူးနေတာပဲ။"

အကြီးဆုံးသခင်လေးဝူက သူ့အဖေ အရိုက်ခံလိုက်ရသည်ကို မြင်သောအခါ ရှစ်သခင်မကြီးမှာ သက်ကြီးရွယ်အိုတစ်ဦး ဖြစ်သည်ကိုပင် သတိမထားနိုင်တော့ပေ။ သူက ရှေ့သို့တိုးသွားပြီး ရှစ်သခင်မကြီးကို ရိုက်နှက်ရန် လုပ်လေသည်။

ထိုအခါ ရှစ်သခင်မကြီးက ဒေါသပေါက်ကွဲသွားဟန်ဖြင့် မြေပြင်ပေါ် ထိုင်ချကာ ငိုချင်ယောင် ဆောင်လေတော့သည်။

"ကယ်ကြပါဦးရှင်... ဝူမိသားစုက သူများကို သတ်ချင်ရုံသာမက ကျွန်မတို့ကိုပါ နှုတ်ပိတ်ချင်နေကြပါပြီရှင်။"

အကြီးဆုံးသခင်လေးဝူက အလွန်ဒေါသထွက်နေကာ တကယ်ကိုပင် ရိုက်ပစ်ချင်နေသည်။ ဘာပဲဖြစ်ဖြစ် ဤနေရာသည် ဝူမိသားစု၏ စံအိမ်ထဲတွင် ဖြစ်သောကြောင့် ဘာမှ ကြောက်စရာ မလိုပေ။ သို့သော် ရှစ်သခင်မကြီးကို မရိုက်နှက်ရသေးခင်မှာပင် လူတစ်ယောက်က သူ့လက်ကောက်ဝတ်ကို ဆွဲဖမ်းထားလိုက်လေသည်။

"ဘာလုပ်တာလဲ... သူ့ကို နှုတ်ပိတ်ဖို့ လုပ်နေတာလား။"

ရှစ်ချင်းလျို့က သူ့ကို ဆွဲထားပြီး ရှစ်မိသားစုကို လှမ်းပြောလိုက်လေသည်။

"သေချာကြည့်ထားကြနော်။ အကြီးဆုံးသခင်လေးဝူက ရှစ်သခင်မကြီးကို ရိုက်နှက်ပြီး နှုတ်ပိတ်ချင်နေတာ။ အချိန်ကျရင် ကျွန်မတို့ သူ့ကို တရားရုံးမှာ တရားစွဲမယ်။"

ရှစ်မိသားစုက ခေါင်းညိတ်ပြလိုက်ကြသည်။

"ငါတို့တွေ အကုန်မြင်တယ်။ ဒီမျိုးမစစ်ကောင်ကို တရားစွဲရမယ်။"

အကြီးဆုံးသခင်လေးဝူ ကြက်သေသေသွားခဲ့သည်။ ဤမိန်းမယုတ်က တော်တော် အရှက်မရှိတာပဲ။ သူတို့မိသားစုကမှ တကယ် အရိုက်ခံထားရသည့် လူတွေမဟုတ်ပါလား။ သူက ရှစ်ချင်းလျို့၏ လက်ထဲမှ လွတ်အောင် ကြိုးစားရုန်းကန်ခဲ့သော်လည်း ဘယ်လောက်ပဲရုန်းရုန်း မလွတ်မြောက်နိုင်ခဲ့ပေ။

"ဒီမိန်းမယုတ်က တော်တော် သန်မာတာပဲ။"

သူက အံကြိတ်ကာ သူမကို မေးလိုက်သည်။

"မင်း ဘာလိုချင်တာလဲ။"

ရှစ်ချင်းလျို့က သူ့ကို အပြစ်ကင်းစင်သည့်ဟန်ဖြင့် ပြန်ကြည့်လိုက်သည်။

"ဒီမေးခွန်းကို ကျွန်မတို့က မေးချင်နေတာ။ ရှင် ဘာလိုချင်တာလဲ။ ရှင့်မိသားစုကြောင့် ကျွန်မရဲ့ စတုတ္ထဦးလေးက အဆိပ်မိပြီး အိပ်ရာထဲမှာ သေတော့မလို ဖြစ်နေပြီ။ ဆေးဆရာက ဖြေဆေးပြင်ဆင်ဖို့ မမှီတော့ဘူးလို့ ပြောတယ်။ ဖြေဆေးပေး... ဒါဆို ကျွန်မတို့ ရန်မရှာတော့ဘူး။"

သူမက ရုပ်တည်ကြီးဖြင့် အဓိပ္ပာယ်မရှိသည်များကို ပြောဆိုကာ အချိန်ဆွဲနေခဲ့သည်။ မော့ချင်းလင်နှင့် ကျန်လူများ မကြာခင်မှာပင် ဝူမိသားစုအိမ်သို့ ရောက်လာကြလိမ့်မည်။

အကြီးဆုံးသခင်လေးဝူ အလွန် ရှုပ်ထွေးသွားခဲ့သည်။

"ဘာအဆိပ်လဲ။ ငါတို့ သူ့ကို အဆိပ်မခတ်ဘူး။ ငါတို့ကို လာပြီး အပြစ်မပုံချနဲ့။"

ရှစ်ချင်းလျို့က သူ့ကို အလွတ်မပေးခဲ့ပေ။

"ရှင်တို့ ကတ်သီးကတ်ဖဲ့ မပြောနဲ့။ စောစောလေးတင် သမားတော်ပင့်ပြီး ပြထားပြီးပြီ။ ရှင်တို့အိမ်က အစေခံတွေလည်း ကြားလိုက်ကြတယ်။"

ရှစ်မိသားစု၏ စတုတ္ထသားကို စောင့်ကြည့်ရန် လွှတ်ထားသည့် အစေခံတာဝန်ခံက ရှေ့သို့တိုးလာကာ ဆေးဆရာပြောခဲ့သည့် စကားများကို အကြီးဆုံးသခင်လေးဝူထံ ပြန်လည်တင်ပြခဲ့သည်။ ထိုအခါ အကြီးဆုံးသခင်လေးဝူ အနည်းငယ် ကြောင်အသွားခဲ့သည်။

ထိုလူကို အဆိပ်ခတ်ခဲ့သည်မှာ သူတို့ မဟုတ်ပေ။ သူတို့သည် ရှစ်မိသားစုနှင့် ရှောင်မိသားစုကို ကိုင်တွယ်ဖြေရှင်းရန် စိတ်ဝင်စားသော်လည်း အဆိပ်ခတ်ရသည်အထိတော့ သူတို့ မလုပ်ရဲပေ။ သူက ခေါင်းခါလိုက်သည်။

"ငါတို့ သူ့ကို အဆိပ်မခတ်ခဲ့ဘူး။"

ရှစ်ချင်းလျို့က အလျှော့မပေးပေ။

"ကျွန်မရဲ့ စတုတ္ထဦးလေး ပြောတာတော့ ရှင်တို့က သူ့ကို အဆိပ်ခတ်ခဲ့တာတဲ့။ ရှင်တို့က သူ့ကို အဆိပ်ခတ်သတ်ပြီး သူ့မိန်းမကို နောက်အိမ်ထောင် ချပေးချင်နေတာတဲ့။"

အကြီးဆုံးသခင်လေးဝူမှာ လုံးဝ ဆွံ့အသွားခဲ့ရသည်။ ဤသည်တို့မှာ လုံးဝ အဓိပ္ပာယ်မရှိသည့် စကားများသာ ဖြစ်သည်။ သူတို့က တရားဝင်သမီးတစ်ယောက်အတွက် တကယ်ပဲ ဒီလိုလုပ်ရပ်ကြီးကို လုပ်ကြပါ့မလား။

ထိုအချိန်မှာပင် ရှစ်မိသားစု၏ တတိယသားက ဝင်ပေါက်ရှေ့သို့ ရောက်လာခဲ့ပြီး ရှစ်ချင်းလျို့ကို အချက်ပေးလိုက်သည်။ ဝူမိသားစု၏ အစေခံများက အရာရှိများ မဝင်လာနိုင်အောင် အချိန်ဆွဲရန် ကြိုးစားနေကြသည်။

ရှစ်ချင်းလျို့က မြေပေါ်တွင် ပေါက်ကွဲနေသည့် ရှစ်သခင်မကြီးကို လှမ်းပြောလိုက်လေသည်။

"အဘွား... သူတို့ ဝန်မခံချင်မှတော့ အပြင်ထွက်ပြီး လူတိုင်းသိအောင် သွားပြောလိုက်တော့။"

သူတို့ မလာခင်ကတည်းက ဘာတွေလုပ်သင့်သည်ဆိုတာကို ရှစ်ချင်းလျို့က သူတို့ကို သင်ပြပေးထားပြီးသား ဖြစ်သည်။ ရှစ်သခင်မကြီးက ချက်ချင်းပင် သွက်လက်စွာ ထလိုက်ပြီး တံခါးမကြီးဆီသို့ သူမ၏ ချွေးမများနှင့်အတူ အလျင်စလို ပြေးထွက်သွားခဲ့သည်။

ထိုအချင်းအရာကို မြင်တော့ သခင်ဝူက လူလွှတ်ကာ သူမကို တားဆီးခိုင်းခဲ့သည်။ သို့ပေမယ့် တခြား ရှစ်မိသားစုဝင်များက လမ်းကိုပိတ်ထားပြီး သူမနောက်သို့ ပြေးလိုက်သွားခဲ့ကြသည်။

ရှစ်သခင်မကြီးက တံခါးမကြီးနား ရောက်ခါနီးတွင် နာကျင်မှုကို သည်းခံလျက် ကိုယ့်ပါးကိုယ် ပြန်ရိုက်လိုက်သည်။ သူမက အလျင်စလို ပြေးထွက်သွားခဲ့ပြီး ရှစ်မိသားစု၏ အကြီးဆုံးသား၊ တတိယသားနှင့် ကျန်သည့်လူများကလည်း အခွင့်ကောင်းယူကာ တံခါးကို ပိတ်ရပ်ထားသည့် အစေခံများကို အနောက်မှနေ၍ တွန်းထုတ်ပစ်ခဲ့ကြသည်။ သူတို့က တရားရုံးမှ လူအုပ်ကြီးကြားထဲသို့ အတင်း တိုးဝင်သွားခဲ့ကြသည်။

ထို့နောက် ဖြတ်သွားဖြတ်လာများနှင့် အိမ်နီးချင်းများက ရှစ်သခင်မကြီး၏ စိတ်သောကရောက်နေသည့် အော်ဟစ်သံများကို ကြားလိုက်ကြရလေသည်။

"အမလေး... ကယ်ကြပါဦးရှင်။ ဝူမိသားစုက လူကို အဆိပ်ခတ်သတ်ဖို့ လုပ်ပြီး နှုတ်ပိတ်ချင်နေကြပါတယ်။ အကြင်နာတရား မရှိတဲ့လူတွေ... သူတို့က ကျွန်မလို အဘွားအိုကိုတောင် ရိုက်နှက်ကြပါတယ်။"

ဖြတ်သွားဖြတ်လာများက ထိုစကားကို ကြားသောအခါ သွားကြည့်လိုက်ကြရာ သူမ၏ပါးပြင်ထက်တွင် လက်ဝါးရာကြီး ထင်းနေသည်ကို တွေ့လိုက်ကြရလေသည်။

"အကြီးဆုံးသခင်လေးဝူက သိပ်လွန်တာပဲ။ အသက်ငယ်ငယ်နဲ့ အဘွားအိုကို ရိုက်နှက်ရက်တယ်။"

"အဘွားအို ပြောတာ မကြားလိုက်ဘူးလား။ သူတို့ကို နှုတ်ပိတ်ဖို့ လုပ်နေတာတဲ့လေ။"

ရှစ်သခင်မကြီးက လူများ၏ မှတ်ချက်စကားများကို ကြားရသောအခါ သူမက ချက်ချင်း အော်ဟစ်ပြီး ဆက်တိုင်တန်းလေသည်။

"ဟုတ်ပါတယ်ရှင်။ သူတို့က သူတို့သမီးကို မြို့တော်က မိသားစုကြီးဆီ ကိုယ်လုပ်တော်အဖြစ် ပို့ချင်လို့ ကျွန်မရဲ့သားကို အဆိပ်ခတ်ခဲ့တာပါ။ အဲဒီကိစ္စကို ဒီနေ့ ကျွန်မတို့ လာလည်ရင်း သိသွားတော့ ဝူမိသားစုက ကျွန်မတို့ကို နှုတ်ပိတ်ချင်နေတာ။ အမလေး... ငါ့သားလေး၊ သနားဖို့ကောင်းလိုက်တဲ့ ငါ့သားလေး။"

ဖြတ်သွားဖြတ်လာများက ရက်စက်လှသည့် ဝူမိသားစုကို ကျိန်ဆဲကြလေတော့သည်။

ထိုအချိန်မှာပင် သခင်ဝူနှင့် အကြီးဆုံးသခင်လေးဝူတို့လည်း အပြင်သို့ ပြေးထွက်လာခဲ့ကြသည်။ ရှစ်သခင်မကြီး၏ စကားများကြောင့် သူတို့ အလွန်ဒေါသထွက်ကာ မေ့လဲမတတ်ပင် ဖြစ်သွားခဲ့ရသည်။ သူတို့အပေါ် သွန်ချလိုက်သည့် ရေဆိုးရေညစ်က သိပ်များလွန်းလှသည်။ သူတို့ ဤလိုမျိုးလုပ်ရပ်ကို တစ်ခါမှ မလုပ်ခဲ့ဖူးဘူး ဟုတ်ပြီလား။

ရှစ်ချင်းလျို့က အကြီးဆုံးသခင်လေးဝူ၏ လက်မောင်းကို ဆုပ်ကိုင်ထားသောကြောင့် သူနှင့် သူ့အဖေ၏ တုံ့ပြန်မှုက အနည်းငယ် နောက်ကျနေခဲ့ခြင်း ဖြစ်သည်။

ထိုအခင်းဖြစ်ပွားမှုကို မြင်တွေ့ရသောအခါ တရားရုံးမှ လူတချို့ ဝင်လာခဲ့ကြလေသည်။ သို့ပေမယ့် သခင်ဝူက မျက်လုံးလျှင်စွာဖြင့် ကျန်ရှိနေသည့် တရားရုံးစာရေးများ တံခါးဝတွင် ရပ်နေသည်ကို မြင်လိုက်ရသည်။

သူတို့၏ အိမ်တွင်းအစေခံက လာရောက် တင်ပြလေသည်။

"သခင်ကြီး... သူတို့ပြောတာတော့ သခင်တို့က သမက်ဖြစ်သူကို အဆိပ်ခတ်တယ်လို့ တိုင်ကြားချက် ရထားတာကြောင့် တရားသူကြီးမင်းက စုံစမ်းခိုင်းလို့ ရောက်လာတာလို့ ပြောပါတယ်။ အထဲကို ဝင်ရှာပြီး အဆိပ်ရှိ၊ မရှိ သိချင်တယ်လို့ ပြောနေပါတယ်။"

သခင်ဝူမှာ ဘာကြောင့်မှန်းမသိပေမယ့် ပျာယာခတ်နေမိသည်။ သူတို့အိမ်က တစ်ခုခုတော့ မှားယွင်းနေပြီ ဖြစ်သည်။ သူက တရားရုံးကို ဝင်ရောက်စစ်ဆေးခွင့် မပြုချင်ပေ။ သို့ပေမယ့် တရားရုံးမှ စာရေးများကတော့ ဆုံးဖြတ်ချက် ခိုင်မာနေကြသည်။

သူတို့က အဆိပ်ကို ကိုယ်တိုင် ဝင်ရောက်စစ်ဆေးချင်နေသောကြောင့် သူကိုယ်တိုင် ခေါ်ဝင်သွားကာ ရှစ်မိသားစု၏ စတုတ္ထသားကို ပြသရမည်ဖြစ်သည်။ သူက ရှစ်သခင်မကြီးကို ကိုင်တွယ်ရန်အတွက် သားဖြစ်သူကို ထားခဲ့ရန် မူလက စီစဉ်ခဲ့သည်။ သို့ပေမယ့် တရားရုံးစာရေးများက အိမ်တော်ထဲသို့ အလျင်စလို ဝင်သွားပြီဖြစ်ကြောင်း အစေခံလေးက တီးတိုးလာရောက် တင်ပြသည့်အချိန်မှာတော့ သူ အလွန် ထိတ်လန့်သွားခဲ့ရသည်။

သူက အကြီးဆုံးသခင်လေးဝူကို အမိန့်ပေးလိုက်သည်။

"မြန်မြန် သွားကြည့်စမ်း။"

အကြီးဆုံးသခင်လေးဝူကလည်း ထိုအချိန်တွင် အနည်းငယ် ပျာယာခတ်နေသည်။

"ဟုတ်ကဲ့။"

သူက လျင်မြန်စွာ ပြေးဝင်သွားခဲ့သည်။

ရှစ်ချင်းလျို့၏ မျက်လုံးများက လက်ခနဲ ဖြစ်သွားပြီး သူ၏နောက်သို့ လိုက်သွားခဲ့သည်။

"အဆိပ်ဖြေဆေး မပေးလို့ကတော့ ဒီကနေ ထွက်သွားဖို့ မစဉ်းစားနဲ့။"

ထို့နောက် သူမက တံခါးဆီသို့ လိုက်သွားပြီး အကြီးဆုံးသခင်လေးဝူ၏ လမ်းကို ပိတ်ဆို့လိုက်လေသည်။

***