Ch 14

🥰Chapter 14 

Zzzzz

ကျန်းယင်၏ QQ ၌ ရိုက်နှက်သည့် အီမိုဂျီ ဒါဇင်ပေါင်းများစွာကို သိမ်းဆည်းထားပြီး အီမိုဂျီအသစ်အဟောင်းအားလုံးက ချီကျူးကို ထိုးနှက်နေသည်။

 [အတန်းခေါင်းဆောင်]: [ဝါထိန်နေသောမျက်နှာဖြင့် မေးလိုက်သည်.jpg]

[အတန်းခေါင်းဆောင်]: “အဲ့တော့ မင်း မအိပ်နေဘူးပေါ့…”

ကျန်းယင်က အီမိုဂျီများကို ရိုက်ခွဲပြီးနောက် သူ တွေးထားသော သဘောတရားအရ သူက ယခု အိပ်ပျော်နေသင့်ကြောင်း သတိရလိုက်သည်။

ကျန်းယင်: "......"

အိပ်ရမှာလား…ဘာအိပ်ရမှာလဲ…

ချီကျူးက ဤသတင်းများဖြင့် ရောက်ရှိလာခဲ့ပြီး သူက အိပ်ပျော်နေလျှင်ပင် နိုးလာနိုင်သည်။

 [အတန်းခေါင်းဆောင်]: [poke. .jpg]

 [အတန်းခေါင်းဆောင်]: “ခုနလေးက လူက ဘယ်ရောက်နေတာလဲ…ငါ့ကို ဒီလောက်အကြာကြီး စာမပြန်ဘူး…”

 [လက်မကြီးဂဏန်း]: “ငါက မင်း ပြောတာတွေကို စောင့်ကြည့်နေတာ…”

[လက်မကြီးဂဏန်း] : [အံ့အားသင့်နေသည်.jpg]

[အတန်းခေါင်းဆောင်]: “မင်း ရသစုံရှိုးကို မလာချင်ဘူးလား…”

မူလ သတ်မှတ်ထားသည့်လူ အရေးကြီးကိစ္စရှိခြင်းဆိုသည်မှာ စကားသက်သက်မျှသာ ဖြစ်ပြီး ရသစုံရှိုးက “မင်္ဂလာရှိသောနှင်းတစ်ပွင့်” ၏ နာမည်ကြီးမှုကို ငှားရမ်းလိုခြင်းဖြစ်ကြောင်း ကျန်းယင် သူ့ခြေချောင်းများဖြင့် စဉ်းစားလျှင်ပင် သိနိုင်သည်။

ချီကျူး၏ စိတ်သဘောထားအရ ထိုသူက သူ့ကို မျောက်တစ်ကောင်ကဲ့သို့ ကျီစယ်နိုင်နေခြင်းမှာ ကုမ္ပဏီက ဤကိစ္စကို လက်ခံထားနှင့်ပြီးဖြစ်၍ ဖြစ်နိုင်သည်။

[လက်မကြီးဂဏန်း]: “လစ်စမ်း…ငါ မင်းကို မကြိုက်ဘူး…”

မည်သို့ပင်ဖြစ်စေ၊ သူတို့နှစ်ယောက်အတူရှိသောအခါ ရသစုံရှိုးက တိတ်ဆိတ်အေးချမ်းသော လေထုကို ဖန်တီးနိုင်ရန် မမျှော်လင့်သည်မှာ ပိုကောင်းသည်။

ဤအချိန်၌ ကျန်းယင်က ချီကျူး၏ QQ ထိပ်ဆုံးမှ ရုပ်ပုံကို ကြည့်လိုက်သည်။ သူက ပို၍ မကျေနပ်မှုကို ခံစားလာရလေလေ သူ့အကျင့်အတိုင်း ပြဿနာရှာလိုလေလေပင်။

 [လက်မကြီးဂဏန်း]: “ကျစ်…မင်းရဲ့ QQ က ပုံက အရမ်းရုပ်ဆိုးတာပဲ…”

[အတန်းခေါင်းဆောင်]: “အိုး…”

[အတန်းခေါင်းဆောင်]: “မင်း ဒါကို ဂရုမစိုက်ဘူးလို့ ငါ ထင်ခဲ့တာ…”

ကျန်းယင်: "??? ”

ထိုအချိန်၌ ချီကျူးက သူ နှစ်ပေါင်းများစွာ အသုံးပြုခဲ့သော ရုပ်ပုံကို QQ စနစ်မှ သတ်မှတ်ထားသော အခြားပင်ဂွင်းတစ်ကောင်နှင့် အစားထိုးလိုက်လေသည်။ ဤတစ်ကြိမ်၌ ၎င်းက အနီရောင်ဖြစ်၏။ ချီကျူးက QQ ၏ အဆင့်မြင့်အဖွဲ့ဝင်အဖြစ် စာရင်းသွင်းလိုက်ပြီး ပုံကို အထူး ရောင်စုံ effect များ ပေါင်းထည့်ကာ တောက်ပနေစေသည်။

ကျန်းယင်: "......"

အရင်တစ်ခုထက်တောင် ရုပ်ဆိုးသေးတယ်…

[လက်မကြီးဂဏန်း]: “လှတယ်…ဒီတစ်ခုက လှတယ်…”

[လက်မကြီးဂဏန်း]: [ဒိုင်နိုဆောလေးချွေးပြန်နေသည်.jpg]

 [အတန်းခေါင်းဆောင်]: “နောက်ကျနေပြီ…အိပ်တော့…”

[အတန်းခေါင်းဆောင်]: [အစိမ်းရောင်ဗီလိန်ကြီးကဖက်လိုက်သည်.jpg]

ကျန်းယင်က စခရင်ပေါ်မှ အစိမ်းရောင်စနစ်ကို ကြည့်ကာ ပြုံးလိုက်သည်။

သူက ယခု ထိတ်လန့်၍ နိုးလာပြီ ဖြစ်ပြီး ချီကျူးကိုလည်း မအိပ်စေလိုပေ။

 [လက်မကြီးဂဏန်း]: “ဘာအိပ်မှာလဲ…လာစမ်းပါ…မင်း ပြောတဲ့အတိုင်း အွန်လိုင်းပေါ်မှာ ဇာတ်ညွှန်းကို စိတ်အားထက်သန်မှုရှိရှိ ဆွေးနွေးကြမယ်…”

 [အတန်းခေါင်းဆောင်]: ...

 [လက်မကြီးဂဏန်း]: “ဒီည မအိပ်နဲ့တော့…”

*

ချန်ရှုက နောက်တစ်နေ့မနက် ဆယ်နာရီမှသာ ကျန်းယင်၏ ဖုန်းကို ဆက်သွယ်၍ ရခဲ့သည်။

“အိပ်ချင်တယ်…”

ကျန်းယင်က မျက်လုံးများ ပိတ်ထားဆဲဖြင့် ဖုန်းကို ဖြေလိုက်သည်။

“ခင်ဗျားက တကယ်ကို ကျွန်တော်တွေ့ဖူးသမျှထဲမှာ အအိပ်နိုင်ဆုံး အိုင်ဒေါပဲ…”

ချန်ရှုက သူ၏ မကျေနပ်မှုကို ပါးနပ်စွာ ဖော်ပြလိုက်သည်။

“ကျွန်တော်တို့မှာ ဒီနေ့ နေ့လယ် တိုက်ရိုက်ထုတ်လွှင့်မှု ပလက်ဖောင်းတစ်ခုမှာ တီဗီစီးရီးနဲ့ ပတ်သက်ပြီးအင်တာဗျူးတစ်ခုရှိတာကို မှတ်မိသေးလား…”

ကျန်းယင်က အင်တာဗျူးကို မှတ်မိသော်လည်း ယခင်ညက ပြန်လည်တိုက်ခိုက်ရန်အလို့ငှာ သူတို့နှစ်ယောက်က ညနက်သည်အထိ ဇာတ်ညွှန်းအကြောင်း  ပြောဆိုခဲ့ကြသည်။

ရန်သူပေါင်းတစ်ထောင်ကို သတ်ဖြတ်နိုင်ခဲ့ပေမယ့် လူရှစ်ရာကို ဆုံးရှုံးခဲ့ရတယ်…

“ငါအခု လာခဲ့မယ်…”

ကျန်းယင်က ကိုယ်ကို လှည့်ကာ ထရပ်လိုက်ပြီး မှန်ရှေ့၌ ဆံပင်ကို ပြုပြင်လိုက်ကာ ကုတ်အင်္ကျီတစ်ထည်ကို ဆွဲယူပြီး အောက်ထပ်သို့‌ ပြေးဆင်းလာလိုက်သည်။

“ညနက်တဲ့ထိ နေခဲ့တာလား…”

လက်ထောက်ချန်က ကျန်းယင်၏ ရှုပ်ပွနေသော ဆံပင်ကို ကြည့်ကာ ရယ်ရမည်လား၊ ငိုရမည်လား မသိတော့ပေ။

“မဟုတ်သေးပါဘူး…မနေ့ညက ချီကျူးနဲ့ ညစာစားပွဲကို သွားတာမလား…”

“အဲ့ဒါက ပြောပြဖို့ ခက်တယ်…”

ကျန်းယင်က မှန်သေးသေးလေးတစ်ခုကို ထုတ်ကာ သူ့ဆံပင်ကို ဖွလိုက်သည်။

လက်ထောက်ချန်က ထိုသူတို့နှစ်ယောက် နေ့တိုင်း ငြင်းခုံလာသည့် QQ စကားပြောဝိုင်းဆက်ဆံရေးကို တွေးမိလိုက်ပြီး ၎င်းက အမှန်တကယ်ပင် ဖော်ပြရန် ခက်ခဲကြောင်း ခံစားလိုက်ရသည်။

“ဒါနဲ့…ရသစုံရှိုးတစ်ခု ရှိတယ်…”

လက်ထောက်ချန်က အခြားအကြောင်းအရာတစ်ခုကို သတိရသွားသည်။

“ချီကျူး ငါ့ကို ပြောတယ်…”

လက်ထောက်ချန်: “ကုမ္ပဏီက မင်းအတွက် စီစဉ်ထားတဲ့ အလုပ်တွေက တကယ်တော့ နည်းနည်း များနေပြီ…”

“အဲ့ဒါကို ငါကိုယ်တိုင် တောင်းဆိုခဲ့တာ…”

ကျန်းယင်က ကားနောက်ခုံကို မှီလိုက်သည်။

“အမေက ပြောတယ်…ငါတို့ မိသားစုက အလုပ်လက်မဲ့တွေကို မပျိုးထောင်ဘူးတဲ့…”

ချန်ရှုက နားလည်သွားပုံပေါ်သည်။ အလုပ်လက်မဲ့များကို မပျိူးထောင်သောကြောင့် ကျန်းယင်က ဤနယ်ပယ်ထဲ၌ အလေးမထားဘဲ ပျင်းပျင်းရိရိနေတတ်သည်ဆိုသော်လည်း သူ၏ အလုပ်များမှာတော့ အခြေခံသဘောတရားအရ ရပ်မသွားဘဲ နာမည်လည်းကြီးကာ ပိုက်ဆံလည်းများစွာ  ရှာနိုင်သည်။

သာမန်လူတစ်ယောက်၏ စိတ်နေစိတ်ထားဖြင့် ဤသို့သော မုန်းတီးမှုများဖြင့် နာမည်ကြီးလာသော လမ်းကြောင်းကို မသွားနိုင်ပေ။

ချန်ရှုက ကားမောင်းသည်ကို အာရုံစိုက်နေချိန်၌ ကျန်းယင်က အနောက်ခုံတွင် ချီကျူးနှင့် ပတ်သက်သည့် ဗီဒီယိုတစ်ပုဒ်ကို ကြည့်ကာ ကျယ်လောင်စွာ ရယ်မောနေသည်။

ထိုဗီဒီယိုမှာ အမြဲအာရုံစိုက်မှု ရှာတတ်သည့် ဈေးကွက်ရှာဖွေရေးအကောင့်တစ်ခုက တင်ထားခြင်းပင်။ 

ချီကျူးက တီဗီစီးရီးအသစ်တစ်ခု၏ အဓိကဇာတ်ဆောင်နေရာကို ယူမည်ဖြစ်ရာ ဈေးကွက်ရှာဖွေရေးအကောင့်က သဘာဝကျကျပင် ကျော်ကြားမှုတက်စေရန် အသုံးချနေခြင်း ဖြစ်သည်။

[[ဈေးကွက်ရှာဖွေရေးအကောင့်: “အဓိကထုတ်လုပ်ရေးတီဗီစီးရီးရဲ့ အဓိကသရုပ်ဆောင်လား…သူ့ရဲ့ သရုပ်ဆောင်စွမ်းရည်ကို မပြောသေးနဲ့ဦး…ဒါပေမယ့် ဒီလောက် အေးစက်ပြီး မဖော်ပြတတ်တဲ့ပုံနဲ့သူက လောနန်ခယ့်ကို ကောင်းကောင်း သရုပ်ဆောင်နိုင်မှာလား…”]]

 ထိုဗီဒီယိုမှာ ချီကျူး၏ ယခင်ရုပ်ရှင်အတွက် ပရိုမိုးရှင်း ပရိုဂရမ်တစ်ခုမှ ဖြစ်သည်။ 

ကျန်းယင်က ထိုသို့သောအကြောင်းအရာများကို အကြိမ်များစွာ မြင်ဖူးသည်။ တစ်ချက်ကြည့်လိုက်ရုံနှင့် ရုပ်ရှင်ထဲမှ ဒုတိယအမျိုးသမီးဇာတ်ဆောင်နေရာ၌ သရုပ်ဆောင်သော အမျိုးသမီးကြယ်ပွင့်က ရှိုး၌ ချီကျူးနှင့် ခေါင်းစဉ်တစ်ခု ဖန်တီးရန် ပြင်းပြင်းထန်ထန် ကြိုးစားနေပုံကိုမြင်နိုင်လေသည်။ နာမည်ကြီးသွားမည့်အကြောင်းအရာအချို့ကို သယ်ဆောင်လာရန် မျှော်လင့်နေသော်လည်း ချီကျူးက အားလုံးကို ပါးနပ်စွာ ရှောင်ရှားခဲ့သည်။

ပရိုဂရမ်အဖွဲ့က အပြန်အလှန် နားလည်မှုနှင့်ပတ်သက်၍ အကြောင်းအရာတစ်ခု ဖန်တီးပေးလိုက်သောအခါ... အမျိုးသမီးကြယ်ပွင့်က ကင်မရာရှေ့တွင် သူမ၏ ယနေ့ ဝတ်ပုံစားပုံနှင့် ပတ်သက်၍ ချီကျူးကို မေးရန်အခွင့်အရေးတစ်ခု အရယူခဲ့သည်။

ပြဿနာမှာ ဂိမ်း၏ အခြေအနေအရ မေးခွန်းကို ရှောင်ရှား၍ မရခြင်းပင်။

ရလဒ်အနေဖြင့် ချီကျူးက နှစ်စက္ကန့်မျှ ရပ်တန့်နေပြီးနောက် ချက်ကျလက်ကျ ပြောလိုက်သည်။

“ဒီနှုတ်ခမ်းနီအရောင်က မင်းနဲ့ မလိုက်ဘူး…”

အမျိုးသမီးကြယ်ပွင့်: "..."

ပရိုဂရမ်ကို နောက်ပိုင်း ထုတ်လွှင့်သောအခါ ထိုအပိုင်းကို သဘာဝကျကျပင် ဖြတ်တောက်ထားသော်လည်း ထိုအပိုင်းကို ပေါက်ကြားစေသည့် လူအချို့မှာ မုချပင် ရှိနေခဲ့သည်။ ကျော်ကြားမှုအတွက် ဈေးကွက်ရှာဖွေရေးအကောင့်များ၏ အသုံးချမှုကို ခံခဲ့ရသည်။

ပြောရမည်ဆိုလျှင် ၎င်းမှာ အမှန်တကယ်ပင် အမျိုးသမီးကြယ်ပွင့်၏ အမှားဖြစ်၏။ သူမက အစီအစဉ်အတိုင်း မလိုက်နာဘဲ ဇာတ်ညွှန်းထဲတွင်မပါသော မေးခွန်းများကို မေးခဲ့ခြင်း ဖြစ်သော်လည်း ချီကျူး၏ အဖြေမှာ အမှန်တကယ်ပင် ဗြောင်ကျလွန်းသည်။

“ဒါက ဆရာချီရဲ့ အသံလား…”

လက်ထောက်ချန်က မေးလာသည်။

“ဟုတ်တယ်…”

ကျန်းယင် ထိုဗီဒီယိုကို လိုက်ခ်လုပ်လိုက်သည်။

“ဒါတွေ အားလုံးက ဆရာချီရဲ့ မကောင်းတဲ့ အကြောင်းအရာတွေပဲ…သူက အမှန်တရားကို လေးလေးနက်နက် ပြောတဲ့အခါ ပုံမှန်ထက်ပိုပြီး စိတ်ဝင်စားစရာကောင်းတယ်…သူ ဒါကို သိမ်းထားသင့်တယ်…”

“သူက ပုံမှန်ဆိုလည်း ပျင်းစရာကောင်းတာလား…”

လက်ထောက်ချန်က ချီကျူးအပေါ် ကျန်းယင်၏ ယခင်က အကဲဖြတ်မှုအကြောင်း အမှတ်ရလိုက်သည်။

“သူ့ရဲ့ QQ က ပုံကို ကြည့်ရုံနဲ့တင် မင်း အဲ့ဒါကို ပြောနိုင်ပါတယ်…”

ကျန်းယင်က အတင်းအဖျင်းများကို ကြည့်ကာ အကောင့်ပင် မပြောင်းဘဲ လိုက်ခ်လုပ်လိုက်ခြင်းကြောင့် နှစ်ဖက်ပရိသတ်များ၏ ယခင်ညက ရပ်တန့်ထားပြီး ဖြစ်သော အငြင်းပွားမှုက ချက်ချင်း ပြန်၍ ပွင့်ထွက်လာလေသည်။

ချီကျူးဘက်မှ  ပရိသတ်များ၏ မှတ်ချက်ထိန်းချုပ်မှုက အလွန် ပြင်းထန်ကာ ချက်ချင်းပင် မှတ်ချက်ကဏ္ဍထဲသို့ ဝင်ရောက်လာကြသည်။

ချီကျူးပရိသတ်: “?”

[ချီကျူးပရိသတ်: “သူများတွေ လိုက်ခ်လုပ်တာက ထားပါတော့…မင်းက ဘာလို့ လိုက်ခ်လုပ်တာလဲ…မင်းကိုယ်တိုင် နာမည်မကောင်းနေတာနဲ့တင် မလုံလောက်သေးဘူးလား…”]

[ချီကျူးပရိသတ်: “[link]…အတင်းအဖျင်းတွေ ကြည့်နေတာလား…ဒါဆို ဒီဗီဒီယိုကိုလည်း ကြည့်ကြည့်လိုက်ပါဦး…သူများတွေနဲ့ ငြင်းခုံတဲ့နေရာမှာ ကျန်းယင်က ဒုတိယဆိုရင် ဘယ်သူက ပထမနေရာကို ယူရဲမှာလဲ…”]

ထိုလင့်ခ်မှာ ကျန်းယင် ပထမဆုံး ပွဲဦးထွက်စဉ်က အင်တာနက် ဆယ်လီတစ်ယောက်နှင့် ငြင်းခုံထားခြင်းပင်။ ထိုအင်တာနက်ဆယ်လီက နာမည်ကြီးရန် ရည်ရွယ်ထားခဲ့ပြီး ကျန်းယင်၏ နောက်ခံကိုလည်းများစွာ မသိသောကြောင့် ကျန်းယင်က အိုင်ဒေါတစ်ယောက်ဖြစ်ရန် လုံလုံလောက်လောက် ချောမောမှုမရှိဟု တိုက်ရိုက်ပင် ပြောခဲ့သည်။

ထိုစကားများ ထွက်လာသည်နှင့် ထိုလူက အုပ်စုလိုက် လှောင်ပြောင်ခြင်းကို ခံခဲ့ရ၏။ အင်တာနက်အသုံးပြုသူများထံမှလည်း လှောင်ပြောင်ခံရပြီး ကျန်းယင်၏ ဂဏန်းအကောင့်အမျိုးမျိုးထံမှလည်း လှောင်ပြောင်ခံခဲ့ရသည်။

အဆုံးတွင်တော့ ကျန်းယင်က သူ၏ တရားဝင်ဝေ့ပေါ်အကောင့်သို့ ဝင်ကာ ထိုအင်တာနက်ဆယ်လီကို မန်းရှင်းလိုက်သည်။

[@ကျန်းယင်Kani: “ဝါး…အံ့အားသင့်စရာပဲ…မင်းက အရမ်းကြည့်ကောင်းတယ်ဆိုတော့ ငါ့ကို ပုံနှစ်ပုံပို့ပေးပါလား…မကောင်းဆိုးဝါးဝိညာဉ်တွေကို နှင်ဖို့ ပရင့်ထုတ်ပြီး လူတိုင်းကို ဖြန့်ပေးမယ်…”]

၎င်းက ကျန်းယင် ဖျော်ဖြေရေးနယ်ပယ်သို့ ဝင်ပြီးချိန်မှစ၍ ပထမဆုံး တိုက်ပွဲဖြစ်ပြီး အမူအကျင့်ကောင်းကာ ချိုသာသော လူငယ်အိုင်ဒေါပုံရိပ်က တစ်လအတွင်းပင် ပြိုကွဲသွားခဲ့သည်။

ပရိသတ်ကထိုလင့်ခ်ကို ပို့ပြီးနောက် ချီကျူးကလည်း ၎င်းကို လိုက်ခ်လုပ်ခဲ့သည်။

အင်တာနက်အသုံးပြုသူများက ရူးသွပ်သွားပြန်ကြသည်။

[ဒီနှစ်ယောက်က ဘာလုပ်နေကြတာလဲ...အချင်းချင်းရဲ့ ဖရဲသီးကို ပြန်စားနေကြတာလား...]

[ဒီနှစ်ကတော့ တကယ်ကောင်းမွန်တဲ့ နှစ်ပဲ...နှစ်အစမှာတင် ဒီနှစ်ယောက်က တစ်ယောက်ကို တစ်ယောက် တိုက်ခိုက်နေကြပြီ...ဒါက တခြား ရည်းစားလုတဲ့ ဖောက်ပြန်တဲ့ သတင်းတွေထက်ပိုပြီး စိတ်ဝင်စားစရာကောင်းတယ်...အဓိကကတော့ နှစ်ဖက် ပရိသတ်တွေက အရမ်းကို အရည်အချင်း ရှိကြတာပဲ...]

[ဒီနှစ်ဖက်ကြားက အငြင်းပွားတာတွေကို တစ်ပတ်လောက် စောင့်ကြည့်နေရင်း ငါတော့ ရယ်နေရပြီ...သူတို့က ဒီလို အပြင်းအထန်ဖြစ်နေကြတော့ ဒီရုပ်ရှင်ကို တကယ်ပဲ ရိုက်ကူးနိုင်ကြပါ့မလား...]

[ဒီနှစ်ယောက်ကြားမှာ ထူးထူးခြားခြား စိတ်ဝင်စားစရာတစ်ခုခု ရှိတယ်လို့ ထင်နေတာ ငါ တစ်ယောက်ထဲလား...]

[မင်္ဂလာရှိသော နှင်းတစ်ပွင့် ရိုက်ကူးတာကို စောင့်နေတာ...ရုပ်ရှင်က ပျက်စီးသွားမလားဆိုတာ စောင့်ကြည့်နေပါတယ်...] 

[ဟေး မကြာခင် တိုက်ရိုက်ထုတ်လွင့်မှု ပလက်ဖောင်းမှာ အင်တာဗျူးတစ်ခု ရှိတယ်ဆိုတာ ငါ မှတ်မိပြီ...အဲ့မှာ ဒီနှစ်ယောက် ပါနိုင်လား...]

[လာကြ...တိုက်ရိုက်ထုတ်လွင့်မှုအခန်းကို သွားပြီး စောင့်ကြည့်ကြမယ်...]

*

ကျန်းယင် အိပ်ရာထနောက်ကျသွားသော်လည်း သူ ရောက်သည့်အချိန်မှာ နောက်မကျဘဲ ရွှမ်ဟွေ့ထုန်တစ်ယောက်တည်းသာ မိတ်ကပ်လိမ်းရသေးသည်။

“ဟွေ့ဟွေ့ကျဲ...”

ထိုနှစ်ယောက်မှာ ကုမ္ပဏီတစ်ခုတည်းမှ ဖြစ်ပြီး တစ်ဖက်လူမှာ စီနီယာဖြစ်သောကြောင့် ကျန်းယင်က စတင် နှုတ်ဆက်လိုက်သည်။

“အင်တာဗျူးမှာ ဘယ်သူတွေ ပါဦးမှာလဲ...”

“ငါရယ်၊ ယင်ကျားယွီရယ်၊ မင်းရယ်..."

ရွှမ်ဟွေ့ထုန်က မိတ်ကပ်စားပွဲပေါ်မှ နို့လက်ဖက်ရည်ကို ကြည့်ကာ စိတ်လွတ်နေသောပုံဖြင့် ပြောလိုက်သည်။

“ပြီးတော့ ချီကျူးရောပဲ...သူက မနက်ပိုင်းမှာ ဘရန်းတစ်ခုက အစည်းအဝေးတစ်ခုရှိလို့ နည်းနည်း နောက်ကျမယ်လို့ ခန့်မှန်းထားတယ်..."

“နို့လက်ဖက်ရည်သောက်လိုက်ဦး...”

ရွှမ်ဟွေ့ထုန်က လက်လျှော့လိုက်သည်။

“ငါ မသောက်တော့ဘူး...ဒါက ပလက်ဖောင်းနဲ့ ပူးပေါင်းထားတာ...အင်တာဗျူးကျရင် ငါက ခေါင်းစဉ်ကို စပေးမယ်...မင်းက ဖြေသွားရုံပဲ..."

အဆီများသည့် နို့်လက်ဖက်ရည်ကို မသောက်သော ကျန်းယင်က ဆိုဖာတစ်လုံးကို ပျော်ရွှင်စွာ ရှာတွေ့သွားကာ လှဲ၍ သူ့ဖုန်းကို ကြည့်လိုက်သည်။

[လက်မကြီးဂဏန်း]: [poke.jpg]

[လက်မကြီးဂဏန်း]: “ဆရာချီ အိပ်ပြီလား...”

[လက်မကြီးဂဏန်း]: [ယုန်လေးအလွန်ပင်ပန်းနေသည်.jpg]

[လက်မကြီးဂဏန်း]: [ဒိုင်နိုဆောလေးအလွန်ပင်ပန်းနေသည်.jpg]

[လက်မကြီးဂဏန်း]: Zzzzzz

ချီကျူးက အလုပ်များနေပုံပေါ်သည်။

 ကျန်းယင် သူကိုယ်တိုင် ပို့ထားသည့် စာများနှင့် ပင်ပန်းသည့် စတစ်ကာများကို ကြည့်လျက် မျက်လုံးများ လေးလာကာ အိပ်ပျော်သွားလေတော့သည်။

***

တိုက်ရိုက်ထုတ်လွှင့်မှုအခန်းမှ အင်တာနက်အသုံးပြုသူများက နောက်ဆုံးတွင် နေ့လယ်တစ်နာရီ၌ ဒရာမာအဖွဲ့၏ တိုက်ရိုက်ထုတ်လွှင့်မှုကို စောင့်ကြည့်နိုင်ခဲ့သည်။ ထိုတိုက်ရိုက်ထုတ်လွှင့်မှုမှာ အမှန်တကယ်တွင် ဒရာမာနှင့် ပလက်ဖောင်းကြားမှ ပူးပေါင်းမှုတစ်ခု ဖြစ်ပြီး အဓိကမှာ ပလက်ဖောင်းကို ကြော်ငြာခြင်း ဖြစ်သည်။ တီဗီစီးရီးမှာမူ မရိုက်ကူးရသေးသည့်အတွက် အကြောင်းအရာများစွာ မပြောကြပေ။

မိတ်ကပ်ကို လှပစွာ ပြင်ဆင်ထားသည့် ရွှမ်ဟွေ့ထုန်က သူ့ဖုန်းကို ကိုင်ကာ ပန်းပွင့်အသစ်လေး ယင်ကျားယွီနှင့်အတူ ပရိသတ်များကို နှုတ်ဆက်လိုက်သည်။ ချီကျူးကလည်း အချိန်မီရောက်လာကာ ပရိသတ်များကို နှုတ်ဆက်လိုက်သည်။

မှတ်ချက်များက ချက်ချင်းပင် များပြားလာသည်။

[ပန်းချီကားထဲက နတ်ဘုရားမကျနေတာပဲ...]

[ကျားယွီ...ငါ့ကို ကြည့်ပါဦး၊ ငါ့ကို ကြည့်ပါဦး...အား...သူ ပြုံးလိုက်တယ်...]

[ချီကျူးကော...ကောက ဒီနေ့အရမ်း ကြည့်ကောင်းနေတာပဲ...ကောက အလုပ်များလွန်းနေတော့ ခဏခဏ မတွေ့ရဘူး...ဒီတစ်ခါက ပလက်ဖောင်းကို ကြော်ငြာတာပေမယ့် တိုက်ရိုက်ထုတ်လွှင့်မှုမှာ တွေ့ရလို့ အရမ်းပျော်တယ်... QAQ]

[ဝူးဝူး...ကောရဲ့ ဒီနေ့ အဝတ်အစားက လုံးဝကို ပြီးပြည့်စုံနေတာပဲ...ခန္ဓာကိုယ် အမှတ် ၁၀၀၊ ဝတ်စားပုံ အမှတ် ၁၀၀၊ အော်ရာ အမှတ် ၁၀၀...အလုပ်များနေတာတောင် လာပြီး တိုက်ရိုက်ထုတ်လွှင့်ပေးတာ စိတ်လှုပ်ရှားပြီး ရင်ထဲထိလို့ မျက်ရည်ပါကျတယ်...]

[ဝိုး...ကောကော ခုနက အစည်းအဝေးမှာ ဝတ်တာက တခြားအဝတ်အစားမလား...ဒါကို ထပ်ပြီး လဲထားတာလား...]

😍😍😍