အခန်း(၃၇)မဖြစ်နိုင်ရင်ဒေါသအိုးမပေါက်ကွဲပါနဲ့
Viewers 53k
Chapters 702

အခန်း(၃၇) - မဖြစ်နိုင်ရင် ဒေါသအိုး မပေါက်ကွဲပါနဲ့


ကျိုးချင်းပိုင် ကျိုးအိမ်မှ ပြန်လာကာ ဇနီးဖြစ်သူ ချက်ပြုတ်ထားသော ဂျင်းပြုတ်ရည်ကို သောက်ပြီး မကြာမီတွင် အဖွဲ့ခေါင်းဆောင်၏အိမ်သို့ သွားရောက်လည်ပတ်ခဲ့သည်။ 


လင်းချင်းဟယ်က စိတ်မဝင်စားဘူး။ သူမသည် ပန်းကန်လုံးကို သိမ်းယူပြီး ဆေးကြောလိုက်သည်။ 


ဂျင်းပြုတ်ရည်ကို သူ ထပ်သောက်ဖို့ သူမ လုပ်ပေးရန် လိုအပ်တယ်ဆိုတာ ပြောစရာတောင် မလိုဘူး။ မနေ့ညက နှင်းတွေ အရမ်းကျနေတာ ဘယ်လိုလုပ်ပြီး ပန်းကန်လုံး တစ်လုံးစာလောက် သောက်ရုံနဲ့ လုံလောက်မှာလဲ။ 


ထိုကြောင့် သူ ကျိုးအိမ်မှာ ရှိနေစဉ်အတွင်း သူမ ဂျင်းပြုတ်ရည်ကို ထပ်ပြုတ်ခဲ့သည်။ 


ဒီတစ်ကြိမ်တော့ ကျိုးချင်းပိုင် တစ်ယောက်တည်း အတွက် မဟုတ်ဘူး။ လောင်တ၊ လောင်အာ့နှင့် လောင်စန်းတို့အတွက်လည်း ပါသည်။ ဒါပေမယ့် သူမသည် သူတို့အတွက်တော့ သကြားညို အနည်းငယ် ထပ်ထည့်ပေးထားသည်။ မဟုတ်ရင် ကလေးသုံးယောက်က သောက်မှာ မဟုတ်ဘူး။ 


လင်းချင်းဟယ်လည်း သောက်သည်။ 


ဒီလိုအေးတဲ့ရာသီဥတုမှာ ဂျင်းပြုတ်ရည် သောက်တာက ခန္ဓာကိုယ်ကို နွေးထွေးစေသည်။ အခုက ကျောက်မီးသွေးမီးဖိုကို မီးမွှေးထားတာကြောင့် ဘာမဆို ချက်ပြုတ်ရန် အဆင်ပြေသည်။ သူမသည် လောင်စန်းကို ကြည့်ရှုစောင့်ရှောက်ရန် လောင်တနှင့် လောင်အာ့ကို တာဝန်ပေးလိုက်သည်။ သူမသည် အာလူးများကို ထုတ်ယူပြီး အတုံးလေးတွေ စိတ်လိုက်သည်။ 


နေ့လည်စာအတွက် အာလူးနဲ့ဝက်သားရောချက် နှင့် ပုဇွန်အရေခွံစွပ်ပြုတ်ဆိုရင် လုံလောက်ပြီ။ 


ဝက်ဗိုက်သားသည် မနေ့က အစ်မမိန်ထံမှ ဝယ်ခဲ့သောအသားဖြစ်သည်။ ဒီတစ်ခါတော့ သူမ အများကြီး ဝယ်ခဲ့သည်။ 


ဝက်ဗိုက်သား သုံးဂျင်းနှင့် ဝက်နံရိုး ဂျင်းနည်းနည်းလောက်ပေါ့။ သူမသာ ချွေချွေသာသာ ချက်ပြုတ်ရင် သူတို့တွေ ထိုအသားကို ခဏတာကြာအောင် စားနိုင်သည်။ 


ဥပမာ - ဒီတစ်ခါ သူမ အာလူးနဲ့ဝက်သား ချက်တဲ့အခါ ဝက်သားကို ပါးပါးလေး လှီးထားသည်။ ကြည့်လိုက်ရင် အများကြီးလို့ ထင်ရသော်လည်း အသားနည်းနည်းပဲ ပါပြီး အပို မထည့်ထားဘူး။ 


ဒါပေမယ့် ဝက်ဆီဖြင့် ကြော်လိုက်ရင် အရသာရှိသွားလိမ့်မည်။ 


ပုဇွန်စွပ်ပြုတ်က ပိုပြီး ရိုးရှင်းသည်။ 


သူမသည် ပါဝင်ပစ္စည်းအားလုံးကို ပြင်ဆင်ပြီးပြီ။ အချိန်ကို ကြည့်လိုက်တော့ စောလွန်းသေးသည်။ အချိန် ကြည့်ရှုရန် အိမ်မှာ နာရီတစ်လုံး ချိတ်ဆွဲထားသည်။ မူလပိုင်ရှင်သည် ၎င်းကို ဝယ်ယူရန် စက်မှုကူပွန်လက်မှတ်များစွာကို စုဆောင်းသိမ်းဆည်းခဲ့သည်။ အဲဒါက ကျိုးချင်းပိုင်၏ လစာနှင့် ထောက်ပံ့ကြေး သုံးလစာနဲ့ ညီမျှသည်။ 


အခု သူမ အကျိုးကျေးဇူးကို ခံစားနေရပြီ။ အသုံးအဖြုန်းကြီး လက်ဖွာသော အမျိုးသမီးတစ်ဦး၏ ဂုဏ်သတင်းကို လွှဲပြောင်းယူရမှာလည်း မလွဲမသွေ ဖြစ်မည်မှာ သေချာပါသည်။ 


လင်းချင်းဟယ်သည် သူမ၏ ပစ္စည်းမျိုးစုံကို စစ်ဆေးရန် အခန်းထဲသို့ ပြန်လာသည်။ ကံကောင်းထောက်မစွာဖြင့် သူမစိတ်ထဲ ထင်မြင်ချက် ရှိပြီး ဒီရက်ပိုင်းအတွင်း သူ ပြန်လာမယ်ဆိုတာ သိနေတာ။ အိမ်မှာ ဆန်နှင့် ဂျုံမှုန့်တွေ အပြည့်ရှိသည်။ ကြက်ဥခြင်းကောပဲ။ ဒါတွေက အချိန်ခဏလောက်တော့ လုံလောက်သည်။ 


လင်းချင်းဟယ် အကျေနပ်ဆုံးကတော့ ကျိုးချင်းပိုင် ဒီတစ်ခေါက် ပြန်ယူလာတဲ့ ကူပွန်လက်မှတ် အမြောက်အများနဲ့ ယွမ် သုံးထောင်ပဲ။ 


နောက်နှစ်မှာ ကျိုးချင်းပိုင်က အလုပ်လုပ်လိမ့်မည်။ ထိုအချိန်မှာ လူစာရင်းအရ အစားအသောက် ရလာလိမ့်မယ်။ ကျိုးချင်းပိုင်လို လူရွယ်တစ်ယောက် အနေဖြင့် အလုပ်မှတ် ဆယ်မှတ် ရနိုင်မှာ သေချာသည်။ ဒါကြောင့် သူမအနေနဲ့ ပိုက်ဆံကုန်မှာကို စိုးရိမ် စိတ်ပူစရာ မလိုတော့ဘူး။ 


သူမက အိမ်သုံးပစ္စည်းများကို အလုံအလောက် သှိမှီးရရှိထားသောကြောင့် ခရိုင်မြို့သို့ ဈေးဝယ်ထွက်ရန် မလိုအပ်တော့ဘူး။ 


ဒါကြောင့် အခု သူမရဲ့ငွေလက်ကျန် ယွမ်နှစ်ရာနဲ့ဆိုရင် သူမမိသားစုမှာ စုစုပေါင်း ယွမ် ၃၂၀၀ ရှိသည်။ ဒီပိုက်ဆံတွေကို စုဆောင်း သိမ်းဆည်းထားရမယ်။ 


ကန့်သတ်ချက်များကို ရုပ်သိမ်းလိုက်မည့် အချိန်အထိ ၎င်းကို သိမ်းဆည်းထားပြီး သူမ စီးပွားရေး လုပ်နိုင်မလား ကြည့်ကြတာပေါ့။ 


ဒီလိုမှမဟုတ်ရင် နေရာတိုင်းမှာ ရွှေတွေ ရနိုင်ပြီး အဲအချိန် သူမမှာ လုပ်စရာအရင်းအနှီး ဘာမှမရှိခဲ့ရင် သူမ တကယ်ငိုမိလိမ့်မည်။ 


လင်းချင်းဟယ်က ထိုကဲ့သို့သော အစီအစဉ်တွေ တွေးတောနေချိန်တွင် ကျိုးအမေ ရောက်လာသည်။ 


ကျိုးအမေကို မြင်လိုက်တော့ လင်းချင်းဟယ်သည် မသိစိတ်၏စေ့ဆော်မှုအရ သူမမျက်နှာကို ချက်ချင်း တည်ကြည် လေးနက်သွားစေသည်။ 


မှန်ပါတယ် သူမက ကျိုးချင်းပိုင်နဲ့ ထိုကိစ္စကို အိုးနင်းခွက်နင်းနှင့်ပင် ပြီးမြောက်သွားနိုင်သည်။ ဒါပေမယ့် ကျိုးအမေနဲ့တော့ မဟုတ်ဘူး။ မူလပိုင်ရှင်သည် ကျိုးချင်းပိုင်နဲ့ အချိန် အနည်းငယ်မျှသာ အတူတူ အချိန်ကုန်ဆုံးဖူးသည်။


သို့သော် သူမက ကျိုးအမေနဲ့ တစ်ရွာတည်းထဲမှာ အတူတူ နေထိုင်ခဲ့သည်။ မူလပိုင်ရှင်၏ဒေါသကို သူမ အလွန် ရှင်းလင်းစွာ သိထားသည်။ 


“ စတုတ္ထရဲ့ဇနီး…… စတုတ္ထ အနားယူပြီးသွားပြီဆိုတာ မင်း သိပြီးပြီလား “ ကျိုးအမေက ဒီကိစ္စကို သတိထားပြီး ကိုင်တွယ်ဖြေရှင်းရန် ကြိုးစားသည်။ 


သူမသည် သူမရဲ့ချွေးမကို တကယ် အလိုလိုက်သည်။ လင်းချင်းဟယ်သာ ဘေးမှရပ်ကြည့်သူ ဖြစ်ပါက သူမသည် သည်းမခံနိုင်ဘဲ ယောက္ခမ၏ ဂုဏ်သိက္ခာကို စွန့်လွှတ်လိုက်မည်။ 


သို့သော် ယခုမူကား သူမက အခွင့်အာဏာရှိသူ ဖြစ်နေသည်။ “ အဘွားကြီးက ဘာပြောချင်တာလဲ။ ကျွန်မကို လာ လှောင်ပြောင်နေတာလား။ ဒါဆိုလည်း လာလှောင်လာလေ……… ။ ဘာပဲဖြစ်ဖြစ် ကျွန်မကတော့ ဒီဘဝမှာ မနေနိုင်တော့ဘူး။ ထုတ်ပိုးပြင်ဆင်ပြီး အိမ်ပြန်ဖို့ အချိန်တန်ပြီ “ 


သူမ(လင်းချင်းဟယ်)က သူမကို ‘ အမေ ‘ လို့တောင် မခေါ်ဘူး။ ကျိုးအမေသည် ဒီကိစ္စ၏ အရေးကြီးမှုကို သိတာကြောင့် အလျင်အမြန် ကြားဖြတ်ပြောသည်။ “ စတုတ္ထရဲ့ဇနီး… စိတ်လက်မာန်ပါ မလုပ်ပါနဲ့။ လောင်တနဲ့ သူ့ညီတွေတောင် ဒီလောက်ကြီးနေပြီ။ သူတို့ကို ချန်ထားရစ်ခဲ့ဖို့ မင်း ခံနိုင်ရည်ရှိပါ့မလား။ စတုတ္ထက အငြိမ်းစားအနားယူပြီးသွားပြီ။ ပြီးတော့ ဒီလိုအရွယ်ရောက်တဲ့ လူရွယ်တစ်ယောက်အနေနဲ့ သူက မင်းနဲ့ ကလေးတွေကို ပံ့ပိုးပေးနိုင်တုန်းပဲလေ ဟုတ်တယ်မလား။ သူ့ကို ပြန်လာပြီး မင်းနဲ့ စကား ကောင်းကောင်းပြောဖို့ ငါ တိုက်တွန်းထားပြီးသားပါ။ အရင်တုန်းက နေထိုင်ခဲ့သလို အနာဂါတ်မှာလည်း အဲလိုနေထိုင်ရမှာပါ။ မင်း လယ်ကွင်းထဲ သွားစရာ မလိုပါဘူး။ စတုတ္ထ တစ်ယောက်တည်းနဲ့ လုံလောက်တယ် “ 


ဒါက ဒီကိုမလာခင် ကျိုးချင်းပိုင်ကို အသိမပေးဘဲ သူမ စဉ်းစားလာသည့် အကြမ်းဖျင်းအကြံဉာဏ် ဖြစ်သည်။ 


“ အရင်တုန်းက ကျွန်မ ဘယ်လိုနေထိုင်ခဲ့ရလဲ။ သူနဲ့လက်ထပ်ခဲ့တာ ဒီလောက်နှစ်တွေ ကြာနေပြီ ကျွန်မက မုဆိုးမတစ်ယောက်လို ပြုမူနေထိုင်နေရတယ်။ ဘာကြောင့် ကျွန်မ ဒီလိုလုပ်ရတာလဲ။ အားလုံးကို ကောင်းကောင်းသိနေမယ်လို့ ကျွန်မ ယုံကြည်တယ်။ ဒါပေမယ့် အခုတော့ သူက ဒီလို လက်ဗလာနဲ့ ပြန်လာခဲ့တာ။ ဘယ်လိုလုပ်ပြီး ဒီကိစ္စကို ကျွန်မက အလျော့ပေး စွန့်လွှတ်နိုင်ရမှာလဲ။ ဘယ်လိုမှ မဖြစ်နိုင်ဘူး ! “ လင်းချင်းဟယ်က သဏ္ဌာန်လုပ် ဟန်ဆောင်လိုက်သည်။ 


ဒီလို ဆိုးသွမ်းတဲ့လုပ်ရပ်မျိုး……! သူမသည် ဒေါသအိုးပေါက်ကွဲသလိုမျိုး အမှန်တကယ်ပင် မလုပ်ချင်သော်လည်း သူမ လုပ်ရမည်။


တကယ်လို့ သူမသာ ဝုန်းဒိုင်းကြဲ ဒေါသမထွက်ထားရင် လယ်ကွင်းကို သွားရလိမ့်မယ်။ သူမသွားရင် ဒါက ဖြစ်ရိုးဖြစ်စဉ် ကိစ္စတစ်ခုလို့ သဘောထားလိမ့်မယ်။ ဒါကြောင့် ဒါက သူမ လုပ်သင့်တဲ့အရာပဲ။ 


လူတွေက တစ်ခါတလေ ဒီလိုပဲဖြစ်ရမယ်။ ပျင်းရိတဲ့သူများသည် တစ်ခါတရံ လုံလဝီရိယရှိပြီး လူတိုင်းက သူမကို ချီးကျူးကြလိမ့်မည်။ လုံလဝီရိယရှိသူများသည် ရံဖန်ရံခါ ပျင်းရိကြတဲ့အခါ လူတိုင်းက ခေါင်းခါပြီး သူမကို ထိုသို့သော လူ ဖြစ်မှန်း ဘယ်တုန်းကမှ မမျှော်လင့်ထားသလို ပြောကြလိမ့်မည်။ 


ဒါက အမှန်တရားပဲ။


သူမသည် ဒုတိယအမျိုးအစား မဖြစ်ချင်ခဲ့သလို ဒုတိယအမျိုးအစားကဲ့သို့ မလုပ်ဆောင်နိုင်ဘူး။ 


ဒါကြောင့် သူမသည် ဒေါသမပေါက်ကွဲဘဲ ကျိုးချင်းပိုင်နှင့် သူမ၏သားများကို ပြုစုစောင့်ရှောက်ရန် နေရစ်ခဲ့လျှင် ကျိုးအဖေနှင့် ကျိုးအမေတို့ကို ပျော်ရွှင်စေနိုင်ကြောင်း ထိုသဘောထားအား သူတို့ သိရန် အခု ဒီအခွင့်အရေးကို အသုံးချရမည်။ ဒါမှ သူမ လယ်ကွင်းထဲမှာ ဘယ်လို အလုပ်မလုပ်ကြောင်းကို သူမနောက်ကွယ်မှာ သူတို့တွေ တကျည်ကျည် ပြောတော့မှာ မဟုတ်ဘူး။ သူမသားကို မစွန့်လွှတ်ဘဲ ဆက်နေချင်သေးတာ ကံကောင်းတယ်လို့ပဲ ခံစားမိလိမ့်မယ်။ 


ဟုတ်တယ်… အရေးကြီးဆုံးကတော့ ဒါက သူမရဲ့ပင်ကိုစရိုက်နဲ့ လိုက်လျောညီထွေရှိဖို့ပါပဲ။ 


သူမ သေချာပေါက် ဇွတ်လုပ်မည်ကို ကျိုးအမေ သိလို့ ထပ်ခါထပ်ခါ ဖျောင်းဖျသည်။ “ မိသားစုက တစ်စုတည်းလေ။ ဘာတွေ စွန့်လွှတ်တာ မစွန့်လွှတ်တာ ရှိရမှာလဲ။ စတုတ္ထက လူကောင်းပါ။ မင်း သူ့ကို လက်ထပ်ရလို့ အရှုံးမရှိပါ…… “ 


“ အဲဒါ ရှင့်တို့ကျိုးမိသားစုက အရှုံးမရှိတာလေ။ ကျွန်မက ကျိုးမိသားစုအတွက် မြေးသုံးယောက် မွေးပေးခဲ့တယ်။ သုံးယောက်ပေါင်းလိုက်ရင်တောင် ကျွန်မ တစ်ယောက်နဲ့ မယှဉ်နိုင်ဘူး။ ငယ်ငယ်ရွယ်ရွယ်နဲ့ အိပ်ထောင်ကျခဲ့တယ်။ ကျိုးချင်းပိုင်… သူကကော ဒီလောက် နှစ်တွေကြာတာတောင် အိမ်ပြန်လာတဲ့အချိန်က တစ်လတောင် မရှိဘူး။ ကျွန်မနဲ့ မုဆိုးမ ဘာများကွာခြားနေလို့လဲ။ နောက်ဆုံး ဒီမှာ နစ်နာတာက ဘယ်သူလဲ……! “ လင်းချင်းဟယ်က သူမကို ကြားဖြတ်ပြောပြီး ငြင်းဆိုလိုက်သည်။ 


ကျိုးအမေက အမြန်ပြန်ဖြေသည်။ “ အမေက အဲလိုသဘောမျိုး ပြောချင်တာ မဟုတ်ပါဘူး။ အခု စတုတ္ထက အနားယူလိုက်ပြီမို့ သူက မင်းကို ဘယ်တော့မှ ဒုက္ခ မခံစားစေတော့ပါဘူး။ လောင်တရဲ့အမေ… စိတ်လက်မာန်ပါ မလုပ်လိုက်ပါနဲ့ “ 


“ ကျွန်မကို ဒုက္ခ မခံစားခိုင်းပါနဲ့တော့။ သေလုနီးပါးအထိ ခံစားခဲ့ရပြီးပြီ။ အဲဒါ ဒုက္ခ မဟုတ်ဘူးလား။ အခု သူက ရာထူးက နှုတ်ထွက်ခဲ့တော့ ရွာထဲမှာ ကျွန်မ ဘယ်လို မျက်နှာပြရမှာလဲ။ ရွာသူ/သားတွေက ကျွန်မကို တိတ်တဆိတ် ရယ်နေလောက်ပြီ။ ရွာသူ/သားတွေကို မပြောနဲ့ ကျွန်မရဲ့ဒုတိယမရီးကိုပဲ ကြည့်။ သူမက တော်တော် ဝမ်းသာပီတိ ဖြစ်နေလောက်ပြီ။ ကျွန်မနောက်ကွယ်မှာ ကျွန်မကို ဘယ်လို အာရုံစိုက်နေမယ်ဆိုတာ ဘယ်သူသိမှာလဲ “ လင်းချင်းဟယ်၏မျက်နှာသည် ရှက်ရွံ့မှုဖြင့် နီမြန်းနေပြီး ဖွင့်ဟပြောဆိုလာသည်။ 


“ မဟုတ်ပါဘူး… သူမ မလုပ်ပါဘူး။ မင်းရဲ့ဒုတိယမရီးက အပြစ်ရှာတတ်တဲ့ အကျင့်ရှိပေမယ့် မင်းကိုတော့ အဲလိုမလုပ်ဝံ့ပါဘူး “ ကျိုးအမေက အမြန် ငြင်းဆိုခဲ့သည်။ 


တကယ်တော့ ဒီစတုတ္ထမြောက်ချွေးမကလည်း ကြံ့ခိုင်သော စရိုက်ရှိသူ ဖြစ်သည်။ သူမက ဒုတိယရဲ့ဇနီးကို ဘယ်တော့မှ အမြတ်ထုတ်ခွင့်မပေးဘူး။ 


“ ဘယ်လုပ်ရဲပါ့မလဲ။ လောင်တရဲ့အဖေ မျက်နှာကြောင့်သာ သူမ မလုပ်ရဲတာ။ နောင်အနာဂါတ်မှာ သူမရဲ့သား အကျိုးကျေးဇူး တစ်ခုခု ရနိုင်မလား လို့ သူမ တွေးနေတာကြောင့် သူမ မလုပ်ရဲခဲ့တာ။ အခု သူ အနားယူလိုက်ပြီဆိုတော့ သူမ ယဉ်ကျေးနေတော့မှာ မဟုတ်ဘူး “ လင်းချင်းဟယ်က ပြောပြီး အရင် အကြောင်းအရာဘက် ပြန်လှည့်ကာ “ ကျွန်မကို ဖျောင်းဖျနေစရာ မလိုပါဘူး။ ဒီကိစ္စနဲ့ပတ်သက်ပြီး ကျွန်မ ကျိုးချင်းပိုင်နဲ့ လွယ်လွယ်ကူကူ စာရှင်းရှင်း ကျေအေးပေးမှာ မဟုတ်ဘူး “ 


“ စတုတ္ထမှာ ဒဏ်ရာရလာတယ်။ ကျေးဇူးပြုပြီး သူ့ကို မဖျားနာအောင် ကောင်းကောင်း ပြုစုစောင့်ရှောက်ပေးပြီး ရောဂါ အမြစ်ပြတ်အောင် လုပ်ပေးပါ “ ကျိုးအမေက အလျင်စလို ချော့မော့သည်။ 


လင်းချင်းဟယ်သည် ထိုစကားကို ကြားလိုက်တာနဲ့ ချက်ချင်းပင် ရက်စက်ကြမ်းတမ်းသော စကားတစ်ခွန်းကို ဒေါသတကြီး ပြောလိုက်သည်။ “ အဲဒါ ကျွန်မ ကိစ္စ မဟုတ်ဘူး “

Prev Next