အပိုင်း ၆၄၇-၆၄၈
Viewers 37k
Chapters 532

Part 647


ကလေးများက မနက်ဖြန်အပြင်ထွက်ကစားဖို့ ဆရာမကိုရှာရန် တိုးတိုးပြောလာကြသည် အသား၊ငါးများစားရန်အတွက်မူ လက်မှတ်ရှိသေးလား၊မရှိတော့ဘူးလား အပေါ်မူတည်၏။သူတို့တွင် မုန့်ဖိုးများနှင့် အခြားအရာများရှိပေသည်။ မကြာခင်မှာပင် ကလေးများက ဆုံးဖြတ်ချက်ချလိုက်ကြ၏။


ရှောင်ဝမ် :‘‘မားမား သားတို့က မားမားလုပ်ကျွေးတဲ့ စည်သွပ်ထားတဲ့ဟောသွန်းသီးစားချင်တယ်’’


လင်းလန်က စိတ်ပါလက်ပါပင် သဘောတူလိုက်၏။ပါဝင်ပစ္စည်းများက သိပ်မပေါသော်ငြား သူမ၏အချိန်နှင့် လုပ်အားများကို ဖြုန်းတီးပေးရန် ဆန္ဒရှိပေသည်။သူက ထောက်ပံ့ရေးနှင့် ဈေးကွက်စီးပွားအေဂျင်စီမှရောင်းသော စည်သွပ်အစားအစာ၊ ဟောသွန်းသီးကိတ်၊အခွံနွှာသီးများအားလုံးကို ကလေးတွေအတွက် လုပ်ပေးမှာဖြစ်သည်။


ကလေးများက အလျင်အမြန်ပင် ကူညီလာကြကာ ဟောသွန်းသီးများကိုထုတ်ကာ ဆေးကြောလိုက်ပြီး သန့်ရှင်းပြီးမသုံးတော့သော ‌ဖော်တိန်ပြွန်ချောင်းကို ဟောသွန်းသီး၏အစွန်းနှစ်ဖက်ပေါက်အောင် ထိုးလိုက်ကာ အလယ်အူတိုင်ကို ထုတ်လိုက်လေသည်။ထို့နောက် အဖုံးပါသည့်အိုးစောက်ထဲသို့ ရေလောင်းထည့်လိုက်ကာ သကြားခဲနှင့် သကြားဖြူကို လုံလောက်သောပမာဏထိထည့်လိုက်ပြီး အပူချိန်အလောတော်တွင် အပူပေးလိုက်ကာ အပူချိန်နိမ့်နိမ့်တွင် ချက်လိုက်၏။သကြားများက ထူပြစ်ပြစ်ဖြစ်လာသောအခါ ဟောသွန်းသီးများကို ထည့်လိုက်ပြီး ခနလောက်ပေးပွက်ထားလိုက်၏။ထို့နောက် မီးဖိုပေါ်မှချလိုက်ကာ အအေးခံလိုက်၏။


အေးသွားသောအခါ ထိုအရာများက ချိုချိုချဉ်ချဉ်အရသာရှိသော စည်သွပ်ဟောသွန်းသီးများဖြစ်လာမှာဖြစ်သည်။


မည်သည့်တာရှည်ခံဆေးမှ ရှိမနေသောကြောင့် ထိုအရာများအား တတ်နိုင်သလောက် မြန်မြန်စားရကာ စည်သွပ်ဘူးထဲထည့်ထားသောအခါတွင်လည်း အချိန်အကြာကြီးထိသိမ်းထားလို့မရပေ


အခုချိန်တွင် သကြားရရန်မလွယ်ကူသော်လည်း ဟောသွန်းသီးများကိုမူ အလွယ်တကူရနိုင်၏။တဝမ်က လင်းမိန်အိမ်မှပြန်လာသောအခါ အများကြီးယူလာခဲ့ပေသည်။အဆင်သင့်ရသောအခါ မိုင်စွေ့က ဖန်းရှောင်၊ရှန်ယွီနှင့် ကုမီတို့အရသာခံနိုင်ရန် အနည်းငယ်ပေးဖို့သွားလိုက်သည်။ကျန်သည့်ကလေးများကမူ သရေစာအဖြစ် စားကြမှာဖြစ်သည်။


ချုံယန်းပွဲတော်၏ ဒုတိယမြောက်နေ့တွင် ကလေးများက ဟန်ချင်းဖျင်အား သူတို့ကို တောင်တက်ဖို့ခေါ်သွားပေးရန် သွေးဆွယ်ကြလေသည်။တချို့ကလေးများကမူ ငြင်းဆန်ကြ၏။အကြောင်းမှာ သူတို့မိဘများက ကလေးတွေကျောင်းမတက်ရပါက အိမ်မှာအလုပ်လုပ်သင့်သည်လို့ ထင်ကြသောကြောင့်ဖြစ်သည်။ထို့ကြောင့် လင်းလန်နှင့် ဆရာ၏ဇနီးတို့က ဆရာက ကလေးများကို ဖျင်တင်းတောင်ကိုခေါ်သွားရာတွင် အဖော်လုပ်ပေးလိုက်ကြသည်။ဖျင်တင်းတောင်၏ အမြင့်ဆုံးနေရာက ပင်လယ်အထက်အမြင့်၁၀၀မီတာကျော်ကာ တောင်ထိပ်က ဖြတ်ခံထားရသလို တုံးတိဖြစ်နေသောကြောင့် ဖျင်တင်းတောင်ဟု ခေါ်ကြခြင်းဖြစ်သည်။တောင်ပေါ်တွင် ဘာအပင်မှမရှိဘဲ ကျောက်တုံးများ၊ မြစ်ဝှမ်းဒေသမှ လေတိုက်၍လွင့်လာသော အနည်အနှစ်များနှင့် ခြုံပုတ်နိမ့်များသာရှိကာ ကြည့်စရာဘာမှရှိမနေပေ။


သို့သော် ဖျော်ဖြေမှုများလစ်လပ်နေသော ကလေးများအတွက်မူ တောင်ပေါ်တက်ကာ သူငယ်ချငးများနှင့် ဂိမ်းဆော့၍ ချုံယန်းပွဲတော်ကို ကျင်းပရခြင်းသည် သူ့အလိုလိုကို စိတ်ဝင်စားစရာကောင်းနေပြီဖြစ်သည်။


ချုံယန်းပွဲတော်ပြီးသည့်နောက်တွင် ဆောင်းတွင်းမိုးက နှစ်ခါရွာလာခဲ့ပြီး အေးစိမ့်မှုများက အလွှာလိုက်ရိုက်ခတ်လာကာ ဆောင်းရာသီနှောင်းပိုင်း၏ လေထုက ပိုပို၍အားကောင်းလာခဲ့လေသည်။သစ်ရွက်များ ကြွေကာ သစ်ကိုင်းများက အထီးကျန်ဆန်နေပြီး သစ်ရွက်များ၏အကာအကွယ်မရှိသောအခါ တချက်ကြည့်လိုက်ရုံဖြင့် ထိုမြင်ကွင်းကို မြင်နိုင်ပြီး အဝေးမှ ရင်းနှီးသောမြင်ကွင်းကြည့်ရန် လွယ်ကူပေသည်။


ဒီနေ့နေ့လယ်ခင်းတွင် လင်းလန်အား တပ်မဟာမှ ကေဒါအစည်းအဝေးတက်ရန် ဖိတ်ခေါ်လာလေသည်။


သူမက တပ်မဟာ၏တရားဝင်ကေဒါမဟုတ်ဟု အမြဲတမ်းခံစားခဲ့ရသော်လည်း အမှန်တွင်မူ တပ်မဟာက သူမအား အဖွဲ့ဝင်အဖြစ် မှတ်ယူထားပေသည်။အခုချိန်တွင် သူမက ရှန်ရွေ့ရွာ၏ သတင်းပြန်ကြားရေးအတွက် တာဝန်ရှိကာ ရှန်ရွေ့ကွန်မြူနတီတောင်မှ ပါဝင်ပေသည်။သို့သော်လည်း သူမတွင် နာမည်ကြီးတစ်ယောက်ဖြစ်ရခြင်း၏ ကိုယ်ပိုင်သတိထားမှုများမရှိနေပေ။


တပ်မဟာ၏အ‌တွင်းရေးမှူး ၊တပ်မဟာခေါင်းဆောင်၊ရုံးစာရေးဝန်ထမ်းနှင့် ထုတ်လုပ်ရေးခေါင်းဆောင်များက အစည်းအဝေးကို တက်ရောက်ကြ၏။


ဟန်ရုံဖန်၏အစည်းအဝေးက ရိုးရှင်းသလို ကြမ်းလည်းကြမ်းတမ်း၏။အနည်းငယ်မှ နိမိတ်ပြတာမျိုးမရှိဘဲ ဗုံးသေးသေးလေးအား တိုက်ရိုက်ပင် ပစ်ချလာလေသည်။


‘‘ငါအကြာကြီးတွေးခဲ့ပြီးပြီ၊ အဲ့ဒါက ငါတို့လည်း တပ်မဟာရဲ့ဘေးပေါက်အလုပ်ကိုလုပ်ကြရလိမ့်မယ်’’


မပြင်ဆင်‌ထားသောသူများက ကြောင်အသွားကြကာ သူတို့ကဘယ်လိုဘေးပေါက် အလုပ်လုပ်လဲဆိုတာကို မေးလာကြ၏။


ဟန်ရုံဖန် :‘‘အရင်ဆုံးဆပ်ပြာလုပ်ကြမယ်’’


‘‘ဆပ်ပြာလား ’’


တချို့လူများက ပဟေဠိဖြစ်သွားကြလေသည်။


‘‘အတွင်းရေးမှူး ကျွန်တော်တို့က အဲ့ဒါကိုမသုံးကြဘူးလေ’’


‘‘ဒါက ငါတို့လူတွေစားဖို့အတွက် တို့ဖူးကြိတ်နေတာမျိုးမဟုတ်ဘူး ဒါက ဘေးပေါက်စီးပွားရေးတစ်ခုဘဲ။အဲ့ဒါကို ဓာတ်မြေဩဇာနဲ့ ပိုးသတ်ဆေးတွေနေရာမှာ အစားထိုးဖို့ လုပ်မှာ’’


ဟန်ရုံဖန်က နိုင်ငံရေးကို သတိပြုတတ်သော စိတ်ရှိကာ ထိုအရာကို သေချာပေါက်ပင် ပိုက်ဆံရှာဖို့မဟုတ်ဘဲ လယ်စိုက်ရန်အတွက်သာဖြစ်၏။အရာအားလုံးက ပိုကောင်းမွန်သော လယ်စိုက်ပျိုးရေးနှင့် ထုတ်လုပ်ရေးအတွက်သာဖြစ်သည်။


ဤနည်းလမ်းက အခြားသူများအတွက် ငြင်းဆိုရန် အကြောင်းရင်းရှိမနေပေ။အမှန်ပင် သူတို့က၎င်းအား ထည့်သွင်းစဉ်းစားသင့်ပေသည်။သူတို့၏တပ်မဟာက ဘာအပို‌စီးပွားရေးမှ မရှိဘဲ ဝင်ငွေကလည်း အနည်းငယ်သာဖြစ်သည်။သူတို့တစ်ခုခုလုပ်ချင်သောအခါတိုင်းတွင် စားစရာရောင်းသည့်အပေါ်တွင်သာ မှီခိုနေရ၏။


ခေါင်းဆောင်က ဘာအကြံမှမရှိသောကြောင့် သူကဒီအတိုင်းစကားအနည်းငယ်သာ ပြောလိုက်၏။

‘‘လင်းလန် တစ်ခုခုပြောဦးလေ’’


လင်းလန်: ဘာလို့ငါလဲ။ ငါကဒီအတိုင်း ဝါဒဖြန့်ချီရေးခေါင်းဆောင်ပါဘဲ။


သူမက ခနလောက် တွေးကြည့်လိုက်ကာ


‘‘ကျွန်မထောက်ခံပါတယ် ဒါပေမယ့် ကျွန်မတို့မှာ နည်းပညာရှင်တွေရှိလို့လား’’


ဟန်ရုံဖန်:‘‘ဒါက ပညာတတ်လူငယ်တွေကို ဆွဲဆောင်နိုင်တယ်၊ ရှန်ကျီချင်က နည်းနည်းသိတော့ သူ့ကို နည်းပညာအသင်းကို ဝင်ခိုင်းလိုက်မယ်’’


လင်းလန်ခေါင်းညိတ်လိုက်၏။ဒါက ဖြစ်နိုင်ခြေရှိပေသည်။


ဟန်ရုံဖန်ကထပ်ပြောလာ၏။

‘‘အားဝမ်ကလည်း မဆိုးဘူး၊တကယ်လို့ သူ့မှာအချိန်ရှိရင် သူ့ကိုလာပြီးကူပေးဖို့ မေးကြည့်လိုက်ပါ’’


လင်းလန် :‘‘အတွင်းရေးမှူး အားဝမ်ကငယ်နေတုန်းဘဲလေ’’


‘‘လုပ်နိုင်စွမ်းက အသက်ရွယ်‌ပေါ်မမူတည်ဘူး၊ တချို့လူတွေက အသက်တစ်ရာလောက်နေရင်တောင်မှ စားစရာဖြုန်းတီးတဲ့သူတွေဘဲ’’


လင်းလန်လည်း သဘောတူလိုက်၏။


ဟန်ရုံဖန်က အဖွဲ့ထဲဝင်ရန် လူများကိုထပ်ခန့်လိုက်ကာ တစ်ယောက်ချင်းဆီက တာဝန်ယူလိုက်ကြ၏။သူက အထွေထွေခေါင်းဆောင်ဖြစ်ကာ ထုတ်လုပ်ရေးအသင်းခေါင်းဆောင်အဖြစ် တာဝန်ယူနေသော ခေါင်းဆောင်က လက်ထောက်ခေါင်းဆောင်ဖြစ်လာပြီး နည်းပညာအသင်း၏ အစီအစဉ်များကို ဆက်လုပ်လိုက်သည်။


‘‘လင်းလန်ကို နည်းပညာအသင်းရဲ့ခေါင်းဆောင် လုပ်ခိုင်းလိုက်ပြီး လက်ထောက်ခေါင်းဆောင်က。。。’’


သူက လင်းလန်ကို ကြည့်လာ၏။

‘‘ရှန်ကျီချင်က လက်ထောက်ခေါင်းဆောင်ဆိုရင်ရော ’’


လင်းလန် :‘‘အတွင်းရေးမှူး ကျွန်မက နည်းပညာကိုနားမလည်ဘူးလေ ၊ကျွန်မက အသင်းခေါင်းဆောင်ဖြစ်ဖို့ မသင့်တော်ဘူးထင်တယ်’’


ခေါင်းဆောင် :‘‘ခေါင်းဆောင်က အလုပ်မှတ်မြင့်မြင့်ရတယ်နော်’’


လင်းလန် :‘‘ကောင်းပါပြီ ’’ ကျွန်မလုပ်လိုက်မယ်။


ဘယ်လိုဘဲဖြစ်ဖြစ် အဖွဲ့ခေါင်းဆောင်က လက်မှတ်ထိုးပြီးသောအခါ လက်ထောက်ခေါင်းဆောင်က အလုပ်လုပ်ရ၏။


Xxxxxxx

Part 648


တချို့သောထုတ်လုပ်ရေးခေါင်းဆောင်အများစုက လက်မခံလိုကြဘဲ ကိုယ်တိုင်၀င်ပါလိုကြသည်။ 


ဟန်ရုံဖန်က ထိုသူများကို ဆူပူလေ၏။ " မင်းတို့ကို ထုတ်လုပ်ရေးအဖွဲ့ကို ၀င်ခိုင်းထားတယ်မဟုတ်ဘူးလား နည်းပညာအဖွဲ့က မင်းတို့နဲ့ ဘာဆိုင်လို့လဲ မင်းတို့က စာတတ်ကြလို့လား ဒါမှမဟုတ် မင်းတို့က ဆပ်ပြာလုပ်နိုင်ကြလို့လား "


ဟန်ရုံလုက မကျေနပ် ။ " သူမလည်း မလုပ်နိုင်ဘူးလေ " 

ပညာတက်လူငယ်ချီကလည်း တော်တာပဲလေ ၊ ဒါကြောင့် သူ့ကိုပဲ အခွင့်အရေးပေးစေချင်သည်။ 


ဟန်ရုံဖန် : " လင်းလန်က စာတတ်တယ် စာတမ်းလည်း ရေးနိုင်တဲ့အပြင် ဟောပြောပွဲတွေလည်း လုပ်နိုင်တယ်လေ ။ ငါတို့ တပ်မဟာရဲ့ ဘေးထွက်စီးပွားရေးလုပ်မယ်ဆိုရင် အပြင်လူတွေနဲ့ အဆက်အဆံလုပ်ရမှာ မင်းလုပ်နိုင်မှာမို့လို့လား  "


ဟန်ရုံလုက မကျေနပ်သေးသော်လည်း ဟန်ရုံဖန်၏စကားများကြောင့် ပါးစပ်ပိတ်သွားလေသည်။


ဟန်ရုံဖန်က လင်းလန်ထံ လှည့်ကာပြောလေ၏။


 " အဖွဲ့ခေါင်းဆောင်တစ်ယောက်ရဲ့ တာ၀န်က ကြီးတယ် ဒါကြောင့် သေချာလုပ်မှဖြစ်မယ်နော် အချိန်ကျလို့ ထုတ်ထုပ်ရေးနဲ့ နည်းပညာကိုနားလည်သွားပြီဆိုရင် လူထုအမြင်အတွက်က မင်းအပေါ်မှာပဲ မူတည်မှာ "


တာ၀န်ကြီးလွန်းတယ်ဟု လင်းလန်တွေးမိသွားသော်လည်း ပြန်ဖြေပေးလိုက်သည်။


 " စိတ်ချပါ ကျွန်မ ကြိုစားပါ့မယ် "


ထိုသို့ဆုံးဖြတ်ပြီးသည့်အခါ ဟန်ရုံဖန်က ရှန်ယွီနှင့် ပညာတက်လူငယ်အချို့ကို အစည်းအဝေးခေါ်လိုက်ပြီး အဖွဲ့ခေါင်းဆောင်နှင့် လင်းလန်ကို ထားခဲ့သည်။ 


မကြာခင်မှာပဲ အခင်းထဲ၌ ဂျုံစိုက်ရန် ကူညိီပေးနေသော ရှန်ယွီက သူနှင့်အတူ ပညာတတ်လူငယ်အချို့နှင့် ၀ါဂွမ်းစိုက်ရန်ကူညီပေးနေခဲ့သော ပညာတတ်မိန်းကလေးအချို့ကိုပါခေါ်ပြီး ရောက်လာသည်။ ယခုဆို ၀ါခင်းထဲ၌ ခူးရန်အသင့်ဖြစ်နေသော ၀ါဂွမ်းများက ဟိုတစ်စု ဒီတစ်စုသာ ကျန်ရှိတော့သည်။ 


လင်းလန်ကိုတွေ့သောအခါ ရှန်ယွီက သူမဘေးတွင် လာ၀င်ထိုင်ပြီး အလာပသလာပ စကားပြောကာ နှုတ်ဆက်သည်။


ခဏအကြာတွင် ဖန်းရှောင်တို့တစ်စုကလည်း ရောက်လာကာ လင်းလန်၏ဘေးသို့ လာ၀င်ထိုင်ပြန်လေသည်။ အခန်းကအေးနေသော​​ကြောင့် လင်းလန် လက်နှစ်ဖက်ကို ပွတ်နေမိသည်။ " ခေါင်းဆောင်လင်း ကျွန်မတို့ ကျန်းကျားကျွမ်းကိုသွားပြီး အ၀တ်အစားတွေ ၀ယ်မလို့ လိုက်ဦးမလား "


" မသိသေးပါဘူး ဘာမှလုပ်စရာမရှိရင်တော့ အတူလိုက်ခဲ့မယ်လေ "


ယခင်တစ်ခေါက်က ရှန်ယွီသည် ယန်ယန်အား ရက်ကန်းရက်ရန် ကျန်းကျားကျွမ်းကို လိုက်ပို့ပေးဖူးပြီး ထိုမှနေ အ၀တ်များအရောင်ကျွတ်တာကို ဖြေရှင်းဖို့ အကြံရလာခဲ့လေသည်။ ထိုအချိန်တုန်းက အခင်းထဲ၌ အလုပ်များရှိနေသောကြောင့် ဖန်းရှောင်နှင့် အခြားလူငယ်များက လိုက်မသွားနိုင်ခဲ့ကြပေ ။


လင်းလန် ဖန်းရှောင်ကို ကြည့်လိုက်သည်။ အလုပ်လုပ်ရသည်က တကယ်ပင်ပန်းလှသည့်ပုံပင်။ ဘုရားသခင်၏ အချစ်တော်လေးပေမို့လားမသိ ဖန်းရှောင်က နေပူဒဏ် လေဒဏ်ကို ခံရသော်လည်း ယခင်လို လှပဆဲပင်ဖြစ်သည်။ သူမနှင့် အတူလာသော အခြားပညာတက်မိန်းကလေး ကောင်းလုမှာမူ အသားများညိုလာပြီး ချီမင်ကလည်း နည်းနည်းပို၍ ရုပ်သွင်ကြမ်းလာလေသည်။ ဖန်းရှောင်တစ်ယောက်သာလျှင် ဖြူဖြူဖွေးဖွေး နူးနူးညံ့ညံ့ရှိနေလေ၏။ 


ငယ်ရွယ်တာက ကောင်းလိုက်တာ ။


ချီမင်နှင့် ကောင်းလုက လင်းလန်နှင့် မျက်နှာချင်းဆိုင်တွင် ၀င်ထိုင်လိုက်ကာ လင်းလန်ကို ခေါင်ညိတ်ပြရုံသာ နှုတ်ဆက်ပြီး စိတ်အားထက်သန်ခြင်းမရှိကြ ။


လင်းမိသားစုအား ခေါ်လာသူမှာ ဖန်းရှောင်ဖြစ်သဖြင့်ထိုနှစ်ယောက်သည် လင်းလန်က ဖန်းရှောင်ကိုသာ မျက်နှာသာပေးမည်ဟုထင်နေတာဖြစ်သည်။ ဟောင်ဟုန်ကျန်းလည်း ရှိသေးသဖြင့် သူတို့အလှည့်ရောက်မလာနိုင်ဟု ထင်နေကြကာ လင်းလန်ကို မျက်နှာလုပ်ရန်အား စိတ်မ၀င်စားကြ ။ 


လင်းလန်ကလည်း စိတ်ထဲမထားပါ ၊ လူတိုင်း ကိုယ့်အတွေးနှင့်ကိုယ် ရှိကြတာပဲလေ ။


တပ်မဟာက ဘေးထွက်စီးပွားရေးစတော့မည်ဆိုသည်ကို ကြားသောအခါ ချီမင်နှင့် ကောင်းလုလည်း ပျော်သွားကြ၏။ သူတို့နှစ်ယောက်ကလည်း တပ်မဟာထဲ၌ သူတို့၏အခြေအနေပြောင်းလဲလာရန် ကြိုးစားချင်နေတာဖြစ်သည်။ ရှန်ယွီက ပဲပိစပ်ကောက်ရန်စက်ကို ဒီဇိုင်းဆွဲပေးခဲ့သောကြောင့် ဆုချီးမြှင့်ခံရလေသည်။ သို့ဖြစ်၍ ထိုနှစ်ယောက်က အားကျနေကာ သူတို့လည်း ထိုသို့တစ်ခုခု လုပ်ချင်နေလေသည်။ 


အမှန်မှာ ကောင်းလုက တပ်မဟာထံ ဆပ်ပြာလုပ်ကြရန် အကြံပေးချင်ခဲ့တာဖြစ်သည်။ ကျေးရွာမှလူများက ဆပ်ပြာမသုံးကြဘဲ အပင်ပြာများ သို့မဟုတ် ဆိုဒါမှုန့်များကိုသာ အသုံးပြုကြသည်ကိုတွေ့သဖြင့် ထိုသို့တွေးမိတာဖြစ်၏။ သို့သော်လည်း သူမ၏အကြံက မကောင်းဘူးဟုအပြောခံရမှာကို စိုးရိမ်သောကြောင့် ထုတ်မပြောခဲ့တာဖြစ်သည်။ ရွာထဲမှလူများက အတွင်းရေးမှူးက အပေါက်ဆိုးတယ်ဟု ပြောကြသည့်အပြင် ပိုက်ဆံရှာရန် အပိုအလုပ်လုပ်ဖို့ပြောသည်ကိုလည်း သဘောမကျဘူးဟု ပြောကြသဖြင့် ငြင်းပယ်ခံရကာ ပြဿနာတက်မည်ကို ကောင်းလုက တွေးပူနေသောကြောင့် ထိုအကြံအား တစ်ခါမှ ထုတ်မပြောခဲ့ပေ ။ 


ထို့ကြောင့် တပ်မဟာမှ ဘေးထွက်စီးပွားရေးလုပ်မည်ဟု ပြောသည်ကိုကြားသောအခါ ကောင်းလုက ၀မ်းသာသွားလေသည်။ " အတွင်းရေးမှူးရှင့် ကျွန်မက ဆပ်ပြာလုပ်တဲ့ နည်းအချို့ကိုသ်ိပါတယ် ဒါကြောင့် နည်းပညာအသင်းကို ကူညီပေးနိုင်လောက်ပါတယ် " 


သူမက ဆပ်ပြာစက်ရုံသို့သွားဖူးကာ သင်လည်းသင်ခဲ့ဖူးသည် ။ ထို့ကြောင့် သူမက အကြံဉာဏ်ရေးပေးနိုင်သည့်အတွက် နည်းပညာအသင်းကို ဦးဆောင်ခွင့်ရလောက်သည်။ ကောင်းလုက စိတ်လှုပ်ရှားနေကာ သူမ သင်လာခဲ့သည်က နောက်ဆုံးတော့ အသုံး၀င်လာပြီဟုတွေးနေလေ၏။ ထို့အတွက် ရှည်ရှည်ဝေးဝေး စဥ်းစားမနေတော့ဘဲ သူမကိုယ်သူမ အကြံပြုလိုက်တာဖြစ်သည်။ 


ဟန်ရုံဖန် : " စိတ်မပူပါနဲ့ အသင်းကနှစ်သင်းရှိမှာပါ  ထုတ်လုပ်ရေးအသင်းကို အဖွဲ့ခေါင်းဆောင်က ဦးဆောင်ပြီး နည်းပညာအသင်းကိုတော့ ခေါင်းဆောင်လင်းက ဦးဆောင်ပေးလိမ့်မယ် ပညာတက်လူငယ်လေးရှန်ကကြ ဒုအဖွဲ့ခေါင်းဆောင်ပေါ့ တစ်ခြား အရည်အချင်းရှိတဲ့သူတွေကလည်း ပါ၀င်ပြီး ကူညီပေးကြလို့ရပါတယ် "


ကောင်းလု၏ မျက်နှာမှာရဲသွားလေ၏။


 အလျင်စလိုဖြင့် သူမကိုယ်သူမ အကြုံပြုလိုက်မိကာ ယခုအခါ အငြင်းခံလိုက်ရ၍ဖြစ်သည်။ စိတ်လှုပ်ရှားနေဟန်မှာလည်း ပျောက်ကွယ်သွားကာ ရှက်လွန်းသဖြင့် လက်များတုန်ယင်နေလေသည်။ ထို့နောက် လင်းလန်ကို လှမ်းကြည့်ကာ တောကလာတဲ့ ကိုယ့်ဘာသာသင်ထားတဲ့ မိန်းမတစ်ယောက်က လူတွေကို လှည့်စားနေပြန်ပြီ ၊ သူမလိုလူက ဘယ်လိုနည်းပညာကို သိမှာမို့လို့လဲ ဟုတွေးနေလေသည်။ 


ကောင်းလုက မကျေမချမ်းဖြစ်နေလေ၏။ 


လင်းလန်က ရှန်ယွီအား သူဘယ်လောက်ထိ သိထားသလဲဆိုသည်ကို သေချာအောင်လုပ်ပြီးမှ စာအုပ်ဆိုင်ကိုသွား၍ နည်းပညာဆိုင်ရာ စာအုပ်များကို ၀ယ်လိုက်သည်။ ထို့နောက် စာရေးလိုက်ကာ နေ့စဥ် ဓာတုဗေဒစက်ရုံကို စာပို့ပြီး ထုတ်လုပ်ရေးအတွက် အကြံဉာဏ်တောင်းလိုက်သည်။ 


Xxxxxxx

Prev Next