Welcome To MM Storyteller
LOGIN
Part 677
ဆပ်ပြာစက်ရုံဆိုသည်က တကယ်တမ်းတွင် ရှန်ရွေ့ရွာထဲရှိ အိမ်ဟောင်းတစ်လုံးသာ ဖြစ်ပေသည်။ စပါးသိိုလှောင်ရန် ဆောက်ထားခြင်း ဖြစ်သော်လည်း လင်းလန်က ဆပ်ပြာလုပ်သည့်အခါ အနံ့ဆိုးထွက်သဖြင့် နေရာရွှေ့ရန် ပြောသည့်အတွက် ဟန်ရုံဖန်က အဖွဲ့ခေါင်းဆောင်နှင့် တိုင်ပင်ပြီး ဤနေရာသို့ ပြောင်းလာခဲ့ခြင်း ဖြစ်သည်။
လင်းလန်တို့ ထွက်ကြည့်လိုက်သည့်အခါ ကွန်မြူနတီအရာရှိ အနည်းငယ်ကို တွေ့လိုက်ရလေသည်။ ထိုထဲမှ တစ်ယောက်သည် အဖြူရောင် ရှပ်အင်္ကျီလက်တိုကို ၀တ်ထားပြီး ဘယ်ဘက်ရင်အုပ်နေရာရှိ အိတ်ကပ်ထဲ၌ ဘောပင်တစ်ချောင်း ချိတ်ထားသည်။ သားရေဖိနပ်က တောက်ပြောင်နေသော်လည်း ရွှံ့များပေနေလေ၏။
ထိုလူက လင်းလန်နှင့် ရှန်ယွီထွက်လာသည်ကို မြင်သောအခါ ခေါင်းမော့၍ ကောင်းကင်ကို မော့ကြည့်ချင်ယောင်ဆောင်လိုက်လေသည်။
ကျန်လူတစ်ယောက်က မေးသည် ။
" တာ၀န်ကျတဲ့သူက ဘယ်သူလဲ ခင်ဗျားတို့ တပ်မဟာက ကေဒါတွေရော ဘယ်မှာလဲ "
နောက်တစ်ယောက်ကလည်း မေးပြန်၏။
" ဒီဆပ်ပြာစက်ရုံက တစ်ခုခုမှားနေတယ်လို့ သတင်းရထားတယ် အရင်းရှင်စနစ်ကို ကျင့်သုံးနေကြတုန်းပဲလား "
ရှန်ယွီက တိုးတိုးလေး ကပ်ပြောသည်။ " သူတို့က ဒီကို ပထမဆုံးရောက်လာတာ ကျွန်တော် သူတို့ကို မသိဘူး "
လင်းလန်လည်း ထိုလူများက သိချင်ရုံမေးနေကြသော ကေဒါများဟု မထင်ပါ ။
" ရှင်တို့က ဘယ်သူများလဲ "
" ငါတို့လား ငါတို့က ကွန်မြူနတီက စျေးကွက်ရှာဖွေရေးဌာနကပဲ ဌာနမှုးဖန်းက တပ်မဟာတစ်ခုချင်းစီကိုသွားပြီး စံနှုန်းနဲ့ ညီမညီလိုက်စစ်နေတာ ခင်ဗျားတို့ရဲ့ စက်ရုံကလည်း မှားနေတာရှိတယ် "
ရှန်ယွီက ရှေ့တိုးလိုက်ကာ ပြန်ပြောလိုက်သည်။
" ကျွန်တော်တို့ စက်ရုံက တော်လှန်ရေးကော်မတီရဲ့ ခွင့်ပြုချက်ရထားပြီးပါပြီ ပြဿနာလည်းမရှိသလို စာရွက်စာတမ်းတွေလည်း ရှိပါသေးတယ် "
" မင်းဆိုလိုတာက မှတ်တမ်းတွေကိုလား "
ကျန့်လျန်ဆိုသူက မျက်ခုံးပင့်ကာ လင်းလန်နှင့် ရှန်ယွီအား မေးလေသည်။
ကျန့်လျန်ဆိုသူသည် အရပ်မရှည်ဘဲ ထူထူတ်ိုတို မျက်ခုံးမွှေးများနှင့် မှေးသော မျက်၀န်းတစ်စုံရှိကာ နှာခေါင်းကလည်း ပြားနေပြီး ထူထဲသော နှုတခမ်းတစ်စုံကို ပိုင်ဆိုင်ထားလေသည်။ သွားများကလည်း ကျိုးတို့ကျဲတဲဖြစ်နေပြီး အလယ်၌သွားတစ်ချောင်းပင် ထပ်စိုက်လို့ရလောက်သည်အထိ ခြားနေလေ၏။
လင်းလန် ထိုမျှထိ ရုပ်ဆိုးသောသူအား နှစ်ဘ၀လုံးတွင် တစ်ခါမှ မကြုံခဲ့ဖူးချေ ။ ထိုလူက ရှေ့သို့ထပ်တိုးလာသည့်အခါ လင်းလန် မကြည့်နိုင်တော့သဖြင့် ဘေးသို့လှည့်ကာ မျက်နှာလွှဲလိုက်မိသည်။
" ဒါက ဘာအပြုအမူလဲ ရှန်ရွေ့ရွာတပ်မဟာက ကွန်မြူနတီက အရာရှိတွေကို ဒီလိုပဲ ဆက်ဆံရလား တော်လှန်ရေးကော်မတီရဲ့ လက်အောက်ကလူတွေဖြစ်ပြီး ဒီလိုလုပ်ရဲကြတာလား "
ဖန်းပိရှန်းက ကွန်မြူနတီ၏ နာမည်ကိုသုံး၍ အာဏာပြတော့သည်။
ကွန်မြူနတီကေဒါ တစ်ယောက်ဖြစ်သည့် လင်းလန်အား ကွန်မြူနတီမှ လူတော်တော်များများက သိကြလေသည်။ အခြားတပ်မဟာမှသူများကလည်း သူမကို သိကြသော်ငြား ဤလူက သူမကိုမသိဘဲ အာဏာပြနေလေသည်။
ဒီရုပ်ဆိုးကောင်က ဘယ်ကရောက်လာတာလဲ ။ တကယ် ကြည့်ရဆိုးလွန်းတယ် ။ သေသင့်တဲ့ လူပဲ ။ ငါ စိတ်မကြည်နေချိန်မှာမှ လာပြီးမောက်မာပြရဲနေတာပဲ ။
လင်းလန် " ယဥ်ကျေးစွာ "
သတိပေးလိုက်သည်။ " စျေးကွက်ရှာဖွေရေးဌာနကို အသစ်ရောက်လာတာလား ဒါဆိုရင် ရှင် ညွှန်မှုးဟန်နဲ့ လက်ထောက်ခေါင်းဆောင်ဟန်တို့ကို သိသင့်တာပေါ့ ရှင်တို့ကွန်မြူနတီက ပြည်သူ့လုံခြုံရေးဗျူရိုက လူတွေလေ "
ဟန်ချင်စုန့်ကို မသိလျှင်တောင် ဟန်ချင်းယွင်ကို သိသင့်ပေသည်။ ပြောရပါက ဟန်ချင်းယွင်သည် စျေးကွက်နှင့် သက်ဆိုင်သည်များကို တာ၀န်ယူထားသောကြောင့် စျေးကွက်ရှာဖွေရေးဌာနနှင့် မကြာခဏ အဆက်အဆံရှိသူဖြစ်ပေ၏။
ဖန်းပ်ိရှန်းက နှာခေါင်းရှုံ့၍ လင်းလန်ထံ မောက်မောက်မာမာ ပြန်ပြောသည်။
" ကျုပ်ပြောမယ် အမျိုးသမီး မင်းက ကွန်မြူနတိီက ကေဒါကို လာဘ်ထိုးချင်နေတာပဲ တော်လှန်ရေးကော်မတီရဲ့ ကေဒါတွေကို ဖျက်စီးချင်နေပြီး ဖောက်ပြန်ရေး၀ါဒရှိနေတဲ့ သူပဲ "
ရှန်ယွီ ထိုကဲ့သို့သူများကို တစ်ခါမှ မတွေ့ခဲ့ဖူးပါ ။ ယခင်လူများကဲ့သို့ စစ်ဆေးရန် ရောက်လာကြသည်မဟုတ်၍ သူလည်း ယဥ်ကျေးပြမနေချင်တော့ချေ ။
" ခင်ဗျားတို့လို ရိုင်စိုင်းတဲ့သူတွေက ကေဒါအဖြစ် ဟန်ဆောင်နေကြတာပဲနေမှာ "
လင်းလန် သူမဘေးရှိ အဖွဲ့၀င်တစ်ယောက်ကို ပြောလိုက်သည်။
" အနီးအနားကိုသွားပြီး ပြည်သူ့စစ်သားတွေကို သွားခေါ်ခဲ့လိုက် ဒီအရိုင်းအစိုင်းတွေကို ဖမ်းပြီး ရဲစခန်းပို့ပစ်ရမယ် "
ထိုလူတစ်စုသည် စိုးရိမ်သွားကြလေ၏။
" မင်းတို့ ဘာလုပ်ကြတာလဲ ဒါက တော်လှန်ရေး ကော်မတီက ကေဒါတွေကို ဗြောင်ကြီး ဆန့်ကျင်လိုက်တာနော် မင်းတို့က ပုန်ကန်ချင်နေကြတာလား "
ဖန်းပိရှန်းက သူ့ကိုယ်သူ ချောလှချည် ထင်နေလားမသိ မဲ့ပြုံးပြုံးလိုက်လေသည်။
" ငါပြောမယ် ခွေးမသားလေး မင်းက ဘာလို့အဲ့လောက် ရန်လိုနေတာလဲ "
ပြောပြီးနောက်တွင် ထိုလူက လက်ကိုဆန့်ထုတ်လိုက်ပြီး လင်းလန်၏ရင်ဘတ်ကို ကိုင်ရန်လုပ်လေသည်။ လင်းလန်က ချောလည်းချော ပြည့်ပြည့်တင်းတင်းလည်းရှိပြီး ခါးသိမ်သိမ်လေးနှင့် သွယ်လျသောခြေထောက်လေးများ ရှိသဖြင့် ဖန်းပိရှန်းက သူ ကလူနေကြ မိန်းမများလိုပဲဟု ထင်နေတာဖြစ်သည်။
ရှန်ယွီက မျက်နှာပျက်သွားပြီး လင်းလန်ကိုဆွဲကာ နောက်သို့ပို့လိုက်ချင်သော်လည်း ဘယ်သူမှ မထင်ထားချိန်တွင် လင်းလန်က ရှန်ယွီလက်ထံမှ မီးညှပ်ကိုဆွဲယူလိုက်ပြီး ရုပ်ဆိုးလှသော ထိုလူကို ရိုက်လိုက်လေသည်။
" အရုပ်ဆိုးတဲ့ကောင် နင့်ပါးစပ်ကို ပိတ်ထားစမ်း "
လင်းလန်က ယခင်တည်းက စိတ်ကြီးသူဖြစ်ကာ ယခုတွင် သူမအား မထိတထိလုပ်ရဲသဖြင့် ဖန်းပိရှန်း၏ လက်ကောက်၀တ်ကို ရိုက်ထည့်လိုက်လေသည်။
" ဒီမှာ လူသတ်နေပါတယ်ဗျို့ မြန်မြန် သူမကို မြန်မြန်ဖမ်းကြစမ်း "
ဖန်းပိရှန်းက ထိုလှည့်ကွက်အား သုံးနေကြဖြစ်သည်။ နောက်ခံမရှိ အာဏာမရှိသူဆိုပါက သူ့ကိုကြောက်၍ အရှုံးပေးလိုက်ကြရတာပဲ ဖြစ်လေသည်။
သူတို့တစ်စုသည် တပ်မဟာကိုယ်စီ၌ အထက်စီးမှနေခဲ့သူများဖြစ်ပြီး မကြာသေးခင်ကမှ ကွန်မြူနတီသို့သွား၍ ရာထူးတစ်ခုတောင်းထားကြသူများ ဖြစ်ကြလေသည်။ လွန်ခဲ့သော လများအတွင်း အခြားတပ်မဟာများသို့သွားကာ အာဏာပြ၍ အခွင့်အရေးယူနေခဲ့ကြတာဖြစ်ပြီး သူတို့နှင့် ပြိုင်ပြောနိုင်သူ မရှိခဲ့ချေ ။
လင်းလန် ထိုလူများက အပျင်းထူကာ မသမာကြသော လူများဖြစ်မည်ကို သိလိုက်သည်။
ရှန်ရွေ့ရာ၌လည်း ထိုကဲ့သို့သောလူများ ရှိခဲ့ဖူးလေသည်။ ထိုလူများသည် ဟန်ရုံဖန်ကို ကြောက်သွားကြပြီး ဟန်ချင်စုန့်၏ လက်အောက်တွင် လောင်းကစားစွဲနေခြင်းကို စွန့်လွှတ်ကာ ယခုဆို ကောင်းကောင်းမွန်မွန် လယ်စိုက်နေကြပြီဖြစ်သည်။
သူမတို့ ရွာတွင်တောင် မရှိသည်ကို အခြားရွာမှလူများက လာပြီးရိုင်းစိုင်းပြနေတာတဲ့လား ။ အဲ့လိုဆိုမှတော့ ငါ့အဆိုးမဆိုကြနဲ့ ။
ခွေးတွေကို ခေါင်းကနေ ရိုက်ပစ်မယ်။
Xxxxxxx
Part 678
စန်း၀မ် အိမ်မှထွက်သွားသောကြောင့် လင်းလန် ၀မ်းနည်းနေသည်ကို ဒီရုပ်ဆိုးကောင်တွေက ရောက်လာပြီး လည်စင်းပေးနေမှတော့ သူမလည်း အားနာမနေတော့ဘူး ။
ရှန်ယွီအား ထိခိုက်သွားမည်စိုး၍ ဘေးဖယ်နေရန် လင်းလန် ပြောလိုက်သည်။
ရှန်ယွီ : " ....... " လင်းလန်အား သေချာစောင့်ကြည့်နေပြီး သူမအား ထိခိုက်အောင် လုပ်မည့်သူရှိလာပါက သူက တားထားပေးမည် ဖြစ်သည်။
လင်းလန် ခွေးကောင်အား ညှပ်တစ်ဖက်ဖြင့် လက်ကိုလိမ်ထားပြီး ကျန်တစ်ဖက်ဖြင့် ပုခုံးကို အားဖြင့်ရိုက်လိုက်သောကြောင့် နာလွန်းလို့ အော်နေလေ၏။ ကျန်လူများက ငြိမ်ခံမနေဘဲ လက်နက်များရှာမည်လုပ်နေသည်ကို ရှန်ယွီနှင့် ကျန်အဖွဲ့၀င်များက တားထားကြလေသည်။
မူလတွင် အဖွဲ့၀င်များက အတည်မထင်ခဲ့ကြသော်လည်း လင်းလန်ကို ဘယ်သူက အနိုင်ကျင့်ခိုင်းလို့လဲ။ ဒီနေ့ဒီအချိန်မျိုးမှာ လင်းလန်ကို အနိုင်ကျင့်ရဲကြတယ်ပေါ့လေ ။ ဒီလိုဆိုရင်တော့ သက်သောင့်သက်သာနေဖို့ စိတ်ကိုမကူးကြပေနဲ့တော့ ။
ဘေးတွင်ရပ်ကာ ပွဲကြည့်နေလိုက်ကြပြီး လင်းလန်ကို အားပေးနေကြလေသည်။
" ဘောပင်ချိတ်ထားတဲ့ တစ်ယောက်ကိုပါ ရိုက် "
" ကျောက်တုံးကောက်ဖို့ လုပ်နေပြီ ရိုက်ပစ် ရိုက်ပစ် "
ထို့ကြောင့် မကောက်နိုင်သေးခင်မှာပဲ လင်းလန်ထံမှ ပြင်းပြင်းထန်ထန် အရိုက်ခံလိုက်ရလေသည်။
ဖန်းပိရှန်းက ထခုန်ကာ အော်နေလေသည်။
" မင်းက ငါဘယ်သူလဲဆိုတာတောင် မမေးတော့ဘူးလား ငါပြောပြမယ် မင်းတို့တပ်မဟာက ငါတို့စျေးကွက်ရှာဖွေရေးဌာနရဲ့ လက်အောက်ကနော် ငါ...ငါပြန်သွားပြီး တိုင်မှာ မင်းတို့စက်ရုံကို ပိတ်ခိုင်းပစ်မှာ မင်း မင်း ခွေးမ စောင့်ကြည့်နေလိုက်စမ်း "
ဖန်းပိရှန်းသည် ယခင်ကဆို အထက်စီးဆန်ကာ တပ်မဟာတိုင်းသည် သူ့အား မျက်နှာလုပ်နေခဲ့ရတာဖြစ်လေသည်။
ရှန်ရွေ့ရွာကြမှ ဒီလိုဖြစ်မည်ဟု ဘယ်သူမှ ထင်မထားခဲ့ချေ ။ သူ့ကို မျက်နှာမလုပ်တဲ့အပြင် ရိုက်ပါရိုက်နေကြတယ်တဲ့ ။
ငါနဲ့ တကယ် တိုက်ခိုက်ချင်နေတာလား ။
သူ ဟန်ချင်စုန့်ကို သိသဖြင့် တမင်ပြဿနာရှာနေတာ ဖြစ်ပေသည်။ ဟန်ချင်စုန့်သာ ဆပ်ပြာစက်ရုံကို ဦးစီးနေတာဆိုပါက သူ့ရဲ့တာ၀န်ကို ပျက်ကွက်တာဖြစ်ပြီး ကိုယ်ပိုင်တပ်မဟာအတွက် အာဏာကိုအလွဲသုံးစားလုပ်တာ ဖြစ်သွားပေလိမ့်မည် ။ ထိုသို့သာဆိုလျှင် ဟန်ချင်စုန့်က အရေးယူခံရမည် ဖြစ်သည်။
လောလောဆယ်တော့ နေနှင့်ကြဦးပေါ့ ။
ဖန်းပိရှန်းသည် အော်နေရင်းဖြင့် တဖြည်းဖြည်းနောက်ဆုတ်သွားကာ အကာအကွယ် ယူပြီးမှ စာရွက်စာတမ်းများကို ထုတ်ပြရန်လုပ်လေသည်။
သို့သော်လည်း လှည့်လိုက်သည်နှင့် တစ်ယောက်က ပေါက်ပြားဖြင့် ခြေထောက်ကို ရိုက်ချလိုက်သောကြောင့် မှောက်လျက်လဲကျသွားကာ ဖုန်များ ပါးစပ်ထဲသို့ ၀င်လာတော့လေသည်။
ထို့ကြောင့် " ဖူး ဖူး မကောင်းတဲ့ဟာတွေ "
ပြန်မထနိုင်ခင်တွင် တစ်ယောက်သည် ဖန်းပိရှန်း၏ လည်ဂုတ်ပေါ်သို့ ခြေထောက်ဖြင့်တက်နင်းကာ ကန်လိုက်ပြန်သောကြောင့် ဟနေသော သွားကြားထဲသို့ ခဲလုံး၀င်သွားပြီး သွေးများစီးကျလာတော့သည်။
လင်းလန်နှင့် ရှန်ယွီက ထိုတစ်ယောက်ထံသို့ ရောက်လာကြလေသည်။ " သားကြီး ရောက်လာတာကောင်းတယ် ဒီလူတွေက အရာရှိယောင်ဆောင်ပြီး ရိုင်းစိုင်းနေကြတာ သူတို့ကို ရဲစခန်းခေါ်သွားပြီး အမှုဖွင့်လိုက် "
ဖန်းပိရှန်း ရိုက်နှက်ခံနေရသည်ကိုကြည့်ပြီး အခြားသူများကလည်း ၀င်ပါလာကြတော့သည်။
တစ်ယောက်က လင်းလန်ကို ဆွဲကာ တစ်ယောက်သည် တ၀မ်ကို ကန်ပြီး ကျန်တစ်ယောက်သည် မြေပေါ်ရှိ ဖန်းပိရှန်းကို ထူပေးဖို့ လုပ်လေသည်။
တ၀မ် ပေါက်ပြားကို မြေပေါ်သို့ ပစ်ချလိုက်ပြီး လင်းလန်ကို ဆွဲမည်လုပ်နေသူအား ကန်ထုတ်ပစ်လိုက်သည်။ ထို့ကြောင့် တ၀မ်ကို ကန်မည်လုပ်နေသူလည်း တ၀မ်ကို မကန်နိုင်လိုက်ပေ ။ တ၀မ် ပေါက်ပြားအား သစ်သားတုတ်နေရာမှကိုင်၍ ထိုလူအား မျက်နှာဖြတ်ရိုက်လိုက်သည်။ ထိုလူက မမျှော်လင့်ထားသဖြင့် မရှောင်နိုင်လိုက်သောကြောင့် နှာခေါင်းသွေးများ ထွက်လာတော့သည်။
တစ်ချိန်တည်းမှာပဲ တ၀မ်သည် မြေပေါ်ရှိ ဖန်းပိရှန်း၏ ကျောက်ိုပါ ရိုက်ချလိုက်သဖြင့် ဖန်းပိရှန်းက အော်နေလေသည်။ တ၀မ် ဖန်းပိရှန်းကို ဖိထားလိုက်ပြီး ထိုလူအား ထူဖို့လုပ်နေသူ၏ လက်ကောက်၀တ်ကို ဆွဲ၍ကိုင်ပေါက်ပစ်လိုက်သည်။
အရာအားလုံးသည် တစ်ခဏလေးအတွင်း ဖြစ်သွားပြီး သေသပ်ကာ လက်ရာလည်း မြောက်လှပေသည်။
ရှန်ယွီ : တ၀မ်က ဒီလောက်အားသန်မှတော့ သူ ဘယ်လိုများ လက်မှောင်းလှဲတဲ့နေရာမှာ နိုင်တော့မှာလဲ ။
ဒီလိုပုံစံမျိုး၌ အခြားလူသာဖြစ်ခဲ့ပါက လက်ကောက်၀တ်ကိုဆွဲပြီး ကိုင်ပေါက်ဖို့မပြောလေနှင့် လှုပ်၍ပင် ရမည်မဟုတ်သော်လည်း တ၀မ်ကမူ တစ်ဖက်လူအား တစ်ချက်တည်းဖြင့် အီစိမ့်နေသည်အထိ ကိုင်ပေါက်ပစ်နိုင်လေသည်။
လင်းလန်က လက်ခုပ်တီး၍ အားပေးနေလေသည်။
" ရုပ်ဆိုးတဲ့ကောင်တွေအကုန်လုံး ခံလိုက်ကြစမ်း "
တ၀မ်သည် ရပ်နေပြီး ထလာဖို့ကြိုးစားသူများကို ကန်ပစ်လေသည်။ ဘယ်သူပဲ ထလာထလာ ကန်ပစ်နေလေ၏။
ထို့ကြောင့် အဆုံးတွင် ယင်းလူများသည်လည်း သူတို့အား မြေပေါ်၌ပဲ နေစေချင်တာဖြစ်ကြောင်းကို သဘောပေါက်သွားပြီး ထမလာကြတော့ချေ ။
မကြာလိုက်ပါ ၊ လျိုကွေ့ဖာသည် ကွန်မြူနတီ အဖွဲ့၀င်အချို့နှင့်အတူ ရောက်လာလေ၏။
" ဒီလူရမ်းကားတွေက ဘယ်ကရောက်လာတာလဲ "
လင်းလန် : " ညွှန်မှုးရှင့် သူတို့ကို ကြိုးချည်ပြီး ပြည်သူ့လုံခြုံရေးဗျူရိုကို ပို့လိုက်ပါ သူတို့က ကွန်မြူနတီ အရာရှိအဖြစ် ဟန်ဆောင်ပြီး ကျွန်မတို့ကို ခြိမ်းခြောက်နေတယ် "
လုံခြုံရေးအရာရှိများသည် လက်ထိပ်များကဲ့သို့ပင် ကြိုးများကို ကိုယ်နှင့်မကွာ ဆောင်ထားတက်ကြလေသည်။
တ၀မ် ကြိုးကိုယူ၍ ဖန်းပိရှန်းအား လက်နောက်ပြန်ကြိုးချည်လိုက်ပြီး တစ်ယောက်ပြီးတစ်ယောက်ကိုပါ တွဲချည်လိုက်သဖြင့် အတွဲလိုက်ချည်ပြီးသား ဖြစ်သွားလေသည်။
တ၀မ် ချည်ထားသည့် ကြိုးထုံးမှာ ဟန်ချင်စုန့် သင်ပေးထားသည့်အတိုင်းဖြစ်သဖြင့် အတော်လေးတင်းပြီး ဖြည်ရန်လည်း ခက်လေသည်။
လင်းလန် ရုပ်ဆိုးကောင်ကို နောက်တစ်ချက် ကန်ပစ်လိုက်သည်။ " ရုပ်လည်းဆိုး စိတ်ထားကလည်းယုတ်နဲ့ လူတွေကို လာခြောက်လှန့်နေသေးတယ် ဘာလို့ အဲ့လောက် ဆိုး၀ါးနေရတာလဲ "
ရှန်ယွီက မီးညှပ်ကို မသိမသာ ပြန်ကောက်လိုက်သည်။
လင်းလန်က လျိုကွေ့ဖာအား ပြောလေသည်။
" ညွှန်မှုး သူတို့ကို ပြည်သူ့လုံခြုံရေးဗျူရိုကို ခေါ်သွားလိုက်ပါ "
ထိုလူက စျေးကွက်ရှာဖွေရေးဌာနက ဌာနမှုးပဲ ဖြစ်နေပါစေ မှတ်လောက်အောင်တော့ ပညာပြပစ်မှ ဖြစ်ပေမည် ။ ဒီလိုလူမျိုးတွေကို တစ်ခါတည်း မဖြေရှင်းဘဲ ထားပါက ဆပ်ပြာစက်ရုံအား နောင်တွင်လည်း ပြဿနာရှာရန် လာနေပေလိမ့်မည် ။
ဆပ်ပြာစက်ရုံဖွင့်ပြီးကတည်းက မနာလိုဖြစ်နေကြသူများစွာ ရှိလေသည်။ အချို့လူများက ရှယ်ယာ၀င်ချင်ကြပြီး တစ်ချို့သည် နည်းပညာများကိုလိုချင်ကြလေသည်။ တစ်ချို့ကလည်း ခွဲဝေယူချင်ကြသည်ကို ဟန်ရုံဖန်က အားလုံးကို ငြင်းလွှတ်ခဲ့တာဖြစ်သည်။
Xxxxxxx
Welcome To MM Storyteller
LOGIN
Welcome To MM Storyteller
REGISTER