MM Story Teller

အပိုင်း ၇၁၅-၇၁၆

Viewers 37k

Part 715

မနက်စာစားပြီးသောအခါ သူတို့မိသားစုက ထုပ်ပိုးလိုက်ပြီး တစ်ချက်ပြန်စစ်ကြည့်ကာ အိမ်ပြန်ရန်လုပ်လိုက်ကြသည်။

လမ်းတွင် သူတို့က ထွန်စက်ကိုမြင်လိုက်သောအခါ ခနလောက်လိုက်စီးကြ၏။ထို့နောက်တွင်လည်း မြင်းလှည်းနှင့် နွားလှည်းများကို တွေ့လိုက်ရကာ လိုက်စီးလာခဲ့ကြလေသည်။မိသားစုတစ်ခုလုံးက ရယ်မောလိုက်စကားပြောလိုက်ဖြင့် မပင်ပန်းသွားကြပေ။

သူတို့ရွာဝင်ပေါက်ကို မရောက်သေးခင်မှာဘဲ ဝမ်ဝမ်နှင့် ရှောင်ပိုင်တို့က သူတို့ဆီပြေးလာကာ တဝုတ်ဝုတ်ဖြင့် ဟောင်လာကြလေသည်။သူတို့ရှေ့သို့ရောက်သောအခါ အနံ့ခံကာ လျက်လာကြပြီးအလွန်ပင် ရင်းနှီးပြလာကြ‌၏။လင်းလန်နှင့် တခြားသူများက ဒီရက်အနည်းငယ်တွင် အိမ်၌မရှိနိုင်ပေ။ထို့ကြောင့် ခွေးများအား သူတို့အစာနှင့်အတူ ပထမချွေးမဟန်အိမ်သို့ ပို့ထားခဲ့လိုက်ခြင်းဖြစ်သည်။

အိမ်ပြန်ရောက်သောအခါ သန့်ရှင်းရေးအရင်လုပ်လိုက်ပြီး လင်းလန်က သူတို့ယူလာခဲ့သောအရာများကို ကလေးများအား လိုက်ပို့ခိုင်းလိုက်သည်။

ကလေးများပြန်ရောက်လာသောအခါ လင်းလန်ကသူတို့အား အိမ်မှာနေခိုင်းမည့်အစား ကျောင်းသွားခိုင်းလိုက်သည်။ဆောင်းဦးရိတ်သိမ်းမှုက အဆုံးကိုရောက်နေပြီဖြစ်ကာ လယ်ကွင်းများတွင် ကန်စွန်းဥချိုအခြောက်များပြည့်နေကာ မီးစာနှင့်ထင်းအတွက်လည်း ဝါဂွမ်းများကို ထုတ်ယူနိုင်ပြီဖြစ်၏။သို့သော် ကလေးများ၏ကျောင်းက စတင်ဖွင့်နေပြီဖြစ်သည်။

မိုင်စွေ့က တွေဝေသွားလေသည်။

‘‘မားမား သမီး ကိစ္စတစ်ခုကို မားမားနဲ့ဆွေးနွေးချင်တယ်’’

သူမ၏လေးနက်နေသောအကြည့်ကိုမြင်သောအခါ လင်းလန်ကသိချင်စွာမေးလိုက်၏။

‘‘တကယ်လို့သမီးမှာ ပြောစရာတစ်ခုခုရှိနေရင် ပြောလိုက်လေ ဘာလို့ အရမ်းလေးနက်နေရတာလဲ’’

မိုင်စွေ့ :‘‘မားမား သမီးနဲ့ ဒုတိယအကိုက အကိုကြီးနဲ့အတူ အလယ်တန်းကျောင်း‌မှာ သွားတက်ချင်တယ်’’

‘‘ဟမ် ’’ လင်းလန်က သူတို့အား အံ့အားသင့်စွာကြည့်လာ၏။

‘‘သမီးတို့နှစ်ယောက်က အတန်းတစ်ခုကျော်ခဲ့ပြီးပြီမဟုတ်ဘူးလား အခုချိန်မှာအလယ်တန်းစာတွေကို လိုက်မှီနေပြီလား’’

အတိတ်တွင် အခြေခံတန်းကခြောက်နှစ်ကြာမြင့်၏။သို့သော် လူအများအပြားက နှစ်တန်းနှင့် သုံးတန်းလောက်ထိသာ တက်နိုင်ကြပြီး အများစုမဟုတ်သော လူအနည်းငယ်ကသာ အထက်တန်းအောင်ကြ၏။ အ ကြောင်းမှာ လေးတန်းမှ ငါးတန်းကိုတက်ချင်လျှင် စာမေးပွဲဖြေရန် လိုအပ်သောကြောင့်ဖြစ်သည်။ ခြောက်တန်းပြီး‌သွားလျှင် မူလတန်းအောင်အဖြစ် မှတ်ယူနိုင်၏။ ထို့နောက်တွင် အလယ်တန်းတက်ရန် စာမေးပွဲဖြေရမှာဖြစ်သည်။အလယ်တန်းဆင့်ကျောင်းတွင် လူသုံးဆယ်မကရှိ၏။တစ်ခါတစ်ရံတွင် ကျောင်းသားများ အလယ်တန်းဆင့်ကို မဖြတ်ကျော်နိုင်ကြပေ။ ထိုသို့မဟုတ်လျှင်လည်း သူတို့က ပိုက်ဆံမတတ်နိုင်မှုကြောင့် ဒီအတိုင်း ကျောင်းထွက်လိုက်ရတာမျိုးရှိ၏။အလယ်တန်းအဆင့်က ပုံမှန်အားဖြင့် သုံးနှစ်ကြာမြင့်ကာ အထက်တန်းဝင်ခွင့်စာမေးပွဲကလည်း အတော်လေးခက်ခဲပေသည်။အတန်းတစ်ခုတွင် လူအယောက်နှစ်ဆယ်၊သုံးဆယ်လောက်ရှိလျှင် နှစ်ယောက်၊သုံးယောက်လောက်သာ စာမေးပွဲအောင်ကြ၏။

အခုကာလများတွင် ဝင်ခွင့်နှုန်းများက နိမ့်သော်ငြား အဆင့်ကမူ မြင့်ပေသည်။

ယဉ်ကျေးမှုတော်လှန်ရေးအစတွင် ဌက္ကဠမော် က ပညာရေးဘက်တွင် တော်လှန်မှု၊ကျောင်းပညာရေးစနစ်များကို ပြန်လည်ပုံစံဖော်ခြင်းနှင့် ရိုးရှင်းသော ပညာရေးစနစ်ကို လိုလားခဲ့ပေသည်။ ထို့ကြောင့် အလယ်တန်းဆင့်ကျောင်းများအတွက် စာမေးပွဲမရှိတော့ပေ။ သင့်အနေဖြင့် ကျူရှင်ခများပေးရန် တတ်နိုင်ပါက အလယ်တန်းနှင့် အထက်တန်းကိုတက်နိုင်ပေသည်။ အတန်းထဲတွင် လယ်သမားသားသမီးများကို မိသားစု၏ သမိုင်း၊အတန်းတွင်း၌ခါးသီးမှုများ၊ သွေးနှင့်မျက်ရည်များ၊ နိုင်ငံရေးအကြောင်းများပြောရန် မေးလေ့ရှိပေသည်။စာလေ့လာရသော ပမာဏကအလွန်နည်းပါးကာ မဟုတ်လျှင်လည်း ဆရာမက ကလေးများကို အလုပ်လုပ်ရန်ခေါ်သွားကြ၏။ အစရှိသဖြင့် စာသင်ချိန်များကို ကြီးမားစွာလျှော့ချထားပေသည်။

ဤအရာက ကျေးလက်အထက်တန်း ကျောင်းသားများကို ပြန်လည်ပုံစံဖော်မှုမရှိခင်က ပညာရေးအဆင့်ကဲ့သို့ ခိုင်မာခြင်းမရှိသည်ကို ဖြစ်စေလာကာ ကျောင်းသားအများစုကို စိတ်ရှုပ်သွားစေပေသည်။

မည်သို့ပင်ဆိုကာမူ လင်းလန်၏အမြင်တွင် ၎င်းကစာတတ်မြောက်ခြင်းနှင့် အခြေခံတွက်တတ်ချက်တတ်ခြင်းကို ဆိုလိုခြင်းဖြစ်ကာ ထိုထက်မပိုပေ။ မလုပ်နိုင်လျှင်လည်း ကိစ္စမရှိပေ။

မိုင်စွေ့နှင့် အားဝမ်အတွက်မူ သူတို့က ‌အခြေခံကျောင်း၌ တကယ်ပင် သိပ်မလေ့လာခဲ့ရပေ။သို့သော် သူတို့ကငယ်သေးတာကြောင့် သူတို့အလယ်တန်းကျောင်းကိုသွားတက်သည်နှင့် နေ့တိုင်းကျောင်းသို့လမ်းလျှောက်သွားကာ လမ်းလျှောက်ပြန်လာနေရမည်ဖြစ်သည်။အထူးသဖြင့် ဆောင်းတွင်းတွင် သူတို့ကစောစောသွားရပြီး နောက်ကျမှပြန်ရောက်ကြမှာဖြစ်၏။ ထိုအခါတွင် အလွန်အေးနေပေမည်။

လင်းလန်က ကလေးများကို အတန်းကျော်ခွင့်ပေးရန် တွန့်ဆုတ်နေမိ၏။

‘‘သမီးတို့ ကျောင်းသွားရင် သားငယ်လေးက အခြေခံကျောင်းမှာ တစ်ယောက်ထဲဖြစ်နေတော့မှာဘဲ’’

ရှောင်ဝမ်က ချက်ချင်းပင်ပြုံးကာ ပြောလိုက်၏။

‘‘အဆင်ပြေပါတယ် မားမား သားကအခုဆို လူကြီးဖြစ်နေပြီ’’

စန်းဝမ်ထွက်သွားပြီးနောက်တွင် ရှောင်ဝမ်ကနှစ်ရက်ကြာ စိတ်ဓာတ်ကျသွားခဲ့၏။ထို့နောက်သူကနေသားကျအောင် ချိန်ညှိလိုက်၏။ဘယ်လိုဘဲဖြစ်ဖြစ် သူ့မားမားက သူနှင့်ရှိနေသရွေ့အဆင်ပြေပေသည်။သူ့မားမားရှိနေသရွေ့ သူ့အကိုနှင့်အမများက အိမ်ပြန်လာကြမည်ဖြစ်သည်။ သူနည်းနည်းလေးမှ စိုးရိမ်စရာမလိုပေ။

လင်းလန်က ရုတ်တရက် တစ်ခုကိုသတိပြုမိလိုက်သည်။ ဟင်းးးထွက်သွားရသည်ကို နေသားမကျသည်မှာ သူတို့မဟုတ်ပေ။တကယ်တမ်းတွင် သူမသာဖြစ်နေပေသည်။

သူမက ဟန်ချင်စုန့်အားမေးလိုက်၏။

‘‘စန်းကော ရှင်ဒါကိုသဘောတူလား’’

ဟန်ချင်စုန့် :‘‘တကယ်လို့ မင်းဆန္ဒရှိရင် လုပ်လိုက်ပါ’’

အခုချိန်တွင် ကျောင်းသွားခြင်းသည် တကယ်ပင်ပေါ့ပါ့ပါးပါးရှိကာ လျော့ရဲနေ၏။သင့်အနေဖြင့် ကျောင်းသွားခြင်းသည် ရှုပ်ထွေးညစ်ပတ်သည်ဟုတောင် ပြောနိုင်ပေသည်။

အကယ်၍ တက္ကသိုလ်တစ်ခုမှ ဝင်ခွင့်ရခဲ့လျှင်တောင်မှ သင့်အနေဖြင့်အလုပ်ရနိုင်မည်မဟုတ်ဘဲ အိမ်ပြန်ပြီးစိုက်ပျိုးရေးသာလုပ်ရမှာဖြစ်သည်။

လင်းလန်က မိုင်စွေ့အားကြည့်ကာ အားဝမ်ကိုလည်းကြည့်လိုက်သည်။

‘‘တကယ်လို့မင်းတို့က စာလေ့လာရတာကို မခက်ဘူးလို့ထင်ရင် သဘောဘဲ’’

အားဝမ်က ပြုံးကာပြောလိုက်၏။

‘‘မားမား အဲ့ဒါက နည်းနည်းလေးတောင်မခက်ပါဘူး၊ သားတို့အားလုံးက အလယ်တန်းအဆင့် သင်္ချာ၊ရူပနဲ့ဓာတုဗေဒတွေကို အကိုရှန်ယွီဆီက သင်ခဲ့ကြတာ။ အခြားဘာသာတွေက ပိုပြီးတောင်လွယ်နေသေးတယ်’’

အရင်တုန်းက မတွေးခဲ့မိသော်လည်း ဒီတကြိမ်တွင် စီရင်စု၏လက်အောက်ခံဖြစ်သော မြို့တော်သို့ သွားလိုက်သောအခါ လူအများကြီးကိုတွေ့ခဲ့ရပြီး အများကြီးသင်ယူခဲ့ရကာ အားဝမ်နှင့်မိုင်စွေ့တို့ကလည်း ပိုပြီးအကြံဉာဏ်များထွက်လာခဲ့ကြပေသည်။သူတို့နှစ်ယောက်လုံး၏ အချိန်ကို မူလတန်းအဆင့်ကျောင်းမှာဘဲ ဖြုန်းမနေသင့်သည်ကို သဘောပေါက်လာကြ၏။

‌

ယခုအချိန်တွင် ကျေးရွာမူလတန်းကျောင်းများ၌ သူတို့က ဘာမှမလေ့လာနိုင်သလို သူငယ်ချင်းလည်းမလုပ်နိုင်ပေ။အကြောင်းမှာ ထိုကလေးများက သူတို့အတွေးအခေါ် များကို ထပ်ပြီးလိုက်မမှီနိုင်တော့ကာ တူညီသောအခြေအနေတွင် မဟုတ်သောကြောင့် ဆက်သွယ်ပြောဆို၍လည်းမရပေ။ဥပမာဖြင့် သူတို့က ပို၍ကြိုးကြိုးစားစား စာလေ့လာချင်ကြ၏။ ဒီလိုမှသာ အပြင်ဘက်လောကကြီးကိုတွေ့နိုင်ရန် သူတို့ထွက်လာနိုင်မည်ဖြစ်ပြီး သူတို့ကြိုက်သည့်အရာများကို လုပ်နိုင်မည်ဖြစ်သည်။ ကျောင်းသားများက နှစ်နှစ်ထက်ပိုပြီး စာလေ့လာချင်ကြကာ အမှတ်ထိန်းသိမ်းသူ၊ မဟုတ်လျှင်လည်း မူလတန်းဆရာအဖြစ် အလုပ်တစ်ခုရှာနိုင်ကြမှာဖြစ်သည်။

လင်းလန် :‘‘ကောင်းပြီလေ အဲ့ဒါက အဲ့လိုဆိုရင်လည်း မင်းတို့ဘာသာ ကိုယ့်ဆုံးဖြတ် ချက်နဲ့ကိုယ် လုပ်လိုက်ကြပေါ့’’

ကလေးများက ပိုပိုပြီး ဉာဏ်ရည်မြင့်မားလာကြပြီး ထိုအရာကလည်းကောင်းမွန်ပေသည်။

Xxxxxxxx

Part 716

ဟန်ချင်စုန့်က မိုင်စွေ့နှင့် အားဝမ်အား အရင်ဆုံး ရွာထဲမှ မူလတန်းကျောင်းကို ခေါ်သွားလိုက်ကာ ဟန်ချင်းဖျင်အား ကိစ္စကိုပြောပြလိုက်သည်။ထို့နောက် လုပ်ရိုးလုပ်စဉ်များကို ဖြတ်ကျော်ကာ သူတို့ကို တော်လှန်ရေးကော်မတီမှ အလယ်တန်းဆင့်ကျောင်း၏ ညွှန်မှူးနှင့်စကားပြောရန် ခေါ်သွားလိုက်သည်။သူတို့က ကွန်မြူနတီခေါင်းဆောင် ၏ကလေးများဖြစ်ကာ ‌ဖခင်ဖြစ်သူကအလွန်တော်သောကြောင့် အလယ်တန်းဆင့်ကျောင်းက သဘာဝကျစွာပင် ထိုအရာအတွက်လုပ်ဆောင်ပေးရန် ဆန္ဒရှိပေသည်။ညွှန်မှူးကလည်း ကိုယ်တိုင်ကိုယ်ကျပင် ကလေးများ၏ငါးတန်းအဆင့် အသိပညာများကို စစ်ဆေးလိုက်ရာ သူတို့နှစ်ယောက်လုံးက တရုတ်ဘာသာနှင့် သင်္ချာတွင် ထူးချွန်ကြသည်ကိုတွေ့လိုက်ရသည်။ထို့ကြောင့် သူကချက်ချင်းပင် သူတို့အား အလယ်တန်းအဆင့်ကျောင်း၏ ပထမတန်းသို့သွားစေရန် ဆုံးဖြတ်လိုက်သည်။

ဤကာလတွင် ကွန်မြူနတီ၏ အလယ်တန်းဆင့်အတန်းက ကျောင်းသားများများဖြင့် တစ်တန်းသာရှိ၏။ သို့သော် အတန်းနှစ်ခုခွဲရန် အဆင်မပြေသောကြောင့် သူတို့က တဝမ်နှင့် တူညီသော အတန်းတွင်သာ တက်ကြရမှာဖြစ်သည်။

ကျူရှင်ခနှင့် စာအုပ်ကြေးများပေးသွင်းရန် လုပ်ရိုးလုပ်စဉ်များကို လုပ်ဆောင်ပြီးသောအခါ စာအုပ်များနှင့် အစားအစာတံဆိပ်‌ထောက်ပံ့မှုများ အစရှိသည်ကို ဝေပေးလိုက်ကာ သူတို့အတွက်စီစဉ်ပေးရန် ကန်တင်းသို့သွားလိုက်သည်။ ထိုသို့မှသာ အနာဂတ်တွင် သူတို့က ကန်တင်းမှာနေ့လယ်စာစားနိုင်ကြမှာဖြစ်သည်။

ကလေးနှစ်ယောက်က အတန်းသွားတက်လိုက်ကြကာ ဟန်ချင်စုန့်က ကွန်မြူနတီသို့ ပြန်သွားလိုက်သည်။

အိမ်တွင် လင်းလန်နှင့် ရှောင်ဝမ်တို့သာ ကျန်ခဲ့လေသည်။ လင်းလန်က နေ့လယ်စာချက်လိုက်ကာ သားအမိနှစ်ယောက် အတူတူစားလိုက်ကြသည်။

ရှောင်ဝမ်က လင်းလန်ကို စားစရာတစ်ချို့ထည့်ပေးလာ၏။

‘‘မားမား များများစား’’

လင်းလန် ရယ်လိုက်လေသည်။

‘‘မားမားရဲ့ သားငယ်လေးက အရမ်းကို ကြင်နာလိုက်တာ’’

ရှောင်ဝမ် :‘‘အင်း သားက မားမားရဲ့ ဂွမ်းကပ်အနွေးထည်လေးလေ’’

စားပြီးနောက်တွင် သူကရေဒီယိုသွားဖွင့်လိုက်ကာ ဒေသထဲရှိ‌ရေဒီယိုထုတ်လွှင့်ဌာနကို နားထောင်ရန် လိုင်းဖမ်းလိုက်သည်။

‘‘မားမား ရေဒီယိုနားထောင်နေနော် သားကျောင်းသွားပြီ’’

သူကကျောင်းလွယ်အိတ်ထဲကို ဘာဂျာနှင့် သံစဉ်စာရွက်များကို ထည့်လိုက်ကာ တရုတ်ဘာသာနှင့် သင်္ချာပုံနှိပ်များကိုလည်း ထည့်လိုက်၏။သူက လင်းလန်ပေါ်ကိုလက်တင်လိုက်ကာ ပြောလိုက်သည်။

‘‘မားမား တာ့တာ’’

လင်းလန်က လက်တစ်ဆုပ်စာ သကြားလုံးများကို သူ့အိတ်ကပ်ထဲထည့်ပေးလိုက်သည်။

‘‘သွားလေ သူငယ်ချင်းတွေနဲ့လည်း မျှစားအုန်းနော်’’

ရှောင်ဝမ်က အတန်းထဲတွင် အလွန်နာမည်ကြီးပေသည်။လာဘ်ကောင်လေးလို တည်ရှိမှုမျိုးဖြင့် ဆရာမများနှင့် ကလေးများက သူ့ကိုသဘောကျကြ၏။

ရှောင်ဝမ်က လမ်းလျှောက်ထွက်သွားကာ တံခါးပေါက်သို့ရောက်သောအခါ ရပ်လိုက်လေသည်။ သူက ပြန်ပြေးဝင်လာပြီး လင်းလန်၏ လက်မောင်းများကြားပြေးဝင်လိုက်၏။

‘‘မားမား ‌သားကျောင်းကပြန်လာရင် မားမားနဲ့တူတူရှိနေပေးမယ်နော်’’

လင်းလန် ရယ်လိုက်မိလေသည်။

‘‘သားက အတန်းဖော်တွေနဲ့ဘဲ ကစားနေပါကွယ်၊ မားမားမှာက အလုပ်ရှိသေးတယ်လေ ဒါကြောင့် ဝါဒဖြန့်ချီရေးအသင်းကိုသွားရအုန်းမယ်’’

သူ့မားမားက တစ်စုံတစ်ယောက်နှင့်ကစားရမည်ကို သိလိုက်ရသောအခါ ရှောင်ဝမ်ကစိတ်သက်သာရာရသွားလေသည်။

‘‘ကောင်းပါပြီ။ မားမား တာ့တာ’’

သူက ထွက်သွားရန်တွန့်‌ဆုတ်နေခဲ့‌သော်လည်း နောက်ဆုံးတွင် သွားလိုက်လေသည်။

လင်းလန်က သက်ပြင်းချလိုက်၏။ဒီကလေးက သူမအိမ်မှာတစ်ယောက်တည်းဖြစ်နေမှာကို စိုးရိမ်နေတာဖြစ်သည်။တကယ့်ကို ခံစားချက်အပြည့်ဖြင့်ဖြစ်ကာ သူမက တခြားသူများမခံစားဖူးသော သိမ်မွေ့သည့် ခံစားချက်များကို ခံစားလိုက်ရပေသည်။

သူမက အရင်ဆုံးဆေးကြောလိုက်ကာ ဝါဒဖြန့်ချီရေးအသင်းသို့ သွားကြည့်ရန်လုပ်လိုက်သည်။ အခုချိန်တွင် ဝါဒဖြန့်ချီရေးအသင်း၌ကူညီရန် ဟောင်ဟုန်ကျန်းရှိနေပြီဖြစ်ကာ လင်းလန်မရှိလျှင်တောင်မှ သူမကကိစ္စရပ်များကို လွယ်ကူစွာ ကိုင်တွယ်နိုင်ပေသည်။

လင်းလန်က ဆပ်ပြာစက်ရုံဆီသွားလိုက်သည်။

ရှန်ယွီနှင့် တွေ့လိုက်ပြီး သူတို့ကခနလောက်စကားပြောနေလိုက်ကြ၏။ စန်းဝမ်က ဆုရကာ ရှောင်ဝမ်၏ခွဲစိတ်မှုက အဆင်ပြေလာသည်ကို သိလိုက်ရသောအခါ ရှန်ယွီသည်လည်း အလွန်ပျော်သွားလေသည်။

သူက ဘူးလေးဖြင့် အသစ်လုပ်ထားသော ခရင်မ်ကိုယူလိုက်ကာ လင်းလန်ကို ပေးလာ၏။

‘‘အဖွဲ့ခေါင်းဆောင် ဒါကိုစမ်းကြည့်လိုက်ပါဦး’’

အခုချိန်များတွင် ပုလင်းများနှင့် ဘူးများကို ရရန်မလွယ်ကူပေ။ ရှန်ယွီက ပြီးမြောက်သွားသော ထုတ်ကုန်များကို ထုတ်ကာ ဘူးများဖြင့်ထုတ်ပိုးထား၏။ ဤအသင့်သုံးခရင်မ်ဘူးများအားလုံးက လင်းလန်အိမ်မှထွက်တာဖြစ်သည်။

လင်းလန်က အဖုံးကိုဖွင့်လိုက်ကာ အနံ့ခံနိုင်ရန်အနံ့အားလက်ဖြင့် ယပ်ခပ်သလိုလုပ်လိုက်သည်။ ၎င်းက အလွန်ပေါ့ပါးသောရနံ့ရှိကာ သူမဝယ်ထားသည့်အရာများလို အနံ့မပြင်းပေ။ လင်းလန်က အနည်းငယ်ယူလိုက်ကာ လက်ဖမိုးတွင် စမ်းကြည့်လိုက်သည်။ ထိုခရင်မ်က နူးညံ့ကာ ၊ဖြူမွတ်နေပြီး ကောင်းကောင်းစိမ့်ဝင်နိုင်ပေသည်။

သူမ ရှန်ယွီကို ချီးကျူးလိုက်၏။

‘‘အရမ်းကောင်းတယ်၊ ငါဒါကို ရောင်းဖို့အတွက် ထောက်ပံ့ရေးနဲ့ ဈေးကွက်‌ပူးပေါင်းရေးဆီ ပို့လိုက်လို့ရတယ်’’

ထောက်ပံ့ရေးနှင့် ဈေးကွက်ပူးပေါင်းရေးအေဂျင်စီတို့သည် မျက်နှာလိမ်းခရင်မ်များရောင်းကြ၏။ တမျိုးမှာပုလင်းသေးသေးဖြင့်ဖြစ်ပြီး ဈေးကြီးကာ အခြားတစ်မျိုးကိုမူ တိုက်ရိုက်ပင် ကြီးမားသောကရားကြီးထဲထည့်ထားကာ အဖွဲ့ဝင်များကို ပုံစံနှစ်မျိုးဖြင့်‌ ရောင်းချပေး၏။ ယေဘုယျအားဖြင့် ကျေးလက်ကွန်မြူနတီအဖွဲ့ဝင်များက ဤဈေးချိုကာလို့ သုံး၍ကောင်းသော အမျိုးအစားကိုသာဝယ်ကြပေသည်။ ဘယ်လိုဘဲဖြစ်ဖြစ် ၎င်းခရင်မ်က အစိုဓာတ်ဖြည့်ပေးကာ မျက်နှာကိုခြောက်သွေ့ပြီး ပက်ကြားအက်ခြင်းမှ ကာကွယ်ပေးရာတွင် အလွန်ထိရောက်မှုရှိ၏။

‘‘ကျွန်တော်တို့တွေ ဖန်စက်ရုံကို ဆက်သွယ်ပြီး ဈေးသက်သာတဲ့ ခရင်မ်ပုလင်းတစ်သုတ်လောက်‌မှာလိုက်လို့ရတယ် ဒီလိုဆိုရင် ကျွန်တော်တို့အဲ့ဒါတွေကို ဈေးမြင့်မြင့်နဲ့ရောင်းလို့ရပြီ’’

ရှန်ယွီက သူမအားအကြံပေးလာ၏။

လင်းလန် ခေါင်းညိတ်လိုက်သည်။

‘‘ကောင်းပြီလေ တစ်ချက်လောက်စုံစမ်းကြည့်လိုက်ရအောင် အကောင်းဆုံးကတော့ ကောင်တီရဲ့နယ်ပယ်ထဲမှာ စက်ရုံတစ်ခုရှိနေဖို့ဘဲ။ အရမ်းဝေးလွန်းနေရင် ပစ္စည်းတင်ပို့ခတွေက ဈေးကြီးနေလိမ့်မယ်’’

ရှန်ယွီက ပြောပြလာ၏။

‘‘ကျွန်တော်မေးကြည့်ပြီးသွားပါပြီ ကျွန်တော်တို့ကောင်တီထဲမှာ စက်ရုံမရှိဘူး ဒါပေမယ့် ကျောက်ကောင်တီမှာတော့ ရှိတယ်’’

လင်းလန်၏မျက်လုံးများ တောက်ပသွားလေသည်။

‘‘ဒါဆိုလည်း မြန်မြန်ဘဲဆက်သွယ်ကြည့်လိုက်ရအောင် မင်းကတပ်မဟာရဲ့အမည်နဲ့ စာတစ်စောင်ရေးလိုက် ၊မင်းရေးလို့ပြီးသွားရင် ငါ့ကိုပေးလိုက် ငါကကွန်မြူနတီဆီသွားပြီး တံဆိပ်တုံးချိတ်ပိတ်ခိုင်းလိုက်မယ် ပြီးရင် ကောင်တီဆီလည်း သွားပြီးတံဆိပ်တုံးချိတ်ပိတ်ခိုင်းရမယ်’’

အခုချိန်တွင် ထိုအရာက ပြသနာများပေသည်။အကယ်၍မင်းအနေဖြင့် အခြားကွန်မြူနတီများဖြင့် ဆက်သွယ်မှုပြုလုပ်ချင်ပါက မင်းကိုယ်ပိုင်‌ကွန်မြူနတီဆီသို့လာကာ အရင်ကျော်ဖြတ်ရမည်ဖြစ်သည်။အကယ်၍အခြားကောင်တီများနှင့် အပေးအယူလုပ်ချင်ပါက မင်းအနေဖြင့် တပ်မဟာ၊ကွန်မြူနတီနှင့် တော်လှန်ရေးကောင်တီ၊ကော်မတီများကို ဖြတ်ကျော်ရမှာဖြစ်သည်။ထိုသို့မဟုတ်ဘဲ ပုံမှန်လုပ်ရိုးထုံးတမ်းများအတိုင်း သွားနေမည်ဆိုပါက တစ်နှစ်လောက်စောင့်ရမည်ဖြစ်ကာ နေ့ရက်များက အလွန်အေးစက်နေပေလိမ့်မည်။

ကံကောင်းထောက်မစွာဖြင့် သူတို့ဘက်တွင် ဟန်ချင်စုန့်ရှိနေပြီး လင်းလန်နှင့် ကောင်တီဝါဒဖြန့်ချီရေးအသင်းကြားမှ ဆက်‌ဆံရေးလည်းရှိနေတာကြောင့် ပိုပြီးအဆင်ပြေစေပေသည်။

Xxxxxx

Prev Next