Welcome To MM Storyteller
LOGIN
Part 809
လင်းလန် ထုံစံအတိုင်း ကိုယ့်အတွက်ကိုယ် ထည့်သွင်းစဉ်းစားထားခဲ့သည်။ဤခေတ်တွင် တည်ဆောက်ထားသော အဆောက်အဦးများသည် သံမဏိတိုင်များမပါရှိပါဘဲ အထပ်သားတွေချည်း ဖြစ်ပြီး ဘေးကင်းမှုလုံခြုံမှုမရှိပါချေ။ လာမည့် နှစ်နှစ်အတွင်တွင် မိုးယိုမည့်ပုံပေါ်ပြီး ပိုက်များမှ မိလ္လာဟောင်းများပင် နောက်သို့ပြန်လောင်းချကာ အဆင်မပြေမှုအမျိုးမျိုးကို ဖြစ်စေလိမ့်မည်။ ထို့အပြင် သူမတို့မိသားစုတွင် ကလေးများစွာရှိသဖြင့် အပေါ်ထပ်ကအိမ်ငယ်လေးတွင် နေထိုင်ရန် မဖြစ်နိုင်ပေ။
သူမပြောသည်ကိုကြားသောအခါ အခန်းထဲကလူအားလုံး အံ့ဩသွားကြ၏။ညွှန်မှူးလင်းက အတော်လေး သတိကြီးပုံရသည်။ သူကတကယ်ကောင်းတဲ့အိမ်ကြီးကို စွန့်လွှတ်ချင်နေတာ...
လူတချို့က သူမကို တောကအရူး တစ်ယောက်ဟု ထင်ပြီး အကြံပေးကြ၏။
"အရာရှိလင်း... အပေါ်ထပ်မှာ အပူပေးစနစ်ပါနေတော့ ဆောင်းရာသီမှာ နွေးတယ်"
လက်ထောက်အတွင်းရေးမှူးချိုးဆိုလာသည်။ "မင်းတို့ အပူပေးစနစ်မပါပဲ ဘန်ဂလိုမှာ နေမယ်ဆိုရင် ဌာနက အပူပေးစနစ်အတွက် ငွေ ထောက်ပံ့နိုင်တယ်”
လင်းလန်က တခြားသူတွေနှင့် ခြံထဲမှာ ပြွတ်သိပ် မနေချင်သောကြောင့်ပြောလိုက်၏။
“ကျွန်မတို့မှာ ကလေးတွေအများကြီးလည်းရှိတယ်..…”
လက်ထောက်အတွင်းရေးမှူးချိုးက ဆိုပြန်သည်။
“သီးသန့် ဝင်းလည်း ရှိတယ်...အဲ့ဒါကြောင့် တခြားသူတွေနဲ့ ပေါင်းနေဖို့ မလိုပါဘူး...အဲ့ဒါကို ညွှန်မှူးဟန်ကို ပေးလိုက်ဖို့ ငါ အကြံပြုချင်တယ်"
မူလကတည်းကလင်းလန်ကို ရွေးချယ်ခွင့်ပေးထားခြင်းဖြစ်သဖြင့် တခြားသူတွေကလည်း သဘာဝအတိုင်း သဘောတူပါလိမ့်မည်။
လင်းလန်က သူ့ကို အမြန်ကျေးဇူးတင်လိုက်၏။
"မြေကောင်းရင် ကျွန်မတို့ ဟင်းသီးဟင်းရွက်တွေ စိုက်လို့ရတယ်...ကျေးလက်ကလာတဲ့သူတွေက နေ့တစ်နေ့ကို အသီးအရွက်မစိုက်ဘဲမနေနိုင်ဘူး"
ထုံးစံအတိုင်း လက်ထောက်အတွင်းရေးမှူးချိုးက ဘာကိုဆိုလိုသည်ကို ရှိနေသူတိုင်း သိကြသည်။
လင်းလန်က ဆန္ဒရှိသည်ဆိုကတည်းက သူတို့အနေဖြင့် ဆက်ပြောရန်အဆင်မပြေပါချေ။ ထို့ကြောင့် လက်ထောက်အတွင်းရေးမှူးချိူးတို့ အိမ်ခေါင်းရင်းက လစ်လပ်နေသည့် သီးသန့်ခြံဝင်းမှာ လင်းလန်တို့ကို နေထိုင်ခွင့်ပေးလိုက်၏။
အစည်းအဝေးအပြီးတွင် လင်းလန် လက်မှတ်ထိုးရန်နှင့် သော့ယူရန် ထောက်ပို့အဖွဲ့ထံသွားခဲ့ပြီး ခြံဝင်းကို ဦးစွာသွားကြည့်ရှုခဲ့သည်။ အခြားလုပ်ထုံးလုပ်နည်းများအတွက်မူ ဟန်ချင်စုန့် လာမည့်အချိန်ကို သူမ စောင့်ဆိုင်းနေရသည်။
ထောက်ပို့အဖွဲ့မှ ရှောင်ကောင်းက လင်းလန် ကြည့်ရန်လိုက်ပို့ပြီး ဂုဏ်ပြုစကားဆို၏။
"အရာရှိ လင်းက အခုကနေစပြီး မြို့သူဖြစ်တော့မှာပေါ့"
လင်းလန်က ပြောလိုက်သည်။
"ငါတို့ခေါင်းဆောင်ဟန်ရဲ့ အိမ်ထောင်စုစာရင်းက ခရိုင်ရုံးက ဖြစ်ပေမယ့် ငါ့ကလေးတွေနဲ့ ငါကမဟုတ်ဘူးလေ"
ယခုအချိန်မှာ အိမ်ထောင်စုစာရင်းက သိပ်မကောင်းသေးပေ။
လက်ထောက်အတွင်းရေးမှူးချိုးက ပြုံးပြုံးရွှင်ရွှင် ဆို၏။
"စိတ်မပူပါနဲ့ ညွှန်မှူးလင်း... အလုပ်ကြိုးစားပြီး နှစ်နှစ်အတွင်းခရိုင်ကို အလုပ်ပြောင်းနိုင်ဖို့ ကြိုးစားပါ... ကလေးတွေရဲ့ အိမ်ထောင်စုစာရင်းက သူ့ဘာသူပါလာပါလိမ့်မယ်"
လင်းလန်ဘက်မှ အစပြုကာ သူလိုချင်သည့်အိမ်ကိုအလျော့ပေးလာသောကြောင့် လက်ထောက်အတွင်းရေးမှူးချိုး အလွန်ပျော်နေ၏။ လင်းလန်က အလွန်ဖော်ရွေသည်ဟုပင်ခံစားနေရပြီး သူ့တစ်ကိုယ်လုံးက တော်လှန်ရေးရဲဘော်တစ်ဦး၏ နွေးထွေးမှုများနှင့် ပြည့်နှက်နေသည်။
လင်းလန် ပြုံးကာ နှုတ်ဆက်လိုက်ပြီး ရှောင်ကောင်းနှင့် အိမ်ကို ကြည့်ရန် လိုက်သွားသည်။
အိမ်က သိပ်မဝေးပါချေ။ တော်လှန်ရေး ကော်မတီဝင်၏ နောက်တံခါးကနေ ထွက်ပြီး မိသားစုနယ်မြေဆီသို့ လမ်းဖြတ်ကူးရသည်။ အဆောက်အဦးသစ်ကို ဖြတ်သွားသည့်အခါ ရှောင်ကောင်းက နောင်တရနေဆဲဖြစ်၏။
"အရာရှိလင်း...ငါတို့သာ အခွင့်အရေးရရင် တိုက်ခန်းလိုချင်မှာသေချာတယ်"
လင်းလန်က ခပ်ပြုံးပြုံးပင်ဆိုလိုက်သည်။
"လူတိုင်းက တိုက်ခန်းလိုချင်နေလို့ ဘန်ဂလိုပဲ လိုချင်တာ.
မည်သို့ပင်ဖြစ်စေ သူမက သီးသန့်လုံးချင်းအိမ်များနှင့် နေသားကျနေပြီဖြစ်၏။ ဟန်ချင်စုန့် က ခေါင်မိုးကို ယိုစိမ့်မှုမရှိအောင် ပြုပြင်နိုင်ပြီး အိမ်သာကိုလည်း ပြုပြင်နိုင်သည်။ မြို့ထဲမှာ အများသုံးရေချိုးခန်းများရှိပြီး တစ်ပတ်ကို နှစ်ကြိမ်လောက် ရေသွားချိုးကာ အိမ်သာထဲမှာ နေ့စဉ်ဆေးကြောရသည်က လုံလောက်လေသည်။
ရှောင်ကောင်းက လင်းလန်ကိုသော့ပေး၍ တံခါးဖွင့်ခိုင်းသည်။ စက်ဘီး သို့မဟုတ်အထွေထွေ ပစ္စည်းများ သိမ်းဆည်းနိုင်သည့် ဂိတ်တဲတစ်ခုရှိသည်။ တံခါးကနေ ဝင်သောအခါတွင် အရိပ်နံရံတစ်ခုရှိသည်။ အရိပ်နံရံကို ပတ်ကာ လမ်းလျှောက်သွားလျှင် ခြံဝင်းထဲကို ရောက်၏။ တောင်အိမ်မရှိသဖြင့် ခြံက အနည်းငယ်ကျယ်သည်။ ခြံထဲမှာ ရေသွယ်ထားခြင်း မရှိဘဲ အလယ်မှာ ရေတွင်းတစ်ခုရှိပြီး ရေတွင်းကတစ်ပေမြင့်ပြီး ကျောက်ပြားနှင့်ဖုံးထား၏။
ထို့အပြင် အနောက်ဘက်တွင် ဘေးခန်းနှစ်ခန်းရှိပြီး ပင်မအခန်းထက် ပိုတိုကာ ဂိုဒေါင်အဖြစ် အသုံးပြုနိုင်သည်။ မြောက်ဘက်တွင် ပင်မအိမ်သုံးလုံး ရှိပြီး တောင်ဘက်သို့ မျက်နှာမူထားသည်။အိမ်က အလွန်မြင့်ပြီး ပုံမန်အပေါက်များပါရှိသော်လည်း အလျားအနံမှာ သာမန်အခန်းများထက် ပိုရှည်သောကြောင့် တစ်ခန်းကို နှစ်ခန်းခွဲနိုင်သည်။
ပင်မအခန်းမှာ အနောက်ဘက်နံရံနှင့်ကပ်လျက် အိုးနှင့် မီးဖိုတစ်ခုရှိနေ၏။ အပူပေးစနစ်မရှိလျှင် အနွေးကုတင်က အကောင်းဆုံးပါပင်။
လင်းလန် အနောက်ဘက်ခန်းသို့ သွားကြည့်လိုက်ရာ ပို၍ပင် အံသြဝမ်းသာသွားသည်။
"အနွေးကုတင်လည်း ရှိတယ်”
အနောက်ဘက်ခန်းမှာ အနွေးကုတင်တစ်ခုရှိပေမဲ ကျေးလက်ကပုံစံနှင့် မတူပါချေ။
ဤနေရာတွင် တောင်ပြတင်းပေါက်အောက်၌ နေရာလွတ်တစ်ခုရှိပြီး အိုးနှင့် မီးဖို၏တစ်ဖက်တွင် အနွေးကုတင်ကိုဆောက်ထား၏။ အနွေးကုတင်အကြီးကြီးတစ်ခုလုံးကို နံရံတစ်ခုခြားကာ အခန်းငယ်နှစ်ခန်းခွဲထားသည်။ ဤနည်းဖြင့် မိန်းကလေးများက အတွင်း၌ အိပ်ပြီး ယောက်ျားလေးများက အပြင်တွင် အိပ်ကာ တောင်ပြတင်းပေါက်အောက်တွင် စားပွဲခုံ ထားရန်အဆင်ပြေပေ၏။
ယခုလောလောဆယ် ပင်မခန်းမှာ ရေတိုင်ကီတစ်ခုပဲ ရှိကာ ဗလာဖြစ်နေပြီး တခြားအိမ်သုံးပစ္စည်းတွေလည်း မရှိပေ။ အရှေ့ဘက်ခန်းမှာ ဘာမှမရှိသဖြင့် ထိုအချိန်ရောက်လျှင် အနွေးကုတင်တစ်ခု ထပ်ဆောက်၍ရလေသည်။
လင်လန် ကြည့်ပြီးသည်နှင့် တစ်ခါတည်း ဘယ်လိုစီစဉ်ရမလဲ စဉ်းစား၏။ သူမက လာနေရန်အလျင်မလိုပါချေ။ ကလေးများက ကွန်မြူနတီတွင် တစ်နှစ်ကျောင်းတက်ရပြီး သူမ၏အလုပ်မှာ ကွန်မြူနတီတွင် ရှိနေသောကြောင့် ပြောင်းရွှေ့ရန် မလွယ်ကူပေ။ ဤနေရာကို လောလောဆယ်တွင် နေ၍ရသလို ဟန်ချင်စုန့် အလုပ်နောက်ကျပါက ဤနေရာတွင်နေမည်ဖြစ်သည်။
သူမ သော့ကိုယူ၍ ရှောင်ကောင်းနှင့်အတူ ခြံရှေ့သို့ ပြန်သွားခဲ့ပြီး လမ်းတွင်မြောင်ဟုန်ယင်းကို တွေ့လိုက်ရသည်။
မြောင်ဟုန်ယင်းက သူမ၏အမျိုးသားက ဗျူရို၏အနာဂတ်ညွှန်မှူးဖြစ်ပြီး တော်လှန်ရေးကော်မတီ၏အနာဂတ်ညွှန်မှူးဖြစ်သည်ဟု ယုံကြည်သောကြောင့် သူမ လင်းလန်ကို အလေးအနက်မထားခဲ့ပေ။
ထောက်ပံ့ရေးနှင့် ရောင်းဝယ်ရေးသမဝါယမများမှ ကုန်ပစ္စည်းများကို မြင့်မားသောစျေးနှုန်းဖြင့် ရောင်းချနိုင်သည်ကို သူမသိရှိလာကတည်းက သူမ ငွေရှာရန်နည်းလမ်းတစ်ခုကို ရှာတွေ့ခဲ့သည်ဟု သူမထင်ခဲ့သည်။ သူမက ဉာဏ်ကောင်းသည်၊မည်သို့ပင်ဖြစ်စေ ဈေးနည်းသော ကုန်ပစ္စည်းများကို သာမန်ပြည်သူများက ဝယ်ယူကြပြီး သူမ သာမန်လူများနှင်ယှဥ်မတုနိုင်ပေ။ ထို့ကြောင့် သူမ ဈေးကြီးသော ကုန်ပစ္စည်းများကို ယူကာ ခြံဝင်းအတွင်းရှိ အတွင်းလူများထံ ရောင်းချခဲ့ပြီး အချို့မှာ ဆွေမျိုးများ သို့မဟုတ် သူငယ်ချင်းများ အတွက် ဝယ်ခဲ့ကြသည်။ကူပွန်များမလောက်လျှင် သူမကကူပွန်နှစ်ခု ထောက်ကူပေးမှာဖြစ်၏။ ယွမ်နှစ်ဆယ်ပိုတောင်းတာဘာမှားလို့လဲ...
သူမ မကူညီလျှင် ယွမ်ငါးဆယ်ကျော်နှင့်ပင် ဝယ်နိုင်မှာ မဟုတ်ချေ။ထို့ကြောင့် သူမက တကယ်ကူညီနေခြင်းဖြစ်သည်။
Xxxxxxx
Part 810
သူမက နာရီ၊ စက်ဘီး၊ ရေဒီယိုစည်တို့ကနေ လက်ဖက်ရည်၊ ဆေးလိပ်နှင့် အရက်တို့အထိ အရာအားလုံးကို ယူခဲ့သည်။ မည်သို့ပင်ဖြစ်စေ သာမန်အထည်၊အဝတ်အစားနှင့် စားစရာများကို သူမလိုချင်ပေ။ သူမကိုယ်သူမ အလုပ်လုပ်သည့်လူလို့ ယူဆသည့်အတွက် အလုပ်လုပ်သူများ၏ ထောက်ထားခြင်းကို ခံရမည့်သူဟုတွေးသည်။
ဘာမှမဖြစ်သည်မှာ ကြာလှပြီဖြစ်၏။ လူတိုင်းက သူတို့လိုအပ်သည်ကိုဝယ်ပြီး မလိုအပ်သည်များကို မသိဟန်ဆောင်ကြသည်။
အမြင်ကျဥ်းလွန်းသော လင်းလန်တစ်ယောက်တည်းကသာ သူမကို မျက်နှာချင်းဆိုင် လှောင်ပြောင်ဝံ့ခဲ့သည်။
မြောင်ဟုန်ယင်း သူမ သည်းမခံနိုင်တော့ဟု ခံစားရသည် ။ အထူးသဖြင့် ဟန်ချင်စုန့်၏အိမ်ခွဲဝေမှုအကြောင်းမေးမြန်းကြည့်ပြီး သူမအိမ်ဘေးတွင်ဖြစ်လောက်သည်ဟုသိရသောအခါ သူမ အတော်လေး ဒေါသထွက်လာခဲ့သည်။
နောက်ဆုံးတွင် လင်းလန်က အနောက်ဘက်မှ ဘန်ဂလိုကို ယူသွားပြီး ထိုအခန်းကို လက်ထောက်အတွင်းရေးမှူးထံ အပ်လိုက်ကြောင်း ကြားလိုက်ရသောအခါတွင် သူမ ဝမ်းသာသွားပြန်သည်။
"ကမ္ဘာကြီးကို တစ်ခါမှ မမြင်ဖူးသေးတဲ့ မယားမိုက်...*ပန်းထိုးခေါင်းအုံးမျက်နှာဖြူလေးပဲ...အရူးမှန်းပေါ်လာပြီ ဟားဟား”
(T/N–အဆင်းသာရှိပြီးအချင်းမရှိသူ)
သူမ လင်းလန်၏စိတ်လှုပ်ရှားမှုကို စောင့်ကြည့်ရန် ရောက်လာသည်။
"ဟန်ချင်စုန့်ရဲ့မိသားစုကိုပြောဦးမယ် ... နင်တို့ ဒီထဲကိုရောက်ပြီးရင် စည်းကမ်းတွေကိုလေ့လာရမယ်"
မြောင်ဟုန်ယင်းက အိမ်ရှေ့ခြံဝင်းတံခါးကိုပိတ်ရပ်လိုက်ပြီး လင်းလန်ကို အလွန်မောက်မာသောအကြည့်ဖြင့်ကြည့်နေသည်။
လင်းလန်က ပျောက်မသွားအောင် သူမအိတ်ကပ်ထဲကို သော့ထည့်လိုက်ပြီး ပြောင်ပြောင်တင်းတင်း ပြောလိုက်၏။
"စျေးကစားနေတာလို့ ကျွန်မပြောပါတယ်...ရှင်ကကျ ဒီဝင်းထဲမှာနေပြီး ဘာလို့ စည်းမျဥ်းတွေကို မလေ့လာတာလဲ"
မြောင်ဟုန်ယင်းက အခွင့်အရေးမပေးဘဲ ဒေါသတကြီး ပြေးလာလေသည်။
"ခွေးမလေး ဘာကိုဆိုလိုချင်တာလဲ...နင် ပြောရမဲ့စကားလား...နင်က ငါ့ကို သင်ပေးချင်တာလား"
လင်းလန်:"ရှင်က ကိုယ့် စကားကိုယ်တောင် ကောင်းကောင်း မပြောတတ်ဘူး...ကျွန်မကို ဥက္ကဋ္ဌမော်ရဲ့ ဘယ်တိုက်ခိုက်ရေးသမားတွေက ပါတီကို နာခံမှုအရှိဆုံးလဲဆိုတာရယ်... အဓိက စည်းကမ်း သုံးခုနဲ့ အချက်ရှစ်ချက်ကို ရှင့်ကို သင်ပေးစေချင်လား... လူထုကို တစ်ယောက်ပြီးတစ်ယောက် အသံမချကြောင်းရယ်... ရန်သူကို ဆောင်းဦလေက သစ်ရွက်ခြောက်ကြွေတွေလို လှည်းကျင်းလိုက်သလို ဆက်ဆံ....."
"ပါးစပ်ပိတ်ထား...နင်က သင်ခန်းစာပေးချင်သေးတာလား"
မြောင်ဟုန်ယင်းက သူမ၏ တုတ်တုတ်တိုတို ခန္ဓာကိုယ်ကို လှုပ်ခါလိုက်ပြီး လက်ကို ဆန့်ကာ လင်းလန်ကို နောက်ပြန်တွန်းလိုသည့်သဘောဖြင့် တွန်းထုတ်လိုက်သည်။
လင်းလန်က သူမလောက်မတုတ်ပေမဲ့ သူမထက် ပိုပျော့ပျောင်း၏။ လင်းလန်က ရှောင်ပြီး တံခါးဆီသို့ ပြေးသွားကာအော်လိုက်သည်။
"အရူးမကြီး လူကို ရိုက်နှက်နေပါတယ်... အကြပ်ကိုင်ပြီး အရောင်းအဝယ်လုပ်ခိုင်းနေပါတယ်ရှင်..."
ထိုသို့အော်ကာ တော်လှန်ရေး ကော်မတီဝင်းထဲသို့ အပြေးအလွှား ပြေးသွားကာ မြောင်ဟုန်ယင်း ဤနေရာသို့လိုက်လာရဲမလား ကြည့်လိုက်သည်။
လင်းလန်က အမြန်လမ်းလျှောက်နေသော်လည်း ထိတ်လန့်မနေဘဲ သူမကိုပင် လှည့်ကာရန်စလိုက်သေးသည်။ မြောင်ဟုန်ယင်း ဒေါသထွက်လွန်း၍ မျက်လုံးများနီရဲလာပြီး သူမကို ရိုက်နှက်ရန်မောင်းတင်ကာ ပြေးလိုက်လာခဲ့သည်။
လင်းလန် ရုံးခန်းရှေ့ စင်္ကြံသို့ရောက်သောအခါ ထောင့်တွင် ပုန်းနေလိုက်သည်။ မြောင်ဟုန်ယင်း၏ မြေကြီးကို လှုပ်ခါစေသည့်ခြေသံကို ကြားသောအခါ ပြေး၍ ခြေထောက်ကို ဆန့်လိုက်သည်။
ဘုန်းခနဲအသံနှင့်အတူ မြောင်ဟုန်ယင်း အရှေ့ဝရန်တာ၏ အစိမ်းရောင်အုတ်ကြမ်းပြင်ပေါ်သို့ ပြုတ်ကျသွားသည်။
သူမ နာကျင်စွာ ညည်းတွားရင်း ထရပ်လိုက်ပြီး သူမ၏ လက်အရေပြားခြစ်မိသည် တွေ့လိုက်ရပြီး ပူစပ်နေအောင်နာ၏။သူမ၏ မေးရိုးအနည်းငယ်ရွဲ့သွားကြောင်း သူမသတိမထားမိသေးပေ။
"လင်းလန် ငါနင့်ကိုသတ်ပစ်မယ်..."
မြောင်ဟုန်ယင်းက ထပြီး ထော့နဲ့ထော့နဲ့ဖြင့် မေးကြီးစောင်းကာ လင်းလန်နောက် လိုက်သွားခဲ့သည်။
လင်းလန်က တော်လှန်ရေး ကော်မတီ အဆောက်အအုံသို့ ပုန်းအောင်းစရာ နေရာရှာရန် ပြေးနေပြီဖြစ်သည်။အတွင်းရေးမှူးလီကိုတွေ့သောအခါ လျှောက်သွားပြီး ကြောက်ရွံ့နေဟန်ဖြင့် လှမ်းကြည့်လျက်ဆို၏။
"အတွင်းရေးမှူးလီ... အဲဒီ့စျေးကစားတဲ့ အမျိုးသမီးပြန်ရောက်လာပြန်ပြီး...ကျွန်မကို လက်ပတ်နာရီ အတင်းဝယ်ခိုင်းနေတယ်... ကူညီပါဦးရှင်~~"
အတွင်းရေးမှုးလီ: .........
မြောင်ဟုန်ယင်းက အော်ဟစ်လိုက်သည်က ကျယ်လွန်း၍ ဘေးချင်းကပ်ရပ်ကပြည်သူ့လုံခြုံရေးဗျူရိုကပင် ၎င်းကို ကြားနိုင်ပေမဲ့ လက်ထောက်ညွှန်မှူးလီက ဖြေရှင်းရန် ထွက်မလာခဲ့ပါချေ။
ထိုအစား ညွှန်မှူးချင်၏ ချစ်သူကျန်းယွီနှင့်ကောင်းဝေ့တုန်း၏ ချစ်သူကျန်းချွင်ရှားတို့ ထွက်လာကြသည်။သူတို့နှစ်ယောက်လုံးက ပညာတတ် စာတတ်ပေတတ်တွေဖြစ်ကြပြီး သူတို့လည်းပဲ တော်လှန်ရေးကော်မတီတွင် အလုပ်လုပ်နေကြ၏။
ကျန်းချွင်ရှားနှင့် မြောင်ဟုန်ယင်းတို့က ယောကျာ်းများကြားက ရန်ပွဲကြောင့် အဓိကအားဖြင့် ရန်ပွဲများ ရှိကြပြီး ကောင်းဝေ့တုန်းနှင့် လီခွမ်းကျိုးတို့သည် အမြဲတမ်း အပြိုင်အဆိုင် ဆက်ဆံရေး ရှိခဲ့ကြသည်။ သူမ၏ယောက်ျားကို ကူညီရန်အတွက် မြောင်ဟုန်ယင်းက ကျန်းချွင်ရှားအတွက် ခက်ခဲအောင် ထပ်ခါတလဲလဲ ပြုလုပ်ခဲ့သည်။သူမက နင်နဲ့ *ကျန်းကျဲရှီက တစ်မိသားစုတည်းကဟူ၍ပင် တစ်ခါက ပြောခဲ့ဖူးပြီး ဝေဖန်မှုများနှင့် အခြားမိုက်မဲသည့်အရာများထဲသို့ ဆွဲခေါ်သွားတတ်သည်။
(T/N–ထိုင်ဝမ်သို့ထွက်ပြေးသွားသည့် တရုတ်အမျိုးသားရေးအစိုးရခေါင်းဆောင်)
ကျန်းချွင်ရှား: "အစ်မယွီက ဂရုမစိုက်ဘူးလား... တော်လှန်ရေး ကော်မတီမှာ လာအော်တာ မသင့်တော်ဘူးလေ"
ကျန်းယွီကလည်း အနည်းငယ် မျက်မှောင်ကြုတ်ပြီးဆိုလိုက်၏။
"ဒီလူနှစ်ယောက်က အဆင်မပြေဘူး"
ဤနေရာကိုရောက်လာသော လူသစ်အများစုက ဒေသခံမြွေများနှင့် ကြုံသည့်အခါ သည်းခံကြလိမ့်မည်။သို့ရာတွင်
ညွှန်မှူးလင်းက မြောင်ဟုန်ယင်းနှင့် တကယ် ရန်ဖြစ်ခဲ့သည်။ ဤသည်က သူမနှင့် ပေါင်းသင်းရန် မလွယ်ကူဟု လူအများကို ပြောနေခြင်း မဟုတ်ပါလော။
သူမက အရာရာကို ပြဿနာမဖြစ်ဘဲ စိတ်အေးလက်အေး အေးအေးဆေးဆေး နေချင်သည်။
မြောင်ဟုန်ယင်းက လင်းလန်ကို ရှာမတွေ့သဖြင့် ငါးပူတင်းကဲ့သို့ ဒေါသတကြီးဖြစ်နေသည်။ ကျန်းယွီနှင့် ကျန်းချွင်ရှားကိုတွေ့သောအခါ ခေါင်းစောင်းလျက်ကြီးပြေးလာပြီးဆို၏။
“နင်တို့နှစ်ယောက် ဘယ်မှာပုန်းနေတာလဲ”
ကျန်းယွီက သူမကို တစ်ချက်ကြည့်လိုက်ပြီးပြောလေသည်။
"နင်က အရမ်းစည်းကမ်းမဲ့တာပဲ...မိသားစုဝင်းထဲမှာ အော်ဟစ်နေတာက အဆင်ပြေတယ်... ဒါပေမဲ့ အခု နင်က ရုံးခန်းမှာ ပြဿနာရှာနေတယ်"
မြောင်ဟုန်ယင်းက နှုတ်ခမ်းကိုမဲ့ကာဆို၏။
"နင်ကရော ဘာအရူးထနေတာလဲ...Xခရိုင်မှာဘယ်သူမှ ငါ့လိုမိန်းမကို သင်ခန်းစာမပေးရဲဘူး...နင့်ယောက်ျားတောင် ရှေ့တစ်လှမ်းတိုးချင်ရင် ငါ့အဖေနဲ့ဦးလေးဆီ ခယပြီးအကူအညီတောင်းရမှာသိလား"
ကျန်းချွင်ရှားက သူမပါ အလောင်ခံရမည်ကို စိုးရိမ်သဖြင့် မြောင်ဟုန်ယင်းကို သူမဘက်ကစပြီးစကားမပြောပေ။
မြောင်ဟုန်ယင်းက သူမမျက်နှာနှင့် လက်တွေကို ညွှန်ပြပြီးဆိုသည်။
"သူက ငါ့ကိုလုပ်ထားတာ ကြည့်စမ်း...ငါ သူနဲ့ ဒိတိုင်း မပြီးနိုင်ဘူးးး..လင်းလန်က *လင်းBနဲ့ ပတ်သတ်မှု တစ်ခုခုတော့ ရှိကိုရှိရမယ်... သူ့ကို ဖမ်းပြီး စစ်ဆေးမေးမြန်းရမယ်"
(T/N–လင်းပြောင်=ကွန်မြူနစ်ပါတီ၏ ပြည်တွင်းစစ်အတွင်း အနိုင်ရမှူတွင်အခရာကျသော ဗိုလ်ချုပ်ကြီး၊အဆိုအရမော်စီတုန်းကို လုပ်ကြံရန်ကြိုးစားပြီး ဆိုဗီယက်ပြည်ထောင်စုဘက်သို့ ကူးပြောင်းသွားပြီးနောက် 1971တွင် လေယာဥ်ပျက်ကျပြီး သေဆုံးသွားသည်။ထိုလေယာဥ်ပေါ်တွင် သူနှင့်အတူ သူ့မိသားစုဝင်များစွာလည်း လိုက်ပါခဲ့၏။)
Xxxxxxxx
Welcome To MM Storyteller
LOGIN
Welcome To MM Storyteller
REGISTER