အပိုင်း ၈၆၁-၈၆၂
Viewers 37k
Chapters 532

Part 861


မိုင်ဆွေ့က အံ့သြသွားသည်။ " ဒီလောက်လှတဲ့ ချည်ထည်တွေ သူတို့ဆီမှာ ရှိတယ်လား " 


နူးညံ့နေကာ ပန်းပွင့်ကြီးများ ရိုက်နှိပ်ထားသော ပိတ်စမျိုးသည် တရုတ်ပြည်တွင် မရှိပေ ။


စန်း၀မ် : " အင်းလေ မဟုတ်ရင် သူတို့ ဘာ၀တ်ကြမှာလဲ " ထို့နောက် စန်း၀မ်က ထရပ်ကာ ပေါင်ပေါ်ကိုထိုးပြသည်။


 " စကပ်တွေက ဒီလောက်လေးတွေပဲတဲ့ ဆောင်းရာသီအေးနေတာတောင် ဂရုမစိုက်ဘဲ ၀တ်ကြတာတဲ့ "


တရုတ်ပြည်မြို့လယ်ရှိ မိန်းကလေးအချို့မှလွဲကာ ကျန်နေရာများ၌ စကပ်များကို ၀တ်ခဲကြလေသည်။ ပေါင်ပေါ်နေဖို့ဆိုသည်က အဝေးကြီးပင်ဖြစ်၍ တ၀မ်က မျက်မှောင်ကြီးကြုံ့လို့နေလေ၏။ 


အားလုံး၏ အံ့သြနေသည့်အမူအရာကြောင့် စန်း၀မ်က တက်ကြွလာသည်။


 " ဒီလိုလည်း ရှိသေးတယ် " ဟုဆိုကာ ရှောင်၀မ်၏ လက်ပြတ်အတွင်းဂျတ်ကတ်အင်္ကျီကိုယူပြလေသည်။ ထိုသည်က အတော်လေးခါးတိုပြီး ဗွီပုံစံလည်ပင်းပေါက်ဖြင့်ဖြစ်သည်။ 


မိုင်ဆွေ့ အလွန်အမင်း အံ့အားသင့်နေသည်။


 " ငါတို့အတွင်းခံတွေထက်တောင် လည်ပင်းဟိုက်သေးတယ် " သူမတို့၀တ်သည်က လည်ပင်းအ၀ိုက်ပုံဖြင့်ဖြစ်ပြီး ရင်သားပေါ်မနေစေပေ ။ စန်း၀မ်ပြောပုံအရဆိုပါက ၀တ်ပြီးရင် ဗိုက်ပေါ်ချက်ပေါ်ဖြစ်နေလောက်သည်။ 


စန်း၀မ်က အံ့သြစရာများကို ဆက်ပြောပြသည်။


 " သူတို့က နေ့တိုင်းကနေကြတာ ယောက်ျားလေးနဲ့ မိန်းကလေးတွဲပြီးတော့ ဒီလိုလေ "


ထို့နောက် လက်ဆန့်ထုတ်ကာ တ၀မ်၏ခါးကိုဖက်ပြသော်လည်း တ၀မ်က စန်း၀မ်အား မျက်နှာမှ တွန်းထုတ်ပြီး ခုတင်ပေါ်ခုန်တက်ကာ ရှောင်၀မ်ကိုဖက်ထားလိုက်လေသည် ။


ကျန်လူများ : ... နိုင်ငံခြားခရီးစဥ်က တော်တော်လေး ကောင်းတဲ့ပုံပဲ ၊ ပြိုင်ပွဲတွေဘာတွေတော့ နှောင့်နှေးမသွားခဲ့ဘူးမလား ။


ဟန်ချင်စုန့်က ထိုသည်ကို သေချာစိုက်ကြည့်နေပြီး လင်းလန်ထံ လှည့်ကြည့်လာသည်။ 


လင်းလန်လည်း မမြင်ချင်ယောင်ဆောင်ကာ စန်း၀မ်ထိုးပေးလာသော အိတ်ထဲကို လှန်လှောကြည့်လိုက်သည့်အခါ ဓာတ်ပုံများနှင့် အယ်ဘမ်လ်အချို့ကိုတွေ့လိုက်ရသည်။ 


ဓာတ်ပုံများက အခြားသူများကရိုက်ပေးထားတာကို စန်း၀မ်ယူလာတာ ဖြစ်လောက်သည်။ အများစုမှာ ထူးထူးဆန်းဆန်း၀တ်စားထားကြသည့် ယောက်ျားမိန်းမများဖြစ်ပြီး အချို့မိန်းကလေးများမှာ ဟိုပေါ်သည်ပေါ် ၀တ်စားထားကြပြီး အချို့ပုံများမှ အတွဲများကလည်း မဖွယ်မရာပင်ဖြစ်၍ ကြည့်ကောင်းသည့်ပုံများ ဟုတ်မနေပေ ။ ကလေးများ အတုယူမမှားစေရန် အချို့ပုံများကို လင်းလန် ဖယ်ထားလိုက်သည်။ ထို့အပြင် ယခုအချိန်၌ ဤအရာများသည် တားမြစ်ခံထားရသည့်အရာများ ဖြစ်နေသေးလေသည်။ 


ရှုခင်းပုံများ ၊ ဗိသုကာအဆောက်အအုံများနှင့် သာမန်ဆန်သည့်ပုံများကိုသာ ကလေးများကြည့်နိုင်ရန် လင်းလန် ထားထားလိုက်သည်။ 


ဟန်ချင်စုန့်က သူမအား ပုခုံးပေါ်လက်တင်ကာ ဖက်ပြီးထိုင်နေတာဖြစ်သည်။ ထို့နောက် ဓာတ်ပုံများကြားထဲမှတစ်ပုံကို ဆွဲထုတ်လိုက်လေသည်။ ဆံပင်ကောက်ကောက်နှင့် မိန်းကလေးတစ်ယောက်က အနီရောင်ရေကူး၀တ်စုံကို၀တ်ထားပြီး ဒေါက်ဖိနပ်အနီရောင် ခပ်မြင့်မြင့်ကိုလည်း ၀တ်ထားသေးကာ ယောက်ျားကြီးတစ်ယောက်မှ ပွေ့ချီထားသည့်ပုံဖြစ်လေသည်။ 


ဟန်ချင်စုန့်က သားရေဖိနပ်ကိုယူကာ ကြည့်ပြီးနောက်တွင် လင်းလန်၏ခြေထောက်နှင့် တိုင်းကြည့်နေလေ၏။ သူ့အထင်တွင် ဒေါက်ဖိနပ်များက သူမနှင့် မလိုက်သလိုပင် ။


ဓာတ်ပုံထဲကနှင့်တူသော်လည်း သူ့မိန်းမအတွက်တော့ မလိုက်ဖက်သဖြင့် မျက်မှောင်ကြုံ့ကာ ဘေးတွင်ချထားလိုက်သည်။ တရုတ်နှစ်ကူးကြမှပဲ ပိုပြီးလှလှပပရှိတဲ့ ဖိနပ်တစ်ရံလောက် ၀ယ်ပေးရမယ် ။


လင်းလန် ဟန်ချင်စုန့်ကိုကြည့်ကာ မျက်မှောင်ကြုတ်မနေစေရန် မေးကိုကိုင်၍ ချော့လိုက်သည်။ 


ထို့နောက် မိုင်ဆွေ့ကို ပြောလိုက်သည်။


 " အစ်မလေးမိုင်ရေ ဒီဖိနပ်တွေကို စမ်း၀တ်ကြည့်ပါလား နှစ်သစ်ကူးပြီးရင် ၀တ်လို့ရလောက်ပြီလို့ မားမားတော့ ထင်တာပဲ "


မိုင်ဆွေ့ : " မားမား သမီး၀တ်ရမှာလား "


လင်းလန် ခေါင်းညိတ်ပြလိုက်သည်။ " ၀တ်ကြည့်လေ ၀တ်ကြည့်တာ မမှားပါဘူး "


ယခုကဲ့သို့စတ်ိုင်နှင့် ဖိနပ်များက ၁၉၈၀ ၊ ၁၉၉၀ ခုနှစ်များတွင် တရုတ်ပြည်၌ ခေတ်စားလာခဲ့လေသည်။ 


မိုင်ဆွေ့က ငယ်ဟန်လေးလည်း ရှိသေးကာ ရုပ်ရည်ကလည်း ကြည့်ကောင်းသူဖြစ်၍ ဘယ်လိုစတိုင်မျိုးနှင့်မဆို လိုက်ဖက်သည်ဟုဆိုရပေမည် ။ 


မိုင်ဆွေ့က သဘောကျသော်လည်း အိမ်တွင်သာ ၀တ်နိုင်လေသည်။ ယခုအချိိန်တွင် အပြင်၌ထုတ်၀တ်ဖို့က မသင့်လျော်သေးပေ ။


ရှောင်၀မ် : " မမ အဲ့ဒီ့ ဖိနပ်တွေကို ၀တ်ထားရင် မြင်းခွာကြီးနဲ့ တူသလိုပဲ "


မိုင်ဆွေ့ : ... နင်တစ်ယောက်ပဲ အဲ့လိုပြောတာ ။


တ၀မ်က စန်း၀မ်ကိုကြည့်ကာ မေးသည်။ " ငါ့အတွက်ရော ဘယ်မှာလဲ "


စန်း၀မ်က တ၀မ်အား အံ့သြတကြီးပြန်ကြည့်သည်။ " အစ်ကိုကြီးနဲ့အဖေက ဒီလိုအပေါ်ယံလက်ဆောင်တွေကို မယူလောက်ဘူးလို့ ထင်ထားတာ "


မိုင်ဆွေ့ ၊ အား၀မ်နှင့် ရှောင်၀မ်က ထရယ်ကြတော့သည်။ 


စန်း၀မ်က ကြိတ်ပြုံးနေပြီး လင်းလန်အား " မားမား နောက်လကြမှ လစာပြန်ပေးမယ်နော် " ဟုဆိုသည်။ ဘာပဲဖြစ်ဖြစ် သူတို့မိသားစုက ငတ်ပြတ်နေကြတာမှ မဟုတ်တာ ။ နောင်ကြရင်လည်း မိဘများနှင့် မောင်နှမများအတွင် လက်ဆောင်များကို ပို၀ယ်ပေးရုံသာရှိသည် ။


သူ့အဖေနဲ့အမေနှစ်ယောက်လုံးကလည်း အလုပ်ကိုယ်စီနဲ့ပဲဟာ ။ 


လင်းလန် စန်း၀မ်၏နဖူးအား လက်ညှိုးဖြင့် ခပ်ဖွဖွ တွန်းလိုက်သည်။


 " နောင်ကြ ခရီးသွားရင် မားမားတို့ဖို့ အများကြီး ပြန်၀ယ်မလာခဲ့နဲ့ နေရာတိုင်းမှာသာ ဓာတ်ပုံတွေ ရိုက်လာခဲ့ "


လင်းလန် အိတ်ထဲမှ အဖြူအမည်း ဓာတ်ပုံအချို့နှင့် အရောင်ပါဓာတ်ပုံအချို့ကို ထုတ်လိုက်သည်။ စန်း၀မ်တစ်ယောက်တည်း၏ပုံများပါသလို အသင်းဖော်များနှင့် အတူတွဲရိုက်ထားသည့်ဓာတ်ပုံများလည်း ပါလေသည်။ 


ဒုတိယသမ္မတထန်နှင့် လက်ဆွဲနှုတ်ဆက်နေသည့်ပုံပင် ပါသေးလေသည်။ 


လင်းလန်မှာ အကြည့်ပင် မခွာနိုင်ချေ ။ စန်း၀မ်က တကယ်တော်တာပဲ ။


တကယ်တွင် စန်း၀မ်ကမူ ဘာအတွေးမှ များများစားစား မရှိချေ ။ ပြောရရင် သူနှင့်လက်ဆွဲနှုတ်ဆက်သူက ဘယ်သူမှန်းတောင် သူ မသိပေ ။ ခေါင်းဆောင်ကျောက်ကဲ့သို့သောလူဟုသာ ထင်နေတာဖြစ်ပြီး ဂုဏ်ပြုညစာစားပွဲသည် သူ့အတွက်တော့ စားဖ်ို့ကသာ အဓိကဖြစ်ခဲ့သည်ကိုး ။


လင်းလန်က ဟန်ချင်စုန့်အား ဓာတ်ပုံကိုပြပြီးနောက်တွင် သိမ်းထားလေသည် ။ အပြင်မှာချိတ်ထားလို့ မတော်လို့ အခိုးခံရရင် ဘယ်လိုလုပ်မလဲ ။


အရောင်ပါဓာတ်ပုံများကို ကြည့်လိုက်သည့်အခါတွင် ဘာဘီရုပ်လေးလိုလှသော အနက်ရောင်ဆံပင်များနှင့် နှင်းလိုဖြူစွတ်နေကာ မျက်လုံး၀ိုင်း၀ိုင်းနှင့် ကောင်မလေးကို လင်းလန် တွေ့လိုက်ရသည်။ 


ထိုတစ်ယောက်က မက်တီဆိုသူပဲ ဖြစ်လောက်သည်။ 


ထို့နောက် ကင်မရာကိုင်ထားကာ စန်း၀မ်ကို ပုခုံးဖက်ထားသော မျက်လုံးပြာပြာ ရွှေရောင်ဆံပင်နှင့်ကောင်လေးကို တွေ့လိုက်ရပြန်သည်။ နှစ်ယောက်လုံးက အားပါးတရ ရယ်နေကြ၍ ကြည့်မိသူများကို ပြုံးသွားစေသည်။ 


မိုင်ဆွေ့ ၊ အား၀မ်နှင့် ရှောင်၀မ်ကလည်း ဓာတ်ပုံများကို လာ၀ိုင်းကြည့်သည်။ 


" သူတို့ဓာတ်ပုံတွေက အရောင်ပါတယ်လား " ကလေးများက ပြောသည်။ " သမီးတို့မှာကြ မပါဘူး "


လင်းလန် : " မားမားတို့မှာလည်း ရှိလာတော့မှာပါ "


အာရှအဆင့်ပြိုင်ပွဲ၌ စန်း၀မ် အနိုင်ရသည့်ပုံများလည်းပါသည်။ ရေကူးကန်တွင် ရိုက်ထားသောပုံများ ၊ အသင်းဖော်များနှင့် ရိုက်ထားသောပုံများ ... ဟင်နရီက စန်း၀မ်အား ဓာတ်ပုံအများကြီး ရိုက်ပေးခဲ့သည့်ပုံပင် ။


လင်းလန် ဟန်ချင်စုန့်ကို မော့ကြည့်လိုက်သည့်အခါ ဟန်ချင်စုန့်ကလည်း သူမကို ငုံ့ကြည့်လာသည်။


 လင်းလန် ပြုံးလိုက်မိသည်။ 


" စန်းကော နောက်ထပ် ဓာတ်ပုံဘောင်နှစ်ခုလောက် ထပ်လုပ်ရအောင် ကြည့်ကောင်တဲ့ပုံလေးတွေကို ဘောင်သွင်းထားရအောင်လေ "


အထူးသဖြင့် စန်း၀မ်က ရွှေတံဆိပ်ကိုကိုင်ထားသည့်ပုံက အတော်လေး ကြည့်ကောင်းပေသည်။ 


Xxxx

Part 862


မိသားစုပြန်ဆုံကြသည်မှာ စိတ်လှုပ်ရှားစရာ ကောင်းလွန်သဖြင့် နှစ်သစ်ကူးညထက်ပင်ပို၍ တက်ကြွနေကြပြိး ပြောစရာများမကုန်နိုင်ဖြစ်နေကြသည်။ 


ကလေးများအတွက် ဤသို့ပျော်ရသည်မှာ ရှားသဖြင့် လင်းလန်လည်း အိပ်ခိုင်းဖို့ကို လောမနေပေ။ မနက်ဖြန်က ဆောင်းဦးလယ်ပွဲတော်နေ့ဖြစ်သဖြင့် ကျောင်းများလည်း ပိတ်သည်ကိုး။


စန်း၀မ်က တ၀မ်ကိုပြောသည်။ " အစ်ကိုကြီး ဒီည တူတူအိပ်ရအောင် "


တစ်ယောက်တည်းအိပ်ရတာ ဘယ်လောက်ပျင်းဖို့ကောင်းလိုက်သလဲ ၊ နံရကိုကန်မိလိုက် ခုတင်ပေါ်က ပြုတ်ကျလိုက်နဲ့ ။


တ၀မ်က စန်း၀မ်ကို ပြန်ကြည့်လာသော်လည်း ဘာတစ်ခွန်းမှမဆိုပေ ။ သူ့မျက်နှာထက်တွင် ` ငါ မင်းနဲ့ စကားမပြောချင်ဘူး ´ ဟုရေးထားသလို ဖြစ်နေလေ၏။


ရှောင်၀မ်က ရယ်နေလေသည်။ စန်း၀မ်က အားလုံးအတွက် လက်ဆောင်များ၀ယ်လာပြီး အစ်ကိုကြီးအတွက် ၀ယ်မလာတာ မဖြစ်နိုင်ပါ။ အစ်ကိုကြီးက ဘာမှမပြောတာ စိတ်မကောင်းဖြစ်နေလို့ပဲ ဖြစ်ရမယ် ။


သို့သော်လည်း စန်း၀မ်က အစ်ကိုကြီးအတွက် လက်ဆောင်၀ယ်လာသည်ကို မိုင်ဆွေ့နှင့်အား၀မ်က သိကြသော်လည် တ၀မ်ကို တမင်စနေကြတာဖြစ်သည်။ 


တ၀မ်ကလည်း စန်း၀မ် သူ့အတွက် လက်ဆောင်၀ယ်လာမည်ကိုသိသည်။ သို့သော်လည်း ထိုကလေးက တမင်သူ့ကို မပြောဘဲ နေနေမှတော့ သူလည်း အလျင်လိုနေစရာအကြောင်းမရှိပေ ။ 


အဆုံးတွင် စန်း၀မ်ကသာ အလျင်လိုလာပြီး တ၀မ်ကို မကြာမကြာလှမ်းကြည့်နေလေ၏။


 " အစ်ကိုကြီး သား အစ်ကိုကြီးဖို့ ဘာမှ၀ယ်မလာတာကို ဘာလို့ စိတ်မဆိုးတာလဲ ဘာလို့ ဘာမှမမေးတာလဲ "


တ၀မ်က ပြန်မဖြေ ။


အဆုံးတွင် စန်း၀မ်က မနေနိုင်တော့ဘဲ ကျောပိုးအိတ်ထဲ၌ အ၀တ်ပတ်ထားသောအရာကို ထုတ်လိုက်ပြီး တ၀မ်လက်ထဲသို့ ထည့်ပေးလာသည်။


 " အစ်ကိုကြီး သား ပေးပြီးပြီးနော် စိတ်မဆိုးနဲ့တော့ "


စန်း၀မ်က မျက်နှာငယ်လေးဖြစ်နေသဖြင့် တ၀မ်က ပေါက်ကရတွေ ပြောမနေနဲ့ဟု ပြန်ဖြေလေသည် ။ 


တ၀မ် အ၀တ်ကိုဖယ်ကြည့်လိုက်သည့်အခါတွင် အံ့သြတကြီးဖြင့် တောင့်တင်းသွားမိသည်။ 


လင်းလန်နှင့်စကားပြောနေခဲ့သော ဟန်ချင်စုန့်၏အကြည့်များကလည်း ထိုနေရာသို့ ရောက်လာလေသည်။ တ၀မ်က လက်ထဲတွင် အနက်ရောင် နွားသားရေဓားမြှောင်ကို ကိုင်ထားလေသည်။ မတိုင်ပင်ထားကြပါဘဲ အားလုံးငြိမ်ကျသွားမိကြ၏။ 


စန်း၀မ် အစ်ကိုကြီးနှင့်အဖေဖြစ်သူ၏ အမူအရာများကိုကြည့်ကာ ကျေနပ်သွားသည်။ 


" ဟင်နရီက သားကို၀ယ်ပေးလိုက်တာ ပိုက်ဆံလည်း သူပဲရှင်းပေးတာ တရုတ်ကိုလာလည်ရင် သားလည်း သူ့ကို ထမင်းဖိတ်ကျွေးရမယ် "


တ၀မ်က တွေဝေနေကာ ဓားကိုဘယ်လက်ဖြင့် ကိုင်ထားသည်။ ဓားသည် သူ့လက်သီးဆုပ်အရွယ်သာရှိပြီး ညာလက်က ဓားရိုးကိုကိုင်ထားလိုက်သည်။ လက်မဖြင့် ခလုတ်လေးကိုနှိပ်လိုက်သည့်အခါတွင် ဓားအိမ်ကပွင့်သွားပြီး ဓားသွားက တဖြည်းဖြည်းချင်း ထွက်လာလေ၏။ 


မီးရောင်မှိန်မှိန်အောက်တွင် ဓား၏အလင်းရောင်က ရောင်ပြန်ဟပ်နေလေသည်။ ကလစ်ခနဲမြည်သွားပြီးနောက်တွင် ဓားသွားတစ်ခုလုံး ထွက်လာသဖြင့် လင်းလန် ရှောင်၀မ် ထိခိုက်သွားမည်စိုး၍ နောက်သို့ဆွဲလိုက်မိသည်။ 


တ၀မ်၏မျက်၀န်းများထဲ၌ ဓား၏အရိပ်ကိုမြင်နေရပြီး သူ့အကြည့်များက သာမန်အချိန်များလို ငြိမ်သက်နေခြင်းမရှိဘဲ စူးရှိလို့နေသည်။


တ၀မ် လက်ကောက်၀တ်ကိုလှည့်၍ ဓားကိုလှည့်လိုက်သည့်အခါ အလင်းရောင်များက ရေလှိုင်းလေးများထလာသည့်နှယ် ရောင်ပြန်ဟပ်သွားလေသည်။ လက်ချောင်းလေးများကို အနည်းငယ်လှုပ်လိုက်ရုံနှင့် ဓားသွားက ဓားအိမ်ထဲသို့ချက်ချင်းပြန်၀င်သွားတော့သည်။


ညီငယ်လေးများနှင့် မိုင်ဆွေ့မှာ ပါးစပ်အဟောင်းသားဖြင့် ကြည့်နေကြသည်။ " ၀ါးးး အစ်ကိုကြီးက ဓားကိုင်တာ တော်လိုက်တာ "


ဟန်ချင်စုန့်က မျက်စိနောက်သည်ဟုထင်ပြီး မျက်မှောင်ကြုတ်ကာ ကြည့်နေလေ၏။ 


တ၀မ်က ဓားမြှောင်ကို ဟန်ချင်စုန့်ထံ ကမ်းပေးလိုက်သည်။ 


" အဖေ "


ဟန်ချင်စုန့်က မယူ ။ " မင်းညီက မင်းကိုပေးတာပဲဟာ ကိုယ့်ဘာသာ ယူထားလေ "


စန်း၀မ် : " အဖေ အဖေ့ကို သားနောက်မှပေးမယ်  "


" ဟင့်အင်း အဖေ့ဖို့ မလိုဘူး " ဟန်ချင်စုန့်က လက်မခံ ။ သူက ပြည်သူ့လုံခြုံရေးဗျုရိုမှဖြစ်၍ သူ့ကိုပေးထားသော ရဲတပ်ဖွဲ့သုံးဓားမြှောင်များ ရှိလေသည်။


နွားသားရေဓားမြှောင်၏လက်ကိုင်၌ ရွှေချည်စလေးများပါနေသည်ကို ဟန်ချင်စုန့် တစ်ချက်ကြည့်ရုံဖြင့် ပြောနိုင်သည်။ ဓားရိုးအား ကြံ့ချိုဖြင့်ပတ်ထားပြီး အထဲမှသစ်ကလည်း အဖိုးတန်သည့်သစ် ဖြစ်လောက်ပေသည်။ ဓားမြှောင်အဆုံး၌လည်း စိမ်းပြာရောင်ကျောက်လေးများကို ထည့်ထားသေးပြီး ဓားသွားကတိုသော်လည်း အတော်လေးထက်သည်။ လူချမ်းသာများကိုင်သည့် အမျိုးအစားဖြစ်သည်ကို ပြောနေဖို့ပင် မလိုချေ။ သာမန်ဓားများထက် တန်ဖိုးကြီးမှာ အသေအချာပင် ။ 


လင်းလန် မှတ်ဉာဏ်များကြားတွင် ရှာကြည့်လိုက်သည်။ အီရတ် - ပါရှား - ဒမတ်စကပ်ဆိုတော့ ဒါက ဒမတ်စကပ်ကဓားများလား ။


အဲ့လိုသာဆို စန်း၀မ် လွယ်လွယ်ရလာခြင်း မဖြစ်နိုင်ပေ ။ 


လင်းလန် တ၀မ်ကို ပြောလိုက်သည်။ " ညီလေးက ပထမဆုံးပေးတဲ့လက်ဆောင်ဆိုတော့ သေချာသိမ်းထားလိုက်လေ "


တ၀မ်က သေချာထိန်းသိမ်းထားမည်ကို သူမ သေချာသိသည်။ 


တ၀မ်က လက်မြှောက်ကာ စန်း၀မ်အား ခေါင်းပွတ်ပေးမည်ပြုပြီးမှ ပုခုံးကိုသာ ပုတ်ပေးလေသည်။


 " ငါ အရမ်း သဘောကျတယ် "


စန်း၀မ်က အလွန်ပျော်သွားလေ၏။ " အစ်ကိုကြီးကြိုက်မယ်ဆိုတာ သား သိသားပဲ "


မိုင်ဆွေ့က အဖေပေးတဲ့ဓားကို အစ်ကိုကြီးက အရမ်းကြိုက်နေတယ်ဟု စာထဲတွင် ရေးပေးခဲ့ဖူးလေသည်။ ဟင်နရီနှင့် အတူသွားနေစဥ်တွင် အိတ်ဆောင်ဓားလေးများကိုရောင်းနေသည့် ဆိုင်ဟောင်းတစ်ဆိုင်ကိုတွေ့ခဲ့သဖြင့် စန်း၀မ် အစ်ကိုကြီးဖို့ ၀င်၀ယ်ခဲ့တာဖြစ်သည်။


ဒီဓားသေးသေးလေးကို အထင်တော့မသေးလိုက်လေနဲ့ ၊ အတော်လေးကို ထက်တာဖြစ်သည်။ 


အစ်ကိုကြီးက အရမ်းသဘောကျတယ်ဆိုမှတော့ ပေးခဲ့ရသည့်ငွေကြေးက တန်သည်ဟု စန်း၀မ်ထင်သည်။


အိပ်ချိန်ရောက်သည့်အခါတွင် ကလေးများက ယခင်ကအတိုင်းပင် အိပ်ကြလေသည်။ စန်း၀မ်၏ ယခင်ကအကျင့်များက မပျောက်သေးဘဲ တ၀မ်ကို ကန်လိုက်ဖက်လိုက် လုပ်နေလေ၏။ တ၀မ်ကလည်း တင်းတင်းကြပ်ကြပ် အဖက်ခံရပါက အသက်ရှူမ၀သဖြင့် ပြန်တွန်းထုတ်သည်။ 


လင်းလန် အိပ်ရာ၀င်မည်လုပ်ချိန်တွင် ညဆယ့်တစ်နာရီပင် ရှိနေပြီဖြစ်သည်။ သို့သော်လည်း ခေါင်းဆောင်ဟန်က ဆောင်းဦးလယ်ပွဲတော်နေ့၌ အလုပ်မသွားဘဲ သူမနှင့်ကလေးများနှင့်သာ ဆင်နွှဲမှာဖြစ်ကြောင်း ပြောလာလေ၏။ 


သို့ဖြစ်ပါသောကြောင့် .....


နောက်နေ့နံနက်၌ ဟန်ချင်စုန့်သည် မထချင်ပေ ၊ မ​နေ့ညက အိပ်တာ နောက်ကျခဲ့၍ဖြစ်သည်။ သို့သော်လည်း ဆယ်စုနှစ်ကျော်ကြာ ကျင့်သားရနေခဲ့သော မျက်စိများက သူ့အလိုကိုမလိုက်သဖြင့် အရုဏ်ဦးတွင်နိုးလာကာ လေ့ကျင့်ခန်းလုပ်လိုက်ရသည်။ 


အသံကြားသဖြင့် နိုးလာသည့် တ၀မ်ကလည်း စန်း၀မ်ကို ကန်ကာနှိုးသည်။ " ပြေးရအောင် ထတော့ "


စန်း၀မ် ညည်းတွားလိုက်မိသည်။ သူ့အဖေက နည်းပြထက်တောင် ဆိုးတာပဲ။ သို့သော်လည်း အိမ်ပြန်ရောက်လာလျှင် မလုပ်လို့မရသည်ကို သူ သိသည်။ 


မိုင်ဆွေ့နှင့် ရှောင်၀မ်သည်ပင် ခြွင်းချက်မရှိဘဲ စောစောထကာ မနက်ခင်း လေ့ကျင့်ခန်းလုပ်ကြရသည်။ 


စန်း၀မ် ယခုကဲ့သို့ လုပ်ရသည်ကို လွမ်းနေခဲ့တာဖြစ်၍ အကျယ်ကြီးအော်ကာ လေ့ကျင့်ခန်းလုပ်နေမိသည်။


ပြေးတယ် ၊ အိပ်ထမ,တင်လုပ်တယ် ၊ ခုန်တယ် ၊ အစရှိသည်များပြီးသည့်အခါ ကိုယ်ခံပညာအတွက် လေ့ကျင့်ရမည့်အလှည့် ရောက်လာသည်။ 


မိုင်ဆွေ့နှင့်အား၀မ်က ယခုဆိုလျှင် တ၀မ်ထံမှ ရိုးရိုးတိုက်ကွက်များကို သင်ထားပြီးပြီဖြစ်သည်။ အား၀မ်က တ၀မ်လောက်အထိ တတ်မြောက်ခြင်းမရှိပေ။ မိုင်ဆွေ့ တတ်ထားသည်များက ပို၍ပင်ရိုးရှင်းလေသည်။ မိုင်ဆွေ့အား တစ်ကွက်ဆိုလျှင်တစ်ကွက်ကိုသာ အခေါက်ခေါက်အခါခါ သင်ပေးပြီး ပြန်လေ့ကျင့်စေသည်။

Prev Next