အခန်း(၉၁)အိမ်ထောင်စုခွဲခြင်းဟာအကြံကောင်းဖြစ်သည်
Viewers 43k
Chapters 702

အခန်း (၉၁) - အိမ်ထောင်စုခွဲခြင်းဟာ အကြံကောင်းဖြစ်သည်


"မန်ထိုကြော်ကို စားချင်တာ၊ သူတို့က တကယ်စားကောင်းမှာပဲ။"


ကလေးတွေက ပျော်ရွှင်စွာဖြင့် ဟိုဟိုဒီဒီ စကားတွေ ပြောဆိုနေကြတာကို လူကြီးတွေက ကြားနေရသည်။ ဒုတိယမရီးက မနေနိုင်ပဲ ဝေဝေဝါးဝါး တီးတိုးရေရွတ်သည်။


အမေကျိုးသည် သူ့ချွေးမရဲ့ မကျေမနပ်ဖြစ်နေတာကို အရေးအရာမလုပ်ဖို့ ဆုံးဖြတ်လိုက်သည်။ အိမ်ထောင်စု ခွဲပြီးတာနဲ့ သူမ ဘာကိုမှ ထိန်းချုပ်ဖို့ အစီအစဥ် မရှိတော့ဘူး။


အကြီးဆုံးမရီးသည် သူတို့အိမ်ထောင်စု ခွဲပြီးတာနဲ့ တစ်ရက်လောက် သူ့ကလေးတွေအတွက် ဘယ်လို အရသာရှိတာတွေ လုပ်ပေးရင် ကောင်းမလဲလို့ စဥ်းစားနေခဲ့သည်။


အိမ်၌ လင်းချင်းဟယ်သည် ကျိုးအိမ်တော်ဟောင်းမှာ တတိယမရီးက အိမ်စောင့်ကျန်နေခဲ့တာကို သိသည်။ တတိယမရီးသည် အိမ်မှာ လုပ်စရာရှိတာတွေ လုပ်ပြီးတာနဲ့ လင်းချင်းဟယ်တို့အိမ်ဖက်သို့ ကူးလာခဲ့သည်။


ဝူနီက နုန်းချိနေပြီး သိပ်မသက်သာသေးပေမယ့် သူမရဲ့ အခြေအနေက အရင်ညကထက်စာရင် ပိုကောင်းလာပါပြီ။


အရာအားလုံး အဆင်ပြေကြောင်း သေချာပြီးနောက် သူမသည် တတိယမရီးနှင့် စကားစမြည်ပြောဆိုခဲ့ပြီး လောင်စန်းလေးသည် တတိယမရီး အိမ်ဖက်သို့ ပြန်သွားသောအခါ နောက်မှ လိုက်ပါသွားခဲ့သည်။ လောင်စန်းလေးသည် ကျိုးတုန်တုန်၊ အကြီးဆုံးမရီးရဲ့ သားအငယ်ဆုံးလေး ထုသို့တို့နှင့် ကစားချင်နေသည်။ သူလေးက နာမည်ရင်း မရှိသေးပါဘူး၊ အခုလောလောဆယ် သူ့ရဲ့ အိမ်နာမည်ကတော့ ထုသို့ပင် ဖြစ်သည်။


လောင်တနှင့် လောင်အာ့တို့ဟာ မကြွားဝါတော့ပေ။ သူတို့ ညီအစ်ကိုတွေက နေ့လည်စာအတွက် ဘာဟင်းလဲလို့ မေးတဲ့အခါက လင်းချင်းဟယ်က မန်ထိုကြော် စားရမယ်လို့ ကတိပေးခဲ့သည်။


လင်းချင်းဟယ်သည် မန်ထိုကို အပိုင်းလေးတွေ လှီးဖြတ်ကာ ကြော်လိုက်ပြီး ဆားနှင့် နှမ်း‌စေ့များဖြင့် ရောစပ်ထား‌သော ကြက်ဥအနှစ်ရည်ကို လောင်းထည့်ကာ နှစ်ဖက်စလုံးကို အညိုရောင် သမ်းလာသည့်အထိ ကြော်လိုက်သည်။ အရသာကတော့ အံ့မခန်းပါပဲ။


လင်းချင်းဟယ်သည် အများကြီး ပြုလုပ်ခဲ့ပြီး သူမ ဝယ်ယူလာခဲ့သော မြေပဲဆီကို အသုံးပြုခဲ့သည်။


ပုံမှန်အားဖြင့် ဝက်ဆီကိုသာ အသုံးပြုသည့်အတွက် အချိန်အတော်ကြာပြီ ဖြစ်သော်လည်း သူမ ဝယ်ယူလာခဲ့သော မြေပဲဆီ ငါးပုံးမှ တစ်ပုံးသာ အသုံးပြုရသေးသည်။ ဒါ့ကြောင့် သူမမှာ မြေပဲဆီ လေးစည် ကျန်သေးသည်။


ထို့ကြောင့် သူမသည် လက်ဖွာစွာဖြင့် မန်ထိုကြော်အတွက် ဒီဆီကို အသုံးပြုခဲ့သည်။

မန်ထိုကြော်အပြင် မတ်ပဲစွပ်ပြုတ်ကိုပါ ပြင်ဆင်ခဲ့သည်။ ဒီတစ်ခါ ပဲစွပ်ပြုတ်တွင် သကြားလုံးဝ မပါဝင်ပဲ ပဲသီးသန့်သာ ပါဝင်ပြီး ဒါက မန်ထိုကြော်နှင့် တည်ခင်းစားသောက်ဖို့ အကောင်းမွန်ဆုံး တွဲဖက်မှုပင် ဖြစ်သည်။


ဒါက တစ်မိသားစုလုံး စားသောက်ဖို့အတွက် လုံလောက်တယ်လို့ ယူဆရတဲ့အတွက် လင်းချင်းဟယ်ဟာ အပူသက်သာစေရန် အထူးအသုံးပြုဖို့ လန်းဆန်းစေသော စွပ်ပြုတ်ကို ပြုလုပ်ရန် ပဲတီစိမ်းများကို စတင်ပြုတ်ခဲ့သည်။


နေ့လယ်စာ သွားပို့သောအခါတွင် ကျိုးမိသားစုရဲ့ နေ့လည်စာများကိုပါ တတိယမရီးထံမှ သွားယူပြီး ပို့ပေးခဲ့သည်။


သူမသည် နေ့လည်စာပို့ရန် သွားသောအခါတွင် လောင်စန်းကို မခေါ်လာခဲ့ပဲ ကျိုးအိမ်တော်ဟောင်းတွင် တတိယမရီး ကလေးထိန်းဖို့ ထားရစ်ခဲ့သည်။


ဒါပေါ့၊ သူမသည် လောင်စန်း၊ ဝူနီနှင့် ကျိုးတုန်တုန်တို့အတွက် မန်ထိုကြော်နှင့် မတ်ပဲစွပ်ပြုတ်ကိုပါ ချန်ထားခဲ့သည်။


ဒီနေ့ရာသီဥတုက အလွန်ပူအိုက်ပြီး တောက်လောင်လုမတတ်ပင်။ လင်းချင်းဟယ်က ထမင်းလာပို့သည့် အချိန်မှာပင် ဒီအပူဒဏ်ကို မခံစားနိုင်သောကြောင့် သူမသာ လယ်ထဲသို့ အလုပ်ဆင်းရင် ဘယ်လောက်တောင် ခံစားနေရမလဲ၊ ဒီအကြောင်းကို စဥ်းတောင် မစဥ်းစားသင့်ဘူး။ သူမ ဒါကို လုံးဝလက်မခံနိုင်ဘူး။


ထို့ကြောင့် ကျိုးချင်းပိုင်ကို လင်းချင်းဟယ်သည် အလွန်ဂရုစိုက်ပေးခဲ့သည်။


"ကျွန်မအမြင်အရ ဒီမန်ထိုကြော်ကို ပဲတီစိမ်းစွပ်ပြုတ်နဲ့ တွဲဖက်စားသုံးရင် ခန္ဓာကိုယ်ထဲက အပူတွေကို အလွယ်တကူ ထုတ်ပေးနိုင်တာကြောင့် ဒီဆေးဖက်ဝင် ရေနွေးကြမ်းကို ရှင်တို့သားအဖတွေအတွက် အထူးပြင်ဆင်ထားတယ်။ ဒါကို သောက်ဖို့ သတိရရမယ်နော်၊ ဟုတ်ပြီလား။" လင်းချင်းဟယ် ပြောသည်။


သူမ ဘယ်လောက်တောင် အလေးအနက် ထားလွန်းနေလဲ ဆိုတာကို မြင်ပြီး ကျိုးချင်းပိုင်ရဲ့ မျက်လုံးတွေက နူးညံ့သွားကာ "များများစား" လို့ ပြောလိုက်သည်။


"ကျွန်မ အိမ်မှာ စားလာခဲ့တယ်။" လင်းချင်းဟယ်သည် သူမလက်ကို ဝှေ့ယမ်းလိုက်သည်။ 


သို့ရာတွင် ကျိုးချင်းပိုင်က သူမကို စိုက်ကြည့်နေသောကြောင့် သူမ နောက်ထပ်တစ်ခုကို ယူစားလိုက်ရသည်။


လောင်တနှင့် လောင်အာ့တို့ကတော့ ဗိုက်ဝသွားကြပြီ။


မန်ထိုကြော်တွေကို နှမ်းနက်စေ့နှင့် ကြက်ဥတို့ဖြင့် ရောစပ်ကာ နှစ်ဖက်စလုံးက ရွှေညိုရောင် သမ်းနေခဲ့သည်။ အငံနည်းနည်းကဲကာ ကြွပ်ရွသောကြောင့် ပဲတီစိမ်းစွပ်ပြုတ်နှင့် တွဲဖက်စားသုံးသောအခါ အရမ်း အရသာရှိလှသည်။


လင်းချင်းဟယ်သည် ကျိုးအိမ်တော်ဟောင်းအတွက် နေ့လည်စာကို ယူလာပေးခဲ့ပေမယ့် သူမက ထိုနေ့လည်စာတွေကို အကြီးဆုံးမရီး လက်ထဲသို့ ထည့်ပြီး ထပ်မံ ဂရုစိုက်ခြင်း မရှိတော့ပေ။


ဘေးနားမှ ဒုတိယမရီးဖြစ်သူသည် မျှော်လင့်ထားသည့်အတိုင်း မန်ထိုကြော်တွေကို ကြည့်နေခဲ့သည်။ သူမသည် တတိယမရီး ထည့်ပေးလိုက်သော ပန်ကိတ်တွေကို စားနေရင်း စကားဆိုလိုက်သည်။ "ပြီးတော့ အဲ့တာက ကြက်ဥတွေနဲ့ နှမ်းစေ့ပါ ဖုံးအုပ်ထားတယ်။"


အနီးအနားက လေထုထဲသို့ ထိုမန်ထိုကြော်တွေရဲ့ စားချင်စဖွယ် ကောင်းသော အနံ့တွေက လေသင့်ရာအတိုင်း ပျံ့နှံ့နေခဲ့သည်။


"ဘယ်လို ဇိမ်ခံရမလဲ ဆိုတာကို တကယ်သိတာပဲ။" ဒုတိယအစ်ကိုသည် ပန်ကိတ်ကို ကိုက်ဝါးရင်း တီးတိုးဆိုသည်။


ဒီနေ့ ပန်ကိတ်က အရင်ကထက် နှစ်ဆလောက် ပိုကြီးပြီး အတော်လေး ကောင်းမွန်သည်။ 

ဒါပေမယ့် စတုတ္ထလေးတို့ မိသားစုရဲ့ မန်ထိုကြော်နှင့် နှိုင်းယှဥ်လျှင် လုံးဝ မယှဥ်သာပေ။


အကြီးဆုံးအစ်ကိုသည် သူ့ခေါင်းကို ခါရင်း ပြောသည်။ "သူတို့က ဘယ်လိုလုပ်ပြီး ဒီလိုနေထိုင်နိုင်တာလဲ။" ဒီလိုမျိုး စားသောက်ရင် ပစ္စည်းတွေ ဘယ်လောက် လိုအပ်မလဲ။

အကြီးဆုံးမရီးက တွေးကြည့်ရင်း ပြောလိုက်သည်။ "ဒီလိုမျိုး နေထိုင်စားသောက်တာ ဘာဖြစ်လဲ။ လောင်တ၊ လောင်အာ့နဲ့ လောင်စန်းတို့ကို ကြည့်လိုက်၊ ဘယ်လောက် ထွားကြိုင်းလိုက်လဲ။"


သို့သော်လည်း အကြီးဆုံးမရီးသည် သူမကတော့ ထိုကဲ့သို့မျိုး မသုံးစွဲဝံ့ပေ။


ရံဖန်ရံခါ ကလေးတွေအတွက် ဒီလိုမျိုး ချက်ပြုတ်ပေးတ အဆင်ပြေပေမယ့် နေ့တိုင်း ထိုကဲ့သို့ ချက်ပြုတ်ဖို့ဆိုတာ မဖြစ်နိုင်ဘူး။


အဆုံး၌ စတုတ္ထရဲ့ ဇနီးသည်ကဲ့သို့ ဒုတိယတစ်ယောက်ကို ရှာတွေ့ရန်မှာ မဖြစ်နိုင်ပေ။


အဖေကျိုးက ဘာမှဝင်မပြောပဲ သူက ဒီအကြောင်းကို အရေးမစိုက်ခဲ့ဘူး။


အမေကျိုးက ဒီအကြောင်းကို ကောင်းကောင်း တွေးတောနေပေမယ့် သူမ ဘာမှတော့ ဝင်မပြောတော့ဘူး။ သူတို့က သီးခြား အိမ်ထောင်စုနှစ်စုဖြစ်ပြီး အလွန်အကျွံ ဝင်ရောက်စီမံခန့်ခွဲခြင်းသည် မကောင်းသော အကြံတစ်ခု ဖြစ်သည်။


မကြာသေးမီက အဖေကျိုးသည် သူမအား ဒီအကြောင်းကို ပြောလာခဲ့သောကြောင့် သူမသည် ပွင့်လင်းမြင်သာမှု ရှိလာပြီး ကလေးတွေကို အိမ်ခွဲပေးကာ သူတို့ဘဝကို သူတို့ကိုယ်တိုင် ထုဆစ်ပုံဖော်ခွင့်ပေးဖို့ အဆင်သင့် ဖြစ်နေခဲ့သည်။


ဒါပေမယ့် သူတို့သက်ကြီးရွယ်အိုတွေကို ထောက်ပံ့ပေးဖို့ကတော့ မရှိမဖြစ် လိုအပ်ပါသည်။


လင်းချင်းဟယ်သည် သားအဖတစ်တွေကို နေ့လည်စာ ကျွေးမွေးပြီးနောက် ပြန်သွားရန် ပြင်ဆင်ခဲ့သည်။ သူမသည် သူတို့ကို မသက်မသာ ခံစားခဲ့ရပါက ချက်ချင်း အနားယူဖို့ လုပ်ရမယ်ဟု သူမက ညွှန်ကြားခဲ့သည်။


သူမသည် ကျိုးချင်းပိုင်အတွက် အရေးပေါ် လိုအပ်ပါက အသုံးပြုရန် ဆေးနှစ်ပြားကိုလည်း ထားရစ့်ခဲသည်။


ဆောင်းစပါး ရိတ်သိမ်းသည့် နေ့ရက်တွေက ပျားပန်းခပ်မျှ လှုပ်ရှားသက်ဝင်နေပြီး ဒီနှစ်မှာတော့ စပါးအထွက် ကောင်းမွန်သောကြောင့် တော်တော်လေး အလုပ်များနေပေမယ့် ဒီနှစ် ရိက္ခာဝေချိန်မှာ ဝေစုများများ ရရှိမည်မှန်းကို သိတဲ့အတွက် လူတိုင်းရဲ့ မျက်နှာပေါ်မှာ ဖြူစင်ရိုးရှင်းတဲ့ ပျော်ရွှင်မှုမျိုးတွေကို မြင်တွေ့ရပါသည်။


လျှပ်တပြတ်အတွင်းမှာပင် အောက်တိုဘာ လကုန်သို့ ရောက်ရှိသွားခဲ့ပြီ။


ရိက္ခာ အမြောက်အများ စုဆောင်းရရှိခဲ့သည်။ ရိက္ခာအချို့ကို နိုင်ငံပိုင် ပေးအပ်ပြီးတာနဲ့ ကောက်နှံအချို့ကို ခွဲဝေခဲ့သည်။ စုဆောင်းမှု မပြီးသေးသော အချို့သူတွေက ဆက်လက် အလုပ်ဆင်းကြရသည်။


ဒီအချိန်ကာလမှာ တစ်ရွာလုံး ပျော်ရွှင်မှုများ လွှမ်းခြုံထားခဲ့သည်။


ဒီနှစ်မှာတော့ မိသားစုတိုင်း ရိက္ခာတွေ အများကြီး ခွဲဝေရရှိခဲ့သည်။ စုပေါင်းအလုပ် မလုပ်ကိုင်ခဲ့သော လင်းချင်းဟယ်သည် ကျိုးချင်းပိုင် ပြန်သယ်လာသည့် ရိက္ခာများကိုမြင်ပြီး အတော်လေး ပျော်ရွှင်မိသည်။


"ဒီနှစ်မှာ ကျွန်မတို့ ဝက်နှစ်ကောင်လည်း မွေးမြူထားတော့ စားစရာတွေ အများကြီး ဖလှယ်နိုင်လိမ့်မယ်။" လင်းချင်းဟယ် ပြောသည်။


လင်းချင်းဟယ်သည် သူမတို့အိမ်က ဝက်နှစ်ကောင်ကို အဆီဖြိုး အသားကောင်းဖို့ ကျွေးမွေးရန် အားထုတ်ခဲ့ပြီး အခုအခါ ဝက်အကြီးကြီးလို့ပင် ခေါ်ဆိုလို့ရနိုင်သည်။ သူတို့တစ်ကောင်ကို ပျမ်းမျှ ကျင်းတစ်ရာလောက် ရှိနိုင်သည်။


လင်းချင်းဟယ်က တစ်နေ့လျှင် ဝက်စာမြက်၊ ဖွဲနု၊ ပဲမှော်၊ ပဲဖတ်၊ ပြောင်းဖူး စသည်ဖြင့် အစာပေါင်းများစွာ‌ ကျွေးမွေးခဲ့သည်။ ကောင်းသော အရာများကို ကျွေးမွေးခဲ့တာ ဖြစ်၍ ဘယ်လိုလုပ်ပြီး အသားမတိုးပဲ နေနိုင်မှာလဲ။


ကျိုးချင်းပိုင် ရှင်းပြသည်။ "ဒီနှစ် ကိုယ်တို့ ဝက်ခေါင်း တစ်ခေါင်း ရနိုင်တယ်။"


လင်းချင်းဟယ်က သူ့ကို စိုက်ကြည့်လိုက်သည်။ ဒါက သူ ဝက်ခေါင်း စားချင်တယ်လို့ ဆိုလိုချင်တာလား။


လင်းချင်းဟယ်က ဝက်ခေါင်းသားကို မကြိုက်သော်လည်း ကျိုးချင်းပိုင်က ဒါကို ကြိုက်နှစ်သက်သောကြောင့် ခေါင်းညိတ်ပြီး ပြောလိုက်သည်။ "ကောင်းပြီ၊ ကျွန်မတို့ ဝက်ခေါင်း ရတဲ့အခါကျရင် ကျွန်မ ရှင့်အတွက် ဝက်ခေါင်းနှပ် လုပ်ပေးမယ်။"


ကျိုးချင်းပိုင်က သူမကို ကြည့်လိုက်သည်။


သူနဲ့ အကြည့်ချင်း ဆုံလိုက်တာနဲ့ လင်းချင်းဟယ်ရဲ့ နှလုံးခုန်နှုန်းက အနည်းငယ် မြန်ဆန်လာခဲ့သည်။ 

နေ့အလင်းရောင် ရှိနေသေးတယ်၊ သူ ဘာလုပ်နိုင်မှာလဲ။ ဒါ့ကြောင့် သူမ သူ့ပါးပြင်ကို အနမ်းပေးလိုက်သည်။ သူမ နောက်သို့ ပြန်မဆုတ်မီ ကျိုးချင်းပိုင်က သူမရဲ့ခါးလေးကို ပွေ့ဖက်လိုက်သည်။


လင်းချင်းဟယ်က လေးနက်တဲ့ အကြောင်းအရာကို ပြောဖို့ ချောင်းတစ်ချက် ဆိုးလိုက်သည်။ "အခု ဆောင်းစပါး ရိတ်သိမ်းပြီးတဲ့အခါကျရင် ရှင့်မိဘတွေက ရှင့်အစ်ကိုတွေကို အိမ်ထောင်စု သီးခြားစီ ခွဲနေခွင့်ပြုလိုက်တယ်လို့ အကြီးဆုံးမရီးက ကျွန်မကို ပြောတယ်။"


"အိမ်ထောင်စု သီးခြားစီခွဲတာက အကြံကောင်းတစ်ခုပဲ။" ကျိုးချင်းပိုင် ပြန်ဖြေသည်။


ရွာမှာ တစ်မိသားစုလုံး အတူတကွအတူတကွ စုစည်းနေထိုင်တာက ထုံးစံလို ဖြစ်နေပေမယ့် လူအများကြိး စုဝေးနေကြရတာ ရယ်စရာပါပဲ။ ကျိုးချင်းပိုင်က အိမ်ထောင်စုခွဲပြီး နေထိုင်တာက ပိုကောင်းတယ်လို့ ယုံကြည်ပြီး မိသားစုတိုင်းဟာ ကိုယ်စီဘဝတွေနဲ့ နေထိုင်ကြရပေမည်။


"အဖေနဲ့ အမေက မငယ်တော့ဘူး။ အချိန်ရရင် အဖေတို့၊ အမေတို့ကို ဘယ်လို ထောက်ပံ့ပေးမလဲ ဆိုတာကို ရှင့်အစ်ကိုတွေနဲ့ ဆွေးနွေးလိုက်ဦး။ ထောက်ပံ့ကြေးကို လစဥ်ဖြစ်ဖြစ် ဒါမှမဟုတ် သုံးလတစ်ကြိမ်ဖြစ်ဖြစ် ရှင်တို့ ဆွေးနွေးကြည့်ဦး။" လင်းချင်းဟယ်က သတိပေးသည်။


အမေကျိုးသည် သူတို့ရဲ့ဘဝကို ကိုယ်ပိုင်နည်းလမ်းတွေဖြင့် နေထိုင်စေကာ သူမ ဝင်ရောက်စွက်ဖက်ဖို့ ရည်ရွယ်ချက်မရှိဘူးလို့ ယူဆရသည်။


ချွေးမတစ်ယောက်အနေဖြင့် လင်းချင်းဟယ်သည် ခေါင်းမာနေတာကို ရပ်တန့်လိုက်ပြီး စိတ်လျှော့လိုက်သည်။


အကြီးဆုံးမရီးဖြစ်သူထံမှ ဒီအကြောင်းကို ကြားလိုက်ရကတည်းက ကျိုးချင်းပိုင်နဲ့ ကလေးတွေကို အဖေကျိုးနဲ့ အမေကျိုးထံသို့ အစားအသောက်တွေ သွားရောက်ပေးပို့ခိုင်းလေ့ရှိသည်။

ဖြစ်ခဲ့သမျှ ကိစ္စရပ်တွေကို ပြီးဆုံးသွားပြီလို့ မှတ်ယူလိုက်သည်။

Prev Next