ငါကိုယ်တိုင်အကုန်လုံးကိုဖျက်ဆီးမိနေတာလား
သူ့ခံစားချက်များကိုဖိနှိပ်ထားခဲ့သည်မှာ အတော်လေးကြာမြင့်ခဲ့ပြီ။
မထင်မှတ်ဘဲ ချန်းခယ့်ယောင်အပေါ် သူ့ခံစားချက်များကတစ်ဖက်သက်စိတ်ဝင်စားနေသည်ထက် ကျော်လွန်သွားခဲ့သည်။ သူသည်မရည်ရွယ်ဘဲ လျစ်လျုရှုခြင်း သို့မဟုတ် ရင်ဆိုင်ရန်ရှောင်ဖယ်နေခဲ့လျှင်ပင်သည်အတိုင်း ပျောက်ကွယ်သွားခွင့်မပေးနိုင်ပေ။ အဆိုပါခံစားချက်များက သူ့နှလုံးသားထဲတွင် တဖြည်းဖြည်းကြီးထွားရှင်သန်လာပြီးသူလက်ခံလိုက်ချိန်တွင် ၎င်းကသူ့အတွေးများကိုစိုးမိုးပြီးသားဖြစ်နေခဲ့သည်။
ရုန်ယီသည် ထပ်မထိန်းချုပ်နိုင်တော့သောကြောင့်သူသာထိန်းချုပ်ခံလိုက်၏။
စိတ်လိုက်မာန်ပါလုပ်ခြင်းက အဆုံးသတ်တွင်ဆိုးရွားသည့်အရာများသာဖြစ်စေခဲ့သည်။
ချန်းခယ့်ယောင်နှုတ်ခမ်းများက သူ့မှတ်ဉာဏ်ထဲတွင်နူးညံ့ခဲ့သည်။ သို့သော် အတိတ်နှင့်မတူညီစွာတစ်ကိုယ်လုံးတောင့်ဆတ်နေသည်။
တုံ့ပြန်မှုမရှိသည့်အနမ်း၏သာယာမှုလေးမှာ အမြန်ပျောက်ဆုံးသွားသည်။
ရုန်ယီ အလျင်အမြန်နောက်ဆုတ်လိုက်၏။
တဒင်္ဂအဖြစ်အပျက်လေးတွင် သူချန်းခယ့်ယောင်ကိုကြောက်အောင်လုပ်လည်း အံ့ဩစရာမဟုတ်ဟုတွေးခဲ့သည်၊ သူကိုယ်တိုင်လည်းကြောက်ရွံ့နေခဲ့သည်။
သို့ထိတိုင် ချန်းခယ့်ယောင်အမူအရာကိုမြင်လိုက်သည့်အခါ စိတ်ပိုင်းဆိုင်ရာ တည်ဆောက်မှုတွင်သက်ရောက်မှုမရှိသည်ကိုတွေ့လိုက်ရသည်။
ချန်းခယ့်ယောင်ကိုကြည့်ရသည်မှာ ဖြူရော်နေသည်။ စက္ကန့်အနည်းငယ်ခန့် သူတို့အပြန်အလှန်ကြည့်နေခဲ့ကြသည်၊ သူသည်တစ်စုံတစ်ခုကိုပြန်ထိန်းသိမ်းရန်ကြိုးပမ်းနေပုံရသော်ငြား မကြာခင်သဘာဝမကျစွာခေါင်းငုံ့ကာ သူ့ပါးစပ်ကိုလက်ဖြင့်အုပ်ထားခဲ့သည်။
သူသည် ရုန်ယီကိုအကူအညီမဲ့စွာကြည့်ကာတစ်စုံတစ်ရာပြောချင်ဟန်ရှိသည်၊ အဆုံးတွင်ပါးစပ်ကိုဖွင့်ကာလက်ကိုဝှေ့ယမ်း၍ လမ်းဘေးနားက အမှိုက်ပုံးရှိရာကိုအမြန်လျှောက်သွားသည်။
သူ့ဆောင့်ကြောင်ထိုင်ကာပျို့တက်နေချိန် ရုန်ယီကအနောက်တွင်ရပ်နေပြီးသူ့ကိုတိတ်ဆိတ်စွာကြည့်နေခဲ့၏။
သူ့လက်ဖဝါးများမှာအေးခဲနေလေပြီ။
ချန်းခယ့်ယောင်မည်သည့်အရာမှအန်မထုတ်နိုင်ခင် ပြန်ထိန်းနိုင်ရန်ကြိုးစားလင့်ကစား သူ၏စိတ်ပိုင်းဆိုင်ရာမအီမသာဖြစ်နေခြင်းကိုထိန်းချုပ်နိုင်ခြင်းမရှိ။ မကြာမီ သူ့မျက်လုံးများကနီရဲလာပြီးစိတ်မသက်မသာဖြစ်မှုကြောင့် မျက်လုံးထောင့်များတွင်မျက်ရည်များပြည့်လာသည်။
သူ့ကိုကြည့်ရတာသနားစရာကောင်းသည်။
'ကြည့်ရတာ ငါသူ့ကိုအန္တရာယ်ဖြစ်အောင်လုပ်မိပြီထင်တယ်'
ထို့ကြောင့် သူလှည့်ပတ်ကြည့်လိုက်သည်၊ကုန်စုံဆိုင်တစ်ဆိုင်တွေ့ရပြီးရေတစ်ဘူးသွားဝယ်လိုက်သည်။ သူကုန်စုံဆိုင်ထဲမှထွက်လာသည်တွင် ချန်းခယ့်ယောင်ကသူ့ကိုမှင်သေသေနှင့်ကြည့်နေသည်၊ သူ့အားလိုက်ရှာနေသယောင်ပင်။
ရုန်ယီကသူ့ထံသွားကာ ရေဘူးကမ်းပေးလိုက်သည့်အခါချန်းခယ့်ယောင်မှာ သိသိသာသာအံ့အားသင့်သွားသည်။
သူရေဘူးကိုလှမ်းယူလိုက်ပြီး နှစ်ယောက်လုံးတပြိုင်တည်းပြောမိကြသည်။
ရုန်ယီမှာ ခဏတာခန့်တုံ့ဆိုင်းနေပြီးမှချန်းခယ့်ယောင်ကိုပြုံးပြလိုက်သည်။
"မင်းကိုအခွင့်အရေးယူမိတာငါပါ၊ မင်းကဘာကိစ္စတောင်းပန်နေရတာလဲ? မင်းငါ့ကိုအန်တာဒီတစ်ကြိမ်ကပထမဆုံးမဟုတ်ဘူးလေ"
ချန်းခယ့်ယောင်သည် ရုန်ယီထိုသို့တုံ့ပြန်လာလိမ့်မည်ဟုလုံးဝထင်မထားခဲ့ပေ။ သူရေဘူးကိုလှမ်းယူပြီးသတိထားမေးလိုက်သည်။
"မင်းကိုယ့်ကိုစိတ်မဆိုးဘူးလား?"
ရုန်ယီ ပုခုံးတွန့်ပြလိုက်သည်။
"ဒီလိုမျိုးကမင်းကိုယ်တိုင်လည်းမထိန်းချုပ်နိုင်ပါဘူး
"အချိန်တွေကြာလာတော့လည်း..."
ချန်းခယ့်ယောင်ကသူ့ကိုကြည့်လာသည်။
"မင်းစိတ်မရှိရင်ကိုယ်..."
"မင်းသင်ခန်းစာရသွားပြီမဟုတ်လား?"
ချန်းခယ့်ယောင် ကြက်သေသေသွားသည်။
ရုန်ယီကတစ်ဖက်လှည့်လိုက်ပြီး သူ့ကိုမကြည့်တော့ပေ။
"မင်းစိတ်ရှုပ်သွားမှာငါသိတယ်၊ အဲဒါကြောင့် ငါတမင်မင်းကိုကြောက်အောင်ခြောက်လိုက်တာ"
ပြောပြီးနောက် သူအချိန်အတန်ကြာအောင်စောင့်နေခဲ့သည့်တိုင် ချန်းခယ့်ယောင်မှာတိတ််ဆိတ်နေဆဲပင်။
သူမျက်မှောင်ကြုတ်ကာဆက်ပြောလိုက်သည်။
"အခုမင်းသိသွားပြီပဲ၊ ငါ့ကိုထပ်ပြီးရန်မစနဲ့တော့"
ချန်းခယ့်ယောင်ကသူ့ထံခြေလှမ်းအနည်းငယ်လျှောက်လာသည်။
"ငါလုပ်စရာရှိသေးတာရုတ်တရက်သတိရသွားပြီ"
ရုန်ယီသည် တစ်စက္ကန့်ခန့်ပိုနေမိလျှင် သူမထိန်းချုပ်နိုင်တော့မှာခံစားရသည်။
သူသည်ဒုတိယအကြိမ် တူညီသည့်တွင်းထဲတွင်အမြစ်တွယ်နေခဲ့သည်။ ပထမဆုံးအကြိမ်က မမျှော်လင့်ဘဲပြုတ်ကျခဲ့သည်။ ယခုကမည်သည့်သဘောနည်း။
သည်ရက်များအတွင်း သူသည်ကျင်းကိုပတ်ချာလှည့်ပြီးဂရုတစိုက်ကြည့်သည်၊ သူဆွဲဆောင်မခံရလောက်ဟု သူကိုယ်တိုင်လိမ်လည်ခဲ့သည်၊ သတိမထားမိသည့်အခါ သူတွင်းထဲထပ်ပြုတ်ကျခဲ့သည်။
သူသည် သူ့သဘောအတိုင်းတမင်ခုန်ဆင်းခဲ့ခြင်းပင်။ သို့သော် အစတည်းက ခုန်ကျော်ရန်ဘယ်သောအခါမှမစီစဉ်ခဲ့ခြင်းလည်းဖြစ်နိုင်၏။
ရုန်ယီသည် မသိစိတ်မှအရာကိုရှင်းရှင်းလင်းလင်းနားလည်ထားပြီးခဲ့သည့်တိုင် လက်ခံရန်လည်းဆန္ဒမရှိ။ ၎င်းအပြင် သူသာအခြားလူတစ်ယောက်ဖြစ်သွားခဲ့လျှင် တစ်ဖက်လူ၏အကျင့်စရိုက်များကိုအဓိပ္ပါယ်ကောက်လွန်ပြီး အဘယ်ကြောင့်နာကျင်နေရမည်နည်း။
သူသည်စိတ်ကူးထဲတွင် လူပေါင်းများစွာနှင့်ချစ်ကျွမ်းဝင်ခဲ့ဖူးသည်။ သူ့ကိုယ်သူစိတ်ကူးယဉ်နေရခြင်းက အလွန်ပျော်စရာကောင်းသည့်အရာပင်။ သူ၏ကျန်နေသေးသောဘဝတစ်လျှောက်လုံးကို သူ့မျက်လုံးထဲတွင်စိတ်ကျေနပ်စရာကောင်းသည့်မည်သူနှင့်မဆိုစိတ်ကူးယဉ်ပြီးကုန်ဆုံးနိုင်သည်၊ လက်တွေ့တွင်အလွန်အမင်းဂရုစိုက်စရာမလိုဘဲအများဆုံးမှ တအီအီငိုကြွေးသံဖြစ်စေမည်။
စိတ်ကူးယဉ်ရုံဖြစ်ပြီး မည်သူကိုမှဆုံးရှုံးစရာမလို၊ အန္တရာယ်လည်းမဖြစ်စေပေ။ တစ်ကိုယ်တော်သာယာမှုက ဘယ်အရာမှမှားယွင်းနေခြင်းမရှိချေ။
သို့တစေ ချန်းခယ့်ယောင်နှင့်သာဆိုပါက သူမတတ်နိုင်တော့။ သူမဝံ့ရဲတော့။ သူ၏ချိုမြိန်သောစိတ်ကူးလေးကအပေါက်တစ်ခုဖြစ်သွားမှာသူကြောက်သည်၊ သူဝမ်းနည်းရလိမ့်မည်။
ချန်းခယ့်ယောင်နှင့်ပတ်သတ်၍ ကောင်းသည့်အရာကိုသူအတိအကျမပြောနိုင်၊ သို့ရာတွင် သူသည်ထိုကွဲပြားနေသည့်လူတစ်ယောက်ဖြစ်နေရုံပင်။
ရုန်ယီ အိမ်ကိုနောက်ကျမှပြန်ရောက်လာသည်။
သူအိမ်ဝင်လာချိန် ဆူညံသံလုပ်မိမှာကြောက်သည့်အတွက်အလွန်ဂရုစိုက်ခဲ့ရသည်။ သူကော်ရစ်ဒါမှမီးကိုပင်မဖွင့်ခဲ့ပေ။ သူအခန်းထဲကိုတွားသွားဝင်ပြီးအနောက်မှတံခါးကိုပိတ်လိုက်သည့်အခါမှ စိတ်သက်သာသွားသလိုသက်ပြင်းရှိုက်လိုက်သည်။
ချန်းခယ့်ယောင်ကသူ့ကိုသတိမထားမိချေ။ သူ့အားသတိထားမိခဲ့လျှင်ပင် နှုတ်ဆက်ဆရာမလိုဘဲလျစ်လျုရှုထားနိုင်သည်။
နောက်တစ်မျိုးမှာ သူသည်အချိန်တစ်ခုအထိအနှီသူကိုသူ့အားမြင်ခွင့်မပေးရုံသာ။
အပြင်ဘက်တွင် နာရီပေါင်းများစွာဦးတည်ရာမဲ့လျှောက်သွားနေခဲ့ပြီးနောက် ယခုသူအိပ်ရာထဲတွင်လှဲလျောင်းလိုက်သည်၊ သူ့ခြေထောက်များက ကိုက်ခဲနေသည်။ ပင်ပန်းနေပါလျက် သူ့မျက်လုံးများကိုပိတ်ကာအိပ်မပျော်နိုင်ပေ။
လွန်ခဲ့သည့်နှစ်ရက်ကဖြစ်ပျက်ခဲ့သည့်အရာများမှာ သူ့မျက်လုံးထဲတွင်ပေါ်လာလိုက်ပျောက်သွားလိုက်နှင့်ရှိနေသည်။
ချန်းခယ့်ယောင်သည် သူသာအဖြူရောင်ဝတ်စုံနှင့်ဆိုလျှင်ကြည့်ကောင်းကြောင်းနှင့် သူလုပ်သည့်ဆားရည်စိမ်မုန်လာဥကိုစားချင်သည့်အကြောင်းပြောခဲ့သည်။ သူကအနှီသူကိုရယ်မောကာသူ့လက်ကိုကိုင်ခဲ့သည်။
ရုန်ယီ သူ့ခေါင်းကိုဂွမ်းကပ်စောင်အောက်တွင်မြုပ်ထားရာ နားများပင်အူလာသည်။ ရုတ်တရက်ပင် သူစတင်ပြီးနောင်တရလာသည်။ သူအဘယ်ကြောင့်မဆင်မခြင်လုပ်ရသနည်း။ သူတို့နှစ်ယောက်ယခင်ကအတိုင်း အတူဆက်ရှိသွားရန်အခြေအနေကောင်းနိုင်ပါဦးမည်လား။ ထိုသူအတွက်နေ့တိုင်းချက်ပြုတ်ပေးမည်၊ ချီးမွမ်းပေးခြင်းကိုနားထောင်မည်၊ အချိန်ပြည့်စကားပြောမည်၊ အခန့်မသင့်လျှင်ရန်ဖြစ်ပြီးစိတ်ဆိုးမည်ဆိုသော်ငြားအမြန်ပြေလည်သွားမည်။ ဝမ်းနည်းဖွယ် ငယ်ဘဝအတွေ့အကြုံများကြောင့်ချန်းခယ့်ယောင်သည်သူ့အပေါ် သံသယမဝင်ဘဲပြောဆိုရန်ဆန္ဒရှိလိမ့်မည်။ ၎င်းကရင်းနှီးစွာပေါင်းသင်းဆက်ဆံခြင်း၏သက်သေပင်။
ငါကပဲအကုန်လုံးကိုငါကိုယ်တိုင်ဖျက်ဆီးမိနေတာလား....
ရုန်ယီ စောင်ကိုဖယ်ပစ်ပြီးအမှောင်ထုထဲရှိသူ့အတွေးများအတွင်းပျောက်ဆုံးနေသည်။
အဆိုပါပုံစံနှင့် သူအိပ်မပျော်ရုံတင်မကသူ့ဦးနှောက်ကပါပေါက်ကွဲထွက်သွားနိုင်သည်။ အကြိမ်ရေများစွာဟိုလှည့်သည်လှည့်လုပ်နေပြီး သူရိုးရိုးတန်တန်းဖုန်းကောက်ကိုင်လိုက်သည်။
Friend circle ကိုအလျဉ်းသင့်သလိုဖွင့်လိုက်သည်။ သူမှလွဲကာတစ်လောကလုံးပျော်ရွှင်မှုထဲတွင်နစ်မြုပ်နေပုံရသည်။
အချို့သူငယ်ချင်းများကတစ်ဝက်သာပြီးသေးသော သူတို့အိမ်အသစ်ကိုပြကြသည်၊ အချို့ကသူတို့ချစ်သူများနှင့်ခရီးထွက်ကြပြီး အချို့ကသူတို့မိသားစုများနှင့် အားလပ်ရက်စားသောက်ကြသည်ကိုပို့စ်တင်ထားကြသည်။ သူနှင့်ခင်တာမကြာသေးသောယွီဝမ်လော့က နာရီပိုင်းလောက်ကပင် လေးနှစ် သို့မဟုတ် ငါးနှစ်သာရှိဦးမည့်ကလေးမလေးတစ်ယောက် သူ့လက်မောင်းများကြားထဲအေးအေးချမ်းချမ်းအိပ်ပျော်နေသည့်ပုံကိုရိုက်တင်ထားသည်။
'ဂရုစိုက်ပေးကြတာကျေးဇူးတင်ပါတယ်၊ ငါ့ရဲ့မင်းသမီးလေးအခုနေကောင်းသွားပြီ' ဟုရေးထားသည်။
ချန်းခယ့်ယောင်ကပို့စ်အောက်တွင် 'like' နှိပ်ထားသည်။ အားနည်းကြောင်းပြသခြင်းကိုငြင်းပယ်ရန် ရုန်ယီကလည်း 'like' ခလုတ်ကိုချက်ချင်းနှိပ်လိုက်သည်။
အရှေ့ကိုဆက်ကြည့်နေရင်း ရုန်ယီသည် ကျိုးလီက Friend circleတွင် အားလုံး၏အာရုံစိုက်ပေးမှုအတွက်ကျေးဇူးတင်ကြောင်းပို့စ်တင်ထားသည်ကိုတွေ့လိုက်ရသည်။ သို့သော် ရေးထားသည့်စာများကအနည်းငယ်ထိတ်လန့်ဖွယ်ကောင်းသည်။
သူ့အဘွားကတိတ်တိတ်လေးလွှင့်ပစ်လိုက်သည့် မီမီလေးကို အောင်မြင်စွာပြန်ရနိုင်ခဲ့သည့်အကြောင်းပြောထားသည်။
အနှီမြွေ၏ကံဆိုးမိုးမှောင်ကျမှုကိုသူစိတ်မကောင်းဖြစ်မိရုံပင်၊ Friend circle မှ ပို့စ်အောက်တွင်ရင်းနှီးနေပြီးမထင်မှတ်ထားသည့်လူတစ်ယောက်ပေါ်လာသည်တွင် သူအံ့ဩသွားသည်။
ဘဝတွင်ထပ်တူညီသည့်အလုပ်များလုပ်ရန်စိတ်ကူးမရှိ၊ ကျိုးလီဖုန်းနံပါတ်လည်းမရှိသည့် လျိုယွမ်ကအသည်းပုံ 'like' နှိပ်ပြီးစာရေးထားခဲ့သည်။
'မင်းဒီနေ့အလုပ်ကြိုးစားခဲ့တာပဲ၊ စောစောအနားယူသင့်တယ်'
ပိုကြောက်စရာကောင်းသည့်အရာက ကျိုးလီစာပြန်လိုက်ခြင်းပင်။
ရုန်ယီမှာ ခေတ္တခန့်တွေဝေမိန်းမောနေသည်။ သူဆက်ဆံရေးတိုးတက်လာရန်မျှော်လင့်ထားခဲ့သည့်လူနှစ်ယောက်က သူမသိလိုက်ခင်မှာပင်အတော်အသင့်ခရီးရောက်နေလေပြီ။ ၎င်းကကျေနပ်ဖွယ်အခြေအနေဖြစ်နိုင်လင့်ကစား ရုန်ယီမှာ သူတို့အတွက်မပျော်ပေးခင်သူ၏ဆန်းကြယ်မှုကိုမရမကတွေးမိသည်။
သူတို့နှစ်ယောက်လုံးက ဒိတ်လေးတစ်ခုရရန်ပင်ခက်ခဲသည့် တစ်ကိုယ်တည်းသမားများဖြစ်သည်။ လျိုယွမ်ကသူနှင့်အတော်လေးကွာခြားသည်။
အနှီသူသည် လှပသည်၊ ချစ်စရာကောင်းပြီးအယ်လ်ဖာများပစ်ကြွေလောက်သည်အထိ ခန့်ညားသည်။ သူမည်သည့်အရာပဲလိုချင်သည်ဖြစ်စေ၊ ကြည်နူးဖွယ်ဆက်ဆံရေးတစ်ခုကိုစတင်နိုင်သည်။
ရုန်ယီကအားကျခဲ့ဖူးသည်။ သို့သော် လက်ရှိတွင်သူသည်အနည်းငယ်မနာလိုဖြစ်နေမိသည်ဟုထင်သည်။
ကံကောင်း၍ ရုတ်တရက်သူသည် လူအများအပြား၏ကြိုက်နှစ်သက်မှုကိုမလိုအပ်ဟုနားလည်လိုက်သောကြောင့် တစ်ယောက်တည်းစိတ်နာနေခြင်းမှာကြာရှည်မခံလိုက်ချေ။
သူ့ကိုလူတစ်ယောက်တည်းကသာနှစ်သက်စေချင်သည်။
သူသည်ထိုသူနှင့်နောက်တစ်ကြိမ် ချစ်မိချင်ပြီးထိုအတွက်သူသည်အမှန်တကယ် အယ်လ်ဖာတစ်ယောက်ကဲ့သို့ပင်ဟန်ဆောင်နိုင်သည်။ သူသည် ကျိုးလီထက် ချန်းခယ့်ယောင်ပြောဖူးသည့်သေပြီးသားအလျင်လူကိုပို၍မနာလိုဖြစ်မိသည်။
ဤလူကအလွန်စိတ်ရှုပ်စရာကောင်းသည်။ သူသည်ချစ်သူကောင်းတစ်ယောက်အားပိုင်ထားပြီးသည်ကိုပင် ချစ်မြတ်နိုးခြင်းမရှိခဲ့ပေ။
အရမ်းကောင်းသည်။ သူသည်အသုံးမကျသည့်နှယ် လူများကိုခံစားမိစေသော်ငြား သူနှင့်ပတ်သက်သမျှအရာတိုင်းကကောင်းနေဆဲပင်။
သင်ဘယ်လိုခံစားနေရပါစေ၊ အလုပ်ကိုသွားရဦးမည်ပင်။
အိပ်ရေးမဝခဲ့သည့်ရုန်ယီမှာတစ်နေကုန်စိတ်ရှုပ်ထွေးနေခဲ့လေရာ အလုပ်မပြီးမချင်းယနေ့ညစာစားပွဲတွင်ချန်းခယ့်ယောင်နှင့်မျက်နှာချင်းဆိုင်ရလျှင် အနေခက်ရနိုင်ခြေကိုမတွေးနေတော့ပေ။
ကျိုးလီထံမှမက်ဆေ့ချ်တစ်စောင်က ကယ်တင်ခဲ့သည်။
သူသည်အပူပေးလွန်သွား၍အရည်ပျော်ကျသွားသောအဏုမြူဓာတ်ပေါင်းဖိုကြီးနှင့်တူနေပြီး စိတ်ဖောက်ပြန်နေသည့် soybean အတွဲလိုက်ကြီးကိုပို့၍ပြောလာသည်။
"ငါသည်းမခံနိုင်တော့ဘူး!...အလုပ်ထွက်တော့မယ်!"
ရုန်ယီမှာ တစ်စက္ကန့်မျှတွေဝေနေပြီးမှစာပြန်ပို့လိုက်သည်။
"ဘာဖြစ်တာလဲ? မင်းစိတ်မပျော်ရင်ငါနဲ့အတူညစာလိုက်စားချင်လား?"
တစ်ဆက်တည်းမှာပင် သူနှင့်လျိုယွမ်တို့ဆက်ဆံရေးအကြောင်းကိုမေးမြန်းချင်ခဲ့သည်။
တစ်စက်လေးပင်နောင်တမရဘဲ ချန်းခယ့်ယောင်ကိုပေးရမည့်ပိုက်ဆံကိုထုတ်လိုက်ပြီးသည့်နောက် သူနှင့်ကျိုးလီတို့သည် သူတို့ကုမ္ပဏီကြားရှိအလယ်လမ်းမှ စားသောက်ဆိုင်တွင်ဆုံကြသည်။
ကျိုးလီသည် ထိုင်ပြီးသည်နှင့်မကြာခင်သူ၏ဘော့စ်ဖြစ်သူအပေါ် ဦးတည်သည့် တိုင်တန်းချက်များကိုခရားရေသွန်စတင်ဖောက်သည်ချတော့၏။
ဖြစ်ပျက်ခဲ့အရာများကျော်လွန်သွားခဲ့ပြီး ရုန်ယီသည်လီရှောင်းရန်က ကျိုးလီထံမှအတားမခံရခြင်းကိုတစ်ခါမှမကြုံတွေ့ခဲ့ရပေ။ ရုန်ယီထိတ်လန့်သွားသည်။ တပြိုင်တည်းပင် သူမတတ်နိုင်ဘဲသက်ပြင်းချလိုက်ရသည်။
သူ့စိတ်ထဲတွင် အနှီသူကနတ်ဘုရားဘဝမှသူတောင်းစားဘဝပြောင်းသွားပြီး ယခုသူကအနည်းငယ်ကံမကောင်းသောသူဖြစ်လာသည်။
သူသည်မြင့်သွန်းလှသည့်တောင်ခါးပန်းတွင်ပေါက်နေသော လူတကာလိုလားဖွယ်ပန်းလေးဖြစ်နေမှန်းသံသယဝင်စရာမရှိပေ၊ သို့ထိတိုင် သူမချစ်သည့်သူ ထောင်ထားခဲ့သည့် ထောင်ချောက်ထဲပြုတ်ကျသွားပြီးကိုယ်ဝန်ရှိနေသည့်ဇနီးနှင့်လက်ထပ်ရန်ဖိအားပေးခံခဲ့ရသည်။ လူတစ်ယောက်က အဆိုပါရှည်လျားပြီးလှောင်အိမ်နှင့်တူသည့်အိမ်ထောင်ရေးကိုဖြတ်သန်းရလျှင် စိတ်ဓာတ်ပိုင်းပြောင်းလဲသွားတာအံ့ဩစရာမဟုတ်ပေ။
"ဒီလူကလေငါ့အတွက်သူ့ဇနီးကိုကွာရှင်းပေးမယ်လို့ပြောတယ်"
ကျိုးလီခမျာမယုံကြည်နိုင်သည့်မျက်နှာဖြစ်နေသည်။
"သေစမ်း၊ သူလက်ထပ်ပြီးတာငါမသိခဲ့ဘူး၊ သူကွာရှင်းချင်တာငါနဲ့ဘာဆိုင်လို့လဲ၊ ငါကအိမ်ထောင်ရေးမှာကြားလူဖြစ်သွားရင်ရော? သူ့ကိုမြင်တိုင်းငါထွက်မပြေးဘဲလို့ကိုမရဘူး!"
ရုန်ယီ နည်းနည်းအံ့ဩသွားသည်။ အဆိုပါနှစ်ယောက်ကွာပြဲသွားခြင်းက ဆိုးရွားသည့်အရာဖြစ်သွားရန်မလိုပေ။ လီရှောင်းရန်ကကျိုးလီကိုတကယ်ကြီး အတည်ဖြစ်နေမည်ဟုသူမမျှော်လင့်ထားခဲ့ချေ။
"ဘာလို့သူနဲ့ငါ့ကိုအတူရှိနေရအောင်ကျိန်စာမတိုက်လိုက်တာလဲ?"
ကျိုးလီ စားပွဲကိုစိတ်ဆိုးမာန်ဆိုးဖြင့်ဘန်းခနဲမြည်အောင်ရိုက်လိုက်၏။
ရုန်ယီမှာ တခဏမျှမည်သည့်ရှုထောင့်မှစကားဖြတ်ရမှန်းမသိပေ။ သူ့စိတ်ထဲတွင် ရုတ်တရက်လီရှောင်းရန်ပုံရိပ်ကပိုပြီးနစ်နာနေသည်။ နောက်ဆုံး သူသည်အတိတ်မှမှားယွင်းနေသည့်ဘဝကိုဖယ်ရှားပြီးနွေဦးအသစ်လေးကိုပွေ့ဖက်ရန်ဆုံးဖြတ်လိုက်သည်၊ ကံမကောင်းစွာဖြင့်သူ၏အချစ်ကံကသူ့ကိုရှောင်ဖယ်သွားသည်။ ရက်ရောသည့်အချစ်တုံ့ပြန်ချက်ကိုလိုက်ခဲ့သည့်ကို့ရို့ကားယားနည်းလမ်းများကိုအကဲဖြတ်ကြည့်ရလျှင် လီရှောင်းရန်ကသူ့သက်တမ်းတွင်တိုတောင်းလှသည့်အချစ်အတွေ့အကြုံလေးဖြစ်နိုင်သည်။
သည်အရာက လူရာချီကိုစိတ်တိမ်းညွတ်လာစေရန်ဆွဲဆောင်နေကျအနှီလူရှုပ်လူပွေအတွက် လူတွေကိုဖယောင်းတိုင်မီးထွန်းပေးချင်လာစေသည်။
"ငါပြန်ရင်နှုတ်ထွက်စာရေးတော့မယ်"
"-ျီးပဲ၊ ခရီးသွားဖို့အခွင့်အရေးရှာနေတာအတော်ပဲပေါ့၊ မင်းရောစိတ်ဝင်စားလား? ငါတို့အတူသွားလို့ရတယ်"
ရုန်ယီ ၎င်းကိုကြားလိုက်ရသည့်အခါ ရုတ်တရက်သူတစ်စုံတစ်ခုကိုသတိရသွားသည်။
မကြာသေးခင်က သူအိုင်ဒေါပရိသတ်များတွေ့ဆုံပွဲအတွက်နယ်လှည့်ခရီးလက်မှတ်ဝယ်ထားခဲ့သည်၊ ၎င်းကဤတစ်ပတ်ပိတ်ရက်တွင်သွားရမည်။
မကြာသေးခင်အကြောင်းအရာများ အများကြီးဖြစ်ပျက်ခဲ့၍သူမေ့လုနီးပါးဖြစ်နေခဲ့သည်။
