ငါ…ငါ့အိုင်ဒေါနဲ့ လိုက်ပြိုင်နေမိတာလား…
ရုန်ယီ ရေချိုးပြီးနောက် အိပ်ရာပေါ်လှဲနေကာ အတွေးလွန်နေမိသည်။
ချန်းခယ့်ယောင် မော့ယွီဖေးအပေါ်ပြုမှုပုံမှာ အလွန်ထူးဆန်း၏။
ကျိုးလီထံမှ ကြားခဲ့ရသော ကောလဟာလများကို မတွေးရန်မှာ ရုန်ယီအဖို့ခက်ခဲလှ၏။
အမှန်မှာ ခုနကလေးတင် ရုန်ယီသူတို့နှစ်ယောက်ကြား ဆက်ဆံရေးတစ်ခုရှိမည်ဟု စိတ်ကူးယဉ်ခဲ့၏။
သာမန်လူများအဖို့ နာမည်ကြီးများနှင့် အဆက်အသွယ်ရရန် ခက်ခဲပေသည်။ သို့သော် ဝတ္ထုရေးသူအနေဖြင့် သရုပ်ေဆာင်ကို မသိခြင်းကတော့ မဖြစ်နိုင်ပေ။
ပြန်တွေးရင်းမှ မော့ယွီဖေးကလွဲ၍ ချန်းခယ့်ယောင် သူအရှေ့တွင် အသည်းအသန်မုန်းပြဖူးသောသူ တစ်ယောက်သာရှိမှန်း ရုန်ယီသဘောပေါက်သွား၏။
ထွက်သွားခဲ့ပြီးဖြစ်သော ရည်းစားဟောင်းပင်ဖြစ်၏။
ထို အပိုင်းအစများကို ပေါင်းစပ်လိုက်လျှင် ပုံပြင်မှာ ရှုထောင့်ပေါင်းစုံမှ ဖြစ်နိုင်ချေရှိပုံရလာ၏။
ရုန်ယီ ချန်းခယ့်ယောင်အပေါ်သူ့ခံစားချက်များကို နားလည်သွားကတည်းက ထိုသို့ယူဆချက်မျိုး မလုပ်ချင်ဖြစ်နေခြင်းသာဖြစ်သည်။
အလွန်ကမောက်ကမနိုင်ကာ နေရထိုင်ရလည်း အဆင်မပြေဖြစ်လှသည်။
တစ်စုံတစ်ယောက်ကို အမှန်တကယ်လက်လွှတ်နိုင်လိုက်ပြီး ဂရုမစိုက်တော့ပါက စိတ်ထဲတွင်ဘာခံစားချက်မှ မရှိတော့ဟု ဆိုကြသည်။
မော့ယွီဖေးသာ အမှန်တကယ် ချန်းခယ့်ယောင် ရည်းစားဟောင်းဆိုလျှင် သူအလွန်ဂရုစိုက်ခဲ့သောကြောင့်သာ ယခုအချိန်အထိ သူ့အကြောင်းကို တွေးနေခြင်းများလား။
ထို့ကြောင့် ရုန်ယီသာ ချန်းခယ့်ယောင်ကို လိုက်ရန်ဆုံးဖြတ်လိုက်လျှင် မော့ယွီဖေးနှင့် ယှဉ်ပြိုင်ရသလို ဖြစ်နေမည်လား။
သူဘယ်လိုလုပ် နိုင်နိုင်မည်နည်း။ ရှုံးမှာ အသေအချာပင်ဖြစ်၏။
သို့သော် သူခဏ စဉ်းစားကြည့်လိုက်သည်။
ချန်းခယ့်ယောင် ရုန်ယီ့ကိုအယ်လ်ဖာဟုထင်ခဲ့စဉ်က သူ့ကို တက်တက်ကြွကြွပင် လိုက်ခဲ့၏။
ထိုအချိန်က ချန်းခယ့်ယောင် သူ့ကိုဘာကြောင့်သဘောကျရသနည်း။
ရုန်ယီ အကြိမ်ပေါင်းများစွာ စဉ်းစားသော်လည်း ချန်းခယ့်ယောင်မှာ သူ့ရုပ်ရည်ကိုသာ သဘောကျခဲ့ခြင်းဖြစ်ကြောင်း လက်ခံရန်ဆုံးဖြတ်လိုက်သည်။
ထိုသို့တွေးကြည့်မှ သူနှင့် မော့ယွီဖေးမှာ ခန္ဓာကိုယ်အချိုးအစားဆင်တူကြောင်း သတိထားမိသည်။
အစကတည်းကများ သူ့အတွက် အစားထိုးဖြစ်ခဲ့လေသလား။
ရုန်ယီ အမှောင်ထဲတွင် ခေါင်းအုံးကို တင်းကြပ်စွာဖက်ကာ မျက်လုံးများကျယ်နေ၏၊
သူ့ယူဆချက်များက သူ့ကိုပြန်ခြောက်လှန့်နေကာ တောင်တွေး မြောက်တွေး ဖြစ်နေသည်။
ချန်းခယ့်ယောင်မှာ သူ့နှလုံးသား၏လရောင်ဖြူထံသို့ ချဉ်းကပ်ခွင့် မပေးသောကြောင့် ချန်းခယ့်ယောင်စိတ်ဆိုးသွားသည်လား။
(စာကြွင်း : လရောင်ဖြူဆိုသည်မှာ နှလုံးသားထဲတွင်ရှိနေသည့်တိုင် လက်လှမ်းမမှီနိုင်သော တစ်စုံတစ်ဦးကို ဆိုလိုသည်။ )
ထိုအရာက ရုန်ယီ့ကို အလွန်စိတ်အနှောင့်အယှက်ဖြစ်စေသည်။
ဘာကြောင့်များ လမ်းခွဲခဲ့ကြသနည်း။
ချန်းခယ့်ယောင်မှာ စိတ်အနှောင့်အယှက် ဖြစ်စရာကောင်းသူ ဖြစ်သော်လည်း ချစ်ဖို့ကောင်းသော စိတ်အနှောင့်အယှက်လေးဖြစ်၏။ သူ့အိုင်ဒေါမှာလည်း ပြီးပြည့်စုံသူဖြစ်၏။
အထင်လွဲမှုတစ်ခုခုများ ရှိခဲ့သည်လား။
ဥပမာပြောရလျှင် မော့ယွီဖေးကို ရည်ရွယ်ချက်ရှိရှိချဉ်းကပ်လာသော အိုမီဂါ မင်းသမီးကြောင့်များလား။
ခဏလောက်ပင် ရုန်ယီ စိတ်ပိုင်းဆိုင်ရာခွဲခြမ်းစိတ်ဖြာမှုကို ချန်းခယ့်ယောင်ထံပင် ပို့ပေးချင်သည်။
ထိုမှသာ မော့ယွီဖေး ခေါင်းမာခဲ့သော အချိန်များကို ချန်းခယ့်ယောင်နားလည်နိုင်မည်ဟု ထင်သောကြောင့် ဖြစ်၏။
ထိုအခါ သူတို့ကြားက အေးစက်မှုကိုဖြိုခွဲကာ ကွဲကြေနေသောဆက်ဆံရေးကို ဖာထေးလျက် ပြီးပြည့်စုံသော ဆက်ဆံရေးကိုတည်ဆောက်နိုင်တော့မည်ဖြစ်သည်။
…ထိုအခါ သူလည်း မျက်ရည်များဖြင့်နောက်ဆုတ်ရမည်ဖြစ်သည်။
ရုန်ယီ အိပ်ရာပေါ်မှငေါက်ခနဲ ထထိုင်လိုက်သည်။
သူတို့နှစ်ယောက် အထင်လွဲမှုတစ်ခုခုကြောင့် လမ်းခွဲခဲ့သည်ဖြစ်စေကာမူ အတိတ်မှ အကြောင်းအရာများသာ ဖြစ်၏။
ပြိုင်ဘက်မှာ သူမယှဉ်နိုင်သော သူ့အိုင်ဒေါပင်ဖြစ်နေစေကာမူ ဝန်ခံရန် သူ့သူငယ်ချင်းဖြင့်ပင် ချိန်းဆိုထားပြီးဖြစ်နေ၏။ ထို့ကြောင့် သူကြိုးစားကြည့်ချင်သည်။
ရုန်ယီဖုန်းကို ကောက်ကိုင်လိုက်ကာ browser ကိုဖွင့်လိုက်ပြီး နဂါးကိုရှာဖွေခြင်း၏ တတိယမြောက်စီးရီးကို ရှာဖွေလိုက်သည်။
သူ့ပြိုင်ဘက်ကို ပိုမိုနားလည်စေရန် မော့ယွီဖေး အဓိကဇာတ်ဆောင်အနေဖြင့် လုပ်ခဲ့သော လက်ရာမြောက်စီးရီးကို ဦးစွာလေ့လာရမည် ဖြစ်သည်။
နဂါးကိုရှာဖွေခြင်းတွင် ထူးခြားသောအချက်တစ်ချက်ရှိ၏။
ထိုကမ္ဘာတွင် ဒုတိယတစ်ဆင့်လိင်ခွဲခြားထားခြင်းမရှိချေ။ ကျားနှင့်မဟူ၍သာ ရှိ၏။ အားလုံးမှာ ဘီတာများဖြစ်ကြကာ မတူညီသောအချက်မှာ ကျားနှင့်မလက်ထပ်ခြင်းကသာ ကလေးယူနိုင်ခြင်းဖြစ်၏။
ထိုသို့ရိုးရှင်းသောအချက်က လက်တွေ့လူနေမှုဘဝတွင် ကွဲပြားခြားနားသောအကျိုးရလဒ်တစ်ခုကို ဖြစ်စေ၏။
ပထမစီးရီး စတင်ထုတ်လွှင့်ကတည်းက ထိုအချက်နှင့်ပတ်သက်ပြီး အမျိုးမျိုးဆွေးနွေးကြကာ မပြီးဆုံးနိုင်သော ဆွေးနွေးမှုကြီးကို စတင်စေခဲ့၏။
“လိင်နှစ်မျိုးခွဲခြားပုံစနစ်” ဟူ၍လည်း နာမည်ကြီးသွားစေခဲ့၏။
အချိန်တစ်ခုအထိ စျေးကွက်ထဲတွင်လည်း ဆင်တူရိုးမှား တုပမှုများ အမြောက်အများ ပေါ်လာခဲ့၏။
ဇာတ်လမ်းအရဆိုလျှင် ဒုတိယစီးရီးမှာ ပထမစီးရီးနှင့်တိုက်ရိုက်မပတ်သက်သော်ငြားလည်း သူတို့ကမ္ဘာမှာအတူတူပင်ဖြစ်နေသည်ဟု ရုန်ယီတွေးလိုက်၏။
ထို့ကြောင့်လည်း ယှဉ်ကြည့်လျှင် ဒုတိယမြောက်စီးရီးက သိပ်လက်ရာမမြောက်သလို ခံစားရသည်။
ရုန်ယီ ယခုတတိယမြောက်စီးရီးကို ဖွင့်ကြည့်လိုက်သောအခါ စာရေးသူမှာလှည့်ကွက်အနည်းငယ်ထည့်ထားသည်ကို တွေ့လိုက်ရ၏။
တစ်ကမ္ဘာတည်းတွင် မဖြစ်နေသေးသော်ငြားလည်း ဇာတ်လိုက်မှာ အခြားကမ္ဘာမှရောက်လာသော အယ်လ်ဖာတစ်ယောက်ဖြစ်နေသည်။
ဇာတ်လိုက်၏ အတွေးအခေါ်များနှင့် အမြင်များမှာ ယခုကမ္ဘာမှ သက်ရှိများနှင့်တူညီနေပြီး အယ်လ်ဖာအနေနှင့်မွေးဖွားလာကတည်းက ပိုင်ဆိုင်ခဲ့သောဖယ်ရိုမုန်းများမှာ အားလုံးအပေါ်သက်ရောက်မှုရှိနေသည်က သဘာဝကျပေသည်။
တစ်ပိုင်းပြီးတစ်ပိုင်း ဖတ်ပြီးသောအခါ ရုန်ယီ ကောလဟာလကောင်းများထွက်လာရသော အကြောင်းအရင်းကို သဘောပေါက်လာသည်။
အမျိုးသားဇာတ်လိုက်၏ ပုံစံမှာလည်း မော့ယွီဖေးနှင့် လိုက်ဖက်၏။ ဇာတ်ကောင်အကြောင်း အသေးစိတ်ဖော်ပြချက်များမှာလည်း သူနှင့်လိုက်ဖက်လှပေသည်။
အခြားတစ်ဖက်က ယောက်ျားဖြစ်စေ မိန်းမဖြစ်စေ ဇာတ်လိုက်မှာ သူ့စကားလုံး သို့မဟုတ် အပြုအမူများဖြင့် အီစီကလီလုပ်ရမည်ဖြစ်၏။
သို့သော် သူသည်အမြဲတမ်းသူ့သတ်မှတ်ချက်နှင့်သူ စည်းကျော်လေ့မရှိချေ။
ဇာတ်လမ်းတစ်လျှောက် အမျိုးသမီးများ၏နှလုံးသားကိုသာမက အမျိုးသားများ၏ နှလုံးသားကိုပါ သိမ်းယူနိုင်ခဲ့၏။
သူသည် ပန်းခင်းထဲတွင်လျှောက်ခဲ့သည်တိုင် သစ်ရွက်ကလေးတစ်ရွက်ကတောင် သူ့စိတ်ကိုမဆွဲဆောင်နိုင်ခဲ့ပေ။ သူ့နှလုံးသား၏အနက်ရှိုင်းဆုံးနေရာတွင် အမြဲတမ်းမှတ်မိနေသောသူမှာ သူဒီကမ္ဘာကိုစရောက်စဉ်က ပထမဆုံးတွေ့ခဲ့သော ပုံပြောသူသာဖြစ်၏။
ဇာတ်လမ်းမှာ စိတ်ဝင်စားစရာကောင်းကာ ဇာတ်ကွက်များမှာလည်း ကောင်းကောင်းမွန်မွန်နေရာချထားပြီး လက်ရာမြောက်လှ၏။
ဇာတ်လမ်းတစ်လျှောက် ပေါ်လာသောအရံဇာတ်ကောင်အများစုမှာလည်း ဇာတ်လိုက်ကိုချစ်မိသွားကြဟန်ကို ရေးသားထားသော်လည်း ဖတ်ရှုသူများက စိတ်ပိုင်းဆိုင်ရာအရ ကျေနပ်မှုရှိကြ၏။
ရုန်ယီတစ်ရွက်ပြီးတစ်ရွက်ဖတ်ကာ သူ့ကိုယ်သူအကြိမ်ကြိမ်အိပ်ရန်ပြောနေသော်လည်း တစ်ပိုင်းပြီးသည်နှင့်ချက်ချင်းနောက်တစ်ပိုင်းကို ဆက်ဖတ်မိနေ၏။
သူမသိလိုက်ပဲ မိုးသောက်ချိန်တောင်ရောက်သွားပြီဖြစ်၏။
သူဆက်ဖတ်နေလျှင် တွေ့ဆုံပွဲတတ်နိုင်တော့မည်မဟုတ်ကို သဘောပေါက်သောကြောင့် ဖုန်းကိုအတင်းအကြပ်ချလိုက်ရ၏။
ထို့နောက် အိပ်ရာပေါ်လှဲကာ အလင်း၏အရှိန်နှုန်းဖြင့် အိပ်ပျော်သွားလေတော့သည်။
အိပ်မက်ထဲတွင် ရုန်ယီ ထူးဆန်းသောကမ္ဘာတွင်လျှောက်သွားကာ တစ်ပါးသူများ၏စိတ်ကို လှုပ်ခတ်စေခဲ့သော်လည်း သူ့နှလုံးသားတွင်တော့ တိတ်တခိုးလေးသာတစ်ယောက်သောသူကို သိမ်းထားခဲ့သောညဇာတ်လိုက်နှင့်တွေ့ခဲ့သည်။
မျှော်လင့်ထားသလိုပင် ဇာတ်ကောင်မှာ မော့ယွီဖေးမျက်နှာဖြင့်ဖြစ်၏။
ရုန်ယီပြေးကာ သူ့နောက်ကိုလိုက်ခဲ့သည်။
သူ့ကိုမှီသွားသောအခါ ရုန်ယီသူ့ကိုလှမ်းဖမ်းလိုက်ကာ သူ့ကို မေးခွန်းများဆက်တိုက်မေးနေခဲ့၏။
“ချန်းခယ့်ယောင်က မင်းကိုသဘောကျနေတာလား…မင်းရော သူ့ကိုသဘောကျသေးလား… မင်းတို့ဆက်ဆံရေးက ဘာတွေလဲ… မင်းတို့နှစ်ယောက်မတွေ့တော့လို့မရဘူးလား…” တစ်ဖက်က ပြန်ပြော၏။ “ ထတော့ မင်းတွေ့ဆုံပွဲကို နောက်ကျတော့မယ်…”
အိပ်ရေးမဝခြင်းက လူတစ်ယောက်၏စိတ်ရောကိုယ်ကိုပါ ပြင်းပြင်းထန်ထန် ထိခိုက်စေ၏။
သူတို့ အိုင်ဒေါနှင့် သွားတွေ့သောအခါ ကောင်းကောင်းမွန်မွန်မပြင်ဆင်သွားချင်သောပရိတ်သတ် ရှိလိမ့်မည်မဟုတ်။
ရုန်ယီ မော့ယွီဖေးနှင့် သီးသန့်အကြိမ်ကြိမ်တွေ့ဆုံဖူးသည့်တိုင် ပရိသတ်တွေ့ဆုံပွဲတွင်တော့ တလေးတစားရှိရန်လိုအပ်သေးသည်။
ရုန်ယီသူ၏ အိပ်ရေးမဝဖြစ်နေသော မျက်နှာကို မှန်ထဲတွင် ကြည့်ကာ ငိုချင်သွားသော်လည်း မျက်ရည်မှာကျမလာချေ။
ပိုဆိုးသည်က သူပြင်ဆင်ရန် အချိန်မရှိတော့ခြင်းဖြစ်သည်။ အကြောင်းမှာ ပရိတ်သတ်များမှာပွဲကျင်းပရာနေရာသို့ ကြိုတင်ဝင်ရသောကြောင့်ဖြစ်၏။
လမ်းတွင် ရုန်ယီ အပိုင်းအချို့ကို ထပ်ဖတ်သွား၏။
ဇာတ်ကွက်မှာ လူကိုသိချင်စိတ်ပြင်းပြစေ၏။ ဇာတ်လိုက်မှာ သူအမြဲတွေးနေသော ပုံပြောသူကိုတွေ့တော့မည်ဆဲဆဲမှာပင် ရုန်ယီနောက်ထပ်စာမျက်နှာကို စိတ်အားထက်သန်စွာနှိပ်လိုက်သောအခါ အသိပေးစာပေါ်လာကာ တစ်ခုခုလွဲချော်သွားကြောင်းကိုအသိပေးထားခြင်းဖြစ်၏။
ဒုတိယတစ်အုပ်မှာ ပြီးသွားကာ တတိယတစ်ခုမှာ ဝဘ်ဆိုက်တွင် ဖတ်မရသေးချေ။
ရုန်ယီ ထိုနေရာမှာပင်သွေးအန်ချင်စိတ် ပေါက်သွားသည်။
အမှန်မှာ ဇာတ်လမ်းတွင် အချစ်ရေးကထိုမျှလောက် အရေးမကြီးသော်လည်း အထင်ကြီးစရာပင်ဖြစ်၏။
ဇာတ်လိုက်နှင့် စာဖတ်သူအတွက် ယောက်ျားနှစ်ယောက်လက်ထပ်ခြင်းမှာ တရားဝင်ဖြစ်နေသည်။ သို့သော် စာအုပ်ထဲမှလောကကြီးအတွက်တော့ သာမန်မဟုတ်သော လုပ်ရပ်ဖြစ်၏။
ကလေးလည်းမွေးနိုင်မည် မဟုတ်သောကြောင့် ပိုက်ဆံချမ်းသာပါလျက် ကလေးမရှိသောအိမ်ကဲ့သို့ဖြစ်နေပေမည်။
ဒါမှမဟုတ် အယ်လ်ဖာနှစ်ယောက်၏ လက်ထပ်ခြင်းနှင့်များဆင်တူနေမလား။
သို့သော်လက်တွေ့တွင် အယ်လ်ဖာနှစ်ယောက် လက်ထပ်ခြင်းကိုလည်း လက်ခံထားပြီးဖြစ်၏။
ရုန်ယီ အွန်လိုင်းတွင်တတိယပိုင်းကို ရှာမတွေ့ခင် တွေ့ဆုံပွဲနေရာသို့ ရောက်လာ၏။
ကားပေါ်က ဆင်းလိုက်သောအခါ ဝင်ပေါက်တွင် အလှဆင်ထားသော အပြင်အဆင်များကိုကြည့်ကာ အံ့ဩသွား၏။
ယခင်က ထိုသို့ပွဲများတွင် မပါဝင်ဖူးချေ။ ထို့ကြောင့် အလွန်စိတ်ဝင်စားကာ သေချာလိုက်ကြည့်မိသည်။
သို့သော် ဝင်ရမည့်အချိန် နီးကပ်လာသောကြောင့် ရုန်ယီ လက်လျော့လိုက်ရသည်။
လက်မှတ်ဂိတ်ပေါက်သို့ လာရာလမ်းတစ်လျှောက်တွင် သူ့ဆီလာကြကာ “လက်မှတ်ဝယ်ဦးမလား…” ဟုမေးကြ၏။
ရုန်ယီက လက်မှတ်ရှိပြီးသား ဖြစ်ကြောင်းပြောလိုက်သောအခါ ထိုသူများက ချက်ချင်းပင် “လက်မှတ်ကစျေးလျော့ပေးထားတာလား…” ဟု ချက်ချင်းပြန်မေးကြ၏။
ရုန်ယီ ဘာပြန်ပြောရမှန်းမသိ အံ့ဩသွား၏။
လက်မှတ်စစ်ပြီးနောက်ကိုယ်ရေးအချက်အလက်များကိုသွင်းပြီး လက်ဆောင်ထုပ်ကိုယူပြီးသောအခါ ရုန်ယီသူ့လက်မှတ်နှင့်ဆိုလျှင် VIP ပေါက်မှ ဝင်နိုင်ကြောင်း သိလိုက်ရသည်။
ပွဲတွင်းသို့ ဝင်ပြီးသူ့ခုံကိုရှာတွေ့သောအခါ ပို၍ပင် အံ့ဩသွားရ၏။
ပွဲထိုင်ခုံအနေအထားကို ကြည့်ခဲ့စဉ်က သိပ်မသိသာပေ။
ယခုရောက်သောအခါ ကြည့်လိုက်မှ ထိုနေရာမှာ သီးသန့်လေးဖြစ်နေကာ နေရာကောင်းဖြစ်နေ၏။
အနောက်ဘက်ထိုင်ခုံများကြားတွင် မစ္စကျန်းကိုရှာချင်သော်လည်း လှည့်ကြည့်လိုက်သာအခါ ကြီးမားသောလူအုပ်ကြီးကိုသာတွေ့လိုက်ရသည်။
ထိုင်ခုံတွင်ထိုင်နေကာ ဓာတ်ပုံရိုက်လိုက်ပြီး မစ္စကျန်းကိုပို့လိုက်၏။ မကြာခင် ဆဲခံရတော့သည်။
မစ္စကျန်းလည်း သူ့ထိုင်ခုံနေရာမှဓာတ်ပုံကို ဒေါသတကြီးပြန်ပို့၏။ သူ့ရှေ့တွင် အခြားသူများ၏ ဦးခေါင်းများကိုသာ မြင်နေရသည်။
သူ့ကို စကားအနည်းငယ်ပြန်ပြောပြီး နှစ်သိမ့်ပြီးနောက် ရုန်ယီ “ဒီနေ့ နင့်ကို ဘလက်ခ်လစ်စ် ထဲထည့်ထားလိုက်ပြီ…” ဟု အနီရောင်သင်္ကေတနှင့်အတူ ပြန်စာကို ရလိုက်၏။
ပွဲစတင်သည့်အခါ ရုန်ယီ အလွန်ပျော်နေ၏။
သီးသန့်တွေ့ခဲ့ဖူးသည်များ ရှိသော်ငြားလည်း ရုန်ယီသူ့ထိုင်ခုံနေရာမှ စင်ပေါ်ကိုလှမ်းကြည့်ရသည့်ခံစားချက်က လုံးဝကွဲပြားနေသည်။
မော့ယွီဖေးနှင့် တွေ့ခဲ့စဉ် စိတ်လှုပ်ရှားခဲ့သော ခံစားချက်နှင့် နှိုင်းယှဉ်လျှင် ဒီနေ့လိုတွေ့ဆုံရခြင်းကို ပိုပျော်ပြီး ပိုသက်တောင့်သက်သာရှိသည်ဟု ခံစားရသည်။
အမှန်မှာလည်း တစ်စုံတစ်ယောက်ကို ဆက်တိုက်စိုက်ကြည့်နေပါက ရိုင်းစိုင်းရာကျမည်ဖြစ်ပေသည်။
စတိတ်စင်နှင့် နီးကပ်လွန်းသောကြောင့် မော့ယွီဖေး၏ လက်သည်းလေးများကိုပင် သေသေချာချာ မြင်နေရသည်။
စက္ကန့်အမျှ သူ့အိုင်ဒေါမှာ ပြီးပြည့်စုံလွန်းလှသည်ဟု ကောက်ချက်ချနေမိ၏။
နှမြောစွာပင် ရုန်ယီမှာ စိတ်လှုပ်ရှားပျော်ရွှင်နေသည့်တိုင် သူ့စိတ်ထဲမှ မေးခွန်းတစ်ခုကိုမေးနေမိ၏။
“ချန်းခယ့်ယောင်ရော သူ့ကို ဒီလိုပဲ သဘောကျခဲ့တာလား…”
ထိုစိတ်က သူ့ပျော်ရွှင်မှုကို မတတ်သာဘဲ ဖျက်ဆီးနေ၏။
စီစဉ်ထားသော အစီအစဉ်များမှာ များပြားလှ၏။ ကနဦးအစမိတ်ဆက်ပြီးနောက် တင်ဆက်သူက မော့ယွီဖေးနှင့် အင်တာဗျူးကို စလုပ်လေသည်။
နောက်ဆုံးတွင် ပရိသတ်ထဲမှကျပန်းရွေးကာ မေးခွန်းများကို မေးစေ၏။
ထို့နောက် မော့ယွီဖေး လက်တလော ထုတ်ထားသော သီချင်းအသစ်ကို သီဆိုလေသည်။ ထို့နောက် အပြန်အလှန်ပြောဆိုဆက်ဆံမှုများလည်း ပြုလုပ်ကြ၏။
ရုန်ယီ သူ့ကိုယ်သူ သူရဲဘောကြောင်သလိုခံစားရသည်။
ပရိတ်သတ်ထဲမှ တစ်ယောက်ရွေးချယ်မည်လုပ်တိုင်း ကိုယ်လေးကို ကျုံ့ကာ ဘယ်တော့မှလက်မမြှောက်ခဲ့ပေ။
သူ စင်ပေါ် ရောက်သွားပြီး သူမော့ယွီဖေးကို ပြောခဲ့သော တက်ရောက်ရမည့်ပွဲက ယခုပွဲဖြစ်နေသည်ကို သိသွားလျှင် ပိုနေရခက်မည်ဖြစ်သည်။
တင်ဆက်သူက “ဝါး အယ်လ်ဖာပဲ…” ဟူ၍ ပြောလိုက်မည်ကိုလည်း စိုးရိမ်သည််။ သူဒါကို ရှင်းပြရန်မှာ မသေချာသေးပေ။
ပွဲပြီးခါနီးတွင် တင်ဆက်သူက စင်ပေါ်တက်ကာ မော့ယွီဖေးနှင့်သီးသန့် စကားပြောရန် ပရိတ်သတ်တစ်ယောက်ကို ရွေးချယ်မည်ဟု ပြောလေသည်။
ကံထူးသူမှာ အပိုလက်ဆောင်သာမက မော့ယွီဖေးထံမှ လက်ဆောင်လေးတစ်ခုခုကို တောင်းဆိုခွင့်ရရှိမည် ဖြစ်သည်။
ချက်ချင်းပင် ပရိတ်သတ်မှာ တက်ကြွလာ၏။ ရွေးချယ်ရန် တင်ဆက်သူက မော့ယွီဖေးကို ကိုယ်တိုင်ရွေးခိုင်း၏။
ရုန်ယီတိတ်တိတ်လေး သူ့ခုံတွင်သာ ကုပ်နေကာ စင်ပေါ်မှ ခေါင်းလေးစောင်းကာ သေချာစဉ်းစားနေသော မော့ယွီဖေးကို ကြည့်လိုက်ပြီး ရုတ်တရက် တစ်ခုခုကို ကြိုသိနေရသလို ခြောက်လှန့်မှုကို ခံစားလိုက်ရ၏။
ထို့နောက် မော့ယွီဖေးက “အဲ့ဒါဆို…ဒီတိုင်း ကြိုက်တဲ့ခုံနံပါတ်ကို ခေါ်လိုက်ရင်ကောင်းမလား…” ဟုပြော၏။
တင်ဆက်သူက မော့ယွီဖေးကို ခုံနံပါတ်အစီအစဉ်ကိုပြလိုက်၏။
မော့ယွီဖေးလည်း တင်ဆက်သူရှင်းပြသည်ကို ကြားပြီးနောက် စင်ဘယ်ဘယ်အစွန်မှ ညာဘက်အစွန်ထိလျှောက်လာကာ ပရိတ်သတ် အကုန်လုံးကို ကြည့်၏။
အမှန်မှာ အလင်းရောင်ကြောင့် သူသေချာမမြင်ရပေ။
သို့သော် ပရိတ်သတ်များမှာ အလွန်စိတ်လှုပ်ရှားနေကြကာ အများစုမှာ လက်ထောင်ထားကြရုံသာမက မတ်တပ်ရပ်ပြီး ထပါခုန်နေကြ၏။
“အဲ့ဒါဆို နံပါတ်တစ်ခုကို တွေးလိုက်မယ်နော်…” စင်အလယ်ကို ပြန်လာပြီး မော့ယွီဖေးက ပြောလိုကါ၏။ “ … A-2-15 ရှိလား… ”
သူစကားတစ်ခုပြောလိုက်တိုင်း ရုန်ယီနှလုံးခုန်ရပ်မတတ်ပင် ဖြစ်သည်။
မော့ယွီဖေးစကားအဆုံးတွင် စလိုက်မီးက သူ့ပေါ်တည့်တည့်ကျလာကာ ရုန်ယီလည်း ကြက်သေသေသွား၏။
အလွန်အမင်းစိတ်လှုပ်ရှားစွာဖြင့် မတ်တပ်ရပ်လိုက်ပြီးနောက် ထူးဆန်းသည့်အရာတစ်ခုကိုတွေ့သွား၏။
ပွဲထဲမှ လူအားလုံးမှာ သူ့ကိုကြည့်နေကြပြီး သူကမော့ယွီဖေးကိုသာ ကြည့်နေခဲ့သည်။
ထို့ကြောင့် မော့ယွီဖေးသူ့ကိုမြင်သွားသောအခါ ပိုအံ့ဩသွားသည်ကို သူတစ်ယောက်တည်းသာသတိထားမိလိုက်၏။
ထို့နောက် မော့ယွီဖေး မျက်နှာအနည်းငယ်ပျက်သွားသည်။
