နောက်ဆုံးတော့ကျိုးလီချစ်မိသွားပြီ -1
အချိန်အများစုတွင် ကျိုးလီသည်သူ့ကိုယ်သူစိတ်အားရှင်းရှင်းလင်းလင်းထားနိုင်သူဟုယူဆခဲ့သည်။
သို့သော် အင်တာနက်တွင် ရုန်ယီနှင့်ချန်းခယ့်ယောင်တို့လက်ဆွဲနှုတ်ဆက်နေသည့်ဓာတ်ပုံများကိုမြင်ရသည့်အခါ သူသည်တမဟုတ်ချင်းစိတ်ရှုပ်ထွေးရဆဲပင်။
သီအိုရီအရသူအနည်းငယ်ဝမ်းနည်းသင့်သည်ဟုထင်မိ၏။ အပေါ်ယံတွင် ငါတို့က သူငယ်ချင်းကောင်းတွေပါ ဟူသောသဘောမျိုးရှိနေစေကာမူ ရုန်ယီသည်သူမြင်မြင်ချင်းချစ်မိသွားခဲ့သူဖြစ်ပြီးသူ၏နှလုံးသားအတွင်း၌မူကွဲပြားသောခံစားချက်တွေ ရှိနေသည်။
ရုန်ယီ၏အကြည့်များက သူ၏နှလုံးသားမှအနူးညံ့ဆုံးအပိုင်းလေးကို အပြည့်အဝထိုးဖောက်နိုင်သည်။ သူသည်မပင်မပန်းနှင့်မေးထောက်၍အနှီသူကိုတစ်နေကုန်ထိုင်ကြည့်နိုင်သည်။ သည့်အပြင် ရုန်ယီသည် အလွန်စာရိတ္တကောင်းသောလူတစ်ယောက်ဖြစ်နေသည်၊ သူ့အားအဆင်မပြေစေမည့်လူမျိုးမဟုတ်၊ သူတို့၏ရည်ရွယ်ချက်များကိုတစ်မျက်နှာလုံးပြထားပြီး တလျှောက်လုံးအတူနေသွားရန်ကသိကအောက်ဖြစ်စေမည့် Alpha များကဲ့သို့လည်းမဟုတ်ပေ။
ထိုကြောင့် မလွဲမသွေပြောရမည်ဆိုပါက ယခုသူသည်အချစ်၏ဒုက္ခသမားလေးပင်။
အသည်းကွဲနေပါသောကျိုးလီသည် သူ၏ဖုန်းကိုလက်ထဲတွင်ကိုင်ကာ ထိုပုံများကိုနှိပ်ကြည့်သည်၊ ချဲ့ကြည့်သည်၊ အပေါ် အောက် ဘယ်နှင့်ညာကိုကြည့်ကာ နောက်ဆုံး၌ခပ်တင်းတင်းဆုပ်ကိုင်ထားသောလက်နှစ်ဖက်အပေါ်အာရုံစိုက်လိုက်သည်။
ပြီးနောက် သူပြုံးလိုက်၏။
နားမလည်နိုင်လောက်အောင်စိတ်လှုပ်ရှားရမှုက သူ၏နှလုံးသားထဲတွင်ဖြည်းဖြည်းချင်းပြည့်ဖောင်းလာသည်။
အစတည်းကသူရုန်ယီကိုမည်သို့ပြောခဲ့သနည်း။ ထိုသူနှစ်ယောက်ကအတူရပ်နေရုံနှင့်ပင် ပြည့်စုံသွားသည်ဟုမြင်ရစေသည်။ သင်ပိုကြည့်လေ သူတို့နှစ်ယောက်က တစ်ယောက်နှင့်တစ်ယောက်လိုက်ဖက်သည်ဟုပိုမိုထင်ရလေပင်။ မျက်စိပသာဒဖြစ်စေသည်။ ကောင်းကင်ဘုံမှတွဲစပ်ပေးထားခြင်းပင်။
ကျိုးလီသည်စိတ်ထိခိုက်မှုများနှင့်သက်ပြင်းချကာ ရုန်ယီထံ ချက်ချင်း မက်ဆေ့ချ်ပို့လိုက်သည်။
ရုန်ယီထံမှ ပြန်စာမလာခင် မထင်မှတ်ပဲလျိုယွမ်ထံမှဖုန်းဝင်လာခဲ့သည်။ အစတွင်သူသည် အင်တာနက်၌သတင်းတွေ့ပြီး အနှီသူသည်သူနှင့်ရုန်ယီကြားမှပတ်သတ်မှုကိုမေးမြန်းရန်ဖုန်းခေါ် ခြင်းဖြစ်မည်ဟု တွေးခဲ့သည်။ ကျိုးလီသည်ဤကိစ္စအတွက် စိတ်အားအလုံအလောက် ကြိုတင်ပြင်ဆင်ထားသည့်တိုင် ၎င်းကိစ္စမဟုတ်ကြောင်းသိလိုက်ရ၏။
လျိုယွမ်က Weibo မှဂယက်အကြောင်းလုံးဝသိရှိပုံမရသေးလင့်ကစား သူနှင့် takagism ဂိမ်းကစားရန်စိတ်ဝင်စားလားဟုသာ မေးခဲ့သည်။
ကျိုးလီ ချက်ချင်းလက်ခံလိုက်၏။
၎င်းကသူနှင့်လျိုယွမ်အပြင်ထွက်လည်သည့်ပထမဆုံးအကြိမ်မဟုတ်ချေ။
လွန်ခဲ့သောလေးငါးရက်က Wechat အပြန်အလှန်ဖလှယ်ခဲ့ကြပြီးနောက်ပိုင်း လျိုယွမ်က friend circle တွင်အမြဲ မှတ်ချက်များချန်ထားခဲ့တတ်ပြီး မက်ဆေ့ချ်များကိုပင်ပို့တတ်သည်။။ လွန်ခဲ့သည့်ရက်အနည်းငယ်က ကျိုးလီသည်သူ၏သူငယ်ချင်းများနှင့် ရုပ်ရှင်ရုံသွားရန်စီစဉ်ခဲ့သည်။ လက်မှတ်များအားလုံးဝယ်ထားပြီးကြသော်ငြား ရုတ်တရက်သူတို့အဖွဲ့တွင်းမှ တစ်ယောက်မှာအချိန်မီရောက်မလာနိုင်ခဲ့။ သို့ဖြစ်၍ကျိုးလီသည်သူ၏ friend circle တွင်အနီးအနားရှိတစ်ယောက်ယောက်သည် ရုပ်ရှင်တစ်ကားကိုအလကားကြည့်ပြီးပျော်ရမည်ဟုပြောခဲ့သည်။
Friend circle ကို refresh လုပ်ပြီးနောက် သူ၏မက်ဆေ့ချ်ဘေးမှနောက်ဆုံးပို့စ်သည် လျိုယွမ်တင်ထားသောမော်ဒန်ကဗျာတစ်ပုဒ်ဖြစ်နေသည်ကိုတွေ့လိုက်သည်။ ကျိုးလီသည် အနှီရှားပါးသောအချိန်အခါ၌၎င်းကိုနားလည်ပေးနိုင်ခဲ့သည်။ ဤလူသည် ပျင်းရလွန်း၍သေတော့မည်ဟုဖော်ပြထားသည်။
ရှင်းမပြတတ်သောဖိအားအချို့ကြောင့် ကျိုးလီသည်ထိုလူ၏ profile ကိုဖွဖွတို့ထိပြီး မက်ဆေ့ချ်ပို့လိုက်သည်။
အမှန်အတိုင်းဆိုရသော် လျိုယွမ်သည်သူ့အား မြင်ရတိုင်းခေါင်းကိုက်စေမည့် ဆိုးရွားသောအမြင်မျိုးပေးခဲ့သည်။ ထိုအချိန်က ကျိုးလီသည်အနှီသူနှင့်မလိုအပ်ဘဲ မည်သို့သောရင်းနှီးကျွမ်းဝင်သည့်အဆက်အသွယ်မျိုးမှမလုပ်ချင်တော့ချေ။
သို့ထိတိုင် ဘဝတွင်လိုအပ်ချက်မျိုးစုံရှိသည်။
သို့သော်ထိုသို့သောလိုအပ်ချက်များကို အကြိမ်ရေမြောက်မြားစွာတွေ့ရှိရပြီးနောက် အနှီသတိမေ့တတ်ပုံရသော Alphaအပေါ် ကျိုးယီ၏အမြင်မှာဒရမ်မာဆန်ဆန် ပြောင်းလဲသွားသည်။
အချို့သောလူတို့သည် အလွန်ထူးဆန်းသည်၊ သူတို့သည်ရယ်စရာမကောင်း သို့မဟုတ် ဟာသမလုပ်တတ်သည့်နှယ်၊ အတန်ငယ်ရူးကြောင်ကြောင်နိုင်သည်ဟုထင်ရသော်လည်း အခြားသူများကသူတို့အား စိတ်ဝင်စားစရာကောင်းသည်ဟုထင်တတ်ကြသည်။ လျိုယွမ်ကသူတို့ထဲမှ တစ်ယောက်ပင်။
ကျိုးလီသည်တစ်ခါက သူ၏ friend circle တွင်ပေါက်ကရပြောခဲ့ဖူးသည်၊ ရုပ်ပိုင်းဆိုင်ရာစစ်ဆေးမှုအပြီးဆရာဝန်က သူသည်နောက်ထပ်ငါးစင်တီမီတာဖွံ့ဖြိုးနိုင်သေးကြောင်း ပြောခဲ့သည်။ တခြားသူငယ်ချင်းများအားလုံးကသူ့အား အမူးပြေအောင်လုပ်ပြီးသူ့ကိုယ်သူမလိမ်ရန်ပြောကြသည်။ လျိုယွမ်တစ်ယောက်တည်းကသာအံ့အားသင့်သောအမူအရာဖြင့်ပြောခဲ့သည်။
"ကောင်းတာပေါ့၊ ဂုဏ်ယူပါတယ်"
ထို့ကြောင့်ကျိုးလီကသူ့အား ရုပ်ပိုင်းဆိုင်ရာစစ်ဆေးမှုရလဒ်များသည်သူ Alpha အဖြစ်ပြောင်းလဲ၍ရသေးသည့်အကြောင်းဆက်လိမ်နေခဲ့သည်။
လျိုယွမ်သည် အနည်းဆုံးနာရီဝက်ခန့်နှုတ်ဆိတ်နေပြီးနောက်ရုတ်ချည့် အင်တာနက်ပေါ်တွင်တွေ့ရှိရသည့်အချက်အလက်တတန်းကြီးအား ပို့ပေးလာသည်။
ဒီလိုကိစ္စမျိုးတွေကတကယ်ရှိပုံရတယ်၊ ဒါပေမဲ့ ကုသမှုတစ်ခုလုံးကအရမ်းနာလိမ့်မယ်၊ မပြီးမြောက်တဲ့ပြောင်းလဲမှုကနေ နောက်ဆက်တွဲဆိုးကျိုးအချို့ခံစားရဖို့က လွယ်တယ်လို့ပြောထားတယ်၊ ဆေးရုံကိုမကြာမကြာသွားဖို့ သတိရမှဖြစ်မှာနော်!"
ကျိုးလီသည် ရှက်လည်းရှက်သွားသည်။ သူသည်လုံးဝအဓိပ္ပါယ်မရှိသည့်စကားများပြောခဲ့သည့်အကြောင်းရိုးရိုးသားသားပြောမှဖြစ်မည်။
လျိုယွမ်ကအစက်တန်းလေးပို့ကာ ပြောလိုက်သည်။
"မင်းဒီလောက်ဆိုးမယ်လို့ငါမထင်ထားဘူး!"
သူကအလွန်အူကြောင်ကြောင်နိုင်သည့်တိုင် အလွန်စိတ်ဝင်စားရန်လည်းကောင်းသည်။
သူ့အားရုပ်ရှင်ကြည့်ရန်ဆိုင်းမဆင့်ဗုံမဆင့်ပြောခဲ့ပြီးသားဖြစ်ကြောင့် ကျိုးလီ အနည်းငယ်စိတ်လှုပ်ရှားနေသော်ငြား မကြာခင်မှာပင်စိတ်ပေါ့ပါးလာသည်။
ရုပ်ရှင်တဝက်အရောက်၌လျိုယွမ်က ကျိုးလီကိုခပ်တိုးတိုးပြောခဲ့၏။
"ငါဒီဇာတ်ကားရဲ့ spoilers တွေကိုကြည့်ဖူးတယ်၊ နောက်ဆုံးပိုင်းမှာ ဇာတ်လိုက်နှစ်ယောက်စလုံးသေသွားတယ်လေ"
လျိုယွမ်ထိတ်လန့်သွားသည်။ ထို့နောက် အန္တရာယ်ရှိသောမြင်ကွင်းကိုမြင်ရတိုင်း ကြောက်ရွံ့ထိတ်လန့်မှုများဖြစ်လာသည့်ခံစားချက်ကသတိပေးသံမြည်လာသည်။
ရုပ်ရှင်ပြီးသည်အထိ ဇာတ်လိုက်နှစ်ယောက်သည် နေဝင်ချိန်နောက်ခံထားကာတစ်ယောက်နှင့်တစ်ယောက်အရူးအမူးနမ်းရှုံ့ခဲ့ကြ၏။ လျိုယွမ်သည်ခပ်အေးအေးပင် အသံနှိမ့်ကာမေးလိုက်သည်။
"အခု တစ်ခုခုဖြစ်တော့မှာလား"
ကျိုးလီ သူ၏ရယ်သံကိုထိန်းလိုက်သည်။
"ငါလည်းတကယ်မသိဘူး။"
ရုပ်ရှင်ခရက်ဒစ်များပေါ်လာသည်အထိ လျိုယွမ်ဒေါသထွက်နေသည်။
"ပို့စ်ခရက်ဒစ်ဇာတ်ဝင်ခန်းတွေထဲမှာ ကြေကွဲဖွယ်ဇာတ်သိမ်းကိုပြလို့မရဘူးလေ၊ ရလို့လား"
သူကမေးလာသည်။
ကျိုးလီသည်ဟန်ဆောင်ပန်ဆောင်ဖြင့်
"အာ...ငါ Spoiler ပေးတဲ့သူတွေဆီကအလိမ်ခံလိုက်ရပြီဖြစ်မယ်"
လျိုယွမ် သက်ပြင်းတစ်ချက်ချကာဆို၏။
"ဒီတာဝန်မဲ့လူကတကယ်ဆိုးတာပဲ"
ထိုနေ့တွင် သူတို့လမ်းခွဲကြသောအခါ လျိုယွမ် သည် သူ၏ရုပ်ရှင်လက်မှတ်များအတွက် သူ့အားကျေးဇူးတင်ကြောင်းပြောကာ အခွင့်အရေးရလျှင်သေချာပေါက်ကျေးဇူးပြန်ဆပ်မည့်အကြောင်းအလေးအနက်ထား၍ပြောခဲ့သည်။
takagism ဂိမ်းလက်မှတ်များသည် ရုပ်ရှင်လက်မှတ်များထက် ပိုဈေးကြီးသည်။ လျိုယွမ်သည်၎င်းအနက်တစ်ခုက သူငယ်ချင်းတစ်ယောက်ကပေးထားခြင်းဖြစ်ကြောင်းပြောခဲ့၏။ သူသည်ဤသို့သောကစားနည်းက တစ်ယောက်တည်းသွားလျှင်ပျင်းစရာကောင်းသည်ဟုထင်၍ သူနှင်အတူသွားရန်တစ်စုံတစ်ယောက်ကို ရှာချင်ခဲ့သည်။ သူတို့သည်လက်မှတ်တစ်စောင်တည်းသာဝယ်ရန်လိုအပ်သောကြောင့် ကုန်ကျစရိတ်မှာမဆိုးလှ။
ဂိမ်းအခန်းကိုမကြာသေးခင်ကပြန်လည်ပြင်ဆင်ခဲ့သည်ဟုပြောကြပြီး ကြည့်ရသလောက်အတော်လေးကောင်းမွန်လှသည်။ ကျိုးလီသည်အလွန်စိတ်လှုပ်ရှားနေကာ လျိုယွမ်သည်ကားပို၍ထိတ်လန့်နေပုံရ၏။
ပထမအခန်းသို့လျှောက်သွားပြီးအလယ်တွင်လဲလျောင်းနေသော အလောင်းတစ်လောင်းကိုတွေ့လိုက်ရသောအခါ အော်ဟစ်မိလိုက်ပြီးသူ၏ပုံရိပ်ကိုလုံးဝဖျက်ဆီးပစ်လိုက်သည်။
ကျိုးလီခမျာအနှီသူအားအမြန်နှစ်သိမ့်ရသည်။
အိုကေပါတယ်၊ အဲဒါတွေအကုန်လုံးကအတုတွေပါ၊ အိုး...မဟုတ်ဘူးတကယ်ကြီးတွေဟ!""
လျိုယွမ် အခန်းထဲမှချက်ချင်းဆုတ်ပြေးတော့သည်။
မကြာမီ သူ၏လွဲမှားသွားသည့်အပြုအမူများကို နားလည်သွားပုံရကာသူ့ကိုယ်သူအားတင်းကာပြန်လာပြီးလည်ချောင်းရှင်းလိုက်၏။
"အင်း၊ အတော်လေးကောင်းတဲ့ဖန်တီးမှုပဲ"
မီးဖွင့်ကာတစ်ခန်းလုံးအားလှည့်ပတ်ရှာဖွေကြပြီးနောက် ကျိုးလီသည် အလောင်းယောင်ဆောင်သောမင်းသားကိုပတ်ချာလှည့်ကာ ပြောလိုက်သည်။
"သူ့ကိုယ်အောက်မှာ သဲလွန်စရှိနိုင်လောက်လား"
" ငါတော့မထင်ဘူး"
လျိုယွမ် တုံ့ဆိုင်းသွားသည်၊
"ဒါမှမဟုတ် မင်းသူ့အိတ်တွေကိုအရင်စစ်ကြည့်ပါလား"
ကျိုးလီက အပေါ်အောက်ကြည့်သည်။
"ဒါပေမဲ့ သူ့အဝတ်အစားမှာအိတ်ကပ်မှမရှိတာ!"
ထို့ကြောင့် နှစ်ယောက်သားဆိုဖာဘေးတွင်ရပ်ကာ အလောင်းကိုခပ်တွေတွေငုံ့ကြည့်နေကြပြီး အတွေးများအတွင်းနစ်မျောနေကြသည်။
အလောင်း၏မျက်နှာသည် သိမ်မွေ့သည့်ပုံစံပြောင်းသွားချိန်မှကျိုးလီက နောက်ဆုံးတွင်ပြောလာသည်။
"မဖြစ်နိုင်တာရွှေ့ဖို့လိုတယ်ဆိုရင် အလောင်းတုကိုဒီနေရာရွေ့ထားမှာပေါ့၊ ဟုတ်တယ်မလား"
လျိုယွမ်က ၎င်းကိုတွေးကြည့်ပြီးလက်ခံလိုက်၏။
"မင်းကအရမ်းတော်တာပဲ"
ထို့ကြောင့် သူတို့လှည့်ပတ်ပြီးအခန်းထဲတွင်ဒုတိယအကြိမ် ဆက်လက်ရှာဖွေကြပြန်သည်။
အဆုံး၌စာအုပ်စင်၏အပေါ်ဆုံးတွင်ဖြတ်သန်းရမည့်ကုဒ်ကို တွေ့လိုက်ကြသည့်အခါအခက်အခဲမရှိတော့ပေ၊ နောက်အခန်းသို့ဝင်ရန် စီစဉ်ကြသည်တွင် တံခါသို့အရောက်၌လျိုယွမ်သည်ကျိုးလီပုခုံးကိုအသာပုတ်ကာအသံနှိမ့်၍ပြောလိုက်၏။
"အဲဒီလူကိုကြည့်၊ သူအိပ်ပျော်နေတာလား"
ကျိုးလီ ခြေဖျားထောက်ကြည့်လိုက်သည်။ အလောင်းသည်အသက်ရှု နေပုံရပြီး သူ၏အမူအရာကပြေလျော့နေကာ သူ၏ကိုယ်ဟန်အနေအထားမှာလည်းအနည်းငယ်ကွဲပြားသွားဟန်ရှိသည်။
"ငါအရမ်းပျော်တာပဲ"
ကျိုးလီကပြောသည်။
"ငါလည်းဒီမှာအလုပ်လုပ်ချင်တယ်"
နောက်အခန်းသည် အံ့အားသင့်ဖွယ်ကောင်းလောက်အောင်လွယ်ကူ၏။
လျိုယွမ်ဝင်လာသည်နှင့်ပြောသည်မှာ
အို၊ ဒီအခန်းကိုဟောင်းနေတဲ့ပုံပေါက်အောင်တမင်လုပ်ထားတာဖြစ်မယ်၊ အမှတ်အပြည့်ပေးတယ်၊ ဒီဟာကသဲလွန်စလား?"
ထို့နောက် ရုတ်တရက်သူခေါင်းငုံ့လိုက်သည်။
"ငါတစ်ခုခုနင်းမိပြီ"
မဝေးလှသောနံရံပေါ်မှခလုတ်ဖိလိုက်သလိုအသံထွက်ပေါ်လာသည်။
နံရံကိုတွန်းဖယ်ပြီးနောက် လျိုယွမ်အသက်ပြင်းပြင်းရှူလိုက်သည်။
ကျိုးလီ အံ့ဩသွားသည့်တိုင်မကြာမီအပြင်းအထန်စိတ်လှုပ်ရှားလာသည်။ သူသည်လျှို့ဝှက်ဆန်းကြယ်သောအခန်းကိုမရေမတွက်နိုင်အောင် လှည့်ပတ်လျှောက်နေသော်ငြား သူတို့ရှေ့ရှိတားအဆီးများကြောင့် စင်ပေါ်ရှိစုဆောင်းထားသည့်ပစ္စည်းများကိုအနီးကပ်ကြည့်ရန်ခက်ခဲပြီး ရှင်းရှင်းလင်းလင်းမမြင်ရပေ။
"ငါဒီနေရာမှာရှာကြည့်လိုက်မယ်"
ကျိုးလီသည်ပြောပြီး လျိုယွမ်ကိုနောက်လှည့်ကာပြုံးပြသည်။
"မင်းအပြင်မှာစောင့်နေလို့ရတယ်!"
လျိုယွမ်သည်တခဏတွေဝေနေကာ မထင်မှတ်ဘဲဝင်လာသည်။
"အိုကေပါတယ်၊ ငါအိုကေတယ်၊ ငါအဲဒါတွေကိုအရမ်းမကြောက်ပါဘူး။"
သူကထိုအတိုင်းပြော၍ အဆင်ပြေသွားသည်။ ကျိုးလီက ပြိုင်မငြင်းတော့ပေ။ သူ လုံခြုံရေးအကာတစ်လျှောက်မှပုလင်းများနှင့်သံဗူးများကို ဂရုတစိုက်ဆက်ကြည့်နေခဲ့သည်။
"ဒီမှာငါတို့ရှာဖို့လိုတဲ့အဓိကပစ္စည်းကဒီနေရာမှာရှိမယ်လို့မထင်ဘူး၊ မဟုတ်ရင် ငါတို့ကိုဒီလိုမျိုးခွဲခြားထားမှာမဟုတ်ဘူး၊ မင်းရောဘယ်လိုထင်လဲ"
ကျိုးလီကမေးလာသည်။
"အဓိပ္ပါယ်ရှိတယ်၊ မင်းကအရမ်းတော်တာပဲ!"
လျိုယွမ်ကခေါင်းညိတ်ပြီး ဖန်ခရားထဲမှမြွေအရှင်တစ်ကောင်ထံသွားလိုက်သည်။
ကြည့်၊ ဒီကောင်ကအကာမရှိဘူး၊ အထဲမှာတစ်ခုခုရှိနေတယ်လို့ဆိုလိုတာများလား"
သူပုလင်းအနောက်ကိုလှမ်းကြည့်ပြီးလက်ဆန့်ကာ ထောင့်စွန်းမှအဖုံးထူနှင့်စာအုပ်တစ်အုပ်ကိုဆွဲထုတ်လိုက်သည်။
"ဒါကိုကြည့်"
အဖုံးကိုဖွင့်လိုက်ပြီး မှောင်မည်းနေသောအခန်းအပြင်ဘက်မှလင်းထိန်သောအခန်းသည် ရုတ်တရက်မှောင်ကျသွားသည်။
"အိုး...ဘုရားရေ!"
လျိုယွမ်ကြက်သေသေသွားသည်
သူမသိရသေးခင် မျက်နှာကျက်မှအလင်းရောင်တစ်ခုဖြာကျလာသည်။ အလင်းရောင်အတွင်းတွင် ထိုအခန်းထဲမှအလောင်းကောင်သည် ဖြည်းညှင်းစွာဖြင့်အခန်းတွင်းသို့ဝင်လာသည်။
"ဘာလဲဟ? အလောင်းကအသက်ပြန်ဝင်လာတာလား
လျိုယွမ်ကမှင်သက်နေ၏။
ကျိုးလီသည် ခဏမျှစဉ်းစားနေပြီး
"အဲဒီလိုတော့မထင်ဘူး။ ကြည့်လေ၊ သူ့အဝတ်အစားလဲထားပြီးပြီ"
ထိုလူသည်လမ်းလျှောက်လာလျက် သူ့ကိုယ်သူစကားပြောလာသည်။ သူတို့ရုတ်တရက်နားလည်သွားကြသည်။ လျိုယွမ်သည် အိမ်ပိုင်ရှင်၏ ဒိုင်ယာရီကိုရှာတွေ့ခဲ့သည်။ လူသေအလောင်းအဖြစ်သရုပ်ဆောင်ရသောမင်းသားသည် သူတို့သိရန်လိုအပ်သောဒိုင်ယာရီ၏အစိတ်အပိုင်းတစ်ခုအားတစ်ဦးတည်းစကားပြောပုံစံဖြင့်ဖတ်ပြရသည်။
ဤဂိမ်းတွင် ဟာသဇာတ်လမ်းတိုလေးများပင် ပါဝင်သည်။ ဖျော်ဖြေရန် သရုပ်ဆောင်အစစ်များလိုအပ်နေသည်မှာအံ့အားသင့်စရာမဟုတ်။ ပျင်းလွန်း၍အိပ်ပျော်တော့မည့်မင်းသားသည် ကူးစက်စေလောက်သောအံ့ဩဖွယ်ဖျော်ဖြေရေးစွမ်းရည်များရှိပြီး လူများအသက်ပင်ရဲရဲမရှူနိုင်စေသည်အထိဖြစ်စေသည်။
မင်းသားကနောက်ဆုံးပြန်ထွက်သွားသည့်အခါ အပြင်ရှိအခန်းသည်နောက်တစ်ကြိမ်လင်းထိန်လာပြန်သည်။ ကျိုးလီသည်တိုးညှင်းသော အသံဖြင့် ပြောသည်။
"ဝိုး...ငါဒီအလုပ်မလုပ်နိုင်ဘူး၊ ဩချလောက်ပါပေတယ်၊ ဒါပေမဲ့ သူအခုလေးတင်ပြောသွားတာကိုမင်းမှတ်မိလား...."
သူပြောတာက သူ့ရဲ့ဒိုင်ယာရီထဲမှာသံသယဖြစ်စရာအကောင်းဆုံးအချက်ကိုရေးခဲ့တယ်တဲ့"
လျိုယွမ်အပြင်ထွက်ပြီး မော့ကြည့်လိုက်သည်။
မင်းကငါ့ထက်ဉာဏ်ကောင်းတယ်၊ အဲဒီမှာဘယ်လိုအသုံးဝင်တဲ့သဲလွန်စရှိလဲ ကြည့်ရအောင်"
ထို့နောက်သူတို့သည်သုံးခန်းဆက်တိုက်ဖြတ်ကျော်ခဲ့ကြပြီး ပြဇာတ်တို သုံးခုကိုကြည့်ခဲ့ကြသည်။ နောက်ဆုံး၌ သူတို့ထွက်ပေါက်ရောက်လာသည့်အခါ ထပ်ဆော့ချင်ကြဆဲပင်။
"ဒီဂိမ်းကငါဆော့ဖူးသမျှထဲမှာ စိတ်ဝင်စားစရာအကောင်းဆုံးပဲ"
ကျိုးလီသည် ခံစားချက်ကောင်းနေ၏။
"အပြန်အလှန်အကျိုးသက်ရောက်တဲ့ရုပ်ရှင်တစ်ကားကြည့်နေရတဲ့အတိုင်းပဲ"
လျိုယွမ် က သက်ပြင်းချရင်းဆိုသည်။
မင်းတကယ်ကိုစိတ်မြန်လက်မြန်ရှိတာပဲ။ ငါသာဆိုရင်အခုထိဒုတိယခန်းထဲမှာပဲပိတ်မိနေအုံးမှာ။
တစ်လမ်းလုံးအနှီသူသည် သူ့အားအကြိမ်ကြိမ်ချီးမွမ်းနေခဲ့ပြီးကျိုးလီသည် မလွဲမသွေရှက်နေခဲ့ရသည်။ သို့သော်ငြား တစ်ချိန်တည်းမှာပဲ သူအနည်းငယ်ကျေနပ်နေသည်။
"အင်း၊ ငါကဒီအတိုင်းအဲဒီလိုမျိုးအကြံတွေထွက်လာဖို့ဖြစ်သွားရုံပါပဲ"
သူလက်ခုပ်တီးလိုက်သည်။
"ဒီလိုစိတ်ဝင်စားစရာကောင်းတဲ့ဂိမ်းမျိုးကို ကစားရအောင်ခေါ်လာပေးတဲ့အတွက်မင်းကိုကျေးဇူးတင်ပါတယ်၊ ငါမင်းကိုညစာလိုက်ကျွေးမယ်!"
လျိုယွမ်က ယဉ်ကျေးမှုပြရန်ကြိုးစားနေပြီး နောက်ပိုင်းစားသောက်ဆိုင်သို့ပျော်ပျော်ကြီး အတူသွားကြသည်။ လမ်းတွင်ကျိုးလီထံဖုန်းဝင်လာ၏။
ထို့နောက် သူ၏ခေါင်းမှာပေါက်ကွဲသွားသလိုမျိုးခံစားလိုက်ရ၏
Xxxxxx
