MM Story Teller

အပိုင်း ၁၆၀

Viewers 34k

Chapter 160

ချင်ချန်းယီ ထိုသတင်းကိုသိရှိပြီးနောက် မော့အာ့ချမ်ကို ချက်ချင်း ဆက်သွယ်ခဲ့သည်။

မော့အာ့ချမ်သည် မနေ့ညက မော့လျှိုကွေ့ဖမ်းဆီးခံရသည့် ကောလဟာလကို ရရှိခဲ့သည်။ ကံမကောင်းစွာပင် ရဲဌာန၌ သူ့ 'အသိမိတ်ဆွေများ' မရှိသဖြင့် မော့လျှိုကွေ့ ဘာကြောင့် ဖမ်းဆီးခံရသည်ကို မသိပေ။ သူမကို အာမခံပေးရန် မစွမ်းဆောင်နိုင်သည်ကြောင့် သူ ချင်ချန်းယီဆီ ချက်ချင်း ဖုန်းဆက်လိုက်သည်။ သို့သော် ထိုအချိန်တွင် ချင်ချန်းယီသည် ချင်ကွမ်းကျယ်နှင့် ဆွေးနွေးနေခဲ့သောကြောင့် ဖုန်းမကိုင်ခဲ့ပေ။ သူ ဆက်သွယ်လို့ရသောအခါ ဖြစ်ပျက်ခဲ့သမျှကို ရှင်းပြထားပြီး မော့လျှိုကွေ့ အဆင်ပြေသွားမှာ သေချာသည်ဆိုသည့် စာတိုလေးတစ်စောင်သာ ပေးပို့ခဲ့သည်။

မော့အာ့ချမ် သူ့စာတွေကို ဖတ်ပြီး ဒေါသမထွက်ခင် ခဏတာ မယုံနိုင်ဖြစ်သွားသည်။ သူ့ရဲ့ အဖိုးတန် ညီမလေးက ရာဇ၀တ်မှုနှင့် တရားစွဲခံရလိမ့်မည်ဟု မတွေးမိပေ! ချင်ချန်းယီကြောင့် အားလုံးက ဖြစ်ရတာပင်!

မော့အာ့ချမ်သည် အပြစ်ပြန်ပေးဆပ်ရန် ချင်ချန်းယီကို အပြေးအလွှားသွားရှာပြီး သူ့ညီမကို လွတ်အောင်လုပ်ခိုင်းသော်လည်း ချင်ချန်းယီမှာ သူ့အတွက် အချိန်မရှိပေ။ မော့လျှိုကွေ့သည် သူ့သဘောနှင့်သူ သိုလှောင်ခန်းထဲသို့ ဝင်လာသည့် သက်သေ မော့တိ၌ ရှိကြောင်းသိပြီးနောက် ချင်ချန်းယီက သူမကိုကူညီရန် သူ စဉ်းစားမိသမျှ သူအားလုံးကို ဆက်သွယ်ခဲ့သည်။ အဖြေရှာရန် အကြီးအကျယ် စိတ်ပင်ပန်းခံခဲ့ပေမဲ့ သူတို့အားလုံး မျှော်လင့်ချက်မဲ့စွာ လမ်းဆုံးသို့ ရောက်ရှိလာသည်။

သူ မော့လျှိုကွေ့ကို ပြစ်တင်ကြိမ်းမောင်းချင်ပေမဲ့ ထိုကဲ့သို့ လုပ်ခဲ့လျှင်တောင် သူမကို ပြစ်မှုက လုံးဝ လွတ်မြောက်စေနိုင်မည် မဟုတ်ပေ။ မော့တိ၏ သက်သေအထောက်အထားများသည် ငြင်းဆို၍မရပေ။ မော့လျှိုကွေ့သည် ဤအရာမှ လွတ်မြောက်ရန် နည်းလမ်းမရှိပေ!

မရေမတွက်နိုင်သော အဖြေများစဥ်းစားပြီးနောက် သူတို့ မိုက်မဲစွာ အသနားခံစာကို မတင်ဘူးဆိုလျှင် အရာအားလုံး နောက်ကွယ်မှ ချုပ်ကိုင်သူဖြစ်ကြောင်း သူ ဝန်ခံရမည်ကို ချင်ချန်းယီ နားလည်ခဲ့သည်။ ဤအရာအားလုံးတွင် သူမ၏တာဝန်ယူမှုကို လျှော့ချရန် ထိုနည်းလမ်းသည် အကောင်းဆုံးပင်ဖြစ်သည်။

သို့သော် ဤသို့ပြုလုပ်လျှင်တောင် မော့လျှိုကွေ့သည် ပြစ်ဒဏ်ချမှတ်ခံရနိုင်သေးသည်။ လူသတ်ရန် ကြိုးစားသည့်အကြောင်း သူမ ကြိုတင်သိရှိထားခြင်းမရှိဟု သူ အခိုင်အမာပြောလျှင်တောင် ဓားစာခံများ၊ ပြန်ပေးဆွဲသူများနှင့် စကားပြောဆိုခြင်းက သူမအား ကြံရာပါဖြစ်စေနိုင်သေးသည်။

ချင်ချန်းယီ မော့အာ့ချမ်နှင့် တွေ့ဆုံရန် ဆုံးဖြတ်လိုက်သည်။

မော့အာ့ချမ်သည် ချင်ချန်းယီကို မြင်သည်နှင့် တပြိုင်နက် ပြေးလာပြီး သူ့အား ရက်စက်စွာ ထိုးလိုက်သည်။ ချင်ချန်းယီသည် ပထမထိုးချက်ကို သည်းခံခဲ့သော်လည်း မော့အာ့ချမ် သူ့လက်ကို ထပ်မံ မြှောက်လိုက်သောအခါတွင် ချင်ချန်းယီ ဖမ်းကိုင်လိုက်ပြီး နောက်ဘက်သို့ လိမ်လိုက်သည်။

သူ မော့အာ့ချမ်ကို အေးစက်စွာကြည့်ပြီး ပြောလိုက်သည်။ " ရှောင်ကွေ့ကို မကယ်ချင်ဘူးဆိုရင် အခု ထွက်သွားလို့ရတယ်"

"သူမနာမည်ကို ထည့်ပြောဖို့ မင်းမှာ ဘယ်လိုတောင် သတ္တိရှိရတာလဲ!" မော့အာ့ချမ်သည် ချင်ချန်းယီကို သတ်ချင်လောက်အောင် ဒေါသတကြီးစိုက်ကြည့်ကာ "ရှောင်ကွေ့ ဒီအရှုပ်အထွေးထဲ ရောက်သွားတာ မင်းကြောင့်ပဲ!"

လူသတ်မှုဖြင့်စွပ်စွဲချက်သည် သတ်ရန်ကြိုးစားရုံနှင့်ပင် အကျဉ်းသားအများစုကို ထောင်ထဲတွင် ဆယ်စုနှစ်တစ်ခုကျော်ကြာအောင် ထိန်းသိမ်းထားနိုင်သည်။ မော့လျှိုကွေ့သည် ဂျူရီအဖွဲ့ဝင်များထံမှ စာနာသနားမှုကို ရရှိပြီး ထောင်ထဲတွင် ကောင်းမွန်စွာ ပြုမူခဲ့မည်ဆိုလျှင်တောင် သူမသည် ထိုနေရာတွင် အနည်းဆုံး ငါးနှစ်မှ ခြောက်နှစ်အထိ နေထိုင်ရမည်ပေ!

[TN:ဂျူရီ - တရားရုံးတွင် စီရင်ချက်ချရသည့် ပုဂ္ဂိုလ် ဆယ့်နှစ်ဦးပါဝင်သောအဖွဲ့]

ငါးနှစ်မှ ခြောက်နှစ်! သူ့ညီမကို ငါးနှစ် ခြောက်နှစ်အထိ ထောင်ထဲမှာ ဘယ်လိုနေခွင့်ပြုနိုင်မှာလဲ?!

ချင်ချန်းယီသည်လည်း မိမိကိုယ်ကို အပြစ်တင်နေပြီး မော့အာ့ချမ်နှင့် ငြင်းခုံရန် စိတ်မ၀င်စားပေ။ သူ မျက်နှာကြီး မည်းသွားပြီး ပြောလိုက်သည်။

"ရှောင်ကွေ့ကို ဘယ်လိုကယ်မလဲဆိုတာ မင်းနဲ့ ဆွေးနွေးဖို့ လာခဲ့တာ ရန်ဖြစ်ဖို့ မဟုတ်ဘူး။ သူများကို အပြစ်တင်ဖို့က အရေးကြီးတယ်လို့ ထင်ရင် ဒါဆို မင်း အခုချက်ချင်း ထွက်သွားလို့ရတယ်"

"ချင်ချန်းယီ ငါ့ညီမအတွက် ငါ အခု မင်းကို သည်းခံလိုက်မယ်။ ဒါပေမယ့် အနှေးနဲ့အမြန်တော့ မင်းအပြစ်တွေကို ပြန်ပေးဆပ်ရအောင် ငါ လုပ်ပြမယ်" မော့အာ့ချမ် သူ့ဒေါသကို ထိန်းလိုက်ပြီး နောက်ပြန်ဆုတ်လိုက်သည်။

"မင်း အစီအစဥ်က ဘာလဲ..."

ချင်ချန်းယီ မော့အာ့ချမ်ကို မျက်လုံးမှေးကြည့်လိုက်သည်။ မကျေနပ်မှုတွေကို ဘေးဖယ်ထားပြီး သူ့အစီအစဉ်အကြောင်းကို ပြောပြလိုက်သည်။

ချင်ချန်းယီသည် သူ့ညီမကို စိတ်ဝေဒနာရှင်အဖြစ် သတ်မှတ်မည့်အကြောင်း မော့အာ့ချမ် ကြားလိုက်ရသည့်အချိန်၌ မသိစိတ်အရ သူ လုံးဝ ပြင်းပြင်းထန်ထန် သဘောမတူခဲ့ပေ။

ဒါပေမယ့် သူ စိတ်ငြိမ်သွားပြီးနောက် ဒါက သူမကို ကယ်တင်ရန် အကောင်းဆုံးနည်းလမ်းဆိုတာ သူသိလိုက်သည်။

ချင်ချန်းယီ ထည့်ဖြည့်ပြောလိုက်သည်။

“ဒါက ရှောင်ကွေ့ကို ရာဇ၀တ်မှုစွဲချက်တွေကနေ လွတ်ငြိမ်းချမ်းသာခွင့် ပေးရုံလောက်ပါပဲ။ ကျွန်တော် သူ့ကို စိတ်ကျန်းမာရေးဆေးရုံကို မပို့ပါဘူး။ အများဆုံးအနေနဲ့ သူမ အဲဒီမှာ ရက်အနည်းလောက်နေရုံပါပဲ။ ရှောင်ကွေ့ နေဖို့အတွက် အဆင့်မြင့် စိတ်ရောဂါကုဆေးရုံကို ဝယ်လိုက်မယ်။ သူမ လက်ရှိအချိန်မှာ အာရုံစိုက်ခံနေရတာကို ရှောင်ရှားဖို့ပဲ လိုတယ်။ ပြီးရင် သူမ အဆင်ပြေသွားမှာပါ

“ဒါ့အပြင်…” ချင်ချန်းယီ မော့အာ့ချင်ကို ကြည့်ပြီး “သူ့အစ်ကိုအနေနဲ့ မင်းရဲ့တန်ဖိုးကို ပြတာ ပိုကောင်းလိမ့်မယ်။ အချိန်တန်လို့ သူ့ကို ဂရုမစိုက်နိုင်တော့ဘူးဆိုရင်..."

"ဒါမဖြစ်နိုင်ဘူး” မော့အာ့ချမ် ချင်ချန်းယီကို ခါးသီးစွာ ကြည့်ပြီး “ဒါပေါ့ ငါ ရှောင်ကွေ့ကို ကောင်းကောင်းဂရုစိုက်မယ်။ ဒါပေမယ့် စိတ်ဝေဒနာရှင်လို့ သတ်မှတ်ခံရတာကို သူမ လက်မခံရင် ဘယ်လိုလုပ်မလဲ? ချင်ချန်းယီ မင်း ဒီလိုမျိုးရော စဥ်းစားဖူးလား..."

......

ချင်ချန်းယီနှင့် မော့အာ့ချမ်တို့ရဲ့ ဆွေးနွေးမှု အသေးစိတ်ကို မော့တိ မသိသော်လည်း ခန့်မှန်း၍ရနိုင်သေးသည်။

အသနားခံမှုကို မော့မိသားစုနှင့် ချင်ချန်းယီတို့ မိုက်မဲစွာ အသုံးပြုလာရန်အတွက် သူက မော့လျှိုကွေ့ကို ပြန်ပေးဆွဲမှု လူသတ်မှုတို့နှင့် စွဲချက်တင်ခံရစေရန် သေချာအောင်လုပ်ရမည်။ ထို့ကြောင့် သူသည် အစ်မမုံ့ကို သွားတွေ့ပြီး အမှုကို လမ်းကြောင်းမှန်သို့ ကူညီ 'ပို့ဆောင်' ပေးခဲ့သည်။

ရိုးရိုးရှင်းရှင်းပြောရလျှင် မော့လျှိုကွေ့၏ ရာဇ၀တ်မှုသည် ပြောင်းလဲမသွားပေ။

သို့သော် မော့တိ လိမ်လည်စွပ်စွဲခဲ့ခြင်း မဟုတ်ပေ။ မော့လျှိုကွေ့သည် ရာဇ၀တ်ကောင်များနှင့် 'ရင်းနှီးစွာ' စကားပြောဆိုခဲ့ပြီး ပျော်ရွှင်စွာ ထွက်ခွာသွားခြင်းကြောင့် သူတို့လုပ်ဆောင်မည့် အရာကို သူမသဘောတူသည်ဟုလည်း ဆိုလို၍ရသည်။ ထို့ကြောင့် သူမသည် ပူးပေါင်းကြံစည်သူများထဲမှ တစ်ဦးဖြစ်နေပြီဖြစ်သည်။

မှန်ပါသည်။ မနေ့က ရဲတွေ ချင်ချန်းယီကို ဖမ်းဆီးသင့်ပေမယ့် မော့တိနှင့် မုထျန်းဟန်တို့၏ လျှို့ဝှက်သဘောတူညီချက်တွေကြောင့် ချင်ချန်းယီသည် မော့လျှိုကွေ့အတွက် အရာအားလုံး ပြင်ဆင်ရန် တစ်ရက် အသက်ရှူခွင့် ရခဲ့ခြင်းဖြစ်သည်။

သို့သော် တစ်ရက်လေးသာပင်။

အမှုအသေးစိတ်များအားလုံးကို စနစ်တကျပြင်ဆင်ပြီး ဗျူရိုအဖွဲ့ဝင်များလည်း အဆင်သင့်ဖြစ်ပြီးနောက် ချင်ချန်းယီသည် ကြိုတင်ကာကွယ်မှုမရှိဘဲ အဖမ်းခံရမည်ဖြစ်သည်။

ချင်ချန်းယီနှင့် မော့အာ့ချမ်တို့ နေ့လည်ပိုင်းတွင် ဆွေးနွေးမှု ပြီးဆုံးသွားသည်။ ချင်ချန်းယီသည် မော့အာ့ချမ်ထံ ငွေအမြောက်အမြား လွှဲပေးခဲ့တာကြောင့် မော့လျှိုကွေ့ကို ပြုစုစောင့်ရှောက်နိုင်ပေလိမ့်သည်။

မော့အာ့ချမ် ဘဏ်သို့သွားပြီး ငွေထုတ်၍ မပြီးသေးမီ ချင်ချန်းယီသည် ဖမ်းဆီးခံထားရပြီးဖြစ်သည်။

တကယ်တမ်း၌ ချင်ချန်းယီသည် သူ့ကိုယ်သူ အပြစ်ဝန်ခံရန် စိတ်ဆုံးဖြတ်ထားတာ ကြာပြီဖြစ်သည်။ ဤအမှုတွင် မော့လျှိုကွေ့၏ အသနားခံမှုကို လုပ်ဆောင်ရန် နောက်ကွယ်မှကြိုးကိုင်သူတစ်ယောက် လိုအပ်နေသည်။ ထိုကိစ္စမှ လွတ်မြောက်ရန် သူ့ 'အသိမိတ်ဆွေများ' ကို အသုံးပြု၍ မရနိုင်မှန်း သူ သိသည်။ အဘယ်ကြောင့်ဆိုသော် သူနှင့်ယှဉ်လျှင် အကန့်အသတ်မရှိ နည်းလမ်းများစွာကို အသုံးပြုနိုင်သည့် မုထျန်းဟန်နှင့် ရင်ဆိုင်နေရသောကြောင့် ဖြစ်သည်။ သူ့ရှောင်ကွေ့ကို ကယ်တင်ရန် သူ့ကိုယ်သူ စတေးရန်လိုအပ်သည်။

မော့အာ့ချမ်သည် ချင်ချန်းယီ ချိတ်ဆက်ပေးသည့် 'အသိမိတ်ဆွေ'မှ တဆင့် မော့လျှိုကွေ့ဆီ သွားတွေ့နိုင်ခဲ့သည်။

သူမ မော့အာ့ချမ်ကို မြင်သောအခါ မော့လျှိုကွေ့သည် ချက်ချင်းပင် မျက်ရည်ကျလာပြီး သူ့လက်မောင်းနှစ်ဖက်ထဲသို့ ပစ်ဝင်လိုက်သည်။

"ဒုတိယအစ်ကို ဝူး… ဒုတိယအစ်ကို နောက်ဆုံးတော့ အစ်ကိုရောက်လာပြီ။ ညီမ အရမ်းကြောက်တယ်။ ရှောင်တိကို သတ်ချင်တာ မဟုတ်ပါဘူး။ ရဲတွေက ညီမကို မယုံဘူး။ နောက်ပြီး ညီမကို လွှတ်ပေးဖို့ ငြင်းနေတယ်။ ဒုတိယအစ်ကို အစ်ကို ညီမကို ကူညီရမယ်နော်…အစ်ကို ရဲတွေနဲ့ စကားပြောကြည့်ပြီး ညီမ အပြစ်ကင်းကြောင်း သက်သေပြဖို့အတွက် ရှေ့နေတစ်ယောက် ရှာပေးပါ!"

"အစ်ကို သိတယ် အစ်ကို သိပါတယ်…” မော့လျှိုကွေ့ကို ကြည့်ရင်း မော့အာ့ချမ်၏ နှလုံးသားသည် နာကျင်လာရသည်။ သူမမျက်ရည်တွေကို သုတ်ပေးလိုက်ပြီး "မော့တိကို ညီမ မသတ်ချင်ဘူးဆိုတာ အစ်ကို သိပါတယ်။ ဒါပေမယ့် အခုလောလောဆယ် အခြေအနေတွေက သိပ်မကောင်းဘူး"

"အစ်ကို ဘာကိုဆိုလိုတာလဲ..." မော့လျှိုကွေ့ မော့အာ့ချမ်ကို မျက်ရည်များ ရွှဲစိုနေသော မျက်လုံးများဖြင့် ကြည့်လိုက်သည်။

သူ့ဖုန်းထဲရှိ တစ်မိနစ်အချိန်ပေးစက်သည် မြည်လာသည်။ မော့အာ့ချမ်၏ အမူအရာ အနည်းငယ် ပြောင်းလဲသွားသည်။ သူ အချိန်တိုင်းစက်ကို ပိတ်လိုက်ပြီး တွန်းအားပေးကာ စကားဆက်ပြောလိုက်သည်။

“ရှောင်ကွေ့ အစ်ကို့စကားကို နားထောင်ပါ။ အစ်ကိုတို့မှာ စကားပြောဖို့ အချိန်အများကြီး မရှိဘူး။ ငါးမိနစ်အတွင်း အစ်ကိုထွက်သွားရမယ်။ နောက်ထပ် အစ်ကိုပြောမယ့်စကားတွေကို သေချာနားထောင်ရမယ်"

"ဒုတိယအစ်ကို..."

မော့အာ့ချမ် သူမကို စွန့်ပစ်တော့မည်ဟု မော့လျှိုကွေ့ ထင်လိုက်သည်။ သူမ၏ မျက်လုံးများ နီရဲလာပြီး ခေါင်းကို မော့ကာ မယုံကြည်မှု ကွယ်ဝှက်ထားသော နာကြည်းမှုတို့နှင့်အတူ သူ့ကို ကြည့်လိုက်သည်။

မော့အာ့ချမ်သည် ဖုံးကွယ်ထားသော ခံစားချက်ကို သတိမထားမိဘဲ မျက်ရည်များပြည့်နေသော သူမ၏ သနားစရာကောင်းသည့် မျက်နှာလေးကိုသာ မြင်ရသည်။ သူမပခုံးကို ကိုင်လိုက်ပြီး "ရှောင်ကွေ့ မိုက်မဲတဲ့အတွေးတွေ မတွေးနဲ့။ အစ်ကို မင်းကို စွန့်ပစ်မှာ မဟုတ်ဘူး"

"အစ်ကို မင်းကို ကယ်မယ်။ အစ်ကို မင်းကို ဘာမှဖြစ်ခွင့်ပေးမှာ မဟုတ်ဘူး! ဒါပေမယ့် အဲဒီစတိုခန်းထဲမှာ ဖြစ်ပျက်ခဲ့သမျှ အရာအားလုံးကို မော့တိက လျှို့ဝှက်မှတ်တမ်းတင်ထားတယ်။ သက်သေက အရမ်းခိုင်လုံလွန်းတယ်။ နောက်ပြီး လူသတ်ရန် ပူးပေါင်းကြံစည်မှုဖြင့် မင်း စွဲချက်တင်ခံရနိုင်တယ်။ ချင်ချန်းယီနဲ့ အစ်ကိုက ထိပ်တန်းရှေ့နေလင်ပေါ်အန်းနဲ့ တိုင်ပင်တော့ မင်းက အပြစ်ရှိကြောင်းထင်ရှားရင် အနည်းဆုံး ထောင်ဒဏ် ငါးနှစ် ကျခံရမယ်လို့ သူက ကောက်ချက်ချတယ်"

"ဘယ်လိုလုပ် ဖြစ်နိုင်မှာလဲ... ညီမ သူ့ကို မသတ်ခဲ့ဘူး... ဘာပြစ်မှုမှလည်း မကျူးလွန်ခဲ့ဘူး...ညီမ သူ့ကိုမသတ်ခဲ့ဘူး..."

မော့အာ့ချမ်၏ စကားကို ကြားပြီး မော့လျှိုကွေ့ အံ့သြသွားသည်။ သူမ လဲကျသွားပြီး မျက်ရည်များ အဆက်မပြတ် စီးကျလာသည်။

"ဒုတိယအစ်ကို အစ်ကို ညီမကို လိမ်နေတာ! အစ်ကို့မှာ ညီမကို ကယ်ဖို့ ရည်ရွယ်ချက်မရှိဘူး။ အစ်ကို ညီမကို မကူညီချင်ပါဘူး!"

"မဖြစ်နိုင်တာ။ ရှောင်ကွေ့ ဘယ်လိုလုပ် အဲလို တွေးရတာလဲ...အစ်ကိုက မင်းကို မလိမ်ဘူး။ လူသတ်ဖို့ကြိုးပမ်းတဲ့ ပြစ်မှုက ထောင်ဒဏ် ဆယ်နှစ်ထက် ပိုကြာနိုင်တယ်။ မင်းက ကြိုးကိုင်သူ မဟုတ်ပေမယ့် ကြံရာပါအဖြစ်..."

"ညီမက ကြံရာပါမဟုတ်ဘူး..."

မော့လျှိုကွေ့ မော့အာ့ချမ်စကားကို ဖြတ်ပြောလိုက်သည်။ သူမ၏ လက်ချောင်းများ တုန်ခါနေသည်။ ထောင်ထဲမှာ ဆယ်နှစ်လောက်နေရန် သူမ စိတ်ကူးယဉ်လို့တောင် မရနိုင်ပေ

လက်မခံနိုင်ဘူး! သူမ ဘာကိုမှ လက်မခံနိုင်ဘူး!!!

မော့လျှိုကွေ့ မော့အာ့ချမ်ကို ရုတ်တရက် မုန်းတီးလာသည်။ သူမကို မကယ်တင်နိုင်သည့်အတွက် သူ့ကို မုန်းသည်။ သူ သူမကို ချစ်မြတ်နိုးပြီး ဂရုစိုက်တယ်မလား ဘာကြောင့် သူ့မှာ အရည်အချင်းမရှိရတာလဲ..

မော့တိကိုလည်း သေမသွားသည့်အတွက် မုန်းသည်။ သူသာ သေသွားခဲ့လျှင် အရာအားလုံး အဆင်ပြေသွားပြီး တောက်ပတဲ့ အနာဂတ်တစ်ခုကို သူမ ရရှိလိမ့်မည်!

သူမ ခေါင်းငုံ့တွေးဝေနေသည်ကို မြင်ပြီး မော့အာ့ချမ် စိုးရိမ်တကြီးနှင့် ပြောလိုက်သည်။

"ရှောင်ကွေ့ အစ်ကို မင်းကိုယုံတယ်။ ဒါပေမယ့် မင်းလည်း အစ်ကို့ကို ယုံရမယ်။ အစ်ကို သေချာပေါက် မင်းကို ကယ်မယ်။ အခု အစ်ကို မင်းကို မေးချင်တာ တစ်ခုရှိတယ်။ မော့တိနဲ့ သိုလှောင်ခန်းထဲမှာ ရှိတုန်းက ပြန်လည်မွေးဖွားတာ ဒါမှမဟုတ် အတိတ်ဘဝနဲ့ ပတ်သက်တာ တစ်ခုခုကို ပြောခဲ့သေးလား..."

မော့အာ့ချမ် ထိုသို့ ပြောလိုက်သောအခါ သူ့ညီမ၌ အမှန်တကယ် စိတ်ပိုင်းဆိုင်ရာ ရှုပ်ထွေးမှုအချို့ ရှိနေလျှင်ဆိုပြီး သူထိတ်လန့်မိသွားသည်။ ထိုကိစ္စသည် ဒီလိုဆိုးရွားသောအခြေအနေတွင် သာမန်လူတစ်ယောက် ဆွေးနွေးရမည့် ကိစ္စမဟုတ်ပေ။

မော့လျှိုကွေ့ မော့အာ့ချမ်ကို မော့ကြည့်လိုက်သည်။

"ဒုတိယအစ်ကို အစ်ကို ဘာကိုဆိုလိုတာလဲ..."

"အစ်ကို မင်းကို အပြစ်ကနေ လွတ်အောင် ကြိုးစားနေတာ။ မင်းစိတ်မနှံ့ဘူးဆိုတာ အစ်ကို သက်သေပြနိုင်သရွေ့ အစ်ကို လုပ်နိုင်..."

"ဘာ?!" မော့လျှိုကွေ့ မယုံကြည်နိုင်စွာဖြင့် "ဒုတိယအစ်ကို အစ်ကိုက ညီမကို ရူးချင်ဟန်ဆောင်ခိုင်း နေတာလား?!"

မော့အာ့ချမ် တံခါးကို အမြန်ကြည့်လိုက်ပြီးနောက် အသံကိုလျှော့ကာ "ရှောင်ကွေ့ လိမ္မာစမ်းပါ။ ဒါက မင်းအတွက် ခက်ခဲမယ်ဆိုတာ သိပါတယ် ဒါပေမယ့် မင်းကို ထောင်ထဲမ၀င်အောင် တားနိုင်တဲ့ တစ်ခုတည်းသော နည်းလမ်းပဲ။ မင်းကို စိတ်ကျန်းမာရေးဆေးရုံ မပို့ဘူးလို့ အစ်ကို ကတိပေးတယ်။ မင်းကို သီးသန့်ဆေးရုံမှာ နေခိုင်းမှာမလို့ ရဲတွေက အစ်ကိုတို့ကို မေးခွန်းထုတ်မှာမဟုတ်ဘူး။ ချင်ချန်းယီက အဲဒီနေရာကို ဝယ်ထားပြီးပြီ။ မင်းက အားလပ်ရက်ခရီးထွက်တယ်လို့ သဘောထားလိုက်ပြီး အဲဒီနေရာမှာ ရက်အနည်းငယ်နေပြီး ကိစ္စတွေ ငြိမ်သွားတာကို စောင့်ရုံပဲ။ ပြီးရင်တော့ အားလုံး အဆင်ပြေသွားမှာပါ။ မင်းလုပ်ချင်တာလုပ်ဖို့ မင်းလွတ်လပ်သွားပြီ ဟုတ်တယ်မလား?"

Xxxxxx

Prev Next