MM Story Teller

အပိုင်း ၁၆၅

Viewers 33k

Chapter 165

မော့မိသားစု အပျော်စီးသင်္ဘောပေါ် တက်သွားပြီးနောက် သူတို့၏ခြေရာများကို မုထျန်းဟန် လုံးဝ ဖျက်စီးရှင်းလင်းခဲ့သည်။

ထိုဇိမ်ခံအပျော်စီးသင်္ဘော၏ မူလပိုင်ရှင်မှာ ဟောင်ကောင်၏ ထိပ်တန်းအချမ်းသာဆုံးငါးဦးထဲမှ တစ်ဦးဖြစ်သည့် ဝမ်ကောချောင်ဖြစ်သည်။ သူက မုထျန်းဟန်နှင့် အလုပ်တွဲလုပ်ရန် အခွင့်အရေးကို အမြဲလိုချင်ခဲ့သော်လည်း မရခဲ့ပေ။ ထို့ကြောင့် ဤတစ်ကြိမ်၌ မုထျန်းဟန် သူ့ကို အကူအညီတောင်းခဲ့ပြီး မယုံနိုင်လောက်စရာ အပေးအယူတစ်ခုကို ပြန်ပေးလာသည့်အခါ တစ်စက္ကန့်ပင်မစဉ်းစားဘဲ သဘောတူခဲ့သည်။

မုထျန်းဟန် သူ့ကို ကြီးမားသည့် စီးပွားရေးလုပ်ငန်းကြီး သုံးခုနှင့် ကမ်းလှမ်းခဲ့ရုံသာမက ကျေးဇူးတင်မှုအနေဖြင့် ယွမ်တစ်ဘီလီယံကိုလည်း ကမ်းလှမ်းခဲ့သည်။

ဝမ်ကောချောင်က ပိုက်ဆံ မပြတ်လပ်သော်လည်း ယွမ်တစ်ဘီလီယံ ငွေသားကို သူ့လက်ထဲ လွှဲပြောင်းပေးလာသည့်အခါ သူမငြင်းနိုင်ပေ။ မုထျန်းဟန်က ကမ္ဘာ့အချမ်းသာဆုံး သုံးဦးထဲမှ တစ်ဦးဖြစ်ကြောင်း သူသိသော်လည်း ဤမျှရက်ရောလိမ့်မည်ဟု သူ မထင်ထားခဲ့ပေ။

ထို့အပြင် မုထျန်းဟန်နှင့် စီးပွားရေးလုပ်လျှင် သူရရှိမည့် အမြတ်ငွေဖြစ်စေ နိုင်ငံတကာ ချိတ်ဆက်မှုများဖြစ်စေ သူ့အတွက် အကျိုးရှိစေလိမ့်မည်ဖြစ်သည်။

ထို့ကြောင့် စိတ်အားထက်သန်စွာဖြင့် မော့မိသားစုဝင်များ လက်ရှိ ပိတ်လှောင်ခံထားရသည့် တုန်ဖန့်ကောဟောင် အပျော်စီးသင်္ဘောတစ်ခုလုံးကို မုထျန်းဟန်အား ချက်ခြင်း ပေးပစ်ခဲ့သည်။

အရာရှိကျောက်နှင့် ပတ်သက်ပြီး သူက အမေရိကတွင် မုထျန်းဟန်၏ အိမ်ထိန်းဟောင်းဖြစ်ပြီး သူ အရွယ်အရောက်လာသည်အထိ ပြုစုစောင့်ရှောက်ခဲ့ဖူးသော အထူးစစ်သားတပ်ဖွဲ့ဝင်ဟောင်းတစ်ဦးဖြစ်သည်။ သူက အလွန်အားကိုးထိုက်သူဖြစ်ပြီး ဉာဏ်ရည်ထက်မြက်သူဖြစ်သည်။ သူ့အား မော့မိသားစုကို 'စောင့်ရှောက်' ရန် တောင်းဆိုခြင်းမှာ အသင့်တော်ဆုံး ဆုံးဖြတ်ချက်ဖြစ်၏။

အရေးကြီးဆုံးအချက်မှာ အရာရှိကျောက်က မုထျန်းဟန်အပေါ် လုံးဝ သစ္စာရှိပြီး ယုံကြည်စိတ်ချရသည့် လူယုံတစ်ယောက်ဖြစ်သည်။ သူသည် မုထျန်းဟန်ကို သူ့သားကဲ့သို့ သဘောထား ပြုစုခဲ့ပြီး သူ့လုပ်ရပ်တွေကို ဘယ်သောအခါမှ သံသယမဝင်ဘဲ မုထျန်းဟန် တောင်းဆိုသည်များကိုသာ သစ္စာရှိရှိ လုပ်ဆောင်ပေးနေခဲ့သည်။ သူက မုထျန်းဟန်၏ အယုံကြည်ရဆုံးလူယုံ ဖြစ်သည်။

သို့သော်လည်း အရာရှိကျောက် မမေးခဲ့လျှင်ပင် မုထျန်းဟန်က မော့မိသားစု၏ ယခုဘဝနှင့် အရင်ဘဝ၌ လုပ်ခဲ့သည့်အရာများကို ရှင်းပြနေခဲ့သည်ပင်။ မှန်ပါသည်။ အချက်အလက်အချို့ကိုတော့ ဖုံးကွယ်ထားခဲ့သည်။

အရာရှိကျောက် ဒေါသထွက်သွားပြီး ထိုနေ့၌ပင် ဟွာရှားသို့ ချက်ချင်း ထွက်ခွာသွားခဲ့သည်။

အစဥ်အလာအရ အ၀တ်အစားများ အနည်းငယ် ပြောင်းလဲလိုက်ရုံဖြင့် သူသည် 'တုန်ဖန့်ကောဟောင်' ၏ လက်ရှိခေါင်းဆောင်အရာရှိ ဖြစ်လာခဲ့သည်။

…..

မော့မိသားစု၏ 'အကျဉ်းချခံရခြင်း' သုံးရက်မြောက်နေ့၌ မြို့တော်၏ အစွန်အဖျားတွင် နေထိုင်သော မော့လျှိုကွေ့မှာ တစ်ခုခုမှားနေကြောင်း နောက်ဆုံးတွင် နားလည်သွားသည်။

မော့မိသားစုဝင် ဘယ်သူကမှ သူမကို သုံးရက်တိုင်တိုင် ဖုန်းခေါ်ဆိုခြင်း မပြုခဲ့ပေ။ ထို့အပြင် သူတို့ထဲမှ တစ်ဦးကို ဖုန်းခေါ်ဆိုခဲ့သော်လည်း ဆက်သွယ်၍မရခဲ့ပေ။ ပထမအကြိမ်၌ ဖုန်းမြည်သော်လည်း ဘယ်သူမှ ပြန်မဖြေဘဲ နောက်ပိုင်းတွင် လုံးဝဖုန်းခေါ်ဆို၍ မရတော့ပေ။ တစ်ခုခု လွဲမှားနေသည်မှာ သေချာသည်။

မော့လျှိုကွေ့ ရုတ်တရက် ထိတ်လန့်စပြုလာသည်။

သူမကို ပြုစုပေးနေသည့် သူနာပြုဆရာမကို ဖမ်းဆွဲပြီး ဒါရိုက်တာနှင့် တွေ့ဆုံရန် တောင်းဆိုခဲ့သည်။

ပြောစရာ မလိုပေ၊ လျှိုခွေ့က သူမ၏တောင်းဆိုမှုကို ငြင်းပယ်ခဲ့သည်။

မော့လျှိုကွေ့ အရှက်ခွဲခံခဲ့ရသည်။ အံ့ဩစရာကောင်းသည်မှာ လျှိုခွေ့က မော့လျှိုကွေ့၏ တောင်းဆိုချက်ကို ငြင်းပယ်ခဲ့ရုံသာမက သူမ၏လမ်းကိုလည်း ပိတ်ထားရဲသေးသည်။ ဒေါသထွက်စွာဖြင့် လျှိုခွေ့ကို ပြင်းထန်စွာ ပါးရိုက်လိုက်သည်။

သို့သော် မော့လျှိုကွေ့ ဒုတိယအကြိမ် ပါးရိုက်တော့မည့် အချိန်တွင် လျှိုခွေ့က သူမ၏လက်မောင်းကို တင်းကြပ်စွာ အသေဆုပ်ကိုင်ထားသည်။ ပိန်ပြီး အသက်ကြီးနေသော်လည်း နှစ်ပေါင်းများစွာ အလုပ်များ ပင်ပင်ပန်းပန်း လုပ်ခဲ့ရခြင်းက သူမအား ရုပ်ပိုင်းဆိုင်ရာ အလေ့အကျင့်ပေးခဲ့သည်ပင်။ မော့လျှိုကွေ့ကဲ့သို့ အားနည်းသူတစ်ယောက်မှာ သူမ၏ပြိုင်ဘက်မဟုတ်ပေ။

သူမ မော့လျှိုကွေ့အား စိတ်ရှည်သည်းခံစွာဖြင့်

“မစ္စမော့ မင်းက စိတ်မကျန်းမာတဲ့လူဖြစ်လို့ ငါ မင်းကို သည်းခံနိုင်ပေမယ့် မင်းကတော့ ကောင်းမွန်စွာ ပြုမူနေထိုင်ရမယ်လေ။ မင်း ဒါရိုက်တာကို တွေ့ချင်ရင် မင်းရဲ့ရောဂါကို စစ်ဆေးကြည့်ဖို့ တစ်မိနစ်အတွင်း သူ ဒီကို ရောက်လာလိမ့်မယ်"

"နင်ကမှ နေမကောင်းတဲ့သူ! နင်က အသက်ကြီးပြီး ရုပ်ဆိုးတဲ့စုန်းမအိုကြီး! နင်က ရူးနေတာ!"

မော့လျှိုကွေ့ ပိုပြီး စိတ်ပူပန်လာသည်။ မော့မိသားစုက ဘယ်သူနှင့်မျှ မဆက်သွယ်နိုင်လျှင် သူမကို ဤနေရာမှ မည်သူက ကယ်ထုတ်ပေးမည်နည်း။

သူမ ဒါရိုက်တာကျောက်နှင့် တွေ့ရန်လိုအပ်သည်။ သူက ချင်ချန်းယီ စီစဉ်ပေးထားခဲ့သည့် သူတစ်ယောက်ဖြစ်ပြီး သူမကို ကူညီပေးရမည်ပင်။ မဟုတ်လျှင် ချင်ချန်းယီက သူ့ကို အပြစ်တင် ဆူပူကြိမ်းမောင်းပေလိမ့်မည်။

သူသာ ထက်မြက်လျှင် ဘာလုပ်ရမည်ကို သိပါလိမ့်မည်။

ကျောက်ချွမ်းလင်က အမှန်တကယ်ပင် ထက်မြက်သူဖြစ်သည်။ ထို့ကြောင့် သူက သင့်တော်သည့်အချိန်တွင် လျှိုခွေ့အား မော့လျှိုကွေ့၏ မိုဘိုင်းလ်စက်များအားလုံးကို သိမ်းယူရန် အမိန့်ပေးခဲ့သည်။

သူ၏အဖြူရောင် ဆရာဝန်ကုတ်အင်္ကျီကိုဝတ်ဆင်ကာ မော့လျှိုကွေ့အတွက် ယခင်က စစ်ဆေးခဲ့သော ရောဂါရှာဖွေခြင်း ဆေးမှတ်တမ်းကို ဖွင့်ပြီး သူမအတွက်ပြင်ဆင်ထားသော ကုသမှုများကို စတင်လုပ်ဆောင်ခဲ့သည်။

လက်စားချေမှုမှာ မော့မိသားစုထံ သက်ရောက်လာပေပြီ။

အချို့က အကျဉ်းချခံခဲ့ရပြီး တစ်ဦးမှာ စိတ်ကျန်းမာရေးဆေးရုံတွင် ပိတ်လှောင်ခံထားရကာ ကျန်လူများမှာ မော့တိ ကြုံတွေ့ခဲ့ရသော နှိပ်စက်ခံရမှုများကို ပြန်လည်ခံစားရင်း အပျော်စီးသင်္ဘောပေါ်တွင် ရှိနေခဲ့သည်။

ချင်ချန်းယီနှင့် ပတ်သက်ပြီး သူ လက်ခံရရှိသည့် အပြစ်ဒဏ်မှာ လူသတ်မှုစွဲချက်ထက် ပိုမိုကြီးလေးသော ပြစ်ဒဏ်များလည်း ပါဝင်လာပြီဖြစ်သည်။ သူ၏ ယခင်ပြစ်မှုများအတွက် သက်သေ အထောက်အထားများကိုလည်း ထုတ်ဖော်ခဲ့ခြင်းကြောင့် လွတ်ငြိမ်းခွင့်မပေးဘဲ ထောင်ဒဏ် အနှစ်နှစ်ဆယ်အထိ ချမှတ်ခံခဲ့ရသည်။

ချင်ချန်းယီ၏ အမှုစစ်ဆေးခြင်းကို ကြည့်ရှုရန် မော့တိ ကိုယ်တိုင်သွားခဲ့သည်။ သူ့လက်မောင်းကို ထိန်းချုပ်ထားစဥ်တွင် သူ ဒေါသတကြီး အော်ဟစ်နေသည်ကိုမြင်ပြီး မော့တိ မပြုံးဘဲ မနေနိုင်ပေ။

မုထျန်းဟန် မော့တိကို ကြည့်ပြီး ဆံပင်ကို ပွတ်သပ်ပေးကာ

"ကိုယ်တို့ အိမ်ပြန်ကြတော့မလား?"

"အင်း!"

မော့တိ၏ မျက်လုံးလေးများ တောက်ပသွားပြီး ဘယ်ဘက်ပါးပြင်တွင် ပါးချိုင့်သေးသေးလေး ပေါ်လာသည်။ သူ မုထျန်းဟန်၏လက်များကို တင်းကျပ်စွာ ဆုပ်ကိုင်ထားသည်။

မော့တိ လုံးဝ ပျော်ရွှင်နေသော်လည်း ပွင့်ပွင့်လင်းလင်းပြောရလျှင် သူ တကယ့်အဖြစ်အပျက် မဟုတ်ဘဲ အိပ်မက်မက်နေသည်ဟု အနည်းငယ် ခံစားနေရသေးသည်။ သူ၏ ပြန်လည်မွေးဖွားခြင်းသည် မကြာသေးမီကကဲ့သို့ ထင်ရပြီး မော့မိသားစုနှင့် ချင်ချန်းယီကို သေချာပေါက် လက်စားချေရန် သစ္စာပြုခဲ့ခြင်းသည် သူ့စိတ်ထဲတွင် အသစ်ဖြစ်နေဆဲပင်။

ယခုမူ ထိုလူများသည် သူတို့နှင့်ထိုက်တန်သောအဆုံးသတ်ကို ရရှိသွားပြီဖြစ်သည်။

ချင်ချန်းယီ ထောင်ဒဏ် အနှစ်နှစ်ဆယ် ချမှတ်ခံလိုက်ရသောအခါ သူ့နှလုံးသားသည် ယခင်က တစ်ခါမှ မခံစားဖူးသည့် ပေါ့ပါးမှုမျိုးကို ခံစားခဲ့ရသည်။ သူ့နှလုံးသားအပေါ် ဖိထားသည့် အလေးချိန်တစ်ခု နောက်ဆုံး၌ ပျောက်သွားသကဲ့သို့ပင်။

ယခုမှစ၍ သူ့အတိတ်ဘဝကို နောက်တစ်ကြိမ် ပြန်မတွေးတော့ပေ။

နှိပ်စက်မှု၊ ညှဉ်းပန်းမှု၊ မတရားမှုနှင့် မျှော်လင့်ချက်အားလုံး ဆုံးရှုံးခဲ့ရသည့် ဘဝ၊ အားလုံးကို သူ့ခေါင်းထဲမှ ဖျက်ပစ်လိုက်တော့ပေမည်။

သူ၏ဘဝအသစ်ကို သူချစ်ရသောသူ၊ သူငယ်ချင်းများနှင့်အတူ ပျော်ပျော်ရွှင်ရွှင် သက်သောင့်သက်သာဖြင့် နေထိုင်သွားမည်။ သူ့အသက်မွေးဝမ်းကြောင်းတွင် ပိုမိုမြင့်မားသော အောင်မြင်မှုများကို ရရှိစေရန် သူ့ဆန္ဒအတိုင်း လွတ်လွတ်လပ်လပ် လုပ်နိုင်သည်။

သူ တစ်ချိန်က မှောင်မည်းသော ချောက်နက်ထဲသို့ ဆွဲချခံခဲ့ရသော်လည်း ယခု နောက်ဆုံး၌ အလင်းရောင်အောက်သို့ ရောက်ရှိနေပြီဖြစ်သည်။

ကောင်းကင်ဘုံ၏ ဥပဒေအရ ကိုယ့်ပြုသည့်ကံ ကိုယ့်ထံပြန်လာသည် ဆိုသော မော့တိ ခိုင်မြဲစွာ ယုံကြည်လာခဲ့သည့် ရှေးဆိုးရိုးစကားတစ်ခွန်းရှိသည်။

သို့သော် ထိုအရာကို မော့လျှိုကွေ့ ဘယ်သောအခုမျှ လက်ခံနိုင်မည် မဟုတ်ပေ။

သူမ၏ ဖုန်းနှင့် ကွန်ပျူတာကို သိမ်းသွားပြီးနောက် တစ်ခုခု မှားယွင်းနေကြောင်း နောက်ဆုံးတွင် မော့လျှိုကွေ့ သဘောပေါက်သွားခဲ့သည်။ သူမ အလွန် ဒေါသထွက်သော်လည်း မျှော်လင့်ချက်မရှိတော့ပေ။ အခန်းကျဉ်းလေးထဲတွင် သော့ခတ်ခံထားရပြီး တခြားဘယ်ကိုမှ သွားခြင်း မပြုတော့ပေ။

နေ့တိုင်း သူမတွေ့ရသည့် တစ်ဦးတည်းသောသူသည် လျှိုခွေ့ပင်။

မော့လျှိုကွေ့ လူတိုင်းကို ကျိန်ဆဲလိုက်သည်။ အရည်အချင်းမပြည့်မီသော မော့မိသားစုကို သူမ မုန်းတီးပြီး သူမကို အကူအညီ မပေးနိုင်သည့် ချင်ချန်းယီကိုလည်း မုန်းတီးသော်လည်း သူမ အမုန်းဆုံးက မော့တိဖြစ်နေဆဲပင်။

သူမ စိတ်ထဲတွင် သူ့ကို ညှဉ်းပန်းနှိပ်စက်ပြီး သတ်ပစ်နိုင်မည့် မရေမတွက်နိုင်သော နည်းလမ်းတွေကို အမြဲတွေးနေခဲ့သည်။ ကြမ်းတမ်းသော အတွေးများက သူမခေါင်းအတွင်း ပြည့်နှက်သွားပြီး ရူးလုမတတ်ပင်။

ချင်ချန်းယီ ပြစ်ဒဏ်ကျခံရန် စေလွှတ်ခံရသည့်နေ့အထိ သူမ ခေါင်းထဲရှိ အတင်းအကြပ် ယုံကြည်ထားခဲ့သည့် အတွေးများ ကျိုးပျက်သွားခဲ့သည်။ သူမ အမြင်အာရုံတွေ မှောင်မည်းသွားပြီး မူးလဲသွားခဲ့သည်။

သူမ နိုးလာသောအခါ မော့လျှိုကွေ့က ပြတင်းပေါက်ကို မမှိတ်မသုန် စိုက်ကြည့်နေသည်။ သူမ၏မျက်နှာမှာ တဖြည်းဖြည်း မှုန်ကုပ်ကုပ် ဖြစ်သွားပြီး ဒေါသူပုန်ထကာ အခန်းတွင်းရှိ ပစ္စည်းများကို ရိုက်ခွဲပစ်ပေါက်လိုက်သည်။

အရင်ဘဝမှ မှတ်ဥာဏ်များ အားလုံးကို သူမ ပြန်မှတ်မိလာခဲ့သည်။

သူမသည် ဤဇာတ်လမ်း၏ အမျိုးသမီး ဇာတ်ဆောင်ဖြစ်ရန် လိုအပ်သည်။ ဤကမ္ဘာ၏ ဇာတ်လမ်းထဲမှ အဓိကဇာတ်ဆောင်ဖြစ်ရမည်။

ထို့အပြင် မော့တိအနေဖြင့် ဘာကိုမျှ သိရန် မလိုအပ်ပေ။ သူ ပြန်လည်မွေးဖွားလာသော်လည်း ဤကမ္ဘာက စာအုပ်ထဲ၌ ရှိနေသည်ကို သူ မသိသင့်ပေ။

အရေးကြီးဆုံးအချက်မှာ သူမက ဤကမ္ဘာမှ မဟုတ်ပေ။ သူမက ကူးပြောင်းလာသူဖြစ်ပြီး systemတစ်ခုရှိသည်။

မည်သူ့ကိုမဆို ဆွဲဆောင်နိုင်သည့်အပြင် ချမ်းသာသောမိသားစုတွင် မွေးဖွားလာပြီး ဇာတ်ကြောင်းကိုလည်း မှတ်မိနိုင်သည့် systemတစ်ခုဖြင့် ချိတ်ဆက်ထားသည့် ကူးပြောင်းလာသူပင်... ။ ဤအကျိုးကျေးဇူးများစွာဖြင့် သူမက အနိုင်ရရှိသူ၊ လူအများ အာရုံစိုက်ခံရသူ၊ ဤကမ္ဘာ၏ အခြေခံအုတ်မြစ်ဖြစ်သင့်သည်။

သူမကို လူတိုင်းက ချစ်ခင်နှစ်သက်ပြီး အလိုလိုက်ရန်အတွက် ရည်ရွယ်ခဲ့သည်။

ထို့အပြင် ထိုအရာက သူမအတိတ်ဘဝ၏ ကိုးဆယ့်ကိုးရာခိုင်နှုန်းမှာ ဖြစ်ပျက်ခဲ့သော်လည်း နောက်ဆုံး၌ သူမ၏လှပနေသည့်ဘဝမှာ အရူးတစ်ယောက်၏ ဖျက်ဆီးခြင်းခံလိုက်ရသည်။အရာအားလုံး ပျက်စီးသွားပြီ။

သူမအတွက် နောက်ထပ် ဘဝတစ်ခုရရန် ခက်ခဲသော်လည်း ဤဘဝက အဆပေါင်းများစွာ ဆိုးရွားခဲ့သည်။

မော့လျှိုကွေ့ အမုန်းတရားကြောင့် အသက်ရှူကျပ်လုနီးပါးဖြစ်သွားသည်။

မူလတွင် သူမက သာမန်ရုံးဝန်ထမ်း အမျိုးသမီးတစ်ဦးဖြစ်ပြီး အသက်ရှင်နေထိုင်ရန် နေ့ရောညပါ အလုပ်လုပ်နေရသူ ဖြစ်သည်။ ကံကောင်းထောက်မစွာ systemတစ်ခုနှင့် ချိတ်ဆက်မိပြီး သူမ လုံးဝ မုန်းတီးသည့် ဝတ္ထုတစ်ပုဒ်ထဲသို့ ခေါ်ဆောင်သွားခြင်းခံရသည်။

ထိုဝတ္ထုက အဓိက ဇာတ်ဆောင်ဖြစ်သည့် သူမမောင်လေးနှင့် မုထျန်းဟန်တို့၏ ယောက်ျားလေးအချစ်ဝတ္ထုတစ်ပုဒ် ဖြစ်သည်။ အဓိကဇာတ်ကြောင်းက ဂိမ်းများနှင့် အသက်မွေးဝမ်းကျောင်းဖန်တီးမှုအကြောင်းဖြစ်သောကြောင့် ဝတ္ထုမှာ ရေပန်းစားလာပြီး တီဗီစီးရီးအဖြစ် ပြောင်းလဲရိုက်ကူးလာခဲ့သည်။ ကာမဆက်ဆံသည့် ဇာတ်ဝင်ခန်းများ မပါရှိသော်လည်း ထိုဇာတ်လမ်းတွဲက လိင်တူချစ်သူစုံတွဲကို သရုပ်ဖော်သည့် ပထမဆုံး ထုတ်လွှင့်သည့် စီးရီးဖြစ်လာသည်။

၎င်းက စက်ဆုပ်ရွံရှာဖွယ်ကောင်းသည်။

ထိုကဲ့သို့ ရွံ့စရာကောင်းသော ဆက်ဆံရေးမျိုးက ဘယ်လိုလုပ် နာမည်ကြီးလာရသည်လဲ။ ထိုအရာကို ရုပ်မြင်သံကြာမှ ထုတ်လွှင့်ရန် သူတို့ ဘယ်လိုတောင် စဥ်းစားနိုင်ရသည်လဲ။

တကယ်ကို သူမအတွက် ရွံ့စရာကောင်းသည်။

သို့သော် သူမ ထိုဝတ္ထုထဲသို့ ကူးပြောင်းသွားပြီး systemတစ်ခုနှင့် ချတ်ဆက်မိသွားလိမ့်မည်ဟု မမျှော်လင့်ထားခဲ့ပေ။

ထိုsystemက ရိုးရှင်းပြီး အံ့သြစရာကောင်းသည်။ ၎င်းက လူများကို မြင်မြင်ချင်းပင် ညှို့ယူဖမ်းစားနိုင်ရုံသာမက လိင်တူဆက်ဆံခြင်းအပေါ် သူမရွံမုန်းသကဲ့သို့ တူညီသည့်ရွံရှာမှုများကိုလည်း မျှဝေခဲ့သည်။

သူမ systemကို အလွန်သဘောကျနှစ်သက်သည်။ ၎င်းက သူမ စိတ်ကူးထက် ကျော်လွန်သော စွမ်းရည်များ ရှိပြီး သူမ အမေ ဗိုက်ထဲ၌ရှိစဉ်ကတည်းက ကြီးကျယ်မြင့်မြတ်ခြင်း အရှိန်အဝါ အမြောက်အများကို သူမအတွက် ပေးအပ်ချီးမြှင့်ထားခဲ့သည်။

သူမ ကြီးပြင်းလာပြီး သူမ ပတ်ဝန်းကျင်ရှိ လူများ၏ ချစ်ခင်မှုကို ပိုရလာလေ systemက ပိုအားကောင်းလာပြီး သာမန်လူထုကို ညှို့ယူဖမ်းစားနိုင်သည့် စွမ်းရည်များ ပိုတိုးလာလေဖြစ်သည်။

တစ်ဖက်တွင်မူ မော့တိက လုံးဝဆန့်ကျင်ဘက်ဖြစ်သည်။ သူ့ဘဝက ဒုက္ခများနှင့် ပြည့်နေသည်။ သို့သော် ထိုအရာမှာ သူနှင့်ထိုက်တန်သည်ဟု မော့လျှိုကွေ့ ယုံကြည်ခဲ့သည်။ သူ၏လိင်တူကြိုက်နှစ်သက်မှုက မှားယွင်းနေခဲ့ပြီး သူ၏ဘဝ ဆိုးရွားနေခြင်းက အပြစ်ဖြေခြင်းပင်ဖြစ်သည်။

ထို့ထက် ပိုအရေးကြီးသည်မှာ မော့တိသည် သူမ၏အရှိန်အဝါနှင့် systemအား ခုခံနိုင်စွမ်းရှိပြီး သူက လူကောင်းမဖြစ်နိုင်ပေ။ နောက်ပိုင်း၌ သူက မော့မိသားစုနှင့် ဝေးရာသို့ ထွက်ပြေးရဲသေးသည်။ လိင်တူကြိုက်နှစ်သက်မှုကို စွန့်လွှတ်ပြီးကတည်းက သူ့ကို လွှတ်ထားရန် စီစဉ်ခဲ့သော်လည်း သူမ၏ကြင်နာမှုကို ငြင်းဆန်ရဲပြီး သူမကိုတောင် တွန်းထုတ်ခဲ့သည်။

Xxxxxxxx

Prev Next