MM Story Teller

အပိုင်း ၁၇၀(Extra 1)

Viewers 33k

Chapter 170 (Extra-1)

မုထျန်းဟန်သည် သူ့ကလေးလေးကို အခြားသူများ လုယူသွားခံရမည်ကို စိုးရိမ်လွန်းနေသော သားရဲအိုကြီးတစ်ကောင်ကဲ့သို့ပင် ဖြစ်နေကြောင်း သူ၏လုပ်ရပ်များက သက်သေပြနေခဲ့သည်။

မော့တိ တက္ကသိုလ် ဒုတိယနှစ်တွင် မုထျန်းဟန်သည် စေ့စပ်ရန် သူ့ကို အမေရိကသို့ ပြန်ခေါ်သွားခဲ့သည်။ မော့တိ ဂျူနီယာဖြစ်လာသောအခါ မုထျန်းဟန်က သူတို့၏ မင်္ဂလာပွဲကို ကျင်းပရန် မော့တိကို တစ်ဖန်ပြန်ခေါ်သွားခဲ့သည်။ ရင်းနှီးသော မိတ်ဆွေများနှင့် ဆွေမျိုးများကိုသာ ဖိတ်ကြားခဲ့သောကြောင့် တက်ရောက်ဂုဏ်ပြုလာသည့် ဧည့်သည်အနည်းငယ်နှင့်အတူ ခမ်းနားသောမင်္ဂလာပွဲတစ်ခု ဖြစ်ခဲ့သည်။

ဦးလေးဖြစ်သူထံမှ ကြိုတင်သတင်းပေးထားသည့် ချန်ကျောင်းမှလွဲ၍ ရှန့်ယွီချောင်နှင့် အခြားသူများက ဖိတ်စာလက်ခံရရှိချိန်တွင် အံသြသွားကြသည်။

သူတို့၏ရှောင်တိမှာ ယခုအချိန်ထိ တစ်လျှောက်လုံး ချစ်သူရှိနေလိမ့်မည်ဟု ဘယ်သောအခါကမှ မထင်ထားခဲ့မိကြပေ။ ထိုချစ်သူက မုထျန်းဟန်ဖြစ်နေခဲ့သည့်အပြင် အခု သူတို့ လက်ထပ်ကြတော့မည်။

လက်ထပ်ကြတော့မည်။

မုထျန်းဟန်နှင့် မော့တိတို့၏မင်္ဂလာပွဲကို အောက်တိုဘာလ ၃ ရက်နေ့တွင် ကျင်းပခဲ့သည်။ ထိုရက်က ဟွားရှားတွင် လက်ထပ်ရန် ရေပန်းစားနေသည့် ရက်စွဲတစ်ခု ဖြစ်သော်လည်း ထိုအချက်မှာ အရေးကြီးဆုံးအချက်မဟုတ်ပေ။ အရေးကြီးဆုံးအပိုင်းသည် မော့တိ၏ အသက်နှစ်ဆယ်မြောက်မွေးနေ့မတိုင်မီ တစ်လအလိုတွင် သူတို့၏မင်္ဂလာပွဲကို ကျင်းပခဲ့ခြင်း ဖြစ်သည်။ တစ်နည်းဆိုရလျှင် ထိုသားရဲအိုကြီး မုထျန်းဟန်မှာ အသက် ဆယ့်ကိုးနှစ်အရွယ်သာရှိသည့် မော့တိကို လက်ထပ်ခဲ့ခြင်းဖြစ်သည်။

သူတို့၏မင်္ဂလာပွဲကို တက်ရောက်ဂုဏ်ပြုလာကြသည့် ဧည့်သည်များအားလုံးက မော့တိနှင့် မုထျန်းဟန်တို့၏ ရင်းနှီးသော မိတ်ဆွေ သူငယ်ချင်းများဖြစ်သော်လည်း မုထျန်းဟန်က ထိုကဲ့သို့ ငယ်ရွယ်သော မော့တိကို အတင်းအကြပ် သိမ်းပိုက်ရဲသည့် အမှန်စင်စစ် သားရဲတစ်ကောင် ဖြစ်ကြောင်း ထပ်လောင်းအတည်ပြုရန် တက်ရောက်လာခဲ့ကြခြင်းသည်။

ထိုနေ့တွင် မော့တိက အဖြူရောင်မင်္ဂလာဝတ်စုံကို ၀တ်ဆင်ထားပြီး နူးညံ့ပြီး အပြစ်ကင်းစင်နေသည်။ နူးညံ့သော နေရောင်ခြည်က စင်မြင့်ပေါ်တွင် ဖြာကျနေသည် မုထျန်းဟန်သည် အိပ်မက်တစ်ခုနှင့်တူသော ထိုမြင်ကွင်းကို ကြည့်နေခဲ့သည်။

သူ ထိုမြင်ကွင်းကို မြင်ရရန် ဘဝနှစ်ခုစာလုံး စောင့်ခဲ့ရသည်ပင်။ သူ့ရှေ့ရှိ ပုံရိပ်သည် သူ့မျက်ဝန်းများကို စူးရှနာကျင်စေသည်။

ချောမောပြီး အံ့ဩဖွယ်ကောင်းလောက်အောင် ခန့်ညားသည့် မုထျန်းဟန်ကို မော့တိ ကြည့်လိုက်သည်။ မော့တိကို လှမ်းကြည့်နေစဥ် မုထျန်းဟန်၏အကြည့်များမှာ နူးညံ့နေပေသည်။ မော့တိက သူ့မျက်လုံးများတွင် ထူးခြားသော တောက်ပမှုနှင့်အတူ ပြုံးပြလိုက်သည်။

ကလစ်

ဓာတ်ပုံဆရာက ထိုအခိုက်အတန့်ကို ဓါတ်ပုံရိုက်ပြီး မှတ်တမ်းတင်ခဲ့သည်။

ထိုဓာတ်ပုံကို နောက်ပိုင်းတွင် သုံးကြိမ်တိုင်တိုင် ဓါတ်ပုံကူးခဲ့သည်။ တစ်ပုံကို သူတို့အတွက် သူတို့၏ အဖိုးတန်သေတ္တာထဲမှာ သိမ်းထားရန်၊ နောက်တစ်ပုံကို ဘောင်ခတ်ပြီး အိပ်ယာဘေးရှိ စားပွဲပေါ်တွင် ထားရန်နှင့် နောက်ဆုံးတစ်ပုံက မုထျန်းဟန်၏ ပိုက်ဆံအိတ်ထဲတွင် ထားရန်ဖြစ်သည်။

မုထျန်းဟန် အသိမိတ်ဆွေတစ်ယောက်နှင့် အပြင်သွားတိုင်း သူက မိုဘိုင်းငွေပေးချေမှုများကို လျစ်လျူရှုကာ သူ့ပိုက်ဆံအိတ်ကိုသာ ထုတ်ပြီး ငွေရှင်းကာ ပုံမှန်အတိုင်း သူ၏မင်္ဂလာဆောင်ဓာတ်ပုံကို မြင်အောင်ပြပေလိမ့်မည်။

မုထျန်းဟန်၏ အလွန်ရင်းနှီးသော အသိအကျွမ်းများထဲမှ တစ်ဦးဖြစ်သော လိုင်သယ်စစ်က ဤရက်စက်ကြမ်းကြုတ်သော ဆက်ဆံမှုကို အချိန်တိုင်း ခံနိုင်ရည်ရှိခဲ့သည်။

ထိုအရာက ဘာအရေးကြီးလို့လဲ။ မကြာခင် သူနှင့် စုန့်ယွီလည်း လက်ထပ်ကြတော့မည်။ သိပ်မကြာတော့ပေ… နောက်နှစ်… နောက်နှစ်ကုန်လျှင် သူ စုန့်ယွီကို လက်ထပ်ခွင့်တောင်းမည်။ ထို့အပြင် သူ၏ပျော်ရွှင်မှုများကို မုထျန်းဟန်ဆီ ထပ်ခါထပ်ခါ ကြွားဝါပစ်မည်။

…..

မော့တိ၏ ငယ်ရွယ်သည့် အသက်အရွယ်နှင့် လူသိရှင်ကြားမဟုတ်သည့် လက်ထပ်ပွဲကြောင့် လူအများသည် မော့တိ၏ အိမ်ထောင်ရေး အခြေအနေကို မသိခဲ့ကြပေ။

ထို့ကြောင့်...

မော့တိသည် သူ့ကျောင်း၏ အကျော်ကြားဆုံး အမျိုးသားနတ်ဘုရားအဖြစ် ဆက်လက်တည်ရှိနေခဲ့ပြီး ဂျူနီယာများနှင့် ဘွဲ့လွန်ကျောင်းသားများ၏ နှလုံးသားများကိုပင် ခိုးယူသွားခဲ့သည်။

မော့တိ စီနီယာနှစ် ဒုတိယနှစ်ဝက်တွင် သူ ဘွဲ့ရတော့မည်ဆိုသည်ကို သိသောကြောင့် လူတော်တော်များများက မော့တိကို ဝန်ခံရန် သူတို့၏သတ္တိများကို စုစည်းကာ ရည်းစားစာများ ရေးပို့လာကြသည်။ အစပိုင်းတွင် သူတို့အား အပြုံးလေးဖြင့် ယဉ်ကျေးစွာဖြင့် မော့တိ ငြင်းဆိုခဲ့သော်လည်း ဝန်ခံသူအရေအတွက် များလာသဖြင့် မော့တိ သူတို့အပေါ် စိတ်ရှည်သည်းခံနိုင်စွမ်းမရှိတော့ပေ။ ထို့ကြောင့် သူ၏လူမှုကွန်ရက်အကောင့်တွင် သူ၏ 'Relationships' ကို 'Marriage 'ဟု ပြောင်းလဲလိုက်သည်။

ထိုသတင်းက တစ်ကျောင်းလုံးကို တုန်လှုပ်သွားစေသည်။ ဆိုရှယ်မီဒီယာပေါ်တွင် အားလုံး မယုံကြည်နိုင်သည်အထိ ဖြစ်သွားကြပြီးနောက် ကွန်ရက်တစ်ခုလုံး ရုတ်ရုတ်သဲသဲ ဖြစ်သွားကြသည်။ ဂိမ်းလုပ်ငန်း၏ပါရမီရှင်မှာ အသက်နှစ်ဆယ့်တစ်နှစ်ပဲရှိသေးသည်။ သူ ဘယ်လိုလုပ် လက်ထပ်ပြီးသွားရတာလဲ။

သတင်းထောက်များက ဝန်ထမ်းများအား အင်တာဗျူးရန် မော့တိ၏ဂိမ်းကုမ္ပဏီသို့ တိုက်ရိုက်သွားရောက်ခဲ့သော်လည်း စီနီယာဝန်ထမ်းများဖြစ်သည့် ရှန့်ယွီချောင်နှင့် အခြားဝန်ထမ်းများကို ဆက်သွယ်၍ မရခဲ့ပေ။ ထို့ကြောင့် သာမန်ဝန်ထမ်းများကိုသာ အင်တာဗျူးနိုင်ခဲ့သည်။ သို့သော်လည်း မော့တိ လက်ထပ်ခဲ့သည့်အကြောင်းနှင့်ပတ်သက်၍ သူတို့လည်း မသိခဲ့ကြပေ။ ထိုသတင်းထောက်များသည် တိကျသည့်အဖြေကို မရရှိခဲ့သောကြောင့် မော့တိ၏ အိမ်ထောင်ရေးနှင့် ပတ်သက်ပြီး သံသယရှိနေကြဆဲပင်။

ထိုနေ့ မော့တိ အိမ်ပြန်ရောက်သောအခါ သူ စွမ်းစွမ်းကို ကောက်ချီလိုက်သည့်အချိန်တွင် မုထျန်းဟန်၏ လက်နှစ်ဖက်ဖြင့် ပွေ့ဖက်ထားခြင်းခံခဲ့ရသည်။

"မင်းလက်ထပ်လိုက်ပြီလို့ ကြေငြာလိုက်တာလား"

"အင်း နောက်ထပ်ဆက်ပြီး ဝန်ခံနေတာတွေကို ကျွန်တော် ဆက်ပြီး မဖြေရှင်းချင်တော့ဘူး"

မော့တိ ခေါင်းမော့ပြီး ပြုံးလျှက် ပြန်ဖြေလိုက်သည်။ ထို့နောက် မော့တိ မုထျန်းဟန်၏ ကော်လာကို ဆွဲယူပြီး ပြောလိုက်သည်။

"ကိုကို ကျွန်တော့်ကို တစ်ချိန်လုံး သဝန်တိုနေတာမဟုတ်ဘူးမလား"

"ဟုတ်တယ် ကိုယ် သဝန်တိုတယ်"

မုထျန်းဟန် မော့တိကို လက်တစ်ဖက်တည်းဖြင့် ခါးမှဆွဲယူလိုက်ပြီး အခြားလက်တစ်ဖက်နှင့် မော့တိ၏လက်ကို ကိုင်ထားသည်။ ထို့နောက် မော့တိ၏ နှုတ်ခမ်းကို ငုံ့နမ်းလိုက်သည်။ မော့တိ ခုခံခြင်းမပြုတော့ဘဲ မုထျန်းဟန်၏ လေးနက်သောအနမ်းကို ကြိုဆိုလိုက်သည်။

နှစ်ယောက်သား အကြားတွင်ညှပ်နေသော စွမ်းစွမ်းက သူ၏လည်ပင်းကို ဆန့်ထုတ်လိုက်ပြီး အပြစ်ကင်းစင်သည့် ငိုသံ ထွက်ပေါ်လာသည်။

သူ့ပါးပြင်ပေါ်တွင် နူးညံ့သော အထိအတွေ့ကို ခံစားလိုက်ရသဖြင့် မော့တိ မရယ်ဘဲမနေနိုင်တော့ပေ။ သူ စွမ်းစွမ်းကို ငုံ့ကြည့်လိုက်ပြီး ခွေးလေး၏နှာခေါင်းကို ပွတ်သပ်ကာ

“မင်းလည်း နမ်းချင်တာလား"

အာဝူး။ မော့တိ သူနှင့် ကစားလိမ့်မည်ဟု ထင်လိုက်သောကြောင့် စွမ်းစွမ်းက သူ့အမြီးကို ပြင်းထန်စွာ လှုပ်ရမ်းလာသည်။

သို့သော်လည်း မုထျန်းဟန်က ခွေးလေးကို ကရုဏာတရားကင်းမဲ့စွာ လည်ပင်းမှ ကောက်ကိုင်ပြီး တစ်ဖက်သို့ တွန်းချလိုက်သည်။

“လသာဆောင်ကို သွားပြီးတော့ မင်းရဲ့ခွေးစာကိုသာ သွားစားနေ"

မော့တိ အူလှိုက်သည်းလှိုက် ရယ်မောရင်း

“အခု သူ ခွေးစာ စားနေရတာပဲလေ"

မုထျန်းဟန် မော့တိ၏ စကားများကြောင့် ပြုံးလိုက်သည်။ ချစ်ရည်ရွှန်းလဲ့သော မျက်လုံးများဖြင့် မော့တိ၏ဆံပင်များကို ပွတ်သပ်ပေးရန် လက်ကိုဆန့်ထုတ်လိုက်သည်။

“မင်း ပြောတာမှန်တယ်"

ထိုသို့ပြောပြီးနောက် မုထျန်းဟန် ဆက်ပြောလာသည်။

“ဒီနေ့ မင်းလက်ထပ်တဲ့အကြောင်းကို ဘာကြောင့် ရုတ်တရက် ကြေငြာဖို့ ဆုံးဖြတ်ခဲ့တာလဲ"

"ဘာလို့လဲဆိုတော့ ကိုကို ကျွန်တော့်ကို သေချာပေါက် ကြေငြာဖို့ အချိန်စောင့်ခိုင်းလိမ့်မယ်။ ပြီးတော့ တကယ်က အချိန်စောင့်စရာ မလိုအပ်ဘူးလို့ ကျွန်တော် ထင်တယ်"

မော့တိ မုထျန်းဟန်ကို ကြည့်ပြီး ပြုံးလိုက်သည်။

"ကျွန်တော် မကြာခင် ဘွဲ့ရတော့မှာ နောက်ပြီး ကျောင်းပြီးတဲ့အချိန်ထိဆို နှစ်လပဲ လိုတော့တယ်"

မုထျန်းဟန် မော့တိ၏ ဘယ်ဘက်ပါးကို ညင်သာစွာ ပွတ်သပ်ပြီး မော့တိ၏ ပါးချိုင့်လေးပေါ်တွင် သူ့လက်ညှိုးကို ဖိထားလိုက်သည်။

“ဒါဆိုလည်း ကောင်းပြီ"

သူတို့၏ ဆက်ဆံရေးကို မော့တိ ထုတ်ဖော်ပြောဆိုချင်နေသည်မှာ ကြာပြီမှန်း သိသော်လည်း မုထျန်းဟန်း သူ့ကို ထိုသို့ မလုပ်ရန် တားမြစ်ခဲ့သည်။ စိတ်ထဲရှိသည့်အတိုင်းပြောရလျှင် မုထျန်းဟန် သူတို့၏အိမ်ထောင်ရေးကို တကိုယ်ကောင်းဆန်စွာ လူသိရှင်ကြားကြေငြာပြီး သူတို့ရဲ့ဆက်ဆံရေးအကြောင်း ကမ္ဘာကို အသိပေးချင်သော်လည်း ကျိုးကြောင်းဆီလျော်သည့် အချိန်မရောက်သေးကြောင်း အခြေခံကျသောအချက်အလက်များက သူ့ကို ဖော်ပြနေခဲ့သည်။ ထိုအရာသည် ဟွာရှားပင်။

ဟွာရှား၏ မျိုးဆက်သစ် လူငယ်များက လိင်တူဆက်ဆံခြင်းကို လက်ခံလာပြီး ခွဲခြားဆက်ဆံခြင်း မပြုတော့သော်လည်း အများစုသည် သူတို့အပေါ် လိုလားပုံမပေါ်သေးပေ။

မော့တိသည် ကျောင်းတက်နေဆဲဖြစ်ပြီး သူ၏ အိမ်ထောင်ရေး အခြေအနေကို သိပြီးသည်နှင့် မော့တိ ယောက်ျားတစ်ယောက်နှင့် လက်ထပ်ခဲ့ကြောင်း လူအများ သိရှိလာမည်မှာ မလွဲဧကန်ပင် ဖြစ်သည်။ မော့တိ၏အရွယ်တူသူများ၊ အဆိုးဆုံးအနေဖြင့် လိင်တူချစ်မြတ်နိုးသူများကို ရွံမုန်းသူများ၏ တစ်ယူသန်စွာ အဆိုးဆုံးပုံစံနှင့် မော့တိအား ဆက်ဆံကြမည်ကို မုထျန်းဟန် မလိုလားပေ။ အမှန်တကယ်တွင် ကျောင်းသည် လုံးဝ လုံခြုံစိတ်ချရဆုံးနေရာ မဟုတ်သည့်အတွက် မုထျန်းဟန် သဝန်တိုသော်လည်း မော့တိကိုမူ သူတို့၏အိမ်ထောင်ရေးအကြောင်း ထုတ်ဖော်ခွင့်မပေးခဲ့ပေ။

ကျောင်းအပြင်ဘက်တွင် မုထျန်းဟန် မော့တိအား အထင်ကြီးလေးစားသူများကို တားနိုင်သော်လည်း မော့တိကျောင်းမှလူများဆီရောက်သွားသောအခါ မုထျန်းဟန် မျှော်လင့်ချက်မဲ့သွားသည်။ မော့တိကို အကြွင်းမဲ့ယုံကြည်ထားသော်လည်း မုထျန်းဟန် သဝန်မတိုဘဲနေနိုင်ပေ။ မော့တိ ချဥ်းကပ်လာမှုများအားလုံးကို ငြင်းဆိုမည်ကို သူသိသော်လည်း သူ့ကလေးလေးသည် ဤမျှလောက် ရဲဝံ့စွာလုပ်ဆောင်လိမ့်မည်ဟု မမျှော်လင့်ထားပေ။

မုထျန်းဟန် ထိုသတင်းကို ကြားလိုက်ရသောအခါ သူ့နှလုံးသားတစ်ခုလုံး တုန်လှုပ်သွားရသည်။ ပထမတွင် အံ့သြသွားသော်လည်း အဆုံးမှာ ဝမ်းသာသွားရသည်။ ထို့နောက် နောက်ဆက်တွဲကိစ္စများကို မည်သို့ ကိုင်တွယ်ဖြေရှင်းရမည်ကို တွေးတောဆင်ခြင်ခဲ့သည်။ အနည်းဆုံး မော့တိ ဘွဲ့ရသည်အထိ သူ့အိမ်ထောင်ဖက်သည် ယောက်ျားတစ်ယောက်ဖြစ်နေကြောင်းကို သူ ဖုံးထား၍ရသေးသည်။ ထိုကဲ့သို့ပေါက်ကြားခဲ့လျှင်တောင် သူ သတင်းအချက်အလက်တွေကို အင်အားသုံးပြီး ဖယ်ရှားပစ်၍ရသေးသည်။

မော့တိအတွက်မူ မုထျန်းဟန် မည်သည်ကို စိတ်ပူနေသည့်အကြောင်း သူ အတိအကျ ပြောနိုင်သည်။

မော့တိ သွားများပေါ်သည်အထိ ပြုံးပြပြီး မုထျန်းဟန်၏ ရင်ခွင်ထဲသို့ ခုန်ဝင်လိုက်သည်။ မုထျန်းဟန် မော့တိကို ကျွမ်းကျင်စွာ ပွေ့ချီလိုက်ပြီး သူ့ရင်ခွင်ထဲတွင် ချစ်မြတ်နိုးစွာ ပွေ့ဖက်ထားလိုက်သည်။

"ကိုကို အရမ်းကြီး စိတ်ပူစရာ မလိုပါဘူး။ ကျွန်တော် မကြာခင် ဘွဲ့ရတော့မှာပါ။ နောက်ပြီး ဒီကိစ္စကို ဖော်ထုတ်ခံရရင်တောင် ကျောင်းမှာ ဘယ်သူကမှ ကျွန်တော့်ကို အနိုင်ကျင့်ခွင့် ပေးမှာမဟုတ်ဘူး။ ပြီးတော့ ကျွန်တော့်ရဲ့ပါမောက္ခတွေကလည်း ကျွန်တော့်ကိုအရမ်းသဘောကျတယ်လေ။ အဲဒါကြောင့် သူတို့က ကျွန်တော့်ကို ဂုဏ်သိက္ခာထိခိုက်အောင် လုပ်မှာမဟုတ်ဘူးဆိုတာ ကျွန်တော် သေချာပြောရဲတယ်"

မော့တိ စကားပြောနေသည်ကို ရပ်လိုက်ပြီး မုထျန်းဟန်၏ပါးကို ပုတ်ကာ ဆက်ပြောသည်။

"ကိုကို ကျွန်တော်နဲ့ ကိုကို အတူတူရှိနေတဲ့အကြောင်းကို တစ်ကမ္ဘာလုံးကိုလည်း ကျွန်တော် သိစေချင်တယ်။ သဝန်တိုတတ်တဲ့သူက ကိုကို တစ်ယောက်တည်းလို့ ထင်မနေနဲ့"

မုထျန်းဟန် သူတို့လက်ထပ်ပြီးသည့် အချိန်ကတည်းက သူ၏အိမ်ထောင်ရေးအခြေအနေကို ကြေငြာခဲ့သည်။ ထိုသို့ကြေငြာခဲ့သည့်တိုင် မုထျန်းဟန်ကို သွေးဆောင်ရန် ကြိုးစားနေသည့် အရှက်မဲ့သောသူများ ရှိနေဆဲပင်။ မုထျန်းဟန် သူတို့ကို မညှာမတာ ငြင်းဆန်ခဲ့ပြီး သူ့ရှေ့တွင် ဘယ်တော့မှ နောက်ထပ် ပြန်မပေါ်လာရန် သေချာအောင် ပြုလုပ်ခဲ့သော်လည်း မော့တိ ဒေါသထွက် စိတ်အနှောင့်အယှက်မဖြစ်ဘဲ မနေပေ။

ထို့အတွက်ကြောင့်လည်း အရည်အချင်းရှိ၍ ချောမောပြီး ချမ်းသာသည့် မော့တိက မုထျန်းဟန်၏ တရားဝင်အိမ်ထောင်ဖက်ဖြစ်သည့်အကြောင်း လူတိုင်းကို သူ သိစေချင်သည်။ အခြားမည်သူကများ သူ့ယောက်ျားကို သွေးဆောင်ရန် တွေးရဲသေးသလားဟု ကြည့်ချင်သေးသည်။

မုထျန်းဟန် မော့တိ၏ ကိုယ့်ကိုယ်ကို ကျေနပ်နေသည့် အမူအရာကို ကြည့်ကာ ပြုံးလိုက်သည်။ မော့တိကို ဆိုဖာပေါ်တင်ပြီး ချစ်မြတ်နိုးစွား နမ်းရှိုက်လိုက်သည်။

“ကောင်းပြီ။ မင်းသဘောအတိုင်း လုပ်ကြရအောင်။ သတင်းတွေ ပျံ့သွားတဲ့အခါကျရင် ကိုယ်တို့ အဲဒါကို ဖယ်ရှားမပစ်ဘဲ တရားဝင် ထုတ်ပြန်ချက်တစ်ခု ထုတ်လိုက်မယ်"

"အင်း” မော့တိ ချက်ချင်း ခေါင်းညိတ်လိုက်သည်။ သူ ပြုံးပြီး တခြားအကြောင်းအရာကို ပြောင်းပြောလာသည်။

"ကိုကို ဒီနေ့ ကျွန်တော် မထင်မှတ်ထားတဲ့ ဖုန်းခေါ်ဆိုမှုတစ်ခု ရခဲ့တယ်။ ဘယ်သူလဲဆိုတာ ခန့်မှန်းကြည့်"

"မထင်မှတ်ထားတဲ့ ဖုန်းခေါ်မှုလား"

မုထျန်းဟန် ခဏတာမျှစဉ်းစားပြီး မေးလိုက်သည်။

"အဲဒါ ချင်ကွမ်းကျယ်လား"

"အိုး ကိုကို ကိုကိုက အရမ်းအံ့ဩဖို့ ကောင်းတာပဲ။ ပထမဆုံး ကြိုးစားမှုမှာတင် မှန်သွားတယ်။ ဟုတ်တယ် သူပဲ"

"သူ ဘာပြောလဲ"

မုထျန်းဟန် မျက်မှောင်ကြုတ်လိုက်သည်။

ချင်အဖွဲ့ကို မုထျန်းဟန် ဖြုတ်ချခဲ့သည်မှာ ကြာပြီဖြစ်သည်။ ရဲတပ်ဖွဲ့သည် ချင်းမိသားစု၏ နက်ရှိုင်းသော အကျင့်ပျက်ခြစားမှုများကို ခွင့်ပြုပေးခဲ့ခြင်းကြောင့် သူတို့ကို လျင်မြန်စွာ ဖယ်ရှားနိုင်ခဲ့ခြင်းလည်း တစ်စိတ်တစ်ပိုင်းဖြစ်နိုင်သည်။ ချင်ကွမ်းကျယ်က ချစ်ခင်မြတ်နိုးတတ်သော ဖခင်တစ်ဦးဖြစ်သော်လည်း သန့်ရှင်းသောစီးပွားရေးသမားမဟုတ်သည်မှာ သေချာပေါက်ပင်။ သူ၏နည်းလမ်းများက ချင်ချန်းယီနှင့် ဆင်တူသည်။ တစ်ခုတည်းသော ခြားနားချက်မှာ သူ၏ကိုယ်ပိုင်အကျိုးစီးပွားထက် အခြားသူ၏အကျိုးစီးပွားကို ဦးစားပေးခြင်း၌ သူသည် 'ထိန်းချုပ်မှု' မရှိခြင်းပင်ဖြစ်သည်။

ချင်မိသားစု ကျဆုံးသွားသည့်တိုင် ချင်ကွမ်းကျယ်ကမူ ငွေကြေးလုံးဝမရှိခြင်း မဟုတ်ပေ။ သူသည် ဟွာရှား၏ အချမ်းသာဆုံးလူအဖြစ်မှ အိမ်တစ်လုံးနှင့် ကားတစ်စီးရှိသော သာမန်လူအိုတစ်ဦးအဖြစ်သို့ လျှော့ချခံလိုက်ရခြင်းမျှသာဖြစ်သည်။

"သူ ချင်ချန်းယီဆီ အလည်အပတ်သွားခဲ့ပြီး ချင်ချန်းယီလည်း နောင်တရနေတယ်လို့ သူကပြောတယ် ”

မော့တိ ပြောပြလိုက်သည်။

"သူပြောတာ ဒါအကုန်ပဲလား"

"မဟုတ်ဘူး။ ဒါပဲ သူပြောနိုင်တယ်။ သူ့အသံကို ကြားတာနဲ့ ကျွန်တော် ဖုန်းချလိုက်လို့ အဲဒီအပိုင်းကိုပဲ ကြားခဲ့တယ်။ ကျွန်တော် မှားနှိပ်ပြီး ဖုန်းကိုင်မိသွားတာ ကျွန်တော် ဘယ်တုန်းကမှ နံပါတ်အစိမ်းတွေဆို လက်မခံဘူး"

သူပြောပြီးသည်နှင့် မော့တိ၏ ဖုန်းမြည်လာပြီး ထိုဖုန်းခေါ်ဆိုမှုမှာ အမည်မသိဖုန်းခေါ်ဆိုမှုတစ်ခုဖြစ်နေသည်။

မော့တိ:"..."

မော့တိ ဖုန်းခေါ်ခြင်းကို ပြတ်ပြတ်သားသား ငြင်းပယ်လိုက်သော်လည်း သုံးစက္ကန့်အကြာတွင် မုထျန်းဟန်၏ ဖုန်းမြည်လာပြီး ထိုနံပါတ်အတိုင်းပင် တူညီသောနံပါတ်ဖြစ်နေခဲ့သည်။

မုထျန်းဟန် စဥ်းစားလိုက်ပြီး ပြန်ဖြေရန် ဆုံးဖြတ်လိုက်သည်။

လိုင်သယ်စစ်၏ အသံ အခြားတစ်ဖက်မှ ထွက်ပေါ်လာပြီး

“မု၊ ငါ ရှောင်တိကို ဖုန်းခေါ်ပေမယ့် သူ ဖုန်းမကိုင်ဘူး။ ဒါက ရှောင်ယွီရဲ့ နံပါတ်အသစ်လေ။ သေချာမှတ်ထားလိုက်အုံး"

"လိုရင်းကိုပဲပြော"

စုန့်ယွီ၏ အသံ ဖုန်းထဲသို့ ဝင်လာသည်။

"အိုး ဟုတ်သားပဲ။ မု၊ မော့တိနဲ့ မင်းရဲ့ အိမ်ထောင်ရေးအကြောင်းကို ဖော်ထုတ်ပြီးသွားကြပြီ။ ကွန်ရက်တစ်ခုလုံး ရုတ်ရုတ်သဲသဲဖြစ်နေပြီ။ တစ်ယောက်ယောက်က မင်းကို ရောင်းစားခဲ့တာလို့လည်း ငါ သံသယရှိတယ်။ မြန်မြန်ကြည့်လိုက်"

Xxxxxxx

Prev Next