MM Story Teller

အပိုင်း ၁၇၁(Extra 2)

Viewers 28k

Chapter 171 (Extra-2)

"ရှောင်တိ ရှောင်တိ နင် နင် ငါပို့လိုက်တဲ့ ဒီဗီဒီယိုကို ကြည့်ဖို့ မမေ့နဲ့နော်။ အဲ့ဒီ အဲဒီတစ်ခုက... ဖူး!" ကျောက်ချွင်သည် မရယ်မိစေရန် ပါးစပ်ကို အတင်းပိတ်ထားရသောကြောင့် သူမ၏မျက်နှာက နီရဲနေသည်။

မော့တိ သူမ၏ ဒုက္ခပေးတတ်သော အပြုအမူများနှင့် ရင်းနှီးနေပြီဖြစ်ပြီး အေးစက်စွာပြောလိုက်သည်။

"ကြည့်ရတာ အစ်မ အလုပ်ပြီးသွားပြီနဲ့ တူတယ်။ ကျွန်တော် အစ်မကို တာဝန်သစ်တစ်ခု ထပ်ပေးမယ်"

"အာ မဟုတ်ဘူး။ ငါ ငါးမိနစ်လောက်ပဲ အနားယူနေတာ” ကျောက်ချွင် ငြင်းပယ်လိုက်သည်။

မော့တိ ခေါင်းခါပြီး ရယ်လိုက်သည်။

လွန်ခဲ့သော ၃ နှစ်ခန့်က ချင်ကွမ်းကျယ်သည် မုထျန်းဟန်နှင့် မော့တိတို့၏ ဆက်ဆံရေးကို မနာလိုမုန်းတီးစွာ ထုတ်ဖော်ခဲ့ပြီးနောက် ထိုကိစ္စသည် သူတို့၏ အိမ်ထောင်ရေးနှင့် ပတ်သက်သည့် တရားဝင်ထုတ်ပြန်ချက်ကို ထုတ်ရန် တွန်းအားပေးခဲ့သည်။ ထိုအချိန်မှစ၍ ဘဝနေထိုင်မှုသည် အနည်းငယ်ကွာခြားသွားပေသည်။

အစပိုင်းတွင် လိင်တူဆက်ဆံခြင်းကို ခွဲခြားဆက်ဆံသူများ၏ အွန်လိုင်းပေါ်တွင် ပေါ်ပေါ်ထင်ထင် ပြစ်တင်ဝေဖန်မှုများခံခဲ့ရသည်မှာ အမှန်ဖြစ်ပြီး အချို့သည် မော့တိ၏ ကုမ္ပဏီကိုပင် သပိတ်မှောက်ခဲ့ကြသည်။ မော့တိ၏ ပြိုင်ဘက်ကုမ္ပဏီများသည် မီးထဲသို့လောင်စာပေါင်းထည့်ရန် ဤအခွင့်အရေးကိုယူပြီး မော့တိ၏ဂိမ်းများကို စော်ကားပြောဆိုရန်နှင့် နာမည်ကောင်းကို ထိခိုက်စေရန် ရေတပ်များကို ငှားရမ်းခဲ့ကြသည်။

သို့သော်လည်း ထိုလူများသည် အချိန်ခဏလေးလောက်သာ အောင်မြင်ခဲ့ကြသည်။

ထိုအချိန်တွင် မုထျန်းဟန် တည်ထောင်ခဲ့သော Impression ကုမ္ပဏီသည် ကမ္ဘာပေါ်တွင် ဒုတိယအကြီးဆုံး ကုမ္ပဏီဖြစ်လာခဲ့သည်။ သူ၏လူထုဆက်ဆံရေးအဖွဲ့ (Public Relation Team)သည် အကောင်းဆုံးမဟုတ်သော်လည်း အကောင်းဆုံးများထဲမှ တစ်ခုဖြစ်သည်။ သူတို့သည် လျင်မြန်စွာ တန်ပြန်အရေးယူမှုများနှင့် အရာခပ်သိမ်းကို ချောချောမွေ့မွေ့ဖြစ်စေရန် အစီအစဥ်များ ချမှတ်ဆောင်ရွက်ခဲ့သည်။

သိပ်မကြာခင်မှာပင် လူထု၏သဘောထားကို ပြောင်းပြန်လှန်ပစ်နိုင်ခဲ့သည်။ အမှန်တကယ်တွင် ထိုကိစ္စသည် အင်အားကြီးရေတပ်များကြောင့်သာ မဟုတ်လျှင် ယေဘုယျသဘောထားများသည် အတော်လေး အပြုသဘောဆောင်သည်။

ရေတပ်များ၏ အပျက်သဘောဆောင်သော လွှမ်းမိုးမှု လျော့နည်းလာသည်နှင့်အမျှ သူတို့၏ ဆက်ဆံရေးကို ထောက်ခံသည့် ပို့စ်များစွာ ထွက်ပေါ်လာခဲ့သည်။ အမျိုးသမီးထုကြားတွင် သူတို့၏ အမျိုးသားနတ်ဘုရားနှစ်ပါးသည် လက်ထပ်ပြီးဖြစ်သောကြောင့် စိတ်ပျက်သွားကြသည်ဟုလည်း အချို့ကပြောကြသော်လည်း သူတို့ပြောစကားများတွင် မော့တိနှင့် မုထျန်းဟန်တို့နှစ်ယောက်ကို ကွဲကွာစေလိုသည့် စိတ်ဆန္ဒမျိုးမရှိကြပေ။ ကျန်သူများသည် သွားရည်များကျကာ အားကျနေကြသော ဖူဂျိုရှီများဖြစ်ပြီး သူတို့နှစ်ယောက်ကို ချစ်မြတ်နိုးလက်ခံလာကြသည့် အရေအတွက်သည်လည်း အဆမတန် တိုးပွားလာနေသည်။

ထို့အတူ မုထျန်းဟန်၏ အဖွဲ့သည် သူတို့နှစ်ဦး မည်ကဲ့သို့တွေ့ဆုံပြီး ချစ်ကြိုက်ခဲ့ကြောင်း မုထျန်းဟန်ကိုယ်တိုင် ကြိုးကိုင်ဖန်တီးထားသည့် စိတ်ကူးယဉ်ဇာတ်လမ်းမျိုးစုံကို စတင် ဖြန့်ဝေခဲ့ကြသည်။ ဗားရှင်းတစ်ခုသည် အခက်အခဲများကို ရင်ဆိုင်ကြုံတွေ့နေရသော မင်းသားတစ်ပါးကို ကူညီပေးသည့် ဧကရာဇ်ဘုရင်တစ်ပါးပုံစံကဲ့သို့ မော့တိကို မုထျန်းဟန် မည်ကဲ့သို့ ကူညီပေးခဲ့ကြောင်း ရေးသားထားသည့် တကယ့်အဖြစ်မှန်ဇာတ်လမ်းဖြစ်သည်။

ထိုဇာတ်လမ်းသည် အလွန်ရေပန်းစားလာခဲ့ပြီး နောက်ဆုံးတွင် cp fan အဖွဲ့ကို ဖန်တီးခဲ့ပြီး သူတို့၏ ချစ်လှစွာသောအတွဲကို ကောင်းကင်ဘုံနှင့် ကမ္ဘာမြေ စုံတွဲ (Heaven and Earth Couple) ဟု အမည်ပေးခဲ့သည်။

ဤစုံတွဲသည် လူအများ မနာလိုစရာ အချက်များအားလုံးနှင့်ပြည့်မီကိုက်ညီနေခဲ့သည်။ နှစ်ယောက်စလုံးသည် ထူးချွန်ထက်မြက်သည့် အရည်အချင်းတွေနှင့်အတူ ရုပ်ရည်သည်လည်း အလွန်ချောမောကြသည်။ သူတို့နှစ်ယောက်၏ အချစ်ဇာတ်လမ်းသည် ချိုမြိန်ပြီး စွဲမက်စရာကောင်းလွန်းသည်။ ထို့အပြင် သူတို့သည် လက်ထပ်ထားပြီးဖြစ်သည်။ ထို့ကြောင့် ထိုကိစ္စသည် လူသိများကျော်ကြားလာစေရန် လှည့်စားခြင်းမဟုတ်ကြောင်း သက်သေများပင်ဖြစ်သည်။

ပရိတ်သတ်အရေအတွက် တိုးလာသည်နှင့်အမျှ အနုပညာလက်ရာများ၊ စိတ်ကူးယဥ်ဇာတ်လမ်းများ၊ manhua နှင့် ကုန်ပစ္စည်းများကို ပိုမိုဖန်တီးလာကြသည်။ ထိုအရာများသည် ပရိတ်သတ်များက ကောင်းကင်ဘုံနှင့်ကမ္ဘာမြေကြီး အစုရှယ်ယာများဟုလည်း ခေါ်ကြသည့် မော့တိနှင့် မုထျန်းဟန်တို့ ကုမ္ပဏီများ၏ ဈေးကွက်တန်ဖိုးကိုလည်း လွှမ်းမိုးနိုင်ခဲ့သည်။ ထိုအရာများကို လက်ဝယ်ပိုင်ဆိုင်နိုင်ခဲ့လျှင် သင် ဘယ်သောအခါမျှ စိတ်ဆိုးဒေါသထွက်ရမည် မဟုတ်ပေ။

နောက်ဆုံးတွင် ဤဖြစ်စဉ်သည် ပြည်ပနိုင်ငံများသို့ ပျံ့နှံ့သွားခဲ့ပြီး ယခုအခါ နိုင်ငံတိုင်းတွင် ကောင်းကင်ဘုံနှင့် ကမ္ဘာမြေကြီး စုံတွဲ၏ ပရိသတ်များ ရှိနေပြီဖြစ်သည်။

အစပိုင်းတွင် မော့တိ အနည်းငယ်ရှက်ရွံ့သော်လည်း မကြာခဏဖော်ပြခြင်းခံရသောကြောင့် သူအရှုံးပေးလိုက်ပြီး တစ်ခါတစ်ရံတွင် သူတို့နှင့်ပတ်သက်သည့် စိတ်ကူးယဉ်ဝတ္ထုများကို ဝဘ်ဆိုဒ်များတွင် လျှို့ဝှက်စွာ ရှာဖွေဖတ်ရှုလေ့ရှိသည်။

သူကိုယ်တိုင် သူ့ကိုယ်ပိုင် ခွေးစာများ စားပြီး ထိုနည်းလမ်းသည် မယုံနိုင်လောက်အောင် အရမ်းအံ့ဩဖို့ကောင်းသည်ဟု သူထင်ခဲ့သည်။

ကျောက်ချွင်သည်လည်း ကောင်းကင်ဘုံနှင့် ကမ္ဘာမြေ စုံတွဲ၏ ပရိတ်သတ်တစ်ဦးဖြစ်သည်။ သူမ 'အစားအသောက်ကောင်း' ကို ရှာတွေ့သည့်အချိန်တိုင်း သူမသည် အထူးသီးသန့် တာဝန်တစ်ရပ်ကဲ့သို့ ၎င်းတို့ကို မော့တိဆီသို့ ရယ်စရာကောင်းသော မျက်နှာဖြင့် ပေးပို့လေ့သည်။

မော့တိ မသိခဲ့သည်မှာ မုထျန်းဟန်သည် သူနှင့်ဝေးနေသည့်အချိန်တိုင်း မုထျန်းဟန်ကိုယ်တိုင် ဖန်တီးထားသော ဇာတ်လမ်းများကို တခါတရံ လှန်ကြည့်တတ်သည်။ ယခုအချိန်တွင် သီးသန့် ကောင်းကင်ဘုံနှင့် ကမ္ဘာမြေကြီး စုံတွဲဝဘ်ဆိုဒ်တွင် သူ၏ ဇာတ်လမ်းများစွာကို တင်ထားပြီးဖြစ်သည်။ အမြင့်ဆုံးဆုအဖြစ် ယွမ်ငွေအမြောက်အများကို မုထျန်းဟန်ကိုယ်တိုင် ထောက်ပံ့ပြီး စာရေးပြိုင်ပွဲကိုပင် ကျင်းပခဲ့သည်။ ထိုသားရဲအိုကြီးနှင့် နှိုင်းယှဥ်လျှင် မော့တိသည် အတော်လေး ရိုးသားပြီး အပြစ်ကင်းနေဆဲပင်။

…..

မော့တိ ဘွဲ့ရပြီး ၃နှစ်အကြာ အသက်နှစ်ဆယ့်လေးနှစ်တွင် သူ၏ကုမ္ပဏီဖြစ်သော တိယီမုကို တည်ထောင်ခဲ့သည်မှာ ခြောက်နှစ်ရှိခဲ့ပြီဖြစ်ပြီး လက်ရှိတွင် ဟွာရှားဂိမ်းလုပ်ငန်း၏ နဂါးဟု အမည်ပေးထားဆဲပင်။ သို့သော် တိယီမုသည် ဟွာရှားတွင် ရေပန်းစားရုံသာမက ၎င်း၏ ဩဇာအာဏာသည် အဆုံးမဲ့စီးဆင်းမှု ဂိမ်းအသစ်များအတွက် အခြေခံဖြစ်သည့် အဆုံးမဲ့ဘ၀ ၏ နည်းပညာများနှင့်အတူ ကမ္ဘာတစ်ဝှမ်းသို့ ပျံ့နှံ့သွားခဲ့သည်။ ဂိမ်းအသစ်များထဲမှ မည်သည့်ဂိမ်းကမျှ သူ၏ပလ္လင်ကို မလှုပ်ခတ်နိုင်သေးပေ။

အဆုံးမဲ့ဘဝသည် တိယီမု၏တစ်ခုတည်းသော ကမ္ဘာကျော်ဂိမ်းမဟုတ်သည်မှာ ပြောနေစရာမလိုတော့ပေ။ ဤနှစ်များတစ်လျှောက်တွင် ၎င်းသည် MOBA ဂိမ်း၊ Battle၊ open-world role-playing ဂိမ်း၊ Path of the Immortal၊ dating sim ဂိမ်း၊ Secret Summer နှင့် အခြားထိတ်လန့်ဖွယ်ရာ survival ဂိမ်း၊ The Survivor is King ...အစရှိသည်တို့ကို ထုတ်လုပ်ခဲ့သည်။

ဤဂိမ်းများသည် မော့တိ၏ ပိုင်ဆိုင်မှုများကို မုထျန်းဟန်ကို ကျော်လွန်သည်အထိ မမြှင့်တင်နိုင်သော်လည်း မော့တိသည် ကမ္ဘာ့အချမ်းသာဆုံးနှစ်ဆယ်စာရင်းတွင် ပါဝင်နေဆဲဖြစ်သည်။ အကယ်၍ တိယီမုသည် ၎င်း၏ဂိမ်းများကို pay-to-win mechanicsများအဖြစ်သို့ ပြောင်းလဲခဲ့ပါလျှင် မော့တိ၏ဝင်ငွေသည် မုထျန်းဟန်ကို အလွယ်တကူ ကျော်တက်နိုင်သည်ဟု သုံးသပ်သူ အများအပြားက ပြောကြသည်။

(Pay-to-win mechanicsက ဂိမ်းကစားသူတွေကို levelမြင့်ဖို့ ဂိမ်းထဲမှာရှိတဲ့ ပစ္စည်း(items)တွေကို ရောင်းပေးတာကို ပြောတာပါ။ ဥပမာ-Mobile Legendsမှာ စိန်တွေ ဝယ်တာနဲ့ တူတူပဲ)

ထိုအကြောင်းကိုဖတ်ပြီး မော့တိသည် သူ့အထက်ပုဂ္ဂိုလ်ကို စောစီးစွာ ကျော်မတက်ချင်သောကြောင့်ဟု စုံတွဲပရိသတ်များအားလုံးက အော်ဟစ်ပြောဆိုခဲ့ကြသည်။

တစ်ခါတရံတွင် မော့မိသားစုအကြောင်းအား ဖော်ပြထားပြီး မော့တိအပေါ် ထိုကဲ့သို့ ပြုမူခဲ့သည်ကို သူတို့ နောင်တရလား သိချင်သည့် ပို့စ်များ အွန်လိုင်းတွင် ရှိနေတတ်သည်။

အဖြေသည် လုံးဝ ဟုတ်ပါသည်။

မော့မိသားစု ထိုကံကြမ္မာအဆုံးအဖြတ်ဖြစ်သော အပျော်စီးသင်္ဘောပေါ်တက်သွားသည့်အချိန်မှစ၍ ခြောက်နှစ်ကြာသွားခဲ့သည်။ သူတို့သည် ငါးနှစ်အတွင်း သူတို့၏ အကြွေးများကို ဆပ်နိုင်သင့်သည်မှန်သော်လည်း မော့စန်းကျစ်ကဲ့သို့ လူတိုင်းသည် တာဝန်များကို စတင်ဆောင်ရွက်နိုင်စွမ်း မရှိကြပေ။ ခွဲတမ်းကို ပြီးမြောက်ရန် ပျက်ကွက်လျှင် ပိုမိုပြင်းထန်သော ပြစ်ဒဏ်များ ချမှတ်ခံရနိုင်သော်လည်း အချို့သောသူများသည် အချိန်ဆွဲရသည်ကို နှစ်သက်နေဆဲဖြစ်သည်။

ထို့ကြောင့် မော့မိသားစုသည် ထိုနေရာတွင် နေထိုင်ရန် နောက်ထပ်တစ်နှစ် ထပ်တိုးသွားခဲ့သည်။ ယခုနှစ် ဇွန်လမှသာလျှင် သူတို့၏ လောင်းကစားကြွေးများအားလုံးကို ပြန်ဆပ်နိုင်ခဲ့သည်။ သို့သော် သူတို့ (ထိုအထဲတွင် ထောင်မှလွတ်လာပြီးနောက် သင်္ဘောဆီသို့ တန်းတန်းမတ်မတ် အပို့ခံရသော မော့စစ်လန်လည်း အပါအဝင်) လွတ်လာသောအခါတွင် သူတို့အားလုံး လူနှင့်တောင်မတူတော့ပေ။ သူတို့အရင်က အကျင့်စရိုက်များ ဆုံးရှုံးသွားပြီး အာရုံကြောများ အနည်းငယ် ပျက်စီးသွားကြသည်။

လယ်ယာလုပ်ငန်းဖြင့် ရပ်တည်နိုင်သည့် အခြားကျေးလက်ဒေသတစ်ခုတွင် ကြီးမားသော မြေကွက်တစ်ခုကို မုထျန်းဟန် သူတို့အား ပေးခဲ့သည်။ သူတို့ ပေးထားသည့်နေရာတွင် နေထိုင်နေသည်ကို သေချာစေရန် မုထန်းဟန် လူတစ်ချို့ကို စောင့်ကြည့်ခိုင်းခဲ့သည်။ ထို့အပြင် သူတို့နှင့် ပြန်လည်ပေါင်းစည်းရန် ခြောက်နှစ်ကြာ စိတ်ကျန်းမာရေးဆေးရုံတွင် ထိန်းသိမ်းခံထားရသည့် မော့လျှိုကွေ့ကိုလည်း ပို့ပေးခဲ့သည်။

စိတ်ကျန်းမာရေးဆေးရုံ၌ သူမ ချုပ်နှောင်ခံထားရသည့် ဒုတိယမြောက်နှစ်တွင် မော့လျှိုကွေ့၏ စိတ်အခြေအနေသည် အနည်းငယ် စိတ်ဖေါက်ပြန်သွားသည်။

အမှန်တရားကိုသိပြီးနောက် ကမ္ဘာကြီးသည် သူမကို လှည့်ပတ်နေသည်ဟု အခိုင်အမာ ယုံကြည်နေဆဲဖြစ်သည်။ သူမသည် ဤစကြဝဠာ၏ ဗဟိုချက်ဖြစ်ပြီး လူတိုင်း သူမအား ချစ်မြတ်နိုးပြီး ကိုးကွယ်သင့်သည်။ ခြွင်းချက်မရှိ သူမကို ချစ်မြတ်နိုးပြီး သူမအတွက် သူတို့၏ အသက်များကို မြှုပ်နှံထားသင့်သည်။

တကယ့်လက်တွေ့တွင် ဆန့်ကျင်ဘက်ဖြစ်နေသည်မှာဖြင့် ဝမ်းနည်းစရာကောင်းလှသည်။

ထိုကဲ့သို့ ပြင်းထန်သော ခြားနားချက်များသည် သူမကို ရူးသွပ်လုနီးပါး ဖြစ်သွားစေခဲ့သည်။ အထူးသဖြင့် စိတ်ဝေဒနာရှင်များရှိသည့် သီးသန့်လူနာဆောင်သို့ ပြောင်းရွှေ့ပြီးနောက်ပင် ဖြစ်သည်။ နေ့စဉ်နှင့်အမျှ ထိုထူးဆန်းသော အတွင်းလူနာများ၏ ကြောက်မက်ဖွယ် အော်ဟစ်သံများနှင့် ထူးဆန်းသော အပြုအမူများသည် သူမကို ဝန်းရံထားကြသည်။ သူမ၏ စိတ်ကျန်းမာရေးသည် တဖြည်းဖြည်း ပြိုလဲလာပြီး သူမ၏ ကိုယ်ပိုင်စိတ်ကူးထဲတွင် စတင်ပုန်းကွယ်လာတော့သည်။

Systemသည် ရှိနေဆဲဖြစ်ပြီး မော့တိသည် သူမ နောက်လိုက်များ၏ သတ်ဖြတ်ခြင်းကို ခံခဲ့ရသည်ဟု တွေးကာ သူမကိုယ်သူမ လှည့်ဖြားနေခဲ့သည်။ မရေမတွက်နိုင်သော အမျိုးသားများသည် သူမ၏ခြေရင်း၌ ဒူးထောက်ကာ လူအများသည် သူမအား အရူးအမူးစွဲလန်းနေပြီး တစ်ကမ္ဘာလုံးသည် သူမအား နတ်ဘုရားမအဖြစ် ဆက်ဆံကြပေလိမ့်မည်။

ထို့ကြောင့် မော့လျှိုကွေ့သည် နှိပ်စက်ညှဉ်းပန်းခြင်းမခံရဘဲ သူမ၏ကိုယ်ပိုင် ထင်ယောင်ထင်မှားယုံကြည်မှုများကြောင့် ရူးသွားခဲ့သည်။

မော့မိသားစုနှင့် ပြန်လည်ပေါင်းစည်းရန် ပြန်ပို့လိုက်သောအခါတွင် သူမသည် စိတ်ကူးယဥ်တတ်သည့် ပြင်းထန်သော စိတ်ဝေဒနာရှင်အဖြစ်သို့ လုံးဝပြောင်းလဲသွားခဲ့သည်။သူမ၏မျက်လုံးများကို ပထမတစ်ချက်ကြည့်ရုံနှင့်ပင် မည်သူမဆို သူမသည် ပုံမှန်မဟုတ်ကြောင်း ပြောနိုင်သည်။

နောက်ဆုံး သူမ မော့မိသားစုဝင်များနှင့် တွေ့သည့်အခါ သူမအတွက် လက်ဖက်ရည်ဖျော်ပေးရန် သူတို့ကို ပြောခဲ့သည်။

မော့မိသားစု သည်းခံခဲ့ရသော နှိပ်စက်မှုများအားလုံးမှ ဒေါသကို နှိုးဆွပေးနိုင်သကဲ့သို့ပင် အခု မော့လျှိုကွေ့ကို တွေ့လိုက်ရခြင်းသည် သူတို့ကို စိတ်အနှောင့်အယှက် ဖြစ်စေသည်။ သူမတွင် သူတို့ကို သွေးဆောင်ရန် သတ္တိများ ရှိနေသေးသည်ဟု တွေးလိုက်မိသည်။ သူတို့၏ ဒေါသကို မထိန်းနိုင်သည့် အဒေါ်နှစ်ယောက်သည် မော့လျှိုကွေ့၏ ဆံပင်ကိုဆွဲပြီး သူမ၏မျက်နှာကို မထိန်းချုပ်နိုင်စွာ အဆက်မပြတ် ပါးရိုက်ကြတော့သည်။

မော့လျှိုကွေ့၏အမေဖြစ်သူ ရွမ်ချင်းတန့်သည် မော့လျှိုကွေ့အား မရိုက်နှက်ခြင်းသည်ပင် သူမသမီးကို ပေးနိုင်သည့် အကြီးမားဆုံး 'ချစ်ခြင်းမေတ္တာ' ဖြစ်သည်။ တကယ်တမ်းတွင် ရွမ်ချင်းတန့်သည် ဘယ်သောအခါကမျှ တစ်ကိုယ်ကောင်းဆန်သည့် မိခင်တစ်ယောက်မဟုတ်ခဲ့ပေ။သို့သော် သူမ ခံစားခဲ့ရသည့် ခြောက်နှစ်တာကာလအတွင်း သူမသည် မော့တိကို မိနစ်တိုင်းမုန်းတီးနေခဲ့ပြီး မော့လျှိုကွေ့ အပေါ် ချစ်မြတ်နိုးမှုသည်လည်း ပျောက်ကွယ်သွားခဲ့သည်။

ကျန်မော့မိသားစုဝင်များအားလုံးသည် မော့လျှိုကွေ့ကို အရိုးထိအောင် မုန်းတီးနေကြသည်မှာ ပြောစရာမလိုပေ။

မော့လျှိုကွေ့ကို ကောင်းကောင်းရိုက်နှက်ပြီးနောက်တွင်တောင် အဒေါ်များသည် မကျေမနပ်ဖြစ်နေဆဲပင်။ မော့လျှိုကွေ့ ပြစ်ဒဏ် အနည်းငယ်လောက်သာ ကျခံနေရစဥ်တွင် မော့မိသားစုဝင်များသည် သူမကြောင့် မရေမတွက်နိုင်သော ညှဉ်းပန်းနှိပ်စက်မှုများကို ဒုက္ခခံခဲ့ကြရသည်။ သူတို့သည် မော့လျှိုကွေ့ကို အလွယ်တကူ မလွှတ်ပေးနိုင်ပေ။

သူတို့ ထိုဒုက္ခကို ဘယ်လိုပင် ခံနိုင်ရည်ရှိစေကာမူ သူမကို အဘယ်ကြောင့် မြည်းစမ်းခွင့်မပေးရမည်နည်း။

…..

ထိုသို့သော ထူးထူးခြားခြား ပြန်လည်ဆုံဆည်းမှုနှင့်အတူ မော့မိသားစု၏နေ့ရက်များသည် စိတ်လှုပ်ရှားဖွယ်ဖြစ်လာသည်။ သူတို့သည် မိသားစုတစ်စုဖြစ်ရန် တကယ်ကိုသင့်တော်ပေသည်။

Xxxxxxxc

Prev Next