လင်းရှောင်က သူ နားကြားမလွဲကြောင်း ထပ်ခါထပ်ခါ အတည်ပြုပြီးသည့်အခါ သူ့မျက်နှာကြီးက မည်းမှောင်သွားသည်။ သူ ကတိုက်ကရိုက်ဖြင့် ခေါင်းကိုတစ်ဖက်လှည့်ကာ ဖူယွီကျွင်း၏ ဆုပ်ကိုင်ထားခြင်းမှ လွတ်အောင်လုပ်လိုက်သည်။
ဖူယွီကျွင်း မျက်ခုံးများပင့်လိုက်ပြီး စိတ်ပျက်သွားကာ လက်ကို ပြန်ရုတ်လိုက်သည်။
" မင်း ... ကိုယ့်ကို အခွင့်အရေးတောင် မပေးတော့ဘူးလား ..."
တခြားတိုင်းပြည်မှ ချောမောခံ့ညားသည့် မင်းသားတစ်ယောက်က သူ့ကို အချစ်များပြည့်နေသည့် မျက်ဝန်းတစ်စုံဖြင့် ကြည့်နေသည်။ အကယ်၍ လင်းရှောင်က ယောက်ျားတစ်ယောက် မဟုတ်ခဲ့ပဲ ယခင်ဘဝက ဖူယွီကျွင်းမည်သို့သောလူမျိုးဖြစ်ကြောင်း မသိခဲ့ပါက သူ၏ အမူအယာကြောင့် စိတ်လှုပ်ရှားသွားနိုင်သည်။
သို့သော်လည်း လင်းရှောင်က ဖူယွီကျွင်းအကြောင်းကို အပြည့်အစုံ သဘောပေါက်ထားသည်။
ဤယောက်ျား၏ ပင်ကိုစိတ်က စိတ်ကူးယဉ်ဆန်သည်။ အနည်းငယ်ကြည့်ကောင်းသော အမျိုးသမီးတစ်ယောက်ရှိနေသရွေ့ လေးနက်သည့် ခံစားမှုအသွင်အပြင်ကို ခံယူပြီး ချစ်ခြင်းမေတ္တာ၏ အချိုသာဆုံးသော စကားလုံးများကို ပြောနိုင်သည်။ သူ၏နှလုံးသားကို သူ့လက်ထဲထည့်ထားပြီး မျက်စိတစ်မှိတ်အတွင်း ချစ်ရသူထံ ပေးပို့နိုင်သည့်ပုံသည်။
သို့သော် သူ့အချစ်ရေးနည်းလမ်းများ၏နောက်ကွယ်တွင် ပြောင်းလဲလွယ်ခြင်းများရှိနေသည်။ သူစိတ်ဝင်စားသောအခါ သူ၏လက်ဖဝါးပေါ်ရှိ ချစ်သူကို ပစ်ချရန်ကြောက်သော်လည်း သူ၏စိတ်ဝင်စားမှုလျော့နည်းသွားသည်နှင့် သူ၏ချစ်သူဟောင်းကို ဖိနပ်တစ်ရံကဲ့သို့ စွန့်ပစ်သွားလိမ့်မည်။
သူ၏ အချစ်ရေးနည်းလမ်းများနှင့် ပြောင်းလဲလွယ်မှုများက ရှောင်နိုင်ငံတွင် သတင်းဆိုးဖြင့် ကျော်စောသည်။
ထို့ကြောင့် ယခင်ဘဝက ဤမင်းသားနှင့် မိုရွှီကို မတွေ့ရန် လင်းရှောင် အထပ်ထပ်အခါခါ ကာကွယ်ခဲ့ခြင်းပင်။ မိုရွှီက ဤယောက်ျား၏ လှည့်စားခြင်းခံရမည်ကို စိုးရိမ်ခဲ့သည်။ ကံကောင်းစွာဖြင့် မိုရွှီ၏နှလုံးသားက ဧကရာဇ်ထံတွင်သာ ရှိနေခဲ့သောကြောင့် ယခင်ဘဝက ပြဿနာများစွာ မကြုံခဲ့ရပေ။
ဤရှောင်တိုင်းပြည်မင်းသားနှင့် သူတို့၏ စေ့စပ်ဆွေးနွေးခြင်းများက မလေးနက်ခဲ့ပေ။
ထိုအချိန်က မိုရွှီ၏ ထူးထူးသောအလှတရား နှင့် ထိုအရိပ်အကြောင့် ရှောင်တိုင်းပြည်မင်းသားနှင့် မကြာခဏ ကျဉ်းထဲကျဉ်ထဲ ရောက်ခဲ့ရသည်။ ယခင်ကတည်းက သူနှင့် ရင်ဆိုင်ရန် လင်းရှောင် အားစိုက်ထုတ်ခဲ့ရသည်။
ဒီဘဝမှာ ဒီဖူယွီကျွင်းဆိုတဲ့ကောင်က ယောက်ျားတစ်ယောက်ကိုပါ အီစီကလီလာလုပ်နေမယ် မထင်မိဘူး ... ပြီးတော့ ယောက်ျားအစစ်မဟုတ်တော့တဲ့ ကုန်းကုန်းတစ်ယောက်ကိုမှ စိတ်ဝင်စားနေတယ်တဲ့ ...
လင်းရှောင် မျက်ဆံလှန်လိုက်မိသည်။
ဤရှောင်မင်းသားက ခဏတာစိတ်ဝင်စားခြင်းဖြစ်သော်လည်း လိုလိုလားလား ချော့မော့ပြောဆိုနေပြီး အကျပ်ကိုင်နေခြင်း မဟုတ်ပေ။ လင်းရှောင် အသက်ပြင်းပြင်းရှု၍ ဒေါသကိုလျော့ချလိုက်ပြီး ဖြည်းညှင်းစွာပြောလိုက်သည်။
" အရှင်မင်းသား ... ဒီအစေခံကို အဲ့လောက်အထိ မစနောက်ပါနဲ့ ..."
ကြည်လင်နေရာမှ မည်းနက်သွားသည့်မျက်နှာနှင့်သူရှေ့မှ ကုန်းကုန်းငယ်လေးကိုကြည့်လိုက်မိသည်။ သူ၏မျက်နှာက မည်းနက်နေရာမှ အနီရောင်၊ အနီရောင်မှတစ်ဆင့် ပြန်လည်ကြည်လင်လာသည်။ ၎င်းက ဖူယွီကျွင်းအတွက် အံ့အားသင့်ဖွယ်မြင်ကွင်းမျိုးဖြစ်နေ၍ မထိန်းနိုင်ပဲ ရယ်လိုက်မိသည်။
ဤအစေခံငယ်လေးကို သူပို၍ ကျီစယ်ချင်လာသည်။ သို့ရာတွင် ဤနေရာက မူတိုင်းပြည်ဧကရာဇ်၏ နန်းဆောင်ဖြစ်နေ၍ အလွန်အကျူးမလုပ်ရဲပေ။ ထိုအတွေးများကြောင့် ဖူယွီကျွင်းပြုံးပြပြီး လင်းရှောင်ကို ဘာမှမပြောတော့ပေ။ အစောပိုင်းကကဲ့သို့ လင်းရှောင်ကို ချစ်မြတ်နိုးစွာဖြင့်သာ ကြည့်နေသည်။
လင်းရှောင် မနေတတ်သဖြင့် မျက်ခွံများကို ပုတ်ခတ်ပုတ်ခတ်လုပ်နေသည်။ သူ၏ အကြည့်က အနည်းငယ် နေရာရွေ့သွားသည်။
" အရှင်မင်းသား ... ဒီအစေခံ ဘာလိုချင်တယ်ဆိုတာကို လာမေးတာ မဟုတ်ဖူးလား ..."
ဖူယွီကျွင်း ခေါင်းငြိမ့်ကာ ပြုံးပြလိုက်သည်။
" မင်း စဉ်းစားမိတာ တစ်ခုခု ရှိပြီလား ..."
လင်းရှောင်တိတ်ဆိတ်နေသည်။ ရှိသည် ဟု ပြောလိုသော်လည်း ယခုအချိန်၌ အန္တရာယ်များသည့် အခေအနေတွင် ရောက်ရှိနေသည်။ ယခုက ရှောင်တိုင်းပြည်မင်းသားကို အငူအညီတောင်းခံရန် အချိန်ဖြစ်သည်။
သို့ရာတွင် လင်းရှောင်ထံတွင် အတည်ပြုရမည့် ကိစ္စတစ်ခု ရှိနေသည်။
သူ သတိမလစ်ခင်က မိုရွှီကို ဧကရာဇ်က ကွပ်မျက်ခိုင်းလိုက်သည်ကို ကြားလိုက်ရသည်။
ဒါပေမဲ့ အဲ့ဒါက တကယ်ဟုတ်မဟုတ် မသိဘူး ...
လင်းရှောင် ကိစ္စများကို ရှင်းလင်းအောင်လုပ်ရမည်ဟု ခံစားမိလာသည်။ သူ့အကြည့်များများက ဖူယွီကျွင်းဆီသို့ ပြန်ရောက်သွားပြီး မမေးမီ စေ့စေ့စပ်စပ် ကြည့်လိုက်သည်။
" အဲ့မတိုင်ခင် အရှင်မင်းသားကို မေးခွန်းနည်းနည်း မေးလို့ရလား ..."
ဖူယွီကျွင်းက စိတ်ဝင်တစားဖြင့် မျကိခုံးပင့်လိုက်ပြီး လက်ပိုက်လိုက်သည်။
" ငါ ကြားပါရစေ ..."
" မိုရွှီ ... မောင်းမမို ဘာဖြစ်သွားလဲ ..."
ထိုစကားကို ကြားသည့်အခါ ဖူယွီကျွင်း တစ်စုံတစ်ခုကို လေးလေးနက်နက်တွေးနေသည်။ ခဏအကြာတွင် ပြန်ဖြေလိုက်သည်။
" သေပြီလေ ... ဧကရာဇ်အမိန့်ကြောင့် သေသွားပြီ ..."
လင်းရှောင် မျက်လုံးများ အရောင်တောက်သွားသည်။ သူ၏မျက်လုံးထဲမှ ရွှင်မြူးမှုအနည်းငယ်က ဖူယွီကျွင်း၏အကြည့်များထဲမှ မလွတ်မြောက်ခဲ့ပေ။ သူက လင်းရှောင်ကို လေးနက်စွာကြည့်နေသည်။
ဒီလင်းရှောင်က မိုရွှီကို ရန်ငြိုးရှိတာလား ...
" ဒါဆိုရင် သူမအလောင်းက ဘယ်နေရာမှာလဲ ..."
သူ တွေးနေစဉ်မှာပင် လင်းရှောင်က မေးခွန်းနောက်တစ်ခု မေးလိုက်သည်။ ဖူယွီကျွင်းက မေးသေ့ကိုပွတ်လျက် ခဏတာ စဉ်းစားနေပြီးနောက် ပြံးပြလိုက်သည်။
" ဒီမေးခွန်းကတော့ ငါ့ကို မမေးပဲ မူဧကရာဇ်ကို မေးရမယ်ထင်တယ် ... သူက သူမကို ကွပ်မျက်ခိုင်းခဲ့တာလေ ... သူမအလောင်းကို ကိုင်တွယ်တာနဲ့ ဘယ်နေရာမှာရှိတယ်ဆိုတာ သူ့ပြဿနာပဲ ..."
လင်းရှောင်ကြားသည့်အခါ မျက်လုံးများ အရောင်လက်သွားသည်။ ဖူယွီကျွင်း၏ စကားများက အစောပိုင်းက လုပ်ကြံခံသည့်လူ မဟုတ်သကဲ့သို့ အေးအေးလူလူပင် ပြောနေခြင်းပင်။
ကြည့်ရတာ ကွပ်မျက်ခံရတဲ့ မိုရွှီက သူနဲ့ ဘာမှမဆိုင်ဘူးထင်တယ် ...
လင်းရှောင် သံသယမကင်းဖြစ်လာသဖြင့် မျက်မှောင်ကြုတ်ကာ မေးလိုက်သည်။
" ဒါ ... အရှင်မင်းသားက အဲ့ဒါကို မကန့်ကွက်တော့ဘူးလား ..."
ဖူယွီကျွင်းက ဘာမှမဖြစ်ခဲ့သိလိုပင် ရယ်လိုက်သည်။
" မူဧကရာဇ်က ငါ့ကို လုပ်ကြံဖို့ကြိုးစားတဲ့ မိန်းမကို ရှင်းပစ်ခဲ့တာပဲ ... ငါရင်ထဲ အသည်းထဲကနေတောင် ကျေးဇူတင်ရမှာ သဘာဝပဲလေ ... အဲ့ထက်ပိုပြီး ဂရုစိုက်စရာ မရှိတော့ဘူး ..."
" အ ... အရှင်သူ့ကို အရမ်းသဘောကျတယ်မလား ..."
လင်းရှောင်က ဆက်လက်မေးမြန်းပြန်သည်။
ဤဖူယွီကျွင်းက စိတ်ကူးယဉ်ဆန်သော်လည်း အကယ်၍ သူစိတ်ဝင်စားသောအမျိုးသမီးတစ်ယောက်ရှိပါက သူ့ချစ်သူ၏စံသတ်မှတ်ချက်ကို ဖြစ်နိုင်သမျှ နည်းလမ်းများဖြင့်ဖြည့်ဆည်းပေးပြီး သူတတ်နိုင်သမျှ စေတနာထားလုပ်ဆောင်မည်ကို လင်းရှောင်သတိရသွားသည်။ သူက စိတ်ကူးယဉ်ဆန်၍ အပြောင်းအလဲမြန်သော်လည်း ရှောင်တိုင်းပြည်မှ အမျိုးသမီးများ၏ အချစ်များစွာကို ရရှိထားသည်။
အကယ်၍ ဖူယွီကျွင်းက မိုရွှီကို အမှန်တကယ်နှစ်သက်ခဲ့ပါက သူမသေဆုံးမှုကို ပူပန်နေမည်ဖြစ်သည်။ သူ့ကိုလုပ်ကြံရန် ကြံသည်ခဲ့သော်လည်း ဒဏ်ရာရစေခဲ့ခြင်းလည်း မဟုတ်ပေ။ အနည်းဆုံး သူမအလောင်းက မည်သည့်နေရာတွင်ရှိမည်ကို သိနိုင်သေးသည်။
ဖူယွီကျွင်းက ဟာသတစ်ခုကို ကြားလိုက်သကဲ့သို့ လှောင်ပြောင်လိုက်သည်။ သို့သော် သူ၏စကားများက သူမိုရွှီကိုနှစ်သက်ကြောင်း မငြင်းဆန်ခဲ့ပေ။
" ငါ သူမကို ဘယ်လောက်သဘောကျပါစေ ငါ့အသက်လောက်တော့မဟုတ်ဖူးလေ ... ငါပြောတာမှားလား ..."
ထိုစကားများကြောင့် လင်းရှောင်ခေါင်းငြိမ့်လိုက်သည်။ အသက်က အရေးကြီးဆုံးပင်ဖြစ်သည်။ ယခင်ဘဝက ဖူယွီကျွင်းအပေါ် သူ၏ထင်မြင်ချက်က အချိန်အများစုတွင် စိတ်ကူးယဉ်ဆန်၍ အပြောင်းအလဲမြန်တတ်သူသာ။ သို့ရာတွင် ယခုအခါ သူ့အသက်ကို တန်ဖိုးထားသူတစ်ယောက် ဖြစ်နေသည်။
လင်းရှောင် စိတ်ဓာတ်ကျစွာဖြင့် သက်ပြင်းရှည်ကြီးချလိုက်သည်။ ဖူယွီကျွင်း၏ စကားအသွားအလာအရ မည်သည့်သတင်းမှ မရရှိနိုင်ကြောင်း သိသွားသည့်အတွက် လင်းရှောင်သူ့ကို မနှောင့်ယှက်တော့ပေ။
မိုရွှီ အမှန်တကယ် သေဆုံးခြင်း ဟုတ်မဟုတ်ကိုသာ တွေးနေမိသည်။
လင်းရှောင် သူ၏ရင်ဘတ်မှဒဏ်ရာကိုအုပ်ထားပြီး ခဏတာ မှင်သက်နေသည်။
ဤတစ်ကြိမ်ဒဏ်ရာက ယခင်အကြိမ်များထက် ပို၍ပြင်းထန်သည်။
သူ၏ ခွန်အားများ အပြည့်အဝ ကုန်ခမ်းသွားသည်ဟုပင် တွေးနေမိသည်။ ခန္ဓာကိုယ်ကလည်း ပို၍လေးလံလာသည့်အပြင် ခုတင်ဘောင်ကို မှီနေသော်လည်း မငြိမ်မသက်ဖြစ်နေသည်။
လင်းရှောင် သူ့ခန္ဓာကိုယ်ကို ငုံ့ကြည့်ကာ စစ်ဆေးလိုက်သည်။ ခေါင်းငုံ့လိုက်ချိန်တွင် မျက်လုံးများ ပြူးကျယ်သွားသည်။
သူ၏ ဒဏ်ရာကို ကုသပေးကာ ခန္ဓာကိုယ်အထက်ပိုင်းကို ပိတ်စပါးများဖြင့် ပတ်ထားသည်။ သို့ရာတွင် ပိတ်စပါးများ၏ အထက်တွင် အဝတ်အစားအသစ်တစ်စုံရှိနေသည်။
၎င်းအဝတ်အစားများက သွေးများရွှဲနစ်နေသော အဖြူရောင်အဝတ်စအပြဲများ မဟုတ်တော့ပဲ တရုတ် ဝတ်ရုံရှည် အသစ်တစ်ထည်ဖြစ်နေသည်။
သူ့အဝတ်တွေကို လဲပေးထားတာပဲ ...
