MM Story Teller

အပိုင်း ၂၉၅

Viewers 53k

အခန်း ၂၉၅ “လေတစ်ချက်အဝှေ့၌ လွင့်ပါသွားသော သွေးနံ့”

“ဘယ်လိုတောင် ချိုမြိန်တာလဲ… ဒါက တကယ့်ကိုပဲ အရသာရှိလွန်းတယ်…”

“ဒါက တော်တော်လေး ကောင်းတယ်.. ဒီဟင်းပွဲက အရမ်းကိုကောင်းတာပဲ…”

“ဒါက အရမ်းကို အရသာရှိတယ်… ငါဟင်းချိုကို သောက်လိုက်တာနဲ့ ငါ့ခန္ဒာကိုယ်ထဲမှာ ခွန်အားတွေ စီးဆင်းလာတာကို ခံစားမိတယ်..”

စစ်သည်တော်များက ပုဖန်၏ဟင်းရည်ကို သောက်ပြီးနောက် ဟင်းပွဲ၏ ကောင်းမွန်မှုကို အပြည့်အ၀ ချီးကျူးကြတော့သည်။ ပုဖန်က စိတ်ဝိဥာဉ် စွမ်းအင် အရိပ်အယောင်မျှပင် မပါ၀င်သော ပါ၀င်ပစ္စည်းများကို အသုံးပြု၍ ချက်ပြုတ်ထားသော်လည်း ချက်ပြုတ်သည့်နေရာတွင် အထူးနည်းလမ်းဖြစ်သော သူ၏ အစစ်အမှန် စွမ်းအင်ဖြင့် ချက်ပြုတ်သည့် နည်းလမ်းကို အသုံးပြုခဲ့သည်။ ထို့ကြောင့်ပင် သူ၏ အစစ်အမှန် စွမ်းအင်များက ဟင်းပွဲထဲတွင် စိမ့်၀င်နေလေသည်။

ထိုအကြောင်းအရာက ဟင်းပွဲအရသာကို ကောင်းမွန်စေသည့် အဓိကအကြောင်းအရာပင် ဖြစ်သည်။

“ပိုင်ရှင်ပုကတော့ ပိုင်ရှင်ပုပါပဲ… ဘယ်နေရာမှာပဲဖြစ်ဖြစ် မင်းချက်လိုက်တဲ့ ဟင်းပွဲက အမြဲတမ်း ကျော်ကြားနေတာပဲ…” ထန်းယင်က အပြုံးကြီးကြီးနှင့် ပြောလိုက်သည်။

ပုဖန်ကို စစ်တပ်ထဲတွင် တွေ့ရသည်က မယုံနိုင်စရာ ကောင်းလှသောကြောင့် သူ၏ ဆရာ နီယန်ကို သတင်းပေးသင့်မပေးသင့် ချီတုန်ချတုံ ဖြစ်နေလေသည်။ သို့သော်လည်း သေချာစွာ တွေးတောလိုက်ပြီးနောက် ပုဖန် အနောက်ပိုင်းဆန်းကျယ်မြို့တော်သို့ ပြန်မည့်အချိန်ထိ စောင့်ရန် ဆုံးဖြတ်လိုက်သည်။

ဒါက ပုဖန်ချက်ပြုတ်သည့် ဟင်းပွဲကို သလင်းကျောက်တစ်တုံးပင် မပေးရပဲ စားသောက်ရမည့် ရှားရှားပါးပါး အခွင့်အရေး ဖြစ်သည်။ ထို့ကြောင့်ပင် ထန်းယင်က စစ်သည်တော်များနှင့် ရောနှော၍ စွပ်ပြုတ်ဟင်းရည်ကို ပန်းကန်လုံးအနည်းငယ်မျှ သောက်သုံးနေလိုက်သည်။

သူတို့ ပျော်ရွှင်စွာနှင့် စားသောက်နေကြစဉ်တွင် စခန်းအပြင်ဘက်မှ စစ်ပွဲကျွေးကြော်သံမျာကို ကြားလိုက်ရပြီး စခန်းတစ်ခုလုံးကို စစ်ခရာမှုတ်သံက ဖုံးလွှမ်းသွားလေသည်။

ကျူးရို့၏ မျက်နှာအမူအယာက ပြောင်းလဲသွားပြီး ပါးစပ်ထဲမှ ဟင်းရည်များကို အလျင်အမြန် မျိုချလိုက်ကာ စခန်းအပြင်သို့ လှည့်ထွက်သွားလိုက်သည်။ စစ်ခရာသံ ထွက်ပေါ်လာသည့် အဓိပ္ပါယ်က ရန်သူများ ကျူးကျော်၀င်ရောက်လာသည်ကို သတိပေးခြင်းပင် ဖြစ်သည်။ သူတို့က မိုလောမြို့နှင့် အဝေးကို ဆုတ်ခွာခဲ့ပြီးဖြစ်သော်လည်း ရန်သူများက ရန်လိုတိုက်ခိုက်လိုဆဲ ဖြစ်နေလေသည်။ ကျူးရို့၏ မျက်နှာပေါ်တွင် ဒေါသများနှင့် ပြည့်နှက်နေပြီး သူ၏ မျက်နှာက ကြည့်ရဆိုးနေလေသည်။

ထန်းယင်က ပုဖန်ကို လုံခြုံရေး ဂရုစိုက်ရန် မှာကြားလိုက်ပြီး ထွက်ခွာသွားလေသည်။ ရန်သူများ တိုက်ခိုက်လာလေရာ ရှုရ ဂိုဏ်းမှ မကောင်းဆိုးဝါးများလည်း ပေါ်ထွက်လာတော့မည်ဖြစ်သည်။ ထိုမကောင်းဆိုးဝါးများက သူတို့ကို သတ်ဖြတ်၍ သူတို့၏ စိတ်ဝိဥာဉ်များကို စိတ်ဝိဥာဉ်အနှစ်သာရများအဖြစ်သို့ ပြောင်းလဲလိုနေလေသည်။

ပုဖန်၏ ရတနာလေးမျိုးဟင်းရည်က ပမာဏများစွာ မရှိသော်လည်း စစ်သည်တစ်ရာခန့်အတွက် လုံလောက်လေသည်။ ထိုသူများက သူတို့၏ ခန္ဒာကိုယ်ထဲတွင် စွမ်းအင်များ ပြည့်နှက်နေသည်ကို ခံစားမိနေလေသည်။ ထိုစစ်သည်တော်များက သူတို့၏ လက်နှက်များကို ဝှေ့ရမ်း၍ စခန်းအပြင်သို့ တဟုန်တိုး ပြေးထွက်သွားကြသည်။ သူတို့ စိတ်ဓါတ်တက်ကြွနေသော အမူအယာများကြောင့် ချီတက်လာကြသော ရန်သူများက ကြောင်အသွားကြသည်။

စစ်ပွဲက နောက်တစ်ကြိမ် ပြန်လည်ဖြစ်ပွားခဲ့လေသည်။ စစ်တပ်နှစ်တပ် ထိပ်တိုက်တွေ့ဆုံရာမှ ထွက်ပေါ်လာသော စစ်ပွဲသံများကလည်း ပွက်ပွက်ညံနေလေသည်။

စခန်းအတွင်းတွင် ပုဖန်က ပြောင်ရှင်းသွားသော သူ၏ အိုးလေးလုံးကို စုစည်းလိုက်ပြီး တဲဆီသို့ ပြန်ရန် ပြင်ဆင်လိုက်သည်။

ဝေတဖုနှင့် အခြားသူများက ခပ်လှမ်းလှမ်းနေရာမှ ပုဖန်ကို ကြည့်နေကြလေသည်။ သူတို့၏ အမူအယာများကလည်း ကြည့်ရဆိုးနေလေသည်။ သူတို့က ပုဖန်ကို မည်သို့ ရင်ဆိုင်ရမည်ကို မသိတော့ချေ။ ထိုလူသစ်လေးကို လွတ်လွတ်လပ်လပ် အနိုင်ကျင့်နိုင်သည်ဟု သူတို့က တွေးထင်ခဲ့ကြပြီး ထိုလူသစ်းလေးတွင် ခိုင်မာသည့် ကျောထောက်နောက်ခံရှိမှန်း သူတို့ မထင်ထားမိကြချေ။

ဝေတဖုက ထိုကိစ္စများ အားလုံးကို မယုံကြည်နိုငိပေ။ သို့သော်လည်း ထိုမြင်ကွင်းများ အားလုံးက အမှန်ဖြစ်ကြောင်း အစောပိုင်းကပင် သက်သေပြပြီးဖြစ်သည်။ ထို့အပြင် ဝေတဖုက ချက်ပြုတ်ရေးတပ်ဖွဲ့၏ ခေါင်းဆောင်နေရာမှ သာမာန်ပါ၀င်ပစ္စည်းများကို ချက်ပြုတ်သူအဖြစ် ရာထူးလျောကျသွားလေသည်။ ထိုအချက်က သူ့ကို သတ်ဖြတ်လိုက်သည်နှင့် အတူတူပင် ဖြစ်သည်။

၀ှစ်… ဝှစ်…

လေးကြိုးသံနှစ်ခု ထွက်ပေါ်လာပြီး အလင်းကဲ့သို့ လျှင်မြန်လှသော မြှားနှစ်စင်းက ချက်ပြုတ်ရေးတပ်ဖွဲ့မှ အစောင့်နှစ်ယောက်၏ ဦးခေါင်းဆီသို့ ပျံသန်းလာကာ ထိုးဖောက်သွားလေသည်။

ဝေတဖုနှင့် အခြားသူများက ထိုမြင်ကွင်းကို ကြည့်၍ ထိတ်လန့်သွားလေသည်။ သူတို့က အခြားတစ်ဖက်သို့ လှမ်းကြည့်လိုက်ရာ သူတို့ဆီသို့ ပြေး၀င်လာသော နတ်ဆိုးသားရဲများကို တွေ့့လိုက်ရလေသည်။

“သူတို့က ရန်သူ့တပ်တွေ… ”

ဝေတဖုနှင့် အခြားသူများအားလုံးက ချက်ချင်းပင် အော်ဟစ်လိုက်ကြသည်။ ထိုရန်သူတပ်များက စစ်တပ်၏ ရိက္ခာတပ်ဖွဲ့ကို ရှာတွေ့သွားမည်ဟု သူတို့က မမျှော်လင့်ထားကြချေ။ ထိုရန်သူများက သူတို့ဆီသို့ တဟုန်တိုး ချီတက်လာသည်ကို ကြည့့်ခြင်းအားဖြင့် စစ်ပွဲက မည်မျှပင် ရက်စက်ကြောင်း မြင်သာပေသည်။ စစ်တပ်၏ ရိက္ခာတပ်ကို ဖျက်ဆီးနိုင်သည်နှင့် တတိယတပ်ဖွဲ့၏ စားနပ်ရိက္ခာများ ကုန်ဆုံးသွားပြီး စစ်သည်တော်များ ရိက္ခာပြတ်လပ်မှုနှင့် ကြုံတွေ့ရတော့မည်ဖြစ်သည်။

လက်ရှိအချိန်၌ ချက်ပြုတ်ရေးတပ်ဖွဲ့မှ တပ်သားများအားလုံးက တိုက်ပွဲ၀င်ရန် လိုအပ်နေလေသည်။ စားနပ်ရိက္ခာများကို ကာကွယ်ရန်မှာ သူတို့၏ တာ၀န်သာ ဖြစ်သည်။ ဟင်းလျှာများကို ခုတ်ထစ်ချက်ပြုတ်ရာတွင် အသုံးပြုသော ဓါးများက ယခုအချိန်တွင် ရန်သူများကို ခုတ်ထစ်ရတော့မည်ဖြစ်သည်။

ရန်သူ့တပ်များက အင်အားနည်းပါးသော်လည်း တစ်ယောက်ချင်းစီက အလွန်သန်မာကြသည်။ ထို့အပြင် ရန်သူများက နတ်ဆိုးသားရဲများကို စီးနင်းထားသောကြောင့် ချီတက်ရာတွင် အလွန်မြန်ဆန်လှလေသည်။

၀ှစ်… ဝှစ်…

ရန်သူ့တပ်အတွင်းမှ လေးကြိုးဆွဲသံများ ထွက်ပေါ်လာပြီး မြှားများ ပျံသန်းထွက်ပေါ်လာလေသည်။ ထိုမြှားများက ချက်ပြုတ်သူများကို ထိုးဖောက်၀င်ရောက်သွားကြပြီး မြေပြင်ပေါ်သို့ လဲကျသွားကြသည်။

ပုဖန်၏ မျက်၀န်းများက စူးရှသွားကြပြီး ပထမဆုံး အကြိမ်အဖြစ် သူ၏ ခန္ဒာကိုယ်ပေါ်တွင် သတ်ဖြတ်ခြင်း အငွေ့အသက်များ ဖုံးလွှမ်းသွားလေသည်။

ဤအရာက တစ်ကယ့်စစ်မြေပြင်သာ ဖြစ်သည်။ စစ်မြေပြင်တွင် မသတ်ဖြတ်နိုင်ပါက သေရမည်သာ ဖြစ်သည်။

“သူတို့ရဲ့ ရိက္ခာတွေကို ဖျက်စီးကြ… ငါတို့ရဲ့့ စစ်သူကြီးက အမိန့်ပေးထားတယ်… အနောက်ပိုင်းပိုင်းဆန်းကျယ်စစ်တပ်က ဘယ်သူ့ကိုမှ အသက်ရှင်လျှက် အိမ်ပြန်ခွင့် မပြုနိုင်ဘူး…” ရန်သူ့စစ်တပ်အတွင်းမှ နားကွဲလောက်စရာ ကြွေးကြော်သံများ ထွက်ပေါ်လာလေသည်။

သူတို့နှင့် ရန်သူ့တပ်များကို ယှဉ်လိုက်ပါက အရေအတွက် တူညီသော်လည်း အင်အားခြင်း ကွာခြားလှသည်။ အိုးလေးလုံးကို သယ်ဆောင်ထားသော ပုဖန်က သူ့ဆီသို့ ဦးတည်လာသော မြှားကိုရှောင်တိမ်းလိုက်သည်။ ထို့နောက် တစ်ရှိန်တိုး ၀င်ရောက်လာသော ရန်သူများကို မထီမဲ့မြင် အမူအယာနှင့် စိုက်ကြည့်နေလေသည်။

၀ှိုက်တီက ပုဖန်၏ ဘေးတွင်ရုတ်တရက် ပေါ်လာလေသည်။ အနီရောင်တောက်ပနေသော သူ၏ မျက်၀န်းများက တဖျပ်ဖျပ် တောက်ပနေလေသည်။

ဒေါင်… ဒေါင်… ဒေါင်…

များပြားလှသော မြှားများက ဝှိုက်တီ၏ ခန္ဒာကိုယ်ကို ထိမှန်ပြီး အသံများ ထွက်ပေါ်လာလေသည်။ ဝှိုက်တီက လက်ကို ဝှေ့ရမ်းလိုက်ရာ မြှားများက ကျိုးပဲ့သွားပြီး ဘေးသို့ ပြုတ်ကျသွားလေသည်။

ထိုမြင်ကွင်းကို မြင်လိုက်ရသော ရန်သူ့တပ်များက သူတို့၏ မြှားများကို မည်သည့်နေရာမှ ပေါ်လာမှန်းမသိသော သံရုပ်သေးတစ်ခု၏ ပိတ်ဆို့ခြင်း ခံရမည်ဟု မမျှော်လင့်ထားကြချေ။ သို့သော်လည်း သူတို့က စိုးရိမ်ပူပန်ခြင်း မရှိကြချေ။

မြင်းခွာသံများ အဆက်မပြတ် ထွက်ပေါ်လာပြီးနောက် ရန်သူများက ပုဖန်နှင့် ဝှိုက်တီတို့ ရှိရာသို့ တိုး၀င်လာကြလေသည်။ သူတို့၏လက်ထဲတွင်လည်း လက်နှက်များကို ကိုင်ဆွဲထားကြသည်။ မြှားများက အသုံးမ၀င်သောကြောင့် သူတို့က ၀င်ရောက်လာခြင်း ဖြစ်သည်။ ရိက္ခာများကို ဖျက်စီးချိန်တွင် တားဆီးသည့် မည်သူ့ကိုမဆို သူတို့က သတ်ဖြတ်ကြမည်ဖြစသည်။

သူတို့၏ ရည်ရွယ်ချက်က စစ်တပ်ရိက္ခာများကို ဖျက်ဆီးပြီး စစ်သည်တော်များကို အငတ်ဘေးစိုက်ကြစေရန်ဖြစ်သည်။ သူတို့က အရည်အချင်းရှိသော မိုလင်း၏ လက်အောက်ငယ်သားများ ဖြစ်ကြပြီး တစ်ယောက်ချင်းစီ၏ ကျင့်ကြံခြင်း အဆင့်များကလည်း မြင့်မားကြသည်။ မိုလင်းက အတိမ်းအစောင့် အနည်းငယ်ပင် မဖြစ်လိုသောကြောင့် သူတို့ကို စေလွှတ်လိုက်ခြင်း ဖြစ်သည်။

“သတ်ဖြတ်ခြင်း အငွေ့အသတ်တွေကို အာရုံခံမိပါတယ်…အမြစ်ပြတ်သုတ်သင်ခြင်း စတင်အသက်၀င်လာပါပြီ….”

၀ှိုက်တီက ရေရွတ်လိုက်ပြီး သူ၏ အနီရောင် မျက်၀န်းများက နက်ရှိုင်းလှသော ခရမ်းရောင်အဖြစ်သို့ ပြောင်းလဲသွားလေသည်။ ထိုခရမ်းရောင်မျက်၀န်းများက လူတစ်ယောက်၏ စိတ်ဝိဥာဉ်ကိုပင် ဆွဲနှုတ်ယူနိုင်သည်ဟု ခံစားရလေသည်။

နတ်ဆိုးသားရဲများကို စီးနင်းထားသည့် ဝိဥာဉ်တည်အဆင့် တပ်သားနှစ်ယောက်က သူတို့လက်ထဲမှ လှံရှည်များကို ဝှိုက်တီနှင့် ပုဖန်ရှိရာသို့ ပစ်လွှတ်လိုက်သည်။

ခရမ်းရောင် မျက်လုံးစနစ် အသက်၀င်လာသည်နှင့် ဝှိုက်တီ၏ အော်ရာများက ပြောင်းလဲသွားလေသည်။ ထို့နောက် ပုဖန်၏ ရှေ့သို့ အလျှင်အမြန် ရောက်ရှိလာပြီး လက်ကို မြှောက်၍ ပိတ်ဆို့ကာကွယ်လိုက်သည်။ ဝှိုက်တီက သူတို့ဆီသို့ တိုး၀င်လာသော လှံရှည်များကို ဖမ်းဆုတ်ရန် ကြိူးစားလိုက်ခြင်း ဖြစ်သည်။

“မင်းက သေချင်နေတာပဲ…”

ရန်သူနှစ်ယောက်က လှံရှည်၏ လမ်းကြောင်းတည့်တည့်ကိုတိုး၀င်လာသော ဝှိုက်တီကို စူးစိုက်ကြည့်လိုက်ကြသည်။ သို့သော်လည်း ဝှိုက်တီ၏ လက်ဖဝါးနှင့် လှံရှည်များ ထိမိသည်နှင့် မီးပွားများ လွင့်စင်လာပြီး နတ်ဆိုးသားရဲ၏ ကျောပေါ်မှ တပ်သားနှစ်ယောက်က မြေပြင်ပေါ်သို့ ကျသွားလေသည်။

၀ှိုက်တီ၏ မျက်၀န်းမှ ခရမ်းရောင်လက်သွားပြီး သူမိထားသော လှံရှည်ကို ချိုးလိုက်သည်။ ထို့နောက် လှံရှည်ပိုင်းများကို နတ်ဆိုးသားရဲများထံသို့ ပစ်လွှတ်လိုက်သည်။ ထိုမြင်းများက အဆင့်နှစ် နတ်ဆိုးသာ့းရဲများသာ ဖြစ်သောကြောင့် သူ၏ တိုက်ခိုက်မှုကို မခံနိုင်ပဲ လဲကျသွားကာ အသက်ပျောက်သွားလေသည်။

ထို့နောက် ဝှိုက်တီက လှံကို ပြန်လည်နှုတ်ယူလိုက်ပြီး ရန်သူနှစ်ယောက်ဆီသို့ ပစ်လွှတ်လိုက်သည်။ လှံများက ရန်သူနှစ်ယောက်ကို ထိုးဖောက်သွားပြီး သူတို့၏ ခန္ဒာကိုယ်မှ သွေးများ စီးကျလာလေသည်။

ထိုမြင်ကွင်းကို ရန်သူများသာမက ချက်ပြုတ်ရေးတပ်ဖွဲ့များပင် တွေ့မြင်လိုက်ရလေသည်။ ဝေတဖု၏ နှုတ်ခမ်းများက တဆတ်ဆတ် တုန်ယင်သွားပြီးေ မြပြင်ပေါ်သို့ လဲကျသွားလေသည်။ ထိုမြင်ကွင်းက အလွန်တုန်လှုပ်ဖွယ် ကောင်းလှလေသည်။

မြေပြင်ပေါ် ထိုးစိုက်ခံထားရသော ရန်သူနှစ်ယောက်၏ မျက်၀န်းများက ပြူးကျယ်နေပြီး မကျေနပ်မှုများနှင့် ပြည့်နှက်နေလေသည်၊

အ၀တ်အစားများ ချွတ်ရသည်ကို ကြိုက်သော နတ်ဆိုးက မမျှော်လင့်ထားစွာပင် အစွမ်းထက်လှသည်။ ရန်သူများက မြင်းစီးစစ်သည်များ ဖြစ်ကြသော်လည်း သူက အလွယ်တကူပင် ဆွဲချနိုင်လေသည်။ ထို့အပြင် နတ်ဆိုးမြင်းနှစ်ကောင်ကို သတ်ဖြတ်လိုက်ပြီး ရန်သူနှစ်ယောက်ကို မြေပြင်ပေါ်တွင် ထိုးစိုက်ထားလေသည်။

ချက်ပြုတ်ရေးတပ်ဖွဲ့မှ ချက်ပြုတ်သူများက သူတို့ကို အ၀တ်အစားချွတ်ခဲ့သည့် ဝှိုက်တီကိုကြည့်လိုက်ပြီး မထိန်းချုပ်နိုင်လောက်အောင် ပျော်ရွှင်သွားကြသည်။

သန်မာလှသော ဝှိုက်တီ၏ ခွန်အားနှင့်သာ ဆိုပါက သူတို့ကို သတ်ဖြတ်ရန် အလွန်လွယ်ကူလှပေသည်။

အိုးလေးလုံးကိုသယ်ဆောင်ထားသော ပုဖန်က မြေပြင်ပေါ်တွင် လှံနှင့် ထိုးစိုက်ခံထားရသော ရန်သူများကို အေးအေးဆေးဆေး ကြည့်နေလိုက်သည်။ သူက ခပ်လှမ်းလှမ်းတွင် ရန်သူများကို လှံရှည်နှင့် တိုက်ခိုက်ရန် ပြင်နေကြသော ဝေတဖုတို့ကို မြင်တွေ့သော်လည်း နောက်သို့ လှည့်သွားလေသည်။

ဒေါသထွက်နေသော ရန်သူ့တပ်သားများက ကြွေးကြော် အော်ဟစ်လိုက်ပြီး ဝှိုက်တီဆီသို့ တဟုန်တိုး ပြေး၀င်လာကြသည်။ သူတို့တပ်ဖွဲ့က မိုလင်း၏လက်အောက်မှ အသန်မာဆုံး စစ်သည်တော်များ ဖြစ်ကြသောကြောင့် ယခုမစ်ရှင်တွင် သူတို့၏ ရဲဘော်ရဲဘက်အချို့ကို ဆုံးရှုံးလိုက်ရမည်ဟု မမျှော်လင့်ထားကြသည်။

၀ှိုက်တီ၏ မျက်၀န်းများက ခရမ်းရောင်တောက်ပနေဆဲဖြစ်ပြီး သူ၏ လက်က ဓါးအဖြစ်သို့ ပြောင်းလဲသွားလေသည်။

ဒါဇင်မျှသာ ရှိသော ရန်သူများက ဝှိုက်တီကို ၀န်းရံလိုက်ကြပြီး ရက်စက်ကြမ်းကြုတ်စွာနှင့် ပြေး၀င်လာလေသည်။ ထို့နောက် ဝေတဖုနှင့် ချက်ပြုတ်ရေးတပ်ဖွဲ့မှ ချက်ပြုတ်သူများ၏ အမြင်အာရုံတွင် မေ့မရနိုင်တော့မည့် မြင်ကွင်းတစ်ခုကို မြင်တွေ့လိုက်ကြရလေသည်။

ရန်သူများက သူတို့ကို ဖိအားပေး တိုက်ခိုက်နေချိန်တွင် သူတို့က အသက်ရှူရန်ပင် ခက်နေသော်လည်း သံစက်ရုပ်က လွယ်ကူစွာ သတ်ဖြတ်လိုက်လေသည်။ ဝှိုက်တီက လက်တစ်ဖက်ကို ဝှေ့ရမ်းလိုက်ပြီး ရန်သူများကို လွယ်ကူစွာ သတ်ဖြတ်လိုက်လေသည်။

ထိုအဖြစ်အပျက် တစ်ခုလုံးတွင် ချက်ပြုတ်သူများက တစ်ချက်မျှပင် မလှုပ်ရှားလိုက်ရချေ။ သန့်ရှင်းတောက်ပြောင်နေသော ဝှိုက်တီက သေဆုံးနေသော ရန်သူများကြားတွင် ရပ်နေလေသည်။ သူ၏ ခန္ဒာကိုယ်သို့ သွေးများ လာစင်သော်လည်း ချက်ချင်းသန့်စင်သွားကြပြီး အသက်အပြောက်တစ်ခုပင် မကျန်ခဲ့တော့ချေ။ ဝှိုက်တီ၏ ခရမ်းရောင်မျက်၀န်းများက အနီရောင်အဖြစ်သို့ ပြန်ပြောင်းသွားလေသည်။

ထို့နောက် ဝှိုက်တီက ချက်ပြုတ်သူတပ်ဖွဲ့မှ အဖွဲ့၀င်များကို တစ်ချက်ကြည့်လိုက်ပြီး အိုးလေးလုံးကို သယ်၍ လျောက်သွားသော ပုဖန်နောက်သို့ လိုက်သွားလေသည်။

မြေပြင်ပေါ်တွင် စီးဆင်းနေသော သွေးနံ့များက လေနှင့်အတူ လွင့်ပါသွားလေသည်။

ဝေတဖုက သူအသက်ရှင်ခဲ့သည့် ကာလတစ်လျောက်တွင် ထိုမြင်ကွင်းမျိုးကို တစ်ကြိမ်မျှပင် မမြင်ဘူးခဲ့ချေ။ ထိုမြင်ကွင်းက အံ့အားသင့်ဖွယ် ကောင်းလှပေသည်။

Prev Next