" လင်းရှောင် နင် ... မျိုးမစစ်ကောင် ..."
မိုရွှီက သူ့ကိုတိုက်ခိုက်ရန်ကြိုးစားနေသည်။
" ငါ ဒီတိုင်းသေသွားမယ်များထင်နေလား ... အိမ်မက်မက်နေလိုက် ... တစ်ကြိမ်ပြန်လည်ရှင်သန်လာပြီးရင် နောက်တစ်ကြိမ်လည်းပြန်လည်မရှင်သန်နိုင်ဘူးများထင်နေလား ... အဲ့အချိန်ကျမှ ငါနင့်ခေါင်းကိုဖြတ်ပစ်မယ် ..."
" နင် ဘယ်တော့မှ ပြန်လည်မမွေးဖွားနိုင်အောင် လုပ်ပစ်မယ် ..."
မိုရွှီက သူ့ကိုကျိန်ဆဲနေသည်။
" အားးး ..."
မိုရွှီက လုံးဝရူးနှမ်းသွားပြီဖြစ်သည်။ မျက်နှာတွင် တံတွေးများစွာစင်သွားသည့် လင်းရှောင်က သရော်လိုက်သည်။
" နင့် အခြေအနေကိုရော နင်သိသေးရဲ့လား ... နင့်ကိုသတ်နိုင်တဲ့လက်နက်ကို ကိုင်ထားတာ ဘယ်သူလဲ ..."
လင်းရှောင်က မိုရွှီ့ကိုဓားဖြင့် ချိန်ရွယ်ထားလျက် ရှေ့သို့တိုးလာသည်။
မိုရွှီက ခဏတာကြောက်လန့်သွားပြီးနောက် မည်သည့်အရာကိုမှ မကြောက်ရွံ့သည့်ပုံ ပြန်ဖြစ်သွားကာ ခွန်းတုံ့ပြန်လိုက်သည်။
" ငါ့ကို ဓားနဲ့ရွယ်ထားတော့ရောဘာဖြစ်လဲ ... အရင်တုန်းက ငါနင့်ကို အဆိပ်ခတ်ခဲ့တဲ့အချိန်ကတောင် နင်တကယ် သေခဲ့လို့လား ..."
" ဟမ့် ..."
မိုရွှီက သရော်လိုက်သည်။ သူမ ဆံပင်ရှည်များက မျက်နှာကို ဖုံးအုပ်ထားပြီး ထူးဆန်းသည့်ဟန်ဖြင့် ပြုံးလိုက်သည်။
" နင် အဆိပ်ခတ်ခံရပြီးတဲ့နောက် မင်းကြီးက ငါ့ကိုပြောခဲ့တယ် ... သူအမြဲတမ်းချစ်ခဲ့တာ ငါမဟုတ်ခဲ့ပဲ နင်ဖြစ်နေတာတဲ့ ... အမြဲတမ်း ပြေးလွှားနေရတဲ့ ခွေးလို ကုန်းကုန်းကိုများ ... သူငါ့ကို မိဖုရားခေါင်ရာထူးထားခဲ့တာလည်း နင့်ကို အနားမှာရှိစေချင်လို့ပဲ ... လင်းရှောင် နင့်ကိုသတ်မိတာကို ငါဘယ်တုန်းကမှ နောင်တမရခဲ့ဖူးဘူး ... နင် အသက်ရှင်နေသရွေ့ ငါတော့မှ အေးအေးချမ်းချမ်း နေရမှာမဟုတ်ဘူး ..."
မိုရွှီက စကားပြောနေလျက် ပျော်နေသည့်ပုံပေါက်လာပြီး ဆက်ပြောသည်။
" နောက်ဆုံးမှာတော့ နင်က အဆိပ်ကြောင့် အဆုံးသတ်သွားရတာပဲ ... နင်သေသွားတာ ကောင်းတယ် ကောင်းတယ် ..."
မိုရွှီက ရုတ်တရက် ဝမ်းနည်းသည့်ပုံဖြစ်လာပြီး ရူးရူးနှမ်းနှမ်း အော်ဟစ်တော့သည်။
" ဒါပေမဲ့ နင်သေပြီးတော့မှ ငါ့ကို ဘာလို့ သူကရုတ်တရက်ကြီး လက်စားချေရတာလဲ ... သူ ငါ့ခေါင်းကိုဖြတ်ပစ်တယ် ... ငါ့ကို အဆိပ်ပါတဲ့ သေရည်သောက်ခိုင်းတယ် ..."
" ဟင်း ... ဒါပေမဲ့ ငါက ဘယ်တုန်းကမှ တကယ်မသေခဲ့ဘူး ...ခေါင်းဖြတ်ခံရတော့ရော ဘာဖြစ်လဲ ... သေအောင်အဆိပ်သောက်ခိုင်းတော့ရော ဘာဖြစ်လဲ ... ငါဘယ်တုန်းကမှ မသေခဲ့ဘူးလေ ... ပထမနှစ်ခေါက်ကတော့ အဆင်မပြေခဲ့ဘူး တတိယတစ်ကြိမ်တော့ အလုပ်ဖြစ်မှာပါ ... လင်းရှောင် နင်အခု ငါ့ကိုဓားနဲ့ထိုးလိုက်ရင်တောင် ငါသေမယ်ထင်နေတာလား ..."
မိုရွှီက အရူးတစ်ယောက်ကဲ့သို့ ရယ်နေသည်။
" ဟားဟားဟား ... လင်းရှောင် နင်စောင့်နေစမ်းပါ ... ငါ ပြန်လာပြီး နင့်ကို လက်စားချေမယ် ..."
မိုရွှီ စကားပြောနေချိန်တွင် သူမမျက်လုံးများက ဂနာမငြိမ်ဖြစနေသည်။ လင်းရှောင် မျက်နှာတစ်ခုလုံး အံ့ဩမှုများဖြင့် ပြည့်နေလျက် မျက်မှောင်ကြုတ်လိုက်သည်။
မိုရွှီက သူမ အဆိပ်သောက်သေလိုက်ရတဲ့အချိန်ကို ပြောနေတာပဲ ... အဲ့ဒီအချိန်က မင်းကြီးက သူမကို သတ်သေခိုင်းတာကို သူသိတယ် ... ဒါပေမဲ့ ခေါင်းဖြတ်ခံရတာ ... အဲ့ဒါ အတိတ်ဘဝတုန်းက ဖြစ်ခဲ့လို့လား ...
သူ အဆိပ်ခတ်ခံရပြီးမှ မင်းကြီးက မိုရွှီ့ကို သဘောမကျဘူးဆိုပြီး ခေါင်းဖြတ်ပစ်တာလား ...
အဲ့ဒါကြောင့် မိုရွှီက ပြန်လည်မွေးဖွားလာတာပေါ့ ...
လင်းရှောင် သတိလက်လွတ်ဖြစ်သည်အထိ တွေးတောနေမိသည်။
လင်းရှောင် စိတ်ပျံ့လွင့်နေစဉ် လေးယောက်မြောက်လူက အပေါက်ဝမှ ဝင်လာသည်။
ထိုလူက အပြာရောင်ဝတ်ရုံ ဝတ်ဆင်ထားပြီး အားမာန်အပြည့်ရှိသည်။ ရုပ်ရည်ချောမောခံ့ညားပြီး သန့်ရှင်းသပ်ရပ်ကာ ဧကရာဇ်က စစ်သူကြီးရာထူး အပ်နှင်းထားသည့် လန်ဝေ့ဖြစ်သည်။
လင်းရှောင် ရှုံ့မဲ့သွားသည်။
ဒီလူက ပြဿနာဖြစ်ချင်ပြန်တာလား ...
" ဒီနေရာက စစ်သူကြီးလန် ရှိနေရမယ့်နေရာ မဟုတ်ပါဘူး ..."
အန်းရှန့်က ဦးအောင်ပြောလိုက်သည်။
ထိုစကားများက လင်းရှောင်စိတ်ထဲတွင် ပြောချင်နေသည်များနှင့် ထပ်တူကျနေသဖြင့် စိတ်ထဲတွင် သူမကို ၃၂ခါခန့် ချီးကျူးလိုက်သည်။
လန်ဝေ့ကို မြင်သည့်အခါ မိုရွှီက ကယ်တင်ရှင်ကိုတွေ့လိုက်သကဲ့သို့ ရုန်းကန်လိုက်ပြီး သူ့ဆီသို့ တွားသွားကာခေါ်လိုက်သည်။
" အစ်ကိုကြီးလန် ... အစ်ကိုကြီးလန် ရွှီရွှီ့ကို ကယ်ပါဦး ..."
“……” လန်ဝေ့က သူမကို ဂရာမစိုက်ပဲ လင်းရှောင်ရှေ့ကိုသာလျှောက်သွားလိုက်သည်။ လင်းရှောင်၏ အကြည့်အောက်တွင် သူ့လက်ထဲမှဓားကို ယူလိုက်သည်။
" ကျွန်တော်မျိုး နောက်မှ အရှင်မင်းကြီးဆီက ခွင့်လွှတ်မှု တောင်းခံလိုက်ပါ့မယ် ..."
" ဒီမိန်းမ ..."
လန်ဝေ့က ရှေ့ကိုလျှောက်သွားကာ ဓားဖြင့် မိုရွှီ၏လည်ပင်းကို ရွယ်ထားသည်။
လင်းရှောင် အံ့အားသင့်သွားသည်။
အန်းရှန့်နှင့် အန်းယုံက အခြေအနေကို ကြိုမသိသောကြောင့် လန်ဝေ့ကို အံ့ဩတကြီးဖြင့် ကြည့်နေသည်။
လန်ဝေ့က မိုရွှီ၏ပါးပေါ်မှ ဆံပင်များကို သပ်ပေးလိုက်သည့်အခါ လင်းရှောင်က သူမမျက်နှာမှ ပြည်ထွက်နေသည့် ဒဏ်ရာများကို မြင်လိုက်ရသည်။
ပြိုင်ဘက်ကင်းအောင် လှခဲ့တဲ့ မိန်းမလှလေးမိုရွှီက ရုပ်ဆိုးတဲ့ ပုံပျက်ပန်းပျက် မိန်းမတစ်ယောက်ဖြစ်သွားပါလား ...
" ဒါ ..."
လင်းရှောင် ဆွံ့အသွားပြီး ဘာပြောရမည်မသိတော့ပေ။
လန်ဝေ့က အေးစက်စွာဖြေလိုက်သည်။
" ဒါ သူမကိုယ်တိုင် ဖန်တီးခဲ့တဲ့ကိစ္စပဲ ... သူမကိုယ်တိုင်ပြင်ဆင်ထားတဲ့ အဆိပ်ကို အတင်းအကျပ်သောက်ခိုင်းပြီး ဘုရင့်ကြင်ယာတော်ကို ဒုက္ခပေးချင်ခဲ့တယ်လေ ..."
“……” ရှောင်တိုင်းပြည်မင်းသားအိမ်တော်မှ ကိစ္စကို လင်းရှောင် ခပ်ရေးရေး မှတ်မိလာသည်။
လန်ဝေ့ပြောလိုက်သည်။
" ဒါ ကင်းမြီးကောက်လိုအဆိပ်ပြင်းတဲ့ နှလုံးသားရှိတဲ့ မင်းလိုမိန်းမနဲ့လိုက်ဖက်တဲ့ ပုံစံပဲ ...
မိုရွှီကို ပြောလိုက်သည့်စကားများကြောင့် သူမ လုံးဝ အံ့အားသင့်သွားရသည်။ သူ၏လေသံတွင် အမုန်းတရားနှင့် ဒေါသများပါဝင်နေသည်။
