Chapter 28
ကုဟွိုက်၏ ကြယ်တာရာမဟာမိတ်အဖွဲ့အစည်းနှင့် ပတ်သက်၍ နားလည်မှုသည် သူစွန့်ပစ်ထားသော ဂြိုဟ်ပေါ်တွင် ရှိနေစဉ် သူရရှိခဲ့သော အမွေဆက်ခံမှု မှတ်ဥာဏ်များမှ ဆင်းသက်လာခြင်းဖြစ်သည်။ နောက်ပိုင်းတွင် သူ တူဆာသို့ရောက်သည်နှင့် ကုဟွိုက်သည် ကြယ်တာရာမဟာမိတ်အဖွဲ့အစည်း၏ အသေးစိတ်အခြေအနေကို ပြောပြရန် ဗိုလ်မှူးကို တောင်းဆိုခဲ့သည်။
ကုဟွိုက်သည် ဇက်များ၏သံတမန်ရေးရာ သုညအနေအထားကို ထိန်းသိမ်းထားသင့်လား သို့မဟုတ် ကြယ်တာရာမဟာမိတ်အဖွဲ့အစည်းတွင်ပါဝင်သင့်လားကို နှစ်ကြိမ်တိုင်တိုင် တွေးခဲ့ဖူးသည်။ဆုံးဖြတ်ချက်ကို သူကိုယ်တိုင် မချနိုင်ပေ။ သူ့ရည်ရွယ်ချက်များကို အမှန်တကယ် မဖော်ပြခင် ဗိုလ်မှူးနှင့် အလ်ဗ်အပါအဝင် တူဆာ၏ထိပ်တန်းအမှုဆောင်အရာရှိများကို မေးခဲ့သည်။
ဇက်များသည် ထိုဦးတည်ချက်အတိုင်း ဖွံ့ဖြိုးတိုးတက်လာပါလျှင် သူတို့သည် အမှန်တကယ် အဆင်ပြေမှုများနှင့် အကျိုးကျေးဇူးများစွာကို ရရှိနိုင်မည် ဖြစ်ကြောင်း တုံ့ပြန်ပြောဆိုခဲ့ကြသည်။ သက်ဆိုင်ရာတာဝန်အချို့ကိုလည်း ထမ်းဆောင်ရန် လိုအပ်နိုင်သော်လည်း ယေဘူယျအားဖြင့် ပြောရလျှင် ပိုအဆင်ပြေပေသည်။
ကုဟွိုက် ထိုအကြံဥာဏ်ကို ထုတ်ပြောရသည့် အကြောင်းအရင်းမှာ ဇက်မျိုးနွယ်တစ်ခုလုံးသည် ကြယ်တာရာမဟာမိတ်အဖွဲ့အစည်းနှင့် ဆက်သွယ်ရန် သဘောထားမရှိသည့်အချိန်က ဇက်မျိုးနွယ်ကို သူတို့ကိုယ်တိုင် စတင်တည်ထောင်ခဲ့ခြင်းကြောင့်ဖြစ်သည်။ သူတို့၏ အင်အားကြောင့် ဇက်မျိုးနွယ်၏ ဖွံ့ဖြိုးတိုးတက်မှုသည် ကောင်းမွန်စွာ လည်ပတ်နေသော်လည်း လုံးဝအမှီအခိုကင်းနေခဲ့၏။
ဇက်များသည် အေးစက်ကာ အာဏာရှင်ဆန်သော သဘောသဘာဝရှိသည်။ မျိုးနွယ်စုပေါင်းစုံစစ်ပွဲများ မကြာခဏ ဖြစ်ပွားနေသည့် ခေတ်ဟောင်းတွင် ဇက်များကို အရက်စက်ဆုံးမျိုးနွယ်ဟုဆိုကြသည်။ ခေတ်သစ်တွင် အင်အားကြီးသောမျိုးနွယ်စုအချို့သည် ကြယ်တာရာမဟာမိတ်အဖွဲ့အစည်းကို ဖွဲ့စည်းရန် အတူတကွပူးပေါင်းခဲ့ကြပြီး နောက်ပိုင်းတွင် အခြားမျိုးနွယ်များလည်း ပါဝင်လာခဲ့ကြသည်။ ကြယ်တာရာမဟာမိတ်အဖွဲ့အစည်းသည် ကြယ်များ၏ အလုံးစုံငြိမ်းချမ်းရေးကို ထိန်းသိမ်းရန် စတင်လုပ်ဆောင်ခဲ့သည်။
ယေဘူယျအားဖြင့် ယင်းကို ငြိမ်းချမ်းရေးခေတ်သစ်ဟု မှတ်ယူနိုင်သည်။ ဇက်များပင်လျှင် ကြုံသလို စစ်မတိုက်နိုင်တော့ပေ။ ထို့အပြင် ဇက်များသည် အရင်ခေတ်ဟောင်းက ဂြိုလ်များစွာကို သိမ်းပိုက်ခဲ့သည်။ ဤဂြိုလ်များကို ဖွံ့ဖြိုးတိုးတက်ရန် အချိန်ယူရသောကြောင့် သူတို့ အတော်လေး ငြိမ်နေခဲ့ကြသည်။ သူတို့သည် သူတို့ဘာသာ ဖွံ့ဖြိုးတိုးတက်အောင် လုပ်နိုင်ခဲ့ပြီး ဇက်များသည် ကြယ်တာရာမဟာမိတ်အဖွဲ့အစည်းတွင် ပါဝင်ရန်နေနေသာသာ အခြားမျိုးနွယ်များနှင့် ဆက်ဆံရန်ပင်အစပြုလိုခြင်းမရှိပေ။
အရင်ခေတ်ဟောင်းက ဇက်များသည် အေးစက်ပြီး ရက်စက်ကြမ်းကြုတ်သည့်ဟူသော အမှတ်အသားများရှိခြင်းကြောင့် ကြယ်တာရာတွင်ရှိသော တခြားမျိုးနွယ်စုများသည် ဇက်များနှင့် သံခင်းတမန်ခင်းထူထောင်ရန် မကြိုးစားခဲ့ကြပေ။ သူတို့သည် ဇက်များကိုကြောက်သောကြောင့် ဇက်များကိုမနှိုးဆွရန် သဘောထားကိုထိန်းသိမ်းခဲ့သည်။ သူတို့အား အခြားမျိုးနွယ်များနှင့် ဆက်ဆံရန် ထုတ်ဖော်ပြောဆိုခဲ့သော ကုဟွိုက်၏အကြံအစည်ကြောင့်သာမဟုတ်ပါလျှင် ဇက်များ၏ လုံးဝ အမှီအခိုကင်းမှုသည် ဆက်လက်ရှိနေဦးမည်ဖြစ်သည်။ သန်မာသောမျိုးနွယ်စုတစ်ခုပင်လျှင် တစ်ခါတစ်ရံ သဘာဝဘေးဥပဒ်များ သို့မဟုတ် အခက်အခဲအကျပ်အတည်းများကို မရှောင်လွှဲနိုင်ကြောင်း ကုဟွိုက် ခံစားမိသည်။ စကြဝဠာထဲတွင် မဖြစ်ပေါ်လာသေးသည့် အန္တရာယ်ရှိသည့်ရန်သူများလည်း ရှိပေသည်။ ထို့ကြောင့် ဇက်များသည် မဟာမိတ်များလိုအပ်သည်။
အခြားလူမျိုးများနှင့် သံတမန်ဆက်ဆံရေးထူထောင်ပြီး ကြယ်တာရာမဟာမိတ်အဖွဲ့အစည်းတွင် ပါဝင်ခြင်းသည် ဇက်များအတွက် အကျိုးရှိကြောင်း အတည်ပြုပြီးနောက် ကုဟွိုက် ဆုံးဖြတ်ချက်ချခဲ့သည်။ လက်ရှိတွင် ကြယ်တာရာအစုအဝေးထဲမှ မျိုးနွယ်အများစုသည် ဇက်များက အလွန်အန္တရာယ်များသည်ဟု တွေးခဲ့ကြသည်။ သူ၏ဇက်များကို သူ့မူရင်းကမ္ဘာ၏သိပ္ပံဝတ္ထုဇာတ်လမ်းများထဲက လူတိုင်းတိုက်ခိုက်နှိမ်နင်းချင်သည့်လူဆိုးများကဲ့သို့ ကုဟွိုက် မဖြစ်စေလိုပေ။
ကုဟွိုက်သည် တူဆာသို့ လာရောက်လည်ပတ်ရန် ဖိတ်ကြားချက်ကို ပေးပို့ခဲ့သည်။ ဖိတ်ကြားမှုသည် တစိတ်တဒေသမျှ အတင်းအကြပ်ဆန်နေသော်လည်း လူသားအရာရှိနှစ်ဦးက အခြေအနေကို လက်ခံခဲ့သည်။ လူသားများသည် သတ္တုလက်ကောက်များကို ၀တ်ဆင်ထားရဆဲဖြစ်သော်လည်း သူတို့အားခွင့်ပြုထားသည့် လုပ်ဆောင်ချက်များမှာ တူဆာရှိ ပုံမှန်နေထိုင်သူများနှင့် များစွာကွာခြားမှုမရှိပေ။ သူတို့သည် ကြယ်တာရာကွန်ရက်ကို ရှာဖွေနိုင်သည့် ကွန်ပျူတာနှင့်ချိတ်ဆက်ထားသည့်စနစ်သို့ပင် ဝင်ရောက်ခွင့်ရှိသည်။ မှန်သည်၊ ကြည့်ရှုရှာဖွေရာတွင် ကန့်သတ်ထားပြီး အခြားခွင့်ပြုချက်များကိုကား ပိတ်ဆို့ထားသည်။
ထိုသို့ဆိုလျှင်ပင် အဆင်ပြေပါသေးသည်။ တူဆာအပြင်ဘက်တွင် ဖြစ်ပျက်နေသည့်အရာများ အထူးသဖြင့် ကမ္ဘာမြေဖက်ဒရယ်အဖွဲ့အစည်း၏ မကြာသေးမီကအခြေအနေကို သိရရန် ရှန်းမုနှင့် ဟန်မာတို့မှာ စိတ်အားထက်သန်နေကြ၏။ သူတို့ ကြယ်တာရာကွန်ရက်ထဲသို့ ဝင်လိုက်သည့်အချိန် ထိုအပေါ်တွင် ဆွေးနွေးနေကြသည့် အကြောင်းအရာများကို မြင်ပြီး နှစ်ယောက်သား ထိတ်လန့်သွားကြသည်။
[D47 (နော့ဇ်ကြယ်အစုအဝေး): ကမ္ဘာမြေမဟာမိတ်အဖွဲ့အစည်းကနေ ကြားရတဲ့အချက်အပေါ် အခြေခံပြီး ဇက်ဘုရင် မွေးဖွားလာခဲ့တယ်ဆိုတာ အမှန်လား။]
[z571 (ဆိုပါကြယ်အစုအဝေး): ဇက်စစ်တပ်လေးခုရဲ့ပေါင်းစပ်အင်အားက အတုအယောင်မဟုတ်ဘူး။ သူတို့က ငါတို့ဂြိုဟ်ကိုဖြတ်သွားပြီး ငါတို့ကိုကြောက်လန့်စေခဲ့တယ်။]
[—(ကိုတိုကြယ်အစုအဝေး): လူသားတွေက သူတို့ရဲ့ဘုရင်ကို ခိုးသွားတာကြောင့် စစ်တပ်တစ်ခုလုံးက ကမ္ဘာမြေရဲ့ကာကွယ်ရေးအဝန်းအဝိုင်းအပြင်ဘက်မှာ တပ်စွဲထားတာမလား။]
[ယွီဇီ(နေအဖွဲ့အစည်း): ဝိုး၊ ငါတို့က တကယ် အပြစ်ကင်းပါတယ်နော်။ အဲဒါကို ငါတို့လူသားတွေ မလုပ်ခဲ့ဘူး! ဒါကိုလုပ်ခဲ့တဲ့လူသားတွေမဟုတ်ပေမယ့် ဇက်တွေက ငါတို့လို့ပဲ ထင်နေတယ်။]
မဟုတ်ဘူး၊ သူတို့က တကယ်ကို လူသားတွေပါ...
လူသားအရာရှိနှစ်ဦးသည် လူသားမျိုးနွယ်မှ နှင်ထုတ်ခံရမည်ကို စိုးရိမ်သဖြင့် သူတို့၏ မျက်နှာများပေါ်တွင် နာကျင်မှုများနှင့် ဖုံးလွှမ်းသွားသည်။ ၎င်းသည်ကား သူတို့နှစ်ယောက်စလုံး လုပ်ခဲ့သည့်အရာပင်ဖြစ်သည်။ ဂြိုလ်များစွာကို ထိတ်လန့်စေရုံသာမက ကမ္ဘာမြေသည်လည်း ဇက်စစ်တပ်မှ ဖိအားများကို အပြည့်အဝခံခဲ့ရပြီးတိုက်ခိုက်ခံရလုနီးပါးဖြစ်ခဲ့သည်။
အကယ်၍ ထိုဂြိုလ်များတွင်နေထိုင်သူများနှင့် ကမ္ဘာပေါ်ရှိ အခြားလူများသာ ထိုကိစ္စအား သူတို့နှစ်ဦးလုပ်ခဲ့သည်ဆိုသည့်အကြောင်း သိသွားခဲ့ပါက ရှန်းမုနှင့် ဟန်မာတို့သည် သူတို့အား ကမ္ဘာမြေဖက်ဒရယ်အဖွဲ့အစည်း၏ သမိုင်းဝင်စာအုပ်များတွင် ရေးမှတ်ထားနိုင်ဖွယ်ကြောင်း ခံစားရသည်။ အတိအကျ အပြစ်တင်ဝေဖန်မှုများကို ရေးထားပေလိမ့်မည်။
ဇက်ဘုရင်၏မွေးဖွားလာမှုသည် မျိုးနွယ်စုများစွာအတွက် စိုးရိမ်စရာအကြောင်းအရင်းတစ်ခုဖြစ်လာခဲ့သည်။ ထိုဘုရင်၏လက်အောက်တွင် ဇက်များ ပေါင်းစည်းသွားပြီးနောက် သူတို့အတွက် ပို၍အန္တရာယ်များလာမည်ကို စိုးရိမ်ခဲ့ကြသည်။ ဇက်ဘုရင်က ဘယ်လိုပုံစံလဲ။ ၎င်းက ကြယ်တာရာကွန်ရက်တွင် လူပြောအများဆုံး အကြောင်းအရာဖြစ်နိုင်သည်။ ထိုအချိန်တွင် ကုဟွိုက်သည် အခြားစစ်တပ်ခေါင်းဆောင်နှစ်ဦးနှင့် တွေ့ဆုံနေ၏။
ယခင်ဖြစ်ရပ်ကြောင့် အခြားစစ်တပ်ခေါင်းဆောင်နှစ်ဦးနှင့် သူ၏ပထမဆုံးတွေ့ဆုံမှုမှာ အလျင်စလိုဖြစ်ခဲ့သည်။ သူ့တွင် စကားအနည်းငယ်ထက် ပိုပြောရန် အချိန်မရှိပေ။ အခု ကုဟွိုက်သည် သူတို့နှင့် ကောင်းမွန်သည့် ဆက်ဆံရေးရှိရန် လိုအပ်ပေသည်။
"နောက်ပိုင်း မင်းတို့ တူဆာမှာ နေမှာလား" ကုဟွိုက် ကာ့ပါးလီယာနှင့် စကားပြောတုန်းကကဲ့သို့ တူညီသောစကားလုံးများကို နူးညံ့စွာမေးလိုက်သည်။
သူ့ခန္ဓာကိုယ်သည် အရမ်းကြီးလွန်းသည့်အတွက် စီမိုဒိုမှာ သာမန်ထိုင်ခုံများတွင် ထိုင်၍မရပေ။ စတုထ္ထမြောက်စစ်တပ်၏ ရက်စက်ကြမ်းကြုတ်သည့် ပုံပန်းသဏ္ဍာန်ရှိသောခေါင်းဆောင်သည် ကုဟွိုက်အား ဦးညွတ်ကာ မဆိုင်းမတွ ပြောဆိုလိုက်သည်။
"အရှင်ရှိတဲ့နေရာမှာ ကျွန်တော်လည်းနေပါ့မယ်.."
စီမိုဒိုသည် ရှုပ်ထွေးသောပုံစံဖြင့် တွေးတောနေရခြင်းကို မကြိုက်ပေ။ သူသည် စွမ်းအားကြီးမားသော အယ်လ်ဖာ-အဆင့် ဇက်ဖြစ်သောကြောင့်ပြဿနာများအား ကြမ်းတမ်းစွာ ဖြေရှင်းခြင်းကို ကျင့်သားရနေခဲ့သည်။ ဥပမာအားဖြင့် ယခု သူ ကုဟွိုက်ကို ကာကွယ်ရမည်ဟု တွေးထားပြီး ဆက်စပ်မေးခွန်းမှာ သူ့ကို မည်သို့ကာကွယ်ရမည်ဟူသည့်မေးခွန်းမျိုး။ စီမိုဒိုသည် အလွန်ရိုးရှင်းပြီး ကြမ်းတမ်းသောနည်းလမ်းကို ရွေးချယ်ခဲ့သည်။
ကာကွယ်ခြင်းဆိုသည်မှာ ဘုရင်နောက်မှအမြဲလိုက်ကာ ကာကွယ်စောင့်ရှောက်ပေးရန်ဖြစ်သည်။ ဤသည်မှာ အမှန်ကန်ဆုံးသော ကာကွယ်မှုပင်။ ထို့အချက်များကြောင့် စီမိုဒိုသည် အခြားအရာများကို စွန့်လွှတ်နိုင်ခဲ့သည်။ ကုဟွိုက်အား ကာကွယ်ရန် အာရုံစိုက်ခြင်းက သူ့အတွက် လုံလောက်သည်။ သူ တခြားအရာများကို ဂရုစိုက်နေရန်မလိုပေ။
စီဒိုမိုသည်လည်း အယ်လ်ဖာ-အဆင့်ဇက်များ၏ ရွှေရောင်ဒေါင်လိုက် သူငယ်အိမ်များကို ပိုင်ဆိုင်ထားပေသည်။ ထိုအချိန်တွင် သူသည် မလှုပ်မယှက်ဘဲ ကုဟွိုက်ကို ကြည့်နေသည်။ ဤမျက်လုံးများသည် သူ့ဘေးနားရှိ တက်ခ်ဇက်အား ကုဟွိုက်ကို တစ်နည်းနည်းဖြင့် သတိရစေသည်။ တဖက်လူ၏ကြီးမားသောကိုယ်ထည်သည်လည်း ကုဟွိုက်အား တူညီမှုကို ပို၍ခံစားရစေသည်။ သို့သော် အခြားတစ်ဖက်လူသည် ကမ်မုစ်ဇက်ဖြစ်သည်မှာ ထင်ရှားသည်။
"ဒါဆို တူဆာမှာ အခြေချပါ.." ကုဟွိုက် ခေါင်းညိတ်ပြလိုက်သည်။
ကုဟွိုက်ရှေ့ရှိ ကြီးမားလှသည့်ဇက်၏ မျက်လုံးများမှာ အနည်းငယ် လှုပ်ရှားသွားသော်လည်း သူ့ခန္ဓာကိုယ်က မလှုပ်ရှားသေးပေ။ ထို့နောက် သူသည် တိုးလျသောအသံဖြင့် ပြန်ဖြေခဲ့သည်။ “စီမိုဒို အရှင့်ရဲ့အမိန့်ကို နာခံပါ့မယ်.."
စီမိုဒိုသည် ကုဟွိုက်၏စကားဖြစ်နေသ၍ နားထောင်လိမ့်မည်။ အကြောင်းမှာ သူ၏သစ္စာစောင့်သိမှုသည် ပြင်းထန်လွန်းသောကြောင့်။ ရက်စက်သောအသွင်အပြင်ရှိ စီမိုဒိုသည် ကုဟွိုက်၏ရှေ့တွင် အနည်းငယ်မှိုင်းနေပုံရပြီး အမေးအဖြေပုံစံတွင် ရှိနေသည်။ ကုဟွိုက် ဘာပဲမေးမေး သူပြန်ဖြေလိမ့်မည်။
ထိုအချိန်တွင် သူ့ဘေးရှိအိုင်းယီသည် ငြိမ်သက်နေသော ရေကန်တစ်ခုကဲ့သို့ ဖြစ်နေ၏။ လှိုင်းများမပါသော ငြိမ်သက်နေသည့် မျက်လုံးများဖြင့် ကုဟွိုက်ကိုကြည့်နေပြီး သူ့အသွင်အပြင်သည် အေးစက်ကာ လှပပေသည်။
"ဒီလက်အောက်ငယ်သားကလည်း တူဆာအပေါ်မှာ အခြေချပါ့မယ်.." အိုင်းယီ တည်ငြိမ်စွာ စကားပြောလိုက်သည်။
ဇက်များသည် ယေဘူယျအားဖြင့် စစ်ယူနီဖောင်းများကဲ့သို့ တိုက်ခိုက်ရ အဆင်ပြေသည့် ဝတ်စုံများကို ၀တ်ဆင်ထားသော်လည်း အိုင်းယီမှာ ခြွင်းချက်ဖြစ်သည်။ တစ်ဖက်လူသည် ရှုပ်ထွေးသော၀တ်ရုံရှည်ကို ၀တ်ဆင်ထားသည်။ ဝတ်ရုံရှည်၏ လက်ဖျားများနှင့် ကော်လာများကို အနက်ရောင်နှင့် ရွှေရောင် ဒီဇိုင်းများဖြင့် တန်ဆာဆင်ထားပြီး တည်ကြည်ကာ ဂုဏ်သိက္ခါရှိသည့်ပုံပေါ်နေသည်။
အိုင်းယီသည် အနီးကပ်တိုက်ပွဲတွင် တစ်ခါမျှ မတိုက်ဖူးခဲ့ပေ။ သူသည် အစ်ဆာဒိုရယ်မျိုးနွယ်စုတွင် မွေးဖွားခဲ့ပြီး ထိုမျိုးနွယ်စု၏လက္ခဏာကို အပြည့်အဝအသုံးချခဲ့သည်။ ဘယ်လိုတိုက်ပွဲမျိုးဖြစ်ဖြစ်၊ သူ့ကိုယ်ပိုင်အစွမ်းအစနှင့် ဖြေရှင်းရန် ရွေးချယ်ခဲ့သည်။
“ကောင်းပြီ..” ကုဟွိုက်၏မျက်လုံးများမှာ ကွေးညွတ်သွားသည်။ ဤရလဒ်အတွက် သူ အရမ်းပျော်ရွှင်ခဲ့သည်။
စစ်တပ်ခေါင်းဆောင်နှစ်ဦးနှင့် ဆက်သွယ်ပြီးသောအခါ ကုဟွိုက်သည် သံတမန်ရေးရာကိစ္စများကို စတင်ရန် အလျင်စလိုမလုပ်ခဲ့ပေ။ သူသည် လာမည့်ရက်အနည်းငယ်အတွင်း စစ်တပ်လေးခုကို ပေါင်းစည်းရေးအား သေချာစေရန်ကိုသာ ပြုလုပ်မည်ဖြစ်သည်။ ထို့နောက် သံတမန်ဆက်ဆံရေး ထူထောင်ရန်၊ လွယ်ကူသောပစ်မှတ်များကို ရှာဖွေနိုင်ရန် ကြယ်တာရာအစုအဝေးရှိ အင်အားစုအားလုံးကို စစ်ဦးစီးချုပ်အား လေ့လာရန် ခိုင်းစေခဲ့သည်။
ပထမဦးစွာ သူတို့သည် သူတို့၏အိမ်နီးချင်းဂြိုဟ်များနှင့် စတင်ကာ ဆက်လက်ဆောင်ရွက်သင့်သည်။ ကုဟွိုက် ကြယ်တာရာမြေပုံကို ကြည့်လိုက်ပြီး တူဆာကြယ်အစုအဝေးဘေးရှိ ဂြိုဟ်တစ်ခုအပေါ် စက်ဝိုင်းရေးဆွဲလိုက်သည်။ ကုဟွိုက် ထိုသို့လုပ်နေချိန်တွင် သူ့နောက်မှ ခြေသံများကို ကြားလိုက်ရသည်။
ခြေသံများက အလွန်ပေါ့ပါးလှသည်။ ကုဟွိုက် လှည့်ကြည့်လိုက်သောအခါ သူ့ထံ တိတ်တဆိတ် လျှောက်လာနေသော အလ်ဗ်ကို တွေ့လိုက်ရသည်။ အဲလ်ဗ်သည် ထိုခြေသံများကို ကုဟွိုက်ကြားစေရန် တမင်တကာ လုပ်နေခြင်းသာ သို့မဟုတ်ပါက အသံလုံးဝထွက်မည်မဟုတ်။ သူသည် တစ်ဖက်လူကို ထိတ်လန့်သွားစေရန် တိတ်တဆိတ် ပေါ်မလာချင်ပေ။ အလ်ဗ်သည် ကုဟွိုက်ဆီသို့ ဖြည်းညှင်းစွာ လျှောက်သွားပြီး ကုဟွိုက်ထံ လက်ကို ဆန့်ထုတ်လိုက်ကာ သူ၏လက်ဖဝါးကိုဖြန့်ကာ ကုဟွိုက်အား ပန်းတစ်ပွင့်ကို ပေးအပ်ခဲ့သည်။
“အရှင်လိုချင်တဲ့ပန်း” အလ်ဗ်သည် ပြောလိုက်ပြီး သူ့၏လှပသည့်မျက်နှာမှာ အေးစက်လွန်းနေသည်။
၎င်းသည် ကြယ်အစုအဝေး ဘေးနားရှိဂြိုလ်မှ အထူးခူးဆွတ်ခဲ့သော ပန်းဖြစ်သည်။ ကုဟွိုက်၏တောင်းဆိုမှုကို သူကျေကျေနပ်နပ်လက်ခံလိုသည်မှာ ကုဟွိုက် အပေါ်ထားသည့် သူ၏လေးနက်သော သဘောထားပင်။ ကုဟွိုက်က နောက်ဆုံးအကြိမ်တုန်းကပေးသည့်ပန်းနှင့် ပုံစံတူတစ်ခုဟု ပြောခဲ့သောကြောင့် အလ်ဗ်သည် အရင်ကလို ဖွေးစွတ်နေသည့်အဖြူရောင်ပန်းကိုပဲ ယူလာပေးခဲ့သည်။ ပွင့်ချပ်ပုံသဏ္ဍာန်များပင်လျှင် တူညီလုနီးပါးဖြစ်နေသည်။
ကုဟွိုက်လည်း ၎င်းကိုသတိထားမိပြီး အလ်ဗ်၏လက်ထဲက ပန်းကို ယူလိုက်သည်။ “တကယ်တော့ ပန်းက မျိုးစိတ်တူရုံနဲ့ လုံလောက်ပါတယ်.."
"အရှင်က အတိအကျတူသင့်တယ်လို့ ကျွန်တော့်ကို ပြောခဲ့တယ်လေ.."
ကုဟွိုက် ၎င်းကို ပြန်လည်မချေပနိုင်ပေ။ သူသည် အလ်ဗ်၏ရွှေရောင်မျက်ဆံများကို ကြည့်ရန် မျက်လုံးများကို မော့လိုက်ပြီး ဤငွေရောင်ကြောင်ကြီး၏ လေးနက်သောအသွင်အပြင်အချို့တွင် အကူအညီမဲ့သွားသလိုခံစားရသည်။ ချစ်စရာကောင်းသောဟူသည့် နာမဝိသေသနသည် အရပ်ရှည်ကာ ချောမောပြီး စစ်ဝတ်စုံဝတ်ထားသည့် ငွေရောင်ဆံပင်နှင့်ဇက်အတွက် မသင့်လျော်သော်လည်း ထိုသို့သောအလေးအနက်ထားမှုသည် သူ့ကို ချစ်စရာကောင်းသည်ဟု လူအများအား ခံစားရစေသည်။
“နောက်တစ်ကြိမ်ဆိုရင်တော့ အတိအကျ တူနေစရာ မလိုဘူး။ တူတယ်ဆိုရုံနဲ့တင် ရတယ်..” ကုဟွိုက် သူ့စကားများကို စပြီးပြင်လိုက်သည်။
“ကောင်းပါပြီ..” အဲလ်ဗ်က အသံတိုးတိုးဖြင့် တုံ့ပြန်ခဲ့သည်။
ပြီးခဲ့သည့်ရက်များက ကုဟွိုက်သည် စစ်တပ်ခေါင်းဆောင်လေးယောက်အကြောင်းနှင့် ပတ်သက်သည့်တစ်စုံတစ်ခုကို ရှာဖွေတွေ့ရှိခဲ့သည်။ အခြားစစ်တပ်ခေါင်းဆောင်သုံးဦးသည် အဲလ်ဗ်အပေါ် အမျိုးမျိုးသောသတိထားနေမှုများ ရှိနေကြောင်း တွေ့ရှိချက်များကို ရိုးရှင်းစွာ အကျဉ်းချုံးနိုင်သည်။
၎င်းသည် အဲလ်ဗ်၏မတည်ငြိမ်မှုကြောင့်ပင်။ အဲလ်ဗ်သည် ကုဟွိုက်အပေါ် နာခံမှု ကင်းမဲ့ပြီး အသိစိတ်လွတ်သွားရန် လွယ်ကူသည်ဟု ကာ့ပါးလီယာနှင့် အခြားသူများက ယူဆခဲ့ကြသည်။ ထို့ကြောင့် အလ်ဗ်က သူ့အနားသို့ ချဉ်းကပ်လာသောအခါ သူတို့သတိထားနေခဲ့ကြ၏။
"မင်း အသိစိတ်လွတ်သွားရင် ငါ့ကို ထိခိုက်အောင် လုပ်မှာလား" ကုဟွိုက် သူ့ရှေ့တွင် ရပ်နေသော ငွေရောင်ဆံပင်နှင့်ဇက်ကို ရုတ်တရက် မေးလိုက်သည်။
အလ်ဗ်၏နှုတ်ခမ်းများသည် တဖြောင့်တည်းဖြစ်သွားပြီး “မလုပ်ဘူး"
ကုဟွိုက် ခေါင်းကိုညိတ်ကာ သူ၏ယုံကြည်မှုကို အလွယ်တကူဖော်ပြလိုက်သည်။
“အရှင် ကျွန်တော့်ကို ထွက်သွားဖို့ မတောင်းဆိုမချင်း အရှင့်ကို ကျွန်တော်ကာကွယ်ပေးသွားမှာပါ”
အလ်ဗ်သည် အေးစက်သောလေသံဖြင့် ကြေညာပြောဆိုလိုက်သည်။
ကုဟွိုက်သည် နာခံမှုရှိသော ငွေရောင်ကြောင်ကြီးကို ကြည့်ပြီး အလ်ဗ်အား အသိစိတ်လွတ်သွားသည်မျိုး မဖြစ်စေချင်ပေ။ ထို့ကြောင့် ကုဟွိုက်က "ငါ့ကို အမြဲတမ်း ကာကွယ်ပေးပါ" ဟုပြောလိုက်သည်။
ထိုစကားကြားပြီး အဲလ်ဗ်၏ရွှေရောင် မျက်ဆံများက ကျုံ့သွားသည်။ သူသည် အမူအရာမဲ့စွာရှိနေသေးသော်လည်း သူ၏ဘေးတိုက်အနေအထားက အနည်းငယ်တင်းမာနေပုံရသည်။
အဲလ်ဗ်သည် သူ့ရှေ့ရှိဆံပင်နက်နှင့်လူငယ်လေးကို စိုက်ကြည့်ကာ ခဏအကြာတွင် တုံ့ပြန်လိုက်၏။
“ကောင်းပါပြီ..."
ပထမဆုံး သံတမန်ရေးပစ်မှတ်ကို သူတို့၏ အိမ်နီးချင်းဂြိုဟ်များနှင့် စတင်သင့်သည်ဟု ကုဟွိုက် ထင်မြင်ခဲ့သည်။ ဖော်ရွေသော အချက်ပြမှုတစ်ခုကို သူ မပေးပို့မီ ကြယ်တာရာမြေပုံပေါ်တွင် သူဝိုင်းထားသောဂြိုဟ်လေးသည် ပြဿနာနှင့် ရင်ဆိုင်ခဲ့ရသည်။ ၎င်းပြသနာသည် ဂြိုလ်များနှင့်ရင်းနှီးသော ကြယ်တာရာပင်လယ်ဓားပြများပင်ဖြစ်သည်။ ယခုတစ်ကြိမ်တွင် ကြယ်တာရာပင်လယ်ဓားပြများသည် ကုန်သွယ်မှုသင်္ဘောများကိုလုယက်ရန် မတင်းတိမ်ကြတော့ဘဲ ဂြိုဟ်တစ်လုံးကိုပါ တိုက်ခိုက်ရန် တွေးထားခဲ့ကြသည်။ ထိုဂြိုလ်ပေါ်တွင်နေထိုင်သောမျိုးနွယ်စုသည် မသန်မာကြပေ။ ၎င်းတို့သည် ဇက်ပိုင်နက်နယ်မြေအနီးတွင် နေထိုင်ကြသောကြောင့် အခြားမျိုးနွယ်စုများနှင့်လည်း မရင်းနှီးခဲ့။
ဤသည်မှာ ကြယ်တာရာပင်လယ်ဓားပြများအတွက် အလွန်အဆင်ပြေလှပေသည်။ တစ်ခါတစ်ရံတွင် ကြယ်တာရာပင်လယ်ဓားပြများသည် ကုန်သွယ်ရေးသင်္ဘောများကို လုယက်ရန် လာကြသည်။ ယခင်က သင်္ဘောများကို လုယက်ပြီးနောက် ဆုတ်ခွာသွားခဲ့သည်။ သို့သော် သူတို့သည် သင်္ဘောများကို အကြိမ်များစွာ လုယက်နိုင်ခဲ့သဖြင့် သူတို့၏လောဘစိတ်မှာ တဖြည်းဖြည်း တိုးပွားလာခဲ့သည်။
ကြယ်တာရာပင်လယ်ဓားပြများ ဝိုင်းရံခံထားရသောဂြိုဟ်သည် နောမ်ဖြစ်ပြီး ဂြိုဟ်ပေါ်တွင်နေထိုင်သည့်မျိုးနွယ်စုသည် ပိုးပိုလ်စ် ဖြစ်သည်။ ပိုးပိုလ်စ်လူမျိုးများသည် ကြယ်တာရာပင်လယ်ဓားပြများ ဝိုင်းရံထားခြင်းခံရသောကြောင့် ကြယ်တာရာမဟာမိတ်အဖွဲ့အစည်းသို့ အချက်ပြမှုများပေးပို့ခဲ့သော်လည်း ကြယ်တာရာမဟာမိတ်အဖွဲ့အစည်း၏ ငြိမ်းချမ်းရေးထိန်းသိမ်းသူများသည် ဇက်နယ်မြေအနီးတွင် တပ်စွဲထားခြင်းမရှိပေ။ ဤနေရာသို့ အလျင်စလိုသွားရန် အချိန်အနည်းငယ်ယူရမည်ဖြစ်ပြီး ထိုဂြိုဟ်လေး၏ အင်အားချည့်နဲ့သောကာကွယ်ရေးတပ်များသည် မကြာမီတွင် ကြယ်တာရာပင်လယ်ဓားပြများ၏တိုက်ခိုက်မှုကို ခုခံနိုင်စွမ်းရှိမည်မဟုတ်ပေ။
ဤဒေသတွင် သူတို့ကိုကူညီရန် ရောက်လာကြမည့် အင်အားကြီးမျိုးနွယ်များလည်းမရှိပေ။ သူတို့ ဇက်အကြောင်းနှင့်ပတ်သက်၍ စဉ်းတောင်မစဉ်းစားနိုင်ကြပေ။ ထို့ကြောင့် ပိုးပိုလ်စ်လူမျိုးများမှာ မျှော်လင့်ချက်ကို အလိုအလျောက် စွန့်လွှတ်ခဲ့ကြသည်။ သူတို့ထံ ကျူးကျော်ရန် ရောက်လာသူများသည် ဇက်များဖြစ်မနေခြင်းကပင် ကံကောင်းနေပေပြီ။ ဇက်များက သူတို့ဆီ လာရောက်ကယ်တင်လိမ့်မည်ဟု အိပ်မက်မက်ရန် မဖြစ်နိုင်ပေ။
သို့သော် ထိုအချိန်တွင် အနက်ရောင် ယူးလာစစ်သင်္ဘောများသည် တူဆာလေဆိပ်၏ ကောင်းကင်ယံတွင် ပြည့်နှက်နေသည်။ အရေအတွက်အများအပြားဖြင့် ဖိနှိပ်ချုပ်ချယ်လိုသော လေထုကို ဖြစ်ပေါ်စေခဲ့သည်။ ဇက်များသည် ကယ်ဆယ်ရေးလုပ်ဆောင်နေမှန်း သူတို့သိသော်လည်း ဤအလွန်ချဲ့ကားထားသော မြင်ကွင်းကိုကြည့်ပြီး လူသားအရာရှိနှစ်ဦးသည် မနေနိုင်ဘဲ သူတို့၏ပါးစပ်များ တင်းကြပ်စွာလှုပ်ရှားသွားကြသည်။
ထိုရေယာဉ်စုအရ ကြယ်တာရာပင်လယ်ဓားပြများ သေသည်အထိ ကြောက်လန့်ရန် မဆိုထားနှင့်။ ထိုဂြိုဟ်ပေါ်တွင်နေထိုင်သည့်သူများပါ သေသည်အထိ ကြောက်လန့်ကုန်ကြလိမ့်မည်ဖြစ်ကြောင်း ခန့်မှန်းရသည်။ ဇက်များလည်း လာရောက်တိုက်ခိုက်ပြီး သူတို့သည် နှစ်ဖက်လုံး ဝိုင်းရံခံထားရသည်ဟု ထိုဂြိုဟ်ပေါ်ရှိလူများက တွေးကြပေမည်။
ဒီလိုမျိုး ပေါ်ထွက်လာတာက လူတွေကို သေတဲ့အထိ ချောက်ချားစေတယ်ဆိုတာ သူတို့ မသိကြဘူးလား။
