Chapter 29

Chapter 29

ကယ်ဆယ်ရေးဆိုသည်မှာ ပေါ့ပေါ့ဆဆ လုပ်ဆောင်၍မရ။ တစ်ကိုယ်ကောင်းဆန်စွာပြောရလျှင် သူ၏ဇက်များ စစ်ပွဲအတွင်းသေဆုံးဒဏ်ရာရမည်ကို ကုဟွိုက် မလိုလားပေ။ သူတစ်ပါးကို ကူညီပြီး သူ့မျိုးနွယ်စုအား ထိခိုက်လာမည်ဆိုလျှင် ကုဟွိုက် ထိုကိစ္စတွင် ဝင်မပါရန်ကိုသာ ရွေးချယ်မိပေလိမ့်မည်။

“အနီးအနားက ကြယ်အစုအဝေးမှာဖြစ်ပျက်နေတဲ့ မငြိမ်မသက်မှုတွေကို နှိမ်နင်းဖို့က အရမ်းလွယ်ပါတယ်။ အရှင် စိတ်ပူစရာ မလိုဘူး" ဗိုလ်မှူးသည် အလွန်အလေးအနက်ထားနေပုံပေါက်နေသောကုဟွိုက်အားပြောလိုက်သည်။

ကြယ်တာရာပင်လယ်ဓားပြများ ကျူးကျော်ဝင်ရောက်လာမှုကြောင့် အိမ်နီးချင်းကြယ်တာရာအစုအဝေးမှ အကူအညီတောင်းသည့် အချက်ပြတစ်ခုကို ပေးပို့ခဲ့ကြောင်း သိပြီးနောက် အိမ်နီးနားချင်းများကို ကူညီပေးရန် ကုဟွိုက်သည် သူ၏အတွေးအမြင်များကို အလ်ဗ်အား ပြောပြခဲ့သည်။ ရလဒ်ကတော့ ယခုလိုပင်ဖြစ်လာခဲ့၏။

ဗိုလ်မှူးသည် ရန်သူများအကြောင်းကို ကြိုပြီးနားလည်နိုင်ရန် မကြိုးစားခဲ့ပေ။ အဘယ်ကြောင့်ဆိုသော် အဓိကအားဖြင့် တူဆာ၏ထိပ်တန်းအမှုဆောင်အရာရှိများသည် သူတို့ဘေးရှိ နဂါးငွေ့တန်း၌နေထိုင်ကြသော မျိုးနွယ်စုများက အလွန်အားနည်းကြောင်း သိသောကြောင့်ပင်။ ကြယ်တာရာပင်လယ်ဓားပြများသည် ထိုသို့အားနည်းသောမျိုးနွယ်စုကိုပင် ချက်ချင်း မတိုက်ခိုက်နိုင်ခဲ့ခြင်းက သူတို့၏ရေတပ်အင်အားမှာ ဇက်များ၏အာရုံစိုက်မှုကို ရရန်မထိုက်တန်ကြောင်း ပြသနေခြင်းပင်။

တူဆာအမှုဆောင်အရာရှိများသည် ရန်သူကို အထင်သေးခဲ့လျှင်ပင် တူဆာလေဆိပ်တွင် စစ်သင်္ဘောအများအပြားကို စုဝေးထားပေသည်။ ယင်းမှာ ရန်သူများကို နည်းဗျူဟာကျကျ အဓိကထားတိုက်ခိုက်လိုခြင်းကြောင့်မဟုတ်။ ကုဟွိုက်ကကယ်ဆယ်ရေးတပ်များနှင့်အတူ အိမ်နီးချင်းကြယ်အစုအဝေးဆီ လိုက်လာခြင်းကြောင့်ပင်။ ဇက်များသည် ကြယ်တာရာပင်လယ်ဓားပြများအား သူတို့မျက်လုံးထဲတွင် ရှိသည်ဟူ၍ပင် မသတ်မှတ်ထားသော်လည်း ကုဟွိုက်သာ သူတို့နှင့်လိုက်ပါလာခဲ့လျှင် အခြေအနေမှာ တူတော့မည်မဟုတ်။

ပထမဦးစွာ သူတို့သည် သူတို့ဘုရင်၏ လုံခြုံမှုကို သေချာစေရန် လုံလောက်သောအစောင့်အရှောက်များကို လိုအပ်သည်။ ဒုတိယအနေဖြင့် သူတို့သည် သူတို့ဘုရင်အား စိုးရိမ်ပူပန်မှုကင်းဝေးစေရန် ရန်သူများကို အတတ်နိုင်ဆုံး၊ အမြန်ဆုံး နည်းဖြင့်တိုက်ခိုက်ရန် လိုအပ်သည်။ နောက်ဆုံးအချက်မှာ... စစ်တပ်လေးခုမှ ဇက်စစ်သားများအားလုံးတွင် တူညီသော အတွေးများရှိသည်။ ဘုရင်၏ရှေ့တော်၌ သူတို့၏ကိုယ်ရည်ကိုယ်သွေးများကို ပြသလိုကြခြင်း။

ဤကိစ္စအတွက် ကုဟွိုက်၏စိုးရိမ်မှုသည် ဇက်စစ်သားများအား အလွန်ပျော်ရွှင်စေခဲ့သော်လည်း အခြားတစ်ဖက်တွင်မူ သူတို့သည် ကုဟွိုက်အား စိုးရိမ်ပူပန်မှုမဖြစ်စေလိုပေ။ ကုဟွိုက်၏အမြဲပြုံးရွှင်နေသော အမူအရာကိုသာ သူတို့ မြင်ချင်ကြသည်။ ထိုသို့မြင်လိုက်တိုင်း သူတို့သည် ထပ်တူညီသည့်အပြုအမူများကိုပြုလုပ်ရန် ဆန္ဒရှိကြသည်။

ထို့ကြောင့် ကယ်ဆယ်ရေးတပ်ဖွဲ့၏ အရွယ်အစားကို ချဲ့ထွင်ခဲ့ကြသည်။

ကုဟွိုက်တွင် ဤစစ်တပ်အရွယ်အစားနှင့်ပတ်သက်၍ မည်သည့်အကြံဥာဏ်မျှ မရှိသေးပေ။ ကယ်ဆယ်ရေးတပ်ဖွဲ့၏ အရွယ်အစားသည် သူ့ကိုရှာရန်လာခဲ့သည့် ပူးပေါင်းတပ်များထက် များစွာသေးငယ်သည်ဟုသာ သူခံစားခဲ့ရသည်။ ထို့ကြောင့် သူသည် သူ၏ဇက်များအတွက် အနည်းငယ် စိုးရိမ်နေသေးသည်။

"ဒီကြယ်တာရာပင်လယ်ဓားပြတွေက မဟူရာသဲမှုန်ထက် ပိုကြောက်စရာကောင်းတယ်လို့ နာမည်ကြီးလား။ အဲ့ဒီလိုသာဆို ငါတို့ စစ်တပ်အားတွေ ပိုမလိုအပ်ဘူးလား.." ရန်သူများကို အလွယ်တကူ နှိမ်နင်းနိုင်သည်ဟု ဗိုလ်မှူးက ပြောခဲ့သော်လည်း ကုဟွိုက်မှာ သတိထားနေဆဲပင်။

မဟူရာသဲမှုန်များအဖွဲ့သည် တူဆာ၏ ဇက်များကို တစ်ကြိမ် ရန်ဆွပေးရန် ပြေးလာခဲ့ပြီး တူဆာ၏ယူးလာစစ်သင်္ဘောကို အနိုင်ယူရလောက်သည်အထိ ကံမကောင်းခဲ့ပေ။ ဇက်များက ချွင်းချက်မရှိ အနိုင်ရသွားခဲ့သည်။ လက်ရှိတွင် သူတို့၏သုံ့ပန်းအများအပြားမှာ တူဆာ၏အကျဉ်းထောင်တွင် ရှိနေဆဲဖြစ်သည်။ ကုဟွိုက်သည် ဤကြယ်တာရာပင်လယ်ဓားပြအဖွဲ့အကြောင်း ကိုလူသားအရာရှိနှစ်ဦးထံမှ ကြားသိခဲ့ရသည်။ ယခု အိမ်နီးချင်းကြယ်အစုအဝေးတွင် ပေါ်လာသည့် ကြယ်တာရာပင်လယ်ဓားပြအုပ်စုသည် အဆင့် ၆ အဆင့်ရှိ ရာဇ၀တ်ဂိုဏ်းဟု လူသိများကြပြီး မဟူရာသဲမှုန်များက အဆင့် ၁၀ သာ ရှိသေးသည်။

"အရှင်လိုချင်ရင် နောက်ထပ်ရေယာဉ်တစ်စင်းကို ထပ်တပ်ဆင်လို့ရပါတယ်.." ဗိုလ်မှူးက သူ့မျက်မှန်ကို ပင့်တင်လိုက်သည်။

လူသားအရာရှိနှစ်ဦးသည် အလွန်အကြူးပုံကြီးချဲ့ထားသော ဇက်တိုက်ခိုက်ရေးစစ်တပ်ကို မြင်ပြီးပြီဖြစ်သည်။ ထိုစကားဝိုင်းကိုကြားသောအခါ သူ့တို့ပါးစပ်များမှာလှုပ်ရှားသွားကြပြီး သူတို့၏မျက်လုံးများကို ဖုံးအုပ်လိုက်ချင်ကြသည်။ အိမ်နီးချင်းကြယ်အစုအဝေးရှိ ကြယ်တာရာပင်လယ်ဓားပြအုပ်စုအတွက်ပင် သူတို့ အနည်းငယ် သနားမိသည်။ 'ရက်စက်ကြမ်းကြုတ်ခြင်း' အားနှိုင်းယှဉ်ရာ၌ ဇက်များထက် ရက်စက်ကြမ်းကြုတ်သူဟူ၍ စကြဝဠာတစ်ခုလုံးတွင် မည်ကဲ့သို့ရှိနိုင်မည်နည်း။

လူသားအရာရှိနှစ်ဦးသည် စက္ကန့်အနည်းငယ်မျှ တိတ်ဆိတ်သွားခဲ့သည်။ သူတို့ ပါးစပ်ကိုဖွင့်လိုက်သော်လည်း စကားမပြောနိုင်တော့ပေ။ ထို့ကြောင့် ထိုစကားလုံးများကို သူတို့ဗိုက်ထဲ၌သာ တိတ်တဆိတ် ထိန်းသိမ်းထားလိုက်၏။ ကယ်ဆယ်ရေးတပ်ဖွဲ့များ စုစည်းပြီးနောက် ကုဟွိုက်သည် အလ်ဗ်၏ယူးလာစစ်သင်္ဘောပေါ်သို့ တက်သွားခဲ့သည်။ သူသည် အေးစက်စက် စက်ခန်းနံရံကိုကိုင်လိုက်ပြီး “အခု ငါတို့ အိမ်နီးချင်းတွေကို သွားကယ်ကြရအောင်.."

ယူးလာစစ်သင်္ဘောသည် ဆက်တိုက် ခလုတ်နှိပ်သံများ ထွက်ပေါ်လာခဲ့ပြီး သင်္ဘောကိုယ်ထည်မှာ အနည်းငယ် တုန်ခါသွားသည်။ ယူးလာစစ်သင်္ဘောကား အလွန်စိတ်လှုပ်ရှားနေပုံပင်။ စကြဝဠာထဲရှိ မည်သည့်နေရာပင်ဖြစ်စေ ကုဟွိုက်အား သယ်ဆောင်သွားနိုင်သရွေ့ ၎င်းက ပျော်နေမည်ဖြစ်သည်။

ကယ်ဆယ်ရေးတပ်ဖွဲ့မှာ တူဆာမှထွက်ခွာသွားပြီ။ တစ်ချိန်တည်းမှာပင် အိမ်နီးချင်းကြယ်အစုအဝေးတွင် ပိုးပိုလ်စ်မျိုးနွယ်များသည် ကြယ်တာရာပင်လယ်ဓားပြများ၏ တိုက်ခိုက်မှုအောက် ကြိုးစားရုန်းကန်နေရပြီး ပိုမိုထိတ်လန့်ကာ စိတ်ဓာတ်ကျလာကြသည်။ ကြယ်တာရာမဟာမိတ်အဖွဲ့အစည်းက ကယ်ဆယ်ရေးတပ်ဖွဲ့များကို စေလွှတ်ခဲ့သော်လည်း နဂါးငွေ့တန်းပေါင်းများစွာ ဝေးကွာနေဆဲဖြစ်သည်။ အရှိန်အပြည့်နှင့် ခရီးနှင်လာလျှင်ပင် တစ်ရက်ထက် ပိုကြာနိုင်သည်။ သို့သော် ပိုးပိုလ်စ်များသည် နေ့တစ်ဝက်တိုင်တိုင် ခုခံကာကွယ်နိုင်စွမ်းမရှိပေ။

ပိုးပိုလ်စ်မျိုးနွယ်များသည် ရံဖန်ရံခါ အင်အားနည်းသောဂြိုလ်များကို ပန်းတိုင်အဖြစ် သိမ်းပိုက်တတ်သည့် ဂရစ်ဖင်ကြယ်တာရာပင်လယ်ဓားပြများနှင့် ရင်ဆိုင်နေကြရသည်။ ဂြိုလ်ကို သိမ်းပိုက်ပြီးနောက် သူတို့သည် မီးရှို့ကာ သတ်ဖြတ်လုယက်မှုများကို စတင်ပြုလုပ်လာမည်ဖြစ်သည်။ ကြယ်တာရာပင်လယ်ဓားပြများ၏ ဖမ်းဆီးမှုနှုန်းနှင့် ရွှေ့ပြောင်းမှုနှုန်းတို့သည် အချိန်တိုင်း အလွန်လျင်မြန်ပြီး သူတို့၏တိုက်ခိုက်ရေးစွမ်းရည်က ကောင်းမွန်သောကြောင့် ကြယ်တာရာမဟာမိတ်အဖွဲ့အစည်း၏ တပ်ဖွဲ့များသည်ပင် ကြယ်တာရာပင်လယ်ဓားပြများကို ချောမွေ့စွာ ဖမ်းနိုင်ခြင်းမရှိခဲ့ပေ။ ထို့ကြောင့်ပင် သူတို့အားဖမ်းမိလျှင် ရရှိမည့်ဆုကြေးငွေသည်လည်း ဆက်တိုက်မြင့်တက်လာခဲ့သည်။

(t/n: Griffin- ဂရစ်ဖင် ဆိုတာခြင်္သေ့ကိုယ်လုံးတွင် လင်းယုန်ဦးခေါင်းနှင့် အတောင်ပံများရှိသည့် ထူးဆန်းသောသတ္တဝါတစ်မျိုးကို ပြောတာပါ)

အကယ်၍ နောမ်ဂြိုဟ်၏ခံစစ်များ အမှန်တကယ် ပျက်စီးသွားခဲ့လျှင် ကြယ်တာရာပင်လယ်ဓားပြများ၏ ကျူးကျော်ဝင်ရောက်ခြင်းခံခဲ့ရသူများကဲ့သို့ တူညီသောကံကြမ္မာကို ပိုးပိုလ်စ်မျိုးနွယ်များ ရင်ဆိုင်ရပေလိမ့်မည်။ သူတို့၏စစ်သင်္ဘောများ နစ်မြုပ်သွားပြီး ဂြိုဟ်၏ခုခံစစ်သည်လည်း သာမန်မျက်စိဖြင့် မြင်နိုင်သော အရှိန်ဖြင့် ပြိုကျသွားကာ ဂြိုဟ်၏အချက်ပေးသံကို ကြားလိုက်ရသောအခါ နောမ်မြို့သားများ ကြောက်ရွံ့ထိတ်လန့် တုန်လှုပ်သွားကြသည်။

ယခုအချိန်တွင် ဆုတောင်းရုံမှတပါး အခြားဘာလုပ်ရမည်မှန်း မသိကြတော့ပေ။ သို့သော် ဆုတောင်းခြင်းသည်လည်း အသုံးမဝင်။ အကာအကွယ်အလွှာမှာ ကျိုးပျက်သွားပေပြီ။

နောမ်၏ထိပ်တန်းဆုံးဖြတ်ချက် ချမှတ်သူများသည် ဂြိုဟ်အနီးတဝိုက် အကာအကွယ်အလွှာများ ပျောက်ကွယ်သွားသောသောကြောင့် ဝမ်းနည်းပူဆွေးနေကြ၏။ ထို့နောက် ထိုကြယ်တာရာပင်လယ်ဓားပြများက ဂြိုဟ်လေးကို ထပ်မံပစ်ခတ်ကာ သူတို့၏ဂြိုဟ်ပေါ်ရှိ အပြစ်မဲ့ပြည်သူများအား ထိခိုက်ဒဏ်ရာရအောင်လုပ်ပြီး သတ်ဖြတ်ကြပေလိမ့်မည်။

"ဒီနယ်မြေထဲမှာ ကျွန်ုပ်တို့ရဲ့တောင်းဆိုချက်ကို ကူညီလိုသော မျိုးနွယ်စုများရှိပါသလား.."

အစည်းအဝေးခန်းထဲရှိ လူကြီးတစ်ယောက်က သိလိုစွာဖြင့် မေးလိုက်သည်။

အစည်အဝေးအခန်းတွင် မည်သူမျှ မဖြေကြားခဲ့ပေ။ ဂရစ်ဖင်ကြယ်တာရာပင်လယ်ဓားပြများနှင့် ဆန့်ကျင်ပြီး အကူအညီပေးရန် မည်သည့်မျိုးနွယ်စုကမျှ အကြင်နာတရားမရှိသည်မှာ ထင်ရှားလှပေသည်။

ဂြိုလ်၏အကာအကွယ်အလွှာကို ဖြတ်ကျော်လိုက်သည်နှင့် ထိုကြယ်တာရာပင်လယ်ဓားပြများမှာ ပို၍ကိုယ့်ကိုယ်ကိုအထင်ကြီးလာကြသည်။ သူတို့သည် ဂြိုဟ်ပေါ်ရှိလူများ သေသွားမည် သို့မဟုတ် ဒဏ်ရာရသွားမည်ကို ဂရုမစိုက်ကြတော့ပေ။ ဂြိုဟ်ငယ်လေးကို လုယူနိုင်သရွေ့ သူတို့ ပျော်ရွှင်နေမည်ပင်။

“ဆက်ပစ်ကြ..” ကြယ်တာရာပင်လယ်ဓားပြခေါင်းဆောင်က အမိန့်ပေးလိုက်၏။

“လူနေတဲ့နေရာတွေကိုပါ နောက်ထပ် နည်းနည်းပါးပါးလောက် ဆက်ပစ်လိုက် ဒါဆို သူတို့ အစကတည်းက မခုခံခဲ့သင့်ဘူးလို့ ပိုးပိုလ်စ်မျိုးနွယ်တွေ နားလည်သွားလိမ့်မယ်.."

ကင်းထောက်ဂြိုလ်တုများကြောင့် နောမ်၏ဆုံးဖြတ်ချက်ချသူများသည် ပင်လယ်ဓားပြများ၏ ရည်ရွယ်ချက်ကို ချက်ချင်းနီးပါး သိရှိခဲ့ကြသည်။ အလင်းတန်းများ လင်းလက်လာပြီး ကြီးမားပြင်းထန်သည့်အမြောက်များမှ စတင်ပစ်ခတ်ခြင်းမပြုမီ ရန်သူ စစ်သင်္ဘောများက သူတို့၏ဂြိုဟ်အား ချိန်ရွယ်ထားသည်ကို ကြည့်ရှုနေခဲ့ကြသည်။ လောကတွင် ဒီထက်ပိုပြီးစိတ်ပျက်အားငယ်စရာ အခိုက်အတန့် မရှိတော့ပေ။

မျှော်လင့်ချက်များပျက်သုဉ်းသွားသည့် ဤအခိုက်အတန့်တွင် နောမ်ဂြိုဟ်ပေါ်ရှိ ပိုးပိုလ်စ်များမှာ ဤအချိန်တွင် တစ်စုံတစ်ယောက်သာ သူတို့အားကယ်တင်ရန် ရောက်ရှိလာလျှင် ထိုသူသည် သူတို့၏ဘဝအတွက် အကြီးမြတ်ဆုံးကျေးဇူးရှင်ပင်ဖြစ်လိမ့်မည်ဟု တွေးထင်ခဲ့ကြသည်။ သို့သော် ၎င်းက မဖြစ်နိုင်ပေ။ သူတို့ကို မည်သူမှ မကယ်တင်နိုင်တော့။

ကြီးမားပြင်းထန်သောအမြောက်များကို အာကာသအတွင်း ပစ်လွှတ်လိုက်ပြီး ဂြိုဟ်၏မျက်နှာပြင်ပေါ်သို့ ရောက်ရန် စက္ကန့်အနည်းငယ်သာ ကြာပေလိမ့်မည်။ ကင်းထောက်ဂြိုလ်များမှ ပေးပို့လာသော အလင်းတန်းပုံရိပ်များကို ကြည့်ပြီး နောမ်၏အစည်းအဝေးခန်းထဲမှ ထိပ်တန်း ဆုံးဖြတ်ချက်ချသူများသည် သူတို့၏မျက်လုံးများ ပိတ်ထားရန်ကိုသာ ရွေးချယ်ခဲ့ကြသည်။

ထို့နောက် အချိန်များကုန်လွန်သွားပြီး တစ်စက္ကန့်၊ နှစ်စက္ကန့်၊ သုံးစက္ကန့်...

ပြင်းထန်သောအမြောက်များဖြင့် တိုက်ခိုက်ခံရသည့် မြင်ကွင်းမျိုး ဖြစ်ပွားမလာခဲ့ပေ။ နောမ်၏ဆုံးဖြတ်ချက်ချသူများနှင့် ကြယ်တာရာပင်လယ်ဓားပြများ နှစ်ဖက်စလုံးသည် မမျှော်လင့်ထားသောမြင်ကွင်းကြောင့် ထိတ်လန့်သွားပြီး ချက်ချင်း မတုံ့ပြန်နိုင်ခဲ့ကြ။

ထို့နောက် သူတို့ အနီးကပ်ကြည့်ရှုလိုက်ရာတွင် ၎င်းသည် ဂြိုဟ်နှင့်စစ်သင်္ဘောများကြားတွင်ရှိသည့် ကြီးမားသောကာကွယ်ရေးပုံစံတစ်ခုကို တွေ့ရှိလိုက်ကြသည်။ ဒီကာကွယ်ရေးပုံစံကို ဘယ်သူဖန်တီးထားတာလဲ။

ရုန်းရင်းဆန်ခတ်ဖြစ်မှုကြောင့် ဂြိုဟ်လေးက ပျက်စီးယိုယွင်းနေပြီး နှစ်ဖက်စလုံးမှလူများသည် သူတို့၏အဖြေကို တွေ့ရှိသွားကြ၏။ အေးစက်ကာ ကြီးမားသောသင်္ဘော... အနက်ရောင် ယူးလာစစ်သင်္ဘောတစ်စီးပင်။ မဟုတ်...တစ်စီးတည်းပင် မဟုတ်ပေ။

မျက်စိတစ်မှိတ်အတွင်းမှာပင် ကြောက်စရာကောင်းသော ယူးလာစစ်သင်္ဘောအများအပြားသည် နောမ်၏အပြင်ဘက်ပတ်၀န်းကျင်ကို ရုတ်တရက် ပြည့်နှက်သွားအောင်နေရာယူလိုက်သည်။ ဤအေးစက်ပြီးကြောက်မက်ဖွယ်ကောင်းသော ယူးလာစစ်သင်္ဘောအုပ်စုသည် ဖိနှိပ်မှုများနှင့် ပြည့်နှက်နေပြီး နောမ်နှင့် ကြယ်တာရာပင်လယ်ဓားပြများကြားတွင် ပေါ်လာကာ ၎င်းတို့နှစ်ဦးကို တိုက်ရိုက်ခွဲခြားပစ်လိုက်သည်။

ထူထပ်စုဝေးနေသော ယူးလာစစ်သင်္ဘောအုပ်စုနှင့် နှိုင်းယှဉ်ပါလျှင် ဤကြယ်တာရာပင်လယ်ဓားပြအဖွဲ့သည် ရုတ်တရက် အားနည်းကာ အားကိုးရာမဲ့ပုံပေါက်နေသည်။

နှစ်ဖက်စလုံး၏ တိုက်စစ်အင်အားသည် လုံးဝနှိုင်းယှဉ်၍မရပေ။ နှိုင်းယှဉ်ဖော်ပြရလျှင် ကြယ်တာရာပင်လယ်ဓားပြများ၏ သင်္ဘောသည် ရေလွှမ်းမိုးမှုခံနေရသော ပုရွက်ဆိတ်လေးများနှင့် တူလှပေသည်။ တိုက်ခိုက်ရန် မဆိုထားနှင့်၊ ရုန်းကန်ရန် အခွင့်အရေးပင် မရရှိခဲ့ပေ။

ယခုအချိန်တွင် သူတို့သည် အချင်းချင်းရန်လိုနေကြသော်လည်း နောမ်နှင့် ကြယ်တာရာပင်လယ်ဓားပြများ၏ တုံ့ပြန်မှုသည် အတူတူပင်ဖြစ်နေသည်။

“——??!”

နောမ်ကြယ်တာရာမှလူများမှာ လုံးဝ ထိတ်လန့်သွားကြသည်။ သူတို့သည် ကြယ်တာရာပင်လယ်ဓားပြများ၏ တိုက်ခိုက်ခြင်းကို မခံချင်ကြသလို ယူးလာစစ်သင်္ဘောများစွာဖြင့် ဝိုင်းရံခြင်းကိုလည်း မခံလိုကြပေ။ ကြယ်တာရာပင်လယ်ဓားပြများ ကျူးကျော်ဝင်ရောက်လာခြင်းသည်ပင် သူတို့၏ဂြိုဟ်အတွက် လုံလောက်နေပြီမဟုတ်ပါလား။ အခုတော့ ဇက်တွေကလည်း ဒီနေ့မှာပဲ သူတို့ကို ကျူးကျော်ဖို့ ရောက်လာခဲ့ကြတာလား...

ဤယူးလာစစ်သင်္ဘောများကို ရင်ဆိုင်နေရသော ကြယ်တာရာပင်လယ်ဓားပြများသည် နောမ်လူမျိုးများထက် ပို၍ပင် ကြောက်ရွံ့နေကြသည်။ လွန်ခဲ့သည့် စက္ကန့်အနည်းငယ်က မောက်မာမှုမှာ လုံးလုံးနီးပါး ငြိမ်သက်သွားခဲ့သည်။ ဤမျှအကွာအဝေးတွင် ယူးလာစစ်သင်္ဘောများနှင့်ရင်ဆိုင်ရသောအခါ ကြယ်တာရာသူခိုးများသည် သူတို့၏ဦးရေပြားများ ထုံကျင်သွားသည်ကို ပထမဆုံးအကြိမ်အဖြစ် ခံစားလိုက်ရသည်။

လက်ရှိတွင် ကုဟွိုက်သည် ယူးလာစစ်သင်္ဘောအလယ်တွင် ရှိနေသည်။ အလွန်သေးငယ်သော ရေယာဉ်ငယ်ကိုကြည့်ပြီး ကုဟွိုက် မနေနိုင်ဘဲ လက်ကို မြှောက်ကာ သူ့ပါးကိုကုတ်လိုက်သည်။

ဒီ...ရန်သူက ဒီအတိုင်းအတာလေးပဲ ရှိသေးတယ်ပေါ့... ဒါဆို ဇက်တွေက အလွန်အကျွံလုပ်နေတာ မဟုတ်ဘူးလား။ ကုဟွိုက်သည် ရုပ်ပိုင်းဆိုင်ရာ နှိုင်းယှဉ်ကြည့်ပြီး နောက်ဆုံးတွင် ၎င်းကို နားလည်လာခဲ့သည်။

ထို့နောက် ရေသည် ပုရွက်ဆိတ်များအပေါ်ကို လွှမ်းမိုးသွားပေပြီ။ အချိန်အများကြီးမယူခဲ့ရပေ။ ကြယ်တာရာပင်လယ်ဓားပြများ၏ သင်္ဘောများကို ဇက်စစ်သင်္ဘောများက ဝိုင်းရံထားပြီး မကြာမီ နစ်မြုပ်သွားခဲ့သည်။ သူတို့တွင် ရုန်းကန်ရန် သို့မဟုတ် လွတ်မြောက်ရန် အခွင့်အရေးပင် မရှိခဲ့ကြပေ။ ၎င်းကို တိုက်ပွဲလို့ လုံးဝမခေါ်နိုင်ပေ။ ဇက်များက တဖက်သတ် နှိပ်စက်ခြင်းမျှသာဖြစ်သည်။

နောမ်ဂြိုဟ်မှလူများသည် ထိုမြင်ကွင်းကို ဂြိုဟ်တုများမှတစ်ဆင့် ကြည့်နေခဲ့ကြသည်။ ယူးလာစစ်သင်္ဘောများက ကြယ်တာရာပင်လယ်ဓားပြများကို သုတ်သင်ရှင်းလင်းပြီးနောက် ဂြိုဟ်ဆီသို့ ဦးတည်လာနေသည်ကို သူတို့တွေ့ခဲ့ကြသည်။ နောမ်ကြယ်တာရာမှလူများသည် ထိတ်လန့်မှုများနှင့် ပြည့်နှက်သွားကြသည်။ ဒီကိုမလာခဲ့နဲ့...

သူတို့ နီးကပ်လာချိန်တွင် ဇက်များထံမှ အချက်ပြမှုတစ်ခု လက်ခံရရှိခဲ့သည်။ ရင်းနှီးစွာ နှုတ်ခွန်ဆက်သခြင်းပေလား...

「 မင်္ဂလာပါ 」

ဤဖော်ရွေသော နှုတ်ဆက်စကားကြောင့်သာမဟုတ်လျှင် နောမ်ဂြိုဟ်ပေါ်ရှိလူများမှာ အခြားအဓိပ္ပာယ်ဖြင့် ထိတ်လန့်သွားကြပေလိမ့်မည်။ ထိုနောက်မှသာလျှင် နောမ်ဂြိုဟ်ပေါ်တွင်နေထိုင်သော ပိုးပိုလ်စ်များသည် ဇက်များက သူတို့အားကယ်တင်ရန် ရောက်ရှိလာခြင်းဖြစ်ကြောင်း နားလည်သွားကြ၏။

ကြယ်တာရာမဟာမိတ်အဖွဲ့ အစည်း၏တပ်များ မရောက်လာနိုင်သေးသည့်အချိန် အနီးနားရှိ ကြယ်တာရာအစုအဝေးမှ အခြားမျိုးနွယ်စုများက သူတို့အား ကူညီရန်တွန့်ဆုတ်နေချိန်တွင်—

ဇက်များက သူတို့ကိုကယ်တင်ရန် ရောက်လာခဲ့ကြသည်။