Chapter 34
ငြိမ်းချမ်းရေးခေတ်သစ်တွင် ကြယ်တာရာခေတ်၏အနုပညာလောကသည် တစ်နေ့ထက်တစ်နေ့ ပိုမိုကောင်းမွန်လာခဲ့၏။ ဝိညာဉ်ပိုင်းဆိုင်ရာနှင့် ရုပ်ဝတ္ထုလောကကို စိတ်ဝင်စားခြင်းမရှိကြသော အေးတိအေးစက်ဇက်များမှအပ ကြယ်တာရာအတွင်းမှ မျိုးနွယ်စုအများအပြားမှာ စိတ်ပျော်ရာအဖြစ် ရှာဖွေတတ်ကြသည်။
လိုအပ်ချက်ရှိလျှင် တိုးတက်မှုလည်းရှိလိမ့်မည်။ ကုဟွိုက်သည် ကြယ်တာရာအတွင်းမှ ကိစ္စရပ်အလုံးစုံကို အထက်ပါရှုထောင့်မှနားလည်လာခဲ့၏။ ကုဟွိုက်မှာ သူ၏လောကအတွင်းမှအနုပညာဖျော်ဖြေမှုသည် တိုးတက်လာသော ကြယ်တာရာလောကအတွင်း ပို၍အရောင်အသွေးစုံလင်လာမှန်း သဘောပေါက်လာသည်။
တီဗွီရုပ်သံအစီအစဉ်များ၊ ရုပ်ရှင်များ စသဖြင့်..အားလုံးမှာ သူနေထိုင်ခဲ့သောမူလကမ္ဘာနှင့် နှိုင်းယှဉ်ကြည့်ပါကပိုမိုတိုးတက်လာခဲ့ပြီး သုံးဖက်မြင်ပုံရိပ် ပုံစံဖြင့်ကြည့်ရှုနိုင်လာသည်။ သို့ဖြစ်၍ ကြယ်တာရာများအကြား မျိုးနွယ်စုတိုင်းမှ သရုပ်ဆောင်များ၊ အဆိုတော်များနှင့် အိုင်ဒေါများမှာ လစ်လပ်သွားသည်ဟူ၍မရှိ။ ဂိမ်းနှင့် ဆိုရှယ်မီဒီယာများပင် သုံးဖက်မြင်ပုံရိပ်ပေါ်စေသော ပစ္စည်းများဖြင့် ထုတ်လုပ်လာကြသည်၊ ဥပမာ ကြယ်တာရာကွန်ရက်...။ စကားပြော chat တွင် ပုံရိပ်ယောင်ကမ္ဘာအတွင်းသို့ဝင်ရောက်ကာ သုံးဖက်မြင်ပုံရိပ်ကိုဖြတ်သန်းပြီး 'မျက်နှာချင်းဆိုင်' စကားပြော၍ရနိုင်သည့် စနစ်တစ်ခုကိုထည့်ပေါင်းထည့်ထားသည်။ ၎င်းက အင်မတန်အဆင်ပြေချောမွေ့စေ၏။
ထိုအကြောင်းများကြောင့် ဇက်များက သူတို့ဘုရင်၏ဆေးခတ်ခံထားရသည်ဟူသော အတွေးမျိုးပေါ်လာရခြင်းသာ၊ ကြယ်တာရာအတွင်းနေထိုင်ကြသော လူများမှာ စကားဝှက်အရှည်များကိုသာ အသုံးပြုနိုင်ကြသည်။ အခြားသောလူများ၏ ဆေးများက ကြယ်တာရာကွန်ရက်အတွင်း ပွဲဆူစေရန် ကန့်သတ်ထားပြီး ပစ္စည်းများကိုလည်း အနည်းနှင့်အများတင်းကြပ်ထားသည်၊ သို့သော် ဇက်များမှာကား သူတို့ဘုရင်အတွက်ဆေးခတ်ခံခဲ့ကြသည်။ အဆိုပါခံစားချက်အတိုင်းအတာက နှိုင်းယှဉ်၍ပင်မရနိုင်ချေ။
[သဲလန် ကြယ်စု: အော်ဟစ်နေ...လွန်ခဲ့တဲ့ရက်ပိုင်းလောက်က ရလဒ်ကိုအမှားကြီးလို့ငါပြောခဲ့တာမှတ်မိသေးတယ်၊ ပါ့ခ်ျထက်ပိုပြီးချစ်စရာကောင်းတဲ့ သက်ရှိမျိုးမရှိတော့ဘူး၊ ငါ့မှာတော့ အကြိမ်ပေါင်း သန်းနဲ့ချီပြီး မက်ဆေ့ခ်ျတွေကိုပို့ခဲ့ရတာ၊ ငါ့မှာအဲဒီမက်ဆေ့ခ်ျတွေကိုပြန်ဖျက်ဖို့အချိန်ရှိသေးလား]
[ဘူတို (ဆိုချီ ကြယ်စု): မင်းကတော့ပွဲပြီးသွားပြီ..ကယ်တင်လို့မရတော့ဘူး..နောက်တစ်ယောက်...]
[dz310 (ပဲလန် ကြယ်စု): ကယ်တင်လို့မရတော့ဘူး..လက်လျှော့လိုက်တော့]
[နော့ဇ် ကြယ်စု: ယူးလာ စစ်သင်္ဘောတွေ လာနေပါတယ်..အရေးပေါ်အဆင့်]
'ယူးလာ စစ်သင်္ဘော' များ အသိပေးချက်က တန်းစီနေသည်။ ထိုအချိန်မှာပင် အဝေးမှနောမ်ကြယ်ရှိ လူသားနှစ်ယောက်မှာ ကြယ်တာရာကွန်ရက်အား ခိုးကြည့်နေပြီး ဘေးပတ်လည်မှအေးစက်စက်မျက်နှာဖြင့်ဇက်များထံသို့ အကြည့်ချင်းဖလှယ်လိုက်သည်။ သူတို့ခမျာ အနှီဇက်များက ကြယ်တာရာကွန်ရက်ကို အလွန်အမင်း အာရုံမစိုက်ကြပါစေနှင့်ဟုသာ တိတ်တိတ်လေးဆုတောင်းနေရတော့၏။
ရှန်းမုနှင့်ဟန်မာတို့၏ သိရှိထားချက်များအရ ကုဟွိုက်အား ချစ်စရာမကောင်းဟုပြောသူတိုင်း ယူးလာစစ်သင်္ဘောများက ၎င်းတို့အိမ်ရှေ့တံခါးဝသို့ ရောက်လာကြလိမ့်မည်။ အနှီဇက်အုပ်စုက အမှန်တကယ်ရောက်လာကြလိမ့်မည်။
၎င်းတို့သည် ကြယ်များအနောက်သို့မလိုက်သော်ငြား ကမ္ဘာမြေပေါ်တွင်နေထိုင်ခဲ့သော လူသားနှစ်ယောက်တို့မှာ 'ဆေးခတ်' ဆိုသောစာလုံး၏အဓိပ္ပါယ်ကိုဖြင့် နားလည်ကြသည်။ ၎င်းစကားလုံးမှာ ဘုရင်၏ဆန္ဒကိုသူတို့၏ဆန္ဒဟု မှတ်ယူထားသောဇက်များအတွက် အင်မတန်သင့်လျော်သည်။ သူတို့၏မျက်စိအရှေ့မှဇက်များသည် နောက်ဆုံးသော ဆေး အမျိုးအစားဖြစ်နိုင်၏။
လူတစ်ယောက်အဖြစ်ပါဝင်ပတ်သတ်လာသောကြောင့် ကုဟွိုက်မှာ သူ့ကိုယ်သူ မဟာမိတ်ပူးပေါင်းခြင်းရှိ အထူးအခြေအနေစာချုပ်ကို မသိသလို လှည့်စားထားလိုက်ရသည်။ အမှန်အတိုင်းပြောရမည်ဆိုပါက လူသိရှင်ကြား ရှက်ဖွယ်လိလိဖြစ်သော်ငြား ကုဟွိုက်က ကြိုးစားပန်းစားဖြင့် ပုံမှန်အတိုင်းဆက်နေ နေရသည်။
ထိုအတိုင်းဆိုလျှင်ပင် သူဘာများလုပ်နိုင်ပါမည်နည်း။ ကုဟွိုက်သာ အထူးအခြေအနေကို လက်သင့်မခံဘဲနောက်ဆုတ်လိုက်ပါက သူ၏တောင်းဆိုချက်ရှိနေသေးသည်။ သို့သော် ကုဟွိုက်သည် ဇက်များစိတ်ပျက်လက်ပျက်ရှိနေပုံကို ထိုင်မကြည့်နိုင်ပေ။
အဆုံး၌မူ ရလဒ်ပေါ်ထွက်လာခဲ့ပြီ။
ဤနှစ်တွင် ဇက်ဘုရင်က ချစ်စရာအကောင်းဆုံးသက်ရှိများပြိုင်ပွဲတွင်အနိုင်ရခဲ့ပြီး ကြယ်တာရာကွန်ရက်ပေါ်မှ ဖရဲသီးစားကြသူတို့မှာ နင်ကုန်ကြ၏။ ခဏအကြာ၌ ဤနှစ်၏ထုတ်လုပ်သူကုန်သည်ကြီးများခမျာ စိတ်ပူပင်ကြလွန်းသောကြောင့် ခေါင်းမွှေးများပင်ကျွတ်ကုန်ကြသည်။
မတိုင်ခင်က သူတို့အားလုံးငြီးငွေ့နေခဲ့ကြ၏၊ အကြောင်းမှာမူ ကုဟွိုက်က မည်သည့် ဇီဝသက်ရှိအမျိုးအစားမှန်း မသိကြ၍ပင်။ ယခုမှာမူ မသိသည်က ပိုကောင်းမည်ဟုထင်နေကြသည်။ သူတို့မည်သို့များ အရောင်းအဝယ်လုပ်၍ရနိုင်တော့မည်နည်း။
ဇက်များက ၎င်းတို့ဘုရင်၏ ပုံရိပ်ကိုအလွတ်မပေးရသည့်အကြောင်းအရင်းအား ခဏထား။ သူတို့လွှတ်ပေးလိုက်လျှင်လည်း ပိုက်ဆံရမည်မဟုတ်။ ပထမနေရာတွင် ကုန်သည်များကိုအလွတ်မပေးဘဲ ဒုတိယနေရာနှင့်တတိယနေရာကိုသာချန်ထားပေးလျှင်ပင် ဇက်များကသူတို့ကို မကျေမချမ်းဖြစ်ကြဦးမည်။ သူတို့တကယ် စိုးရိမ်ရလွန်း၍ခေါင်းမွှေးများပြောင်ကုန်တော့မည်။
......
ဇက်နှင့် ပိုပိုးလ်စ်တို့ သံတမန်ဆက်ဆံရေးတည်ဆောက်လိုက်ကြသည့်သတင်းက မကြာမီမှာပင် စကြဝဠာတစ်ခုလုံးပျံ့နှံ့သွားခဲ့သည်။ ကြယ်စုအမျိုးမျိုးရှိ နေရာအနှံ့နေထိုင်ကြသောမျိုးနွယ်စုများမှာ ပါးစပ်အဟောင်းသားဖြစ်သွားရသည့်အခြေအနေတွင် ဆက်ရှိနေခဲ့ကြ၏။
အေးစက်ခက်ထန်သော ဇက်တို့၏ပုံရိပ်က သူတို့နှလုံးသားထဲတွင် စွဲထင်နေသေးသည်။ ဇက်တို့က အခြားမျိုးနွယ်စုတစ်ခုနှင့်သံတမန်ဆက်ဆံရေးအား တည်ဆောက်ရန် လိုလိုလားလားရှိသည်မှာ ယုံကြည်ရန်ခက်ခဲလှသည်။ ထပ်လောင်းပြောရပါက ဇက်တို့သည် အခြားမျိုးနွယ်စုများနှင့်သံတမန်ဆက်ဆံရေးတည်ဆောက်ချင်သည်ဆိုပါက ဘာကြောင့်များ ပိုပိုးလ်စ်နှင့်ဖြစ်နေရပါသနည်း။
ပိုပိုးလ်စ်မျိုးနွယ်စုသည် အင်အားနည်းကာ လူဦးရေတိုးတက်နှုန်းကလည်းထိပ်ဆုံးစာရင်းတွင်မရှိ။ ၎င်းတို့က နည်းပညာနှင့်အခြားသော ကဏ္ဍများတွင်လည်း တိုးတက်မှုမရှိချေ။ အထူးသဖြင့် ၎င်းတို့ဂြိုလ်ပေါ်တွင် တင်ပို့ရန် ရှားပါးသယံဇာတပင်မရှိ။
ကြယ်တာရာအတွင်းနေထိုင်သော အင်အားကြီးမားသည့်မျိုးနွယ်စုများသည် ယခုကဲ့သို့အင်အားနည်းလှသော မျိုးနွယ်စုများနှင့်ဆက်ဆံရန်မလိုချေ။ ရေတွက်၍ပင်ရသောလူနည်းစုကသာ ဇက်နှင့်ပိုပိုးလ်စ်တို့အကြား ဆက်ဆံရေးက လေးစားဖွယ်လက္ခဏာဖြစ်ကြောင်းယူဆကြသည်။ ဥပမာအားဖြင့် စာချုပ်တွင် မမျှမတအချက်အချို့ပါနေပြီး ပိုပိုးလ်စ်တို့က ၎င်းတွင်လက်မှတ်ထိုးရန် ဖိအားပေးခံရသည့်အဖြစ်မျိုး။
သို့သော် ထိုသို့သော ယူဆချက်မျိုး ထွက်ပေါ်လာသည့်အခိုက် ဇက်တို့က ဘာမျှမပြောကြသော်လည်း ပိုပိုးလ်စ်တို့မှာ မပျော်ရွှင်ကြချေ။ ၎င်းတို့မှာ စွမ်းအားကြီးသောဇက်နှင့်ပတ်သတ်၍ မဖြစ်စလောက်အကြောက်တရားရှိနေနိုင်လင့်ကစား ၎င်းတို့ကပို၍ပင် ကျေးဇူးတင်မိကြသည်။ပိုပိုးလ်စ်တို့မှာ ဇက်များကဲ့ရဲ့ခံရမည့်အဖြစ်ကို မလိုလားကြချေ။
[ရစ်ချယ် (ပန်ဒိုရာ) : ငါတို့ မမျှမတဖြစ်နေတဲ့ သဘောတူညီချက်မှာလက်မှတ်မထိုးခဲ့ပါဘူး၊ ဇက်တွေက ငါတို့ကိုတကယ် ဖြိုခွဲချင်တယ်ဆိုရင် မမျှတတဲ့စာချုပ်တောင်လိုမှာမဟုတ်ဘူး၊ ငါတို့ဂြိုလ်ကို တိုက်ရိုက်သိမ်းပစ်မှာပေါ့]
[အဲဒို (ပန်ဒိုရာကြယ်စု) : ငါတို့အားလုံး ဇက်တွေအပေါ် ကျေးဇူးတင်နေကြတာ၊ သူတို့ကငါတို့ရဲ့ကျေးဇူးရှင်တွေပဲ]
[ပန်ဒိုရာကြယ်စု: ဇက်တွေက ငါတို့ကိုအရမ်းခင်တယ်!!]
ဇက်များအကြောင်းပြောရာတွင် 'ခင်မင်တယ်' ဆိုသောစကားလုံးက အလွန်တရာမှ မျက်လှည့်ဆန်လွန်းပေသည်။ ဇက်များက ပိုပိုးလ်စ်တို့၏ဂြိုလ်ပေါ်သို့အလည်လာပြီး တူ့ဆာသိုပြန်သည်အထိ ကြယ်တာရာအတွင်းနေထိုင်ကြသူများမှာ မျိုးနွယ်စုနှစ်ခု၏တိုးတက်လာမှုကိုစောင့်ကြည့်နေခဲ့ကြသည်။ ၎င်းက ပုံမှန်ဆက်သွယ်မှုမျိုးဖြစ်ပြီး သဟဇာတဖြစ်လုနီးပါး အိမ်နီးချင်းများပါပေ။
ကြယ်တာရာအတွင်းနေထိုင်ကြသူများသည် ဇက်များက ၎င်းတို့၏အိမ်နီးချင်းဂြိုလ်များအပေါ် မဆန့်ကျင်သည်ကိုသိရှိလာကြ၏။
၎င်းသံတမန်ဆက်သွယ်ရေးအားတည်ဆောက်ပြီးနောက် အားနည်းသောမျိုးနွယ်စုများမှာ ကြယ်တာရာမဟာမိတ်၏အကူအညီဖြင့် ဆက်လက်တောင့်ခံမထားနိုင်လောက်ဟု ထင်ထားကြသော ကြယ်ပင်လယ်ဓားပြများသည် ဇက်တို့အနားမှ ဂြိုလ်နှစ်ခုကိုတိုက်ခိုက်ခဲ့သည်။ ၎င်းကြယ်ပင်လယ်ဓားပြအစုမှာ ဇက်တို့ကစေလွှတ်လိုက်သော ယူးလာစစ်သင်္ဘောများဖြင့် အပြောင်ချေမှုန်းခံလိုက်ရတော့သည်။
ဇက်တို့၏အိမ်နီးနားချင်းဂြိုလ်များအတွက်မူ ၎င်းတို့မှာ 'အန္တရာယ်ရှိမြေငလျင်ကြော' တွင် အတင်းအကြပ်နေခိုင်းခံထားရပြီး အကြောင်းအရင်းမှာ ၎င်းတို့ကအားနည်းသည့်အတွက်ကြောင့် နေထိုင်ရန်အခြားဂြိုလ်များမရှိတော့၍ပင်။ ယခုမူ အဆိုပါ 'မြေငလျင်ဧရိယာ' က ကြယ်တာရာတခွင်၌ လုံခြုံမှုအရှိဆုံးနေရာဖြစ်လာသည်။
ဇက်တို့သည် ၎င်းတို့အား မဆန့်ကျင်သည့်အပြင် ကြယ်ပင်လယ်ဓားပြများ၏ခြိမ်းခြောက်ခံရမှုမှလည်း ကာကွယ်ပေးထားသည်။ ယခုအခါ ဇက်တို့နေထိုင်ရာ ဘေးကပ်လျက်ကြယ်စုများတွင် ကြယ်ပင်လယ်ဓားပြများလုံးဝမရှိတော့ချေ။ ထိုကိစ္စက ကြယ်တာရာအတွင်းနေထိုင်ကြပြီး ဓားပြများကိုကြောက်ရွံ့ကြသူ အားနည်းသောမျိုးနွယ်စုများကို အတော်အတန်မျက်ရည်ကျသွားစေနိုင်လောက်သည်အထိ ပြင်းထန်ခဲ့သည်။
[နော့ဇ်ကြယ်စု: ဇက်တွေက သူတို့အိမ်နီးချင်းတွေကို မတရားခင်တယ်ပေါ့....ငါတို့လည်း အဲဒီလို စိတ်ကြီးဝင်နေတဲ့အိမ်နီးချင်းမျိုးလိုချင်ပါရဲ့..မနာလိုဖြစ်နေပုံ]
[အိုတို ( ရစ်ချယ်ကြယ်စု) : ငါတို့ကြယ်စုက ဓားပြတွေနှိပ်စက်တာအမြဲခံနေခဲ့ရတာ၊ သည်းခံဖို့တကယ်ခက်ခဲတယ်၊ ပန်ဒိုရာကြယ်စုထဲမှာ နေလို့ရတဲ့ တခြားဂြိုလ်တွေမရှိလို့သာမဟုတ်ရင် ငါတို့တမျိုးလုံးပြောင်းသွားလိုက်မှာ၊ အရမ်းဈေးကြီးတဲ့ဂြိုလ်တစ်လုံးဝယ်မယ်၊ ဒါပေမဲ့ ဒီမှာအကြာကြီးနေရတာထက်တော့ပိုကောင်းမှာပေါ့...ဇက်တွေက ပြောင်းလာတဲ့ အိမ်နီးချင်းတွေအပေါ် ဘယ်လိုမြင်မလဲတော့မသိဘူး]
[စေဖန်င် ကြယ်စု: ငါတို့မျိုးနွယ်တွေလည်းပြောင်းလို့ရဖို့မျှော်လင့်ပါတယ်၊ ပိုပိုးလ်စ်၊ ခယ်ဝေ့နဲ့ ဟုမ်း တို့ပြောကြတာတော့ ဇက်တွေကသူတို့ကိုခင်တယ်တဲ့၊ ငါလည်းဇက်တွေကအဲဒီလောက် ကြောက်စရာကောင်းမယ်လို့မထင်ပါဘူး]
အစဉ်လိုက်ဖြစ်ပျက်ခဲ့ပြီးနောက်ပိုင်း ဇက်တို့၏ အတွင်းပိုင်းထဲမှ နူးညံ့သောပုံရိပ်၊ နှလုံးသားအတွင်းမှ တိတ်တဆိတ်ပြောင်းလဲမှုတို့က ကြယ်တာရာအတွင်းနေထိုင်ကြသူတို့၏စိတ်ထဲတွင် စတင်နေရာယူလာသည်။ ဇက်တို့၏အနီးကပ်ဂြိုလ်သုံးလုံးမှာ အခြားမျိုးနွယ်စုများထံမှ လေးစားခံရမည့်နေ့ရက်မျိုး ရောက်လာလိမ့်မည်ဟုမမျှော်လင့်ထားခဲ့ကြပေ။ ထိုမျိုးနွယ်စုမှလူများက သူတို့အပေါ်ကြင်နာစိတ်ရှိကြပြီး ယခုမူ ထိုသူတို့က သူတို့အပေါ် ဝန်တိုစိတ်ပွားနေကြပြီဖြစ်၏။
ကုဟွိုက် အမြန်ပင် ဇက်တို့နှင့်အနီးနားမှဂြိုလ်နှစ်ခုနှင့်ပါ ပိုပိုးလ်စ်တို့၏အစဉ်အလာအတိုင်း သံတမန်ဆက်ဆံရေးကိုတည်ဆောက်တော့သည်။ ဤတစ်ကြိမ်တွင် လက်ဦးမှုရယူသူမှာ ကုဟွိုက်မဟုတ်။ အဆိုပါအိမ်နီးချင်းဂြိုလ်နှစ်ခုသည် ထိတ်လန့်ရှပ်ပျာစွာဖြင့် ဇက်တို့အားသဘောကောင်းပြရရှာပေသည်။
ထို့ကြောင့် သံတမန်ဆက်ဆံရေးအရေအတွက်မှာ တစ်ဖွဲ့မှသုံးဖွဲ့ဖြစ်သွားလေသည်။ လုပ်ငန်းစဉ်တိုးတက်မှုအတွင်း မည်သည့်ပြဿနာမှမရှိခဲ့၍ ကုဟွိုက်က ကျေနပ်စွာဖြင့်ခေါင်းညိတ်လိုက်၏။ ဆက်လုပ်!
ကြယ်တာရာကွန်ရက်တွင်းမှ လူများမှာ ဇက်တို့နေထိုင်ရာဒေသသို့ပြောင်းလာချင်ကြောင်းကို ပြောဆိုနေကြသည်။ ၎င်းတို့က ပြောရုံတင်မကေပ။ ထိပ်ပိုင်း အကြီးအကဲများပင် ထိုကိစ္စအတွက် အစည်းအဝေးထိုင်ကာ ငြင်းခုံနေကြပြီ။
သူတို့ ရလဒ်ကိုမဆွေးနွေးခင် တူဆာသည် သီးသန့်ဆက်သွယ်မှုတစ်ခုကိုရရှိခဲ့၏။ မက်ဆေ့ခ်ျမှာ ချီအယ်တာ အမည်ရသော မှင်စာကုန်သည်တစ်ယောက်ထံမှပင်။ ထိုသူသည် နှစ်စဉ်ကျင်းပသော ကြယ်တာရာအတွင်းချစ်စရာအကောင်းဆုံးသက်ရှိများပြိုင်ပွဲတွင် နာမည်အရဆုံးကုန်သည်ကြီးဖြစ်ကာ ဆက်သွယ်မှုက ဗိုလ်မှူးထံမှတဆင့်ရောက်ရှိလာခြင်းဖြစ်၏။
"ဗိုလ်မှူး၊ ကျွန်တော် တစ်ခုလောက် တောင်းဆိုပါရစေ"
ကျယ်ပြန့်သော စပ်တူလုပ်ငန်းများအား ထိန်းချုပ်ထားသော မှင်စာကုန်သည်ကြီးမှာ အလွန်သတိရှိနေပုံဖြင့် ပေါ်လာခဲ့သည်။ သူ၏ဧည့်သည်များနှင့်ယှဉ်ပြိုင်သူများထံကြည့်လာသည့်အခါ သူ၏မျက်နှာပေါ်တွင်နွေးထွေးသောအပြုံးတစ်ခုရှိနေ၏။
ယခင်က ချီအယ်တာသည် ဇက်မျိုးနွယ်များထံဆက်သွယ်ရန် မဝံ့ရဲခဲ့ပေ။ မကြာသေးခင်က ပြိုင်ပွဲသည် သူဇက်မျိုးနွယ်များထံသို့ဆက်သွယ်ကြည့်ရန် စမ်းသပ်ချက်တစ်ခုဖြစ်လာခဲ့၏။
ဗိုလ်မှူးကသူ့အား လှမ်းကြည့်လာပြီး စိမ်းဖန့်ဖန့်အသားအရေဖြင့်မှင်စာက သူ၏အပြုံးကိုအမြန်တပ်ဆင်လိုက်သည်။
"ကျွန်တော်တို့ ကုမ္ပဏီက နှစ်တိုင်းကျင်းပနေကြဖြစ်တဲ့ ချစ်စရာအကောင်းဆုံးသက်ရှိများပြိုင်ပွဲမှာ ပထမရတဲ့သူတွေကို ကုန်သည်တွေစေလွှတ်လေ့ရှိပါတယ်၊ ဒီနှစ်ရဲ့ ပထမဆုရှင်က ဇက်တို့ရဲ့တော်ဝင်ဘုရင်မင်းမြတ်ပါ၊ အရှင်မင်းကြီးအနေနဲ့ ကျွန်တော်တို့ဘက်က သက်ဆိုင်ရာကုန်သည်တစ်ယောက်ကိုစေလွှတ်ခွင့်ပြုပါလို့ တောင်းဆိုချင်လို့ပါ"
ချီအယ်တာသည် ကုမ္ပဏီ၏ထိပ်တန်းအရာရှိများနှင့် အဆိုပါကိစ္စကိုဆွေးနွေးခဲ့ပြီး ၎င်းတို့က ဇက်တို့အားကြောက်လန့်နေခဲ့သည်။ အကောင်းဆုံးနည်းလမ်းမှာ ဇက်တို့၏သဘောထားအားမေးမြန်းကြည့်ရုံပင်။
"ဥပမာပြောရရင် ထုတ်ကုန်က အင်္ကျီအိတ်ကပ်အရွယ်အစားလောက်ရှိတဲ့ ဒီလိုမျိုးလေးတွေပါ"
ချီအယ်တာသည် လက်ဖဝါးအရွယ်စာလောက်ရှိသော သာမန်ဇက်လေးအား ထုတ်ပြလာ၏။
