Chapter 172
အပြင်ဘက်မှ လူများကလည်း အလွန် ထူးဆန်းနေပြီး အံ့အားသင့်စရာ ကောင်းသည်ဟု ခံစားလိုက်ရသည်။ တော်ဝင်အမိန့်တော် ရောက်လာတယ်... ဘာတွေ ဖြစ်နေတာလဲ...
လူတိုင်းက မည်မျှပင် သံသယဖြစ်နေကြပါစေ ဤအချိန်တွင် လူအားလုံးက ဒူးထောက်ကာ အမိန့်တော်ကို နားထောင်ကြရသည်။
"ဧကရာဇ် ဖုန်းထန်ချန်းယွမ် ဆီကနေ အမိန့်တော် ထုတ်ပြန်လွှာ... ဟယ့်ချောင်စီရင်စုမှ ကျန်းကျန့်အတွက် လူများ၏ ဘဝကို ကယ်တင်ပေးခဲ့သည့် နည်းလမ်းကို တင်ပြခဲ့သည့်အတွက်ကြောင့်..."
တော်ဝင်အမိန့်တော်က များသောအားဖြင့် တစ်ရောင်တည်းသော အမိန့်စာများ ဖြစ်ကြသည်။ အဆုံးတွင် ကျန်းကျန့်က သာမန် ပြည်သူ တစ်ယောက်သာ ဖြစ်သည်။
ဆုငွေကမများလှဘဲ ရွှေတုံးတစ်ရာအပြင် ကဗျည်းတစ်ခုသာ ဖြစ်၍ ကျန်းကျန့်ကို အလွန်ရှက်ရွံ့သွားစေသည်။ ၎င်းမှာ သမားတော်တစ်ယောက်၏ စေတနာထက်သန်မှု ဟူ၏။
ယခင်မင်းဆက်တွင် သူက တည်ငြိမ်ပြီး ကောင်းမွန်သော သဘာဝရှိပါက အနိမ့်ဆုံးအဆင့်ကို ပေးလိမ့်မည်ပင်။ သို့သော်လည်း တချီတွင် တိုင်းပြည်ကို ကြီးကျယ်သော အကူအညီပေးခြင်းမျိုး မရှိဘဲ ထိုဂုဏ်ပုဒ်ကို မရနိုင်ပေ။ ထို့ကြောင့် ကျန်းကျန့်အတွက် ထိုချီးမြှောက်မှုကို ရရှိရန် မဖြစ်နိုင်ပါပေ။
သို့သော်လည်း ထိုအမိန့်တော်က သူ့ကို ဦးစားပေးဆက်ဆံခံရမှုများ ပေးနေဆဲ ဖြစ်သည်။
"ချီးမြှောက်ခံရသူတွေက ဒူးထောက်စရာ မလိုဘူး... ဆိုတော့ကာ..."
တော်ဝင်အမိန့်စာ ကိုင်ထားသည့် သက်လတ်ပိုင်း မိန်းမစိုးကြီးတစ်ယောက်က အနည်းငယ် မသက်မသာ ဖြစ်နေပုံပေါ်ပြီး တော်ဝင်အမိန့်စာကို ပြီးဆုံးသည်အထိ အနိုင်နိုင် ဖတ်လိုက်ရသည်။ အဆုံးတွင် သူ့အသံက တိမ်ဝင်သွားလေတော့သည်။
တချီတွင် စာသင်သားတစ်ယောက်၏ ဂုဏ်သရေ ရှိနေသ၍ အရာရှိများ၏ မျက်နှာကို ဒူးထောက်ချခြင်း မရှိဘဲ ကြည့်နိုင်သည်။ ဤဦးစားပေးဆက်ဆံခံရမှုက အထူးအခြား မဟုတ်သော်လည်း ဤခေတ်တွင် ထိုကဲ့သို့သော အမိန့်စာများလည်း ရှိနေသေးသည်
ကျိုးမောင်ဟယ်၏ မျက်နှာမဲမှောင်သွားလေသည်။
မိန်းမစိုးကြီးက ကျိုးမောင်ဟယ်ကို တွေ့လိုက်ရသောအခါ နှလုံးခုန်သံများက ဒရမ်တစ်လုံးသဖွယ် ဆူပွက်လာခဲ့လေသည်။
ကျိုးမောင်ဟယ်က ဧကရီမယ်တော်ကြီးကိုပင် ဆန့်ကျင်ရဲလေရာ မိန်းမစိုးများကတော့ ဆိုဖွယ်ရာပင် မရှိပေ။ အမှန်ပင် သူက ကျိုးမောင်ဟယ်ကို အဖက်လုပ်၍ပင် စကားမပြောချင်ပေ။
သခင်လေးကျန့်က တွန်းအားပေးနေ၍သာ သူမတတ်သာခဲ့။
"အရှင်ကျိုး... ကျန်းကျန့်က အနာကုသတဲ့ နည်းလမ်းတစ်ခုကို တင်ပြထားပြီး လူတွေ ကယ်တင်ပေးနိုင်ခဲ့တယ်... စစ်သူကြီးတွေအများကြီးက သူ့ကို အလေးထားနေကြပြီ... အရှင်ကျိုးအနေနဲ့..."
"ကျန်းကျန့် ဘယ်လိုလူမျိုးလဲ ဆိုတာ ဒီအရာရှိကပဲ ရှင်းရှင်းလင်းလင်း ဆုံးဖြတ်ပေးမယ်... မိန်းမစိုးကြီး ထပ်ပြောစရာ မလိုတော့ဘူး"
ကျိုးမောင်ဟယ်က ပြောလိုက်သည်။
ထိုအမိန့်တော်က ကျန်းကျန့်ကို အရာရှိများရှေ့ ဒူးမထောက်ရန် ခွင့်ပြုပေးခဲ့သော်လည်း ဤနေရာတွင် ပြီးသွားလေပြီ။ သူက ကျန်းကျန့်ကို ဥပဒေ လိုက်နာစေရန် မလုပ်နိုင်ဟု မယုံကြည်ပေ။
ထိုနည်းလမ်းကို စဥ်းစားမိသောအခါ ကျိုးမောင်ဟယ်က ကျန်းကျန့်ကို မဲမှောင်လျက် ကြည့်လိုက်ပြီး တရားခွင်မစမီ ကျန်းကျန့်ကို သင်ခန်းစာပေးရန် ကြံလိုက်သည်။
"အဘိုးအဘွားနဲ့ မိဘတွေ သက်ရှိထင်ရှားရှိနေစဥ်မှာ ကလေးနဲ့ မြေးတွေက ပိုင်ဆိုင်မှုတွေ ခွဲဖို့ အိမ်ထောင်ခွဲလိုက်မယ်ဆိုရင် ပြစ်ဒဏ်က ကြိမ်နဲ့ အချက်တစ်ရာ အရိုက်ခံရမယ်..." ကျိုးမောင်ဟယ်က ပြောလ်ုက်သည်။
"လာကြစမ်း... လူတွေ... ဒီလူကို ဆွဲခေါ်ပြီး ရိုက်လိုက်ကြ"
ယခင်မင်းဆက်တွင် အိမ်ထောင်စု ခွဲထုတ်ကာ ပိုင်ဆိုင်မှူများ ခွဲဝေကြသည့် သားသမီးနှင့် မြေးများ ရှိခဲ့ဖူးသည်။ ၎င်းက မိသားစုခွဲကာ သီးသန့်ငွေစုဆောင်းခြင်းဖြစ်ပြီး ထောင်သုံးနှစ်ကျခံခဲ့ရသော်လည်း တချီတွင် ကြိမ်ဒဏ်အချက်တစ်ရာဟု ပြောင်းလဲလိုက်သည်။
ထိုပြောင်းလဲမှုကို အချိန်အကြာကြီးကတည်းက ပြောင်းလဲခဲ့ခြင်း ဖြစ်သော်လည်း ဤအကြောင်းအရင်းကြောင့် ရိုက်ခံခဲ့ရသူ အနည်းငယ်သာ ရှိသေးသည်။ ဟယ်ချောင် စီရင်စုမှ လူများမှာ ထိုကဲ့သို့သော ကိစ္စမျိုးကို ယခင်က တစ်ခါမှပင် မကြားခဲ့ဖူးပေ။
ဒါက... တကယ်ကြီး ရှိတာလား... ထိုလူများမှာ သံသယအပြည့် ဖြစ်နေကြသော်လည်း ကျောက်ကျင်းကောကမူ စိုးရိမ်ပူပန်သွားလေသည်။
"အရှင်... ကျန်းကျန့်က ကျွန်တော်ရဲ့မိသားစုဝင် ဖြစ်ပါတယ်... ဒါကြောင့်မို့ သူ့ကို အပြစ်ပေးလို့ မရပါဘူး" ကျောက်ကျင်းကောက ကျယ်လောင်စွာ ပြောလိုက်သည်။
ထိုအခိုက်မှာပင် ရမန်၏ အပြင်ဘက်မှ စည်တော်ကြီး မြည်သွားပြီး တစ်ချိန်တည်းမှာပင် ဟယ်ချွန်းရှန့်၏ အဖေက တစ်နေရာရာမှ ထွက်ပေါ်လာခဲ့လေသည်။
"အရှင်... ကျွန်တော်လည်း တိုင်ကြားချင်ပါတယ်... ကျွန်တော့်ရဲ့ သားကို တရားစွဲချင်ပါတယ်... ငွေဝှက်ထားတဲ့အတွက်ပါ"
ဟယ်အဖေက ရမန် အရာရှိများထံမှ အတားခံလိုက်ရသော်လည်း ကျယ်ကျယ်လောင်လောင် အော်ဟစ်နေဆဲ ဖြစ်သည်။ ထိုမျှသာမကသေး မကြာမီမှာပင် သက်လတ်ပိုင်း သို့မဟုတ် သက်ကြီးပိုင်း လူများစွာက အပြေးရောက်လာပြီး သူ့အနားတွင် အုံဖွဲ့လာကြလေသည်။
"အရှင်... ကျွန်တော်လည်း တိုင်ကြားချင်ပါတယ်"
"ကျွန်တော်လည်း တိုင်ကြားချင်ပါတယ်"
"ကျွန်တော်ရောပဲ"
……
ထိုလူများအားလုံးမှာ ဟယ်ချွန်းရှန့်ကို သူ့အဖေက မိတ်ဆက်ပေးထားခဲ့ခြင်း ဖြစ်ပြီး တစ်ဦးချင်းစီမှာ ဟယ်ချောင်စီရင်စုမှ လောင်းကစားသမားများ ဖြစ်ကြသည်။
ထိုလူများကသာ ပိုက်ဆံများ ဆုံးရှုံးသွားပါက သူတို့၏ ကလေးများ၊ ဇနီးများကို ရောင်းချရမည် ဖြစ်သော်လည်း ယခုတွင် ရမန်ရုံးကို လာပြီး တရားစွဲရုံဖြင့် ပိုက်ဆံရမည် ဖြစ်၍ ထိုသို့ လုပ်နိုင်ရန် သဘာဝကျကျပင် ဆန္ဒရှိနေကြသည်။
သူတို့က သူတို့၏ လက်ထပ်ပြီးသွားသော သမီးများ၊ ကောများကို လုံးဝ ဂရုမစိုက်ကြပေ။ အချို့မှာ သူတို့ထံသို့ ပိုက်ဆံသွားချေးကြချိန်၌ ကန်ထုတ်ခံလိုက်ရသဖြင့် သူတို့၏ သမီးများအပေါ်တွင် အာဃာတတရားများပင် ဖွဲ့နေခဲ့ကြလေသည်။
"အရှင်... ကျွန်တော် ထမင်းမစားရတာ ရက်တွေအကြာကြီး ရှိနေပါပြီ... ကျွန်တော့်မှာ သုံးစရာ ငွေမရှိပါဘူး... ကျွန်တော့်ရဲ့ သမီးက ကျွန်တော့်ကို ငွေမပေးပါဘူး... ဥာဏ်ရှိလှသည့် အရှင်... ကျွန်တော့်အတွက် တရားမျှတမှု ရှာပေးပါ"
"အရှင်... ကျွန်တော့်ရဲ့သားမက်က အရမ်းချမ်းသာပေမယ့် ကျွန်တော့်ရဲ သမီးကို ကျွန်တော့်ဆီ ငွေပေးဖို့ တားမြစ်ထားပါတယ်... အရှင်... ကျွန်တော့်အတွက် တရားမျှတမှု ရှာပေးပါ"
အဖေဟယ်က အော်ပြောလိုက်သည်။ "အရှင်... ကျွန်တော့်ရဲ့ ကောသား လက်ထပ်သွားတဲ့အချိန်မှာ ကျွန်တော့်ကို တစ်ယောက်တည်း ချန်ရစ်ထားခဲ့ပါတယ်... အရှင်... ကျွန်တော် သောကရောက်နေရပါတယ်"
ကျိုးမောင်ဟယ်၏ မျက်နှာ မဲမှောင်သွားလေသည်။ "လာမရှုပ်ကြနဲ့"
ထိုလူများမှာ အသေအချာပင် ဤနေရာသို့ ပြဿနာ လာရှာခြင်း ဖြစ်မည်။ ဘယ်သူကများ အသက်ရှင်နေထိုင်ဖို့ လက်ထပ်သွားတဲ့ သမီးဆီကနေ ပိုက်ဆံတောင်းမှာတဲ့လဲ...
ဒါက သေချာပေါက် ကျန်းကျန့် လုပ်ထားတာပဲ... သူ့ကို ချိတ်ကနေ လွတ်ပေးရမယ်ပေါ့...
ကျိုးမောင်ဟယ်က အနည်းငယ် ဒေါသထွက်နေပြီးသား ဖြစ်သော်လည်း ထိုအချိန်မှာပင် ကျန်းဖျင်က ဟယ့်ရှီရွာသားများနှင့်အတူ အထဲသို့ ဝင်လာခဲ့လေသည်။
လူအများကြီး ဝင်လာကြသည့်အတွက် ဘေးမှ ဝိုင်းကြည့်သူများကို ကြပ်ညပ်သွားစေသည်။
အချို့သော ပွဲကြည့်သမားများမှာ ထွက်သွားရန် တွန့်ဆုတ်နေကြသော်ငြား ဟယ့်ရှီရွာသားများထဲတွင် ကျင်းကျန့်ကိုယ်ရံတော် လုပ်ငန်းမှ ကိုယ်ရံတော်များပါ ရောနှောနေခဲ့လေသည်။
ထိုသူများကို ဘေးသို့ တွန်းထုတ်ရန် အလွန် လွယ်ကူသွားလေသည်။
"အရှင်... ကျွန်တော်မျိုးတို့က ကျန်းကျန့်အတွက် သက်သေလာခံပေးတာပါ... ကျန်းကျန့်က ဘာပြစ်မှုကိုမှ မကျုးလွန်ခဲ့ပါဘူး... သူက သားသမီးဝတ်မကျေပွန်တဲ့ ဘယ်ပြစ်မှုကိုမှ မကျုးလွန်ခဲ့ပါဘူး" ကျန်းဖျင်က ပြောလိုက်ပြီးနောက် အနည်းငယ် အပြစ်ရှိစိတ် ဝင်သွားရသည်။
သို့သော်လည်း မကြာမီပင် အပြစ်ရှိစိတ်များ ပျောက်ကွယ်သွားလေသည်။
ကျန်းကျန့်က အစတွင် အတော်လေး လွန်သွားခဲ့သော်လည်း ကျန်းကျန့် လုပ်ခဲ့သည့်အရာများက ကျန်းချန်ရှန့်နှင့် ကျန်းချောင်ဝမ်တို့ လုပ်ခဲ့သည်ထက် ပိုကောင်းသေးသည်။
ထိုလူနှစ်ယောက်က အတော်လေး မသိတတ်ကြသူများ ဖြစ်သည်။ ကျန်းလူအိုစုံတွဲထံမှ ငွေများ ညှစ်ယူကြသည်သာမက အလုပ်လုပ်ရန် ငြင်းဆိုနေကာ လူအိုနှစ်ယောက်ကို သူတို့အတွက် လယ်အလုပ်များအားလုံး လုပ်ဆောင်ပေးရန် ခိုင်းစေခဲ့သည်။
"ကျေးဇူးပြုပြီး... စဥ်းစားပေးပါ အရှင်" ဟယ့်ရှီရွာမှ အခြားသူများကလည်း ဒူးထောက်ချလိုက်ကြသည်။
ကျန်းကျန့်သာ ကျန်းမိသားစုအပေါ် ခွင့်မလွှတ်နိုင်စရာ လုပ်ရပ်များ လုပ်ခဲ့ပါက သူတို့ကလည်း လာရောက် သက်သေခံပေးမည် မဟုတ်ပေ။ သို့သော်လည်း အမှန်မှာ ကျန်းကျန့်က ကျန်းမိသားစုအပေါ် ဘာကိုမှ မလုပ်ခဲ့ပေ။ မတိုင်ခင်က ကျန်းမိသားစု ကျန်းရှောင်မိန်ကို ရောင်းချရန် ကြံစည်စဥ်ကလည်း သူက ကျန်းရှောင်မိန်ကို ဝယ်ရန် ငွေသုံးခဲ့ပြီး သူ့မိသားစုတွင် နေစေခဲ့သည်။ သူတို့က ကျန်းရှောင်မိန်တစ်ယောက် မကြာမီတွင် လက်ထပ်တော့မည် ဖြစ်ပြီး ကျန်းကျန့်က သူမကို ခန်းဝင်ပစ္စည်းများပင် ထည့်ပေးလ်ုက်ဦးမည့်အကြောင်းကို ကြားသိခဲ့ရသည်။
ယှဥ်ကြည့်လျှင် သူတို့ကသာ ကျန်းမိသားစုအပေါ် မကြင်နာခဲ့ကြသူများ ဖြစ်သည်။
ကျန်းမိသားစုက သူတို့၏ သားအရင်း၊ အစ်ကိုအရင်းကိုပင် တရားစွဲသည်အထိ လွန်လွန်းသွားပြီဖြစ်ရာ... နောင်တွင် သူတို့အပေါ် မည်သည့်လုပ်ရပ်များ လုပ်လာနိုင်မည်ကို မသေချာပေ။
ထိုအချိန်မှာပင် လူများစွာက စီရင်စု တရားရုံးတော်တွင် တစ်ယောက်ပြီး တစ်ယောက် ဒူးထောက်ချလိုက်ကြသည်။ အချို့က တရားလာစွဲခြင်း ဖြစ်၍ တချို့က သက်သေလာခံပေးကြခြင်း ဖြစ်ကာ အလွန်ပင် ပွက်လောရိုက်နေကြပေသည်။
