အတွေးတွေပေါက်ကြားပြီးနောက် ကျင့်ကြံ‌ရေးလောကတစ်ခုလုံး၏အချစ်တော်လေးဖြစ်လာခြင်း

🍉 Intro

ရှန်လဲ့ယန်သည် ကျင့်စဉ်ကျင့်ကြံခြင်းဝတ္ထုတစ်ပုဒ်ထဲသို့ ကူးပြောင်းရောက်ရှိသွားခဲ့ပြီး ဂိုဏ်းထဲမှ တံခါးစောင့်တပည့်ငယ် လေးတစ်ဦး ဖြစ်လာခဲ့ရာ၊ နေ့စဉ်အလုပ်မှာ အေးအေးလူလူအချိန်ဖြုန်းကာ စားသောက်နေရုံသာဖြစ်၍ အလွန်ပင် ဇိမ်ကျလှပေသည်!!!

ရှန်လဲ့ယန်သည် ဆားနယ်ငါးသဖွယ် ဘာမှမလုပ်ဘဲ ပက်လက်လှန်နေသော်လည်း၊ မူလဝတ္ထုထဲတွင် ဂိုဏ်းထဲမှ အခြားသူများမှာမူ အလွန်ပင်သနားစရာကောင်းလောက်အောင် အဆုံးသတ်ဆိုးရွားခဲ့ကြလေသည်။

ဂိုဏ်းချုပ်ကျင့်ကြံသည့် သံယောဇဉ်ကင်းမဲ့သောလမ်းစဉ်သည် အေးစက်ကာ အထီးကျန်ဆန်လှပြီး၊ လူသောင်းပေါင်းများ စွာ၏ကြည်ညိုလေးစားခြင်းကို ခံရလေသည်။

ရှန်လဲ့ယန်သည် ဂိုဏ်းအစည်းအဝေးတွင် တစ်ရေးတစ်မောအိပ်ငိုက်နေခဲ့သည်။

【ကံဆိုးတာက သူဟာ နောက်ပိုင်းမှာ သူလျှိုတွေရဲ့ ချောက်ချတာကို ခံရပြီး မကောင်းဆိုးဝါးလမ်းစဉ်ထဲ ကျဆင်းရူးသွပ်သွား ပြီးတဲ့နောက် ကမ္ဘာမီးလောင်ကျွမ်းပြီး သေဆုံးသွားခဲ့ရတာပဲ】

ဂိုဏ်းချုပ်သည် အခြားသော ပြိုင်ဘက်ကင်း ပါရမီရှင်များကို လျစ်လျူရှုကာ၊ သူ့အား အတွင်းတပည့်အဖြစ် လက်ခံရန်သာ တင်းခံနေခဲ့သည်။

တောင်အောက်သို့ဆင်းကာ လေ့ကျင့်အတွေ့အကြုံယူပြီးနောက်၊ သူသည် ဒဏ်ရာရနေသော ဝံပုလွေမိစ္ဆာငယ်လေးတစ် ကောင်ကို ကောက်ရခဲ့ပြီး ထိုဝံပုလွေမှာ မူလဝတ္ထုထဲတွင် ဝိညာဉ်အရိုးကိုပိုင်ဆိုင်ကာ နှစ်အနည်းငယ်ကြာပြီးနောက် မိစ္ဆာမျိုးနွယ်စုကို ပေါင်းစည်းမည့်သူပင်။

ရှန်လဲ့ယန်သည် သူ့အား ဒဏ်ရာများ ပတ်တီးစည်းပေးပြီးနောက် ဝံပုလွေလေးအား လွှတ်ပေးရန် ပြင်ဆင်လိုက်သည်။

【ကံဆိုးတာက၊ သူက မကြာခင်မှာ မိစ္ဆာဧကရာဇ်ရဲ့ ဖမ်းဆီးတာကို ခံရပြီး ဝိညာဉ်အရိုးတွေ တူးထုတ်ခံရပြီး မျက်စိကန်းသွားမှာ ပြီးရင်မိစ္ဆာအကျဉ်းထောင်ထဲမှာ အကျဉ်းချခံရလိမ့်မယ်】

နှစ်အနည်းငယ်ကြာပြီးနောက်၊ သံသယလွန်ကဲပြီး သွေးအေးရက်စက်သော မိစ္ဆာဧကရာဇ်အသစ်သည် ထီးနန်းတက်လာခဲ့ပြီး သူနှင့် ရုပ်ရည်ချင်းချွတ်စွတ်တူညီကာ မည်မျှလိုချင်တပ်မက်သော်လည်းမရနိုင်ခဲ့သည့် လရောင်ဖြူလေးတစ်ဦးရှိသည်ဟု ကြားသိရလေသည်။

【ဂိုဏ်းတူအစ်ကိုကြီး၊ ခင်ဗျားက ဖြောင့်မတ်တည်ကြည်တဲ့ လူကြီးလူကောင်းတစ်ယောက်ဖြစ်ပေမယ့် ခင်ဗျားရဲ့ ညီနှစ်ယောက်က နေ့တိုင်းလောင်းကစားလုပ်ဖို့ ခိုးထွက်နေကြတယ်၊ သူတို့ကို မြန်မြန်ပညာပေးလိုက်စမ်းပါ】

【ဂိုဏ်းတူဦးလေး၊ ခင်ဗျား အချစ်ရူးကြီးမဖြစ်ပါနဲ့တော့၊ ခင်ဗျားကိုမျှားထားတဲ့ မိန်းမက…… တကယ်တော့ ယောက်ျားတစ်ယောက်ပဲ】

【မင်းသမီးလေး၊ မင်းရဲ့ခမည်းတော်က အပေါ်ယံမှာတော့ မင်းကိုချစ်ချစ်ခင်ခင်ဆက်ဆံပေမယ့် တကယ်တမ်းကျတော့ မင်းကို အဝေးပို့ပြီး တိုင်းပြည်မဟာမိတ်အတွက် လက်ထပ်ပေးချင်နေတာ၊ ဘာ မင်းသမီးလဲ ? ဧကရီသာ လုပ်လိုက်တော့!】

ရှန်လဲ့ယန်သည် ပက်လက်လှန်နေရင်း တစ်ဖက်မှဖရဲသီးစားကာ၊ စားရင်း စားရင်းနှင့်….. ဟင် ?

ဘာ့ကြောင့် ဒီလောက်များပြားလှတဲ့ ထိပ်သီးပုဂ္ဂိုလ်ကြီးတွေက ငါ့ကို ပုံမှန်မဟုတ်တဲ့ အကြည့်နဲ့ကြည့်နေကြရတာလဲ ??