Description 

ဝမ်ချီက အချစ်ရေး လက်တွေ့ရှိုးတစ်ခုတွင် ပါဝင်ရန် ပြင်ဆင်နေ၏။ သူနှင့် ကျပန်းအတွဲဖြစ်လာသူမှာ အနုပညာလောက၏ ထိပ်ဆုံးတွင် ပွဲဦးထွက်ခဲ့သူ "ရုပ်ရှင်ဧကရာဇ်" ကျန်းစီဟန်းပင် ဖြစ်သည်။

သူ၏ မန်နေဂျာက ထိုသတင်းကို ပျော်ပျော်ပါးပါး လာပြောပြလာရာ ဝမ်ချီ၏ တုံ့ပြန်မှုမှာ မျက်နှာသေဖြင့် ဆိုဖာပေါ်သို့ ပစ်လှဲလိုက်ခြင်းပင် ဖြစ်သည်။

"အရမ်း စိတ်လှုပ်ရှားဖို့ကောင်းတာပဲ" 

စက္ကန့်အနည်းငယ်အကြာတွင် သူ၏ဖုန်းမှ စက်ရုပ်အသံလေး ထွက်ပေါ်လာသည်။ 

"တောက်... အလုပ်ပြန်လုပ်ရပြန်ပြီ :)"

စာချုပ်ဖောက်ဖျက်မှု လျော်ကြေးငွေအကြောင်းကို တွေးမိသောအခါ ဝမ်ချီ သူ၏ ကျောပိုးအိတ်လေးကို လွယ်ကာ ရှေ့ဆက်ရမည့် ခရီးကြမ်းကို ရင်ဆိုင်ရန် မျက်ရည်လည်ရွဲဖြင့် အိမ်မှ ထွက်လာခဲ့တော့သည်။

ရှိုးပွဲက တစ်ခြားပြိုင်ပွဲဝင်တွေကရော....

သူ့ထက် နာမည်ကြီးသော အင်တာနက်ဆယ်လီများ၊ အလွန်ချမ်းသာသော CEO များ၊ ပရိသတ်ပေါင်းများစွာရှိသည့် ဂိမ်းစထွင်မာများ ဖြစ်ကြသည်။

နိုင်ရန် လမ်းမရှိပေ။ 

အဲတော့ ဘာဖြစ်ဖြစ်ပေါ့

ဝမ်ချီအေးအေးလူလူ လှဲနေသည် jpg

အခြားသူများက သားနားတောက်ပစွာ ဝတ်ဆင်လာကြချိန်တွင် ဝမ်ချီကမူ တီရှပ်ပွပွ၊ ဘောင်းဘီတိုအပွ၊ ဖိနပ်ပါးနှင့် လည်ပင်းတွင် ရေဗူးလေး ချိတ်ထားရာ အတန်းလိုက် ခရီးထွက်လာသည့် သူငယ်တန်းကျောင်းသားလေးအလား တူနေခဲ့သည်။

အစပိုင်းတွင် ထုတ်လုပ်သူများက ကျန်းစီဟန်းအနေဖြင့် ဝမ်ချီအပေါ် စိတ်ဝင်စားမှု ရှိပါ့မလား၊ ဖန်သားပြင်ပေါ်တွင် သူတို့နှစ်ဦးကြား အချိတ်အဆက်ရှိပါ့မလားဟု စိုးရိမ်ခဲ့ကြသည်။ သို့သော် သူတို့ အတွေးလွန်ခဲ့မှန်း မကြာမီ သိလိုက်ရ၏။

ဂိမ်းကစားသည့် အပိုင်းများတွင် အခြားအတွဲများက တာဝန်များကို အတူတကွ လုပ်ဆောင်ကြသော်လည်း ဟန်းဝမ်CP အတွက်မူ ကျန်းစီဟန်းက ပူပြင်းလှသော နေရောင်အောက်တွင် အလုပ်အားလုံးကို တစ်ဦးတည်း လုပ်ဆောင်ပေးသည်။ ဝမ်ချီကမူ အရိပ်ထဲတွင် အေးအေးဆေးဆေး ထိုင်လျက် ဦးထုပ်လေးဆောင်းကာ ရေဗူးလေးကို ပွေ့ပိုက်ထားပြီး ကျန်းစီဟန်းကို အားပေးရန် လက်ကလေးကို ဖြည်းဖြည်းချင်း တောက်ပေးနေ၏။

ကြည့်ရှုသူအသစ်များ  : "ဝမ်ချီက ဘာလို့ ဘာမှမလုပ်ဘဲ သစ်ပင်အောက်မှာ ထိုင်နေရတာလဲ ကြည့်ရတာ စိတ်ပျက်ဖို့ကောင်းလိုက်တာ သနားစရာ ကျန်းစီဟန်းလေး" 

တိုက်ရိုက်ထုတ်လွှင့်မှု တစ်ခုလုံးကို ကြည့်ဖူးသူများ : "ဝမ်ချီက မလှုပ်တာ မဟုတ်ဘူး ကျန်းစီဟန်းကိုယ်တိုင်က သူ့ကို နေပူထဲ တစ်စက်ကလေးတောင် အထွက်မခံတာ" 

ကျန်းစီဟန်းက ဝမ်ချီကို အလိုလိုက်လွန်းသဖြင့် အခြားသူများမှာ ကြည့်ရင်း မျက်နှာလွှဲရသည့်အထိ ဖြစ်သော်လည်း အမှန်အတိုင်းပြောရလျှင် သူတို့အတွဲကို အားပေးရသည်မှာ အလွန် အရသာရှိလှသည်။

ရှိုးပွဲပြီးဆုံးသွားသောအခါ ပရိသတ်များက ဟန်းဝမ်CP ဤမျှနှင့် ပြီးဆုံးသွားပြီဟု ထင်မှတ်ကာ ငိုကြွေးခဲ့ကြ၏။

တစ်နေ့တွင် အနီရောင်ကော်ဇော အနားတိုက်ရိုက်ထုတ်လွှင့်မှုအတွင်း ကျန်းစီဟန်း၏ မော်တော်ယာဉ် ရောက်ရှိလာသည်။ စောင့်မျှော်နေသော ပရိသတ်များက စိတ်လှုပ်ရှားစွာဖြင့် လှမ်းကြည့်လိုက်ကြ၏။

လူတစ်ယောက် ကားပေါ်မှ ဆင်းလာသော်လည်း အနီရောက်ကော်ဇောပေါ်သို့ တိုက်ရိုက်မသွားဘဲ ကားအတွင်းသို့ ကိုင်းညွတ်ကာ တစ်စုံတစ်ဦးကို အလွန်နူးညံ့စွာ စကားပြောနေသည်။

ထိုမျှ နူးညံ့စွာ ပြောဆိုခြင်းခံရသူမှာ မည်သူဖြစ်မလဲဟု ပရိသတ်များ သိချင်နေကြ၏။

ထို့နောက် ရင်းနှီးနေသော ငါးဆားနယ်လေးတစ်ဦး ကားပေါ်မှ ဖြည်းဖြည်းချင်း ထွက်ပေါ်လာသည်။ထိုသူမှာ အခြားသူမဟုတ်ဘဲ ကျန်းစီဟန်း၏ လက်ကို နာခံမှုရှိရှိ ဆုပ်ကိုင်ထားသော ဝမ်ချီပင် ဖြစ်သည်။

အနီးဆုံးရှိ ပရိသတ်များက သူတို့၏ စကားပြောသံကို ကြားလိုက်ရ၏။ 

"ကျန်းစီဟန်းကျွန်တော် အရမ်းပင်ပန်းနေပြီ..."

"ကဲ... ကဲ... ဆုတက်ယူပြီးတာနဲ့ ကိုယ်တို့ ချက်ချင်း အိမ်ပြန်ကြမယ်နော်"

"ဒါတွေအားလုံး ခင်ဗျားအပြစ်တွေပဲ အဲဒီလို မလုပ်ပါနဲ့လို့ ကျွန်တော် အကြိမ်ကြိမ် ပြောခဲ့သားပဲ အခု ကျွန်တော့် ကျောတွေ အောင့်နေပြီ"

"အင်းပါ... နောက်တစ်ခါ မလုပ်တော့ဘူးနော် မင်းက အရမ်းတော်တာပဲ ကလေးလေးရယ်"

ပရိသတ်များ : "... ငါတို့ မသိသင့်တဲ့ အရာတစ်ခုခု သူတို့ကြားမှာ ရှိနေတာလား"

Translator - Eliya