ငါ့အဖေက ငါ့အမေရဲ့ သေမျိုး ရန်သူပဲ။

စာစဉ်မိတ်ဆက်

ရှောက်မိသားစုနှင့် ချန်မိသားစုသည် မျိုးဆက်ပေါင်းများစွာကြာအောင် မဟာ ရန်သူတော်ကြီးတွေ ဖြစ်ခဲ့ကြသော်လည်း သူတို့ရဲ့ ရန်ငြိုးရန်စတွေကြားမှ အသေးစိတ် အကြောင်းအရာတွေကို သေချာ သိတဲ့ အပြင်လူရယ်လို့ သိပ်မရှိပေ။

ရှောက်မိသားစုမှာ အရေးအကြီးဆုံး စည်းမျဉ်း သုံးခု ရှိသည်ဟု လူသိများသည်။

ရှောက်မိသားစုဟာ ချန်မိသားစုနှင့် ပူးပေါင်းဆောင်ရွက်ခြင်း မပြုရ၊ ထိမ်းမြားလက်ထပ်ခြင်း မပြုရ၊ ဘယ်လို အခမ်းအနားမှာမဆို ချန်မိသားစုဝင်တွေနှင့် မတွေ့ရ။

တစ်နေ့မှာတော့ ပန်းနုရောင် ဂါဝန် ဖောင်းဖောင်းကြွကြွလေးကို ဝတ်ဆင်ကာ ပန်းနုရောင် ဆံညှပ်လေးကို ညှပ်၍ ပန်းနုရောင် ကျောပိုးအိတ်ကို လွယ်ထားပြီး အရုပ်မလေး တစ်ရုပ်ကဲ့သို့ ချစ်စရာကောင်းသော ကလေးမလေး တစ်ယောက်သည် ရှောက်မိသားစု အဆောက်အအုံ ပထမထပ်ရှိ ဧည့်ခန်းထဲသို့ လျှောက်ဝင်လာခဲ့သည်။

ဧည့်ကြိုဝန်ထမ်းက သူမကို အိမ်ကနေ ထွက်ပြေးလာတဲ့ ကလေးမလေး တစ်ယောက်လို့ ထင်သွားသော်လည်း ထိုကလေးမလေးက “ သမီး အစ်မတို့ရဲ့ ရှန်းအုပ်စု စီအီးအို ရှောက်ချန်းကျယ်နဲ့ တွေ့ချင်လို့ပါ။ ” ဟု တည်ငြိမ်လေးနက်စွာ ပြောလာခဲ့သည်။

ဧည့်ကြိုမိန်းကလေးသည် ကလေးမလေးရဲ့ ပန်းနုရောင် ဂါဝန်လေးကို ကြည့်ကာ သူတို့စီအီးအိုရဲ့ နာမည် အပြည့်အစုံကိုပင် ခေါ်ရဲသောကြောင့် ချမ်းသာကြီးမြတ်တဲ့ မိသားစုက လာတဲ့ ကလေး တစ်ယောက်မှန်း ချက်ချင်း သိလိုက်သည်။ ဒီကလေးမလေးက ရာထူးအကြီးပိုင်း ရှောက်အုပ်စု အမှုဆောင် တစ်ယောက်ယောက်ရဲ့ သမီး ဖြစ်နေမလား … ။

ဧည့်ကြိုဝန်ထမ်းက နွေးထွေးစွာ ပြုံးရင်း “ အစ်မကို မင်းမိဘတွေရဲ့ နာမည် ပြောပြပါလား ကလေး။ ” ဟု မေးလိုက်သည်။

ကလေးမလေးက ခေါင်းညိတ်ပြသည်။ “ သမီးအမေနာမည်က ချန်ကျင်းလန်ပါ။ ”

ချန်… ကျင်းလန် … ။

ချန်မိသားစုရဲ့ ဒုတိယသခင်မလေး ချန်ကျင်းလန်လား … ။ ရှောက်အုပ်စုရဲ့ အဆောက်အအုံထဲကို ချန်မိသားစုဝင် တစ်ယောက် ခြေချမည့်နေ့ကို သူမ မြင်ရလိမ့်မည်ဟု တစ်ခါမှ တွေးမကြည့်ဖူး။ တကယ့်ကို ဖြစ်ရပ်ဆန်းပဲ။

“ သမီးအဖေက ဘယ်သူလဲ ဆိုတာကို သိရဖို့အတွက် ဒီကို လာခဲ့တာပါ။ ဒီနေ့ ဒီအင်န်အေ စစ်ဆေးဖို့ ရှောက်ချန်းကျယ်ရဲ့ ဆံပင်ကို ယူရမယ်။ သူ့ဆံပင်ကို ဒီအန်အေ စစ်ပြီးတာနဲ့ သူက သမီးရဲ့ အဖေ ဟုတ် မဟုတ် သိရလိမ့်မယ်။ ”

ကလေးမလေးရဲ့ ပြတ်သားသော စကားလုံးတွေက ဧည့်သည်လက်ခံသည့် စားပွဲကို ကျော်လွန်၍ လူတွေ ပျားပန်းခတ်မျှ သွားလာလှုပ်ရှားနေကြသော ပထမထပ် ဧည့်ခန်း တစ်ဆောင်လုံးအထိ ပျံ့လွင့်သွားသည်။ လူတိုင်း ပါးစပ်အဟောင်းသား ဖြစ်ကာ ထိတ်လန့်သွားကြလေသည်။

ရှောက်ချန်းကျယ်က လွဲလို့ ဓာတ်လှေကားထဲမှ ထွက်လာကြသူတိုင်းဘေးမှာ လူတွေ ဝိုင်းနေသည်။

ပန်းနုရောင် ဂါဝန်လေးကို ဝတ်ထားသော ကလေးမလေးဆီ အကြည့်ရောက်သွားချိန်မှာ မြေခွေး တစ်ကောင်နှင့် တူသော သူ့မျက်လုံးတွေ ကျဉ်းမြောင်းသွား၏။

ချန်လီချီက ရှောက်ချန်းကျယ်ကို မှတ်မိသွားကာ ပါးစပ်ကို လက်ဖြင့် အုပ်၍ “ အိုးအို ” ဟု ရေရွတ်လိုက်၏။

ရှောက်ချန်းကျယ်က သူမရဲ့ အဖေ မဟုတ်လျှင်တောင် ချန်ကျင်းလန်အား ဤအမျိုးသားကို ပိုင်ဆိုင်နိုင်စေရန် သူမ ကူညီပေးရပါမည်။ သူ့မျက်လုံးတွေကို သူမ သဘောကျသည်။

အဲ့မျက်လုံးတွေက သူမရဲ့ မျက်လုံးတွေနဲ့ တစ်ပုံစံတည်းပဲ။

သိပ်ကို လှတယ်။

***